4.7 - agnāviṣṇū sajoṣasemā vardhantu - kṛṣṇa yajurveda taittirīya saṃhitā pāṭhaḥ

kṛṣṇa yajurvedīya taittirīya saṃhitāyā-ñcaturthakāṇḍe saptamaḥ praśnaḥ - vasordhārādiśiṣṭa saṃskārābhidhānaṃ
o-nnamaḥ paramātmane, śrī mahāgaṇapataye namaḥ,
śrī gurubhyo namaḥ | hariḥ om ||
agnā̭viṣṇū sajoṣa̭semā va̭rdhantu vā-ṅgiraḥ̭ | dyunaiṃrvājḙbhirā ga̭tam || vāja̭śca me prasavaśca̭ me praya̭tiśca me prasi̭tiśca me dhītiśca̭ me kratṷśca me svara̭śca me śloka̭śca me śrāvaśca̭ me śruti̭śca me jyoti̭śca me suva̭śca me prāṇaśca̭ me 'pāna- [prāṇaśca̭ me 'pānaḥ, ca me vyānaśca me 'sṷśca me] 1
-śca̭ me vyānaśca me 'sṷśca me citta-ñca̭ ma ādhī̭ta-ñca me vākca̭ me mana̭śca me cakṣṷśca me śrotra̭-ñca me dakṣa̭śca me bala̭-ñca ma oja̭śca me saha̭śca ma āyṷśca me jarā ca̭ ma ātmā ca̭ me tanūśca̭ me śarma̭ ca me varma̭ ca me 'ṅgā̭ni ca me 'sthāni̭ ca me parūgṃ̭ṣi ca me śarī̭rāṇi ca me || 2 ||

(apāna - stanūśca̭ me - 'ṣṭāda̭śa ca) (a. 1)
jyaiṣṭhya̭-ñca ma ādhi̭patya-ñca me manyuśca̭ me bhāma̭śca me-'ma̭śca me 'bhaṃ̭śca me jemā ca̭ me mahimā ca̭ me varimā ca̭ me prathimā ca̭ me varṣmā ca̭ me drāghuyā ca̭ me vṛddha-ñca̭ me vṛddhi̭śca me satya-ñca̭ me śraddhā ca̭ me jaga̭cca [ ] 3
-me dhana̭-ñca me vaśa̭śca me tviṣi̭śca me krīḍā ca̭ me moda̭śca me jāta-ñca̭ me janiṣyamā̭ṇa-ñca me sūkta-ñca̭ me sukṛta-ñca̭ me vitta-ñca̭ me vedya̭-ñca me bhūtañca̭ me bhaviṣyacca̭ me suga-ñca̭ me supatha̭-ñca ma ṛddha-ñca̭ ma ṛddhi̭ śca me kḷpta-ñca̭ me kḷpti̭śca me matiśca̭ me sumatiśca̭ me || 4 ||

(jagacca - rdhi - ścatṷrdaśa ca) (a. 2)
śa-ñca̭ me maya̭śca me priya-ñca̭ me 'nukāmaśca̭ me kāma̭śca me saumanasaśca̭ me bhadra-ñca̭ me śreya̭śca me vasya̭śca me yaśa̭śca me bhaga̭śca me dravi̭ṇa-ñca me yantā ca̭ me dhartā ca̭ mekṣema̭śca me dhṛti̭śca me viśva̭-ñca [ ] 5
me maha̭śca me saṃvi~cca̭ me jñātra̭-ñca me sūśca̭ me prasūśca̭ me sīra̭-ñca me layaśca̭ ma ṛta-ñca̭ me 'mṛta̭-ñca me-'yakṣma-ñca me 'nā̭mayacca me jīvātṷśca me dīrghāyutva-ñca̭ me 'namitra-ñca me 'bha̭ya-ñca me suga-ñca̭ me śaya̭na-ñca me sūṣā ca̭ me sudina̭-ñca me || 6 ||

