ଦେଵୀମାହାତ୍ମ୍ଯମ୍

॥ ଦେଵୀ ମାହାତ୍ମ୍ଯମ୍ ॥
॥ ଶ୍ରୀ ॥
॥ ଶ୍ରୀଚଣ୍ଡିକାଧ୍ଯାନମ୍ ॥
ଓଁ ବନ୍ଧୂକକୁସୁମାଭାସାଂ ପଞ୍ଚମୁଣ୍ଡାଧିଵାସିନୀମ୍ ।
ସ୍ଫୁରଚ୍ଚନ୍ଦ୍ରକଲାରତ୍ନମୁକୁଟାଂ ମୁଣ୍ଡମାଲିନୀମ୍ ॥
ତ୍ରିନେତ୍ରାଂ ରକ୍ତଵସନାଂ ପୀନୋନ୍ନତଘଟସ୍ତନୀମ୍ ।
ପୁସ୍ତକଂ ଚାକ୍ଷମାଲାଂ ଚ ଵରଂ ଚାଭଯକଂ କ୍ରମାତ୍ ॥
ଦଧତୀଂ ସଂସ୍ମରେନ୍ନିତ୍ଯମୁତ୍ତରାମ୍ନାଯମାନିତାମ୍ ।
ଅଥଵା
ଯା ଚଣ୍ଡୀ ମଧୁକୈଟଭାଦିଦୈତ୍ଯଦଲନୀ ଯା ମାହିଷୋନ୍ମୂଲିନୀ
ଯା ଧୂମ୍ରେକ୍ଷଣଚଣ୍ଡମୁଣ୍ଡମଥନୀ ଯା ରକ୍ତବୀଜାଶନୀ ।
ଶକ୍ତିଃ ଶୁମ୍ଭନିଶୁମ୍ଭଦୈତ୍ଯଦଲନୀ ଯା ସିଦ୍ଧିଦାତ୍ରୀ ପରା
ସା ଦେଵୀ ନଵକୋଟିମୂର୍ତିସହିତା ମାଂ ପାତୁ ଵିଶ୍ଵେଶ୍ଵରୀ ॥

ଓଁ ଅସ୍ଯ ଶ୍ରୀଅର୍ଗଲାସ୍ତୋତ୍ରମନ୍ତ୍ରସ୍ଯ ଵିଷ୍ଣୁରୃଷିଃ,
ଅନୁଷ୍ଟୁପ୍ ଛନ୍ଦଃ, ଶ୍ରୀମହାଲକ୍ଷ୍ମୀର୍ଦେଵତା,
ଶ୍ରୀଜଗଦମ୍ବାପ୍ରୀତଯେ ସପ୍ତଶତିପାଠାଙ୍ଗତ୍ଵେନ ଜପେ ଵିନିଯୋଗଃ ।
ଓଁ ନମଶ୍ଚଣ୍ଡିକାଯୈ ।
ମାର୍କଣ୍ଡେଯ ଉଵାଚ।
ଓଁ ଜଯ ତ୍ଵଂ ଦେଵି ଚାମୁଣ୍ଡେ ଜଯ ଭୂତାପହାରିଣି ।
ଜଯ ସର୍ଵଗତେ ଦେଵି କାଲରାତ୍ରି ନମୋଽସ୍ତୁ ତେ ॥ ୧॥
ଜଯନ୍ତୀ ମଙ୍ଗଲା କାଲୀ ଭଦ୍ରକାଲୀ କପାଲିନୀ ।
ଦୁର୍ଗା ଶିଵା କ୍ଷମା ଧାତ୍ରୀ ସ୍ଵାହା ସ୍ଵଧା ନମୋଽସ୍ତୁ ତେ ॥ ୨॥
ମଧୁକୈଟଭଵିଧ୍ଵଂସି ଵିଧାତୃଵରଦେ ନମଃ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୩॥
ମହିଷାସୁରନିର୍ନାଶି ଭକ୍ତାନାଂ ସୁଖଦେ ନମଃ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୪॥
ଧୂମ୍ରନେତ୍ରଵଧେ ଦେଵି ଧର୍ମକାମାର୍ଥଦାଯିନି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୫॥
ରକ୍ତବୀଜଵଧେ ଦେଵି ଚଣ୍ଡମୁଣ୍ଡଵିନାଶିନି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୬॥
ନିଶୁମ୍ଭଶୁମ୍ଭନିର୍ନାଶି ତ୍ରୈଲୋକ୍ଯଶୁଭଦେ ନମଃ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୭॥
ଵନ୍ଦିତାଙ୍ଘ୍ରିଯୁଗେ ଦେଵି ସର୍ଵସୌଭାଗ୍ଯଦାଯିନି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୮॥
ଅଚିନ୍ତ୍ଯରୂପଚରିତେ ସର୍ଵଶତ୍ରୁଵିନାଶିନି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୯॥
ନତେଭ୍ଯଃ ସର୍ଵଦା ଭକ୍ତ୍ଯା ଚାପର୍ଣେ ଦୁରିତାପହେ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୦॥
ସ୍ତୁଵଦ୍ଭ୍ଯୋ ଭକ୍ତିପୂର୍ଵଂ ତ୍ଵାଂ ଚଣ୍ଡିକେ ଵ୍ଯାଧିନାଶିନି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୧॥
ଚଣ୍ଡିକେ ସତତଂ ଯୁଦ୍ଧେ ଜଯନ୍ତି ପାପନାଶିନି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୨॥
ଦେହି ସୌଭାଗ୍ଯମାରୋଗ୍ଯଂ ଦେହି ଦେଵି ପରଂ ସୁଖମ୍ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୩॥
ଵିଧେହି ଦେଵି କଲ୍ଯାଣଂ ଵିଧେହି ଵିପୁଲାଂ ଶ୍ରିଯମ୍ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୪॥
ଵିଧେହି ଦ୍ଵିଷତାଂ ନାଶଂ ଵିଧେହି ବଲମୁଚ୍ଚକୈଃ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୫॥
ସୁରାସୁରଶିରୋରତ୍ନନିଘୃଷ୍ଟଚରଣେଽମ୍ବିକେ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୬॥
ଵିଦ୍ଯାଵନ୍ତଂ ଯଶସ୍ଵନ୍ତଂ ଲକ୍ଷ୍ମୀଵନ୍ତଞ୍ଚ ମାଂ କୁରୁ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୭॥
ଦେଵି ପ୍ରଚଣ୍ଡଦୋର୍ଦଣ୍ଡଦୈତ୍ଯଦର୍ପନିଷୂଦିନି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୮॥
ପ୍ରଚଣ୍ଡଦୈତ୍ଯଦର୍ପଘ୍ନେ ଚଣ୍ଡିକେ ପ୍ରଣତାଯ ମେ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୧୯॥
ଚତୁର୍ଭୁଜେ ଚତୁର୍ଵକ୍ତ୍ରସଂସ୍ତୁତେ ପରମେଶ୍ଵରି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୨୦॥
କୃଷ୍ଣେନ ସଂସ୍ତୁତେ ଦେଵି ଶଶ୍ଵଦ୍ଭକ୍ତ୍ଯା ସଦାମ୍ବିକେ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୨୧॥
ହିମାଚଲସୁତାନାଥସଂସ୍ତୁତେ ପରମେଶ୍ଵରି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୨୨॥
ଇନ୍ଦ୍ରାଣୀପତିସଦ୍ଭାଵପୂଜିତେ ପରମେଶ୍ଵରି ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୨୩॥
ଦେଵି ଭକ୍ତଜନୋଦ୍ଦାମଦତ୍ତାନନ୍ଦୋଦଯେଽମ୍ବିକେ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୨୪॥
ଭାର୍ଯାଂ ମନୋରମାଂ ଦେହି ମନୋଵୃତ୍ତାନୁସାରିଣୀମ୍ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୨୫॥
ତାରିଣି ଦୁର୍ଗସଂସାରସାଗରସ୍ଯାଚଲୋଦ୍ଭଵେ ।
ରୂପଂ ଦେହି ଜଯଂ ଦେହି ଯଶୋ ଦେହି ଦ୍ଵିଷୋ ଜହି ॥ ୨୬॥
ଇଦଂ ସ୍ତୋତ୍ରଂ ପଠିତ୍ଵା ତୁ ମହାସ୍ତୋତ୍ରଂ ପଠେନ୍ନରଃ ।
ସପ୍ତଶତୀଂ ସମାରାଧ୍ଯ ଵରମାପ୍ନୋତି ଦୁର୍ଲଭମ୍ ॥ ୨୭॥
॥ ଇତି ଶ୍ରୀମାର୍କଣ୍ଡେଯପୁରାଣେ ଅର୍ଗଲାସ୍ତୋତ୍ରଂ ସମାପ୍ତମ୍ ॥

ଓଁ ଅସ୍ଯ ଶ୍ରୀକୀଲକମନ୍ତ୍ରସ୍ଯ ଶିଵଋଷିଃ, ଅନୁଷ୍ଟୁପ୍ ଛନ୍ଦଃ,
ଶ୍ରୀମହାସରସ୍ଵତୀ ଦେଵତା, ଶ୍ରୀଜଗଦମ୍ବାପ୍ରୀତ୍ଯର୍ଥଂ
ସପ୍ତଶତୀପାଠାଙ୍ଗତ୍ଵେନ ଜପେ ଵିନିଯୋଗଃ ।
ଓଁ ନମଶ୍ଚଣ୍ଡିକାଯୈ ।
ମାର୍କଣ୍ଡେଯ ଉଵାଚ।
ଓଁ ଵିଶୁଦ୍ଧଜ୍ଞାନଦେହାଯ ତ୍ରିଵେଦୀଦିଵ୍ଯଚକ୍ଷୁଷେ ।
ଶ୍ରେଯଃପ୍ରାପ୍ତିନିମିତ୍ତାଯ ନମଃ ସୋମାର୍ଧଧାରିଣେ ॥ ୧॥
ସର୍ଵମେତଦ୍ଵିଜାନୀଯାନ୍ମନ୍ତ୍ରାଣାମପି କୀଲକମ୍ ।
ସୋଽପି କ୍ଷେମମଵାପ୍ନୋତି ସତତଂ ଜପ୍ଯତତ୍ପରଃ ॥ ୨॥
ସିଦ୍ଧ୍ଯନ୍ତ୍ଯୁଚ୍ଚାଟନାଦୀନି କର୍ମାଣି ସକଲାନ୍ଯପି ।
ଏତେନ ସ୍ତୁଵତାଂ ଦେଵୀଂ ସ୍ତୋତ୍ରଵୃନ୍ଦେନ ଭକ୍ତିତଃ ॥ ୩॥
ନ ମନ୍ତ୍ରୋ ନୌଷଧଂ ତସ୍ଯ ନ କିଞ୍ଚିଦପି ଵିଦ୍ଯତେ ।
ଵିନା ଜପ୍ଯେନ ସିଦ୍ଧ୍ଯେତ୍ତୁ ସର୍ଵମୁଚ୍ଚାଟନାଦିକମ୍ ॥ ୪॥
ସମଗ୍ରାଣ୍ଯପି ସେତ୍ସ୍ଯନ୍ତି ଲୋକଶଙ୍କାମିମାଂ ହରଃ ।
କୃତ୍ଵା ନିମନ୍ତ୍ରଯାମାସ ସର୍ଵମେଵମିଦଂ ଶୁଭମ୍ ॥ ୫॥
ସ୍ତୋତ୍ରଂ ଵୈ ଚଣ୍ଡିକାଯାସ୍ତୁ ତଚ୍ଚ ଗୁହ୍ଯଂ ଚକାର ସଃ ।
ସମାପ୍ନୋତି ସ ପୁଣ୍ଯେନ ତାଂ ଯଥାଵନ୍ନିମନ୍ତ୍ରଣାମ୍ ॥ ୬॥
ସୋଽପି କ୍ଷେମମଵାପ୍ନୋତି ସର୍ଵମେଵ ନ ସଂଶଯଃ ।
କୃଷ୍ଣାଯାଂ ଵା ଚତୁର୍ଦଶ୍ଯାମଷ୍ଟମ୍ଯାଂ ଵା ସମାହିତଃ ॥ ୭॥
ଦଦାତି ପ୍ରତିଗୃହ୍ଣାତି ନାନ୍ଯଥୈଷା ପ୍ରସୀଦତି ।
ଇତ୍ଥଂ ରୂପେଣ କୀଲେନ ମହାଦେଵେନ କୀଲିତମ୍ ॥ ୮॥
ଯୋ ନିଷ୍କୀଲାଂ ଵିଧାଯୈନାଂ ଚଣ୍ଡୀଂ ଜପତି ନିତ୍ଯଶଃ ।
ସ ସିଦ୍ଧଃ ସ ଗଣଃ ସୋଽଥ ଗନ୍ଧର୍ଵୋ ଜାଯତେ ଧ୍ରୁଵମ୍ ॥ ୯॥
ନ ଚୈଵାପାଟଵଂ ତସ୍ଯ ଭଯଂ କ୍ଵାପି ନ ଜାଯତେ ।
ନାପମୃତ୍ଯୁଵଶଂ ଯାତି ମୃତେ ଚ ମୋକ୍ଷମାପ୍ନୁଯାତ୍ ॥ ୧୦॥
ଜ୍ଞାତ୍ଵା ପ୍ରାରଭ୍ଯ କୁର୍ଵୀତ ହ୍ଯକୁର୍ଵାଣୋ ଵିନଶ୍ଯତି ।
ତତୋ ଜ୍ଞାତ୍ଵୈଵ ସମ୍ପୂର୍ଣମିଦଂ ପ୍ରାରଭ୍ଯତେ ବୁଧୈଃ ॥ ୧୧॥
ସୌଭାଗ୍ଯାଦି ଚ ଯତ୍କିଞ୍ଚିଦ୍ ଦୃଶ୍ଯତେ ଲଲନାଜନେ ।
ତତ୍ସର୍ଵଂ ତତ୍ପ୍ରସାଦେନ ତେନ ଜପ୍ଯମିଦଂ ଶୁଭମ୍ ॥ ୧୨॥
ଶନୈସ୍ତୁ ଜପ୍ଯମାନେଽସ୍ମିନ୍ ସ୍ତୋତ୍ରେ ସମ୍ପତ୍ତିରୁଚ୍ଚକୈଃ ।
ଭଵତ୍ଯେଵ ସମଗ୍ରାପି ତତଃ ପ୍ରାରଭ୍ଯମେଵ ତତ୍ ॥ ୧୩॥
ଐଶ୍ଵର୍ଯଂ ତତ୍ପ୍ରସାଦେନ ସୌଭାଗ୍ଯାରୋଗ୍ଯମେଵ ଚ ।
ଶତ୍ରୁହାନିଃ ପରୋ ମୋକ୍ଷଃ ସ୍ତୂଯତେ ସା ନ କିଂ ଜନୈଃ ॥ ୧୪॥
ଚଣ୍ଡିକାଂ ହୃଦଯେନାପି ଯଃ ସ୍ମରେତ୍ ସତତଂ ନରଃ ।
ହୃଦ୍ଯଂ କାମମଵାପ୍ନୋତି ହୃଦି ଦେଵୀ ସଦା ଵସେତ୍ ॥ ୧୫॥
ଅଗ୍ରତୋଽମୁଂ ମହାଦେଵକୃତଂ କୀଲକଵାରଣମ୍ ।
ନିଷ୍କୀଲଞ୍ଚ ତଥା କୃତ୍ଵା ପଠିତଵ୍ଯଂ ସମାହିତୈଃ ॥ ୧୬॥
॥ ଇତି ଶ୍ରୀଭଗଵତ୍ଯାଃ କୀଲକସ୍ତୋତ୍ରଂ ସମାପ୍ତମ୍ ॥

ଅସ୍ଯ ଶ୍ରୀଚଣ୍ଡୀକଵଚସ୍ଯ ବ୍ରହ୍ମା ଋଷିଃ , ଅନୁଷ୍ଟୁପ୍ ଛନ୍ଦଃ ,
ଚାମୁଣ୍ଡା ଦେଵତା , ଅଙ୍ଗନ୍ଯାସୋକ୍ତମାତରୋ ବୀଜମ୍ ,
ଦିଗ୍ବନ୍ଧଦେଵତାସ୍ତତ୍ଵମ୍ , ଶ୍ରୀଜଗଦମ୍ବାପ୍ରୀତ୍ଯର୍ଥେ ଜପେ ଵିନିଯୋଗଃ ।
ଓଁ ନମଶ୍ଚଣ୍ଡିକାଯୈ ।
ମାର୍କଣ୍ଡେଯ ଉଵାଚ।
ଓଁ ଯଦ୍ଗୁହ୍ଯଂ ପରମଂ ଲୋକେ ସର୍ଵରକ୍ଷାକରଂ ନୃଣାମ୍ ।
ଯନ୍ନ କସ୍ଯଚିଦାଖ୍ଯାତଂ ତନ୍ମେ ବ୍ରୂହି ପିତାମହ ॥ ୧॥
ବ୍ରହ୍ମୋଵାଚ ।
ଅସ୍ତି ଗୁହ୍ଯତମଂ ଵିପ୍ର ସର୍ଵଭୂତୋପକାରକମ୍ ।
ଦେଵ୍ଯାସ୍ତୁ କଵଚଂ ପୁଣ୍ଯଂ ତଚ୍ଛୃଣୁଷ୍ଵ ମହାମୁନେ ॥ ୨॥
ପ୍ରଥମଂ ଶୈଲପୁତ୍ରୀତି ଦ୍ଵିତୀଯଂ ବ୍ରହ୍ମଚାରିଣୀ ।
ତୃତୀଯଂ ଚନ୍ଦ୍ରଘଣ୍ଟେତି କୂଷ୍ମାଣ୍ଡେତି ଚତୁର୍ଥକମ୍ ॥ ୩॥
ପଞ୍ଚମଂ ସ୍କନ୍ଦମାତେତି ଷଷ୍ଠଂ କାତ୍ଯାଯନୀ ତଥା ।
ସପ୍ତମଂ କାଲରାତ୍ରିଶ୍ଚ ମହାଗୌରୀତି ଚାଷ୍ଟମମ୍ ॥ ୪॥
ନଵମଂ ସିଦ୍ଧିଦାତ୍ରୀ ଚ ନଵଦୁର୍ଗାଃ ପ୍ରକୀର୍ତିତାଃ ।
ଉକ୍ତାନ୍ଯେତାନି ନାମାନି ବ୍ରହ୍ମଣୈଵ ମହାତ୍ମନା ॥ ୫॥
ଅଗ୍ନିନା ଦହ୍ଯମାନାସ୍ତୁ ଶତ୍ରୁମଧ୍ଯଗତା ରଣେ ।
ଵିଷମେ ଦୁର୍ଗମେ ଚୈଵ ଭଯାର୍ତାଃ ଶରଣଂ ଗତାଃ ॥ ୬।
ନ ତେଷାଂ ଜାଯତେ କିଞ୍ଚିଦଶୁଭଂ ରଣସଙ୍କଟେ ।
ଆପଦଂ ନ ଚ ପଶ୍ଯନ୍ତି ଶୋକଦୁଃଖଭଯଙ୍କରୀମ୍ ॥ ୭॥
ଯୈସ୍ତୁ ଭକ୍ତ୍ଯା ସ୍ମୃତା ନିତ୍ଯଂ ତେଷାଂ ଵୃଦ୍ଧିଃ ପ୍ରଜାଯତେ ।
ଯେ ତ୍ଵାଂ ସ୍ମରନ୍ତି ଦେଵେଶି ରକ୍ଷସି ତାନ୍ନ ସଂଶଯଃ ॥ ୮॥
ପ୍ରେତସଂସ୍ଥା ତୁ ଚାମୁଣ୍ଡା ଵାରାହୀ ମହିଷାସନା ।
ଐନ୍ଦ୍ରୀ ଗଜସମାରୂଢା ଵୈଷ୍ଣଵୀ ଗରୁଡାସନା ॥ ୯॥
ନାରସିଂହୀ ମହାଵୀର୍ଯା ଶିଵଦୂତୀ ମହାବଲା ।
ମାହେଶ୍ଵରୀ ଵୃଷାରୂଢା କୌମାରୀ ଶିଖିଵାହନା ॥ ୧୦॥
ଲକ୍ଷ୍ମୀଃ ପଦ୍ମାସନା ଦେଵୀ ପଦ୍ମହସ୍ତା ହରିପ୍ରିଯା ।
ଶ୍ଵେତରୂପଧରା ଦେଵୀ ଈଶ୍ଵରୀ ଵୃଷଵାହନା ॥ ୧୧॥
ବ୍ରାହ୍ମୀ ହଂସସମାରୂଢା ସର୍ଵାଭରଣଭୂଷିତା ।
ଇତ୍ଯେତା ମାତରଃ ସର୍ଵାଃ ସର୍ଵଯୋଗସମନ୍ଵିତାଃ ॥ ୧୨॥
ନାନାଭରଣଶୋଭାଢ୍ଯା ନାନାରତ୍ନୋପଶୋଭିତାଃ ।
ଶ୍ରୈଷ୍ଠୈଶ୍ଚ ମୌକ୍ତିକୈଃ ସର୍ଵା ଦିଵ୍ଯହାରପ୍ରଲମ୍ବିଭିଃ ॥ ୧୩॥
ଇନ୍ଦ୍ରନୀଲୈର୍ମହାନୀଲୈଃ ପଦ୍ମରାଗୈଃ ସୁଶୋଭନୈଃ ।
ଦୃଶ୍ଯନ୍ତେ ରଥମାରୂଢା ଦେଵ୍ଯଃ କ୍ରୋଧସମାକୁଲାଃ ॥ ୧୪॥
ଶଙ୍ଖଂ ଚକ୍ରଂ ଗଦାଂ ଶକ୍ତିଂ ହଲଂ ଚ ମୁସଲାଯୁଧମ୍ ।
ଖେଟକଂ ତୋମରଂ ଚୈଵ ପରଶୁଂ ପାଶମେଵ ଚ ॥ ୧୫॥
କୁନ୍ତାଯୁଧଂ ତ୍ରିଶୂଲଂ ଚ ଶାର୍ଙ୍ଗମାଯୁଧମୁତ୍ତମମ୍ ।
ଦୈତ୍ଯାନାଂ ଦେହନାଶାଯ ଭକ୍ତାନାମଭଯାଯ ଚ ॥ ୧୬॥
ଧାରଯନ୍ତ୍ଯାଯୁଧାନୀତ୍ଥଂ ଦେଵାନାଂ ଚ ହିତାଯ ଵୈ ।
ନମସ୍ତେଽସ୍ତୁ ମହାରୌଦ୍ରେ ମହାଘୋରପରାକ୍ରମେ ॥ ୧୭॥
ମହାବଲେ ମହୋତ୍ସାହେ ମହାଭଯଵିନାଶିନି ।
ତ୍ରାହି ମାଂ ଦେଵି ଦୁଷ୍ପ୍ରେକ୍ଷ୍ଯେ ଶତ୍ରୂଣାଂ ଭଯଵର୍ଧିନି ॥ ୧୮॥
ପ୍ରାଚ୍ଯାଂ ରକ୍ଷତୁ ମାମୈନ୍ଦ୍ରୀ ଆଗ୍ନେଯ୍ଯାମଗ୍ନିଦେଵତା ।
ଦକ୍ଷିଣେଽଵତୁ ଵାରାହୀ ନୈରୃତ୍ଯାଂ ଖଡ୍ଗଧାରିଣୀ ॥ ୧୯॥
ପ୍ରତୀଚ୍ଯାଂ ଵାରୁଣୀ ରକ୍ଷେଦ୍ଵାଯଵ୍ଯାଂ ମୃଗଵାହିନୀ ।
ଉଦୀଚ୍ଯାଂ ପାତୁ କୌବେରୀ ଈଶାନ୍ଯାଂ ଶୂଲଧାରିଣୀ ॥ ୨୦॥
ଊର୍ଧ୍ଵଂ ବ୍ରହ୍ମାଣୀ ମେ ରକ୍ଷେଦଧସ୍ତାଦ୍ଵୈଷ୍ଣଵୀ ତଥା ।
ଏଵଂ ଦଶ ଦିଶୋ ରକ୍ଷେଚ୍ଚାମୁଣ୍ଡା ଶଵଵାହନା ॥ ୨୧॥
ଜଯା ମାମଗ୍ରତଃ ପାତୁ ଵିଜଯା ପାତୁ ପୃଷ୍ଠତଃ ।
ଅଜିତା ଵାମପାର୍ଶ୍ଵେ ତୁ ଦକ୍ଷିଣେ ଚାପରାଜିତା ॥ ୨୨॥
ଶିଖାଂ ମେ ଦ୍ଯୋତିନୀ ରକ୍ଷେଦୁମା ମୂର୍ଧ୍ନି ଵ୍ଯଵସ୍ଥିତା ।
ମାଲାଧରୀ ଲଲାଟେ ଚ ଭ୍ରୁଵୌ ରକ୍ଷେଦ୍ଯଶସ୍ଵିନୀ ॥ ୨୩॥
ନେତ୍ରଯୋଶ୍ଚିତ୍ରନେତ୍ରା ଚ ଯମଘଣ୍ଟା ତୁ ପାର୍ଶ୍ଵକେ ।
ତ୍ରିନେତ୍ରା ଚ ତ୍ରିଶୂଲେନ ଭ୍ରୁଵୋର୍ମଧ୍ଯେ ଚ ଚଣ୍ଡିକା ॥ ୨୪॥
ଶଙ୍ଖିନୀ ଚକ୍ଷୁଷୋର୍ମଧ୍ଯେ ଶ୍ରୋତ୍ରଯୋର୍ଦ୍ଵାରଵାସିନୀ ।
କପୋଲୌ କାଲିକା ରକ୍ଷେତ୍ କର୍ଣମୂଲେ ତୁ ଶଙ୍କରୀ ॥ ୨୫॥
ନାସିକାଯାଂ ସୁଗନ୍ଧା ଚ ଉତ୍ତରୋଷ୍ଠେ ଚ ଚର୍ଚିକା ।
ଅଧରେ ଚାମୃତାବାଲା ଜିହ୍ଵାଯାଂ ଚ ସରସ୍ଵତୀ ॥ ୨୬॥
ଦନ୍ତାନ୍ ରକ୍ଷତୁ କୌମାରୀ କଣ୍ଠଦେଶେ ତୁ ଚଣ୍ଡିକା ।
ଘଣ୍ଟିକାଂ ଚିତ୍ରଘଣ୍ଟା ଚ ମହାମାଯା ଚ ତାଲୁକେ ॥ ୨୭॥
କାମାକ୍ଷୀ ଚିବୁକଂ ରକ୍ଷେଦ୍ଵାଚଂ ମେ ସର୍ଵମଙ୍ଗଲା ।
ଗ୍ରୀଵାଯାଂ ଭଦ୍ରକାଲୀ ଚ ପୃଷ୍ଠଵଂଶେ ଧନୁର୍ଧରୀ ॥ ୨୮॥
ନୀଲଗ୍ରୀଵା ବହିଃ କଣ୍ଠେ ନଲିକାଂ ନଲକୂବରୀ ।
ସ୍କନ୍ଧଯୋଃ ଖଡ୍ଗିନୀ ରକ୍ଷେଦ୍ ବାହୂ ମେ ଵଜ୍ରଧାରିଣୀ ॥ ୨୯॥
ହସ୍ତଯୋର୍ଦଣ୍ଡିନୀ ରକ୍ଷେଦମ୍ବିକା ଚାଙ୍ଗୁଲୀଷୁ ଚ ।
ନଖାଞ୍ଛୂଲେଶ୍ଵରୀ ରକ୍ଷେତ୍ କୁକ୍ଷୌ ରକ୍ଷେନ୍ନରେଶ୍ଵରୀ ॥ ୩୦॥
ସ୍ତନୌ ରକ୍ଷେନ୍ମହାଦେଵୀ ମନଃଶୋକଵିନାଶିନୀ ।
ହୃଦଯେ ଲଲିତା ଦେଵୀ ଉଦରେ ଶୂଲଧାରିଣୀ ॥ ୩୧॥
ନାଭୌ ଚ କାମିନୀ ରକ୍ଷେଦ୍ ଗୁହ୍ଯଂ ଗୁହ୍ଯେଶ୍ଵରୀ ତଥା ।
ମେଢ୍ରଂ ରକ୍ଷତୁ ଦୁର୍ଗନ୍ଧା ପାଯୁଂ ମେ ଗୁହ୍ଯଵାହିନୀ ॥ ୩୨॥
କଟ୍ଯାଂ ଭଗଵତୀ ରକ୍ଷେଦୂରୂ ମେ ମେଘଵାହନା ।
ଜଙ୍ଘେ ମହାବଲା ରକ୍ଷେତ୍ ଜାନୂ ମାଧଵନାଯିକା ॥ ୩୩॥
ଗୁଲ୍ଫଯୋର୍ନାରସିଂହୀ ଚ ପାଦପୃଷ୍ଠେ ତୁ କୌଶିକୀ ।
ପାଦାଙ୍ଗୁଲୀଃ ଶ୍ରୀଧରୀ ଚ ତଲଂ ପାତାଲଵାସିନୀ ॥ ୩୪॥
ନଖାନ୍ ଦଂଷ୍ଟ୍ରକରାଲୀ ଚ କେଶାଂଶ୍ଚୈଵୋର୍ଧ୍ଵକେଶିନୀ ।
ରୋମକୂପେଷୁ କୌମାରୀ ତ୍ଵଚଂ ଯୋଗୀଶ୍ଵରୀ ତଥା ॥ ୩୫॥
ରକ୍ତମଜ୍ଜାଵସାମାଂସାନ୍ଯସ୍ଥିମେଦାଂସି ପାର୍ଵତୀ ।
ଅନ୍ତ୍ରାଣି କାଲରାତ୍ରିଶ୍ଚ ପିତ୍ତଂ ଚ ମୁକୁଟେଶ୍ଵରୀ ॥ ୩୬॥
ପଦ୍ମାଵତୀ ପଦ୍ମକୋଶେ କଫେ ଚୂଡାମଣିସ୍ତଥା ।
ଜ୍ଵାଲାମୁଖୀ ନଖଜ୍ଵାଲାମଭେଦ୍ଯା ସର୍ଵସନ୍ଧିଷୁ ॥ ୩୭॥
ଶୁକ୍ରଂ ବ୍ରହ୍ମାଣୀ ମେ ରକ୍ଷେଚ୍ଛାଯାଂ ଛତ୍ରେଶ୍ଵରୀ ତଥା ।
ଅହଙ୍କାରଂ ମନୋ ବୁଦ୍ଧିଂ ରକ୍ଷେନ୍ମେ ଧର୍ମଧାରିଣୀ ॥ ୩୮॥
ପ୍ରାଣାପାନୌ ତଥା ଵ୍ଯାନମୁଦାନଂ ଚ ସମାନକମ୍ ।
ଵଜ୍ରହସ୍ତା ଚ ମେ ରକ୍ଷେତ୍ ପ୍ରାଣାନ୍ କଲ୍ଯାଣଶୋଭନା ॥ ୩୯॥
ରସେ ରୂପେ ଚ ଗନ୍ଧେ ଚ ଶବ୍ଦେ ସ୍ପର୍ଶେ ଚ ଯୋଗିନୀ ।
ସତ୍ତ୍ଵଂ ରଜସ୍ତମଶ୍ଚୈଵ ରକ୍ଷେନ୍ନାରାଯଣୀ ସଦା ॥ ୪୦॥
ଆଯୂ ରକ୍ଷତୁ ଵାରାହୀ ଧର୍ମଂ ରକ୍ଷତୁ ପାର୍ଵତୀ ।
ଯଶଃ କୀର୍ତିଂ ଚ ଲକ୍ଷ୍ମୀଂ ଚ ସଦା ରକ୍ଷତୁ ଵୈଷ୍ଣଵୀ ॥ ୪୧॥
ଗୋତ୍ରମିନ୍ଦ୍ରାଣୀ ମେ ରକ୍ଷେତ୍ ପଶୂନ୍ ରକ୍ଷେଚ୍ଚ ଚଣ୍ଡିକା ।
ପୁତ୍ରାନ୍ ରକ୍ଷେନ୍ମହାଲକ୍ଷ୍ମୀର୍ଭାର୍ଯାଂ ରକ୍ଷତୁ ଭୈରଵୀ ॥ ୪୨॥
ଧନେଶ୍ଵରୀ ଧନଂ ରକ୍ଷେତ୍ କୌମାରୀ କନ୍ଯକାଂ ତଥା ।
ପନ୍ଥାନଂ ସୁପଥା ରକ୍ଷେନ୍ମାର୍ଗଂ କ୍ଷେମଙ୍କରୀ ତଥା ॥ ୪୩॥
ରାଜଦ୍ଵାରେ ମହାଲକ୍ଷ୍ମୀର୍ଵିଜଯା ସତତ ସ୍ଥିତା ।
ରକ୍ଷାହୀନଂ ତୁ ଯତ୍ ସ୍ଥାନଂ ଵର୍ଜିତଂ କଵଚେନ ତୁ ॥ ୪୪॥
ତତ୍ସର୍ଵଂ ରକ୍ଷ ମେ ଦେଵି ଜଯନ୍ତୀ ପାପନାଶିନୀ ।
ସର୍ଵରକ୍ଷାକରଂ ପୁଣ୍ଯଂ କଵଚଂ ସର୍ଵଦା ଜପେତ୍ ॥ ୪୫॥
ଇଦଂ ରହସ୍ଯଂ ଵିପ୍ରର୍ଷେ ଭକ୍ତ୍ଯା ତଵ ମଯୋଦିତମ୍ ।
ପାଦମେକଂ ନ ଗଚ୍ଛେତ୍ ତୁ ଯଦୀଚ୍ଛେଚ୍ଛୁଭମାତ୍ମନଃ ॥ ୪୬॥
କଵଚେନାଵୃତୋ ନିତ୍ଯଂ ଯତ୍ର ଯତ୍ରୈଵ ଗଚ୍ଛତି ।
ତତ୍ର ତତ୍ରାର୍ଥଲାଭଶ୍ଵ ଵିଜଯଃ ସାର୍ଵକାଲିକଃ ॥ ୪୭॥
ଯଂ ଯଂ ଚିନ୍ତଯତେ କାମଂ ତଂ ତଂ ପ୍ରାପ୍ନୋତି ନିଶ୍ଚିତମ୍ ।
ପରମୈଶ୍ଵର୍ଯମତୁଲଂ ପ୍ରାପ୍ସ୍ଯତେ ଭୂତଲେ ପୁମାନ୍ ॥ ୪୮॥
ନିର୍ଭଯୋ ଜାଯତେ ମର୍ତ୍ଯଃ ସଙ୍ଗ୍ରାମେଷ୍ଵପରାଜିତଃ ।
ତ୍ରୈଲୋକ୍ଯେ ତୁ ଭଵେତ୍ପୂଜ୍ଯଃ କଵଚେନାଵୃତଃ ପୁମାନ୍ ॥ ୪୯॥
ଇଦଂ ତୁ ଦେଵ୍ଯାଃ କଵଚଂ ଦେଵାନାମପି ଦୁର୍ଲଭମ୍ ।
ଯଃ ପଠେତ୍ପ୍ରଯତୋ ନିତ୍ଯଂ ତ୍ରିସନ୍ଧ୍ଯଂ ଶ୍ରଦ୍ଧଯାନ୍ଵିତଃ ॥ ୫୦॥
ଦୈଵୀକଲା ଭଵେତ୍ତସ୍ଯ ତ୍ରୈଲୋକ୍ଯେ ଚାପରାଜିତଃ ।
ଜୀଵେଦ୍ଵର୍ଷଶତଂ ସାଗ୍ରମପମୃତ୍ଯୁଵିଵର୍ଜିତଃ ॥ ୫୧॥
ନଶ୍ଯନ୍ତି ଵ୍ଯାଧଯଃ ସର୍ଵେ ଲୂତାଵିସ୍ଫୋଟକାଦଯଃ ।
ସ୍ଥାଵରଂ ଜଙ୍ଗମଂ ଚୈଵ କୃତ୍ରିମଂ ଚୈଵ ଯଦ୍ଵିଷମ୍ ॥ ୫୨॥
ଅଭିଚାରାଣି ସର୍ଵାଣି ମନ୍ତ୍ରଯନ୍ତ୍ରାଣି ଭୂତଲେ ।
ଭୂଚରାଃ ଖେଚରାଶ୍ଚୈଵ କୁଲଜାଶ୍ଚୌପଦେଶିକାଃ ॥ ୫୩॥
ସହଜା କୁଲଜା ମାଲା ଡାକିନୀ ଶାକିନୀ ତଥା ।
ଅନ୍ତରିକ୍ଷଚରା ଘୋରା ଡାକିନ୍ଯଶ୍ଚ ମହାରଵାଃ ॥ ୫୪॥
ଗ୍ରହଭୂତପିଶାଚାଶ୍ଚ ଯକ୍ଷଗନ୍ଧର୍ଵରାକ୍ଷସାଃ ।
ବ୍ରହ୍ମରାକ୍ଷସଵେତାଲାଃ କୂଷ୍ମାଣ୍ଡା ଭୈରଵାଦଯଃ ॥ ୫୫॥
ନଶ୍ଯନ୍ତି ଦର୍ଶନାତ୍ତସ୍ଯ କଵଚେନାଵୃତୋ ହି ଯଃ ।
ମାନୋନ୍ନତିର୍ଭଵେଦ୍ରାଜ୍ଞସ୍ତେଜୋଵୃଦ୍ଧିଃ ପରା ଭଵେତ୍ ॥ ୫୬॥
ଯଶୋଵୃଦ୍ଧିର୍ଭଵେତ୍ ପୁଂସାଂ କୀର୍ତିଵୃଦ୍ଧିଶ୍ଚ ଜାଯତେ ।
ତସ୍ମାତ୍ ଜପେତ୍ ସଦା ଭକ୍ତଃ କଵଚଂ କାମଦଂ ମୁନେ ॥ ୫୭॥
ଜପେତ୍ ସପ୍ତଶତୀଂ ଚଣ୍ଡୀଂ କୃତ୍ଵା ତୁ କଵଚଂ ପୁରା ।
ନିର୍ଵିଘ୍ନେନ ଭଵେତ୍ ସିଦ୍ଧିଶ୍ଚଣ୍ଡୀଜପସମୁଦ୍ଭଵା ॥ ୫୮॥
ଯାଵଦ୍ଭୂମଣ୍ଡଲଂ ଧତ୍ତେ ସଶୈଲଵନକାନନମ୍ ।
ତାଵତ୍ତିଷ୍ଠତି ମେଦିନ୍ଯାଂ ସନ୍ତତିଃ ପୁତ୍ରପୌତ୍ରିକୀ ॥ ୫୯॥
ଦେହାନ୍ତେ ପରମଂ ସ୍ଥାନଂ ସୁରୈରପି ସୁଦୁର୍ଲଭମ୍ ।
ପ୍ରାପ୍ନୋତି ପୁରୁଷୋ ନିତ୍ଯଂ ମହାମାଯାପ୍ରସାଦତଃ ॥ ୬୦॥
ତତ୍ର ଗଚ୍ଛତି ଗତ୍ଵାସୌ ପୁନଶ୍ଚାଗମନଂ ନହି ।
ଲଭତେ ପରମଂ ସ୍ଥାନଂ ଶିଵେନ ସମତାଂ ଵ୍ରଜେତ୍ ॥ ୬୧॥
॥ ଇତି ଶ୍ରୀମାର୍କଣ୍ଡେଯପୁରାଣେ ହରିହରବ୍ରହ୍ମଵିରଚିତଂ
ଦେଵୀକଵଚଂ ସମାପ୍ତମ୍ ॥

