2.6 - sautrāmaṇiḥ kaukilī hotraṃ ca - kṛṣṇa yajurveda taittirīya brāhmaṇa pāṭhaḥ - svādvīṃ tvā

kṛṣṇa yajurvedīya taittirīya brāhmaṇe dvitīyāṣṭake ṣaṣṭhaḥ prapāṭhakaḥ - sautrāmaṇiḥ kaukilī hotra-ñca
o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | hariḥ om ||
anuvākaṃ 1 - grahāḥ

svādvī-ntvā svādunā | tīvrā-ntīvreṇa̭ | amṛtā̭-mamṛtḙna | madhṷmatī-mmadhṷmatā | sṛjāmi sagṃ somḙna | somo-'syaśvibhyā-mpacyasva | sara̭svatyai pacyasva | indrā̭ya sutrāmṇḙ pacyasva || parītoṣi̭ñcatā sutam | somo ya ṷttamagṃ haviḥ || 1 ||
dadhanvā yo naryo̭ aphsva̭ntarā | suṣāva somamadri̭bhiḥ || punātṷ te parisrutam | somagṃ sūrya̭sya duhitā | vārḙṇa śaśva̭tā tanā | vāyuḥ pūtaḥ pavitrḙṇa | prāṅkhsomo ati̭drutaḥ | indra̭sya yujya-ssakhā || vāyuḥ pūtaḥ pavitrḙṇa | pratyaṅkhsomo ati̭drutaḥ || 2 ||
indra̭sya yujya-ssakhā || brahma̭ kṣatra-mpa̭vate teja̭ indriyam | sura̭yā somaḥ̭ suta āsṷto madā̭ya | śukreṇa̭ deva devatāḥ pipṛgdhi | rasenānnaṃ-ya~ja̭mānāya dhehi || kuvidaṅga yava̭manto yava̭-ñcit | yathā dāntya̭nupūrvaṃ-vi~yūya̭ | ihehai̭ṣā-ṅkṛṇuta bhoja̭nāni | ye baraḥiṣo namo̭vṛkti-nna jagmuḥ || upayāma-gṛ̭hīto-'syaśvibhyā-ntvā juṣṭa̭-ṅgṛhṇāmi || 3 ||
sara̭svatyā indrā̭ya sutrāmṇe || eṣa te yonisteja̭se tvā | vīryā̭ya tvā balā̭ya tvā || tejo̭-'si tejo mayi̭ dhehi | vīrya̭masi vīrya̭-mmayi̭ dhehi | bala̭masi bala-mmayi̭ dhehi || nānā hi vā-ndevahi̭tagṃ sadaḥ̭ kṛtam | mā sagṃsṛ̭kṣāthā-mparame vyo̭mann | surā tvamasi̭ śuṣmiṇī soma̭ eṣaḥ | mā mā̭ higṃsī-ssvāṃ-yo~ni̭māviśann || 4 ||
upayāmagṛ̭hīto-'syāśvina-ntejaḥ̭ | sārasvataṃ-vī~ryam | aindra-mbalam || eṣa te yonirmodā̭ya tvā | ānandāya̭ tvā maha̭se tvā || ojo-'syojo mayi̭ dhehi | manyura̭si manyu-mmayi̭ dhehi | maho̭-'si maho mayi̭ dhehi | saho̭-'si saho mayi̭ dhehi || yā vyāghraṃ-vi~ṣṷ̄cikā | ubhau vṛka̭-ñca rakṣa̭ti | śyena-mpa̭tatriṇagṃ̭ sigṃham | sema-mpātvagṃha̭saḥ || sa-mpṛcaḥ̭ stha sa-mmā̭ bhadreṇa̭ pṛṅkta | vipṛcaḥ̭ stha vi mā̭ pāpmanā̭ pṛṅkta || 5 ||

(haviḥ - pratyaṅkhsomo āti̭druto - gṛhṇā - myāviśan - viṣṷ̄cikā pañca̭ ca) (a. 1)
anuvākaṃ 2 - grahopasthānam

somo rājā-'mṛtagṃ̭ sutaḥ | ṛjīṣeṇā̭jahānmṛtyum | ṛtena̭ satyami̭ndriyam | vipānagṃ̭ śukramandha̭saḥ | indra̭syendriyam | ida-mpayo-'mṛta-mmadhṷ || soma̭madbhyo vya̭pibat | chanda̭sā hagṃsa-śśṷciṣat | ṛtena̭ satyami̭ndriyam | adbhyaḥ, kṣīraṃ-vya~̭pibat || 6 ||
kruṅṅāṅgiraso dhiyā | ṛtena̭ satyami̭ndriyam | annā-tparisruto rasam | brahma̭ṇā vya̭piba-tkṣatram | ṛtena̭ satyami̭ndriyam || reto mūtraṃ-vi~ja̭hāti | yoni̭-mpraviśadi̭ndriyam | garbho̭ jarāyuṇā-''vṛ̭taḥ | ulba̭-ñjahāti janma̭nā | ṛtena̭ satyami̭ndriyam || 7 ||
vedḙna rūpe vya̭karot | satāsatī prajāpa̭tiḥ | ṛtena̭ satyami̭ndriyam || somḙna somau vya̭pibat | sutāsutau prajāpa̭tiḥ | ṛtena̭ satyami̭ndriyam | dṛṣṭvā rūpe vyāka̭rot | satyānṛte prajāpa̭tiḥ | aśra̭ddhā-manṛte-'da̭dhāt | śraddhāgṃ satye prajāpa̭tiḥ | ṛtena̭ satyami̭ndriyam || dṛṣṭvā pa̭risruto rasam | śukreṇa̭ śukraṃ-vya~̭pibat | paya-ssoma̭-mprajāpa̭tiḥ | ṛtena̭ satyami̭ndriyam | vipānagṃ̭ śukramandha̭saḥ | indra̭syendriyam | ida-mpayo-'mṛta-mmadhṷ || 8 ||

(adbhyaḥ, kṣīraṃ-vya~̭piba - jjanma̭nartena̭ satyami̭ndriyagg - śraddhāgṃ satye prajāpa̭tiraṣṭau ca̭) (a. 2)
(somo rājā vipānagṃ soma̭madbhyo-'nnā-dreto mūtraṃ-ve~dḙna satāsatī somḙna sutāsutau dṛṣṭvā rūpe dṛṣṭvā pa̭risruto rasaṃ-vi~pāna-ndaśa̭ )
anuvākaṃ 3 - grahahomaḥ

surā̭vanta-mbarhiṣadagṃ̭ suvīram | yajñagṃ hi̭nvanti mahiṣā namo̭bhiḥ | dadhā̭nā-ssoma̭-ndivi devatā̭su | mademendraṃ-ya~ja̭mānā-ssvarkāḥ || yaste rasa-ssambhṛ̭ta oṣa̭dhīṣu | soma̭sya śuṣma-ssura̭yā sutasya̭ | tena̭ jinva yaja̭māna-mmadḙna | sara̭svatī-maśvinā-vindra̭-magnim || yamaśvinā namṷcerāsurādadhi̭ | sara̭svatyasa̭nodindriyāya̭ || 9 ||
ima-ntagṃ śukra-mmadhṷmanta-mindum | somagṃ rājā̭namiha bha̭kṣayāmi || yadatra̭ riptagṃ rasinaḥ̭ sutasya̭ | yadindro api̭bacchacī̭bhiḥ | aha-ntada̭sya mana̭sā śivena̭ | somagṃ rājā̭namiha bha̭kṣayāmi || pitṛbhyaḥ̭ svadhāvibhyaḥ̭ svadhā namaḥ̭ | pitāmahebhyaḥ̭ svadhāvibhyaḥ̭ svadhā namaḥ̭ | prapi̭tāmahebhya-ssvadhāvibhyaḥ̭ svadhā namaḥ̭ | akṣa̭-npitaraḥ̭ || 10 ||
amī̭madanta pitaraḥ̭ | atī̭tṛpanta pitaraḥ̭ | amī̭mṛjanta pitaraḥ̭ | pita̭ra-śśundha̭ddhvam || punantṷ mā pitaraḥ̭ somyāsaḥ̭ | punantṷ mā pitāmahāḥ | punantu prapi̭tāmahāḥ | pavitrḙṇa śatāyṷṣā | punantṷ mā pitāmahāḥ | punantu prapi̭tāmahāḥ || 11 ||
pavitrḙṇa śatāyṷṣā || viśvamāyu-rvya̭śnavai | agna āyūgṃ̭ṣi pavasa ā suvorjamiṣa̭-ñca naḥ | āre bā̭dhasva ducchunām || agne pava̭sva svapā̭ asme varcaḥ̭ suvīryam | dadha-tpoṣagṃ̭ rayi-mmayi̭ ||| pava̭māna-ssuvarjanaḥ̭ | pavitrḙṇa vica̭rṣaṇiḥ | yaḥ potā sa pṷnātu mā || punantṷ mā devajanāḥ | punantu mana̭ vo dhiyā | punantu viśva̭ āyavaḥ̭ ||| jāta̭vedaḥ pavitra̭vat | pavitrḙṇa punāhi mā | śukreṇa̭ deva dīdya̭t | agne kratvā kratūgṃranṷ || yattḙ pavitra̭-marciṣi̭ | agne vita̭tamantarā | brahma tena̭ punīmahe ||| ubhābhyā-ndeva savitaḥ | pavitrḙṇa savena̭ ca | ida-mbrahma̭ punīmahe || vaiśvadevī pṷnatī devyāgāt | yasyai̭ bahvī-stanuvo̭ vītapṛ̭ṣṭhāḥ | tayā mada̭nta-ssadhamādyḙṣu | vayagg syā̭ma pata̭yo rayīṇām |||| ye sa̭mānā-ssama̭nasaḥ | pitaro̭ yamarājye | teṣāṃ-lo~ka-ssvadhā namaḥ̭ | yajño deveṣṷ kalpatām || 12 ||
ye sa̭jātā-ssama̭nasaḥ | jīvā jīveṣṷ māmakāḥ | teṣāg śrīrmayi̭ kalpatām | asmil ~loke śatagṃ samāḥ || dve srutī a̭śṛṇava-mpitṛṇām | aha-ndevānā̭muta martyā̭nām | yābhyā̭midaṃ-vi~śvameja-thsamḙti | yada̭ntarā pitara̭-mmātara̭-ñca || idagṃ haviḥ prajana̭na-mme astu | daśa̭vīragṃ sarvaga̭ṇagg svastaye | ātmasani̭ prajāsani̭ | paśusanya̭bhayasani̭ lokasani̭ | agniḥ prajā-mba̭hulā-mmḙ karotu | anna-mpayo reto̭ asmāsṷ dhatta | rāyaspoṣa-miṣamūrja̭masmāsṷ dīdhara-thsvāhā || 13 ||