( viśva̭-ñca - śaya̭na - maṣṭau ca̭ ) (a. 3)
ūrkca̭ me sūnṛtā̭ ca me paya̭śca me rasa̭śca me ghṛta-ñca̭ me madhṷ ca me sagdhi̭śca me sapī̭tiśca me kṛṣiśca̭ me vṛṣṭi̭śca me jaitra̭-ñca ma audbhi̭dya-ñca me rayiśca̭ me rāya̭śca me puṣṭa-ñca̭ me puṣṭi̭śca me vibhu ca̭ [vibhu ca̭, me prabhu ca̭ me] 7
me prabhu ca̭ me bahu ca̭ me bhūya̭śca me pūrṇa-ñca̭ me pūrṇata̭ra-ñca me 'kṣi̭tiśca me kūya̭vāśca me-'nna̭-ñca me 'kṣṷcca me vrīhaya̭śca me yavāśca me māṣāśca me tilāśca me mudgāśca̭ me khalvāśca me godhūmāśca me masurā- -śca me priyaṅga̭vaśca me 'ṇa̭vaśca me śyāmākāśca me nīvārāśca me || 8 ||

(vibhu ca̭ - masurā - ścatṷrdaśa ca) (a. 4)
aśmā̭ ca me mṛtti̭kā ca me giraya̭śca me parva̭tāśca me sika̭tāśca me vanaspata̭yaśca me hira̭ṇya-ñca me 'ya̭śca me sīsa̭-ñca me trapṷśca me śyāma-ñca̭ me loha-ñca̭ me-'gniśca̭ ma āpa̭śca mevīrudha̭śca ma oṣa̭dhayaśca me kṛṣṭapacya-ñca̭ [kṛṣṭapacya-ñca̭, me 'kṛṣṭapacya-ñca̭ me] 9
me 'kṛṣṭapacya-ñca̭ me grmāyāśca̭ me paśava̭ āraṇyāśca̭ yajñena̭ kalpantāṃ ~vitta-ñca̭ me vitti̭śca me bhūta-ñca̭ me bhūti̭śca me vasṷ ca me vasatiśca̭ me karma̭ ca me śakti̭śca me-'rtha̭śca ma ema̭śca ma iti̭śca me gati̭śca me || 10

(kṛṣṭapacya-ñcā - 'ṣṭāca̭tvārigṃśacca) (a. 5)
agniśca̭ ma indra̭śca me soma̭śca ma indra̭śca me savitā ca̭ ma indra̭śca me sara̭svatī ca ma indra̭śca me pūṣā ca̭ ma indra̭śca me bṛhaspati̭śca ma indra̭śca me mitraśca̭ ma indra̭śca me varṷṇaśca ma indra̭śca me tvaṣṭā̭ ca - [ ] 11
ma indra̭śca me dhātā ca̭ ma indra̭śca me viṣṇṷśca ma indra̭śca me 'śvinaṷ ca ma indra̭śca me maruta̭śca ma indra̭śca me viśvḙ ca me devā indra̭śca me pṛthivī ca̭ ma indra̭śca me-'ntari̭kṣa-ñca ma indra̭śca me dyauśca̭ ma indra̭śca me diśa̭śca ma indra̭śca me mūrdhā ca̭ ma indra̭śca me prajāpa̭tiśca ma indra̭śca me || 12 ||