%
॥ ଶ୍ରୀଦୁର୍ଗାଯୈ ନମଃ ॥
॥ ଅଥ ଶ୍ରୀଦୁର୍ଗାସପ୍ତଶତୀ ॥

ଵିନିଯୋଗଃ
ଅସ୍ଯ ଶ୍ରୀ ପ୍ରଥମଚରିତ୍ରସ୍ଯ । ବ୍ରହ୍ମା ଋଷିଃ ।
ମହାକାଲୀ ଦେଵତା । ଗାଯତ୍ରୀ ଛନ୍ଦଃ । ନନ୍ଦା ଶକ୍ତିଃ ।
ରକ୍ତଦନ୍ତିକା ବୀଜମ୍ । ଅଗ୍ନିସ୍ତତ୍ତ୍ଵମ୍ ।
ଋଗ୍ଵେଦଃ ସ୍ଵରୂପମ୍ । ଶ୍ରୀମହାକାଲୀପ୍ରୀତ୍ଯର୍ଥେ
ପ୍ରଥମଚରିତ୍ରଜପେ ଵିନିଯୋଗଃ ।
। ଧ୍ଯାନମ୍ ।
ଓଁ ଖଡ୍ଗଂ ଚକ୍ରଗଦେଷୁଚାପପରିଘାଞ୍ଛୂଲଂ ଭୁଶୁଣ୍ଡୀଂ ଶିରଃ
ଶଙ୍ଖଂ ସନ୍ଦଧତୀଂ କରୈସ୍ତ୍ରିନଯନାଂ ସର୍ଵାଙ୍ଗଭୂଷାଵୃତାମ୍ ।
ନୀଲାଶ୍ମଦ୍ଯୁତିମାସ୍ଯପାଦଦଶକାଂ ସେଵେ ମହାକାଲିକାଂ
ଯାମସ୍ତୌତ୍ସ୍ଵପିତେ ହରୌ କମଲଜୋ ହନ୍ତୁଂ ମଧୁଂ କୈଟଭମ୍ ॥
ଓଁ ନମଶ୍ଚଣ୍ଡିକାଯୈ ॥
ଓଁ ଐଂ ମାର୍କଣ୍ଡେଯ ଉଵାଚ॥ ୧.୧॥
ସାଵର୍ଣିଃ ସୂର୍ଯତନଯୋ ଯୋ ମନୁଃ କଥ୍ଯତେଽଷ୍ଟମଃ ।
ନିଶାମଯ ତଦୁତ୍ପତ୍ତିଂ ଵିସ୍ତରାଦ୍ଗଦତୋ ମମ ॥ ୧.୨॥
ମହାମାଯାନୁଭାଵେନ ଯଥା ମନ୍ଵନ୍ତରାଧିପଃ ।
ସ ବଭୂଵ ମହାଭାଗଃ ସାଵର୍ଣିସ୍ତନଯୋ ରଵେଃ ॥ ୧.୩॥
ସ୍ଵାରୋଚିଷେଽନ୍ତରେ ପୂର୍ଵଂ ଚୈତ୍ରଵଂଶସମୁଦ୍ଭଵଃ ।
ସୁରଥୋ ନାମ ରାଜାଭୂତ୍ସମସ୍ତେ କ୍ଷିତିମଣ୍ଡଲେ ॥ ୧.୪॥
ତସ୍ଯ ପାଲଯତଃ ସମ୍ଯକ୍ ପ୍ରଜାଃ ପୁତ୍ରାନିଵୌରସାନ୍ ।
ବଭୂଵୁଃ ଶତ୍ରଵୋ ଭୂପାଃ କୋଲାଵିଧ୍ଵଂସିନସ୍ତଦା ॥ ୧.୫॥
ତସ୍ଯ ତୈରଭଵଦ୍ ଯୁଦ୍ଧମତିପ୍ରବଲଦଣ୍ଡିନଃ ।
ନ୍ଯୂନୈରପି ସ ତୈର୍ଯୁଦ୍ଧେ କୋଲାଵିଧ୍ଵଂସିଭିର୍ଜିତଃ ॥ ୧.୬॥
ତତଃ ସ୍ଵପୁରମାଯାତୋ ନିଜଦେଶାଧିପୋଽଭଵତ୍ ।
ଆକ୍ରାନ୍ତଃ ସ ମହାଭାଗସ୍ତୈସ୍ତଦା ପ୍ରବଲାରିଭିଃ ॥ ୧.୭॥
ଅମାତ୍ଯୈର୍ବଲିଭିର୍ଦୁଷ୍ଟୈର୍ଦୁର୍ବଲସ୍ଯ ଦୁରାତ୍ମଭିଃ ।
କୋଶୋ ବଲଂ ଚାପହୃତଂ ତତ୍ରାପି ସ୍ଵପୁରେ ତତଃ ॥ ୧.୮॥
ତତୋ ମୃଗଯାଵ୍ଯାଜେନ ହୃତସ୍ଵାମ୍ଯଃ ସ ଭୂପତିଃ ।
ଏକାକୀ ହଯମାରୁହ୍ଯ ଜଗାମ ଗହନଂ ଵନମ୍ ॥ ୧.୯॥
ସ ତତ୍ରାଶ୍ରମମଦ୍ରାକ୍ଷୀଦ୍ଦ୍ଵିଜଵର୍ଯସ୍ଯ ମେଧସଃ ।
ପ୍ରଶାନ୍ତଶ୍ଵାପଦାକୀର୍ଣଂ ମୁନିଶିଷ୍ଯୋପଶୋଭିତମ୍ ॥ ୧.୧୦॥
ତସ୍ଥୌ କଞ୍ଚିତ୍ସ କାଲଂ ଚ ମୁନିନା ତେନ ସତ୍କୃତଃ ।
ଇତଶ୍ଚେତଶ୍ଚ ଵିଚରଂସ୍ତସ୍ମିନ୍ ମୁନିଵରାଶ୍ରମେ ॥ ୧.୧୧॥
ସୋଽଚିନ୍ତଯତ୍ତଦା ତତ୍ର ମମତ୍ଵାକୃଷ୍ଟମାନସଃ ।
ମତ୍ପୂର୍ଵୈଃ ପାଲିତଂ ପୂର୍ଵଂ ମଯା ହୀନଂ ପୁରଂ ହି ତତ୍ ॥ ୧.୧୨॥
ମଦ୍ଭୃତ୍ଯୈସ୍ତୈରସଦ୍ଵୃତ୍ତୈର୍ଧର୍ମତଃ ପାଲ୍ଯତେ ନ ଵା ।
ନ ଜାନେ ସ ପ୍ରଧାନୋ ମେ ଶୂରୋ ହସ୍ତୀ ସଦାମଦଃ ॥ ୧.୧୩॥
ମମ ଵୈରିଵଶଂ ଯାତଃ କାନ୍ ଭୋଗାନୁପଲପ୍ସ୍ଯତେ ।
ଯେ ମମାନୁଗତା ନିତ୍ଯଂ ପ୍ରସାଦଧନଭୋଜନୈଃ ॥ ୧.୧୪॥
ଅନୁଵୃତ୍ତିଂ ଧ୍ରୁଵଂ ତେଽଦ୍ଯ କୁର୍ଵନ୍ତ୍ଯନ୍ଯମହୀଭୃତାମ୍ ।
ଅସମ୍ଯଗ୍ଵ୍ଯଯଶୀଲୈସ୍ତୈଃ କୁର୍ଵଦ୍ଭିଃ ସତତଂ ଵ୍ଯଯମ୍ ॥ ୧.୧୫॥
ସଞ୍ଚିତଃ ସୋଽତିଦୁଃଖେନ କ୍ଷଯଂ କୋଶୋ ଗମିଷ୍ଯତି ।
ଏତଚ୍ଚାନ୍ଯଚ୍ଚ ସତତଂ ଚିନ୍ତଯାମାସ ପାର୍ଥିଵଃ ॥ ୧.୧୬॥
ତତ୍ର ଵିପ୍ରାଶ୍ରମାଭ୍ଯାଶେ ଵୈଶ୍ଯମେକଂ ଦଦର୍ଶ ସଃ ।
ସ ପୃଷ୍ଟସ୍ତେନ କସ୍ତ୍ଵଂ ଭୋ ହେତୁଶ୍ଚାଗମନେଽତ୍ର କଃ ॥ ୧.୧୭॥
ସଶୋକ ଇଵ କସ୍ମାତ୍ତ୍ଵଂ ଦୁର୍ମନା ଇଵ ଲକ୍ଷ୍ଯସେ ।
ଇତ୍ଯାକର୍ଣ୍ଯ ଵଚସ୍ତସ୍ଯ ଭୂପତେଃ ପ୍ରଣଯୋଦିତମ୍ ॥ ୧.୧୮॥
ପ୍ରତ୍ଯୁଵାଚସ ତଂ ଵୈଶ୍ଯଃ ପ୍ରଶ୍ରଯାଵନତୋ ନୃପମ୍ ॥ ୧.୧୯॥
ଵୈଶ୍ଯ ଉଵାଚ॥ ୧.୨୦॥
ସମାଧିର୍ନାମ ଵୈଶ୍ଯୋଽହମୁତ୍ପନ୍ନୋ ଧନିନାଂ କୁଲେ ॥ ୧.୨୧॥
ପୁତ୍ରଦାରୈର୍ନିରସ୍ତଶ୍ଚ ଧନଲୋଭାଦସାଧୁଭିଃ ।
ଵିହୀନଶ୍ଚ ଧନୈର୍ଦାରୈଃ ପୁତ୍ରୈରାଦାଯ ମେ ଧନମ୍ ॥ ୧.୨୨॥
ଵନମଭ୍ଯାଗତୋ ଦୁଃଖୀ ନିରସ୍ତଶ୍ଚାପ୍ତବନ୍ଧୁଭିଃ ।
ସୋଽହଂ ନ ଵେଦ୍ମି ପୁତ୍ରାଣାଂ କୁଶଲାକୁଶଲାତ୍ମିକାମ୍ ॥ ୧.୨୩॥
ପ୍ରଵୃତ୍ତିଂ ସ୍ଵଜନାନାଂ ଚ ଦାରାଣାଂ ଚାତ୍ର ସଂସ୍ଥିତଃ ।
କିଂ ନୁ ତେଷାଂ ଗୃହେ କ୍ଷେମମକ୍ଷେମଂ କିଂ ନୁ ସାମ୍ପ୍ରତମ୍ ॥ ୧.୨୪॥
କଥଂ ତେ କିଂ ନୁ ସଦ୍ଵୃତ୍ତା ଦୁର୍ଵୃତ୍ତାଃ କିଂ ନୁ ମେ ସୁତାଃ ॥ ୧.୨୫॥
ରାଜୋଵାଚ ॥ ୧.୨୬॥
ଯୈର୍ନିରସ୍ତୋ ଭଵାଁଲ୍ଲୁବ୍ଧୈଃ ପୁତ୍ରଦାରାଦିଭିର୍ଧନୈଃ ॥ ୧.୨୭॥
ତେଷୁ କିଂ ଭଵତଃ ସ୍ନେହମନୁବଧ୍ନାତି ମାନସମ୍ ॥ ୧.୨୮॥
ଵୈଶ୍ଯ ଉଵାଚ॥ ୧.୨୯॥
ଏଵମେତଦ୍ଯଥା ପ୍ରାହ ଭଵାନସ୍ମଦ୍ଗତଂ ଵଚଃ ॥ ୧.୩୦॥
କିଂ କରୋମି ନ ବଧ୍ନାତି ମମ ନିଷ୍ଠୁରତାଂ ମନଃ ।
ଯୈଃ ସନ୍ତ୍ଯଜ୍ଯ ପିତୃସ୍ନେହଂ ଧନଲୁବ୍ଧୈର୍ନିରାକୃତଃ ॥ ୧.୩୧॥
ପତିସ୍ଵଜନହାର୍ଦଂ ଚ ହାର୍ଦିତେଷ୍ଵେଵ ମେ ମନଃ ।
କିମେତନ୍ନାଭିଜାନାମି ଜାନନ୍ନପି ମହାମତେ ॥ ୧.୩୨॥
ଯତ୍ପ୍ରେମପ୍ରଵଣଂ ଚିତ୍ତଂ ଵିଗୁଣେଷ୍ଵପି ବନ୍ଧୁଷୁ ।
ତେଷାଂ କୃତେ ମେ ନିଃଶ୍ଵାସୋ ଦୌର୍ମନସ୍ଯଂ ଚ ଜାଯତେ ॥ ୧.୩୩॥
କରୋମି କିଂ ଯନ୍ନ ମନସ୍ତେଷ୍ଵପ୍ରୀତିଷୁ ନିଷ୍ଠୁରମ୍ ॥ ୧.୩୪॥
ମାର୍କଣ୍ଡେଯ ଉଵାଚ॥ ୧.୩୫॥
ତତସ୍ତୌ ସହିତୌ ଵିପ୍ର ତଂ ମୁନିଂ ସମୁପସ୍ଥିତୌ ॥ ୧.୩୬॥
ସମାଧିର୍ନାମ ଵୈଶ୍ଯୋଽସୌ ସ ଚ ପାର୍ଥିଵସତ୍ତମଃ ।
କୃତ୍ଵା ତୁ ତୌ ଯଥାନ୍ଯାଯଂ ଯଥାର୍ହଂ ତେନ ସଂଵିଦମ୍ ॥ ୧.୩୭॥
ଉପଵିଷ୍ଟୌ କଥାଃ କାଶ୍ଚିଚ୍ଚକ୍ରତୁର୍ଵୈଶ୍ଯପାର୍ଥିଵୌ ॥ ୧.୩୮॥
ରାଜୋଵାଚ ॥ ୧.୩୯॥
ଭଗଵଂସ୍ତ୍ଵାମହଂ ପ୍ରଷ୍ଟୁମିଚ୍ଛାମ୍ଯେକଂ ଵଦସ୍ଵ ତତ୍ ॥ ୧.୪୦॥
ଦୁଃଖାଯ ଯନ୍ମେ ମନସଃ ସ୍ଵଚିତ୍ତାଯତ୍ତତାଂ ଵିନା ।
ମମତ୍ଵଂ ଗତରାଜ୍ଯସ୍ଯ ରାଜ୍ଯାଙ୍ଗେଷ୍ଵଖିଲେଷ୍ଵପି ॥ ୧.୪୧॥
ଜାନତୋଽପି ଯଥାଜ୍ଞସ୍ଯ କିମେତନ୍ମୁନିସତ୍ତମ ।
ଅଯଂ ଚ ନିକୃତଃ ପୁତ୍ରୈର୍ଦାରୈର୍ଭୃତ୍ଯୈସ୍ତଥୋଜ୍ଝିତଃ ॥ ୧.୪୨॥
ସ୍ଵଜନେନ ଚ ସନ୍ତ୍ଯକ୍ତସ୍ତେଷୁ ହାର୍ଦୀ ତଥାପ୍ଯତି ।
ଏଵମେଷ ତଥାହଂ ଚ ଦ୍ଵାଵପ୍ଯତ୍ଯନ୍ତଦୁଃଖିତୌ ॥ ୧.୪୩॥
ଦୃଷ୍ଟଦୋଷେଽପି ଵିଷଯେ ମମତ୍ଵାକୃଷ୍ଟମାନସୌ ।
ତତ୍କିମେତନ୍ମହାଭାଗ ଯନ୍ମୋହୋ ଜ୍ଞାନିନୋରପି ॥ ୧.୪୪॥
ମମାସ୍ଯ ଚ ଭଵତ୍ଯେଷା ଵିଵେକାନ୍ଧସ୍ଯ ମୂଢତା ॥ ୧.୪୫॥
ଋଷିରୁଵାଚ ॥ ୧.୪୬॥
ଜ୍ଞାନମସ୍ତି ସମସ୍ତସ୍ଯ ଜନ୍ତୋର୍ଵିଷଯଗୋଚରେ ॥ ୧.୪୭॥
ଵିଷଯାଶ୍ଚ ମହାଭାଗ ଯାନ୍ତି ଚୈଵଂ ପୃଥକ୍ପୃଥକ୍ ।
ଦିଵାନ୍ଧାଃ ପ୍ରାଣିନଃ କେଚିଦ୍ରାତ୍ରାଵନ୍ଧାସ୍ତଥାପରେ ॥ ୧.୪୮॥
କେଚିଦ୍ଦିଵା ତଥା ରାତ୍ରୌ ପ୍ରାଣିନସ୍ତୁଲ୍ଯଦୃଷ୍ଟଯଃ ।
ଜ୍ଞାନିନୋ ମନୁଜାଃ ସତ୍ଯଂ କିଂ ତୁ ତେ ନ ହି କେଵଲମ୍ ॥ ୧.୪୯॥
ଯତୋ ହି ଜ୍ଞାନିନଃ ସର୍ଵେ ପଶୁପକ୍ଷିମୃଗାଦଯଃ ।
ଜ୍ଞାନଂ ଚ ତନ୍ମନୁଷ୍ଯାଣାଂ ଯତ୍ତେଷାଂ ମୃଗପକ୍ଷିଣାମ୍ ॥ ୧.୫୦॥
ମନୁଷ୍ଯାଣାଂ ଚ ଯତ୍ତେଷାଂ ତୁଲ୍ଯମନ୍ଯତ୍ତଥୋଭଯୋଃ ।
ଜ୍ଞାନେଽପି ସତି ପଶ୍ଯୈତାନ୍ ପତଙ୍ଗାଞ୍ଛାଵଚଞ୍ଚୁଷୁ ॥ ୧.୫୧॥
କଣମୋକ୍ଷାଦୃତାନ୍ ମୋହାତ୍ପୀଡ୍ଯମାନାନପି କ୍ଷୁଧା ।
ମାନୁଷା ମନୁଜଵ୍ଯାଘ୍ର ସାଭିଲାଷାଃ ସୁତାନ୍ ପ୍ରତି ॥ ୧.୫୨॥
ଲୋଭାତ୍ ପ୍ରତ୍ଯୁପକାରାଯ ନନ୍ଵେତାନ୍ କିଂ ନ ପଶ୍ଯସି ।
ତଥାପି ମମତାଵର୍ତ୍ତେ ମୋହଗର୍ତେ ନିପାତିତାଃ ॥ ୧.୫୩॥
ମହାମାଯାପ୍ରଭାଵେଣ ସଂସାରସ୍ଥିତିକାରିଣା ।
ତନ୍ନାତ୍ର ଵିସ୍ମଯଃ କାର୍ଯୋ ଯୋଗନିଦ୍ରା ଜଗତ୍ପତେଃ ॥ ୧.୫୪॥
ମହାମାଯା ହରେଶ୍ଚୈଷା ତଯା ସମ୍ମୋହ୍ଯତେ ଜଗତ୍ ।
ଜ୍ଞାନିନାମପି ଚେତାଂସି ଦେଵୀ ଭଗଵତୀ ହି ସା ॥ ୧.୫୫॥
ବଲାଦାକୃଷ୍ଯ ମୋହାଯ ମହାମାଯା ପ୍ରଯଚ୍ଛତି ।
ତଯା ଵିସୃଜ୍ଯତେ ଵିଶ୍ଵଂ ଜଗଦେତଚ୍ଚରାଚରମ୍ ॥ ୧.୫୬॥
ସୈଷା ପ୍ରସନ୍ନା ଵରଦା ନୃଣାଂ ଭଵତି ମୁକ୍ତଯେ ।
ସା ଵିଦ୍ଯା ପରମା ମୁକ୍ତେର୍ହେତୁଭୂତା ସନାତନୀ ॥ ୧.୫୭॥
ସଂସାରବନ୍ଧହେତୁଶ୍ଚ ସୈଵ ସର୍ଵେଶ୍ଵରେଶ୍ଵରୀ ॥ ୧.୫୮॥
ରାଜୋଵାଚ ॥ ୧.୫୯॥
ଭଗଵନ୍ କା ହି ସା ଦେଵୀ ମହାମାଯେତି ଯାଂ ଭଵାନ୍ ॥ ୧.୬୦॥
ବ୍ରଵୀତି କଥମୁତ୍ପନ୍ନା ସା କର୍ମାସ୍ଯାଶ୍ଚ କିଂ ଦ୍ଵିଜ ।
ଯତ୍ପ୍ରଭାଵା ଚ ସା ଦେଵୀ ଯତ୍ସ୍ଵରୂପା ଯଦୁଦ୍ଭଵା ॥ ୧.୬୧॥
ତତ୍ସର୍ଵଂ ଶ୍ରୋତୁମିଚ୍ଛାମି ତ୍ଵତ୍ତୋ ବ୍ରହ୍ମଵିଦାଂ ଵର ॥ ୧.୬୨॥
ଋଷିରୁଵାଚ ॥ ୧.୬୩॥
ନିତ୍ଯୈଵ ସା ଜଗନ୍ମୂର୍ତିସ୍ତଯା ସର୍ଵମିଦଂ ତତମ୍ ॥ ୧.୬୪॥
ତଥାପି ତତ୍ସମୁତ୍ପତ୍ତିର୍ବହୁଧା ଶ୍ରୂଯତାଂ ମମ ।
ଦେଵାନାଂ କାର୍ଯସିଦ୍ଧ୍ଯର୍ଥମାଵିର୍ଭଵତି ସା ଯଦା ॥ ୧.୬୫॥
ଉତ୍ପନ୍ନେତି ତଦା ଲୋକେ ସା ନିତ୍ଯାପ୍ଯଭିଧୀଯତେ ।
ଯୋଗନିଦ୍ରାଂ ଯଦା ଵିଷ୍ଣୁର୍ଜଗତ୍ଯେକାର୍ଣଵୀକୃତେ ॥ ୧.୬୬॥
ଆସ୍ତୀର୍ଯ ଶେଷମଭଜତ୍ କଲ୍ପାନ୍ତେ ଭଗଵାନ୍ ପ୍ରଭୁଃ ।
ତଦା ଦ୍ଵାଵସୁରୌ ଘୋରୌ ଵିଖ୍ଯାତୌ ମଧୁକୈଟଭୌ ॥ ୧.୬୭॥
ଵିଷ୍ଣୁକର୍ଣମଲୋଦ୍ଭୂତୌ ହନ୍ତୁଂ ବ୍ରହ୍ମାଣମୁଦ୍ଯତୌ ।
ସ ନାଭିକମଲେ ଵିଷ୍ଣୋଃ ସ୍ଥିତୋ ବ୍ରହ୍ମା ପ୍ରଜାପତିଃ ॥ ୧.୬୮॥
ଦୃଷ୍ଟ୍ଵା ତାଵସୁରୌ ଚୋଗ୍ରୌ ପ୍ରସୁପ୍ତଂ ଚ ଜନାର୍ଦନମ୍ ।
ତୁଷ୍ଟାଵ ଯୋଗନିଦ୍ରାଂ ତାମେକାଗ୍ରହୃଦଯଃ ସ୍ଥିତଃ ॥ ୧.୬୯॥
ଵିବୋଧନାର୍ଥାଯ ହରେର୍ହରିନେତ୍ରକୃତାଲଯାମ୍ ।
ଵିଶ୍ଵେଶ୍ଵରୀଂ ଜଗଦ୍ଧାତ୍ରୀଂ ସ୍ଥିତିସଂହାରକାରିଣୀମ୍ ॥ ୧.୭୦॥
ନିଦ୍ରାଂ ଭଗଵତୀଂ ଵିଷ୍ଣୋରତୁଲାଂ ତେଜସଃ ପ୍ରଭୁଃ ॥ ୧.୭୧॥
ବ୍ରହ୍ମୋଵାଚ ॥ ୧.୭୨॥
ତ୍ଵଂ ସ୍ଵାହା ତ୍ଵଂ ସ୍ଵଧା ତ୍ଵଂ ହି ଵଷଟ୍କାରଃ ସ୍ଵରାତ୍ମିକା ॥ ୧.୭୩॥
ସୁଧା ତ୍ଵମକ୍ଷରେ ନିତ୍ଯେ ତ୍ରିଧା ମାତ୍ରାତ୍ମିକା ସ୍ଥିତା ।
ଅର୍ଧମାତ୍ରା ସ୍ଥିତା ନିତ୍ଯା ଯାନୁଚ୍ଚାର୍ଯାଵିଶେଷତଃ ॥ ୧.୭୪॥
ତ୍ଵମେଵ ସନ୍ଧ୍ଯା ସାଵିତ୍ରୀ ତ୍ଵଂ ଦେଵି ଜନନୀ ପରା ।
ତ୍ଵଯୈତଦ୍ଧାର୍ଯତେ ଵିଶ୍ଵଂ ତ୍ଵଯୈତତ୍ ସୃଜ୍ଯତେ ଜଗତ୍ ॥ ୧.୭୫॥
ତ୍ଵଯୈତତ୍ ପାଲ୍ଯତେ ଦେଵି ତ୍ଵମତ୍ସ୍ଯନ୍ତେ ଚ ସର୍ଵଦା ।
ଵିସୃଷ୍ଟୌ ସୃଷ୍ଟିରୂପା ତ୍ଵଂ ସ୍ଥିତିରୂପା ଚ ପାଲନେ ॥ ୧.୭୬॥
ତଥା ସଂହୃତିରୂପାନ୍ତେ ଜଗତୋଽସ୍ଯ ଜଗନ୍ମଯେ ।
ମହାଵିଦ୍ଯା ମହାମାଯା ମହାମେଧା ମହାସ୍ମୃତିଃ ॥ ୧.୭୭॥
ମହାମୋହା ଚ ଭଵତୀ ମହାଦେଵୀ ମହେଶ୍ଵରୀ ।
ପ୍ରକୃତିସ୍ତ୍ଵଂ ଚ ସର୍ଵସ୍ଯ ଗୁଣତ୍ରଯଵିଭାଵିନୀ ॥ ୧.୭୮॥
କାଲରାତ୍ରିର୍ମହାରାତ୍ରିର୍ମୋହରାତ୍ରିଶ୍ଚ ଦାରୁଣା ।
ତ୍ଵଂ ଶ୍ରୀସ୍ତ୍ଵମୀଶ୍ଵରୀ ତ୍ଵଂ ହ୍ରୀସ୍ତ୍ଵଂ ବୁଦ୍ଧିର୍ବୋଧଲକ୍ଷଣା ॥ ୧.୭୯॥
ଲଜ୍ଜା ପୁଷ୍ଟିସ୍ତଥା ତୁଷ୍ଟିସ୍ତ୍ଵଂ ଶାନ୍ତିଃ କ୍ଷାନ୍ତିରେଵ ଚ ।
ଖଡ୍ଗିନୀ ଶୂଲିନୀ ଘୋରା ଗଦିନୀ ଚକ୍ରିଣୀ ତଥା ॥ ୧.୮୦॥
ଶଙ୍ଖିନୀ ଚାପିନୀ ବାଣଭୁଶୁଣ୍ଡୀପରିଘାଯୁଧା ।
ସୌମ୍ଯା ସୌମ୍ଯତରାଶେଷସୌମ୍ଯେଭ୍ଯସ୍ତ୍ଵତିସୁନ୍ଦରୀ ॥ ୧.୮୧॥
ପରାପରାଣାଂ ପରମା ତ୍ଵମେଵ ପରମେଶ୍ଵରୀ ।
ଯଚ୍ଚ କିଞ୍ଚିତ୍କ୍ଵଚିଦ୍ଵସ୍ତୁ ସଦସଦ୍ଵାଖିଲାତ୍ମିକେ ॥ ୧.୮୨॥
ତସ୍ଯ ସର୍ଵସ୍ଯ ଯା ଶକ୍ତିଃ ସା ତ୍ଵଂ କିଂ ସ୍ତୂଯସେ ମଯା ।
ଯଯା ତ୍ଵଯା ଜଗତ୍ସ୍ରଷ୍ଟା ଜଗତ୍ପାତ୍ଯତ୍ତି ଯୋ ଜଗତ୍ ॥ ୧.୮୩॥
ସୋଽପି ନିଦ୍ରାଵଶଂ ନୀତଃ କସ୍ତ୍ଵାଂ ସ୍ତୋତୁମିହେଶ୍ଵରଃ ।
ଵିଷ୍ଣୁଃ ଶରୀରଗ୍ରହଣମହମୀଶାନ ଏଵ ଚ ॥ ୧.୮୪॥
କାରିତାସ୍ତେ ଯତୋଽତସ୍ତ୍ଵାଂ କଃ ସ୍ତୋତୁଂ ଶକ୍ତିମାନ୍ ଭଵେତ୍ ।
ସା ତ୍ଵମିତ୍ଥଂ ପ୍ରଭାଵୈଃ ସ୍ଵୈରୁଦାରୈର୍ଦେଵି ସଂସ୍ତୁତା ॥ ୧.୮୫॥
ମୋହଯୈତୌ ଦୁରାଧର୍ଷାଵସୁରୌ ମଧୁକୈଟଭୌ ।
ପ୍ରବୋଧଂ ଚ ଜଗତ୍ସ୍ଵାମୀ ନୀଯତାମଚ୍ଯୁତୋ ଲଘୁ ॥ ୧.୮୬॥
ବୋଧଶ୍ଚ କ୍ରିଯତାମସ୍ଯ ହନ୍ତୁମେତୌ ମହାସୁରୌ ॥ ୧.୮୭॥
ଋଷିରୁଵାଚ ॥ ୧.୮୮॥
ଏଵଂ ସ୍ତୁତା ତଦା ଦେଵୀ ତାମସୀ ତତ୍ର ଵେଧସା ॥ ୧.୮୯॥
ଵିଷ୍ଣୋଃ ପ୍ରବୋଧନାର୍ଥାଯ ନିହନ୍ତୁଂ ମଧୁକୈଟଭୌ ।
ନେତ୍ରାସ୍ଯନାସିକାବାହୁହୃଦଯେଭ୍ଯସ୍ତଥୋରସଃ ॥ ୧.୯୦॥
ନିର୍ଗମ୍ଯ ଦର୍ଶନେ ତସ୍ଥୌ ବ୍ରହ୍ମଣୋଽଵ୍ଯକ୍ତଜନ୍ମନଃ ।
ଉତ୍ତସ୍ଥୌ ଚ ଜଗନ୍ନାଥସ୍ତଯା ମୁକ୍ତୋ ଜନାର୍ଦନଃ ॥ ୧.୯୧॥
ଏକାର୍ଣଵେଽହିଶଯନାତ୍ତତଃ ସ ଦଦୃଶେ ଚ ତୌ ।
ମଧୁକୈଟଭୌ ଦୁରାତ୍ମାନାଵତିଵୀର୍ଯପରାକ୍ରମୌ ॥ ୧.୯୨॥
କ୍ରୋଧରକ୍ତେକ୍ଷଣାଵତ୍ତୁଂ ବ୍ରହ୍ମାଣଂ ଜନିତୋଦ୍ଯମୌ ।
ସମୁତ୍ଥାଯ ତତସ୍ତାଭ୍ଯାଂ ଯୁଯୁଧେ ଭଗଵାନ୍ ହରିଃ ॥ ୧.୯୩॥
ପଞ୍ଚଵର୍ଷସହସ୍ରାଣି ବାହୁପ୍ରହରଣୋ ଵିଭୁଃ ।
ତାଵପ୍ଯତିବଲୋନ୍ମତ୍ତୌ ମହାମାଯାଵିମୋହିତୌ ॥ ୧.୯୪॥
ଉକ୍ତଵନ୍ତୌ ଵରୋଽସ୍ମତ୍ତୋ ଵ୍ରିଯତାମିତି କେଶଵମ୍ ॥ ୧.୯୫॥
ଶ୍ରୀଭଗଵାନୁଵାଚ ॥ ୧.୯୬॥
ଭଵେତାମଦ୍ଯ ମେ ତୁଷ୍ଟୌ ମମ ଵଧ୍ଯାଵୁଭାଵପି ॥ ୧.୯୭॥
କିମନ୍ଯେନ ଵରେଣାତ୍ର ଏତାଵଦ୍ଧି ଵୃତଂ ମଯା ॥ ୧.୯୮॥
ଋଷିରୁଵାଚ ॥ ୧.୯୯॥
ଵଞ୍ଚିତାଭ୍ଯାମିତି ତଦା ସର୍ଵମାପୋମଯଂ ଜଗତ୍ ॥ ୧.୧୦୦॥
ଵିଲୋକ୍ଯ ତାଭ୍ଯାଂ ଗଦିତୋ ଭଗଵାନ୍ କମଲେକ୍ଷଣଃ ।
ଆଵାଂ ଜହି ନ ଯତ୍ରୋର୍ଵୀ ସଲିଲେନ ପରିପ୍ଲୁତା ॥ ୧.୧୦୧॥
ଋଷିରୁଵାଚ ॥ ୧.୧୦୨॥
ତଥେତ୍ଯୁକ୍ତ୍ଵା ଭଗଵତା ଶଙ୍ଖଚକ୍ରଗଦାଭୃତା ।
କୃତ୍ଵା ଚକ୍ରେଣ ଵୈ ଛିନ୍ନେ ଜଘନେ ଶିରସୀ ତଯୋଃ ॥ ୧.୧୦୩॥
ଏଵମେଷା ସମୁତ୍ପନ୍ନା ବ୍ରହ୍ମଣା ସଂସ୍ତୁତା ସ୍ଵଯମ୍ ।
ପ୍ରଭାଵମସ୍ଯା ଦେଵ୍ଯାସ୍ତୁ ଭୂଯଃ ଶ‍ୃଣୁ ଵଦାମି ତେ ॥ ୧.୧୦୪॥
। ଐଂ ଓଁ ।
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ମଧୁକୈଟଭଵଧୋ ନାମ ପ୍ରଥମୋଽଧ୍ଯାଯଃ ॥ ୧॥
ଉଵାଚ୧୪, ଅର୍ଧଶ୍ଲୋକାଃ ୨୪, ଶ୍ଲୋକାଃ ୬୬, ଏଵମାଦିତଃ ॥ ୧୦୪॥