(indriyāya̭ - pitaraḥ̭ - śatāyṷṣā punantṷ mā pitāmahāḥ punantu prapi̭tāmahāḥ-kalpatāg-svastaye pañca̭ ca) (a. 3)
anuvākaṃ 4 - upahomāḥ

sīsḙna tantra-mmana̭sā manīṣiṇaḥ̭ | ūrṇāsūtreṇa̭ kavayo̭ vayanti | aśvinā̭ yajñagṃ sa̭vitā sara̭svatī | indra̭sya rūpaṃ-va~rṷṇo bhiṣajyann || tada̭sya rūpamamṛtagṃ śacī̭bhiḥ | tisro da̭dhurdevatā-ssagṃrarāṇāḥ | lomā̭ni śaṣpai-rbahudhā na tokma̭bhiḥ | tvaga̭sya māgṃsama̭bhavanna lājāḥ || tadaśvinā̭ bhiṣajā̭ rudrava̭rtanī | sara̭svatī vayati peśo anta̭raḥ || 14 ||
asthi̭ majjāna-mmāsa̭raiḥ | kārotareṇa dadha̭to gavā-ntvaci || sara̭svatī mana̭sā peśalaṃ-va~sṷ | nāsa̭tyābhyāṃ-va~yati darśataṃ-va~puḥ̭ | rasa̭-mparisrutā na rohi̭tam | nagnahurdhīrastasa̭ra-nna vema̭ || paya̭sā śukramamṛta̭-ñjanitram | sura̭yā mūtrājjanayanti retaḥ̭ | apāma̭ti-ndurmati-mbādha̭mānāḥ | ūva̭ddhyaṃ-vā~tagṃ̭ sabuva-ntadārāt || 15 ||
indraḥ̭ sutrāmā hṛda̭yena satyam | puroḍāśḙna savitā ja̭jāna | yakṛ̭-tklomānaṃ-va~rṷṇo bhiṣajyann | mata̭sne vāyavyairna mi̭nāti pittam || āntrāṇi̭ sthālī madhu pinva̭mānā | gudā pātrā̭ṇi sudughā na dhenuḥ | śyenasya patra-nna plīhā śacī̭bhiḥ | āsandī nābhi̭rudara-nna mātā || kumbho va̭niṣṭhurja̭nitā śacī̭bhiḥ | yasminnagre yonyā-ṅgarbho̭ antaḥ || 16 ||
plāśīrvya̭kta-śśatadhā̭ra uthsaḥ̭ | duhe na kumbhīg svadhā-mpitṛbhyaḥ̭ || mukhagṃ sada̭sya śira ithsadḙna | jihvā pavitra̭maśvinā sagṃ sara̭svatī | cappa-nna pāyurbhiṣaga̭sya vālaḥ̭ | vastirna śepo hara̭sā tarasvī || aśvibhyā-ñcakṣṷramṛta-ṅgrahābhyām | chāgḙna tejo̭ haviṣā̭ śṛtena̭ | pakṣmā̭ṇi godhūmaiḥ kva̭lairutāni̭ | peśo na śuklamasi̭taṃ-va~sāte || 17 ||
avirna meṣo nasi vīryā̭ya | prāṇasya panthā̭ amṛto grahābhyām | sara̭svatyupavākairvyānam | nasyā̭ni baraḥi-rbada̭rai-rjajāna || indra̭sya rūpamṛ̭ṣabho balā̭ya | karṇābhyāg śrotra̭mamṛta-ṅgrahābhyām | yavā na baraḥi-rbhruvi kesa̭rāṇi | karkandhṷ jajñe madhṷ sāragha-mmukhāt || ātmannupasthe na vṛka̭sya loma̭ | mukhe śmaśrṷ̄ṇi na vyāghralomam || 18 ||
keśā na śīra.ṣan. yaśa̭se śriyai śikhā | sigṃhasya loma tviṣi̭-rindriyāṇi̭ || aṅgānyātman-bhiṣajā tadaśvinā | ātmānamaṅgai-ssama̭dhā-thsara̭svatī | indra̭sya rūpagṃ śatamā̭namāyuḥ̭ | candreṇa jyoti̭ramṛta-ndadhā̭nā || sara̭svatī yonyā-ṅgarbha̭mantaḥ | aśvibhyā-mpatnī sukṛ̭ta-mbibharti | apāgṃ rasḙna varṷṇo na sāmnā | indragg̭ śriyai janaya̭nnaphsu rājā || tejaḥ̭ paśūnāgṃ haviri̭ndriyāva̭t | parisrutā paya̭sā sāragha-mmadhṷ | aśvibhyā-ndugdha-mbhiṣajā sara̭svatyā sutāsutābhyām | amṛta-ssoma induḥ̭ || 19 ||

(anta̭ra - ārā - danta--r va̭sāte - vyāghralomagṃ - rājā̭ catvāri̭ ca) (a. 4)
anuvākaṃ 5 - abhiṣekaḥ

mitro̭-'si varṷṇo-'si | samahaṃ-vi~śvairdevaiḥ || kṣatrasya nābhi̭rasi | kṣatrasya yoni̭rasi || syonāmāsī̭da | suṣadāmāsī̭da | mā tvā̭ higṃsīt | mā mā̭ higṃsīt || niṣa̭sāda dhṛtavra̭to varṷṇaḥ | pastyāsvā || 20 ||
sāmrājyāya sukratuḥ̭ || devasya̭ tvā savituḥ pra̭save | aśvino-rbāhubhyām | pūṣṇo hastābhyām | aśvino-rbhaiṣa̭jyena | teja̭se brahmavarcasāyābhiṣi̭ñcāmi || devasya̭ tvā savituḥ pra̭save | aśvino-rbāhubhyām | pūṣṇo hastābhyām | sara̭svatyai bhaiṣa̭jyena || 21 ||
vīryā̭yānnādyā̭yābhiṣi̭ñcāmi || devasya̭ tvā savituḥ pra̭save | aśvino-rbāhubhyām | pūṣṇo hastābhyām | indra̭syendriyeṇa̭ | śriyai yaśa̭se balā̭yābhiṣi̭ñcāmi || ko̭-'si katamo̭-'si | kasmai tvā kāya̭ tvā || suślokā~(4) suma̭ḍgalā~(4) satya̭rājā(3)n || śiro̭ me śrīḥ || 22 ||
yaśo mukham | tviṣiḥ keśāśca śmaśrṷ̄ṇi | rājā̭ me prāṇo̭-'mṛtam | samrāṭ cakṣuḥ̭ | virāṭchrotram | jihvā mḙ bhadram | vāmmahaḥ̭ | mano̭ manyuḥ | svarāḍbhāmaḥ̭ | modāḥ pramodā aṅgulīraṅgā̭ni || 23 ||
citta-mme sahaḥ̭ | bāhū me bala̭mindriyam | hastaṷ me karma̭ vīryam | ātmā kṣatramuro mama̭ | pṛṣṭīrmḙ rāṣṭramudaramagṃsau | grīvāśca śroṇyau | ūrū a̭ratnī jānṷnī | viśo me-'ṅgā̭ni sarvataḥ̭ | nābhi̭rme cittaṃ-vi~jñānam | pāyurme-'pa̭citirbhasat || 24 ||
ānandanandāvāṇḍau me | bhaga-ssaubhāgya-mpasaḥ̭ || jaṅghābhyā-mpadbhyā-ndharmo-'smi | viśi rājā prati̭ṣṭhitaḥ || prati̭ kṣatre prati̭tiṣṭhāmi rāṣṭre | pratyaśvḙṣu prati̭tiṣṭhāmi goṣṷ | pratyaṅgḙṣu prati̭tiṣṭhāmyātmann | prati̭ prāṇeṣu prati̭tiṣṭhāmi puṣṭe | prati dyāvā̭pṛthivyoḥ | pratiti̭ṣṭhāmi yajñe || 25 ||
trayā devā ekā̭daśa | trayastrigṃśā-ssurādha̭saḥ | bṛhaspati̭ purohitāḥ | devasya̭ savitu-ssave | devā devaira̭vantu mā | prathamā dvitīyaiḥ | dvitīyāstṛtīyaiḥ | tṛtīyā-ssatyena̭ | satyaṃ-ya~jñena̭ |yajño yajṷrbhiḥ || 26 ||
yajūgṃ̭ṣi sāma̭bhiḥ | sāmānyṛgbhiḥ | ṛco̭ yājyā̭bhiḥ | yājyā̭ vaṣaṭkāraiḥ | vaṣaṭkārā āhṷtibhiḥ | āhṷtayo me kāmān-thsama̭rdhayantu || bhū-ssvāhā || lomā̭ni praya̭tirmama̭ | tvamma āna̭tirāga̭tiḥ | māgṃsa-mma upa̭natiḥ | va svasthi̭ | majjā ma āna̭tiḥ || 27 ||