(tvaṣṭā̭ ca - dyauśca̭ ma - eka̭vigṃśatiśca) (a. 6)
agṃśuśca̭ me raśmiśca me 'dābhyaśca me-'dhi̭patiśca ma upāgṃśuśca̭ me 'ntaryāmaśca̭ ma aindravāyavaśca̭ me maitrāvaruṇaśca̭ ma āśvinaśca̭ me pratiprasthāna̭śca me śukraśca̭ me manthī ca̭ ma āgrayaṇaśca̭ me vaiśvadevaśca̭ me dhruvaśca̭ me vaiśvānaraśca̭ ma ṛtugrahāśca̭ [ṛtugrahāśca̭, me 'tigrāhyāśca ma] 13
me 'tigrāhyāśca ma aindrāgnaśca̭ me vaiśvadevaśca̭ me marutvatīyāśca me māhendraśca̭ ma ādityaśca̭ me sāvitraśca̭ me sārasvataśca̭ me pauṣṇaśca̭ me pātnīvataśca̭ me hāriyojanaśca̭ me || 14 ||

(ṛtugrahāśca - catṷstrigṃśacca ) (a. 7)
iddhmaśca̭ me barhiśca̭ me vedi̭śca me dhiṣṇi̭yāśca me sruca̭śca me camasāśca̭ me grāvā̭ṇaśca me svara̭vaśca ma uparavāśca̭ me 'dhiṣava̭ṇe ca me droṇakalaśaśca̭ me vāyavyā̭ni ca me pūtabhṛcca̭ ma ādhavanīya̭śca ma āgnīddhra-ñca me havirdhāna̭-ñca me gṛhāśca̭ me sada̭śca me puroḍāśāśca me pacatāśca̭ me-'vabhṛthaśca̭ me svagākāraśca̭ me || 15 ||

(gṛhāśca - ṣoḍa̭śa ca) (a. 8)
agniśca̭ me gharmaśca̭ me-'rkaśca̭ me sūrya̭śca me prāṇaśca̭ me 'śvamedhaśca̭ me pṛthivī ca me 'di̭tiśca me diti̭śca me dyauśca̭ me śakva̭rīraṅgula̭yo diśa̭śca me yajñena̭ kalpantā- mṛkca̭ me sāma̭ ca me stoma̭śca me yajṷśca me dīkṣā ca̭ me tapa̭śca ma ṛtuśca̭ me vrata-ñca̭ me 'horātrayo rvṛṣṭyā bṛ̭hadrathantare ca̭ me yajñena̭ kalpetām || 16 ||

(dīkṣā-' - ṣṭāda̭śa ca ) (a. 9)
garbhāśca me vathsāśca̭ me tryavi̭śca me tryavī ca̭ me dityavāṭ ca̭ me dityauhī ca̭ me pañcā̭viśca me pañcāvī ca̭ me trivathsaśca̭ me trivathsā ca̭ me turyavāṭ ca̭ me turyauhī ca̭ me paṣṭhavācca̭ me paṣṭhauhī ca̭ ma ukṣā ca̭ me vaśā ca̭ ma ṛṣabhaśca̭- [vaśā ca̭ ma ṛṣabhaśca̭, me vehacca̭ me] 17
me vehacca̭ me 'naḍvān ca̭ me dhenuśca̭ ma āyṷryajñena̭ kalpatā-mprāṇo yajñena̭ kalpatā-mapāno yajñena̭ kalpatāṃ-vyā~no yajñena̭ kalpatā-ñcakṣṷ-ryajñena̭ kalpatāg śrotraṃ̭-ya~jñena̭ kalpatā-mmano̭ yajñena̭ kalpatāṃ ~vāg yajñena̭ kalpatā-mātmā yajñena̭ kalpatāṃ-ya~jño yajñena̭ kalpatām || 18 ||