ଵିନିଯୋଗଃ
ଅସ୍ଯ ଶ୍ରୀ ମଧ୍ଯମଚରିତ୍ରସ୍ଯ ଵିଷ୍ଣୁରୃଷିଃ ।
ଶ୍ରୀମହାଲକ୍ଷ୍ମୀର୍ଦେଵତା ।
ଉଷ୍ଣିକ୍ ଛନ୍ଦଃ । ଶାକମ୍ଭରୀ ଶକ୍ତିଃ । ଦୁର୍ଗା ବୀଜମ୍ ।
ଵାଯୁସ୍ତତ୍ତ୍ଵମ୍ ।
ଯଜୁର୍ଵେଦଃ ସ୍ଵରୂପମ୍ । ଶ୍ରୀମହାଲକ୍ଷ୍ମୀପ୍ରୀତ୍ଯର୍ଥେ
ମଧ୍ଯମଚରିତ୍ରଜପେ ଵିନିଯୋଗଃ ।
। ଧ୍ଯାନମ୍ ।
ଓଁ ଅକ୍ଷସ୍ରକ୍ପରଶୂ ଗଦେଷୁକୁଲିଶଂ ପଦ୍ମଂ ଧନୁଃ କୁଣ୍ଡିକାଂ
ଦଣ୍ଡଂ ଶକ୍ତିମସିଂ ଚ ଚର୍ମ ଜଲଜଂ ଘଣ୍ଟାଂ ସୁରାଭାଜନମ୍ ।
ଶୂଲଂ ପାଶସୁଦର୍ଶନେ ଚ ଦଧତୀଂ ହସ୍ତୈଃ ପ୍ରଵାଲପ୍ରଭାଂ
ସେଵେ ସୈରିଭମର୍ଦିନୀମିହ ମହାଲକ୍ଷ୍ମୀଂ ସରୋଜସ୍ଥିତାମ୍ ॥
ଓଁ ହ୍ରୀଂ ଋଷିରୁଵାଚ ॥ ୨.୧॥
ଦେଵାସୁରମଭୂଦ୍ଯୁଦ୍ଧଂ ପୂର୍ଣମବ୍ଦଶତଂ ପୁରା ।
ମହିଷେଽସୁରାଣାମଧିପେ ଦେଵାନାଂ ଚ ପୁରନ୍ଦରେ ॥ ୨.୨॥
ତତ୍ରାସୁରୈର୍ମହାଵୀର୍ଯୈର୍ଦେଵସୈନ୍ଯଂ ପରାଜିତମ୍ ।
ଜିତ୍ଵା ଚ ସକଲାନ୍ ଦେଵାନିନ୍ଦ୍ରୋଽଭୂନ୍ମହିଷାସୁରଃ ॥ ୨.୩॥
ତତଃ ପରାଜିତା ଦେଵାଃ ପଦ୍ମଯୋନିଂ ପ୍ରଜାପତିମ୍ ।
ପୁରସ୍କୃତ୍ଯ ଗତାସ୍ତତ୍ର ଯତ୍ରେଶଗରୁଡଧ୍ଵଜୌ ॥ ୨.୪॥
ଯଥାଵୃତ୍ତଂ ତଯୋସ୍ତଦ୍ଵନ୍ମହିଷାସୁରଚେଷ୍ଟିତମ୍ ।
ତ୍ରିଦଶାଃ କଥଯାମାସୁର୍ଦେଵାଭିଭଵଵିସ୍ତରମ୍ ॥ ୨.୫॥
ସୂର୍ଯେନ୍ଦ୍ରାଗ୍ନ୍ଯନିଲେନ୍ଦୂନାଂ ଯମସ୍ଯ ଵରୁଣସ୍ଯ ଚ ।
ଅନ୍ଯେଷାଂ ଚାଧିକାରାନ୍ସ ସ୍ଵଯମେଵାଧିତିଷ୍ଠତି ॥ ୨.୬॥
ସ୍ଵର୍ଗାନ୍ନିରାକୃତାଃ ସର୍ଵେ ତେନ ଦେଵଗଣା ଭୁଵି ।
ଵିଚରନ୍ତି ଯଥା ମର୍ତ୍ଯା ମହିଷେଣ ଦୁରାତ୍ମନା ॥ ୨.୭॥
ଏତଦ୍ଵଃ କଥିତଂ ସର୍ଵମମରାରିଵିଚେଷ୍ଟିତମ୍ ।
ଶରଣଂ ଵଃ ପ୍ରପନ୍ନାଃ ସ୍ମୋ ଵଧସ୍ତସ୍ଯ ଵିଚିନ୍ତ୍ଯତାମ୍ ॥ ୨.୮॥
ଇତ୍ଥଂ ନିଶମ୍ଯ ଦେଵାନାଂ ଵଚାଂସି ମଧୁସୂଦନଃ ।
ଚକାର କୋପଂ ଶମ୍ଭୁଶ୍ଚ ଭ୍ରୁକୁଟୀକୁଟିଲାନନୌ ॥ ୨.୯॥
ତତୋଽତିକୋପପୂର୍ଣସ୍ଯ ଚକ୍ରିଣୋ ଵଦନାତ୍ତତଃ ।
ନିଶ୍ଚକ୍ରାମ ମହତ୍ତେଜୋ ବ୍ରହ୍ମଣଃ ଶଙ୍କରସ୍ଯ ଚ ॥ ୨.୧୦॥
ଅନ୍ଯେଷାଂ ଚୈଵ ଦେଵାନାଂ ଶକ୍ରାଦୀନାଂ ଶରୀରତଃ ।
ନିର୍ଗତଂ ସୁମହତ୍ତେଜସ୍ତଚ୍ଚୈକ୍ଯଂ ସମଗଚ୍ଛତ ॥ ୨.୧୧॥
ଅତୀଵ ତେଜସଃ କୂଟଂ ଜ୍ଵଲନ୍ତମିଵ ପର୍ଵତମ୍ ।
ଦଦୃଶୁସ୍ତେ ସୁରାସ୍ତତ୍ର ଜ୍ଵାଲାଵ୍ଯାପ୍ତଦିଗନ୍ତରମ୍ ॥ ୨.୧୨॥
ଅତୁଲଂ ତତ୍ର ତତ୍ତେଜଃ ସର୍ଵଦେଵଶରୀରଜମ୍ ।
ଏକସ୍ଥଂ ତଦଭୂନ୍ନାରୀ ଵ୍ଯାପ୍ତଲୋକତ୍ରଯଂ ତ୍ଵିଷା ॥ ୨.୧୩॥
ଯଦଭୂଚ୍ଛାମ୍ଭଵଂ ତେଜସ୍ତେନାଜାଯତ ତନ୍ମୁଖମ୍ ।
ଯାମ୍ଯେନ ଚାଭଵନ୍ କେଶା ବାହଵୋ ଵିଷ୍ଣୁତେଜସା ॥ ୨.୧୪॥
ସୌମ୍ଯେନ ସ୍ତନଯୋର୍ଯୁଗ୍ମଂ ମଧ୍ଯଂ ଚୈନ୍ଦ୍ରେଣ ଚାଭଵତ୍ ।
ଵାରୁଣେନ ଚ ଜଙ୍ଘୋରୂ ନିତମ୍ବସ୍ତେଜସା ଭୁଵଃ ॥ ୨.୧୫॥
ବ୍ରହ୍ମଣସ୍ତେଜସା ପାଦୌ ତଦଙ୍ଗୁଲ୍ଯୋଽର୍କତେଜସା ।
ଵସୂନାଂ ଚ କରାଙ୍ଗୁଲ୍ଯଃ କୌବେରେଣ ଚ ନାସିକା ॥ ୨.୧୬॥
ତସ୍ଯାସ୍ତୁ ଦନ୍ତାଃ ସମ୍ଭୂତାଃ ପ୍ରାଜାପତ୍ଯେନ ତେଜସା ।
ନଯନତ୍ରିତଯଂ ଜଜ୍ଞେ ତଥା ପାଵକତେଜସା ॥ ୨.୧୭॥
ଭ୍ରୁଵୌ ଚ ସନ୍ଧ୍ଯଯୋସ୍ତେଜଃ ଶ୍ରଵଣାଵନିଲସ୍ଯ ଚ ।
ଅନ୍ଯେଷାଂ ଚୈଵ ଦେଵାନାଂ ସମ୍ଭଵସ୍ତେଜସାଂ ଶିଵା ॥ ୨.୧୮॥
ତତଃ ସମସ୍ତଦେଵାନାଂ ତେଜୋରାଶିସମୁଦ୍ଭଵାମ୍ ।
ତାଂ ଵିଲୋକ୍ଯ ମୁଦଂ ପ୍ରାପୁରମରା ମହିଷାର୍ଦିତାଃ ।
ତତୋ ଦେଵା ଦଦୁସ୍ତସ୍ଯୈ ସ୍ଵାନି ସ୍ଵାନ୍ଯାଯୁଧାନି ଚ ॥ ୨.୧୯॥
ଶୂଲଂ ଶୂଲାଦ୍ଵିନିଷ୍କୃଷ୍ଯ ଦଦୌ ତସ୍ଯୈ ପିନାକଧୃକ୍ ।
ଚକ୍ରଂ ଚ ଦତ୍ତଵାନ୍ କୃଷ୍ଣଃ ସମୁତ୍ପାଟ୍ଯ ସ୍ଵଚକ୍ରତଃ ॥ ୨.୨୦॥
ଶଙ୍ଖଂ ଚ ଵରୁଣଃ ଶକ୍ତିଂ ଦଦୌ ତସ୍ଯୈ ହୁତାଶନଃ ।
ମାରୁତୋ ଦତ୍ତଵାଂଶ୍ଚାପଂ ବାଣପୂର୍ଣେ ତଥେଷୁଧୀ ॥ ୨.୨୧॥
ଵଜ୍ରମିନ୍ଦ୍ରଃ ସମୁତ୍ପାଟ୍ଯ କୁଲିଶାଦମରାଧିପଃ ।
ଦଦୌ ତସ୍ଯୈ ସହସ୍ରାକ୍ଷୋ ଘଣ୍ଟାମୈରାଵତାଦ୍ଗଜାତ୍ ॥ ୨.୨୨॥
କାଲଦଣ୍ଡାଦ୍ଯମୋ ଦଣ୍ଡଂ ପାଶଂ ଚାମ୍ବୁପତିର୍ଦଦୌ ।
ପ୍ରଜାପତିଶ୍ଚାକ୍ଷମାଲାଂ ଦଦୌ ବ୍ରହ୍ମା କମଣ୍ଡଲୁମ୍ ॥ ୨.୨୩॥
ସମସ୍ତରୋମକୂପେଷୁ ନିଜରଶ୍ମୀନ୍ ଦିଵାକରଃ ।
କାଲଶ୍ଚ ଦତ୍ତଵାନ୍ ଖଡ୍ଗଂ ତସ୍ଯୈ ଚର୍ମ ଚ ନିର୍ମଲମ୍ ॥ ୨.୨୪॥
କ୍ଷୀରୋଦଶ୍ଚାମଲଂ ହାରମଜରେ ଚ ତଥାମ୍ବରେ ।
ଚୂଡାମଣିଂ ତଥା ଦିଵ୍ଯଂ କୁଣ୍ଡଲେ କଟକାନି ଚ ॥ ୨.୨୫॥
ଅର୍ଧଚନ୍ଦ୍ରଂ ତଥା ଶୁଭ୍ରଂ କେଯୂରାନ୍ ସର୍ଵବାହୁଷୁ ।
ନୂପୁରୌ ଵିମଲୌ ତଦ୍ଵଦ୍ ଗ୍ରୈଵେଯକମନୁତ୍ତମମ୍ ॥ ୨.୨୬॥
ଅଙ୍ଗୁଲୀଯକରତ୍ନାନି ସମସ୍ତାସ୍ଵଙ୍ଗୁଲୀଷୁ ଚ ।
ଵିଶ୍ଵକର୍ମା ଦଦୌ ତସ୍ଯୈ ପରଶୁଂ ଚାତିନିର୍ମଲମ୍ ॥ ୨.୨୭॥
ଅସ୍ତ୍ରାଣ୍ଯନେକରୂପାଣି ତଥାଭେଦ୍ଯଂ ଚ ଦଂଶନମ୍ ।
ଅମ୍ଲାନପଙ୍କଜାଂ ମାଲାଂ ଶିରସ୍ଯୁରସି ଚାପରାମ୍ ॥ ୨.୨୮॥
ଅଦଦଜ୍ଜଲଧିସ୍ତସ୍ଯୈ ପଙ୍କଜଂ ଚାତିଶୋଭନମ୍ ।
ହିମଵାନ୍ ଵାହନଂ ସିଂହଂ ରତ୍ନାନି ଵିଵିଧାନି ଚ ॥ ୨.୨୯॥
ଦଦାଵଶୂନ୍ଯଂ ସୁରଯା ପାନପାତ୍ରଂ ଧନାଧିପଃ ।
ଶେଷଶ୍ଚ ସର୍ଵନାଗେଶୋ ମହାମଣିଵିଭୂଷିତମ୍ ॥ ୨.୩୦॥
ନାଗହାରଂ ଦଦୌ ତସ୍ଯୈ ଧତ୍ତେ ଯଃ ପୃଥିଵୀମିମାମ୍ ।
ଅନ୍ଯୈରପି ସୁରୈର୍ଦେଵୀ ଭୂଷଣୈରାଯୁଧୈସ୍ତଥା ॥ ୨.୩୧॥
ସମ୍ମାନିତା ନନାଦୋଚ୍ଚୈଃ ସାଟ୍ଟହାସଂ ମୁହୁର୍ମୁହୁଃ ।
ତସ୍ଯା ନାଦେନ ଘୋରେଣ କୃତ୍ସ୍ନମାପୂରିତଂ ନଭଃ ॥ ୨.୩୨॥
ଅମାଯତାତିମହତା ପ୍ରତିଶବ୍ଦୋ ମହାନଭୂତ୍ ।
ଚୁକ୍ଷୁଭୁଃ ସକଲା ଲୋକାଃ ସମୁଦ୍ରାଶ୍ଚ ଚକମ୍ପିରେ ॥ ୨.୩୩॥
ଚଚାଲ ଵସୁଧା ଚେଲୁଃ ସକଲାଶ୍ଚ ମହୀଧରାଃ ।
ଜଯେତି ଦେଵାଶ୍ଚ ମୁଦା ତାମୂଚୁଃ ସିଂହଵାହିନୀମ୍ ॥ ୨.୩୪॥
ତୁଷ୍ଟୁଵୁର୍ମୁନଯଶ୍ଚୈନାଂ ଭକ୍ତିନମ୍ରାତ୍ମମୂର୍ତଯଃ ।
ଦୃଷ୍ଟ୍ଵା ସମସ୍ତଂ ସଙ୍କ୍ଷୁବ୍ଧଂ ତ୍ରୈଲୋକ୍ଯମମରାରଯଃ ॥ ୨.୩୫॥
ସନ୍ନଦ୍ଧାଖିଲସୈନ୍ଯାସ୍ତେ ସମୁତ୍ତସ୍ଥୁରୁଦାଯୁଧାଃ ।
ଆଃ କିମେତଦିତି କ୍ରୋଧାଦାଭାଷ୍ଯ ମହିଷାସୁରଃ ॥ ୨.୩୬॥
ଅଭ୍ଯଧାଵତ ତଂ ଶବ୍ଦମଶେଷୈରସୁରୈର୍ଵୃତଃ ।
ସ ଦଦର୍ଶ ତତୋ ଦେଵୀଂ ଵ୍ଯାପ୍ତଲୋକତ୍ରଯାଂ ତ୍ଵିଷା ॥ ୨.୩୭॥
ପାଦାକ୍ରାନ୍ତ୍ଯା ନତଭୁଵଂ କିରୀଟୋଲ୍ଲିଖିତାମ୍ବରାମ୍ ।
କ୍ଷୋଭିତାଶେଷପାତାଲାଂ ଧନୁର୍ଜ୍ଯାନିଃସ୍ଵନେନ ତାମ୍ ॥ ୨.୩୮॥
ଦିଶୋ ଭୁଜସହସ୍ରେଣ ସମନ୍ତାଦ୍ଵ୍ଯାପ୍ଯ ସଂସ୍ଥିତାମ୍ ।
ତତଃ ପ୍ରଵଵୃତେ ଯୁଦ୍ଧଂ ତଯା ଦେଵ୍ଯା ସୁରଦ୍ଵିଷାମ୍ ॥ ୨.୩୯॥
ଶସ୍ତ୍ରାସ୍ତ୍ରୈର୍ବହୁଧା ମୁକ୍ତୈରାଦୀପିତଦିଗନ୍ତରମ୍ ।
ମହିଷାସୁରସେନାନୀଶ୍ଚିକ୍ଷୁରାଖ୍ଯୋ ମହାସୁରଃ ॥ ୨.୪୦॥
ଯୁଯୁଧେ ଚାମରଶ୍ଚାନ୍ଯୈଶ୍ଚତୁରଙ୍ଗବଲାନ୍ଵିତଃ ।
ରଥାନାମଯୁତୈଃ ଷଡ୍ଭିରୁଦଗ୍ରାଖ୍ଯୋ ମହାସୁରଃ ॥ ୨.୪୧॥
ଅଯୁଧ୍ଯତାଯୁତାନାଂ ଚ ସହସ୍ରେଣ ମହାହନୁଃ ।
ପଞ୍ଚାଶଦ୍ଭିଶ୍ଚ ନିଯୁତୈରସିଲୋମା ମହାସୁରଃ ॥ ୨.୪୨॥
ଅଯୁତାନାଂ ଶତୈଃ ଷଡ୍ଭିର୍ବାଷ୍କଲୋ ଯୁଯୁଧେ ରଣେ ।
ଗଜଵାଜିସହସ୍ରୌଘୈରନେକୈଃ ପରିଵାରିତଃ ॥ ୨.୪୩॥
ଵୃତୋ ରଥାନାଂ କୋଟ୍ଯା ଚ ଯୁଦ୍ଧେ ତସ୍ମିନ୍ନଯୁଧ୍ଯତ ।
ବିଡାଲାଖ୍ଯୋଽଯୁତାନାଂ ଚ ପଞ୍ଚାଶଦ୍ଭିରଥାଯୁତୈଃ ॥ ୨.୪୪॥
ଯୁଯୁଧେ ସଂଯୁଗେ ତତ୍ର ରଥାନାଂ ପରିଵାରିତଃ ।
ଅନ୍ଯେ ଚ ତତ୍ରାଯୁତଶୋ ରଥନାଗହଯୈର୍ଵୃତାଃ ॥ ୨.୪୫॥
ଯୁଯୁଧୁଃ ସଂଯୁଗେ ଦେଵ୍ଯା ସହ ତତ୍ର ମହାସୁରାଃ ।
କୋଟିକୋଟିସହସ୍ରୈସ୍ତୁ ରଥାନାଂ ଦନ୍ତିନାଂ ତଥା ॥ ୨.୪୬॥
ହଯାନାଂ ଚ ଵୃତୋ ଯୁଦ୍ଧେ ତତ୍ରାଭୂନ୍ମହିଷାସୁରଃ ।
ତୋମରୈର୍ଭିନ୍ଦିପାଲୈଶ୍ଚ ଶକ୍ତିଭିର୍ମୁସଲୈସ୍ତଥା ॥ ୨.୪୭॥
ଯୁଯୁଧୁଃ ସଂଯୁଗେ ଦେଵ୍ଯା ଖଡ୍ଗୈଃ ପରଶୁପଟ୍ଟିଶୈଃ ।
କେଚିଚ୍ଚ ଚିକ୍ଷିପୁଃ ଶକ୍ତୀଃ କେଚିତ୍ ପାଶାଂସ୍ତଥାପରେ ॥ ୨.୪୮॥
ଦେଵୀଂ ଖଡ୍ଗପ୍ରହାରୈସ୍ତୁ ତେ ତାଂ ହନ୍ତୁଂ ପ୍ରଚକ୍ରମୁଃ ।
ସାପି ଦେଵୀ ତତସ୍ତାନି ଶସ୍ତ୍ରାଣ୍ଯସ୍ତ୍ରାଣି ଚଣ୍ଡିକା ॥ ୨.୪୯॥
ଲୀଲଯୈଵ ପ୍ରଚିଚ୍ଛେଦ ନିଜଶସ୍ତ୍ରାସ୍ତ୍ରଵର୍ଷିଣୀ ।
ଅନାଯସ୍ତାନନା ଦେଵୀ ସ୍ତୂଯମାନା ସୁରର୍ଷିଭିଃ ॥ ୨.୫୦॥
ମୁମୋଚାସୁରଦେହେଷୁ ଶସ୍ତ୍ରାଣ୍ଯସ୍ତ୍ରାଣି ଚେଶ୍ଵରୀ ।
ସୋଽପି କ୍ରୁଦ୍ଧୋ ଧୁତସଟୋ ଦେଵ୍ଯା ଵାହନକେସରୀ ॥ ୨.୫୧॥
ଚଚାରାସୁରସୈନ୍ଯେଷୁ ଵନେଷ୍ଵିଵ ହୁତାଶନଃ ।
ନିଃଶ୍ଵାସାନ୍ ମୁମୁଚେ ଯାଂଶ୍ଚ ଯୁଧ୍ଯମାନା ରଣେଽମ୍ବିକା ॥ ୨.୫୨॥
ତ ଏଵ ସଦ୍ଯଃ ସମ୍ଭୂତା ଗଣାଃ ଶତସହସ୍ରଶଃ ।
ଯୁଯୁଧୁସ୍ତେ ପରଶୁଭିର୍ଭିନ୍ଦିପାଲାସିପଟ୍ଟିଶୈଃ ॥ ୨.୫୩॥
ନାଶଯନ୍ତୋଽସୁରଗଣାନ୍ ଦେଵୀଶକ୍ତ୍ଯୁପବୃଂହିତାଃ ।
ଅଵାଦଯନ୍ତ ପଟହାନ୍ ଗଣାଃ ଶଙ୍ଖାଂସ୍ତଥାପରେ ॥ ୨.୫୪॥
ମୃଦଙ୍ଗାଂଶ୍ଚ ତଥୈଵାନ୍ଯେ ତସ୍ମିନ୍ ଯୁଦ୍ଧମହୋତ୍ସଵେ ।
ତତୋ ଦେଵୀ ତ୍ରିଶୂଲେନ ଗଦଯା ଶକ୍ତିଵୃଷ୍ଟିଭିଃ ॥ ୨.୫୫॥
ଖଡ୍ଗାଦିଭିଶ୍ଚ ଶତଶୋ ନିଜଘାନ ମହାସୁରାନ୍ ।
ପାତଯାମାସ ଚୈଵାନ୍ଯାନ୍ ଘଣ୍ଟାସ୍ଵନଵିମୋହିତାନ୍ ॥ ୨.୫୬॥
ଅସୁରାନ୍ ଭୁଵି ପାଶେନ ବଦ୍ଧ୍ଵା ଚାନ୍ଯାନକର୍ଷଯତ୍ ।
କେଚିଦ୍ ଦ୍ଵିଧାକୃତାସ୍ତୀକ୍ଷ୍ଣୈଃ ଖଡ୍ଗପାତୈସ୍ତଥାପରେ ॥ ୨.୫୭॥
ଵିପୋଥିତା ନିପାତେନ ଗଦଯା ଭୁଵି ଶେରତେ ।
ଵେମୁଶ୍ଚ କେଚିଦ୍ରୁଧିରଂ ମୁସଲେନ ଭୃଶଂ ହତାଃ ॥ ୨.୫୮॥
କେଚିନ୍ନିପତିତା ଭୂମୌ ଭିନ୍ନାଃ ଶୂଲେନ ଵକ୍ଷସି ।
ନିରନ୍ତରାଃ ଶରୌଘେଣ କୃତାଃ କେଚିଦ୍ରଣାଜିରେ ॥ ୨.୫୯॥
ଶ୍ଯେନାନୁକାରିଣଃ ପ୍ରାଣାନ୍ ମୁମୁଚୁସ୍ତ୍ରିଦଶାର୍ଦନାଃ ।
କେଷାଞ୍ଚିଦ୍ ବାହଵଶ୍ଛିନ୍ନାଶ୍ଛିନ୍ନଗ୍ରୀଵାସ୍ତଥାପରେ ॥ ୨.୬୦॥
ଶିରାଂସି ପେତୁରନ୍ଯେଷାମନ୍ଯେ ମଧ୍ଯେ ଵିଦାରିତାଃ ।
ଵିଚ୍ଛିନ୍ନଜଙ୍ଘାସ୍ତ୍ଵପରେ ପେତୁରୁର୍ଵ୍ଯାଂ ମହାସୁରାଃ ॥ ୨.୬୧॥
ଏକବାହ୍ଵକ୍ଷିଚରଣାଃ କେଚିଦ୍ଦେଵ୍ଯା ଦ୍ଵିଧାକୃତାଃ ।
ଛିନ୍ନେଽପି ଚାନ୍ଯେ ଶିରସି ପତିତାଃ ପୁନରୁତ୍ଥିତାଃ ॥ ୨.୬୨॥
କବନ୍ଧା ଯୁଯୁଧୁର୍ଦେଵ୍ଯା ଗୃହୀତପରମାଯୁଧାଃ ।
ନନୃତୁଶ୍ଚାପରେ ତତ୍ର ଯୁଦ୍ଧେ ତୂର୍ଯଲଯାଶ୍ରିତାଃ ॥ ୨.୬୩॥
କବନ୍ଧାଶ୍ଛିନ୍ନଶିରସଃ ଖଡ୍ଗଶକ୍ତ୍ଯୃଷ୍ଟିପାଣଯଃ ।
ତିଷ୍ଠ ତିଷ୍ଠେତି ଭାଷନ୍ତୋ ଦେଵୀମନ୍ଯେ ମହାସୁରାଃ ॥ ୨.୬୪॥
ପାତିତୈ ରଥନାଗାଶ୍ଵୈରସୁରୈଶ୍ଚ ଵସୁନ୍ଧରା ।
ଅଗମ୍ଯା ସାଭଵତ୍ତତ୍ର ଯତ୍ରାଭୂତ୍ ସ ମହାରଣଃ ॥ ୨.୬୫॥
ଶୋଣିତୌଘା ମହାନଦ୍ଯଃ ସଦ୍ଯସ୍ତତ୍ର ପ୍ରସୁସ୍ରୁଵୁଃ ।
ମଧ୍ଯେ ଚାସୁରସୈନ୍ଯସ୍ଯ ଵାରଣାସୁରଵାଜିନାମ୍ ॥ ୨.୬୬॥
କ୍ଷଣେନ ତନ୍ମହାସୈନ୍ଯମସୁରାଣାଂ ତଥାମ୍ବିକା ।
ନିନ୍ଯେ କ୍ଷଯଂ ଯଥା ଵହ୍ନିସ୍ତୃଣଦାରୁମହାଚଯମ୍ ॥ ୨.୬୭॥
ସ ଚ ସିଂହୋ ମହାନାଦମୁତ୍ସୃଜନ୍ ଧୁତକେସରଃ ।
ଶରୀରେଭ୍ଯୋଽମରାରୀଣାମସୂନିଵ ଵିଚିନ୍ଵତି ॥ ୨.୬୮॥
ଦେଵ୍ଯା ଗଣୈଶ୍ଚ ତୈସ୍ତତ୍ର କୃତଂ ଯୁଦ୍ଧଂ ତଥାସୁରୈଃ ।
ଯଥୈଷାଂ ତୁତୁଷୁର୍ଦେଵାଃ ପୁଷ୍ପଵୃଷ୍ଟିମୁଚୋ ଦିଵି ॥ ୨.୬୯॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ମହିଷାସୁରସୈନ୍ଯଵଧୋ ନାମ ଦ୍ଵିତୀଯୋଽଧ୍ଯାଯଃ ॥ ୨॥
ଉଵାଚ୧, ଅର୍ଧଶ୍ଲୋକାଃ ୬୮, ଶ୍ଲୋକାଃ ୬୯, ଏଵମାଦିତଃ ॥ ୧୭୩॥

। ଧ୍ଯାନମ୍ ।
ଓଁ ଉଦ୍ଯଦ୍ଭାନୁସହସ୍ରକାନ୍ତିମରୁଣକ୍ଷୌମାଂ ଶିରୋମାଲିକାଂ
ରକ୍ତାଲିପ୍ତପଯୋଧରାଂ ଜପଵଟୀଂ ଵିଦ୍ଯାମଭୀତିଂ ଵରମ୍ ।
ହସ୍ତାବ୍ଜୈର୍ଦଧତୀଂ ତ୍ରିନେତ୍ରଵିଲସଦ୍ଵକ୍ତ୍ରାରଵିନ୍ଦଶ୍ରିଯଂ
ଦେଵୀଂ ବଦ୍ଧହିମାଂଶୁରତ୍ନମୁକୁଟାଂ ଵନ୍ଦେଽରଵିନ୍ଦସ୍ଥିତାମ୍ ।
ଓଁ ଋଷିରୁଵାଚ ॥ ୩.୧॥
ନିହନ୍ଯମାନଂ ତତ୍ସୈନ୍ଯମଵଲୋକ୍ଯ ମହାସୁରଃ ।
ସେନାନୀଶ୍ଚିକ୍ଷୁରଃ କୋପାଦ୍ଯଯୌ ଯୋଦ୍ଧୁମଥାମ୍ବିକାମ୍ ॥ ୩.୨॥
ସ ଦେଵୀଂ ଶରଵର୍ଷେଣ ଵଵର୍ଷ ସମରେଽସୁରଃ ।
ଯଥା ମେରୁଗିରେଃ ଶ‍ୃଙ୍ଗଂ ତୋଯଵର୍ଷେଣ ତୋଯଦଃ ॥ ୩.୩॥
ତସ୍ଯ ଛିତ୍ଵା ତତୋ ଦେଵୀ ଲୀଲଯୈଵ ଶରୋତ୍କରାନ୍ ।
ଜଘାନ ତୁରଗାନ୍ବାଣୈର୍ଯନ୍ତାରଂ ଚୈଵ ଵାଜିନାମ୍ ॥ ୩.୪॥
ଚିଚ୍ଛେଦ ଚ ଧନୁଃ ସଦ୍ଯୋ ଧ୍ଵଜଂ ଚାତିସମୁଚ୍ଛୃତମ୍ ।
ଵିଵ୍ଯାଧ ଚୈଵ ଗାତ୍ରେଷୁ ଛିନ୍ନଧନ୍ଵାନମାଶୁଗୈଃ ॥ ୩.୫॥
ସଚ୍ଛିନ୍ନଧନ୍ଵା ଵିରଥୋ ହତାଶ୍ଵୋ ହତସାରଥିଃ ।
ଅଭ୍ଯଧାଵତ ତାଂ ଦେଵୀଂ ଖଡ୍ଗଚର୍ମଧରୋଽସୁରଃ ॥ ୩.୬॥
ସିଂହମାହତ୍ଯ ଖଡ୍ଗେନ ତୀକ୍ଷ୍ଣଧାରେଣ ମୂର୍ଧନି ।
ଆଜଘାନ ଭୁଜେ ସଵ୍ଯେ ଦେଵୀମପ୍ଯତିଵେଗଵାନ୍ ॥ ୩.୭॥
ତସ୍ଯାଃ ଖଡ୍ଗୋ ଭୁଜଂ ପ୍ରାପ୍ଯ ପଫାଲ ନୃପନନ୍ଦନ ।
ତତୋ ଜଗ୍ରାହ ଶୂଲଂ ସ କୋପାଦରୁଣଲୋଚନଃ ॥ ୩.୮॥
ଚିକ୍ଷେପ ଚ ତତସ୍ତତ୍ତୁ ଭଦ୍ରକାଲ୍ଯାଂ ମହାସୁରଃ ।
ଜାଜ୍ଵଲ୍ଯମାନଂ ତେଜୋଭୀ ରଵିବିମ୍ବମିଵାମ୍ବରାତ୍ ॥ ୩.୯॥
ଦୃଷ୍ଟ୍ଵା ତଦାପତଚ୍ଛୂଲଂ ଦେଵୀ ଶୂଲମମୁଞ୍ଚତ ।
ତେନ ତଚ୍ଛତଧା ନୀତଂ ଶୂଲଂ ସ ଚ ମହାସୁରଃ ॥ ୩.୧୦॥
ହତେ ତସ୍ମିନ୍ମହାଵୀର୍ଯେ ମହିଷସ୍ଯ ଚମୂପତୌ ।
ଆଜଗାମ ଗଜାରୂଢଶ୍ଚାମରସ୍ତ୍ରିଦଶାର୍ଦନଃ ॥ ୩.୧୧॥
ସୋଽପି ଶକ୍ତିଂ ମୁମୋଚାଥ ଦେଵ୍ଯାସ୍ତାମମ୍ବିକା ଦ୍ରୁତମ୍ ।
ହୁଙ୍କାରାଭିହତାଂ ଭୂମୌ ପାତଯାମାସ ନିଷ୍ପ୍ରଭାମ୍ ॥ ୩.୧୨॥
ଭଗ୍ନାଂ ଶକ୍ତିଂ ନିପତିତାଂ ଦୃଷ୍ଟ୍ଵା କ୍ରୋଧସମନ୍ଵିତଃ ।
ଚିକ୍ଷେପ ଚାମରଃ ଶୂଲଂ ବାଣୈସ୍ତଦପି ସାଚ୍ଛିନତ୍ ॥ ୩.୧୩॥
ତତଃ ସିଂହଃ ସମୁତ୍ପତ୍ଯ ଗଜକୁମ୍ଭାନ୍ତରେ ସ୍ଥିତଃ ।
ବାହୁଯୁଦ୍ଧେନ ଯୁଯୁଧେ ତେନୋଚ୍ଚୈସ୍ତ୍ରିଦଶାରିଣା ॥ ୩.୧୪॥
ଯୁଧ୍ଯମାନୌ ତତସ୍ତୌ ତୁ ତସ୍ମାନ୍ନାଗାନ୍ମହୀଂ ଗତୌ ।
ଯୁଯୁଧାତେଽତିସଂରବ୍ଧୌ ପ୍ରହାରୈରତିଦାରୁଣୈଃ ॥ ୩.୧୫॥
ତତୋ ଵେଗାତ୍ ଖମୁତ୍ପତ୍ଯ ନିପତ୍ଯ ଚ ମୃଗାରିଣା ।
କରପ୍ରହାରେଣ ଶିରଶ୍ଚାମରସ୍ଯ ପୃଥକ୍ କୃତମ୍ ॥ ୩.୧୬॥
ଉଦଗ୍ରଶ୍ଚ ରଣେ ଦେଵ୍ଯା ଶିଲାଵୃକ୍ଷାଦିଭିର୍ହତଃ ।
ଦନ୍ତମୁଷ୍ଟିତଲୈଶ୍ଚୈଵ କରାଲଶ୍ଚ ନିପାତିତଃ ॥ ୩.୧୭॥
ଦେଵୀ କ୍ରୁଦ୍ଧା ଗଦାପାତୈଶ୍ଚୂର୍ଣଯାମାସ ଚୋଦ୍ଧତମ୍ ।
ବାଷ୍କଲଂ ଭିନ୍ଦିପାଲେନ ବାଣୈସ୍ତାମ୍ରଂ ତଥାନ୍ଧକମ୍ ॥ ୩.୧୮॥
ଉଗ୍ରାସ୍ଯମୁଗ୍ରଵୀର୍ଯଂ ଚ ତଥୈଵ ଚ ମହାହନୁମ୍ ।
ତ୍ରିନେତ୍ରା ଚ ତ୍ରିଶୂଲେନ ଜଘାନ ପରମେଶ୍ଵରୀ ॥ ୩.୧୯॥
ବିଡାଲସ୍ଯାସିନା କାଯାତ୍ ପାତଯାମାସ ଵୈ ଶିରଃ ।
ଦୁର୍ଧରଂ ଦୁର୍ମୁଖଂ ଚୋଭୌ ଶରୈର୍ନିନ୍ଯେ ଯମକ୍ଷଯମ୍ ॥ ୩.୨୦॥
ଏଵଂ ସଙ୍କ୍ଷୀଯମାଣେ ତୁ ସ୍ଵସୈନ୍ଯେ ମହିଷାସୁରଃ ।
ମାହିଷେଣ ସ୍ଵରୂପେଣ ତ୍ରାସଯାମାସ ତାନ୍ ଗଣାନ୍ ॥ ୩.୨୧॥
କାଂଶ୍ଚିତ୍ତୁଣ୍ଡପ୍ରହାରେଣ ଖୁରକ୍ଷେପୈସ୍ତଥାପରାନ୍ ।
ଲାଙ୍ଗୂଲତାଡିତାଂଶ୍ଚାନ୍ଯାନ୍ ଶ‍ୃଙ୍ଗାଭ୍ଯାଂ ଚ ଵିଦାରିତାନ୍ ॥ ୩.୨୨॥
ଵେଗେନ କାଂଶ୍ଚିଦପରାନ୍ନାଦେନ ଭ୍ରମଣେନ ଚ ।
ନିଃଶ୍ଵାସପଵନେନାନ୍ଯାନ୍ପାତଯାମାସ ଭୂତଲେ ॥ ୩.୨୩॥
ନିପାତ୍ଯ ପ୍ରମଥାନୀକମଭ୍ଯଧାଵତ ସୋଽସୁରଃ ।
ସିଂହଂ ହନ୍ତୁଂ ମହାଦେଵ୍ଯାଃ କୋପଂ ଚକ୍ରେ ତତୋଽମ୍ବିକା ॥ ୩.୨୪॥
ସୋଽପି କୋପାନ୍ମହାଵୀର୍ଯଃ ଖୁରକ୍ଷୁଣ୍ଣମହୀତଲଃ ।
ଶ‍ୃଙ୍ଗାଭ୍ଯାଂ ପର୍ଵତାନୁଚ୍ଚାଂଶ୍ଚିକ୍ଷେପ ଚ ନନାଦ ଚ ॥ ୩.୨୫॥
ଵେଗଭ୍ରମଣଵିକ୍ଷୁଣ୍ଣା ମହୀ ତସ୍ଯ ଵ୍ଯଶୀର୍ଯତ ।
ଲାଙ୍ଗୂଲେନାହତଶ୍ଚାବ୍ଧିଃ ପ୍ଲାଵଯାମାସ ସର୍ଵତଃ ॥ ୩.୨୬॥
ଧୁତଶ‍ୃଙ୍ଗଵିଭିନ୍ନାଶ୍ଚ ଖଣ୍ଡଂ ଖଣ୍ଡଂ ଯଯୁର୍ଘନାଃ ।
ଶ୍ଵାସାନିଲାସ୍ତାଃ ଶତଶୋ ନିପେତୁର୍ନଭସୋଽଚଲାଃ ॥ ୩.୨୭॥
ଇତି କ୍ରୋଧସମାଧ୍ମାତମାପତନ୍ତଂ ମହାସୁରମ୍ ।
ଦୃଷ୍ଟ୍ଵା ସା ଚଣ୍ଡିକା କୋପଂ ତଦ୍ଵଧାଯ ତଦାକରୋତ୍ ॥ ୩.୨୮॥
ସା କ୍ଷିପ୍ତ୍ଵା ତସ୍ଯ ଵୈ ପାଶଂ ତଂ ବବନ୍ଧ ମହାସୁରମ୍ ।
ତତ୍ଯାଜ ମାହିଷଂ ରୂପଂ ସୋଽପି ବଦ୍ଧୋ ମହାମୃଧେ ॥ ୩.୨୯॥
ତତଃ ସିଂହୋଽଭଵତ୍ସଦ୍ଯୋ ଯାଵତ୍ତସ୍ଯାମ୍ବିକା ଶିରଃ ।
ଛିନତ୍ତି ତାଵତ୍ ପୁରୁଷଃ ଖଡ୍ଗପାଣିରଦୃଶ୍ଯତ ॥ ୩.୩୦॥
ତତ ଏଵାଶୁ ପୁରୁଷଂ ଦେଵୀ ଚିଚ୍ଛେଦ ସାଯକୈଃ ।
ତଂ ଖଡ୍ଗଚର୍ମଣା ସାର୍ଧଂ ତତଃ ସୋଽଭୂନ୍ମହାଗଜଃ ॥ ୩.୩୧॥
କରେଣ ଚ ମହାସିଂହଂ ତଂ ଚକର୍ଷ ଜଗର୍ଜ ଚ ।
କର୍ଷତସ୍ତୁ କରଂ ଦେଵୀ ଖଡ୍ଗେନ ନିରକୃନ୍ତତ ॥ ୩.୩୨॥
ତତୋ ମହାସୁରୋ ଭୂଯୋ ମାହିଷଂ ଵପୁରାସ୍ଥିତଃ ।
ତଥୈଵ କ୍ଷୋଭଯାମାସ ତ୍ରୈଲୋକ୍ଯଂ ସଚରାଚରମ୍ ॥ ୩.୩୩॥
ତତଃ କ୍ରୁଦ୍ଧା ଜଗନ୍ମାତା ଚଣ୍ଡିକା ପାନମୁତ୍ତମମ୍ ।
ପପୌ ପୁନଃ ପୁନଶ୍ଚୈଵ ଜହାସାରୁଣଲୋଚନା ॥ ୩.୩୪॥
ନନର୍ଦ ଚାସୁରଃ ସୋଽପି ବଲଵୀର୍ଯମଦୋଦ୍ଧତଃ ।
ଵିଷାଣାଭ୍ଯାଂ ଚ ଚିକ୍ଷେପ ଚଣ୍ଡିକାଂ ପ୍ରତି ଭୂଧରାନ୍ ॥ ୩.୩୫॥
ସା ଚ ତାନ୍ପ୍ରହିତାଂସ୍ତେନ ଚୂର୍ଣଯନ୍ତୀ ଶରୋତ୍କରୈଃ ।
ଉଵାଚତଂ ମଦୋଦ୍ଧୂତମୁଖରାଗାକୁଲାକ୍ଷରମ୍ ॥ ୩.୩୬॥
ଦେଵ୍ଯୁଵାଚ॥ ୩.୩୭॥
ଗର୍ଜ ଗର୍ଜ କ୍ଷଣଂ ମୂଢ ମଧୁ ଯାଵତ୍ପିବାମ୍ଯହମ୍ ।
ମଯା ତ୍ଵଯି ହତେଽତ୍ରୈଵ ଗର୍ଜିଷ୍ଯନ୍ତ୍ଯାଶୁ ଦେଵତାଃ ॥ ୩.୩୮॥
ଋଷିରୁଵାଚ ॥ ୩.୩୯॥
ଏଵମୁକ୍ତ୍ଵା ସମୁତ୍ପତ୍ଯ ସାରୂଢା ତଂ ମହାସୁରମ୍ ।
ପାଦେନାକ୍ରମ୍ଯ କଣ୍ଠେ ଚ ଶୂଲେନୈନମତାଡଯତ୍ ॥ ୩.୪୦॥
ତତଃ ସୋଽପି ପଦାକ୍ରାନ୍ତସ୍ତଯା ନିଜମୁଖାତ୍ତଦା ।
ଅର୍ଧନିଷ୍କ୍ରାନ୍ତ ଏଵାସୀଦ୍ଦେଵ୍ଯା ଵୀର୍ଯେଣ ସଂଵୃତଃ ॥ ୩.୪୧॥
ଅର୍ଧନିଷ୍କ୍ରାନ୍ତ ଏଵାସୌ ଯୁଧ୍ଯମାନୋ ମହାସୁରଃ ।
ତଯା ମହାସିନା ଦେଵ୍ଯା ଶିରଶ୍ଛିତ୍ତ୍ଵା ନିପାତିତଃ ॥ ୩.୪୨॥
ତତୋ ହାହାକୃତଂ ସର୍ଵଂ ଦୈତ୍ଯସୈନ୍ଯଂ ନନାଶ ତତ୍ ।
ପ୍ରହର୍ଷଂ ଚ ପରଂ ଜଗ୍ମୁଃ ସକଲା ଦେଵତାଗଣାଃ ॥ ୩.୪୩॥
ତୁଷ୍ଟୁଵୁସ୍ତାଂ ସୁରା ଦେଵୀଂ ସହଦିଵ୍ଯୈର୍ମହର୍ଷିଭିଃ ।
ଜଗୁର୍ଗନ୍ଧର୍ଵପତଯୋ ନନୃତୁଶ୍ଚାପ୍ସରୋଗଣାଃ ॥ ୩.୪୪॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ମହିଷାସୁରଵଧୋ ନାମ ତୃତୀଯୋଽଧ୍ଯାଯଃ ॥ ୩॥
ଉଵାଚ୩, ଅର୍ଧଶ୍ଲୋକାଃ ୪୧, ଶ୍ଲୋକାଃ ୪୪, ଏଵମାଦିତଃ ॥ ୨୧୭॥