(pastyāsvā - sara̭svatyai bhaiṣa̭jyena - śrī - raṅgā̭ni - bhasa--dyajñe - yajño yajṷrbhi - rupa̭natirdve ca̭) (a. 5)
anuvākaṃ 6 - avabhṛthaḥ

ya-ddḙvā devaheḍa̭nam | devā̭saścakṛmā vayam | agnirmā tasmādena̭saḥ | viśvā-nmuñcatvagṃha̭saḥ || yadi divā yadi naktam | enāgṃ̭si cakṛmā vayam | vāyurmā tasmādena̭saḥ | viśvā-nmuñcatvagṃha̭saḥ || yadi jāgra-dyadi svapne | enāgṃ̭si cakṛmā vayam || 28 ||
sūryo̭ mā tasmādena̭saḥ | viśvā-nmuñcatvagṃha̭saḥ || yadgrāme yadara̭ṇye | ya-thsabhāyāṃ-ya~di̭ndriye | yacchūdre yadarye | ena̭ścakṛmā vayam | yadekasyādhi dharma̭ṇi | tasyā̭vayaja̭namasi || yadāpo aghni̭yā varuṇeti śapā̭mahe | tato̭ varuṇa no muñca || 29 ||
ava̭bhṛtha nicaṅkuṇa nicerura̭si nicaṅkuṇa | ava̭ devai-rdevakṛ̭tameno̭-'yāṭ | ava martyairmartya̭kṛtam | urorā no̭ deva riṣaspā̭hi || sumitrā na āpa oṣa̭dhaya-ssantu | durmitrāstasmai̭ bhūyāsuḥ | yo-'smā-ndveṣṭi̭ | ya-ñca̭ vaya-ndviṣmaḥ || drupadādive-nmṷmucānaḥ | svinna-ssnātvī malā̭diva || 30 ||
pūta-mpavitrḙṇevājyam | āpaḥ̭ śundhantu maina̭saḥ || udvaya-ntama̭saspari̭ | paśya̭nto jyotirutta̭ram | deva-ndḙvatrā sūryam | aga̭nma jyoti̭ruttamam || prati̭yuto varṷṇasya pāśaḥ̭ | pratya̭sto varṷṇasya pāśaḥ̭ || edho-'syedhiṣīmahi̭ | samida̭si || 31 ||
tejo̭-'si tejo mayi̭ dhehi || apo anva̭cāriṣam | rasḙna sama̭sṛkṣmahi | paya̭svāgṃ agna ā-'ga̭mam | ta-mmā sagṃsṛ̭ja varca̭sā | prajayā̭ ca dhanḙna ca || samāva̭varti pṛthivī | samuṣāḥ | samu sūryaḥ̭ | samu viśva̭mida-ñjaga̭t | vaiśvānara jyo̭ti-rbhūyāsam | vibhu-ṅkāmaṃ-vya~̭śnavai || bhū-ssvāhā || 32 ||

(svapna enāgṃ̭si cakṛmā vayaṃ - mṷñca - malā̭diva - samida̭si - jaga-ttrīṇi̭ ca) (a. 6)
anuvākaṃ 7 - aindre praśnau prayājānāmekādaśa maitrāvaruṇapraiṣāḥ

hotā̭ yakṣa-thsamidhendra̭-miḍaspade | nābhā̭ pṛthivyā adhi̭ | divo varṣman-thsami̭ddhyate | oji̭ṣṭhaścarṣaṇīsahāṋ | vetvājya̭sya hotaryaja̭ || hotā̭ yakṣattanūnapā̭tam | ūtibhi-rjetā̭ra-mapa̭rājitam | indra̭-ndevagṃ sṷvarvidam | pathibhi-rmadhṷmattamaiḥ | narāśagṃsḙna teja̭sā || 33 ||
vetvājya̭sya hotaryaja̭ || hotā̭ yakṣadiḍā̭bhi-rindra̭-mīḍitam | ājuhvā̭na-mama̭rtyam | devo devai-ssavīryaḥ | vajra̭hastaḥ purandaraḥ | vetvājya̭sya hotaryaja̭ || hotā̭ yakṣa-dbaraḥiṣīndra̭-nniṣadvaram | vṛṣabha-nnaryā̭pasam | vasṷbhī rudrairā̭dityaiḥ | sayugbhi̭-rbaraḥirā 'sa̭dat || 34 ||
vetvājya̭sya hotaryaja̭ || hotā̭ yakṣadojo na vīryam | saho dvāra indra̭mavardhayann | suprāyaṇā viśra̭yantāmṛtāvṛdhaḥ̭ | dvāra indrā̭ya mīḍhuṣe | viyantvājya̭sya hotaryaja̭ || hotā̭ yakṣaduṣe indra̭sya dhenū | sudughḙ mātaraṷ mahī | savātarau na teja̭sī | vathsamindra̭-mavardhatām || 35 ||
vītāmājya̭sya hotaryaja̭ || hotā̭ yakṣa-ddaivyā hotā̭rā | bhiṣajā sakhā̭yā | haviṣendra̭-mbhiṣajyataḥ | kavī devau pracḙtasau | indrā̭ya dhatta indriyam | vītāmājya̭sya hotaryaja̭ || hotā̭ yakṣattisro devīḥ | traya̭stridhāta̭vo-'pasaḥ̭ | iḍā sara̭svatī bhāra̭tī || 36 ||
mahīndra̭patnīr-haviṣma̭tīḥ | viyantvājya̭sya hotaryaja̭ || hotā̭ yakṣattvaṣṭā̭ra-mindra̭-ndevam | bhiṣajagṃ̭ suyaja̭-ṅghṛtaśriyam | pururūpagṃ̭ sureta̭sa-mmaghonim | indrā̭ya tvaṣṭā dadha̭dindriyāṇi̭ | vetvājya̭sya hotaryaja̭ || hotā̭ yakṣa-dvanaspatim | śamitāragṃ̭ śatakra̭tum | dhiyo joṣṭāra̭-mindriyam || 37 ||
maddhvā̭ samañjanpathibhiḥ̭ sugebhiḥ̭ | svadā̭ti havya-mmadhṷnā ghṛtena̭ | vetvājya̭sya hotaryaja̭ || hotā̭ yakṣadindragg svāhā-''jya̭sya | svāhā meda̭saḥ | svāhā stokānām | svāhā svāhā̭kṛtīnām | svāhā̭ havyasūktīnām | svāhā̭ devāgṃ ājyapān | svāhendragṃ̭ hotrājjṷṣāṇāḥ | indra ājya̭sya viyantu | hotaryaja̭ || 38 ||