(ṛṣabhaśca̭ - catvārigṃśacca̭) (a. 10)
ekā̭ ca me tisraśca̭ me pañca̭ ca me sapta ca̭ me nava̭ ca ma ekā̭daśa ca me trayo̭daśa ca me pañca̭daśa ca me saptada̭śa ca me nava̭daśa ca ma eka̭vigṃśatiśca me trayo̭vigṃśatiśca me pañca̭vigṃśatiśca me saptavigṃ̭śatiśca me nava̭vigṃśatiśca ma eka̭trigṃśacca me traya̭strigṃśacca [ ] 19
me cata̭sraśca me 'ṣṭau ca̭ me dvāda̭śa ca me ṣoḍa̭śa ca me vigṃśatiśca̭ me catṷrvigṃśatiśca me 'ṣṭāvigṃ̭śatiśca me dvātrigṃ̭śacca me ṣaṭ-trigṃ̭śacca me catvārigṃśacca̭ me catṷścatvārigṃśacca me 'ṣṭāca̭tvārigṃśacca me vāja̭śca prasavaścā̭-pijaśca kratṷśca suva̭śca mūrdhā ca vyaśñi̭yaścā- -ntyāyanaścā- ntya̭śca bhauvanaśca bhuva̭naścā-dhi̭patiśca || 20 ||