। ଧ୍ଯାନମ୍ ।
ଓଁ କାଲାଭ୍ରାଭାଂ କଟାକ୍ଷୈରରିକୁଲଭଯଦାଂ ମୌଲିବଦ୍ଧେନ୍ଦୁରେଖାଂ
ଶଙ୍ଖଂ ଚକ୍ରଂ କୃପାଣଂ ତ୍ରିଶିଖମପି କରୈରୁଦ୍ଵହନ୍ତୀଂ ତ୍ରିନେତ୍ରାମ୍ ।
ସିଂହସ୍କନ୍ଧାଧିରୂଢାଂ ତ୍ରିଭୁଵନମଖିଲଂ ତେଜସା ପୂରଯନ୍ତୀଂ
ଧ୍ଯାଯେଦ୍ଦୁର୍ଗାଂ ଜଯାଖ୍ଯାଂ ତ୍ରିଦଶପରିଵୃତାଂ ସେଵିତାଂ ସିଦ୍ଧିକାମୈଃ ॥
ଓଁ ଋଷିରୁଵାଚ ॥ ୪.୧॥
ଶକ୍ରାଦଯଃ ସୁରଗଣା ନିହତେଽତିଵୀର୍ଯେ
ତସ୍ମିନ୍ଦୁରାତ୍ମନି ସୁରାରିବଲେ ଚ ଦେଵ୍ଯା ।
ତାଂ ତୁଷ୍ଟୁଵୁଃ ପ୍ରଣତିନମ୍ରଶିରୋଧରାଂସା
ଵାଗ୍ଭିଃ ପ୍ରହର୍ଷପୁଲକୋଦ୍ଗମଚାରୁଦେହାଃ ॥ ୪.୨॥
ଦେଵ୍ଯା ଯଯା ତତମିଦଂ ଜଗଦାତ୍ମଶକ୍ତ୍ଯା
ନିଃଶେଷଦେଵଗଣଶକ୍ତିସମୂହମୂର୍ତ୍ଯା ।
ତାମମ୍ବିକାମଖିଲଦେଵମହର୍ଷିପୂଜ୍ଯାଂ
ଭକ୍ତ୍ଯା ନତାଃ ସ୍ମ ଵିଦଧାତୁ ଶୁଭାନି ସା ନଃ ॥ ୪.୩॥
ଯସ୍ଯାଃ ପ୍ରଭାଵମତୁଲଂ ଭଗଵାନନନ୍ତୋ
ବ୍ରହ୍ମା ହରଶ୍ଚ ନ ହି ଵକ୍ତୁମଲଂ ବଲଂ ଚ ।
ସା ଚଣ୍ଡିକାଖିଲଜଗତ୍ପରିପାଲନାଯ
ନାଶାଯ ଚାଶୁଭଭଯସ୍ଯ ମତିଂ କରୋତୁ ॥ ୪.୪॥
ଯା ଶ୍ରୀଃ ସ୍ଵଯଂ ସୁକୃତିନାଂ ଭଵନେଷ୍ଵଲକ୍ଷ୍ମୀଃ
ପାପାତ୍ମନାଂ କୃତଧିଯାଂ ହୃଦଯେଷୁ ବୁଦ୍ଧିଃ ।
ଶ୍ରଦ୍ଧା ସତାଂ କୁଲଜନପ୍ରଭଵସ୍ଯ ଲଜ୍ଜା
ତାଂ ତ୍ଵାଂ ନତାଃ ସ୍ମ ପରିପାଲଯ ଦେଵି ଵିଶ୍ଵମ୍ ॥ ୪.୫॥
କିଂ ଵର୍ଣଯାମ ତଵ ରୂପମଚିନ୍ତ୍ଯମେତତ୍
କିଞ୍ଚାତିଵୀର୍ଯମସୁରକ୍ଷଯକାରି ଭୂରି ।
କିଂ ଚାହଵେଷୁ ଚରିତାନି ତଵାତି ଯାନି
ସର୍ଵେଷୁ ଦେଵ୍ଯସୁରଦେଵଗଣାଦିକେଷୁ ॥ ୪.୬॥
ହେତୁଃ ସମସ୍ତଜଗତାଂ ତ୍ରିଗୁଣାପି ଦୋଷୈ-
ର୍ନ ଜ୍ଞାଯସେ ହରିହରାଦିଭିରପ୍ଯପାରା ।
ସର୍ଵାଶ୍ରଯାଖିଲମିଦଂ ଜଗଦଂଶଭୂତ-
ମଵ୍ଯାକୃତା ହି ପରମା ପ୍ରକୃତିସ୍ତ୍ଵମାଦ୍ଯା ॥ ୪.୭॥
ଯସ୍ଯାଃ ସମସ୍ତସୁରତା ସମୁଦୀରଣେନ
ତୃପ୍ତିଂ ପ୍ରଯାତି ସକଲେଷୁ ମଖେଷୁ ଦେଵି ।
ସ୍ଵାହାସି ଵୈ ପିତୃଗଣସ୍ଯ ଚ ତୃପ୍ତିହେତୁ-
ରୁଚ୍ଚାର୍ଯସେ ତ୍ଵମତ ଏଵ ଜନୈଃ ସ୍ଵଧା ଚ ॥ ୪.୮॥
ଯା ମୁକ୍ତିହେତୁରଵିଚିନ୍ତ୍ଯମହାଵ୍ରତା ତ୍ଵଂ
ଅଭ୍ଯସ୍ଯସେ ସୁନିଯତେନ୍ଦ୍ରିଯତତ୍ତ୍ଵସାରୈଃ ।
ମୋକ୍ଷାର୍ଥିଭିର୍ମୁନିଭିରସ୍ତସମସ୍ତଦୋଷୈ-
ର୍ଵିଦ୍ଯାସି ସା ଭଗଵତୀ ପରମା ହି ଦେଵି ॥ ୪.୯॥
ଶବ୍ଦାତ୍ମିକା ସୁଵିମଲର୍ଗ୍ଯଜୁଷାଂ ନିଧାନ-
ମୁଦ୍ଗୀଥରମ୍ଯପଦପାଠଵତାଂ ଚ ସାମ୍ନାମ୍ ।
ଦେଵି ତ୍ରଯୀ ଭଗଵତୀ ଭଵଭାଵନାଯ
ଵାର୍ତାସି ସର୍ଵଜଗତାଂ ପରମାର୍ତିହନ୍ତ୍ରୀ ॥ ୪.୧୦॥
ମେଧାସି ଦେଵି ଵିଦିତାଖିଲଶାସ୍ତ୍ରସାରା
ଦୁର୍ଗାସି ଦୁର୍ଗଭଵସାଗରନୌରସଙ୍ଗା ।
ଶ୍ରୀଃ କୈଟଭାରିହୃଦଯୈକକୃତାଧିଵାସା
ଗୌରୀ ତ୍ଵମେଵ ଶଶିମୌଲିକୃତପ୍ରତିଷ୍ଠା ॥ ୪.୧୧॥
ଈଷତ୍ସହାସମମଲଂ ପରିପୂର୍ଣଚନ୍ଦ୍ର-
ବିମ୍ବାନୁକାରି କନକୋତ୍ତମକାନ୍ତିକାନ୍ତମ୍ ।
ଅତ୍ଯଦ୍ଭୁତଂ ପ୍ରହୃତମାତ୍ତରୁଷା ତଥାପି
ଵକ୍ତ୍ରଂ ଵିଲୋକ୍ଯ ସହସା ମହିଷାସୁରେଣ ॥ ୪.୧୨॥
ଦୃଷ୍ଟ୍ଵା ତୁ ଦେଵି କୁପିତଂ ଭ୍ରୁକୁଟୀକରାଲ-
ମୁଦ୍ଯଚ୍ଛଶାଙ୍କସଦୃଶଚ୍ଛଵି ଯନ୍ନ ସଦ୍ଯଃ ।
ପ୍ରାଣାନ୍ ମୁମୋଚ ମହିଷସ୍ତଦତୀଵ ଚିତ୍ରଂ
କୈର୍ଜୀଵ୍ଯତେ ହି କୁପିତାନ୍ତକଦର୍ଶନେନ ॥ ୪.୧୩॥
ଦେଵି ପ୍ରସୀଦ ପରମା ଭଵତୀ ଭଵାଯ
ସଦ୍ଯୋ ଵିନାଶଯସି କୋପଵତୀ କୁଲାନି ।
ଵିଜ୍ଞାତମେତଦଧୁନୈଵ ଯଦସ୍ତମେତ-
ନ୍ନୀତଂ ବଲଂ ସୁଵିପୁଲଂ ମହିଷାସୁରସ୍ଯ ॥ ୪.୧୪॥
ତେ ସମ୍ମତା ଜନପଦେଷୁ ଧନାନି ତେଷାଂ
ତେଷାଂ ଯଶାଂସି ନ ଚ ସୀଦତି ବନ୍ଧୁଵର୍ଗଃ ।
ଧନ୍ଯାସ୍ତ ଏଵ ନିଭୃତାତ୍ମଜଭୃତ୍ଯଦାରା
ଯେଷାଂ ସଦାଭ୍ଯୁଦଯଦା ଭଵତୀ ପ୍ରସନ୍ନା ॥ ୪.୧୫॥
ଧର୍ମ୍ଯାଣି ଦେଵି ସକଲାନି ସଦୈଵ କର୍ମା-
ଣ୍ଯତ୍ଯାଦୃତଃ ପ୍ରତିଦିନଂ ସୁକୃତୀ କରୋତି ।
ସ୍ଵର୍ଗଂ ପ୍ରଯାତି ଚ ତତୋ ଭଵତୀ ପ୍ରସାଦା-
ଲ୍ଲୋକତ୍ରଯେଽପି ଫଲଦା ନନୁ ଦେଵି ତେନ ॥ ୪.୧୬॥
ଦୁର୍ଗେ ସ୍ମୃତା ହରସି ଭୀତିମଶେଷଜନ୍ତୋଃ
ସ୍ଵସ୍ଥୈଃ ସ୍ମୃତା ମତିମତୀଵ ଶୁଭାଂ ଦଦାସି ।
ଦାରିଦ୍ର୍ଯଦୁଃଖଭଯହାରିଣି କା ତ୍ଵଦନ୍ଯା
ସର୍ଵୋପକାରକରଣାଯ ସଦାର୍ଦ୍ରଚିତ୍ତା ॥ ୪.୧୭॥
ଏଭିର୍ହତୈର୍ଜଗଦୁପୈତି ସୁଖଂ ତଥୈତେ
କୁର୍ଵନ୍ତୁ ନାମ ନରକାଯ ଚିରାଯ ପାପମ୍ ।
ସଙ୍ଗ୍ରାମମୃତ୍ଯୁମଧିଗମ୍ଯ ଦିଵଂ ପ୍ରଯାନ୍ତୁ
ମତ୍ଵେତି ନୂନମହିତାନ୍ଵିନିହଂସି ଦେଵି ॥ ୪.୧୮॥
ଦୃଷ୍ଟ୍ଵୈଵ କିଂ ନ ଭଵତୀ ପ୍ରକରୋତି ଭସ୍ମ
ସର୍ଵାସୁରାନରିଷୁ ଯତ୍ପ୍ରହିଣୋଷି ଶସ୍ତ୍ରମ୍ ।
ଲୋକାନ୍ପ୍ରଯାନ୍ତୁ ରିପଵୋଽପି ହି ଶସ୍ତ୍ରପୂତା
ଇତ୍ଥଂ ମତିର୍ଭଵତି ତେଷ୍ଵହିତେଷୁସାଧ୍ଵୀ ॥ ୪.୧୯॥
ଖଡ୍ଗପ୍ରଭାନିକରଵିସ୍ଫୁରଣୈସ୍ତଥୋଗ୍ରୈଃ
ଶୂଲାଗ୍ରକାନ୍ତିନିଵହେନ ଦୃଶୋଽସୁରାଣାମ୍ ।
ଯନ୍ନାଗତା ଵିଲଯମଂଶୁମଦିନ୍ଦୁଖଣ୍ଡ-
ଯୋଗ୍ଯାନନଂ ତଵ ଵିଲୋକଯତାଂ ତଦେତତ୍ ॥ ୪.୨୦॥
ଦୁର୍ଵୃତ୍ତଵୃତ୍ତଶମନଂ ତଵ ଦେଵି ଶୀଲଂ
ରୂପଂ ତଥୈତଦଵିଚିନ୍ତ୍ଯମତୁଲ୍ଯମନ୍ଯୈଃ ।
ଵୀର୍ଯଂ ଚ ହନ୍ତୃ ହୃତଦେଵପରାକ୍ରମାଣାଂ
ଵୈରିଷ୍ଵପି ପ୍ରକଟିତୈଵ ଦଯା ତ୍ଵଯେତ୍ଥମ୍ ॥ ୪.୨୧॥
କେନୋପମା ଭଵତୁ ତେଽସ୍ଯ ପରାକ୍ରମସ୍ଯ
ରୂପଂ ଚ ଶତ୍ରୁଭଯକାର୍ଯତିହାରି କୁତ୍ର ।
ଚିତ୍ତେ କୃପା ସମରନିଷ୍ଠୁରତା ଚ ଦୃଷ୍ଟା
ତ୍ଵଯ୍ଯେଵ ଦେଵି ଵରଦେ ଭୁଵନତ୍ରଯେଽପି ॥ ୪.୨୨॥
ତ୍ରୈଲୋକ୍ଯମେତଦଖିଲଂ ରିପୁନାଶନେନ
ତ୍ରାତଂ ତ୍ଵଯା ସମରମୂର୍ଧନି ତେଽପି ହତ୍ଵା ।
ନୀତା ଦିଵଂ ରିପୁଗଣା ଭଯମପ୍ଯପାସ୍ତମ୍
ଅସ୍ମାକମୁନ୍ମଦସୁରାରିଭଵଂ ନମସ୍ତେ ॥ ୪.୨୩॥
ଶୂଲେନ ପାହି ନୋ ଦେଵି ପାହି ଖଡ୍ଗେନ ଚାମ୍ବିକେ ।
ଘଣ୍ଟାସ୍ଵନେନ ନଃ ପାହି ଚାପଜ୍ଯାନିଃସ୍ଵନେନ ଚ ॥ ୪.୨୪॥
ପ୍ରାଚ୍ଯାଂ ରକ୍ଷ ପ୍ରତୀଚ୍ଯାଂ ଚ ଚଣ୍ଡିକେ ରକ୍ଷ ଦକ୍ଷିଣେ ।
ଭ୍ରାମଣେନାତ୍ମଶୂଲସ୍ଯ ଉତ୍ତରସ୍ଯାଂ ତଥେଶ୍ଵରି ॥ ୪.୨୫॥
ସୌମ୍ଯାନି ଯାନି ରୂପାଣି ତ୍ରୈଲୋକ୍ଯେ ଵିଚରନ୍ତି ତେ ।
ଯାନି ଚାତ୍ଯନ୍ତଘୋରାଣି ତୈ ରକ୍ଷାସ୍ମାଂସ୍ତଥା ଭୁଵମ୍ ॥ ୪.୨୬॥
ଖଡ୍ଗଶୂଲଗଦାଦୀନି ଯାନି ଚାସ୍ତ୍ରାନି ତେଽମ୍ବିକେ ।
କରପଲ୍ଲଵସଙ୍ଗୀନି ତୈରସ୍ମାନ୍ରକ୍ଷ ସର୍ଵତଃ ॥ ୪.୨୭॥
ଋଷିରୁଵାଚ ॥ ୪.୨୮॥
ଏଵଂ ସ୍ତୁତା ସୁରୈର୍ଦିଵ୍ଯୈଃ କୁସୁମୈର୍ନନ୍ଦନୋଦ୍ଭଵୈଃ ।
ଅର୍ଚିତା ଜଗତାଂ ଧାତ୍ରୀ ତଥା ଗନ୍ଧାନୁଲେପନୈଃ ॥ ୪.୨୯॥
ଭକ୍ତ୍ଯା ସମସ୍ତୈସ୍ତ୍ରିଦଶୈର୍ଦିଵ୍ଯୈର୍ଧୂପୈଃ ସୁଧୂପିତା ।
ପ୍ରାହ ପ୍ରସାଦସୁମୁଖୀ ସମସ୍ତାନ୍ ପ୍ରଣତାନ୍ ସୁରାନ୍ ॥ ୪.୩୦॥
ଦେଵ୍ଯୁଵାଚ॥ ୪.୩୧॥
ଵ୍ରିଯତାଂ ତ୍ରିଦଶାଃ ସର୍ଵେ ଯଦସ୍ମତ୍ତୋଽଭିଵାଞ୍ଛିତମ୍ ॥ ୪.୩୨॥
ଦେଵା ଊଚୁଃ ॥ ୪.୩୩॥
ଭଗଵତ୍ଯା କୃତଂ ସର୍ଵଂ ନ କିଞ୍ଚିଦଵଶିଷ୍ଯତେ ॥ ୪.୩୪॥
ଯଦଯଂ ନିହତଃ ଶତ୍ରୁରସ୍ମାକଂ ମହିଷାସୁରଃ ।
ଯଦି ଚାପି ଵରୋ ଦେଯସ୍ତ୍ଵଯାସ୍ମାକଂ ମହେଶ୍ଵରି ॥ ୪.୩୫॥
ସଂସ୍ମୃତା ସଂସ୍ମୃତା ତ୍ଵଂ ନୋ ହିଂସେଥାଃ ପରମାପଦଃ ।
ଯଶ୍ଚ ମର୍ତ୍ଯଃ ସ୍ତଵୈରେଭିସ୍ତ୍ଵାଂ ସ୍ତୋଷ୍ଯତ୍ଯମଲାନନେ ॥ ୪.୩୬॥
ତସ୍ଯ ଵିତ୍ତର୍ଦ୍ଧିଵିଭଵୈର୍ଧନଦାରାଦିସମ୍ପଦାମ୍ ।
ଵୃଦ୍ଧଯେଽସ୍ମତ୍ପ୍ରସନ୍ନା ତ୍ଵଂ ଭଵେଥାଃ ସର୍ଵଦାମ୍ବିକେ ॥ ୪.୩୭॥
ଋଷିରୁଵାଚ ॥ ୪.୩୮॥
ଇତି ପ୍ରସାଦିତା ଦେଵୈର୍ଜଗତୋଽର୍ଥେ ତଥାତ୍ମନଃ ।
ତଥେତ୍ଯୁକ୍ତ୍ଵା ଭଦ୍ରକାଲୀ ବଭୂଵାନ୍ତର୍ହିତା ନୃପ ॥ ୪.୩୯॥
ଇତ୍ଯେତତ୍କଥିତଂ ଭୂପ ସମ୍ଭୂତା ସା ଯଥା ପୁରା ।
ଦେଵୀ ଦେଵଶରୀରେଭ୍ଯୋ ଜଗତ୍ତ୍ରଯହିତୈଷିଣୀ ॥ ୪.୪୦॥
ପୁନଶ୍ଚ ଗୌରୀଦେହାତ୍ସା ସମୁଦ୍ଭୂତା ଯଥାଭଵତ୍ ।
ଵଧାଯ ଦୁଷ୍ଟଦୈତ୍ଯାନାଂ ତଥା ଶୁମ୍ଭନିଶୁମ୍ଭଯୋଃ ॥ ୪.୪୧॥
ରକ୍ଷଣାଯ ଚ ଲୋକାନାଂ ଦେଵାନାମୁପକାରିଣୀ ।
ତଚ୍ଛୃଣୁଷ୍ଵ ମଯାଖ୍ଯାତଂ ଯଥାଵତ୍କଥଯାମି ତେ ॥ ୪.୪୨॥
। ହ୍ରୀଂ ଓଁ ।
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ
ଦେଵୀମାହାତ୍ମ୍ଯେ ଶକ୍ରାଦିସ୍ତୁତିର୍ନାମ ଚତୁର୍ଥୋଽଧ୍ଯାଯଃ ॥ ୪॥
ଉଵାଚ୫, ଅର୍ଧଶ୍ଲୋକୌ ୨, ଶ୍ଲୋକାଃ ୩୫, ଏଵମାଦିତଃ ॥ ୨୫୯॥