(teja̭sā-'sada-davardhatāṃ-bhāra̭tī-ndriyaṃ-jṷṣāṇā dve ca̭) (a. 7)
(samidhendra-ntanūnapā̭tamiḍā̭bhi-rbarhiṣyoja̭ uṣe daivyā̭ tisrastvaṣṭā̭raṃ-va~naspatimindram | samidhendra̭-ñcaturvetveko̭ viyantu dvirvītāmeko̭ viyantu dvirvetveko̭ viyantu hotaryaja̭ )
anuvākaṃ 8 - aindre praśnau prayājayājyāḥ

sami̭ddha indra̭ uṣasāmanī̭ke | purorucā̭ pūrvakṛdvā̭vṛdhānaḥ | tribhirdevaistrigṃśatā vajra̭bāhuḥ | jaghāna̭ vṛtraṃ-vi~ duro̭ vavāra || narāśagṃsaḥ prati śūro mimā̭naḥ | tanūnapāt-prati̭ yajñasya dhāma̭ | gobhi̭-rvapāvā-nmadhṷnā samañjann | hira̭ṇyaiścandrī ya̭jati pracḙtāḥ || īḍito devairhari̭vāgṃ abhiṣṭiḥ | ājuhvā̭no haviṣā śardha̭mānaḥ || 39 ||
puradaṃro maghavān. vajra̭bāhuḥ | āyā̭tu yajñamupa̭ no juṣāṇaḥ || juṣāṇo baraḥirhari̭vānna indraḥ̭ | prācīnagṃ̭ sīdatpradiśā̭ pṛthivyāḥ | uruvyacāḥ pratha̭mānagg syonam | ādityairaktaṃ-va~sṷbhi-ssajoṣāḥ || indra-nduraḥ̭ kavaṣyo̭ dhāva̭mānāḥ | vṛṣā̭ṇaṃ-ya~ntu jana̭ya-ssupatnīḥ | dvāro̭ devīrabhito viśra̭yantām | suvīrā̭ vīra-mpratha̭mānā maho̭bhiḥ || 40 ||
uṣāsā naktā̭ bṛhatī bṛhantam | paya̭svatī sudughe śūramindram | peśa̭svatī tantṷnā saṃvya~ya̭ntī | devānā-ndevaṃ-ya~̭jata-ssurukme || daivyā mimā̭nā mana̭sā purutrā | hotā̭rāvindra̭-mprathamā suvācā | mūrdhan. yajñasya madhṷnā dadhā̭nā | prācīna-ñjyoti̭rhaviṣā̭ vṛdhātaḥ || tisro devīrhaviṣā vardha̭mānāḥ | indra̭-ñjuṣāṇā vṛṣa̭ṇa-nna patnīḥ || 41 ||
acchi̭nna-ntantu-mpaya̭sā sara̭svatī | iḍā̭ devī bhāra̭tī viśvatūrtiḥ || tvaṣṭā dadhadindrā̭ya śuṣmam | apāko-'ci̭ṣṭuryaśasḙ purūṇi̭ | vṛṣā yajan vṛṣa̭ṇa-mbhūri̭retāḥ | mūrdhan. yajñasya sama̭naktu devān || vanaspati-rava̭sṛṣṭo na pāśaiḥ | tmanyā̭ samañjañcha̭mitā na devaḥ | indra̭sya havyairjaṭhara̭-mpṛṇānaḥ | svadā̭ti havya-mmadhṷnā ghṛtena̭ || stokānāmindu-mprati śūra indraḥ̭ | vṛṣāyamā̭ṇo vṛṣabha-stṷrāṣāṭ | ghṛtapruṣā madhṷnā havyamundann | mūrdhan. yajñasya̭ juṣatāg svāhā || 42 ||

(śardha̭māno - maho̭bhiḥ - patnī--r ghṛtena̭ catvāri̭ ca) (a. 8)
anuvākaṃ 9 - aindre praśnau vapādīnāṃ-yā~jyānuvākyāḥ

āca̭rṣaṇiprā vṛ̭ṣabho janā̭nām | rājā̭ kṛṣṭīnā-mpṷruhūta indraḥ̭ | stuta-śśra̭vasyannavasopa̭madrik | yuktvā harī vṛṣaṇā ''yāhyarvām ||, viveṣa yanmā̭ dhiṣaṇā̭ jajāna stavai̭ purā pāryādindra mahnaḥ̭ | agṃha̭so yatra̭ pīparadyathā̭ no nāveva yānta̭ mubhayḙ havante |||| tagṃ sadhrīcī̭rūtayo vṛṣṇi̭yāni | pauggsyā̭ni niyutaḥ̭ saścurindram | samudra-nna sindha̭va ukthaśṷṣmāḥ | uruvyaca̭sagiṃra āvi̭śanti |||| satyamittanna tvāvāgṃ̭ anyo asti̭ | indra̭ devo na martyo jyāyāṋ | ahannahi̭-mpariśayā̭namarṇaḥ̭ | avā̭sṛjo-'po acchā̭ samudram || prasa̭sāhiṣe puruhūta śatrūṋ | jyeṣṭha̭ste śuṣma̭ iha rātira̭stu | indrābha̭ra dakṣi̭ṇenā vasṷ̄ni | pati-ssindhṷ̄nāmasi revatī̭nām || sa śevṛ̭dhamadhi̭dhā dyumnamasme | mahi̭ kṣatra-ñja̭nāṣāḍi̭ndra tavyam | rakṣā̭ ca no maghonaḥ̭ pāhi sūrīn | rāye ca̭ na-ssvapatyā iṣe dhāḥ || 43 ||

(revatī̭nā-ñcatvāri̭ ca) (a. 9)
anuvākaṃ 10 - aindre praśnau anuyājānāmekādaśa maitrāvaruṇapraiṣāḥ

deva-mbarhirindragṃ̭ sudeva-ndevaiḥ | vīrava̭-thstīrṇaṃ-ve~dyā̭mavardhayat | vastorvṛta-mprāktorbhṛtam | rāyā barhiṣmato-'tya̭gāt | vasuvanḙ vasudheya̭sya vetu yaja̭ || devīrdvāra indragṃ̭ saṅghāte | viḍvīryāma̭nnavardhayann | ā vathsena tarṷṇena kumāreṇa̭ ca mīvitā apārvā̭ṇam | reṇuka̭kāṭa-nnudantām | vasuvanḙ vasudheya̭sya viyantu yaja̭ || 44 ||
devī uṣāsā naktā | indraṃ̭-ya~jñe pra̭yatya̭hvetām | daivīrviśaḥ prāyā̭siṣṭām | suprī̭te sudhi̭te abhūtām | vasuvanḙ vasudheya̭sya vītāṃ-ya~ja̭ || devī joṣṭrī vasṷdhitī | devamindra̭mavardhatām | ayāvyanyā-'ghā dveṣāgṃ̭si | ā-'nyā vākṣī-dvasu vāryā̭ṇi | yaja̭mānāya śikṣite || 45 ||
vasuvanḙ vasudheya̭sya vītāṃ-ya~ja̭ || devī ūrjāhṷtī dughḙ sudughe | payasendra̭mavardhatām | iṣamūrja̭manyā 'vākṣīt | sagdhigṃ sapī̭timanyā | navḙna pūrva-ndaya̭māne | purāṇena navam | adhā̭tā-mūrja̭mūrjāhṷtī vasu vāryā̭ṇi | yaja̭mānāya śikṣite | vasuvanḙ vasudheya̭sya vītāṃ-ya~ja̭ || 46 ||
devā daivyā hotā̭rā | devamindra̭mavardhatām | hatāgha̭śagṃ sāvābhārṣṭāṃ-va~su vāryā̭ṇi | yaja̭mānāya śikṣitau | vasuvanḙ vasudheya̭sya vītāṃ-ya~ja̭ || devīstisrastisro devīḥ | patimindra̭mavardhayann | aspṛ̭kṣadbhāra̭tī divam | rudrairyajñagṃ sara̭svatī | iḍā vasṷmatī gṛhān || 47 ||
vasuvanḙ vasudheya̭sya viyantu yaja̭ || deva indro narāśagṃsaḥ̭ | trivarūtha-stri̭vandhuraḥ | devamindra̭mavardhayat | śatena̭ śitipṛṣṭhānāmāhi̭taḥ | sahasrḙṇa prava̭rtate | mitrāvaruṇeda̭sya hotramarha̭taḥ | bṛhaspatiḥ̭ stotram | aśvinā-''ddhva̭ryavam | vasuvanḙ vasudheya̭sya vetu yaja̭ || 48 ||
deva indro vanaspatiḥ̭ | hira̭ṇyaparṇo madhṷśākha-ssupippalaḥ | devamindra̭mavardhayat | divamagrḙṇāprāt | ā-'ntari̭kṣa-mpṛthivīma̭dṛgṃhīt | vasuvanḙ vasudheya̭sya vetu yaja̭ || deva-mbaraḥirvāri̭tīnām | devamindra̭mavardhayat | svāsastha-mindreṇāsa̭nnam | anyā barhīgṣyabhya̭bhūt | vasuvanḙ vasudheya̭sya vetu yaja̭ || devo agni-ssvi̭ṣṭakṛt | devamindra̭mavardhayat | svi̭ṣṭa-ṅkurvan-thsvi̭ṣṭakṛt | svi̭ṣṭamadya ka̭rotu naḥ | vasuvanḙ vasudheya̭sya vetu yaja̭ || 49 ||