ଵିନିଯୋଗଃ
ଅସ୍ଯ ଶ୍ରୀ ଉତ୍ତରଚରିତ୍ରସ୍ଯ ରୁଦ୍ର ଋଷିଃ ।
ଶ୍ରୀମହାସରସ୍ଵତୀ ଦେଵତା ।
ଅନୁଷ୍ଟୁପ୍ ଛନ୍ଦଃ । ଭୀମା ଶକ୍ତିଃ । ଭ୍ରାମରୀ ବୀଜମ୍ ।
ସୂର୍ଯସ୍ତତ୍ତ୍ଵମ୍ ।
ସାମଵେଦଃ ସ୍ଵରୂପମ୍ । ଶ୍ରୀମହାସରସ୍ଵତୀପ୍ରୀତ୍ଯର୍ଥେ
ଉତ୍ତରଚରିତ୍ରପାଠେ ଵିନିଯୋଗଃ ।
। ଧ୍ଯାନମ୍ ।
ଘଣ୍ଟାଶୂଲହଲାନି ଶଙ୍ଖମୁସଲେ ଚକ୍ରଂ ଧନୁଃ ସାଯକଂ
ହସ୍ତାବ୍ଜୈର୍ଦଧତୀଂ ଘନାନ୍ତଵିଲସଚ୍ଛୀତାଂଶୁତୁଲ୍ଯପ୍ରଭାମ୍ ।
ଗୌରୀଦେହସମୁଦ୍ଭଵାଂ ତ୍ରିଜଗତାମାଧାରଭୂତାଂ ମହା-
ପୂର୍ଵାମତ୍ର ସରସ୍ଵତୀମନୁଭଜେ ଶୁମ୍ଭାଦିଦୈତ୍ଯାର୍ଦିନୀମ୍ ॥
ଓଁ କ୍ଲୀଂ ଋଷିରୁଵାଚ ॥ ୫.୧॥
ପୁରା ଶୁମ୍ଭନିଶୁମ୍ଭାଭ୍ଯାମସୁରାଭ୍ଯାଂ ଶଚୀପତେଃ ।
ତ୍ରୈଲୋକ୍ଯଂ ଯଜ୍ଞଭାଗାଶ୍ଚ ହୃତା ମଦବଲାଶ୍ରଯାତ୍ ॥ ୫.୨॥
ତାଵେଵ ସୂର୍ଯତାଂ ତଦ୍ଵଦଧିକାରଂ ତଥୈନ୍ଦଵମ୍ ।
କୌବେରମଥ ଯାମ୍ଯଂ ଚ ଚକ୍ରାତେ ଵରୁଣସ୍ଯ ଚ ॥ ୫.୩॥
ତାଵେଵ ପଵନର୍ଦ୍ଧିଂ ଚ ଚକ୍ରତୁର୍ଵହ୍ନିକର୍ମ ଚ ।
ତତୋ ଦେଵା ଵିନିର୍ଧୂତା ଭ୍ରଷ୍ଟରାଜ୍ଯାଃ ପରାଜିତାଃ ॥ ୫.୪॥
ହୃତାଧିକାରାସ୍ତ୍ରିଦଶାସ୍ତାଭ୍ଯାଂ ସର୍ଵେ ନିରାକୃତାଃ ।
ମହାସୁରାଭ୍ଯାଂ ତାଂ ଦେଵୀଂ ସଂସ୍ମରନ୍ତ୍ଯପରାଜିତାମ୍ ॥ ୫.୫॥
ତଯାସ୍ମାକଂ ଵରୋ ଦତ୍ତୋ ଯଥାପତ୍ସୁ ସ୍ମୃତାଖିଲାଃ ।
ଭଵତାଂ ନାଶଯିଷ୍ଯାମି ତତ୍କ୍ଷଣାତ୍ପରମାପଦଃ ॥ ୫.୬॥
ଇତି କୃତ୍ଵା ମତିଂ ଦେଵା ହିମଵନ୍ତଂ ନଗେଶ୍ଵରମ୍ ।
ଜଗ୍ମୁସ୍ତତ୍ର ତତୋ ଦେଵୀଂ ଵିଷ୍ଣୁମାଯାଂ ପ୍ରତୁଷ୍ଟୁଵୁଃ ॥ ୫.୭॥
ଦେଵା ଊଚୁଃ ॥ ୫.୮॥
ନମୋ ଦେଵ୍ଯୈ ମହାଦେଵ୍ଯୈ ଶିଵାଯୈ ସତତଂ ନମଃ ।
ନମଃ ପ୍ରକୃତ୍ଯୈ ଭଦ୍ରାଯୈ ନିଯତାଃ ପ୍ରଣତାଃ ସ୍ମ ତାମ୍ ॥ ୫.୯॥
ରୌଦ୍ରାଯୈ ନମୋ ନିତ୍ଯାଯୈ ଗୌର୍ଯୈ ଧାତ୍ର୍ଯୈ ନମୋ ନମଃ ।
ଜ୍ଯୋତ୍ସ୍ନାଯୈ ଚେନ୍ଦୁରୂପିଣ୍ଯୈ ସୁଖାଯୈ ସତତଂ ନମଃ ॥ ୫.୧୦॥
କଲ୍ଯାଣ୍ଯୈ ପ୍ରଣତାଂ ଵୃଦ୍ଧ୍ଯୈ ସିଦ୍ଧ୍ଯୈ କୁର୍ମୋ ନମୋ ନମଃ ।
ନୈରୃତ୍ଯୈ ଭୂଭୃତାଂ ଲକ୍ଷ୍ମ୍ଯୈ ଶର୍ଵାଣ୍ଯୈ ତେ ନମୋ ନମଃ ॥ ୫.୧୧॥
ଦୁର୍ଗାଯୈ ଦୁର୍ଗପାରାଯୈ ସାରାଯୈ ସର୍ଵକାରିଣ୍ଯୈ ।
ଖ୍ଯାତ୍ଯୈ ତଥୈଵ କୃଷ୍ଣାଯୈ ଧୂମ୍ରାଯୈ ସତତଂ ନମଃ ॥ ୫.୧୨॥
ଅତିସୌମ୍ଯାତିରୌଦ୍ରାଯୈ ନତାସ୍ତସ୍ଯୈ ନମୋ ନମଃ ।
ନମୋ ଜଗତ୍ପ୍ରତିଷ୍ଠାଯୈ ଦେଵ୍ଯୈ କୃତ୍ଯୈ ନମୋ ନମଃ ॥ ୫.୧୩॥
ଯା ଦେଵୀ ସର୍ଵଭୂତେଷୁ ଵିଷ୍ଣୁମାଯେତି ଶବ୍ଦିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୧୪-୧୬॥
ଯା ଦେଵୀ ସର୍ଵଭୂତେଷୁ ଚେତନେତ୍ଯଭିଧୀଯତେ ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୧୭-୧୯॥
ଯା ଦେଵୀ ସର୍ଵଭୂତେଷୁ ବୁଦ୍ଧିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୨୦-୨୨॥
ଯା ଦେଵୀ ସର୍ଵଭୂତେଷୁ ନିଦ୍ରାରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୨୩-୨୫॥
ଯା ଦେଵୀ ସର୍ଵଭୂତେଷୁ କ୍ଷୁଧାରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୨୬-୨୮॥
ଯା ଦେଵୀ ସର୍ଵଭୂତେଷୁ ଛାଯାରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୨୯-୩୧॥
ଯା ଦେଵୀ ସର୍ଵଭୂତେଷୁ ଶକ୍ତିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୩୨-୩୪॥
ଯା ଦେଵୀ ସର୍ଵଭୂତେଷୁ ତୃଷ୍ଣାରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୩୫-୩୭॥
ଯା ଦେଵୀ ସର୍ଵଭୂତେଷୁ କ୍ଷାନ୍ତିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୩୮-୪୦॥
ଯା ଦେଵୀ ସର୍ଵଭୂତେଷୁ ଜାତିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୪୧-୪୩॥
ଯା ଦେଵୀ ସର୍ଵଭୂତେଷୁ ଲଜ୍ଜାରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୪୪-୪୬॥
ଯା ଦେଵୀ ସର୍ଵଭୂତେଷୁ ଶାନ୍ତିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୪୭-୪୯॥
ଯା ଦେଵୀ ସର୍ଵଭୂତେଷୁ ଶ୍ରଦ୍ଧାରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୫୦-୫୨॥
ଯା ଦେଵୀ ସର୍ଵଭୂତେଷୁ କାନ୍ତିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୫୩-୫୫॥
ଯା ଦେଵୀ ସର୍ଵଭୂତେଷୁ ଲକ୍ଷ୍ମୀରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୫୬-୫୮॥
ଯା ଦେଵୀ ସର୍ଵଭୂତେଷୁ ଵୃତ୍ତିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୫୯-୬୧॥
ଯା ଦେଵୀ ସର୍ଵଭୂତେଷୁ ସ୍ମୃତିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୬୨-୬୪॥
ଯା ଦେଵୀ ସର୍ଵଭୂତେଷୁ ଦଯାରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୬୫-୬୭॥
ଯା ଦେଵୀ ସର୍ଵଭୂତେଷୁ ତୁଷ୍ଟିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୬୮-୭୦॥
ଯା ଦେଵୀ ସର୍ଵଭୂତେଷୁ ମାତୃରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୭୧-୭୩॥
ଯା ଦେଵୀ ସର୍ଵଭୂତେଷୁ ଭ୍ରାନ୍ତିରୂପେଣ ସଂସ୍ଥିତା ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୭୪-୭୬॥
ଇନ୍ଦ୍ରିଯାଣାମଧିଷ୍ଠାତ୍ରୀ ଭୂତାନାଂ ଚାଖିଲେଷୁ ଯା ।
ଭୂତେଷୁ ସତତଂ ତସ୍ଯୈ ଵ୍ଯାପ୍ତ୍ଯୈ ଦେଵ୍ଯୈ ନମୋ ନମଃ ॥ ୫.୭୭॥
ଚିତିରୂପେଣ ଯା କୃତ୍ସ୍ନମେତଦ୍ ଵ୍ଯାପ୍ଯ ସ୍ଥିତା ଜଗତ୍ ।
ନମସ୍ତସ୍ଯୈ ନମସ୍ତସ୍ଯୈ ନମସ୍ତସ୍ଯୈ ନମୋ ନମଃ ॥ ୫.୭୮-୮୦॥
ସ୍ତୁତା ସୁରୈଃ ପୂର୍ଵମଭୀଷ୍ଟସଂଶ୍ରଯା-
ତ୍ତଥା ସୁରେନ୍ଦ୍ରେଣ ଦିନେଷୁ ସେଵିତା ।
କରୋତୁ ସା ନଃ ଶୁଭହେତୁରୀଶ୍ଵରୀ
ଶୁଭାନି ଭଦ୍ରାଣ୍ଯଭିହନ୍ତୁ ଚାପଦଃ ॥ ୫.୮୧॥
ଯା ସାମ୍ପ୍ରତଂ ଚୋଦ୍ଧତଦୈତ୍ଯତାପିତୈ-
ରସ୍ମାଭିରୀଶା ଚ ସୁରୈର୍ନମସ୍ଯତେ ।
ଯା ଚ ସ୍ମୃତା ତତ୍କ୍ଷଣମେଵ ହନ୍ତି ନଃ
ସର୍ଵାପଦୋ ଭକ୍ତିଵିନମ୍ରମୂର୍ତିଭିଃ ॥ ୫.୮୨॥
ଋଷିରୁଵାଚ ॥ ୫.୮୩॥
ଏଵଂ ସ୍ତଵାଭିଯୁକ୍ତାନାଂ ଦେଵାନାଂ ତତ୍ର ପାର୍ଵତୀ ।
ସ୍ନାତୁମଭ୍ଯାଯଯୌ ତୋଯେ ଜାହ୍ନଵ୍ଯା ନୃପନନ୍ଦନ ॥ ୫.୮୪॥
ସାବ୍ରଵୀତ୍ତାନ୍ ସୁରାନ୍ ସୁଭ୍ରୂର୍ଭଵଦ୍ଭିଃ ସ୍ତୂଯତେଽତ୍ର କା ।
ଶରୀରକୋଶତଶ୍ଚାସ୍ଯାଃ ସମୁଦ୍ଭୂତାବ୍ରଵୀଚ୍ଛିଵା ॥ ୫.୮୫॥
ସ୍ତୋତ୍ରଂ ମମୈତତ୍କ୍ରିଯତେ ଶୁମ୍ଭଦୈତ୍ଯନିରାକୃତୈଃ ।
ଦେଵୈଃ ସମେତୈଃ ସମରେ ନିଶୁମ୍ଭେନ ପରାଜିତୈଃ ॥ ୫.୮୬॥
ଶରୀରକୋଶାଦ୍ଯତ୍ତସ୍ଯାଃ ପାର୍ଵତ୍ଯା ନିଃସୃତାମ୍ବିକା ।
କୌଶିକୀତି ସମସ୍ତେଷୁ ତତୋ ଲୋକେଷୁ ଗୀଯତେ ॥ ୫.୮୭॥
ତସ୍ଯାଂ ଵିନିର୍ଗତାଯାଂ ତୁ କୃଷ୍ଣାଭୂତ୍ସାପି ପାର୍ଵତୀ ।
କାଲିକେତି ସମାଖ୍ଯାତା ହିମାଚଲକୃତାଶ୍ରଯା ॥ ୫.୮୮॥
ତତୋଽମ୍ବିକାଂ ପରଂ ରୂପଂ ବିଭ୍ରାଣାଂ ସୁମନୋହରମ୍ ।
ଦଦର୍ଶ ଚଣ୍ଡୋ ମୁଣ୍ଡଶ୍ଚ ଭୃତ୍ଯୌ ଶୁମ୍ଭନିଶୁମ୍ଭଯୋଃ ॥ ୫.୮୯॥
ତାଭ୍ଯାଂ ଶୁମ୍ଭାଯ ଚାଖ୍ଯାତା ସାତୀଵ ସୁମନୋହରା ।
କାପ୍ଯାସ୍ତେ ସ୍ତ୍ରୀ ମହାରାଜ ଭାସଯନ୍ତୀ ହିମାଚଲମ୍ ॥ ୫.୯୦॥
ନୈଵ ତାଦୃକ୍ କ୍ଵଚିଦ୍ରୂପଂ ଦୃଷ୍ଟଂ କେନଚିଦୁତ୍ତମମ୍ ।
ଜ୍ଞାଯତାଂ କାପ୍ଯସୌ ଦେଵୀ ଗୃହ୍ଯତାଂ ଚାସୁରେଶ୍ଵର ॥ ୫.୯୧॥
ସ୍ତ୍ରୀରତ୍ନମତିଚାର୍ଵଙ୍ଗୀ ଦ୍ଯୋତଯନ୍ତୀ ଦିଶସ୍ତ୍ଵିଷା ।
ସା ତୁ ତିଷ୍ଠତି ଦୈତ୍ଯେନ୍ଦ୍ର ତାଂ ଭଵାନ୍ ଦ୍ରଷ୍ଟୁମର୍ହତି ॥ ୫.୯୨॥
ଯାନି ରତ୍ନାନି ମଣଯୋ ଗଜାଶ୍ଵାଦୀନି ଵୈ ପ୍ରଭୋ ।
ତ୍ରୈଲୋକ୍ଯେ ତୁ ସମସ୍ତାନି ସାମ୍ପ୍ରତଂ ଭାନ୍ତି ତେ ଗୃହେ ॥ ୫.୯୩॥
ଐରାଵତଃ ସମାନୀତୋ ଗଜରତ୍ନଂ ପୁରନ୍ଦରାତ୍ ।
ପାରିଜାତତରୁଶ୍ଚାଯଂ ତଥୈଵୋଚ୍ଚୈଃଶ୍ରଵା ହଯଃ ॥ ୫.୯୪॥
ଵିମାନଂ ହଂସସଂଯୁକ୍ତମେତତ୍ତିଷ୍ଠତି ତେଽଙ୍ଗଣେ ।
ରତ୍ନଭୂତମିହାନୀତଂ ଯଦାସୀଦ୍ଵେଧସୋଽଦ୍ଭୁତମ୍ ॥ ୫.୯୫॥
ନିଧିରେଷ ମହାପଦ୍ମଃ ସମାନୀତୋ ଧନେଶ୍ଵରାତ୍ ।
କିଞ୍ଜଲ୍କିନୀଂ ଦଦୌ ଚାବ୍ଧିର୍ମାଲାମମ୍ଲାନପଙ୍କଜାମ୍ ॥ ୫.୯୬॥
ଛତ୍ରଂ ତେ ଵାରୁଣଂ ଗେହେ କାଞ୍ଚନସ୍ରାଵି ତିଷ୍ଠତି ।
ତଥାଯଂ ସ୍ଯନ୍ଦନଵରୋ ଯଃ ପୁରାସୀତ୍ପ୍ରଜାପତେଃ ॥ ୫.୯୭॥
ମୃତ୍ଯୋରୁତ୍କ୍ରାନ୍ତିଦା ନାମ ଶକ୍ତିରୀଶ ତ୍ଵଯା ହୃତା ।
ପାଶଃ ସଲିଲରାଜସ୍ଯ ଭ୍ରାତୁସ୍ତଵ ପରିଗ୍ରହେ ॥ ୫.୯୮॥
ନିଶୁମ୍ଭସ୍ଯାବ୍ଧିଜାତାଶ୍ଚ ସମସ୍ତା ରତ୍ନଜାତଯଃ ।
ଵହ୍ନିରପି ଦଦୌ ତୁଭ୍ଯମଗ୍ନିଶୌଚେ ଚ ଵାସସୀ ॥ ୫.୯୯॥
ଏଵଂ ଦୈତ୍ଯେନ୍ଦ୍ର ରତ୍ନାନି ସମସ୍ତାନ୍ଯାହୃତାନି ତେ ।
ସ୍ତ୍ରୀରତ୍ନମେଷା କଲ୍ଯାଣୀ ତ୍ଵଯା କସ୍ମାନ୍ନ ଗୃହ୍ଯତେ ॥ ୫.୧୦୦॥
ଋଷିରୁଵାଚ ॥ ୫.୧୦୧॥
ନିଶମ୍ଯେତି ଵଚଃ ଶୁମ୍ଭଃ ସ ତଦା ଚଣ୍ଡମୁଣ୍ଡଯୋଃ ।
ପ୍ରେଷଯାମାସ ସୁଗ୍ରୀଵଂ ଦୂତଂ ଦେଵ୍ଯା ମହାସୁରମ୍ ॥ ୫.୧୦୨॥
ଇତି ଚେତି ଚ ଵକ୍ତଵ୍ଯା ସା ଗତ୍ଵା ଵଚନାନ୍ମମ ।
ଯଥା ଚାଭ୍ଯେତି ସମ୍ପ୍ରୀତ୍ଯା ତଥା କାର୍ଯଂ ତ୍ଵଯା ଲଘୁ ॥ ୫.୧୦୩॥
ସ ତତ୍ର ଗତ୍ଵା ଯତ୍ରାସ୍ତେ ଶୈଲୋଦ୍ଦେଶେଽତିଶୋଭନେ ।
ତାଂ ଚ ଦେଵୀଂ ତତଃ ପ୍ରାହ ଶ୍ଲକ୍ଷ୍ଣଂ ମଧୁରଯା ଗିରା ॥ ୫.୧୦୪॥
ଦୂତ ଉଵାଚ॥ ୫.୧୦୫॥
ଦେଵି ଦୈତ୍ଯେଶ୍ଵରଃ ଶୁମ୍ଭସ୍ତ୍ରୈଲୋକ୍ଯେ ପରମେଶ୍ଵରଃ ।
ଦୂତୋଽହଂ ପ୍ରେଷିତସ୍ତେନ ତ୍ଵତ୍ସକାଶମିହାଗତଃ ॥ ୫.୧୦୬॥
ଅଵ୍ଯାହତାଜ୍ଞଃ ସର୍ଵାସୁ ଯଃ ସଦା ଦେଵଯୋନିଷୁ ।
ନିର୍ଜିତାଖିଲଦୈତ୍ଯାରିଃ ସ ଯଦାହ ଶ‍ୃଣୁଷ୍ଵ ତତ୍ ॥ ୫.୧୦୭॥
ମମ ତ୍ରୈଲୋକ୍ଯମଖିଲଂ ମମ ଦେଵା ଵଶାନୁଗାଃ ।
ଯଜ୍ଞଭାଗାନହଂ ସର୍ଵାନୁପାଶ୍ନାମି ପୃଥକ୍ ପୃଥକ୍ ॥ ୫.୧୦୮॥
ତ୍ରୈଲୋକ୍ଯେ ଵରରତ୍ନାନି ମମ ଵଶ୍ଯାନ୍ଯଶେଷତଃ ।
ତଥୈଵ ଗଜରତ୍ନଂ ଚ ହୃତଂ ଦେଵେନ୍ଦ୍ରଵାହନମ୍ ॥ ୫.୧୦୯॥
କ୍ଷୀରୋଦମଥନୋଦ୍ଭୂତମଶ୍ଵରତ୍ନଂ ମମାମରୈଃ ।
ଉଚ୍ଚୈଃଶ୍ରଵସସଂଜ୍ଞଂ ତତ୍ପ୍ରଣିପତ୍ଯ ସମର୍ପିତମ୍ ॥ ୫.୧୧୦॥
ଯାନି ଚାନ୍ଯାନି ଦେଵେଷୁ ଗନ୍ଧର୍ଵେଷୂରଗେଷୁ ଚ ।
ରତ୍ନଭୂତାନି ଭୂତାନି ତାନି ମଯ୍ଯେଵ ଶୋଭନେ ॥ ୫.୧୧୧॥
ସ୍ତ୍ରୀରତ୍ନଭୂତାଂ ତ୍ଵାଂ ଦେଵି ଲୋକେ ମନ୍ଯାମହେ ଵଯମ୍ ।
ସା ତ୍ଵମସ୍ମାନୁପାଗଚ୍ଛ ଯତୋ ରତ୍ନଭୁଜୋ ଵଯମ୍ ॥ ୫.୧୧୨॥
ମାଂ ଵା ମମାନୁଜଂ ଵାପି ନିଶୁମ୍ଭମୁରୁଵିକ୍ରମମ୍ ।
ଭଜ ତ୍ଵଂ ଚଞ୍ଚଲାପାଙ୍ଗି ରତ୍ନଭୂତାସି ଵୈ ଯତଃ ॥ ୫.୧୧୩॥
ପରମୈଶ୍ଵର୍ଯମତୁଲଂ ପ୍ରାପ୍ସ୍ଯସେ ମତ୍ପରିଗ୍ରହାତ୍ ।
ଏତଦ୍ବୁଦ୍ଧ୍ଯା ସମାଲୋଚ୍ଯ ମତ୍ପରିଗ୍ରହତାଂ ଵ୍ରଜ ॥ ୫.୧୧୪॥
ଋଷିରୁଵାଚ ॥ ୫.୧୧୫॥
ଇତ୍ଯୁକ୍ତା ସା ତଦା ଦେଵୀ ଗମ୍ଭୀରାନ୍ତଃସ୍ମିତା ଜଗୌ ।
ଦୁର୍ଗା ଭଗଵତୀ ଭଦ୍ରା ଯଯେଦଂ ଧାର୍ଯତେ ଜଗତ୍ ॥ ୫.୧୧୬॥
ଦେଵ୍ଯୁଵାଚ॥ ୫.୧୧୭॥
ସତ୍ଯମୁକ୍ତଂ ତ୍ଵଯା ନାତ୍ର ମିଥ୍ଯା କିଞ୍ଚିତ୍ତ୍ଵଯୋଦିତମ୍ ।
ତ୍ରୈଲୋକ୍ଯାଧିପତିଃ ଶୁମ୍ଭୋ ନିଶୁମ୍ଭଶ୍ଚାପି ତାଦୃଶଃ ॥ ୫.୧୧୮॥
କିଂ ତ୍ଵତ୍ର ଯତ୍ପ୍ରତିଜ୍ଞାତଂ ମିଥ୍ଯା ତତ୍କ୍ରିଯତେ କଥମ୍ ।
ଶ୍ରୂଯତାମଲ୍ପବୁଦ୍ଧିତ୍ଵାତ୍ପ୍ରତିଜ୍ଞା ଯା କୃତା ପୁରା ॥ ୫.୧୧୯॥
ଯୋ ମାଂ ଜଯତି ସଙ୍ଗ୍ରାମେ ଯୋ ମେ ଦର୍ପଂ ଵ୍ଯପୋହତି ।
ଯୋ ମେ ପ୍ରତିବଲୋ ଲୋକେ ସ ମେ ଭର୍ତା ଭଵିଷ୍ଯତି ॥ ୫.୧୨୦॥
ତଦାଗଚ୍ଛତୁ ଶୁମ୍ଭୋଽତ୍ର ନିଶୁମ୍ଭୋ ଵା ମହାବଲଃ ।
ମାଂ ଜିତ୍ଵା କିଂ ଚିରେଣାତ୍ର ପାଣିଂ ଗୃହ୍ଣାତୁ ମେ ଲଘୁ ॥ ୫.୧୨୧॥
ଦୂତ ଉଵାଚ॥ ୫.୧୨୨॥
ଅଵଲିପ୍ତାସି ମୈଵଂ ତ୍ଵଂ ଦେଵି ବ୍ରୂହି ମମାଗ୍ରତଃ ।
ତ୍ରୈଲୋକ୍ଯେ କଃ ପୁମାଂସ୍ତିଷ୍ଠେଦଗ୍ରେ ଶୁମ୍ଭନିଶୁମ୍ଭଯୋଃ ॥ ୫.୧୨୩॥
ଅନ୍ଯେଷାମପି ଦୈତ୍ଯାନାଂ ସର୍ଵେ ଦେଵା ନ ଵୈ ଯୁଧି ।
ତିଷ୍ଠନ୍ତି ସମ୍ମୁଖେ ଦେଵି କିଂ ପୁନଃ ସ୍ତ୍ରୀ ତ୍ଵମେକିକା ॥ ୫.୧୨୪॥
ଇନ୍ଦ୍ରାଦ୍ଯାଃ ସକଲା ଦେଵାସ୍ତସ୍ଥୁର୍ଯେଷାଂ ନ ସଂଯୁଗେ ।
ଶୁମ୍ଭାଦୀନାଂ କଥଂ ତେଷାଂ ସ୍ତ୍ରୀ ପ୍ରଯାସ୍ଯସି ସମ୍ମୁଖମ୍ ॥ ୫.୧୨୫॥
ସା ତ୍ଵଂ ଗଚ୍ଛ ମଯୈଵୋକ୍ତା ପାର୍ଶ୍ଵଂ ଶୁମ୍ଭନିଶୁମ୍ଭଯୋଃ ।
କେଶାକର୍ଷଣନିର୍ଧୂତଗୌରଵା ମା ଗମିଷ୍ଯସି ॥ ୫.୧୨୬॥
ଦେଵ୍ଯୁଵାଚ॥ ୫.୧୨୭॥
ଏଵମେତଦ୍ ବଲୀ ଶୁମ୍ଭୋ ନିଶୁମ୍ଭଶ୍ଚାପିତାଦୃଶଃ ।
କିଂ କରୋମି ପ୍ରତିଜ୍ଞା ମେ ଯଦନାଲୋଚିତା ପୁରା ॥ ୫.୧୨୮॥
ସ ତ୍ଵଂ ଗଚ୍ଛ ମଯୋକ୍ତଂ ତେ ଯଦେତତ୍ସର୍ଵମାଦୃତଃ ।
ତଦାଚକ୍ଷ୍ଵାସୁରେନ୍ଦ୍ରାଯ ସ ଚ ଯୁକ୍ତଂ କରୋତୁ ଯତ୍ ॥ ୫.୧୨୯॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ଦେଵ୍ଯା ଦୂତସଂଵାଦୋ ନାମ ପଞ୍ଚମୋଽଧ୍ଯାଯଃ ॥ ୫॥
ଉଵାଚ୯, ତ୍ରିପାନ୍ମନ୍ତ୍ରାଃ ୬୬, ଶ୍ଲୋକାଃ ୫୪, ଏଵମାଦିତଃ ॥ ୩୮୮॥

। ଧ୍ଯାନମ୍ ।
ଓଁ ନାଗାଧୀଶ୍ଵରଵିଷ୍ଟରାଂ ଫଣିଫଣୋତ୍ତଂସୋରୁ ରତ୍ନାଵଲୀ-
ଭାସ୍ଵଦ୍ଦେହଲତାଂ ଦିଵାକରନିଭାଂ ନେତ୍ରତ୍ରଯୋଦ୍ଭାସିତାମ୍ ।
ମାଲାକୁମ୍ଭକପାଲନୀରଜକରାଂ ଚନ୍ଦ୍ରାର୍ଧଚୂଡାଂ ପରାଂ
ସର୍ଵଜ୍ଞେଶ୍ଵରଭୈରଵାଙ୍ଗନିଲଯାଂ ପଦ୍ମାଵତୀଂ ଚିନ୍ତଯେ ॥
ଓଁ ଋଷିରୁଵାଚ ॥ ୬.୧॥
ଇତ୍ଯାକର୍ଣ୍ଯ ଵଚୋ ଦେଵ୍ଯାଃ ସ ଦୂତୋଽମର୍ଷପୂରିତଃ ।
ସମାଚଷ୍ଟ ସମାଗମ୍ଯ ଦୈତ୍ଯରାଜାଯ ଵିସ୍ତରାତ୍ ॥ ୬.୨॥
ତସ୍ଯ ଦୂତସ୍ଯ ତଦ୍ଵାକ୍ଯମାକର୍ଣ୍ଯାସୁରରାଟ୍ ତତଃ ।
ସକ୍ରୋଧଃ ପ୍ରାହ ଦୈତ୍ଯାନାମଧିପଂ ଧୂମ୍ରଲୋଚନମ୍ ॥ ୬.୩॥
ହେ ଧୂମ୍ରଲୋଚନାଶୁ ତ୍ଵଂ ସ୍ଵସୈନ୍ଯପରିଵାରିତଃ ।
ତାମାନଯ ବଲାଦ୍ଦୁଷ୍ଟାଂ କେଶାକର୍ଷଣଵିହ୍ଵଲାମ୍ ॥ ୬.୪॥
ତତ୍ପରିତ୍ରାଣଦଃ କଶ୍ଚିଦ୍ଯଦି ଵୋତ୍ତିଷ୍ଠତେଽପରଃ ।
ସ ହନ୍ତଵ୍ଯୋଽମରୋ ଵାପି ଯକ୍ଷୋ ଗନ୍ଧର୍ଵ ଏଵ ଵା ॥ ୬.୫॥
ଋଷିରୁଵାଚ ॥ ୬.୬॥
ତେନାଜ୍ଞପ୍ତସ୍ତତଃ ଶୀଘ୍ରଂ ସ ଦୈତ୍ଯୋ ଧୂମ୍ରଲୋଚନଃ ।
ଵୃତଃ ଷଷ୍ଟ୍ଯା ସହସ୍ରାଣାମସୁରାଣାଂ ଦ୍ରୁତଂ ଯଯୌ ॥ ୬.୭॥
ସ ଦୃଷ୍ଟ୍ଵା ତାଂ ତତୋ ଦେଵୀଂ ତୁହିନାଚଲସଂସ୍ଥିତାମ୍ ।
ଜଗାଦୋଚ୍ଚୈଃ ପ୍ରଯାହୀତି ମୂଲଂ ଶୁମ୍ଭନିଶୁମ୍ଭଯୋଃ ॥ ୬.୮॥
ନ ଚେତ୍ପ୍ରୀତ୍ଯାଦ୍ଯ ଭଵତୀ ମଦ୍ଭର୍ତାରମୁପୈଷ୍ଯତି ।
ତତୋ ବଲାନ୍ନଯାମ୍ଯେଷ କେଶାକର୍ଷଣଵିହ୍ଵଲାମ୍ ॥ ୬.୯॥
ଦେଵ୍ଯୁଵାଚ॥ ୬.୧୦॥
ଦୈତ୍ଯେଶ୍ଵରେଣ ପ୍ରହିତୋ ବଲଵାନ୍ବଲସଂଵୃତଃ ।
ବଲାନ୍ନଯସି ମାମେଵଂ ତତଃ କିଂ ତେ କରୋମ୍ଯହମ୍ ॥ ୬.୧୧॥
ଋଷିରୁଵାଚ ॥ ୬.୧୨॥
ଇତ୍ଯୁକ୍ତଃ ସୋଽଭ୍ଯଧାଵତ୍ତାମସୁରୋ ଧୂମ୍ରଲୋଚନଃ ।
ହୁଙ୍କାରେଣୈଵ ତଂ ଭସ୍ମ ସା ଚକାରାମ୍ବିକା ତଦା ॥ ୬.୧୩॥
ଅଥ କ୍ରୁଦ୍ଧଂ ମହାସୈନ୍ଯମସୁରାଣାଂ ତଥାମ୍ବିକା ।
ଵଵର୍ଷ ସାଯକୈସ୍ତୀକ୍ଷ୍ଣୈସ୍ତଥା ଶକ୍ତିପରଶ୍ଵଧୈଃ ॥ ୬.୧୪॥
ତତୋ ଧୁତସଟଃ କୋପାତ୍କୃତ୍ଵା ନାଦଂ ସୁଭୈରଵମ୍ ।
ପପାତାସୁରସେନାଯାଂ ସିଂହୋ ଦେଵ୍ଯାଃ ସ୍ଵଵାହନଃ ॥ ୬.୧୫॥
କାଂଶ୍ଚିତ୍କରପ୍ରହାରେଣ ଦୈତ୍ଯାନାସ୍ଯେନ ଚାପରାନ୍ ।
ଆକ୍ରାନ୍ତ୍ଯା ଚାଧରେଣାନ୍ଯାନ୍ ଜଘାନ ସ ମହାସୁରାନ୍ ॥ ୬.୧୬॥
କେଷାଞ୍ଚିତ୍ପାଟଯାମାସ ନଖୈଃ କୋଷ୍ଠାନି କେସରୀ ।
ତଥା ତଲପ୍ରହାରେଣ ଶିରାଂସି କୃତଵାନ୍ପୃଥକ୍ ॥ ୬.୧୭॥
ଵିଚ୍ଛିନ୍ନବାହୁଶିରସଃ କୃତାସ୍ତେନ ତଥାପରେ ।
ପପୌ ଚ ରୁଧିରଂ କୋଷ୍ଠାଦନ୍ଯେଷାଂ ଧୁତକେସରଃ ॥ ୬.୧୮॥
କ୍ଷଣେନ ତଦ୍ବଲଂ ସର୍ଵଂ କ୍ଷଯଂ ନୀତଂ ମହାତ୍ମନା ।
ତେନ କେସରିଣା ଦେଵ୍ଯା ଵାହନେନାତିକୋପିନା ॥ ୬.୧୯॥
ଶ୍ରୁତ୍ଵା ତମସୁରଂ ଦେଵ୍ଯା ନିହତଂ ଧୂମ୍ରଲୋଚନମ୍ ।
ବଲଂ ଚ କ୍ଷଯିତଂ କୃତ୍ସ୍ନଂ ଦେଵୀକେସରିଣା ତତଃ ॥ ୬.୨୦॥
ଚୁକୋପ ଦୈତ୍ଯାଧିପତିଃ ଶୁମ୍ଭଃ ପ୍ରସ୍ଫୁରିତାଧରଃ ।
ଆଜ୍ଞାପଯାମାସ ଚ ତୌ ଚଣ୍ଡମୁଣ୍ଡୌ ମହାସୁରୌ ॥ ୬.୨୧॥
ହେ ଚଣ୍ଡ ହେ ମୁଣ୍ଡ ବଲୈର୍ବହୁଭିଃ ପରିଵାରିତୌ ।
ତତ୍ର ଗଚ୍ଛତ ଗତ୍ଵା ଚ ସା ସମାନୀଯତାଂ ଲଘୁ ॥ ୬.୨୨॥
କେଶେଷ୍ଵାକୃଷ୍ଯ ବଦ୍ଧ୍ଵା ଵା ଯଦି ଵଃ ସଂଶଯୋ ଯୁଧି ।
ତଦାଶେଷାଯୁଧୈଃ ସର୍ଵୈରସୁରୈର୍ଵିନିହନ୍ଯତାମ୍ ॥ ୬.୨୩॥
ତସ୍ଯାଂ ହତାଯାଂ ଦୁଷ୍ଟାଯାଂ ସିଂହେ ଚ ଵିନିପାତିତେ ।
ଶୀଘ୍ରମାଗମ୍ଯତାଂ ବଦ୍ଧ୍ଵା ଗୃହୀତ୍ଵା ତାମଥାମ୍ବିକାମ୍ ॥ ୬.୨୪॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ଶୁମ୍ଭନିଶୁମ୍ଭସେନାନୀଧୂମ୍ରଲୋଚନଵଧୋ ନାମ ଷଷ୍ଠୋଽଧ୍ଯାଯଃ ॥ ୬॥
ଉଵାଚ୪, ଶ୍ଲୋକାଃ ୨୪, ଏଵମାଦିତଃ ॥ ୪୧୨॥

। ଧ୍ଯାନମ୍ ।
ଓଁ ଧ୍ଯାଯେଯଂ ରତ୍ନପୀଠେ ଶୁକକଲପଠିତଂ ଶ‍ୃଣ୍ଵତୀଂ ଶ୍ଯାମଲାଙ୍ଗୀଂ
ନ୍ଯସ୍ତୈକାଂଘ୍ରିଂ ସରୋଜେ ଶଶିଶକଲଧରାଂ ଵଲ୍ଲକୀଂ ଵାଦଯନ୍ତୀମ୍ ।
କଲ୍ହାରାବଦ୍ଧମାଲାଂ ନିଯମିତଵିଲସଚ୍ଚୋଲିକାଂ ରତ୍ନଵସ୍ତ୍ରାଂ
ମାତଙ୍ଗୀ ଶଙ୍କପାତ୍ରାଂ ମଧୁରମଧୁମଦାଂ ଚିତ୍ରକୋଦ୍ଭାସିଭାଲାମ୍ ॥
ଓଁ ଋଷିରୁଵାଚ ॥ ୭.୧॥
ଆଜ୍ଞପ୍ତାସ୍ତେ ତତୋ ଦୈତ୍ଯାଶ୍ଚଣ୍ଡମୁଣ୍ଡପୁରୋଗମାଃ ।
ଚତୁରଙ୍ଗବଲୋପେତା ଯଯୁରଭ୍ଯୁଦ୍ଯତାଯୁଧାଃ ॥ ୭.୨॥
ଦଦୃଶୁସ୍ତେ ତତୋ ଦେଵୀମୀଷଦ୍ଧାସାଂ ଵ୍ଯଵସ୍ଥିତାମ୍ ।
ସିଂହସ୍ଯୋପରି ଶୈଲେନ୍ଦ୍ରଶ‍ୃଙ୍ଗେ ମହତି କାଞ୍ଚନେ ॥ ୭.୩॥
ତେ ଦୃଷ୍ଟ୍ଵା ତାଂ ସମାଦାତୁମୁଦ୍ଯମଂ ଚକ୍ରୁରୁଦ୍ଯତାଃ ।
ଆକୃଷ୍ଟଚାପାସିଧରାସ୍ତଥାନ୍ଯେ ତତ୍ସମୀପଗାଃ ॥ ୭.୪॥
ତତଃ କୋପଂ ଚକାରୋଚ୍ଚୈରମ୍ବିକା ତାନରୀନ୍ପ୍ରତି ।
କୋପେନ ଚାସ୍ଯା ଵଦନଂ ମଷୀଵର୍ଣମଭୂତ୍ତଦା ॥ ୭.୫॥
ଭ୍ରୁକୁଟୀକୁଟିଲାତ୍ତସ୍ଯା ଲଲାଟଫଲକାଦ୍ଦ୍ରୁତମ୍ ।
କାଲୀ କରାଲଵଦନା ଵିନିଷ୍କ୍ରାନ୍ତାସିପାଶିନୀ ॥ ୭.୬॥
ଵିଚିତ୍ରଖଟ୍ଵାଙ୍ଗଧରା ନରମାଲାଵିଭୂଷଣା ।
ଦ୍ଵୀପିଚର୍ମପରୀଧାନା ଶୁଷ୍କମାଂସାତିଭୈରଵା ॥ ୭.୭॥
ଅତିଵିସ୍ତାରଵଦନା ଜିହ୍ଵାଲଲନଭୀଷଣା ।
ନିମଗ୍ନାରକ୍ତନଯନା ନାଦାପୂରିତଦିଙ୍ମୁଖା ॥ ୭.୮॥
ସା ଵେଗେନାଭିପତିତା ଘାତଯନ୍ତୀ ମହାସୁରାନ୍ ।
ସୈନ୍ଯେ ତତ୍ର ସୁରାରୀଣାମଭକ୍ଷଯତ ତଦ୍ବଲମ୍ ॥ ୭.୯॥
ପାର୍ଷ୍ଣିଗ୍ରାହାଙ୍କୁଶଗ୍ରାହଯୋଧଘଣ୍ଟାସମନ୍ଵିତାନ୍ ।
ସମାଦାଯୈକହସ୍ତେନ ମୁଖେ ଚିକ୍ଷେପ ଵାରଣାନ୍ ॥ ୭.୧୦॥
ତଥୈଵ ଯୋଧଂ ତୁରଗୈ ରଥଂ ସାରଥିନା ସହ ।
ନିକ୍ଷିପ୍ଯ ଵକ୍ତ୍ରେ ଦଶନୈଶ୍ଚର୍ଵଯନ୍ତ୍ଯତିଭୈରଵମ୍ ॥ ୭.୧୧॥
ଏକଂ ଜଗ୍ରାହ କେଶେଷୁ ଗ୍ରୀଵାଯାମଥ ଚାପରମ୍ ।
ପାଦେନାକ୍ରମ୍ଯ ଚୈଵାନ୍ଯମୁରସାନ୍ଯମପୋଥଯତ୍ ॥ ୭.୧୨॥
ତୈର୍ମୁକ୍ତାନି ଚ ଶସ୍ତ୍ରାଣି ମହାସ୍ତ୍ରାଣି ତଥାସୁରୈଃ ।
ମୁଖେନ ଜଗ୍ରାହ ରୁଷା ଦଶନୈର୍ମଥିତାନ୍ଯପି ॥ ୭.୧୩॥
ବଲିନାଂ ତଦ୍ବଲଂ ସର୍ଵମସୁରାଣାଂ ଦୁରାତ୍ମନାମ୍ ।
ମମର୍ଦାଭକ୍ଷଯଚ୍ଚାନ୍ଯାନନ୍ଯାଂଶ୍ଚାତାଡଯତ୍ତଦା ॥ ୭.୧୪॥
ଅସିନା ନିହତାଃ କେଚିତ୍କେଚିତ୍ଖଟ୍ଵାଙ୍ଗତାଡିତାଃ ।
ଜଗ୍ମୁର୍ଵିନାଶମସୁରା ଦନ୍ତାଗ୍ରାଭିହତାସ୍ତଥା ॥ ୭.୧୫॥
କ୍ଷଣେନ ତଦ୍ବଲଂ ସର୍ଵମସୁରାଣାଂ ନିପାତିତମ୍ ।
ଦୃଷ୍ଟ୍ଵା ଚଣ୍ଡୋଽଭିଦୁଦ୍ରାଵ ତାଂ କାଲୀମତିଭୀଷଣାମ୍ ॥ ୭.୧୬॥
ଶରଵର୍ଷୈର୍ମହାଭୀମୈର୍ଭୀମାକ୍ଷୀଂ ତାଂ ମହାସୁରଃ ।
ଛାଦଯାମାସ ଚକ୍ରୈଶ୍ଚ ମୁଣ୍ଡଃ କ୍ଷିପ୍ତୈଃ ସହସ୍ରଶଃ ॥ ୭.୧୭॥
ତାନି ଚକ୍ରାଣ୍ଯନେକାନି ଵିଶମାନାନି ତନ୍ମୁଖମ୍ ।
ବଭୁର୍ଯଥାର୍କବିମ୍ବାନି ସୁବହୂନି ଘନୋଦରମ୍ ॥ ୭.୧୮॥
ତତୋ ଜହାସାତିରୁଷା ଭୀମଂ ଭୈରଵନାଦିନୀ ।
କାଲୀ କରାଲଵଦନା ଦୁର୍ଦର୍ଶଦଶନୋଜ୍ଜ୍ଵଲା ॥ ୭.୧୯॥
ଉତ୍ଥାଯ ଚ ମହାସିଂହଂ ଦେଵୀ ଚଣ୍ଡମଧାଵତ ।
ଗୃହୀତ୍ଵା ଚାସ୍ଯ କେଶେଷୁ ଶିରସ୍ତେନାସିନାଚ୍ଛିନତ୍ ॥ ୭.୨୦॥
ଅଥ ମୁଣ୍ଡୋଽଭ୍ଯଧାଵତ୍ତାଂ ଦୃଷ୍ଟ୍ଵା ଚଣ୍ଡଂ ନିପାତିତମ୍ ।
ତମପ୍ଯପାତଯଦ୍ଭୂମୌ ସା ଖଡ୍ଗାଭିହତଂ ରୁଷା ॥ ୭.୨୧॥
ହତଶେଷଂ ତତଃ ସୈନ୍ଯଂ ଦୃଷ୍ଟ୍ଵା ଚଣ୍ଡଂ ନିପାତିତମ୍ ।
ମୁଣ୍ଡଂ ଚ ସୁମହାଵୀର୍ଯଂ ଦିଶୋ ଭେଜେ ଭଯାତୁରମ୍ ॥ ୭.୨୨॥
ଶିରଶ୍ଚଣ୍ଡସ୍ଯ କାଲୀ ଚ ଗୃହୀତ୍ଵା ମୁଣ୍ଡମେଵ ଚ ।
ପ୍ରାହ ପ୍ରଚଣ୍ଡାଟ୍ଟହାସମିଶ୍ରମଭ୍ଯେତ୍ଯ ଚଣ୍ଡିକାମ୍ ॥ ୭.୨୩॥
ମଯା ତଵାତ୍ରୋପହୃତୌ ଚଣ୍ଡମୁଣ୍ଡୌ ମହାପଶୂ ।
ଯୁଦ୍ଧଯଜ୍ଞେ ସ୍ଵଯଂ ଶୁମ୍ଭଂ ନିଶୁମ୍ଭଂ ଚ ହନିଷ୍ଯସି ॥ ୭.୨୪॥
ଋଷିରୁଵାଚ ॥ ୭.୨୫॥
ତାଵାନୀତୌ ତତୋ ଦୃଷ୍ଟ୍ଵା ଚଣ୍ଡମୁଣ୍ଡୌ ମହାସୁରୌ ।
ଉଵାଚକାଲୀଂ କଲ୍ଯାଣୀ ଲଲିତଂ ଚଣ୍ଡିକା ଵଚଃ ॥ ୭.୨୬॥
ଯସ୍ମାଚ୍ଚଣ୍ଡଂ ଚ ମୁଣ୍ଡଂ ଚ ଗୃହୀତ୍ଵା ତ୍ଵମୁପାଗତା ।
ଚାମୁଣ୍ଡେତି ତତୋ ଲୋକେ ଖ୍ଯାତା ଦେଵୀ ଭଵିଷ୍ଯସି ॥ ୭.୨୭॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ଚଣ୍ଡମୁଣ୍ଡଵଧୋ ନାମ ସପ୍ତମୋଽଧ୍ଯାଯଃ ॥ ୭॥
ଉଵାଚ୨, ଶ୍ଲୋକାଃ ୨୫, ଏଵମାଦିତଃ ॥ ୪୩୯॥