(viyantu yaja̭ - śikṣite - śi̭kṣite va̭suvanḙ vasudheya̭sya vītāṃ-ya~ja̭-gṛhān.-vḙtu yajā̭-bhū-thṣaṭca̭) (a. 10)
deva-mbarhi-rdevīrdvāro̭ devī uṣāsā naktā̭ devī joṣṭrī̭ devī ūrjāhṷtī devā daivyā hotā̭rā śikṣitau devīstisrastisro devīḥ pati̭-ndeva indro narāśagṃso̭ deva indro vanaspati̭-rdeva-mbarhirvāri̭tīnā-ndevo agni-ssvi̭ṣṭakṛ-ddevam | vetu viyantu caturvī̭tāmeko̭ viyantu caturvḙtu | avardhayadavardhaya-ntrira̭vardhatāmeko̭ 'vardhayagg ścatura̭vardhayat | vastorā vathsena daivīrayāvīṣagṃ̭ hatāspṛ̭kṣacchatena divamindragg̭ svāsasthagg svi̭ṣṭam | śikṣite śi̭kṣite śi̭kṣitau |
anuvākaṃ 11 - paśutraye praya jārthā maitrāvaruṇapraiṣāḥ

hotā̭ yakṣa-thsamidhā-'gni-miḍaspade | aśvinendragṃ sara̭svatīm | ajo dhūmro na godhūmaiḥ kva̭lairbheṣajam | madhu śaṣpairna teja̭ indriyam | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣattanūnapā-thsara̭svatī | avi̭rmeṣo na bhḙṣajam | pathā madhṷmatā ''bha̭rann | aśvinendrā̭ya vīryam || 50 ||
bada̭rairupavākā̭bhi-rbheṣaja-ntokma̭bhiḥ | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣannarāśagṃsana-nnagnahum | patigṃ surā̭yai bheṣajam | meṣa-ssara̭svatī bhiṣak | ratho na candrya̭śvinorvapā indra̭sya vīryam | bada̭rairupavākā̭bhi-rbheṣaja-ntokma̭bhiḥ | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || 51 ||
hotā̭ yakṣadiḍeḍita ājuhvā̭na-ssara̭svatīm | indra-mbalḙna vardhayanṋ | ṛṣabheṇa gavendriyam | aśvinendrā̭ya vīryam | yavaiḥ karkandhṷbhiḥ | madhṷ lājairna māsa̭ram | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣa-dbaraḥi-ssuṣṭarīmo-'rṇa̭mradāḥ | bhiṣannāsa̭tyā || 52 ||
bhiṣajā-'śvinā-'śvā śiśṷmatī | bhiṣagdhenu-ssara̭svatī | bhiṣagduha indrā̭ya bheṣajam | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣadduro diśaḥ̭ | kavaṣyo̭ na vyaca̭svatīḥ | aśvibhyā-nna duro diśaḥ̭ | indro na roda̭sī dughe | duhe kāmān-thsara̭svatī || 53 ||
aśvinendrā̭ya bheṣajam | śukra-nna jyoti̭rindriyam | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣa-thsupeśa̭soṣe nakta-ndivā | aśvinā̭ sañjānāne | sama̭ñjāte sara̭svatyā | tviṣimindre na bhḙṣajam | śyeno na raja̭sā hṛdā | paya-ssomaḥ̭ parisrutā̭ ghṛta-mmadhṷ || 54 ||
viyantvājya̭sya hotaryaja̭ || hotā̭ yakṣaddaivyā hotā̭rā bhiṣajā-'śvinā | indra-nna jāgṛ̭vī divā nakta-nna bhḙṣajaiḥ | śūṣagṃ sara̭svatī bhiṣak | sīsḙna duha indriyam | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣa-ttisro devīrna bhḙṣajam | traya̭stridhāta̭vo-'pasaḥ̭ | rūpamindrḙ hiraṇyayam || 55 ||
aśvineḍā na bhāra̭tī | vācā sara̭svatī | maha indrā̭ya dadhurindriyam | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣattvaṣṭā̭ra-mindra̭maśvinā | bhiṣaja-nna sara̭svatīm | ojo na jūtiri̭ndriyam | vṛko na ra̭bhaso bhiṣak | yaśa-ssura̭yā bheṣajam || 56 ||
śriyā na māsa̭ram | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣa-dvanaspatim | śamitāragṃ̭ śatakra̭tum | bhīma-nna manyugṃ rājā̭naṃ-vyā~ghra-nnama̭sā-'śvinā bhāmam | sara̭svatī bhiṣak | indrā̭ya duha indriyam | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || 57 ||
hotā̭ yakṣadagnigg svāhā-''jya̭sya stokānām | svāhā meda̭sā-mpṛtha̭k | svāhā chāga̭maśvibhyām | svāhā̭ meṣagṃ sara̭svatyai | svāhā̭rṣabha-mindrā̭ya sigṃhāya saha̭sendriyam | svāhā-'gni-nna bhḙṣajam | svāhā soma̭mindriyam | svāhendragṃ̭ sutrāmā̭ṇagṃ savitāraṃ-va~rṷṇa-mbhiṣajā-mpatim | svāhā vanaspati̭-mpriya-mpātho na bhḙṣajam | svāhā̭ devāgṃ ājyapān || 58 ||
svāhā-'gnigṃ hotrājjṷṣāṇo agni-rbhḙṣajam | paya-ssomaḥ̭ parisrutā̭ ghṛta-mmadhṷ | viyantvājya̭sya hotaryaja̭ || hotā̭ yakṣadaśvinā sara̭svatīmindragṃ̭ sutrāmā̭ṇam | ime somā-ssurāmā̭ṇaḥ | chāgairna meṣair-ṛ̭ṣabhai-ssutāḥ | śaṣpairna tokma̭bhiḥ | lājairmaha̭svantaḥ | madā māsa̭reṇa pari̭ṣkṛtāḥ | śukrāḥ paya̭svanto-'mṛtāḥ | prasthi̭tā vo madhuścutaḥ̭ | tānaśvinā sara̭svatīndraḥ̭ sutrāmā̭ vṛtrahā | juṣantāgṃ̭ saumya-mmadhṷ | piba̭ntu mada̭ntu viyantu somam | hotaryaja̭ || 59 ||

(vīryaṃ - ~viyantvājya̭sya hotaryaja - nāsa̭tyā - sara̭svatī - madhṷ - hiraṇyayaṃ̭ - bheṣajaṃ - ~viyantvājya̭sya hotaryajā - jyapā - namṛtāḥ pañca̭ ca) (a. 11)
samidhā-'gnigṃ ṣaṭ | tanūnapā-thsapta | narāśagṃsamṛṣiḥ̭ | iḍeḍito yavai̭raṣṭau | barhi-ssapta | duro-'śvinā̭ śukrannava̭ | supeśa̭soṣe naktamṛṣiḥ̭| daivyā hotā̭rā sīsḙna rasaḥ̭ | tisrastvaṣṭā̭ramaṣṭāva̭ṣṭau | vanaspatimṛṣiḥ̭ | agni-ntrayo̭daśa | aśvinā dvāda̭śa trayo̭daśa | samidhā-'gni-mbada̭rai-rbada̭rai-ryavai̭raśvinā tviṣi̭maśvinā na bhḙṣajagṃ rūpamaśvinā̭ bhīma-mbhāmam |
anuvākaṃ 12 - paśutraye prayājayājyā āpriyaḥ

sami̭ddho agnira̭śvinā | tapto gharmo virāṭ-thsutaḥ | duhe dhenu-ssara̭svatī | somagṃ̭ śukramihendriyam || tanūpā bhiṣajā̭ sute | aśvinobhā sara̭svatī | maddhvā rajāgṃ̭sīndriyam | indrā̭ya pathibhi̭-rvahān || indrāyendugṃ sara̭svatī | narāśagṃsḙna nagnahuḥ̭ || 60 ||
adhā̭tāmaśvinā madhṷ | bheṣaja-mbhiṣajā̭ sute || ājuhvā̭nā sara̭svatī | indrā̭yendriyāṇi̭ vīryam | iḍā̭bhiraśvināviṣam | samūrjagṃ sagṃ rayi-nda̭dhuḥ || aśvi̭nā namṷce-ssutam | somagṃ̭ śukra-mpa̭risrutā | sara̭svatī tamābha̭rat | barhiṣendrā̭ya pāta̭ve || 61 ||
kavaṣyo̭ na vyaca̭svatīḥ | aśvibhyā-nna duro diśaḥ̭ | indro na roda̭sī dughe | duhe kāmān-thsara̭svatī || uṣāsā nakta̭maśvinā | divendragṃ̭ sāyami̭ndriyaiḥ | sajānnāne supeśa̭sā | sama̭ñjāte sara̭svatyā || pāta-nno̭ aśvinā divā | pāhi naktagṃ̭ sarasvati || 62 ||
daivyā̭ hotārā bhiṣajā | pātamindragṃ sacā̭ sute || tisrastredhā sara̭svatī | aśvinā bhāratīḍā | tīvra-mpa̭risrutā somam | indrā̭ya suṣavurmadam || aśvi̭nā bheṣaja-mmadhṷ | bheṣaja-nna-ssara̭svatī | indre tvaṣṭā yaśa-śśriyam | rūpagṃ rṷ̄pamadhu-ssute || ṛtuthendro vanaspatiḥ̭ | śaśamānaḥ pa̭risrutā | kīlāla̭maśvibhyā-mmadhṷ | duhe dhenu-ssara̭svatī || gobhirna soma̭maśvinā | māsa̭reṇa pariṣkṛtā | sama̭dhātāgṃ sara̭svatyā | svāhendrḙ suta-mmadhṷ || 63 ||