। ଧ୍ଯାନମ୍ ।
ଓଁ ଅରୁଣାଂ କରୁଣାତରଙ୍ଗିତାକ୍ଷୀଂ
ଧୃତପାଶାଙ୍କୁଶବାଣାଚାପହସ୍ତାମ୍ ।
ଅଣିମାଦିଭିରାଵୃତାଂ ମଯୂଖୈ-
ରହମିତ୍ଯେଵ ଵିଭାଵଯେ ଭଵାନୀମ୍ ॥
ଓଁ ଋଷିରୁଵାଚ ॥ ୮.୧॥
ଚଣ୍ଡେ ଚ ନିହତେ ଦୈତ୍ଯେ ମୁଣ୍ଡେ ଚ ଵିନିପାତିତେ ।
ବହୁଲେଷୁ ଚ ସୈନ୍ଯେଷୁ କ୍ଷଯିତେଷ୍ଵସୁରେଶ୍ଵରଃ ॥ ୮.୨॥
ତତଃ କୋପପରାଧୀନଚେତାଃ ଶୁମ୍ଭଃ ପ୍ରତାପଵାନ୍ ।
ଉଦ୍ଯୋଗଂ ସର୍ଵସୈନ୍ଯାନାଂ ଦୈତ୍ଯାନାମାଦିଦେଶ ହ ॥ ୮.୩॥
ଅଦ୍ଯ ସର୍ଵବଲୈର୍ଦୈତ୍ଯାଃ ଷଡଶୀତିରୁଦାଯୁଧାଃ ।
କମ୍ବୂନାଂ ଚତୁରଶୀତିର୍ନିର୍ଯାନ୍ତୁ ସ୍ଵବଲୈର୍ଵୃତାଃ ॥ ୮.୪॥
କୋଟିଵୀର୍ଯାଣି ପଞ୍ଚାଶଦସୁରାଣାଂ କୁଲାନି ଵୈ ।
ଶତଂ କୁଲାନି ଧୌମ୍ରାଣାଂ ନିର୍ଗଚ୍ଛନ୍ତୁ ମମାଜ୍ଞଯା ॥ ୮.୫॥
କାଲକା ଦୌର୍ହୃଦା ମୌର୍ଵାଃ କାଲିକେଯାସ୍ତଥାସୁରାଃ ।
ଯୁଦ୍ଧାଯ ସଜ୍ଜା ନିର୍ଯାନ୍ତୁ ଆଜ୍ଞଯା ତ୍ଵରିତା ମମ ॥ ୮.୬॥
ଇତ୍ଯାଜ୍ଞାପ୍ଯାସୁରପତିଃ ଶୁମ୍ଭୋ ଭୈରଵଶାସନଃ ।
ନିର୍ଜଗାମ ମହାସୈନ୍ଯସହସ୍ରୈର୍ବହୁଭିର୍ଵୃତଃ ॥ ୮.୭॥
ଆଯାନ୍ତଂ ଚଣ୍ଡିକା ଦୃଷ୍ଟ୍ଵା ତତ୍ସୈନ୍ଯମତିଭୀଷଣମ୍ ।
ଜ୍ଯାସ୍ଵନୈଃ ପୂରଯାମାସ ଧରଣୀଗଗନାନ୍ତରମ୍ ॥ ୮.୮॥
ତତଃ ସିଂହୋ ମହାନାଦମତୀଵ କୃତଵାନ୍ନୃପ ।
ଘଣ୍ଟାସ୍ଵନେନ ତାନ୍ନାଦାନମ୍ବିକା ଚୋପବୃଂହଯତ୍ ॥ ୮.୯॥
ଧନୁର୍ଜ୍ଯାସିଂହଘଣ୍ଟାନାଂ ନାଦାପୂରିତଦିଙ୍ମୁଖା ।
ନିନାଦୈର୍ଭୀଷଣୈଃ କାଲୀ ଜିଗ୍ଯେ ଵିସ୍ତାରିତାନନା ॥ ୮.୧୦॥
ତଂ ନିନାଦମୁପଶ୍ରୁତ୍ଯ ଦୈତ୍ଯସୈନ୍ଯୈଶ୍ଚତୁର୍ଦିଶମ୍ ।
ଦେଵୀ ସିଂହସ୍ତଥା କାଲୀ ସରୋଷୈଃ ପରିଵାରିତାଃ ॥ ୮.୧୧॥
ଏତସ୍ମିନ୍ନନ୍ତରେ ଭୂପ ଵିନାଶାଯ ସୁରଦ୍ଵିଷାମ୍ ।
ଭଵାଯାମରସିଂହାନାମତିଵୀର୍ଯବଲାନ୍ଵିତାଃ ॥ ୮.୧୨॥
ବ୍ରହ୍ମେଶଗୁହଵିଷ୍ଣୂନାଂ ତଥେନ୍ଦ୍ରସ୍ଯ ଚ ଶକ୍ତଯଃ ।
ଶରୀରେଭ୍ଯୋ ଵିନିଷ୍କ୍ରମ୍ଯ ତଦ୍ରୂପୈଶ୍ଚଣ୍ଡିକାଂ ଯଯୁଃ ॥ ୮.୧୩॥
ଯସ୍ଯ ଦେଵସ୍ଯ ଯଦ୍ରୂପଂ ଯଥା ଭୂଷଣଵାହନମ୍ ।
ତଦ୍ଵଦେଵ ହି ତଚ୍ଛକ୍ତିରସୁରାନ୍ଯୋଦ୍ଧୁମାଯଯୌ ॥ ୮.୧୪॥
ହଂସଯୁକ୍ତଵିମାନାଗ୍ରେ ସାକ୍ଷସୂତ୍ରକମଣ୍ଡଲୁଃ ।
ଆଯାତା ବ୍ରହ୍ମଣଃ ଶକ୍ତିର୍ବ୍ରହ୍ମାଣୀତ୍ଯଭିଧୀଯତେ ॥ ୮.୧୫॥
ମାହେଶ୍ଵରୀ ଵୃଷାରୂଢା ତ୍ରିଶୂଲଵରଧାରିଣୀ ।
ମହାହିଵଲଯା ପ୍ରାପ୍ତା ଚନ୍ଦ୍ରରେଖାଵିଭୂଷଣା ॥ ୮.୧୬॥
କୌମାରୀ ଶକ୍ତିହସ୍ତା ଚ ମଯୂରଵରଵାହନା ।
ଯୋଦ୍ଧୁମଭ୍ଯାଯଯୌ ଦୈତ୍ଯାନମ୍ବିକା ଗୁହରୂପିଣୀ ॥ ୮.୧୭॥
ତଥୈଵ ଵୈଷ୍ଣଵୀ ଶକ୍ତିର୍ଗରୁଡୋପରି ସଂସ୍ଥିତା ।
ଶଙ୍ଖଚକ୍ରଗଦାଶାର୍ଙ୍ଗଖଡ୍ଗହସ୍ତାଭ୍ଯୁପାଯଯୌ ॥ ୮.୧୮॥
ଯଜ୍ଞଵାରାହମତୁଲଂ ରୂପଂ ଯା ବିଭ୍ରତୋ ହରେଃ ।
ଶକ୍ତିଃ ସାପ୍ଯାଯଯୌ ତତ୍ର ଵାରାହୀଂ ବିଭ୍ରତୀ ତନୁମ୍ ॥ ୮.୧୯॥
ନାରସିଂହୀ ନୃସିଂହସ୍ଯ ବିଭ୍ରତୀ ସଦୃଶଂ ଵପୁଃ ।
ପ୍ରାପ୍ତା ତତ୍ର ସଟାକ୍ଷେପକ୍ଷିପ୍ତନକ୍ଷତ୍ରସଂହତିଃ ॥ ୮.୨୦॥
ଵଜ୍ରହସ୍ତା ତଥୈଵୈନ୍ଦ୍ରୀ ଗଜରାଜୋପରି ସ୍ଥିତା ।
ପ୍ରାପ୍ତା ସହସ୍ରନଯନା ଯଥା ଶକ୍ରସ୍ତଥୈଵ ସା ॥ ୮.୨୧॥
ତତଃ ପରିଵୃତସ୍ତାଭିରୀଶାନୋ ଦେଵଶକ୍ତିଭିଃ ।
ହନ୍ଯନ୍ତାମସୁରାଃ ଶୀଘ୍ରଂ ମମ ପ୍ରୀତ୍ଯାହ ଚଣ୍ଡିକାମ୍ ॥ ୮.୨୨॥
ତତୋ ଦେଵୀଶରୀରାତ୍ତୁ ଵିନିଷ୍କ୍ରାନ୍ତାତିଭୀଷଣା ।
ଚଣ୍ଡିକା ଶକ୍ତିରତ୍ଯୁଗ୍ରା ଶିଵାଶତନିନାଦିନୀ ॥ ୮.୨୩॥
ସା ଚାହ ଧୂମ୍ରଜଟିଲମୀଶାନମପରାଜିତା ।
ଦୂତ ତ୍ଵଂ ଗଚ୍ଛ ଭଗଵନ୍ ପାର୍ଶ୍ଵଂ ଶୁମ୍ଭନିଶୁମ୍ଭଯୋଃ ॥ ୮.୨୪॥
ବ୍ରୂହି ଶୁମ୍ଭଂ ନିଶୁମ୍ଭଂ ଚ ଦାନଵାଵତିଗର୍ଵିତୌ ।
ଯେ ଚାନ୍ଯେ ଦାନଵାସ୍ତତ୍ର ଯୁଦ୍ଧାଯ ସମୁପସ୍ଥିତାଃ ॥ ୮.୨୫॥
ତ୍ରୈଲୋକ୍ଯମିନ୍ଦ୍ରୋ ଲଭତାଂ ଦେଵାଃ ସନ୍ତୁ ହଵିର୍ଭୁଜଃ ।
ଯୂଯଂ ପ୍ରଯାତ ପାତାଲଂ ଯଦି ଜୀଵିତୁମିଚ୍ଛଥ ॥ ୮.୨୬॥
ବଲାଵଲେପାଦଥ ଚେଦ୍ଭଵନ୍ତୋ ଯୁଦ୍ଧକାଙ୍କ୍ଷିଣଃ ।
ତଦାଗଚ୍ଛତ ତୃପ୍ଯନ୍ତୁ ମଚ୍ଛିଵାଃ ପିଶିତେନ ଵଃ ॥ ୮.୨୭॥
ଯତୋ ନିଯୁକ୍ତୋ ଦୌତ୍ଯେନ ତଯା ଦେଵ୍ଯା ଶିଵଃ ସ୍ଵଯମ୍ ।
ଶିଵଦୂତୀତି ଲୋକେଽସ୍ମିଂସ୍ତତଃ ସା ଖ୍ଯାତିମାଗତା ॥ ୮.୨୮॥
ତେଽପି ଶ୍ରୁତ୍ଵା ଵଚୋ ଦେଵ୍ଯାଃ ଶର୍ଵାଖ୍ଯାତଂ ମହାସୁରାଃ ।
ଅମର୍ଷାପୂରିତା ଜଗ୍ମୁର୍ଯତ୍ର କାତ୍ଯାଯନୀ ସ୍ଥିତା ॥ ୮.୨୯॥
ତତଃ ପ୍ରଥମମେଵାଗ୍ରେ ଶରଶକ୍ତ୍ଯୃଷ୍ଟିଵୃଷ୍ଟିଭିଃ ।
ଵଵର୍ଷୁରୁଦ୍ଧତାମର୍ଷାସ୍ତାଂ ଦେଵୀମମରାରଯଃ ॥ ୮.୩୦॥
ସା ଚ ତାନ୍ ପ୍ରହିତାନ୍ ବାଣାଞ୍ଛୂଲଶକ୍ତିପରଶ୍ଵଧାନ୍ ।
ଚିଚ୍ଛେଦ ଲୀଲଯାଧ୍ମାତଧନୁର୍ମୁକ୍ତୈର୍ମହେଷୁଭିଃ ॥ ୮.୩୧॥
ତସ୍ଯାଗ୍ରତସ୍ତଥା କାଲୀ ଶୂଲପାତଵିଦାରିତାନ୍ ।
ଖଟ୍ଵାଙ୍ଗପୋଥିତାଂଶ୍ଚାରୀନ୍କୁର୍ଵତୀ ଵ୍ଯଚରତ୍ତଦା ॥ ୮.୩୨॥
କମଣ୍ଡଲୁଜଲାକ୍ଷେପହତଵୀର୍ଯାନ୍ ହତୌଜସଃ ।
ବ୍ରହ୍ମାଣୀ ଚାକରୋଚ୍ଛତ୍ରୂନ୍ଯେନ ଯେନ ସ୍ମ ଧାଵତି ॥ ୮.୩୩॥
ମାହେଶ୍ଵରୀ ତ୍ରିଶୂଲେନ ତଥା ଚକ୍ରେଣ ଵୈଷ୍ଣଵୀ ।
ଦୈତ୍ଯାଞ୍ଜଘାନ କୌମାରୀ ତଥା ଶକ୍ତ୍ଯାତିକୋପନା ॥ ୮.୩୪॥
ଐନ୍ଦ୍ରୀ କୁଲିଶପାତେନ ଶତଶୋ ଦୈତ୍ଯଦାନଵାଃ ।
ପେତୁର୍ଵିଦାରିତାଃ ପୃଥ୍ଵ୍ଯାଂ ରୁଧିରୌଘପ୍ରଵର୍ଷିଣଃ ॥ ୮.୩୫॥
ତୁଣ୍ଡପ୍ରହାରଵିଧ୍ଵସ୍ତା ଦଂଷ୍ଟ୍ରାଗ୍ରକ୍ଷତଵକ୍ଷସଃ ।
ଵାରାହମୂର୍ତ୍ଯା ନ୍ଯପତଂଶ୍ଚକ୍ରେଣ ଚ ଵିଦାରିତାଃ ॥ ୮.୩୬॥
ନଖୈର୍ଵିଦାରିତାଂଶ୍ଚାନ୍ଯାନ୍ ଭକ୍ଷଯନ୍ତୀ ମହାସୁରାନ୍ ।
ନାରସିଂହୀ ଚଚାରାଜୌ ନାଦାପୂର୍ଣଦିଗମ୍ବରା ॥ ୮.୩୭॥
ଚଣ୍ଡାଟ୍ଟହାସୈରସୁରାଃ ଶିଵଦୂତ୍ଯଭିଦୂଷିତାଃ ।
ପେତୁଃ ପୃଥିଵ୍ଯାଂ ପତିତାଂସ୍ତାଂଶ୍ଚଖାଦାଥ ସା ତଦା ॥ ୮.୩୮॥
ଇତି ମାତୃଗଣଂ କ୍ରୁଦ୍ଧଂ ମର୍ଦଯନ୍ତଂ ମହାସୁରାନ୍ ।
ଦୃଷ୍ଟ୍ଵାଭ୍ଯୁପାଯୈର୍ଵିଵିଧୈର୍ନେଶୁର୍ଦେଵାରିସୈନିକାଃ ॥ ୮.୩୯॥
ପଲାଯନପରାନ୍ଦୃଷ୍ଟ୍ଵା ଦୈତ୍ଯାନ୍ମାତୃଗଣାର୍ଦିତାନ୍ ।
ଯୋଦ୍ଧୁମଭ୍ଯାଯଯୌ କ୍ରୁଦ୍ଧୋ ରକ୍ତବୀଜୋ ମହାସୁରଃ ॥ ୮.୪୦॥
ରକ୍ତବିନ୍ଦୁର୍ଯଦା ଭୂମୌ ପତତ୍ଯସ୍ଯ ଶରୀରତଃ ।
ସମୁତ୍ପତତି ମେଦିନ୍ଯାଂ ତତ୍ପ୍ରମାଣୋ ମହାସୁରଃ ॥ ୮.୪୧॥
ଯୁଯୁଧେ ସ ଗଦାପାଣିରିନ୍ଦ୍ରଶକ୍ତ୍ଯା ମହାସୁରଃ ।
ତତଶ୍ଚୈନ୍ଦ୍ରୀ ସ୍ଵଵଜ୍ରେଣ ରକ୍ତବୀଜମତାଡଯତ୍ ॥ ୮.୪୨॥
କୁଲିଶେନାହତସ୍ଯାଶୁ ବହୁ ସୁସ୍ରାଵ ଶୋଣିତମ୍ ।
ସମୁତ୍ତସ୍ଥୁସ୍ତତୋ ଯୋଧାସ୍ତଦ୍ରୂପାସ୍ତତ୍ପରାକ୍ରମାଃ ॥ ୮.୪୩॥
ଯାଵନ୍ତଃ ପତିତାସ୍ତସ୍ଯ ଶରୀରାଦ୍ରକ୍ତବିନ୍ଦଵଃ ।
ତାଵନ୍ତଃ ପୁରୁଷା ଜାତାସ୍ତଦ୍ଵୀର୍ଯବଲଵିକ୍ରମାଃ ॥ ୮.୪୪॥
ତେ ଚାପି ଯୁଯୁଧୁସ୍ତତ୍ର ପୁରୁଷା ରକ୍ତସମ୍ଭଵାଃ ।
ସମଂ ମାତୃଭିରତ୍ଯୁଗ୍ରଶସ୍ତ୍ରପାତାତିଭୀଷଣମ୍ ॥ ୮.୪୫॥
ପୁନଶ୍ଚ ଵଜ୍ରପାତେନ କ୍ଷତମସ୍ଯ ଶିରୋ ଯଦା ।
ଵଵାହ ରକ୍ତଂ ପୁରୁଷାସ୍ତତୋ ଜାତାଃ ସହସ୍ରଶଃ ॥ ୮.୪୬॥
ଵୈଷ୍ଣଵୀ ସମରେ ଚୈନଂ ଚକ୍ରେଣାଭିଜଘାନ ହ ।
ଗଦଯା ତାଡଯାମାସ ଐନ୍ଦ୍ରୀ ତମସୁରେଶ୍ଵରମ୍ ॥ ୮.୪୭॥
ଵୈଷ୍ଣଵୀଚକ୍ରଭିନ୍ନସ୍ଯ ରୁଧିରସ୍ରାଵସମ୍ଭଵୈଃ ।
ସହସ୍ରଶୋ ଜଗଦ୍ଵ୍ଯାପ୍ତଂ ତତ୍ପ୍ରମାଣୈର୍ମହାସୁରୈଃ ॥ ୮.୪୮॥
ଶକ୍ତ୍ଯା ଜଘାନ କୌମାରୀ ଵାରାହୀ ଚ ତଥାସିନା ।
ମାହେଶ୍ଵରୀ ତ୍ରିଶୂଲେନ ରକ୍ତବୀଜଂ ମହାସୁରମ୍ ॥ ୮.୪୯॥
ସ ଚାପି ଗଦଯା ଦୈତ୍ଯଃ ସର୍ଵା ଏଵାହନତ୍ ପୃଥକ୍ ।
ମାତୄଃ କୋପସମାଵିଷ୍ଟୋ ରକ୍ତବୀଜୋ ମହାସୁରଃ ॥ ୮.୫୦॥
ତସ୍ଯାହତସ୍ଯ ବହୁଧା ଶକ୍ତିଶୂଲାଦିଭିର୍ଭୁଵି ।
ପପାତ ଯୋ ଵୈ ରକ୍ତୌଘସ୍ତେନାସଞ୍ଛତଶୋଽସୁରାଃ ॥ ୮.୫୧॥
ତୈଶ୍ଚାସୁରାସୃକ୍ସମ୍ଭୂତୈରସୁରୈଃ ସକଲଂ ଜଗତ୍ ।
ଵ୍ଯାପ୍ତମାସୀତ୍ତତୋ ଦେଵା ଭଯମାଜଗ୍ମୁରୁତ୍ତମମ୍ ॥ ୮.୫୨॥
ତାନ୍ ଵିଷଣ୍ଣାନ୍ ସୁରାନ୍ ଦୃଷ୍ଟ୍ଵା ଚଣ୍ଡିକା ପ୍ରାହସତ୍ଵରମ୍ ।
ଉଵାଚକାଲୀଂ ଚାମୁଣ୍ଡେ ଵିସ୍ତୀର୍ଣଂ ଵଦନଂ କୁରୁ ॥ ୮.୫୩॥
ମଚ୍ଛସ୍ତ୍ରପାତସମ୍ଭୂତାନ୍ ରକ୍ତବିନ୍ଦୂନ୍ ମହାସୁରାନ୍ ।
ରକ୍ତବିନ୍ଦୋଃ ପ୍ରତୀଚ୍ଛ ତ୍ଵଂ ଵକ୍ତ୍ରେଣାନେନ ଵେଗିନା ॥ ୮.୫୪॥
ଭକ୍ଷଯନ୍ତୀ ଚର ରଣେ ତଦୁତ୍ପନ୍ନାନ୍ମହାସୁରାନ୍ ।
ଏଵମେଷ କ୍ଷଯଂ ଦୈତ୍ଯଃ କ୍ଷେଣରକ୍ତୋ ଗମିଷ୍ଯତି ॥ ୮.୫୫॥
ଭକ୍ଷ୍ଯମାଣାସ୍ତ୍ଵଯା ଚୋଗ୍ରା ନ ଚୋତ୍ପତ୍ସ୍ଯନ୍ତି ଚାପରେ ।
ଇତ୍ଯୁକ୍ତ୍ଵା ତାଂ ତତୋ ଦେଵୀ ଶୂଲେନାଭିଜଘାନ ତମ୍ ॥ ୮.୫୬॥
ମୁଖେନ କାଲୀ ଜଗୃହେ ରକ୍ତବୀଜସ୍ଯ ଶୋଣିତମ୍ ।
ତତୋଽସାଵାଜଘାନାଥ ଗଦଯା ତତ୍ର ଚଣ୍ଡିକାମ୍ ॥ ୮.୫୭॥
ନ ଚାସ୍ଯା ଵେଦନାଂ ଚକ୍ରେ ଗଦାପାତୋଽଲ୍ପିକାମପି ।
ତସ୍ଯାହତସ୍ଯ ଦେହାତ୍ତୁ ବହୁ ସୁସ୍ରାଵ ଶୋଣିତମ୍ ॥ ୮.୫୮॥
ଯତସ୍ତତସ୍ତଦ୍ଵକ୍ତ୍ରେଣ ଚାମୁଣ୍ଡା ସମ୍ପ୍ରତୀଚ୍ଛତି ।
ମୁଖେ ସମୁଦ୍ଗତା ଯେଽସ୍ଯା ରକ୍ତପାତାନ୍ମହାସୁରାଃ ॥ ୮.୫୯॥
ତାଂଶ୍ଚଖାଦାଥ ଚାମୁଣ୍ଡା ପପୌ ତସ୍ଯ ଚ ଶୋଣିତମ୍ ।
ଦେଵୀ ଶୂଲେନ ଵଜ୍ରେଣ ବାଣୈରସିଭିରୃଷ୍ଟିଭିଃ ॥ ୮.୬୦॥
ଜଘାନ ରକ୍ତବୀଜଂ ତଂ ଚାମୁଣ୍ଡାପୀତଶୋଣିତମ୍ ।
ସ ପପାତ ମହୀପୃଷ୍ଠେ ଶସ୍ତ୍ରସଙ୍ଘସମାହତଃ ॥ ୮.୬୧॥
ନୀରକ୍ତଶ୍ଚ ମହୀପାଲ ରକ୍ତବୀଜୋ ମହାସୁରଃ ।
ତତସ୍ତେ ହର୍ଷମତୁଲମଵାପୁସ୍ତ୍ରିଦଶା ନୃପ ॥ ୮.୬୨॥
ତେଷାଂ ମାତୃଗଣୋ ଜାତୋ ନନର୍ତାସୃଙ୍ମଦୋଦ୍ଧତଃ ॥ ୮.୬୩॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ରକ୍ତବୀଜଵଧୋ ନାମାଷ୍ଟମୋଽଧ୍ଯାଯଃ ॥ ୮॥
ଉଵାଚ୧, ଅର୍ଧଶ୍ଲୋକଃ ୧, ଶ୍ଲୋକାଃ ୬୧, ଏଵମାଦିତଃ ॥ ୫୦୨॥

। ଧ୍ଯାନମ୍ ।
ଓଁ ବନ୍ଧୂକକାଞ୍ଚନନିଭଂ ରୁଚିରାକ୍ଷମାଲାଂ
ପାଶାଙ୍କୁଶୌ ଚ ଵରଦାଂ ନିଜବାହୁଦଣ୍ଡୈଃ ।
ବିଭ୍ରାଣମିନ୍ଦୁଶକଲାଭରଣଂ ତ୍ରିନେତ୍ର-
ମର୍ଧାଂବିକେଶମନିଶଂ ଵପୁରାଶ୍ରଯାମି ॥
ଓଁ ରାଜୋଵାଚ ॥ ୯.୧॥
ଵିଚିତ୍ରମିଦମାଖ୍ଯାତଂ ଭଗଵନ୍ ଭଵତା ମମ ।
ଦେଵ୍ଯାଶ୍ଚରିତମାହାତ୍ମ୍ଯଂ ରକ୍ତବୀଜଵଧାଶ୍ରିତମ୍ ॥ ୯.୨॥
ଭୂଯଶ୍ଚେଚ୍ଛାମ୍ଯହଂ ଶ୍ରୋତୁଂ ରକ୍ତବୀଜେ ନିପାତିତେ ।
ଚକାର ଶୁମ୍ଭୋ ଯତ୍କର୍ମ ନିଶୁମ୍ଭଶ୍ଚାତିକୋପନଃ ॥ ୯.୩॥
ଋଷିରୁଵାଚ ॥ ୯.୪॥
ଚକାର କୋପମତୁଲଂ ରକ୍ତବୀଜେ ନିପାତିତେ ।
ଶୁମ୍ଭାସୁରୋ ନିଶୁମ୍ଭଶ୍ଚ ହତେଷ୍ଵନ୍ଯେଷୁ ଚାହଵେ ॥ ୯.୫॥
ହନ୍ଯମାନଂ ମହାସୈନ୍ଯଂ ଵିଲୋକ୍ଯାମର୍ଷମୁଦ୍ଵହନ୍ ।
ଅଭ୍ଯଧାଵନ୍ନିଶୁମ୍ଭୋଽଥ ମୁଖ୍ଯଯାସୁରସେନଯା ॥ ୯.୬॥
ତସ୍ଯାଗ୍ରତସ୍ତଥା ପୃଷ୍ଠେ ପାର୍ଶ୍ଵଯୋଶ୍ଚ ମହାସୁରାଃ ।
ସନ୍ଦଷ୍ଟୌଷ୍ଠପୁଟାଃ କ୍ରୁଦ୍ଧା ହନ୍ତୁଂ ଦେଵୀମୁପାଯଯୁଃ ॥ ୯.୭॥
ଆଜଗାମ ମହାଵୀର୍ଯଃ ଶୁମ୍ଭୋଽପି ସ୍ଵବଲୈର୍ଵୃତଃ ।
ନିହନ୍ତୁଂ ଚଣ୍ଡିକାଂ କୋପାତ୍କୃତ୍ଵା ଯୁଦ୍ଧଂ ତୁ ମାତୃଭିଃ ॥ ୯.୮॥
ତତୋ ଯୁଦ୍ଧମତୀଵାସୀଦ୍ଦେଵ୍ଯା ଶୁମ୍ଭନିଶୁମ୍ଭଯୋଃ ।
ଶରଵର୍ଷମତୀଵୋଗ୍ରଂ ମେଘଯୋରିଵ ଵର୍ଷତୋଃ ॥ ୯.୯॥
ଚିଚ୍ଛେଦାସ୍ତାଞ୍ଛରାଂସ୍ତାଭ୍ଯାଂ ଚଣ୍ଡିକା ସ୍ଵଶରୋତ୍କରୈଃ ।
ତାଡଯାମାସ ଚାଙ୍ଗେଷୁ ଶସ୍ତ୍ରୌଘୈରସୁରେଶ୍ଵରୌ ॥ ୯.୧୦॥
ନିଶୁମ୍ଭୋ ନିଶିତଂ ଖଡ୍ଗଂ ଚର୍ମ ଚାଦାଯ ସୁପ୍ରଭମ୍ ।
ଅତାଡଯନ୍ମୂର୍ଧ୍ନି ସିଂହଂ ଦେଵ୍ଯା ଵାହନମୁତ୍ତମମ୍ ॥ ୯.୧୧॥
ତାଡିତେ ଵାହନେ ଦେଵୀ କ୍ଷୁରପ୍ରେଣାସିମୁତ୍ତମମ୍ ।
ନିଶୁମ୍ଭସ୍ଯାଶୁ ଚିଚ୍ଛେଦ ଚର୍ମ ଚାପ୍ଯଷ୍ଟଚନ୍ଦ୍ରକମ୍ ॥ ୯.୧୨॥
ଛିନ୍ନେ ଚର୍ମଣି ଖଡ୍ଗେ ଚ ଶକ୍ତିଂ ଚିକ୍ଷେପ ସୋଽସୁରଃ ।
ତାମପ୍ଯସ୍ଯ ଦ୍ଵିଧା ଚକ୍ରେ ଚକ୍ରେଣାଭିମୁଖାଗତାମ୍ ॥ ୯.୧୩॥
କୋପାଧ୍ମାତୋ ନିଶୁମ୍ଭୋଽଥ ଶୂଲଂ ଜଗ୍ରାହ ଦାନଵଃ ।
ଆଯାତଂ ମୁଷ୍ଟିପାତେନ ଦେଵୀ ତଚ୍ଚାପ୍ଯଚୂର୍ଣଯତ୍ ॥ ୯.୧୪॥
ଆଵିଦ୍ଯାଥ ଗଦାଂ ସୋଽପି ଚିକ୍ଷେପ ଚଣ୍ଡିକାଂ ପ୍ରତି ।
ସାପି ଦେଵ୍ଯାସ୍ ତ୍ରିଶୂଲେନ ଭିନ୍ନା ଭସ୍ମତ୍ଵମାଗତା ॥ ୯.୧୫॥
ତତଃ ପରଶୁହସ୍ତଂ ତମାଯାନ୍ତଂ ଦୈତ୍ଯପୁଙ୍ଗଵମ୍ ।
ଆହତ୍ଯ ଦେଵୀ ବାଣୌଘୈରପାତଯତ ଭୂତଲେ ॥ ୯.୧୬॥
ତସ୍ମିନ୍ନିପତିତେ ଭୂମୌ ନିଶୁମ୍ଭେ ଭୀମଵିକ୍ରମେ ।
ଭ୍ରାତର୍ଯତୀଵ ସଙ୍କ୍ରୁଦ୍ଧଃ ପ୍ରଯଯୌ ହନ୍ତୁମମ୍ବିକାମ୍ ॥ ୯.୧୭॥
ସ ରଥସ୍ଥସ୍ତଥାତ୍ଯୁଚ୍ଚୈର୍ଗୃହୀତପରମାଯୁଧୈଃ ।
ଭୁଜୈରଷ୍ଟାଭିରତୁଲୈର୍ଵ୍ଯାପ୍ଯାଶେଷଂ ବଭୌ ନଭଃ ॥ ୯.୧୮॥
ତମାଯାନ୍ତଂ ସମାଲୋକ୍ଯ ଦେଵୀ ଶଙ୍ଖମଵାଦଯତ୍ ।
ଜ୍ଯାଶବ୍ଦଂ ଚାପି ଧନୁଷଶ୍ଚକାରାତୀଵ ଦୁଃସହମ୍ ॥ ୯.୧୯॥
ପୂରଯାମାସ କକୁଭୋ ନିଜଘଣ୍ଟାସ୍ଵନେନ ଚ ।
ସମସ୍ତଦୈତ୍ଯସୈନ୍ଯାନାଂ ତେଜୋଵଧଵିଧାଯିନା ॥ ୯.୨୦॥
ତତଃ ସିଂହୋ ମହାନାଦୈସ୍ତ୍ଯାଜିତେଭମହାମଦୈଃ ।
ପୂରଯାମାସ ଗଗନଂ ଗାଂ ତଥୈଵ ଦିଶୋ ଦଶ ॥ ୯.୨୧॥
ତତଃ କାଲୀ ସମୁତ୍ପତ୍ଯ ଗଗନଂ କ୍ଷ୍ମାମତାଡଯତ୍ ।
କରାଭ୍ଯାଂ ତନ୍ନିନାଦେନ ପ୍ରାକ୍ସ୍ଵନାସ୍ତେ ତିରୋହିତାଃ ॥ ୯.୨୨॥
ଅଟ୍ଟାଟ୍ଟହାସମଶିଵଂ ଶିଵଦୂତୀ ଚକାର ହ ।
ଵୈଃ ଶବ୍ଦୈରସୁରାସ୍ତ୍ରେସୁଃ ଶୁମ୍ଭଃ କୋପଂ ପରଂ ଯଯୌ ॥ ୯.୨୩॥
ଦୁରାତ୍ମଂସ୍ତିଷ୍ଠ ତିଷ୍ଠେତି ଵ୍ଯାଜହାରାମ୍ବିକା ଯଦା ।
ତଦା ଜଯେତ୍ଯଭିହିତଂ ଦେଵୈରାକାଶସଂସ୍ଥିତୈଃ ॥ ୯.୨୪॥
ଶୁମ୍ଭେନାଗତ୍ଯ ଯା ଶକ୍ତିର୍ମୁକ୍ତା ଜ୍ଵାଲାତିଭୀଷଣା ।
ଆଯାନ୍ତୀ ଵହ୍ନିକୂଟାଭା ସା ନିରସ୍ତା ମହୋଲ୍କଯା ॥ ୯.୨୫॥
ସିଂହନାଦେନ ଶୁମ୍ଭସ୍ଯ ଵ୍ଯାପ୍ତଂ ଲୋକତ୍ରଯାନ୍ତରମ୍ ।
ନିର୍ଘାତନିଃସ୍ଵନୋ ଘୋରୋ ଜିତଵାନଵନୀପତେ ॥ ୯.୨୬॥
ଶୁମ୍ଭମୁକ୍ତାଞ୍ଛରାନ୍ଦେଵୀ ଶୁମ୍ଭସ୍ତତ୍ପ୍ରହିତାଞ୍ଛରାନ୍ ।
ଚିଚ୍ଛେଦ ସ୍ଵଶରୈରୁଗ୍ରୈଃ ଶତଶୋଽଥ ସହସ୍ରଶଃ ॥ ୯.୨୭॥
ତତଃ ସା ଚଣ୍ଡିକା କ୍ରୁଦ୍ଧା ଶୂଲେନାଭିଜଘାନ ତମ୍ ।
ସ ତଦାଭିହତୋ ଭୂମୌ ମୂର୍ଚ୍ଛିତୋ ନିପପାତ ହ ॥ ୯.୨୮॥
ତତୋ ନିଶୁମ୍ଭଃ ସମ୍ପ୍ରାପ୍ଯ ଚେତନାମାତ୍ତକାର୍ମୁକଃ ।
ଆଜଘାନ ଶରୈର୍ଦେଵୀଂ କାଲୀଂ କେସରିଣଂ ତଥା ॥ ୯.୨୯॥
ପୁନଶ୍ଚ କୃତ୍ଵା ବାହୂନାମଯୁତଂ ଦନୁଜେଶ୍ଵରଃ ।
ଚକ୍ରାଯୁଧେନ ଦିତିଜଶ୍ଛାଦଯାମାସ ଚଣ୍ଡିକାମ୍ ॥ ୯.୩୦॥
ତତୋ ଭଗଵତୀ କ୍ରୁଦ୍ଧା ଦୁର୍ଗା ଦୁର୍ଗାର୍ତିନାଶିନୀ ।
ଚିଚ୍ଛେଦ ଦେଵୀ ଚକ୍ରାଣି ସ୍ଵଶରୈଃ ସାଯକାଂଶ୍ଚ ତାନ୍ ॥ ୯.୩୧॥
ତତୋ ନିଶୁମ୍ଭୋ ଵେଗେନ ଗଦାମାଦାଯ ଚଣ୍ଡିକାମ୍ ।
ଅଭ୍ଯଧାଵତ ଵୈ ହନ୍ତୁଂ ଦୈତ୍ଯସୈନ୍ଯସମାଵୃତଃ ॥ ୯.୩୨॥
ତସ୍ଯାପତତ ଏଵାଶୁ ଗଦାଂ ଚିଚ୍ଛେଦ ଚଣ୍ଡିକା ।
ଖଡ୍ଗେନ ଶିତଧାରେଣ ସ ଚ ଶୂଲଂ ସମାଦଦେ ॥ ୯.୩୩॥
ଶୂଲହସ୍ତଂ ସମାଯାନ୍ତଂ ନିଶୁମ୍ଭମମରାର୍ଦନମ୍ ।
ହୃଦି ଵିଵ୍ଯାଧ ଶୂଲେନ ଵେଗାଵିଦ୍ଧେନ ଚଣ୍ଡିକା ॥ ୯.୩୪॥
ଭିନ୍ନସ୍ଯ ତସ୍ଯ ଶୂଲେନ ହୃଦଯାନ୍ନିଃସୃତୋଽପରଃ ।
ମହାବଲୋ ମହାଵୀର୍ଯସ୍ତିଷ୍ଠେତି ପୁରୁଷୋ ଵଦନ୍ ॥ ୯.୩୫॥
ତସ୍ଯ ନିଷ୍କ୍ରାମତୋ ଦେଵୀ ପ୍ରହସ୍ଯ ସ୍ଵନଵତ୍ତତଃ ।
ଶିରଶ୍ଚିଚ୍ଛେଦ ଖଡ୍ଗେନ ତତୋଽସାଵପତଦ୍ଭୁଵି ॥ ୯.୩୬॥
ତତଃ ସିଂହଶ୍ଚଖାଦୋଗ୍ରଦଂଷ୍ଟ୍ରାକ୍ଷୁଣ୍ଣଶିରୋଧରାନ୍ ।
ଅସୁରାଂସ୍ତାଂସ୍ତଥା କାଲୀ ଶିଵଦୂତୀ ତଥାପରାନ୍ ॥ ୯.୩୭॥
କୌମାରୀଶକ୍ତିନିର୍ଭିନ୍ନାଃ କେଚିନ୍ନେଶୁର୍ମହାସୁରାଃ ।
ବ୍ରହ୍ମାଣୀମନ୍ତ୍ରପୂତେନ ତୋଯେନାନ୍ଯେ ନିରାକୃତାଃ ॥ ୯.୩୮॥
ମାହେଶ୍ଵରୀତ୍ରିଶୂଲେନ ଭିନ୍ନାଃ ପେତୁସ୍ତଥାପରେ ।
ଵାରାହୀତୁଣ୍ଡଘାତେନ କେଚିଚ୍ଚୂର୍ଣୀକୃତା ଭୁଵି ॥ ୯.୩୯॥
ଖଣ୍ଡଂ ଖଣ୍ଡଂ ଚ ଚକ୍ରେଣ ଵୈଷ୍ଣଵ୍ଯା ଦାନଵାଃ କୃତାଃ ।
ଵଜ୍ରେଣ ଚୈନ୍ଦ୍ରୀହସ୍ତାଗ୍ରଵିମୁକ୍ତେନ ତଥାପରେ ॥ ୯.୪୦॥
କେଚିଦ୍ଵିନେଶୁରସୁରାଃ କେଚିନ୍ନଷ୍ଟା ମହାହଵାତ୍ ।
ଭକ୍ଷିତାଶ୍ଚାପରେ କାଲୀଶିଵଦୂତୀମୃଗାଧିପୈଃ ॥ ୯.୪୧॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ନିଶୁମ୍ଭଵଧୋ ନାମ ନଵମୋଽଧ୍ଯାଯଃ ॥ ୯॥
ଉଵାଚ୨, ଅର୍ଧଶ୍ଲୋକାଃ ୩୯, ଶ୍ଲୋକାଃ ୪୧, ଏଵମାଦିତଃ ॥ ୫୪୩॥

। ଧ୍ଯାନମ୍ ।
ଓଁ ଉତ୍ତପ୍ତହେମରୁଚିରାଂ ରଵିଚନ୍ଦ୍ରଵହ୍ନି-
ନେତ୍ରାଂ ଧନୁଶ୍ଶରଯୁତାଙ୍କୁଶପାଶଶୂଲମ୍ ।
ରମ୍ଯୈର୍ଭୁଜୈଶ୍ଚ ଦଧତୀଂ ଶିଵଶକ୍ତିରୂପାଂ
କାମେଶ୍ଵରୀଂ ହୃଦି ଭଜାମି ଧୃତେନ୍ଦୁଲେଖାମ୍ ॥
ଓଁ ଋଷିରୁଵାଚ ॥ ୧୦.୧॥
ନିଶୁମ୍ଭଂ ନିହତଂ ଦୃଷ୍ଟ୍ଵା ଭ୍ରାତରଂ ପ୍ରାଣସମ୍ମିତମ୍ ।
ହନ୍ଯମାନଂ ବଲଂ ଚୈଵ ଶୁମ୍ଭଃ କ୍ରୁଦ୍ଧୋଽବ୍ରଵୀଦ୍ଵଚଃ ॥ ୧୦.୨॥
ବଲାଵଲେପଦୁଷ୍ଟେ ତ୍ଵଂ ମା ଦୁର୍ଗେ ଗର୍ଵମାଵହ ।
ଅନ୍ଯାସାଂ ବଲମାଶ୍ରିତ୍ଯ ଯୁଦ୍ଧ୍ଯସେ ଚାତିମାନିନୀ ॥ ୧୦.୩॥
ଦେଵ୍ଯୁଵାଚ॥ ୧୦.୪॥
ଏକୈଵାହଂ ଜଗତ୍ଯତ୍ର ଦ୍ଵିତୀଯା କା ମମାପରା ।
ପଶ୍ଯୈତା ଦୁଷ୍ଟ ମଯ୍ଯେଵ ଵିଶନ୍ତ୍ଯୋ ମଦ୍ଵିଭୂତଯଃ ॥ ୧୦.୫॥
ତତଃ ସମସ୍ତାସ୍ତା ଦେଵ୍ଯୋ ବ୍ରହ୍ମାଣୀପ୍ରମୁଖା ଲଯମ୍ ।
ତସ୍ଯା ଦେଵ୍ଯାସ୍ତନୌ ଜଗ୍ମୁରେକୈଵାସୀତ୍ତଦାମ୍ବିକା ॥ ୧୦.୬॥
ଦେଵ୍ଯୁଵାଚ॥ ୧୦.୭॥
ଅହଂ ଵିଭୂତ୍ଯା ବହୁଭିରିହ ରୂପୈର୍ଯଦାସ୍ଥିତା ।
ତତ୍ସଂହୃତଂ ମଯୈକୈଵ ତିଷ୍ଠାମ୍ଯାଜୌ ସ୍ଥିରୋ ଭଵ ॥ ୧୦.୮॥
ଋଷିରୁଵାଚ ॥ ୧୦.୯॥
ତତଃ ପ୍ରଵଵୃତେ ଯୁଦ୍ଧଂ ଦେଵ୍ଯାଃ ଶୁମ୍ଭସ୍ଯ ଚୋଭଯୋଃ ।
ପଶ୍ଯତାଂ ସର୍ଵଦେଵାନାମସୁରାଣାଂ ଚ ଦାରୁଣମ୍ ॥ ୧୦.୧୦॥
ଶରଵର୍ଷୈଃ ଶିତୈଃ ଶସ୍ତ୍ରୈସ୍ତଥା ଚାସ୍ତ୍ରୈଃ ସୁଦାରୁଣୈଃ ।
ତଯୋର୍ଯୁଦ୍ଧମଭୂଦ୍ଭୂଯଃ ସର୍ଵଲୋକଭଯଙ୍କରମ୍ ॥ ୧୦.୧୧॥
ଦିଵ୍ଯାନ୍ଯସ୍ତ୍ରାଣି ଶତଶୋ ମୁମୁଚେ ଯାନ୍ଯଥାମ୍ବିକା ।
ବଭଞ୍ଜ ତାନି ଦୈତ୍ଯେନ୍ଦ୍ରସ୍ତତ୍ପ୍ରତୀଘାତକର୍ତୃଭିଃ ॥ ୧୦.୧୨॥
ମୁକ୍ତାନି ତେନ ଚାସ୍ତ୍ରାଣି ଦିଵ୍ଯାନି ପରମେଶ୍ଵରୀ ।
ବଭଞ୍ଜ ଲୀଲଯୈଵୋଗ୍ରହୁଙ୍କାରୋଚ୍ଚାରଣାଦିଭିଃ ॥ ୧୦.୧୩॥
ତତଃ ଶରଶତୈର୍ଦେଵୀମାଚ୍ଛାଦଯତ ସୋଽସୁରଃ ।
ସାପି ତତ୍କୁପିତା ଦେଵୀ ଧନୁଶ୍ଚିଚ୍ଛେଦ ଚେଷୁଭିଃ ॥ ୧୦.୧୪॥
ଛିନ୍ନେ ଧନୁଷି ଦୈତ୍ଯେନ୍ଦ୍ରସ୍ତଥା ଶକ୍ତିମଥାଦଦେ ।
ଚିଚ୍ଛେଦ ଦେଵୀ ଚକ୍ରେଣ ତାମପ୍ଯସ୍ଯ କରେ ସ୍ଥିତାମ୍ ॥ ୧୦.୧୫॥
ତତଃ ଖଡ୍ଗମୁପାଦାଯ ଶତଚନ୍ଦ୍ରଂ ଚ ଭାନୁମତ୍ ।
ଅଭ୍ଯଧା ଵତ ତାଂ ଦେଵୀଂ ଦୈତ୍ଯାନାମଧିପେଶ୍ଵରଃ ॥ ୧୦.୧୬॥
ତସ୍ଯାପତତ ଏଵାଶୁ ଖଡ୍ଗଂ ଚିଚ୍ଛେଦ ଚଣ୍ଡିକା ।
ଧନୁର୍ମୁକ୍ତୈଃ ଶିତୈର୍ବାଣୈଶ୍ଚର୍ମ ଚାର୍କକରାମଲମ୍ ।
ଅଶ୍ଵାଂଶ୍ଚ ପାତଯାମାସ ରଥଂ ସାରଥିନା ସହ ॥ ୧୦.୧୭॥
ହତାଶ୍ଵଃ ସ ତଦା ଦୈତ୍ଯଶ୍ଛିନ୍ନଧନ୍ଵା ଵିସାରଥିଃ ।
ଜଗ୍ରାହ ମୁଦ୍ଗରଂ ଘୋରମମ୍ବିକାନିଧନୋଦ୍ଯତଃ ॥ ୧୦.୧୮॥
ଚିଚ୍ଛେଦାପତତସ୍ତସ୍ଯ ମୁଦ୍ଗରଂ ନିଶିତୈଃ ଶରୈଃ ।
ତଥାପି ସୋଽଭ୍ଯଧାଵତ୍ତାଂ ମୁଷ୍ଟିମୁଦ୍ଯମ୍ଯ ଵେଗଵାନ୍ ॥ ୧୦.୧୯॥
ସ ମୁଷ୍ଟିଂ ପାତଯାମାସ ହୃଦଯେ ଦୈତ୍ଯପୁଙ୍ଗଵଃ ।
ଦେଵ୍ଯାସ୍ତଂ ଚାପି ସା ଦେଵୀ ତଲେନୋରସ୍ଯତାଡଯତ୍ ॥ ୧୦.୨୦॥
ତଲପ୍ରହାରାଭିହତୋ ନିପପାତ ମହୀତଲେ ।
ସ ଦୈତ୍ଯରାଜଃ ସହସା ପୁନରେଵ ତଥୋତ୍ଥିତଃ ॥ ୧୦.୨୧॥
ଉତ୍ପତ୍ଯ ଚ ପ୍ରଗୃହ୍ଯୋଚ୍ଚୈର୍ଦେଵୀଂ ଗଗନମାସ୍ଥିତଃ ।
ତତ୍ରାପି ସା ନିରାଧାରା ଯୁଯୁଧେ ତେନ ଚଣ୍ଡିକା ॥ ୧୦.୨୨॥
ନିଯୁଦ୍ଧଂ ଖେ ତଦା ଦୈତ୍ଯଶ୍ଚଣ୍ଡିକା ଚ ପରସ୍ପରମ୍ ।
ଚକ୍ରତୁଃ ପ୍ରଥମଂ ସିଦ୍ଧମୁନିଵିସ୍ମଯକାରକମ୍ ॥ ୧୦.୨୩॥
ତତୋ ନିଯୁଦ୍ଧଂ ସୁଚିରଂ କୃତ୍ଵା ତେନାମ୍ବିକା ସହ ।
ଉତ୍ପାଟ୍ଯ ଭ୍ରାମଯାମାସ ଚିକ୍ଷେପ ଧରଣୀତଲେ ॥ ୧୦.୨୪॥
ସ କ୍ଷିପ୍ତୋ ଧରଣୀଂ ପ୍ରାପ୍ଯ ମୁଷ୍ଟିମୁଦ୍ଯମ୍ଯ ଵେଗଵାନ୍ ।
ଅଭ୍ଯଧାଵତ ଦୁଷ୍ଟାତ୍ମା ଚଣ୍ଡିକାନିଧନେଚ୍ଛଯା ॥ ୧୦.୨୫॥
ତମାଯାନ୍ତଂ ତତୋ ଦେଵୀ ସର୍ଵଦୈତ୍ଯଜନେଶ୍ଵରମ୍ ।
ଜଗତ୍ଯାଂ ପାତଯାମାସ ଭିତ୍ତ୍ଵା ଶୂଲେନ ଵକ୍ଷସି ॥ ୧୦.୨୬॥
ସ ଗତାସୁଃ ପପାତୋର୍ଵ୍ଯାଂ ଦେଵୀ ଶୂଲାଗ୍ରଵିକ୍ଷତଃ ।
ଚାଲଯନ୍ ସକଲାଂ ପୃଥ୍ଵୀଂ ସାବ୍ଧିଦ୍ଵୀପାଂ ସପର୍ଵତାମ୍ ॥ ୧୦.୨୭॥
ତତଃ ପ୍ରସନ୍ନମଖିଲଂ ହତେ ତସ୍ମିନ୍ ଦୁରାତ୍ମନି ।
ଜଗତ୍ସ୍ଵାସ୍ଥ୍ଯମତୀଵାପ ନିର୍ମଲଂ ଚାଭଵନ୍ନଭଃ ॥ ୧୦.୨୮॥
ଉତ୍ପାତମେଘାଃ ସୋଲ୍କା ଯେ ପ୍ରାଗାସଂସ୍ତେ ଶମଂ ଯଯୁଃ ।
ସରିତୋ ମାର୍ଗଵାହିନ୍ଯସ୍ତଥାସଂସ୍ତତ୍ର ପାତିତେ ॥ ୧୦.୨୯॥
ତତୋ ଦେଵଗଣାଃ ସର୍ଵେ ହର୍ଷନିର୍ଭରମାନସାଃ ।
ବଭୂଵୁର୍ନିହତେ ତସ୍ମିନ୍ ଗନ୍ଧର୍ଵା ଲଲିତଂ ଜଗୁଃ ॥ ୧୦.୩୦॥
ଅଵାଦଯଂସ୍ତଥୈଵାନ୍ଯେ ନନୃତୁଶ୍ଚାପ୍ସରୋଗଣାଃ ।
ଵଵୁଃ ପୁଣ୍ଯାସ୍ତଥା ଵାତାଃ ସୁପ୍ରଭୋଽଭୂଦ୍ଦିଵାକରଃ ॥ ୧୦.୩୧॥
ଜଜ୍ଵଲୁଶ୍ଚାଗ୍ନଯଃ ଶାନ୍ତାଃ ଶାନ୍ତା ଦିଗ୍ଜନିତସ୍ଵନାଃ ॥ ୧୦.୩୨॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ
ଦେଵୀମାହାତ୍ମ୍ଯେ ଶୁମ୍ଭଵଧୋ ନାମ ଦଶମୋଽଧ୍ଯାଯଃ ॥ ୧୦॥

। ଧ୍ଯାନମ୍ ।
ଓଁ ବାଲରଵିଦ୍ଯୁତିମିନ୍ଦୁକିରୀଟାଂ ତୁଙ୍ଗକୁଚାଂ ନଯନତ୍ରଯଯୁକ୍ତାମ୍ ।
ସ୍ମେରମୁଖୀଂ ଵରଦାଙ୍କୁଶପାଶାଭୀତିକରାଂ ପ୍ରଭଜେ ଭୁଵନେଶୀମ୍ ॥
ଓଁ ଋଷିରୁଵାଚ ॥ ୧୧.୧॥
ଦେଵ୍ଯା ହତେ ତତ୍ର ମହାସୁରେନ୍ଦ୍ରେ
ସେନ୍ଦ୍ରାଃ ସୁରା ଵହ୍ନିପୁରୋଗମାସ୍ତାମ୍ ।
କାତ୍ଯାଯନୀଂ ତୁଷ୍ଟୁଵୁରିଷ୍ଟଲାଭାଦ୍
ଵିକାଶିଵକ୍ତ୍ରାବ୍ଜଵିକାଶିତାଶାଃ ॥ ୧୧.୨॥
ଦେଵି ପ୍ରପନ୍ନାର୍ତିହରେ ପ୍ରସୀଦ
ପ୍ରସୀଦ ମାତର୍ଜଗତୋଽଖିଲସ୍ଯ ।
ପ୍ରସୀଦ ଵିଶ୍ଵେଶ୍ଵରି ପାହି ଵିଶ୍ଵଂ
ତ୍ଵମୀଶ୍ଵରୀ ଦେଵି ଚରାଚରସ୍ଯ ॥ ୧୧.୩॥
ଆଧାରଭୂତା ଜଗତସ୍ତ୍ଵମେକା
ମହୀସ୍ଵରୂପେଣ ଯତଃ ସ୍ଥିତାସି ।
ଅପାଂ ସ୍ଵରୂପସ୍ଥିତଯା ତ୍ଵଯୈତ-
ଦାପ୍ଯାଯତେ କୃତ୍ସ୍ନମଲଙ୍ଘ୍ଯଵୀର୍ଯେ ॥ ୧୧.୪॥
ତ୍ଵଂ ଵୈଷ୍ଣଵୀଶକ୍ତିରନନ୍ତଵୀର୍ଯା
ଵିଶ୍ଵସ୍ଯ ବୀଜଂ ପରମାସି ମାଯା ।
ସମ୍ମୋହିତଂ ଦେଵି ସମସ୍ତମେତତ୍
ତ୍ଵଂ ଵୈ ପ୍ରସନ୍ନା ଭୁଵି ମୁକ୍ତିହେତୁଃ ॥ ୧୧.୫॥
ଵିଦ୍ଯାଃ ସମସ୍ତାସ୍ତଵ ଦେଵି ଭେଦାଃ
ସ୍ତ୍ରିଯଃ ସମସ୍ତାଃ ସକଲା ଜଗତ୍ସୁ ।
ତ୍ଵଯୈକଯା ପୂରିତମମ୍ବଯୈତତ୍
କା ତେ ସ୍ତୁତିଃ ସ୍ତଵ୍ଯପରାପରୋକ୍ତିଃ ॥ ୧୧.୬॥
ସର୍ଵଭୂତା ଯଦା ଦେଵୀ ଭୁକ୍ତିମୁକ୍ତିପ୍ରଦାଯିନୀ ।
ତ୍ଵଂ ସ୍ତୁତା ସ୍ତୁତଯେ କା ଵା ଭଵନ୍ତୁ ପରମୋକ୍ତଯଃ ॥ ୧୧.୭॥
ସର୍ଵସ୍ଯ ବୁଦ୍ଧିରୂପେଣ ଜନସ୍ଯ ହୃଦି ସଂସ୍ଥିତେ ।
ସ୍ଵର୍ଗାପଵର୍ଗଦେ ଦେଵି ନାରାଯଣି ନମୋଽସ୍ତୁ ତେ ॥ ୧୧.୮॥
କଲାକାଷ୍ଠାଦିରୂପେଣ ପରିଣାମପ୍ରଦାଯିନି ।
ଵିଶ୍ଵସ୍ଯୋପରତୌ ଶକ୍ତେ ନାରାଯଣି ନମୋଽସ୍ତୁ ତେ ॥ ୧୧.୯॥
ସର୍ଵମଙ୍ଗଲମାଙ୍ଗଲ୍ଯେ ଶିଵେ ସର୍ଵାର୍ଥସାଧିକେ ।
ଶରଣ୍ଯେ ତ୍ର୍ଯମ୍ବକେ ଗୌରି ନାରାଯଣି ନମୋଽସ୍ତୁ ତେ ॥ ୧୧.୧୦॥
ସୃଷ୍ଟିସ୍ଥିତିଵିନାଶାନାଂ ଶକ୍ତିଭୂତେ ସନାତନି ।
ଗୁଣାଶ୍ରଯେ ଗୁଣମଯେ ନାରାଯଣି ନମୋଽସ୍ତୁ ତେ ॥ ୧୧.୧୧॥
ଶରଣାଗତଦୀନାର୍ତପରିତ୍ରାଣପରାଯଣେ ।
ସର୍ଵସ୍ଯାର୍ତିହରେ ଦେଵି ନାରାଯଣି ନମୋଽସ୍ତୁ ତେ ॥ ୧୧.୧୨॥
ହଂସଯୁକ୍ତଵିମାନସ୍ଥେ ବ୍ରହ୍ମାଣୀରୂପଧାରିଣି ।
କୌଶାମ୍ଭଃକ୍ଷରିକେ ଦେଵି ନାରାଯଣି ନମୋଽସ୍ତୁ ତେ ॥ ୧୧.୧୩॥
ତ୍ରିଶୂଲଚନ୍ଦ୍ରାହିଧରେ ମହାଵୃଷଭଵାହିନି ।
ମାହେଶ୍ଵରୀସ୍ଵରୂପେଣ ନାରାଯଣି ନମୋଽସ୍ତୁତେ ॥ ୧୧.୧୪॥
ମଯୂରକୁକ୍କୁଟଵୃତେ ମହାଶକ୍ତିଧରେଽନଘେ ।
କୌମାରୀରୂପସଂସ୍ଥାନେ ନାରାଯଣି ନମୋଽସ୍ତୁ ତେ ॥ ୧୧.୧୫॥
ଶଙ୍ଖଚକ୍ରଗଦାଶାର୍ଙ୍ଗଗୃହୀତପରମାଯୁଧେ ।
ପ୍ରସୀଦ ଵୈଷ୍ଣଵୀରୂପେ ନାରାଯଣି ନମୋଽସ୍ତୁ ତେ ॥ ୧୧.୧୬॥
ଗୃହୀତୋଗ୍ରମହାଚକ୍ରେ ଦଂଷ୍ଟ୍ରୋଦ୍ଧୃତଵସୁନ୍ଧରେ ।
ଵରାହରୂପିଣି ଶିଵେ ନାରାଯଣି ନମୋଽସ୍ତୁ ତେ ॥ ୧୧.୧୭॥
ନୃସିଂହରୂପେଣୋଗ୍ରେଣ ହନ୍ତୁଂ ଦୈତ୍ଯାନ୍ କୃତୋଦ୍ଯମେ ।
ତ୍ରୈଲୋକ୍ଯତ୍ରାଣସହିତେ ନାରାଯଣି ନମୋଽସ୍ତୁ ତେ ॥ ୧୧.୧୮॥
କିରୀଟିନି ମହାଵଜ୍ରେ ସହସ୍ରନଯନୋଜ୍ଜ୍ଵଲେ ।
ଵୃତ୍ରପ୍ରାଣହରେ ଚୈନ୍ଦ୍ରି ନାରାଯଣି ନମୋଽସ୍ତୁ ତେ ॥ ୧୧.୧୯॥
ଶିଵଦୂତୀସ୍ଵରୂପେଣ ହତଦୈତ୍ଯମହାବଲେ ।
ଘୋରରୂପେ ମହାରାଵେ ନାରାଯଣି ନମୋଽସ୍ତୁ ତେ ॥ ୧୧.୨୦॥
ଦଂଷ୍ଟ୍ରାକରାଲଵଦନେ ଶିରୋମାଲାଵିଭୂଷଣେ ।
ଚାମୁଣ୍ଡେ ମୁଣ୍ଡମଥନେ ନାରାଯଣି ନମୋଽସ୍ତୁ ତେ ॥ ୧୧.୨୧॥
ଲକ୍ଷ୍ମି ଲଜ୍ଜେ ମହାଵିଦ୍ଯେ ଶ୍ରଦ୍ଧେ ପୁଷ୍ଟି ସ୍ଵଧେ ଧ୍ରୁଵେ ।
ମହାରାତ୍ରି ମହାମାଯେ ନାରାଯଣି ନମୋଽସ୍ତୁ ତେ ॥ ୧୧.୨୨॥
ମେଧେ ସରସ୍ଵତି ଵରେ ଭୂତି ବାଭ୍ରଵି ତାମସି ।
ନିଯତେ ତ୍ଵଂ ପ୍ରସୀଦେଶେ ନାରାଯଣି ନମୋଽସ୍ତୁତେ ॥ ୧୧.୨୩॥
ସର୍ଵସ୍ଵରୂପେ ସର୍ଵେଶେ ସର୍ଵଶକ୍ତିସମନ୍ଵିତେ ।
ଭଯେଭ୍ଯସ୍ତ୍ରାହି ନୋ ଦେଵି ଦୁର୍ଗେ ଦେଵି ନମୋଽସ୍ତୁ ତେ ॥ ୧୧.୨୪॥
ଏତତ୍ତେ ଵଦନଂ ସୌମ୍ଯଂ ଲୋଚନତ୍ରଯଭୂଷିତମ୍ ।
ପାତୁ ନଃ ସର୍ଵଭୂତେଭ୍ଯଃ କାତ୍ଯାଯନି ନମୋଽସ୍ତୁ ତେ ॥ ୧୧.୨୫॥
ଜ୍ଵାଲାକରାଲମତ୍ଯୁଗ୍ରମଶେଷାସୁରସୂଦନମ୍ ।
ତ୍ରିଶୂଲଂ ପାତୁ ନୋ ଭୀତେର୍ଭଦ୍ରକାଲି ନମୋଽସ୍ତୁ ତେ ॥ ୧୧.୨୬॥
ହିନସ୍ତି ଦୈତ୍ଯତେଜାଂସି ସ୍ଵନେନାପୂର୍ଯ ଯା ଜଗତ୍ ।
ସା ଘଣ୍ଟା ପାତୁ ନୋ ଦେଵି ପାପେଭ୍ଯୋ ନଃ ସୁତାନିଵ ॥ ୧୧.୨୭॥
ଅସୁରାସୃଗ୍ଵସାପଙ୍କଚର୍ଚିତସ୍ତେ କରୋଜ୍ଜ୍ଵଲଃ ।
ଶୁଭାଯ ଖଡ୍ଗୋ ଭଵତୁ ଚଣ୍ଡିକେ ତ୍ଵାଂ ନତା ଵଯମ୍ ॥ ୧୧.୨୮॥
ରୋଗାନଶେଷାନପହଂସି ତୁଷ୍ଟା
ରୁଷ୍ଟା ତୁ କାମାନ୍ ସକଲାନଭୀଷ୍ଟାନ୍ ।
ତ୍ଵାମାଶ୍ରିତାନାଂ ନ ଵିପନ୍ନରାଣାଂ
ତ୍ଵାମାଶ୍ରିତା ହ୍ଯାଶ୍ରଯତାଂ ପ୍ରଯାନ୍ତି ॥ ୧୧.୨୯॥
ଏତତ୍କୃତଂ ଯତ୍କଦନଂ ତ୍ଵଯାଦ୍ଯ
ଧର୍ମଦ୍ଵିଷାଂ ଦେଵି ମହାସୁରାଣାମ୍ ।
ରୂପୈରନେକୈର୍ବହୁଧାତ୍ମମୂର୍ତିଂ
କୃତ୍ଵାମ୍ବିକେ ତତ୍ପ୍ରକରୋତି କାନ୍ଯା ॥ ୧୧.୩୦॥
ଵିଦ୍ଯାସୁ ଶାସ୍ତ୍ରେଷୁ ଵିଵେକଦୀପେ-
ଷ୍ଵାଦ୍ଯେଷୁ ଵାକ୍ଯେଷୁ ଚ କା ତ୍ଵଦନ୍ଯା ।
ମମତ୍ଵଗର୍ତେଽତିମହାନ୍ଧକାରେ
ଵିଭ୍ରାମଯତ୍ଯେତଦତୀଵ ଵିଶ୍ଵମ୍ ॥ ୧୧.୩୧॥
ରକ୍ଷାଂସି ଯତ୍ରୋଗ୍ରଵିଷାଶ୍ଚ ନାଗା
ଯତ୍ରାରଯୋ ଦସ୍ଯୁବଲାନି ଯତ୍ର ।
ଦାଵାନଲୋ ଯତ୍ର ତଥାବ୍ଧିମଧ୍ଯେ
ତତ୍ର ସ୍ଥିତା ତ୍ଵଂ ପରିପାସି ଵିଶ୍ଵମ୍ ॥ ୧୧.୩୨॥
ଵିଶ୍ଵେଶ୍ଵରି ତ୍ଵଂ ପରିପାସି ଵିଶ୍ଵଂ
ଵିଶ୍ଵାତ୍ମିକା ଧାରଯସୀହ ଵିଶ୍ଵମ୍ ।
ଵିଶ୍ଵେଶଵନ୍ଦ୍ଯା ଭଵତୀ ଭଵନ୍ତି
ଵିଶ୍ଵାଶ୍ରଯା ଯେ ତ୍ଵଯି ଭକ୍ତିନମ୍ରାଃ ॥ ୧୧.୩୩॥
ଦେଵି ପ୍ରସୀଦ ପରିପାଲଯ ନୋଽରିଭୀତେ-
ର୍ନିତ୍ଯଂ ଯଥାସୁରଵଧାଦଧୁନୈଵ ସଦ୍ଯଃ ।
ପାପାନି ସର୍ଵଜଗତାଂ ପ୍ରଶମଂ ନଯାଶୁ
ଉତ୍ପାତପାକଜନିତାଂଶ୍ଚ ମହୋପସର୍ଗାନ୍ ॥ ୧୧.୩୪॥
ପ୍ରଣତାନାଂ ପ୍ରସୀଦ ତ୍ଵଂ ଦେଵି ଵିଶ୍ଵାର୍ତିହାରିଣି ।
ତ୍ରୈଲୋକ୍ଯଵାସିନାମୀଡ୍ଯେ ଲୋକାନାଂ ଵରଦା ଭଵ ॥ ୧୧.୩୫॥
ଦେଵ୍ଯୁଵାଚ॥ ୧୧.୩୬॥
ଵରଦାହଂ ସୁରଗଣା ଵରଂ ଯନ୍ମନସେଚ୍ଛଥ ।
ତଂ ଵୃଣୁଧ୍ଵଂ ପ୍ରଯଚ୍ଛାମି ଜଗତାମୁପକାରକମ୍ ॥ ୧୧.୩୭॥
ଦେଵା ଊଚୁଃ ॥ ୧୧.୩୮॥
ସର୍ଵାବାଧାପ୍ରଶମନଂ ତ୍ରୈଲୋକ୍ଯସ୍ଯାଖିଲେଶ୍ଵରି ।
ଏଵମେଵ ତ୍ଵଯା କାର୍ଯମସ୍ମଦ୍ଵୈରିଵିନାଶନମ୍ ॥ ୧୧.୩୯॥
ଦେଵ୍ଯୁଵାଚ॥ ୧୧.୪୦॥
ଵୈଵସ୍ଵତେଽନ୍ତରେ ପ୍ରାପ୍ତେ ଅଷ୍ଟାଵିଂଶତିମେ ଯୁଗେ ।
ଶୁମ୍ଭୋ ନିଶୁମ୍ଭଶ୍ଚୈଵାନ୍ଯାଵୁତ୍ପତ୍ସ୍ଯେତେ ମହାସୁରୌ ॥ ୧୧.୪୧॥
ନନ୍ଦଗୋପଗୃହେ ଜାତା ଯଶୋଦାଗର୍ଭସମ୍ଭଵା ।
ତତସ୍ତୌ ନାଶଯିଷ୍ଯାମି ଵିନ୍ଧ୍ଯାଚଲନିଵାସିନୀ ॥ ୧୧.୪୨॥
ପୁନରପ୍ଯତିରୌଦ୍ରେଣ ରୂପେଣ ପୃଥିଵୀତଲେ ।
ଅଵତୀର୍ଯ ହନିଷ୍ଯାମି ଵୈପ୍ରଚିତ୍ତାଂଶ୍ଚ ଦାନଵାନ୍ ॥ ୧୧.୪୩॥
ଭକ୍ଷଯନ୍ତ୍ଯାଶ୍ଚ ତାନୁଗ୍ରାନ୍ ଵୈପ୍ରଚିତ୍ତାନ୍ ମହାସୁରାନ୍ ।
ରକ୍ତା ଦନ୍ତା ଭଵିଷ୍ଯନ୍ତି ଦାଡିମୀକୁସୁମୋପମାଃ ॥ ୧୧.୪୪॥
ତତୋ ମାଂ ଦେଵତାଃ ସ୍ଵର୍ଗେ ମର୍ତ୍ଯଲୋକେ ଚ ମାନଵାଃ ।
ସ୍ତୁଵନ୍ତୋ ଵ୍ଯାହରିଷ୍ଯନ୍ତି ସତତଂ ରକ୍ତଦନ୍ତିକାମ୍ ॥ ୧୧.୪୫॥
ଭୂଯଶ୍ଚ ଶତଵାର୍ଷିକ୍ଯାମନାଵୃଷ୍ଟ୍ଯାମନମ୍ଭସି ।
ମୁନିଭିଃ ସଂସ୍ମୃତା ଭୂମୌ ସମ୍ଭଵିଷ୍ଯାମ୍ଯଯୋନିଜା ॥ ୧୧.୪୬॥
ତତଃ ଶତେନ ନେତ୍ରାଣାଂ ନିରୀକ୍ଷିଷ୍ଯାମ୍ଯହଂ ମୁନୀନ୍ ।
କୀର୍ତଯିଷ୍ଯନ୍ତି ମନୁଜାଃ ଶତାକ୍ଷୀମିତି ମାଂ ତତଃ ॥ ୧୧.୪୭॥
ତତୋଽହମଖିଲଂ ଲୋକମାତ୍ମଦେହସମୁଦ୍ଭଵୈଃ ।
ଭରିଷ୍ଯାମି ସୁରାଃ ଶାକୈରାଵୃଷ୍ଟେଃ ପ୍ରାଣଧାରକୈଃ ॥ ୧୧.୪୮॥
ଶାକମ୍ଭରୀତି ଵିଖ୍ଯାତିଂ ତଦା ଯାସ୍ଯାମ୍ଯହଂ ଭୁଵି ।
ତତ୍ରୈଵ ଚ ଵଧିଷ୍ଯାମି ଦୁର୍ଗମାଖ୍ଯଂ ମହାସୁରମ୍ ॥ ୧୧.୪୯॥
ଦୁର୍ଗାଦେଵୀତି ଵିଖ୍ଯାତଂ ତନ୍ମେ ନାମ ଭଵିଷ୍ଯତି ।
ପୁନଶ୍ଚାହଂ ଯଦା ଭୀମଂ ରୂପଂ କୃତ୍ଵା ହିମାଚଲେ ॥ ୧୧.୫୦॥
ରକ୍ଷାଂସି ଭକ୍ଷଯିଷ୍ଯାମି ମୁନୀନାଂ ତ୍ରାଣକାରଣାତ୍ ।
ତଦା ମାଂ ମୁନଯଃ ସର୍ଵେ ସ୍ତୋଷ୍ଯନ୍ତ୍ଯାନମ୍ରମୂର୍ତଯଃ ॥ ୧୧.୫୧॥
ଭୀମାଦେଵୀତି ଵିଖ୍ଯାତଂ ତନ୍ମେ ନାମ ଭଵିଷ୍ଯତି ।
ଯଦାରୁଣାଖ୍ଯସ୍ତ୍ରୈଲୋକ୍ଯେ ମହାବାଧାଂ କରିଷ୍ଯତି ॥ ୧୧.୫୨॥
ତଦାହଂ ଭ୍ରାମରଂ ରୂପଂ କୃତ୍ଵାସଙ୍ଖ୍ଯେଯଷଟ୍ପଦମ୍ ।
ତ୍ରୈଲୋକ୍ଯସ୍ଯ ହିତାର୍ଥାଯ ଵଧିଷ୍ଯାମି ମହାସୁରମ୍ ॥ ୧୧.୫୩॥
ଭ୍ରାମରୀତି ଚ ମାଂ ଲୋକାସ୍ତଦା ସ୍ତୋଷ୍ଯନ୍ତି ସର୍ଵତଃ ।
ଇତ୍ଥଂ ଯଦା ଯଦା ବାଧା ଦାନଵୋତ୍ଥା ଭଵିଷ୍ଯତି ॥ ୧୧.୫୪॥
ତଦା ତଦାଵତୀର୍ଯାହଂ କରିଷ୍ଯାମ୍ଯରିସଙ୍କ୍ଷଯମ୍ ॥ ୧୧.୫୫॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ନାରାଯଣୀସ୍ତୁତିର୍ନାମୈକାଦଶୋଽଧ୍ଯାଯଃ ॥ ୧୧॥
ଉଵାଚ୪, ଅର୍ଧଶ୍ଲୋକଃ ୧, ଶ୍ଲୋକାଃ ୫୦, ଏଵମାଦିତଃ ॥ ୬୩୦॥