(nagnahuḥ - pāta̭ve - sarasva - tyadhu-ssute-'ṣṭau ca̭) (a. 12)
anuvākaṃ 13 - paśutraye vapādīnāṃ-yā~jyānuvākyāḥ

aśvinā̭ haviri̭ndriyam | namṷcerdhiyā sara̭svatī | ā śukramā̭surādvasu | maghamindrā̭ya jabhrire || yamaśvinā sara̭svatī | haviṣendra-mava̭rdhayann | sa bi̭bheda balaṃ (valaṃ) magham | namṷcāvāsure sacā | tamindra̭-mpaśava-ssacā || aśvinobhā sara̭svatī || 64 ||
dadhā̭nā abhya̭nūṣata | haviṣā̭ yajñami̭ndriyam || ya indra̭ indriya-ndadhuḥ | savitā varṷṇo bhagaḥ̭ | sa sutrāmā̭ haviṣpa̭tiḥ | yaja̭mānāya saścata || savitā varṷṇo dadha̭t | yaja̭mānāya dāśuṣe | āda̭tta namṷcervasṷ | sutrāmā bala̭mindriyam || 65 ||
varṷṇaḥ, kṣatrami̭ndriyam | bhagḙna savitā śriyam | sutrāmā yaśa̭sā balam | dadhā̭nā yajñamā̭śata || aśvi̭nā gobhi̭rindriyam | aśvḙbhi-rvīrya̭-mbalam | haviṣendragṃ sara̭svatī | yaja̭māna-mavardhayann || tā nāsa̭tyā supeśa̭sā | hira̭ṇyavartanī narā | sara̭svatī haviṣma̭tī | indra kama̭rsu no-'vata || tā bhiṣajā̭ sukarma̭ṇā | sā sudughā sara̭svatī | sa vṛ̭trahā śatakra̭tuḥ | indrā̭ya dadhurindriyam || 66 ||

(ubhā sara̭svatī - bala̭mindriyaṃ - narā ṣaṭca̭) (a. 13)
anuvākaṃ 14 - paśutraye anūyājapraiṣāḥ

deva-mbarhi-ssara̭svatī | sudevamindrḙ aśvinā | tejo na cakṣṷrakṣyoḥ | barhiṣā̭ dadhurindriyam | vasuvanḙ vasudheya̭sya viyantu yaja̭ || devīrdvāro̭ aśvinā | bhiṣajendre sara̭svatī | prāṇa-nna vīrya̭-nnasi | dvāro̭ dadhurindriyam | vasuvanḙ vasudheya̭sya viyantu yaja̭ || 67 ||
devī uṣāsā̭vaśvinā | bhiṣajendre sara̭svatī | bala-nna vāca̭māsye | uṣābhyā-ndadhurindriyam | vasuvanḙ vasudheya̭sya viyantu yaja̭ || devī joṣṭrī̭ aśvinā | sutrāmendre sara̭svatī | śrotra-nna karṇa̭yoryaśaḥ̭ | joṣṭrībhyā-ndadhurindriyam | vasuvanḙ vasudheya̭sya viyantu yaja̭ || 68 ||
devī ūrjāhṷtī dughḙ sudughe | payasendragṃ sara̭svatyaśvinā̭ bhiṣajā̭-'vata | śukra-nna jyoti-sstana̭yorāhṷtī dhatta indriyam | vasuvanḙ vasudheya̭sya viyantu yaja̭ || devā devānā-mbhiṣajā | hotā̭rāvindra̭-maśvinā | vaṣaṭkārai-ssara̭svatī | tviṣi-nna hṛda̭ye matim | hotṛ̭bhyā-ndadhurindriyam | vasuvanḙ vasudheya̭sya viyantu yaja̭ || 69 ||
devī-stisra-stisro devīḥ | sara̭svatyaśvinā bhāratīḍā | śūṣa-nna maddhye nābhyām | indrā̭ya dadhurindriyam | vasuvanḙ vasudheya̭sya viyantu yaja̭ || deva indro narāśagṃsaḥ̭ | trivarūtha-ssara̭svatyā 'śvibhyā̭mīyate rathaḥ̭ | reto na rūpamamṛta̭-ñjanitram | indrā̭ya tvaṣṭā dadha̭dindriyāṇi̭ | vasuvanḙ vasudheya̭sya viyantu yaja̭ || 70 ||
deva indro vanaspatiḥ̭ | hira̭ṇyaparṇo aśvibhyām | sara̭svatyā-ssupippalaḥ | indrā̭ya pacyate madhṷ | ojo na jūtimṛ̭ṣabho na bhāmam | vanaspati̭rno dadha̭dindriyāṇi̭ | vasuvanḙ vasudheya̭sya viyantu yaja̭ || deva-mbarhirvāri̭tīnām | addhvare stīrṇamaśvibhyām | ūrṇa̭mradā-ssara̭svatyāḥ || 71 ||
syonami̭ndra te sadaḥ̭ | īśāyai̭ manyugṃ rājā̭na-mbarhiṣā̭ dadhurindriyam | vasuvanḙ vasudheya̭sya viyantu yaja̭ || devo agni-ssvi̭ṣṭakṛt | devān.ya̭kṣa-dyathāyatham | hotā̭rā-vindra̭maśvinā | vācā vācagṃ sara̭svatīm | agnigṃ somagg̭ sviṣṭakṛt | svi̭ṣṭa indraḥ̭ sutrāmā̭ savitā varṷṇo bhiṣak | iṣṭo devo vanaspatiḥ̭ | svi̭ṣṭā devā ājyapāḥ | iṣṭo agniragninā | hotā̭ hotre svi̭ṣṭakṛt | yaśo na dadha̭dindriyam | ūrjamapa̭citigg svadhām | vasuvanḙ vasudheya̭sya viyantu yaja̭ || 72 ||

(dvāro̭ dadhurindriyaṃ-va~̭suvanḙ vasudheya̭sya viyantu yaja - joṣṭrībhyā-ndadhurindriyaṃ-va~̭suvanḙ vasudheya̭sya viyantu yaja -hotṛ̭bhyā-ndadhurindriyaṃ-va~̭suvanḙ vasudheya̭sya viyantu yaje - ndriyāṇi̭ vasuvanḙ vasudheya̭sya viyantu yaja - sara̭svatyā - vanaspati-ṣṣaṭca̭) (a. 14)
(deva-mbarhi-rdevī-rdvāro̭ devī uṣāsā̭vaśvinā̭ devī joṣṭra̭ devī ūrjāhṷ̄tī devā devānā-mbhiṣajā̭ vaṣaṭkārai-rdevīstisrastisro devī-ssara̭svatī deva indro narāśagṃso̭ deva indro vanaspati̭rdeva-mbarhirvāri̭tīnā-ndevoagni-ssvi̭ṣṭakṛ-ddevān) |
(samidhā-'gni-ndeva-mbarhi-ssara̭svatyāśvinā sarvaṃ̭-vi~yantu | dvāra̭stisra-ssaṃrva̭ viyantu | aja indramojo-'gni-mpara-ssara̭svatīm | naktampūrva-ssara̭svati | anyatra sara̭svati | bhiṣa-kpūrva̭-nduha indriyam | anyatra̭ dadhurindriyam | sautrāmaṇyāgṃ sṷtāsutī | añjantyayaṃ-ya~ja̭mānaḥ)
anuvākaṃ 15 - sūktavākapraiṣaḥ

agnimadya hotā̭ramavṛṇīta | ayagṃ sṷtāsutī yaja̭mānaḥ | paca̭-npaktīḥ | paca̭-npuroḍāśāṋ | gṛhṇa-ngrahāṋ | baddhnannaśvibhyā-ñchāgagṃ sara̭svatyā indrā̭ya | baddhnan-thsara̭svatyai meṣamindrā̭yāśvibhyām | baddhnannindrā̭yarṣabha-maśvibhyāgṃ sara̭svatyai | sūpasthā adya devo vanaspati̭rabhavat | aśvibhyā-ñchāgḙna sara̭svatyā indrā̭ya || 73 ||
sara̭svatyai meṣeṇendrā̭yāśvibhyām | indrā̭yarṣabheṇāśvibhyāgṃ sara̭svatyai | akṣaggstānmḙdastaḥ prati̭ pacatā-'gra̭bhīṣuḥ | avī̭vṛdhanta grahaiḥ | apā̭tāmaśvinā sara̭svatīndraḥ̭ sutrāmā̭ vṛtrahā | somān-thsurāmṇaḥ̭ | upo̭ ukthāmadā-śśraudvimadā̭ adann | avī̭vṛdha-ntāṅgūṣaiḥ | tvāmadyarṣa̭ ārṣeyarṣīṇā-nnapādavṛṇīta | ayagṃ sṷtāsutī yaja̭mānaḥ | bahubhya āsaṅga̭tebhyaḥ | eṣa mḙ deveṣu vasu vāryā ya̭kṣyata iti̭ | tā yā devā dḙvadānānyaduḥ̭ | tānya̭smā ā ca śāsva̭ | ā ca̭ gurasva | iṣitaśca̭ hotarasi̭ bhadravācyā̭ya preṣi̭to mānṷṣaḥ | sūktavākāya̭ sūktā brṷ̄hi || 74 ||

(indrā̭ya - yaja̭māna-ssapta ca̭) (a. 15)
anuvākaṃ 16 - pitṛyajñayājyānuvākyāḥ

uśanta̭stvā havāmaha uśanta-ssami̭dhīmahi | uśannṷśata ā va̭ha pitṝn haviṣe atta̭ve ||, ā no̭ agne suketunā | rayiṃ-vi~śvāyṷpoṣasam | mārḍīka-ndhḙhi jīvase ||| tvagṃ so̭ma mahe bhagam | tvaṃ-yū~na̭ ṛtāyate | dakṣa̭-ndadhāsi jīvase ||,tvagṃ so̭ma praci̭kito manīṣā tvagṃ raji̭ṣṭhamanṷ neṣi panthām | tava praṇī̭tī pitaro̭ na indo deveṣu ratna̭ma bhajanta dhīrāḥ ||| tvayā hi naḥ̭ pitaraḥ̭ soma pūrve karmā̭ṇi cakruḥ pa̭vamāna dhīrāḥ | vanvannavā̭taḥ paridhīgṃ raporṇu vīrebhiraśvairmaghavā̭ bhavā naḥ ||, tvagṃ so̭ma pitṛbhiḥ̭ saṃvi~dāno-'nu dyāvā̭pṛthivī ā ta̭tantha | tasmai̭ ta indo haviṣā̭ vidhema vayagg syā̭ma pata̭yo rayīṇām || | barhi̭ṣadaḥ pitara ūtya̭rvāgimā vo̭ havyā ca̭kṛmā juṣadhvam | ta ā gatā-'va̭sā śa-nta̭menāthāsmabhyagṃ śaṃ-yo~ra̭rapo da̭dhāta ||, ā-'ha-mpitṝn-thsṷvidatrāgṃ̭ avithsi napā̭ta-ñca vikrama̭ṇa-ñca viṣṇoḥ | barhiṣado ye svadhayā̭ sutasya bhaja̭nta pitvasta ihā-'' ga̭miṣṭhāḥ || | upa̭hūtāḥ pitaraḥ̭ somyāso̭ barhiṣyḙṣu nidhiṣṷ priyeṣṷ | ta ā ga̭mantu ta iha śrṷvantvadhi̭ bruvantu te a̭vantvasmān ||, agni̭ṣvāttāḥ pitara eha ga̭cchata sadaḥ̭ sada-ssadata supraṇītayaḥ | attā havīgṃṣi praya̭tāni barhiṣyathā̭ rayigṃ sarva̭vīra-ndadhātana || || agniṣvāttānṛ̭tumato̭ havāmahe | narāśagṃsḙ somapīthaṃ-ya~ āśuḥ | te no arva̭nta-ssuhavā̭ bhavantu | śa-nno̭ bhavantu dvipade śa-ñcatṷṣpade || ye a̭gniṣvāttā ye-'na̭gniṣvāttāḥ || 75 ||
agṃhomucaḥ̭ pitaraḥ̭ somyāsaḥ̭ | pare-'va̭re-'mṛtā̭so bhava̭ntaḥ | adhi̭bruvantu te a̭vantvasmān || vānyā̭yai dugdhe juṣamā̭ṇāḥ karambham | udīrā̭ṇā ava̭re parḙ ca | agniṣvāttā ṛtubhiḥ̭ saṃvi~dānāḥ | indra̭vanto havirida-ñjṷṣantām || yada̭gne kavyavāhana pitṝn yakṣyṛ̭tāvṛdhaḥ̭ | pra ca̭ havyāni̭ vakṣyasi devebhya̭śca pitṛbhya ā ||, tvama̭gna īḍito jā̭tavedo-'vāḍḍhavyāni̭ surabhīṇi̭ kṛtvā | prādāḥ pitṛbhyaḥ̭ svadhayā te a̭kṣannaddhi tva-ndḙva praya̭tā havīgṃṣi̭ | | māta̭lī kavyairyamo aṅgi̭robhi rbṛhaspatir-ṛkva̭bhi rvāvṛdhānaḥ | yāgśca̭ devā vā̭vṛdhurye ca̭ devān-thsvāhā-'nye svadhayā-'nye ma̭danti || || ye tā̭tṛpurdḙvatrā jeha̭mānāḥ | hotrāvṛdha-sstoma̭taṣṭāso arkaiḥ | ā-'gnḙ yāhi suvidatrḙbhirarvām | satyaiḥ kavyaiḥ pitṛbhi̭-rgharmasadbhiḥ̭ || havyavāha̭majara̭-mpurupriyam | agni-ṅghṛtena̭ haviṣā̭ saparyann | upā̭sada-ṅkavyavāha̭-mpitṛṇām | sa naḥ̭ prajāṃ-vī~rava̭tīgṃ samṛ̭ṇvatu || 76 ||

(ana̭gniṣvāttā - jeha̭mānā-ssapta ca̭) (a. 16)
anuvākaṃ 17 - aindro paśau ekādaśa prayājāḥ

hotā̭ yakṣadiḍaspade | samidhāna-mmahadyaśaḥ̭ | suṣa̭middhaṃ-va~reṇyam | agnimindraṃ̭-va~yodhasam | gāyatrī-ñchanda̭ indriyam | tryavi-ṅgāṃ-va~yo dadha̭t | vetvājya̭sya hotaryaja̭ || hotā̭ yakṣacchuci̭vratam | tanūnapā̭tamudbhidam | ya-ṅgarbhamadi̭tirdadhe || 77 ||
śucimindraṃ̭-va~yodhasam | uṣṇiha-ñchanda̭ indriyam | dityavāha-ṅgāṃ-va~yo dadha̭t | vetvājya̭sya hotaryaja̭ || hotā̭ yakṣadīḍenyam | īḍitaṃ-vṛ~̭trahanta̭mam | iḍā̭bhirīḍyagṃ sahaḥ̭ | somamindraṃ̭-va~yodhasam | anuṣṭubha-ñchanda̭ indriyam | trivathsa-ṅgāṃ-va~yo dadha̭t || 78 ||
vetvājya̭sya hotaryaja̭ || hotā̭ yakṣa-thsubarhiṣadam | pūṣaṇvanta-mama̭rtyam | sīda̭nta-mbarhiṣi̭ priye | amṛtendraṃ̭-va~yodhasam | bṛhatī-ñchanda̭ indriyam | pañcā̭vi-ṅgāṃ-va~yo dadha̭t | vetvājya̭sya hotaryaja̭ || hotā̭ yakṣa-dvyaca̭svatīḥ | suprāyaṇā ṛ̭tāvṛdhaḥ̭ || 79 ||
dvāro̭ devīrhi̭raṇyayīḥ | brahmāṇa indraṃ̭-va~yodhasam | paṅkti-ñchanda̭ ihendriyam | turyavāha-ṅgāṃ-va~yo dadha̭t | vetvājya̭sya hotaryaja̭ || hotā̭ yakṣa-thsupeśa̭se | suśilpe bṛ̭hatī ubhe | naktoṣāsā na da̭rśate | viśvamindraṃ̭-va~yodhasam | triṣṭubha-ñchanda̭ indriyam || 80 ||
paṣṭhavāha-ṅgāṃ-va~yo dadha̭t | vetvājya̭sya hotaryaja̭ || hotā̭ yakṣa-tpracḙtasā | devānā̭muttamaṃ-ya~śaḥ̭ | hotā̭rā daivyā̭ kavī | sayujendraṃ̭-va~yodhasam | jaga̭tī-ñchanda̭ ihendriyam | anaḍvāha-ṅgāṃ-va~yo dadha̭t | vetvājya̭sya hotaryaja̭ || hotā̭ yakṣa-tpeśa̭svatīḥ || 81 ||
tisro devīrhi̭raṇyayīḥ | bhāra̭tī-rbṛhatīrmahīḥ | patimindraṃ̭-va~yodhasam | virāja-ñchanda̭ ihendriyam | dhenu-ṅgā-nna vayo dadha̭t | vetvājya̭sya hotaryaja̭ || hotā̭ yakṣa-thsureta̭sam | tvaṣṭā̭ra-mpuṣṭivardha̭nam | rūpāṇi bibhra̭ta-mpṛtha̭k | puṣṭimindraṃ̭-va~yodhasam || 82 ||
dvipada-ñchanda̭ ihendriyam | ukṣāṇa-ṅgā-nna vayo dadha̭t | vetvājya̭sya hotaryaja̭ || hotā̭ yakṣacchatakra̭tum | hira̭ṇyaparṇa-mukthinam | raśanā-mbibhra̭taṃ-va~śim | bhagamindraṃ̭-va~yodhasam | kakubha-ñchanda̭ ihendriyam | vaśāṃ-ve~hata-ṅgā-nna vayo dadha̭t | vetvājya̭sya hotaryaja̭ || hotā̭ yakṣa-thsvāhā̭kṛtīḥ | agni-ṅgṛhapa̭ti-mpṛtha̭k | varṷṇa-mbheṣaja-ṅkavim | kṣatramindraṃ̭-va~yodhasam | ati̭cchandasa-ñchanda̭ indriyam | bṛhadṛ̭ṣabha-ṅgāṃ-va~yo dadha̭t | vetvājya̭sya hotaryaja̭ || 83 ||