। ଧ୍ଯାନମ୍ ।
ଓଁ ଵିଦ୍ଯୁଦ୍ଧାମସମପ୍ରଭାଂ ମୃଗପତିସ୍କନ୍ଧସ୍ଥିତାଂ ଭୀଷଣାଂ
କନ୍ଯାଭିଃ କରଵାଳଖେଟଵିଲସଧସ୍ତାଭିରାସେଵିତାମ୍ ।
ହସ୍ତୈଶ୍ଚକ୍ରଗଦାସିଖେଟଵିଶିଖାଂଶ୍ଚାପଂ ଗୁଣଂ ତର୍ଜନୀଂ
ବିଭ୍ରାଣାମନଲାତ୍ମିକାଂ ଶଶିଧରାଂ ଦୁର୍ଗାଂ ତ୍ରିନେତ୍ରାଂ ଭଜେ ॥
ଓଁ ଦେଵ୍ଯୁଵାଚ॥ ୧୨.୧॥
ଏଭିଃ ସ୍ତଵୈଶ୍ଚ ମାଂ ନିତ୍ଯଂ ସ୍ତୋଷ୍ଯତେ ଯଃ ସମାହିତଃ ।
ତସ୍ଯାହଂ ସକଲାଂ ବାଧାଂ ଶମଯିଷ୍ଯାମ୍ଯସଂଶଯମ୍ ॥ ୧୨.୨॥
ମଧୁକୈଟଭନାଶଂ ଚ ମହିଷାସୁରଘାତନମ୍ ।
କୀର୍ତଯିଷ୍ଯନ୍ତି ଯେ ତଦ୍ଵଦ୍ଵଧଂ ଶୁମ୍ଭନିଶୁମ୍ଭଯୋଃ ॥ ୧୨.୩॥
ଅଷ୍ଟମ୍ଯାଂ ଚ ଚତୁର୍ଦଶ୍ଯାଂ ନଵମ୍ଯାଂ ଚୈକଚେତସଃ ।
ଶ୍ରୋଷ୍ଯନ୍ତି ଚୈଵ ଯେ ଭକ୍ତ୍ଯା ମମ ମାହାତ୍ମ୍ଯମୁତ୍ତମମ୍ ॥ ୧୨.୪॥
ନ ତେଷାଂ ଦୁଷ୍କୃତଂ କିଞ୍ଚିଦ୍ଦୁଷ୍କୃତୋତ୍ଥା ନ ଚାପଦଃ ।
ଭଵିଷ୍ଯତି ନ ଦାରିଦ୍ର୍ଯଂ ନ ଚୈଵେଷ୍ଟଵିଯୋଜନମ୍ ॥ ୧୨.୫॥
ଶତ୍ରୁଭ୍ଯୋ ନ ଭଯଂ ତସ୍ଯ ଦସ୍ଯୁତୋ ଵା ନ ରାଜତଃ ।
ନ ଶସ୍ତ୍ରାନଲତୋଯୌଘାତ୍ କଦାଚିତ୍ ସମ୍ଭଵିଷ୍ଯତି ॥ ୧୨.୬॥
ତସ୍ମାନ୍ମମୈତନ୍ମାହାତ୍ମ୍ଯଂ ପଠିତଵ୍ଯଂ ସମାହିତୈଃ ।
ଶ୍ରୋତଵ୍ଯଂ ଚ ସଦା ଭକ୍ତ୍ଯା ପରଂ ସ୍ଵସ୍ତ୍ଯଯନଂ ମହତ୍ ॥ ୧୨.୭॥
ଉପସର୍ଗାନଶେଷାଂସ୍ତୁ ମହାମାରୀସମୁଦ୍ଭଵାନ୍ ।
ତଥା ତ୍ରିଵିଧମୁତ୍ପାତଂ ମାହାତ୍ମ୍ଯଂ ଶମଯେନ୍ମମ ॥ ୧୨.୮॥
ଯତ୍ରୈତତ୍ପଠ୍ଯତେ ସମ୍ଯଙ୍ନିତ୍ଯମାଯତନେ ମମ ।
ସଦା ନ ତଦ୍ଵିମୋକ୍ଷ୍ଯାମି ସାନ୍ନିଧ୍ଯଂ ତତ୍ର ମେ ସ୍ଥିତମ୍ ॥ ୧୨.୯॥
ବଲିପ୍ରଦାନେ ପୂଜାଯାମଗ୍ନିକାର୍ଯେ ମହୋତ୍ସଵେ ।
ସର୍ଵଂ ମମୈତନ୍ମାହାତ୍ମ୍ଯମ୍ ଉଚ୍ଚାର୍ଯଂ ଶ୍ରାଵ୍ଯମେଵ ଚ ॥ ୧୨.୧୦॥
ଜାନତାଜାନତା ଵାପି ବଲିପୂଜାଂ ଯଥା କୃତାମ୍ ।
ପ୍ରତୀକ୍ଷିଷ୍ଯାମ୍ଯହଂ ପ୍ରୀତ୍ଯା ଵହ୍ନିହୋମଂ ତଥାକୃତମ୍ ॥ ୧୨.୧୧॥
ଶରତ୍କାଲେ ମହାପୂଜା କ୍ରିଯତେ ଯା ଚ ଵାର୍ଷିକୀ ।
ତସ୍ଯାଂ ମମୈତନ୍ମାହାତ୍ମ୍ଯଂ ଶ୍ରୁତ୍ଵା ଭକ୍ତିସମନ୍ଵିତଃ ॥ ୧୨.୧୨॥
ସର୍ଵାବାଧାଵିନିର୍ମୁକ୍ତୋ ଧନଧାନ୍ଯସମନ୍ଵିତଃ ।
ମନୁଷ୍ଯୋ ମତ୍ପ୍ରସାଦେନ ଭଵିଷ୍ଯତି ନ ସଂଶଯଃ ॥ ୧୨.୧୩॥
ଶ୍ରୁତ୍ଵା ମମୈତନ୍ମାହାତ୍ମ୍ଯଂ ତଥା ଚୋତ୍ପତ୍ତଯଃ ଶୁଭାଃ ।
ପରାକ୍ରମଂ ଚ ଯୁଦ୍ଧେଷୁ ଜାଯତେ ନିର୍ଭଯଃ ପୁମାନ୍ ॥ ୧୨.୧୪॥
ରିପଵଃ ସଙ୍କ୍ଷଯଂ ଯାନ୍ତି କଲ୍ଯାଣଂ ଚୋପପଦ୍ଯତେ ।
ନନ୍ଦତେ ଚ କୁଲଂ ପୁଂସାଂ ମାହାତ୍ମ୍ଯଂ ମମ ଶ‍ୃଣ୍ଵତାମ୍ ॥ ୧୨.୧୫॥
ଶାନ୍ତିକର୍ମଣି ସର୍ଵତ୍ର ତଥା ଦୁଃସ୍ଵପ୍ନଦର୍ଶନେ ।
ଗ୍ରହପୀଡାସୁ ଚୋଗ୍ରାସୁ ମାହାତ୍ମ୍ଯଂ ଶ‍ୃଣୁଯାନ୍ମମ ॥ ୧୨.୧୬॥
ଉପସର୍ଗାଃ ଶମଂ ଯାନ୍ତି ଗ୍ରହପୀଡାଶ୍ଚ ଦାରୁଣାଃ ।
ଦୁଃସ୍ଵପ୍ନଂ ଚ ନୃଭିର୍ଦୃଷ୍ଟଂ ସୁସ୍ଵପ୍ନମୁପଜାଯତେ ॥ ୧୨.୧୭॥
ବାଲଗ୍ରହାଭିଭୂତାନାଂ ବାଲାନାଂ ଶାନ୍ତିକାରକମ୍ ।
ସଙ୍ଘାତଭେଦେ ଚ ନୃଣାଂ ମୈତ୍ରୀକରଣମୁତ୍ତମମ୍ ॥ ୧୨.୧୮॥
ଦୁର୍ଵୃତ୍ତାନାମଶେଷାଣାଂ ବଲହାନିକରଂ ପରମ୍ ।
ରକ୍ଷୋଭୂତପିଶାଚାନାଂ ପଠନାଦେଵ ନାଶନମ୍ ॥ ୧୨.୧୯॥
ସର୍ଵଂ ମମୈତନ୍ମାହାତ୍ମ୍ଯଂ ମମ ସନ୍ନିଧିକାରକମ୍ ।
ପଶୁପୁଷ୍ପାର୍ଘ୍ଯଧୂପୈଶ୍ଚ ଗନ୍ଧଦୀପୈସ୍ତଥୋତ୍ତମୈଃ ॥ ୧୨.୨୦॥
ଵିପ୍ରାଣାଂ ଭୋଜନୈର୍ହୋମୈଃ ପ୍ରୋକ୍ଷଣୀଯୈରହର୍ନିଶମ୍ ।
ଅନ୍ଯୈଶ୍ଚ ଵିଵିଧୈର୍ଭୋଗୈଃ ପ୍ରଦାନୈର୍ଵତ୍ସରେଣ ଯା ॥ ୧୨.୨୧॥
ପ୍ରୀତିର୍ମେ କ୍ରିଯତେ ସାସ୍ମିନ୍ ସକୃଦୁଚ୍ଚରିତେ ଶ୍ରୁତେ ।
ଶ୍ରୁତଂ ହରତି ପାପାନି ତଥାରୋଗ୍ଯଂ ପ୍ରଯଚ୍ଛତି ॥ ୧୨.୨୨॥
ରକ୍ଷାଂ କରୋତି ଭୂତେଭ୍ଯୋ ଜନ୍ମନାଂ କୀର୍ତନଂ ମମ ।
ଯୁଦ୍ଧେଷୁ ଚରିତଂ ଯନ୍ମେ ଦୁଷ୍ଟଦୈତ୍ଯନିବର୍ହଣମ୍ ॥ ୧୨.୨୩॥
ତସ୍ମିଞ୍ଛ୍ରୁତେ ଵୈରିକୃତଂ ଭଯଂ ପୁଂସାଂ ନ ଜାଯତେ ।
ଯୁଷ୍ମାଭିଃ ସ୍ତୁତଯୋ ଯାଶ୍ଚ ଯାଶ୍ଚ ବ୍ରହ୍ମର୍ଷିଭିଃ କୃତାଃ ॥ ୧୨.୨୪॥
ବ୍ରହ୍ମଣା ଚ କୃତାସ୍ତାସ୍ତୁ ପ୍ରଯଚ୍ଛନ୍ତୁ ଶୁଭାଂ ମତିମ୍ ।
ଅରଣ୍ଯେ ପ୍ରାନ୍ତରେ ଵାପି ଦାଵାଗ୍ନିପରିଵାରିତଃ ॥ ୧୨.୨୫॥
ଦସ୍ଯୁଭିର୍ଵା ଵୃତଃ ଶୂନ୍ଯେ ଗୃହୀତୋ ଵାପି ଶତ୍ରୁଭିଃ ।
ସିଂହଵ୍ଯାଘ୍ରାନୁଯାତୋ ଵା ଵନେ ଵା ଵନହସ୍ତିଭିଃ ॥ ୧୨.୨୬॥
ରାଜ୍ଞା କ୍ରୁଦ୍ଧେନ ଚାଜ୍ଞପ୍ତୋ ଵଧ୍ଯୋ ବନ୍ଧଗତୋଽପି ଵା ।
ଆଘୂର୍ଣିତୋ ଵା ଵାତେନ ସ୍ଥିତଃ ପୋତେ ମହାର୍ଣଵେ ॥ ୧୨.୨୭॥
ପତତ୍ସୁ ଚାପି ଶସ୍ତ୍ରେଷୁ ସଙ୍ଗ୍ରାମେ ଭୃଶଦାରୁଣେ ।
ସର୍ଵାବାଧାସୁ ଘୋରାସୁ ଵେଦନାଭ୍ଯର୍ଦିତୋଽପି ଵା ॥ ୧୨.୨୮॥
ସ୍ମରନ୍ ମମୈତଚ୍ଚରିତଂ ନରୋ ମୁଚ୍ଯେତ ସଙ୍କଟାତ୍ ।
ମମ ପ୍ରଭାଵାତ୍ସିଂହାଦ୍ଯା ଦସ୍ଯଵୋ ଵୈରିଣସ୍ତଥା ॥ ୧୨.୨୯॥
ଦୂରାଦେଵ ପଲାଯନ୍ତେ ସ୍ମରତଶ୍ଚରିତଂ ମମ ॥ ୧୨.୩୦॥
ଋଷିରୁଵାଚ ॥ ୧୨.୩୧॥
ଇତ୍ଯୁକ୍ତ୍ଵା ସା ଭଗଵତୀ ଚଣ୍ଡିକା ଚଣ୍ଡଵିକ୍ରମା ॥ ୧୨.୩୨॥
ପଶ୍ଯତାଂ ସର୍ଵଦେଵାନାଂ ତତ୍ରୈଵାନ୍ତରଧୀଯତ ।
ତେଽପି ଦେଵା ନିରାତଙ୍କାଃ ସ୍ଵାଧିକାରାନ୍ଯଥା ପୁରା ॥ ୧୨.୩୩॥
ଯଜ୍ଞଭାଗଭୁଜଃ ସର୍ଵେ ଚକ୍ରୁର୍ଵିନିହତାରଯଃ ।
ଦୈତ୍ଯାଶ୍ଚ ଦେଵ୍ଯା ନିହତେ ଶୁମ୍ଭେ ଦେଵରିପୌ ଯୁଧି ॥ ୧୨.୩୪॥
ଜଗଦ୍ଵିଧ୍ଵଂସକେ ତସ୍ମିନ୍ ମହୋଗ୍ରେଽତୁଲଵିକ୍ରମେ ।
ନିଶୁମ୍ଭେ ଚ ମହାଵୀର୍ଯେ ଶେଷାଃ ପାତାଲମାଯଯୁଃ ॥ ୧୨.୩୫॥
ଏଵଂ ଭଗଵତୀ ଦେଵୀ ସା ନିତ୍ଯାପି ପୁନଃ ପୁନଃ ।
ସମ୍ଭୂଯ କୁରୁତେ ଭୂପ ଜଗତଃ ପରିପାଲନମ୍ ॥ ୧୨.୩୬॥
ତଯୈତନ୍ମୋହ୍ଯତେ ଵିଶ୍ଵଂ ସୈଵ ଵିଶ୍ଵଂ ପ୍ରସୂଯତେ ।
ସା ଯାଚିତା ଚ ଵିଜ୍ଞାନଂ ତୁଷ୍ଟା ଋଦ୍ଧିଂ ପ୍ରଯଚ୍ଛତି ॥ ୧୨.୩୭॥
ଵ୍ଯାପ୍ତଂ ତଯୈତତ୍ସକଲଂ ବ୍ରହ୍ମାଣ୍ଡଂ ମନୁଜେଶ୍ଵର ।
ମହାଦେଵ୍ଯା ମହାକାଲୀ ମହାମାରୀସ୍ଵରୂପଯା ॥ ୧୨.୩୮॥
ସୈଵ କାଲେ ମହାମାରୀ ସୈଵ ସୃଷ୍ଟିର୍ଭଵତ୍ଯଜା ।
ସ୍ଥିତିଂ କରୋତି ଭୂତାନାଂ ସୈଵ କାଲେ ସନାତନୀ ॥ ୧୨.୩୯॥
ଭଵକାଲେ ନୃଣାଂ ସୈଵ ଲକ୍ଷ୍ମୀର୍ଵୃଦ୍ଧିପ୍ରଦା ଗୃହେ ।
ସୈଵାଭାଵେ ତଥାଲକ୍ଷ୍ମୀର୍ଵିନାଶାଯୋପଜାଯତେ ॥ ୧୨.୪୦॥
ସ୍ତୁତା ସମ୍ପୂଜିତା ପୁଷ୍ପୈର୍ଗନ୍ଧଧୂପାଦିଭିସ୍ତଥା ।
ଦଦାତି ଵିତ୍ତଂ ପୁତ୍ରାଂଶ୍ଚ ମତିଂ ଧର୍ମେ ଗତିଂ ଶୁଭାମ୍ ॥ ୧୨.୪୧॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ଭଗଵତୀ ଵାକ୍ଯଂ ଦ୍ଵାଦଶୋଽଧ୍ଯାଯଃ ॥ ୧୨॥
ଉଵାଚ୨, ଅର୍ଧଶ୍ଲୋକୌ ୨, ଶ୍ଲୋକାଃ ୩୭, ଏଵମାଦିତଃ ॥ ୬୭୧॥

। ଧ୍ଯାନମ୍ ।
ଓଁ ବାଲାର୍କମଣ୍ଡଲାଭାସାଂ ଚତୁର୍ବାହୁଂ ତ୍ରିଲୋଚନାମ୍ ।
ପାଶାଙ୍କୁଶଵରାଭୀତିର୍ଧାରଯନ୍ତୀଂ ଶିଵାଂ ଭଜେ ॥
ଓଁ ଋଷିରୁଵାଚ ॥ ୧୩.୧॥
ଏତତ୍ତେ କଥିତଂ ଭୂପ ଦେଵୀମାହାତ୍ମ୍ଯମୁତ୍ତମମ୍ ।
ଏଵଂ ପ୍ରଭାଵା ସା ଦେଵୀ ଯଯେଦଂ ଧାର୍ଯତେ ଜଗତ୍ ॥ ୧୩.୨॥
ଵିଦ୍ଯା ତଥୈଵ କ୍ରିଯତେ ଭଗଵଦ୍ଵିଷ୍ଣୁମାଯଯା ।
ତଯା ତ୍ଵମେଷ ଵୈଶ୍ଯଶ୍ଚ ତଥୈଵାନ୍ଯେ ଵିଵେକିନଃ ॥ ୧୩.୩॥
ମୋହ୍ଯନ୍ତେ ମୋହିତାଶ୍ଚୈଵ ମୋହମେଷ୍ଯନ୍ତି ଚାପରେ ।
ତାମୁପୈହି ମହାରାଜ ଶରଣଂ ପରମେଶ୍ଵରୀମ୍ ॥ ୧୩.୪॥
ଆରାଧିତା ସୈଵ ନୃଣାଂ ଭୋଗସ୍ଵର୍ଗାପଵର୍ଗଦା ॥ ୧୩.୫॥
ମାର୍କଣ୍ଡେଯ ଉଵାଚ॥ ୧୩.୬॥
ଇତି ତସ୍ଯ ଵଚଃ ଶ୍ରୁତ୍ଵା ସୁରଥଃ ସ ନରାଧିପଃ ॥ ୧୩.୭॥
ପ୍ରଣିପତ୍ଯ ମହାଭାଗଂ ତମୃଷିଂ ସଂଶିତଵ୍ରତମ୍ ।
ନିର୍ଵିଣ୍ଣୋଽତିମମତ୍ଵେନ ରାଜ୍ଯାପହରଣେନ ଚ ॥ ୧୩.୮॥
ଜଗାମ ସଦ୍ଯସ୍ତପସେ ସ ଚ ଵୈଶ୍ଯୋ ମହାମୁନେ ।
ସନ୍ଦର୍ଶନାର୍ଥମମ୍ବାଯା ନଦୀପୁଲିନମାସ୍ଥିତଃ ॥ ୧୩.୯॥
ସ ଚ ଵୈଶ୍ଯସ୍ତପସ୍ତେପେ ଦେଵୀସୂକ୍ତଂ ପରଂ ଜପନ୍ ।
ତୌ ତସ୍ମିନ୍ ପୁଲିନେ ଦେଵ୍ଯାଃ କୃତ୍ଵା ମୂର୍ତିଂ ମହୀମଯୀମ୍ ॥ ୧୩.୧୦॥
ଅର୍ହଣାଂ ଚକ୍ରତୁସ୍ତସ୍ଯାଃ ପୁଷ୍ପଧୂପାଗ୍ନିତର୍ପଣୈଃ ।
ନିରାହାରୌ ଯତାତ୍ମାନୌ ତନ୍ମନସ୍କୌ ସମାହିତୌ ॥ ୧୩.୧୧॥
ଦଦତୁସ୍ତୌ ବଲିଂ ଚୈଵ ନିଜଗାତ୍ରାସୃଗୁକ୍ଷିତମ୍ ।
ଏଵଂ ସମାରାଧଯତୋସ୍ତ୍ରିଭିର୍ଵର୍ଷୈର୍ଯତାତ୍ମନୋଃ ॥ ୧୩.୧୨॥
ପରିତୁଷ୍ଟା ଜଗଦ୍ଧାତ୍ରୀ ପ୍ରତ୍ଯକ୍ଷଂ ପ୍ରାହ ଚଣ୍ଡିକା ॥ ୧୩.୧୩॥
ଦେଵ୍ଯୁଵାଚ॥ ୧୩.୧୪॥
ଯତ୍ପ୍ରାର୍ଥ୍ଯତେ ତ୍ଵଯା ଭୂପ ତ୍ଵଯା ଚ କୁଲନନ୍ଦନ ।
ମତ୍ତସ୍ତତ୍ପ୍ରାପ୍ଯତାଂ ସର୍ଵଂ ପରିତୁଷ୍ଟା ଦଦାମିତେ ॥ ୧୩.୧୫॥
ମାର୍କଣ୍ଡେଯ ଉଵାଚ॥ ୧୩.୧୬॥
ତତୋ ଵଵ୍ରେ ନୃପୋ ରାଜ୍ଯମଵିଭ୍ରଂଶ୍ଯନ୍ଯଜନ୍ମନି ।
ଅତ୍ରୈଵ ଚ ନିଜଂ ରାଜ୍ଯଂ ହତଶତ୍ରୁବଲଂ ବଲାତ୍ ॥ ୧୩.୧୭॥
ସୋଽପି ଵୈଶ୍ଯସ୍ତତୋ ଜ୍ଞାନଂ ଵଵ୍ରେ ନିର୍ଵିଣ୍ଣମାନସଃ ।
ମମେତ୍ଯହମିତି ପ୍ରାଜ୍ଞଃ ସଙ୍ଗଵିଚ୍ଯୁତିକାରକମ୍ ॥ ୧୩.୧୮॥
ଦେଵ୍ଯୁଵାଚ॥ ୧୩.୧୯॥
ସ୍ଵଲ୍ପୈରହୋଭିର୍ନୃପତେ ସ୍ଵଂ ରାଜ୍ଯଂ ପ୍ରାପ୍ସ୍ଯତେ ଭଵାନ୍ ॥ ୧୩.୨୦॥
ହତ୍ଵା ରିପୂନସ୍ଖଲିତଂ ତଵ ତତ୍ର ଭଵିଷ୍ଯତି ॥ ୧୩.୨୧॥
ମୃତଶ୍ଚ ଭୂଯଃ ସମ୍ପ୍ରାପ୍ଯ ଜନ୍ମ ଦେଵାଦ୍ଵିଵସ୍ଵତଃ ॥ ୧୩.୨୨॥
ସାଵର୍ଣିକୋ ମନୁର୍ନାମ ଭଵାନ୍ଭୁଵି ଭଵିଷ୍ଯତି ॥ ୧୩.୨୩॥
ଵୈଶ୍ଯଵର୍ଯ ତ୍ଵଯା ଯଶ୍ଚ ଵରୋଽସ୍ମତ୍ତୋଽଭିଵାଞ୍ଛିତଃ ॥ ୧୩.୨୪॥
ତଂ ପ୍ରଯଚ୍ଛାମି ସଂସିଦ୍ଧ୍ଯୈ ତଵ ଜ୍ଞାନଂ ଭଵିଷ୍ଯତି ॥ ୧୩.୨୫॥
ମାର୍କଣ୍ଡେଯ ଉଵାଚ॥ ୧୩.୨୬॥
ଇତି ଦତ୍ତ୍ଵା ତଯୋର୍ଦେଵୀ ଯଥାଭିଲଷିତଂ ଵରମ୍ ॥ ୧୩.୨୭॥
ବଭୂଵାନ୍ତର୍ହିତା ସଦ୍ଯୋ ଭକ୍ତ୍ଯା ତାଭ୍ଯାମଭିଷ୍ଟୁତା ।
ଏଵଂ ଦେଵ୍ଯା ଵରଂ ଲବ୍ଧ୍ଵା ସୁରଥଃ କ୍ଷତ୍ରିଯର୍ଷଭଃ ॥ ୧୩.୨୮॥
ସୂର୍ଯାଜ୍ଜନ୍ମ ସମାସାଦ୍ଯ ସାଵର୍ଣିର୍ଭଵିତା ମନୁଃ ॥ ୧୩.୨୯॥
ଏଵଂ ଦେଵ୍ଯା ଵରଂ ଲବ୍ଧ୍ଵା ସୁରଥଃ କ୍ଷତ୍ରିଯର୍ଷଭଃ ।
ସୂର୍ଯାଜ୍ଜନ୍ମ ସମାସାଦ୍ଯ ସାଵର୍ଣିର୍ଭଵିତା ମନୁଃ ॥ କ୍ଲୀଂ ଓଁ ॥
॥ ସ୍ଵସ୍ତି ଶ୍ରୀମାର୍କଣ୍ଡେଯପୁରାଣେ ସାଵର୍ଣିକେ ମନ୍ଵନ୍ତରେ ଦେଵୀମାହାତ୍ମ୍ଯେ
ସୁରଥଵୈଶ୍ଯଯୋର୍ଵରପ୍ରଦାନଂ ନାମ ତ୍ରଯୋଦଶୋଽଧ୍ଯାଯଃ ॥ ୧୩॥
ଉଵାଚ୬, ଅର୍ଧଶ୍ଲୋକାଃ ୧୧, ଶ୍ଲୋକାଃ ୧୨, ଏଵମାଦିତଃ ॥ ୭୦୦॥
ସମସ୍ତା ଉଵାଚମନ୍ତ୍ରାଃ ୫୭, ଅର୍ଧଶ୍ଲୋକାଃ ୪୨, ଶ୍ଲୋକାଃ ୫୩୫, ଅଵଦାନାନି ୬୬ ॥
॥ ଶ୍ରୀସପ୍ତଶତୀଦେଵୀମାହାତ୍ମ୍ଯଂ ସମାପ୍ତମ୍ ॥
॥ ଓଁ ତତ୍ ସତ୍ ଓଁ ॥

ଓଁ ଅପରାଧଶତଂ କୃତ୍ଵା ଜଗଦମ୍ବେତି ଚୋଚ୍ଚରେତ୍ ।
ଯାଂ ଗତିଂ ସମଵାପ୍ନୋତି ନ ତାଂ ବ୍ରହ୍ମାଦଯଃ ସୁରାଃ ॥ ୧॥
ସାପରାଧୋଽସ୍ମି ଶରଣଂ ପ୍ରାପ୍ତସ୍ତ୍ଵାଂ ଜଗଦମ୍ବିକେ ।
ଇଦାନୀମନୁକମ୍ପ୍ଯୋଽହଂ ଯଥେଚ୍ଛସି ତଥା କୁରୁ ॥ ୨॥
ଅଜ୍ଞାନାଦ୍ଵିସ୍ମୃତେର୍ଭ୍ରାନ୍ତ୍ଯା ଯନ୍ନ୍ଯୂନମଧିକଂ କୃତମ୍ ।
ତତ୍ସର୍ଵଂ କ୍ଷମ୍ଯତାଂ ଦେଵି ପ୍ରସୀଦ ପରମେଶ୍ଵରି ॥ ୩॥
କାମେଶ୍ଵରି ଜଗନ୍ମାତଃ ସଚ୍ଚିଦାନନ୍ଦଵିଗ୍ରହେ ।
ଗୃହାଣାର୍ଚାମିମାଂ ପ୍ରୀତ୍ଯା ପ୍ରସୀଦ ପରମେଶ୍ଵରି ॥ ୪॥
ସର୍ଵରୂପମଯୀ ଦେଵୀ ସର୍ଵଂ ଦେଵୀମଯଂ ଜଗତ୍ ।
ଅତୋଽହଂ ଵିଶ୍ଵରୂପାଂ ତ୍ଵାଂ ନମାମି ପରମେଶ୍ଵରୀମ୍ ॥ ୫॥
ଯଦକ୍ଷରଂ ପରିଭ୍ରଷ୍ଟଂ ମାତ୍ରାହୀନଞ୍ଚ ଯଦ୍ଭଵେତ୍ ।
ପୂର୍ଣଂ ଭଵତୁ ତତ୍ ସର୍ଵଂ ତ୍ଵତ୍ପ୍ରସାଦାନ୍ମହେଶ୍ଵରି ॥ ୬॥
ଯଦତ୍ର ପାଠେ ଜଗଦମ୍ବିକେ ମଯା
ଵିସର୍ଗବିନ୍ଦ୍ଵକ୍ଷରହୀନମୀରିତମ୍ ।
ତଦସ୍ତୁ ସମ୍ପୂର୍ଣତମଂ ପ୍ରସାଦତଃ
ସଙ୍କଲ୍ପସିଦ୍ଧିଶ୍ଚ ସଦୈଵ ଜାଯତାମ୍ ॥ ୭॥
ଯନ୍ମାତ୍ରାବିନ୍ଦୁବିନ୍ଦୁଦ୍ଵିତଯପଦପଦଦ୍ଵନ୍ଦ୍ଵଵର୍ଣାଦିହୀନଂ
ଭକ୍ତ୍ଯାଭକ୍ତ୍ଯାନୁପୂର୍ଵଂ ପ୍ରସଭକୃତିଵଶାତ୍ ଵ୍ଯକ୍ତମଵ୍ଯକ୍ତମମ୍ବ ।
ମୋହାଦଜ୍ଞାନତୋ ଵା ପଠିତମପଠିତଂ ସାମ୍ପ୍ରତଂ ତେ ସ୍ତଵେଽସ୍ମିନ୍
ତତ୍ ସର୍ଵଂ ସାଙ୍ଗମାସ୍ତାଂ ଭଗଵତି ଵରଦେ ତ୍ଵତ୍ପ୍ରସାଦାତ୍ ପ୍ରସୀଦ ॥ ୮॥
ପ୍ରସୀଦ ଭଗଵତ୍ଯମ୍ବ ପ୍ରସୀଦ ଭକ୍ତଵତ୍ସଲେ ।
ପ୍ରସାଦଂ କୁରୁ ମେ ଦେଵି ଦୁର୍ଗେ ଦେଵି ନମୋଽସ୍ତୁ ତେ ॥ ୯॥
॥ ଇତି ଅପରାଧକ୍ଷମାପଣସ୍ତୋତ୍ରଂ ସମାପ୍ତମ୍ ॥

ଓଁ ଅହଂ ରୁଦ୍ରେଭିର୍ଵସୁଭିଶ୍ଚରାମ୍ଯହ-
ମାଦିତ୍ଯୈରୁତ ଵିଶ୍ଵଦେଵୈଃ ।
ଅହଂ ମିତ୍ରାଵରୁଣୋଭା ବିଭର୍ମ୍ଯହ-
ମିନ୍ଦ୍ରାଗ୍ନୀ ଅହମଶ୍ଵିନୋଭା ॥ ୧॥
ଅହଂ ସୋମମାହନସଂ ବିଭର୍ମ୍ଯହଂ
ତ୍ଵଷ୍ଟାରମୁତ ପୂଷଣଂ ଭଗମ୍ ।
ଅହଂ ଦଧାମି ଦ୍ରଵିଣଂ ହଵିଷ୍ମତେ
ସୁପ୍ରାଵ୍ଯେ ଯଜମାନାଯ ସୁନ୍ଵତେ ॥ ୨॥
ଅହଂ ରାଷ୍ଟ୍ରୀ ସଙ୍ଗମନୀ ଵସୂନାଂ
ଚିକିତୁଷୀ ପ୍ରଥମା ଯଜ୍ଞିଯାନାମ୍ ।
ତାଂ ମା ଦେଵା ଵ୍ଯଦଧୁଃ ପୁରୁତ୍ରା
ଭୂରିସ୍ଥାତ୍ରାଂ ଭୂର୍ଯାଵେଶଯନ୍ତୀମ୍ ॥ ୩॥
ମଯା ସୋ ଅନ୍ନମତ୍ତି ଯୋ ଵିପଶ୍ଯତି
ଯଃ ପ୍ରାଣିତି ଯ ଈଂ ଶ‍ୃଣୋତ୍ଯୁକ୍ତମ୍ ।
ଅମନ୍ତଵୋ ମାଂ ତ ଉପକ୍ଷିଯନ୍ତି
ଶ୍ରୁଧି ଶ୍ରୁତ ଶ୍ରଦ୍ଧିଵଂ ତେ ଵଦାମି ॥ ୪॥
ଅହମେଵ ସ୍ଵଯମିଦଂ ଵଦାମି ଜୁଷ୍ଟଂ
ଦେଵେଭିରୁତ ମାନୁଷେଭିଃ ।
ଯଂ କାମଯେ ତଂ ତମୁଗ୍ରଂ କୃଣୋମି
ତଂ ବ୍ରହ୍ମାଣଂ ତମୃଷିଂ ତଂ ସୁମେଧାମ୍ ॥ ୫॥
ଅହଂ ରୁଦ୍ରାଯ ଧନୁରା ତନୋମି
ବ୍ରହ୍ମଦ୍ଵିଷେ ଶରଵେ ହନ୍ତଵା ଉ ।
ଅହଂ ଜନାଯ ସମଦଂ କୃଣୋମ୍ଯହଂ
ଦ୍ଯାଵାପୃଥିଵୀ ଆ ଵିଵେଶ ॥ ୬॥
ଅହଂ ସୁଵେ ପିତରମସ୍ଯ ମୂର୍ଧନ୍
ମମ ଯୋନିରପ୍ସ୍ଵନ୍ତଃ ସମୁଦ୍ରେ ।
ତତୋ ଵି ତିଷ୍ଠେ ଭୁଵନାନୁ ଵିଶ୍ଵୋ-
ତାମୂଂ ଦ୍ଯାଂ ଵର୍ଷ୍ମଣୋପ ସ୍ପୃଶାମି ॥ ୭॥
ଅହମେଵ ଵାତ ଇଵ ପ୍ର ଵାମ୍ଯା-
ରଭମାଣା ଭୁଵନାନି ଵିଶ୍ଵା ।
ପରୋ ଦିଵା ପର ଏନା ପୃଥିଵ୍ଯୈ-
ତାଵତୀ ମହିନା ସଂ ବଭୂଵ ॥ ୮॥
॥ ଇତି ଋଗ୍ଵେଦୋକ୍ତଂ ଦେଵୀସୂକ୍ତଂ ସମାପ୍ତମ୍ ॥
॥ ଓଁ ତତ୍ ସତ୍ ଓଁ ॥