(dadhe - dadha̭-d- ṛtāvṛdha̭ - indriyaṃ - peśa̭svatī--r vayodhasaṃ - ~vetvājya̭sya hotaryaja̭ sapta ca̭) (a. 17)
iḍaspade-'gni-ṅgā̭yatrī-ntryavim | śuci̭vratagṃ śuci̭muṣṇiha̭-ndityavāham | īḍenyagṃ soma̭-manaṣṭubha̭-ntrivathsam | subaraḥiṣada̭mamṛtendra̭-mbṛhatī-mpañcā̭vim | vyaca̭svatī-ssuprāyaṇā dvāro brāhmāṇaḥ̭ pāṅktimiha tṷryavāham | supeśa̭se viśvamindra̭-ntriṣṭubha̭-mpaṣṭhavāham | pracḙtasā sayujendra-ñjaga̭tīmihānaḍvāham | peśa̭svatīstistro bhāra̭tīḥ patiṃ̭-vi~rāja̭miha dhenu-nna | sureta̭sa-ntvaṣṭā̭ra-mpuṣṭi̭-ndvipada̭mihokṣāṇa-nna | śatakra̭tu-mbhagamindra̭-ṅkakubha̭miha vaśāṃ-ve~hata-ṅgā-nna | svāhā̭kṛtīḥ, kṣatramati̭cchandasa-mbṛhadṛ̭ṣabha-ṅgāṃ-va~yaḥ̭ | indriyamuṣi̭vasunava̭daśehendriyamaṣṭa̭ nava daśa gā-nna vayo dadha-thsarva̭vetu |
anuvākaṃ 18 - aindro paśau prayājayājyāḥ

sami̭ddho agni-ssamidhā | suṣa̭middho vareṇyaḥ | gāyatrī chanda̭ indriyam | tryavirgaurvayo̭ dadhuḥ || tanūnapā-cchuci̭vrataḥ | tanūnapācca (tanūpācca) sara̭svatī | uṣṇikchanda̭ indriyam | dityavāḍgaurvayo̭ dadhuḥ || iḍā̭bhiragnirīḍyaḥ̭ | somo̭ devo ama̭rtyaḥ || 84 ||
anuṣṭupchanda̭ indriyam | trivathso gaurvayo̭ dadhuḥ || subarhiragniḥ pṷ̄ṣaṇvān | stīrṇa-ba̭rhirama̭rtyaḥ | bṛhatī chanda̭ indriyam | pañcā̭vi-rgaurvayo̭ dadhuḥ || duro̭ devīrdiśo̭ mahīḥ | brahmā devo bṛhaspatiḥ̭ | paṅkti-śchanda̭ ihendriyam | turyavāḍ gaurvayo̭ dadhuḥ || 85 ||
uṣe yahvī supeśa̭sā | viśvḙ devā ama̭rtyāḥ | triṣṭu-pchanda̭ indriyam | paṣṭhavādgaurvayo̭ dadhuḥ || daivyā̭ hotārā bhiṣajā | indrḙṇa sayujā̭ yujā | jaga̭tī chanda̭ ihendriyam | anaḍvān-gaurvayo̭ dadhuḥ || tisra iḍā sara̭svatī | bhāra̭tī maruto viśaḥ̭ || 86 ||
virāṭchanda̭ ihendriyam | dhenurgaurna vayo̭ dadhuḥ || tvaṣṭā̭ turīpo adbhṷtaḥ | indrāgnī pṷṣṭivardha̭nā | dvipācchanda̭ ihendriyam | ukṣā gaurna vayo̭ dadhuḥ || śamitā no vanaspatiḥ̭ | savitā pra̭suvanbhagam | kakucchanda̭ ihendriyam | vaśā vehadgaurna vayo̭ dadhuḥ || svāhā̭ yajñaṃ-va~rṷṇaḥ | sukṣatro bhḙṣaja-ṅka̭rat | atiḥ̭ chandā-śchanda̭ indriyam | bṛhadṛ̭ṣabho gaurvayo̭ dadhuḥ || 87 ||

(ama̭rtya - sturyavāḍgaurvayo̭ dadhu--r viśo̭ - vaśā vehadgaurna vayo̭ dadhuścatvāri̭ ca) (a. 18)
anuvākaṃ 19 - aindro paśau vapādīnāṃ-ya~jyānuvākyāḥ

vasantenartunā̭ devāḥ | vasa̭vastrivṛtā stutam | rathantareṇa teja̭sā | havirindre vayo̭ dadhuḥ || grīṣmeṇa̭ devā ṛtunā | rudrāḥ pa̭ñcadaśe stutam | bṛhatā yaśa̭sā balam | havirindre vayo̭ dadhuḥ || vara.ṣābhi̭r-ṛtunā̭-''dityāḥ | stomḙ saptadaśe stutam || 88 ||
vairūpeṇa̭ viśauja̭sā | havirindre vayo̭ dadhuḥ || śāradenartunā̭ devāḥ | ekavigṃśa ṛbhavaḥ̭ stutam | vairājena̭ śriyā śriyam | havirindre vayo̭ dadhuḥ || hemantenartunā̭ devāḥ | maruta̭striṇave stutam | balḙna śakva̭rī-ssahaḥ̭ | havirindre vayo̭ dadhuḥ || śaiśireṇartunā̭ devāḥ | trayastrigṃśḙ 'mṛtagg̭ stutam | satyena̭ revatīḥ, kṣatram | havirindre vayo̭ dadhuḥ || 89 ||

(stomḙ saptadaśe stutagṃ - saho̭ havirindre vayo̭ dadhuścatvāri̭ ca) (a. 19)
(vasantena̭ grīṣmeṇa̭ varṣābhiḥ̭ śāradena̭ hemantena̭ śaiśireṇa ṣaṭ )
anuvākaṃ 20 - aindro paśau anūyājānā-mmaitrāvariṇapraiṣāḥ

deva-mbarhirindraṃ̭-va~yodhasam | deva-ndevama̭vardhayat | gāyatriyā chanda̭sendriyam | teja indre vayo dadha̭t | vasuvanḙ vasudheya̭sya vetu yaja̭ || devīrdvāro̭ devamindraṃ̭-va~yodhasam | devīrdeva-ma̭vardhayann | uṣṇihā chanda̭sendriyam | prāṇamindre vayo dadha̭t | vasuvanḙ vasudheya̭sya viyantu yaja̭ || 90 ||
devī devaṃ-va~̭yodhasam | uṣe indra̭mavardhatām | anuṣṭubhā chanda̭sendriyam | vācamindre vayo dadha̭t | vasuvanḙ vasudheya̭sya vītāṃ-ya~ja̭ || devī joṣṭrī̭ devamindraṃ̭-va~yodhasam | devī devama̭vardhatām | bṛhatyā chanda̭sendriyam | śrotramindre vayo dadha̭t | vasuvanḙ vasudheya̭sya vītāṃ-ya~ja̭ || 91 ||
devī ūrjāhṷtī devamindraṃ̭-va~yodhasam | devī devama̭vardhatām | paṅktyā chanda̭sendriyam | śukramindre vayo dadha̭t | vasuvanḙ vasudheya̭sya vītāṃ-ya~ja̭ || devā daivyā hotā̭rā devamindraṃ̭-va~yodhasam | devā devama̭vardhatām | triṣṭubhā chanda̭sendriyam | tviṣimindre vayo dadha̭t | vasuvanḙ vasudheya̭sya vītāṃ-ya~ja̭ || 92 ||
devī-stisra-stisro devīrva̭yodhasam | patimindra̭-mavardhayann | jaga̭tyā chanda̭sendriyam | balamindre vayo dadha̭t | vasuvanḙ vasudheya̭sya viyantu yaja̭ || devo narāśagṃso̭ devamindraṃ̭-va~yodhasam | devo devama̭vardhayat | virājā chanda̭sendriyam | reta indre vayo dadha̭t | vasuvanḙ vasudheya̭sya vetu yaja̭ || 93 ||
devo vanaspati̭-rdevamindraṃ̭-va~yodhasam | devo devama̭vardhayat | dvipadā chanda̭sendriyam | bhagamindre vayo dadha̭t | vasuvanḙ vasudheya̭sya vetu yaja̭ || deva-mbarhirvāri̭tīnā-ndevamindraṃ̭-va~yodhasam | devo (devaṃ) devama̭vardhayat | kakubhā chanda̭sendriyam | yaśa indre vayo dadha̭t | vasuvanḙ vasudheya̭sya vetu yaja̭ || devo agni-ssvi̭ṣṭakṛ-ddevamindraṃ̭-va~yodhasam | devo devama̭vardhayat | ati̭cchandasā chanda̭sendriyam | kṣatramindre vayo dadha̭t | vasuvanḙ vasudheya̭sya vetu yaja̭ || 94 ||