(traya̭strigṃśacca - vyaśñi̭ya - ekā̭daśa ca ) (a. 11)
vājo̭ na-ssapta pradiśaścata̭sro vā parāvataḥ̭ | vājo̭ no viśvairdevai-rdhana̭sātāvihāva̭tu || viśvḙ adya maruto viśva̭ ūtī viśvḙ bhavantvagnaya-ssami̭ddhāḥ | viśvḙ no devā avasā-'' ga̭mantu viśva̭mastu dravi̭ṇaṃ-vā~jo̭ asme || vāja̭sya prasava-ndḙvā rathairyātā hiraṇyayaiḥ | agnirindro bṛhaspati̭rmaruta-ssoma̭pītaye || vājḙvāje 'vata vājino no dhanḙṣu [no dhanḙṣu, viprā amṛtā ṛtajñāḥ |] 21
viprā amṛtā ṛtajñāḥ | asya maddhvaḥ̭ pibata mādaya̭ddhva-ntṛptā yā̭ta pathibhi̭rdevayānaiḥ || vājaḥ̭ purastā̭duta ma̭ddhyato no vājo̭ devāgṃ ṛtubhiḥ̭ kalpayāti | vāja̭sya hi pra̭savo nanna̭mīti viśvā āśā vāja̭patirbhaveyam || payaḥ̭ pṛthivyā-mpaya oṣa̭dhīṣu payo̭ divya̭ntari̭kṣe payo̭ dhām | paya̭svatīḥ pradiśaḥ̭ santu mahyam || sa-mmā̭ sṛjāmi paya̭sā ghṛtena sa-mmā̭ sṛjāmyapa [sa-mmā̭ sṛjāmyapaḥ, oṣa̭dhībhiḥ |] 22
oṣa̭dhībhiḥ | so̭-'haṃ-vā~jagṃ̭ saneyamagne || naktoṣāsā sama̭nasā virṷ̄pe dhāpayḙte śiśumekagṃ̭ samīcī | dyāvā kṣāmā̭ rukmo antarvi bhā̭ti devā agni-ndhā̭raya-ndraviṇodāḥ || samudro̭-'si nabha̭svānārdradā̭nu-śśabhūṃrma̭yobhūrabhi mā̭ vāhi svāhā̭ māruto̭-'si marutā-ṅgaṇa-śśabhūṃrma̭yobhūrabhi mā̭ vāhi svāhā̭ 'vasyura̭si duva̭svāñchabhūṃrma̭yobhūrabhi mā̭ vāhi svāhā || 23 ||
(dhane - ṣvapo - duva̭svāñchabhūṃrma̭yobhūrabha mā -dve ca̭ ) (a. 12)
agniṃ-yu~̭najmi śava̭sā ghṛtena̭ divyagṃ sṷparṇaṃ-va~ya̭sā bṛhantam | tena̭ vaya-mpa̭tema braddhnasya̭ viṣṭapagṃ suvo ruhā̭ṇā adhi nāka̭ uttame || imau tḙ pakṣāvajaraṷ patatriṇo yābhyāgṃ rakṣāg̭-syapahagg-sya̭gne | tābhyā-mpatema sukṛtā̭mu lokaṃ-ya~trarṣa̭yaḥ prathamajā ye pṷrāṇāḥ || cida̭si samudrayo̭nirindurdakṣaḥ̭ śyena ṛtāvā | hira̭ṇyapakṣa-śśakuno bhṷraṇyu-rmahān-thsadhasthe dhruva [dhruvaḥ, ā niṣa̭ttaḥ |] 24
ā niṣa̭ttaḥ || nama̭ste astu mā mā̭ higṃsīrviśva̭sya mūrdhannadhi̭ tiṣṭhasi śritaḥ | samudre te hṛda̭ya-mantarāyu-rdyāvā̭pṛthivī bhuva̭neṣvarpi̭te || udno da̭ttodadhi-mbhi̭ntta divaḥ parjanyā̭dantari̭kṣā-tpṛthivyāstato̭ no vṛṣṭyā̭vata | divo mūrdhā-'si̭ pṛthivyā nābhirūrgapāmoṣa̭dhīnām | viśvāyu-śśarma̭ saprathā nama̭spathe || yenarṣa̭yastapa̭sā satra- [satram, āsatendhā̭nā] 25
-māsatendhā̭nā agnigṃ suva̭rābhara̭ntaḥ | tasmi̭nnaha-nni da̭dhe nākḙ agnimetaṃ-ya~māhurmana̭va stīrṇaba̭rhiṣam || ta-mpatnī̭bhiranṷ gacchema devāḥ putrairbhrātṛ̭bhiruta vā hira̭ṇyaiḥ | nāka̭-ṅgṛhṇānā-ssṷkṛtasya̭ loke tṛtīyḙ pṛṣṭhe adhi̭ rocane divaḥ || ā vāco maddhya̭-maruha-dbhuraṇyuraya-magni-ssatpa̭tiśceki̭tānaḥ | pṛṣṭhe pṛ̭thivyā nihi̭to davi̭dyuta-dadhaspada-ṅkṛ̭ṇute [-dadhaspada-ṅkṛ̭ṇute, ye pṛ̭tanyavaḥ̭ |] 26
ye pṛ̭tanyavaḥ̭ || ayamagnirvīrata̭mo vayodhā-ssa̭hasriyo̭ dīpyatāmapra̭yucchann | vibhrāja̭māna-ssarirasya maddhya upa pra yā̭ta divyāni dhāma̭ || sa-mpra cya̭vaddhvamanu sa-mpra yātāgnḙ patho dḙvayānān kṛṇuddhvam | asmin-thsadhasthe addhyutta̭rasmin viśvḙ devā yaja̭mānaśca sīdata || yenā̭ sahasraṃ-va~ha̭si yenāgne sarvavedasam | tenemaṃ-ya~jña-nno̭ vaha devayāno ya [devayāno yaḥ, uttamaḥ |] 27
ṷttamaḥ || u-dbṷddhyasvāgne prati̭ jāgṛhyena miṣṭāpūrte sagṃ sṛ̭jethāmaya-ñca̭ | punaḥ̭ kṛṇvaggstvā̭ pitaraṃ-yu~vā̭na-manvātāgṃ̭sī-ttvayi tantṷmetam || aya-nte yoni̭r-ṛtviyo yato̭ jāto aro̭cathāḥ | ta-ñjānanna̭gna ā rohāthā̭ no vardhayā rayim || 28 ||
(dhruvaḥ - satraṃ - kṛ̭ṇute - yaḥ - saptatrigṃ̭śacca ) (a. 13)
mamāgne varco̭ vihaveṣva̭stu vaya-ntvendhā̭nā stanuva̭-mpuṣema | mahya̭-nnamantā-mpradiśaścata̭sra stvayā-'ddhya̭kṣeṇa pṛta̭nā jayema || mama̭ devā vi̭have sa̭ntu sarva indrā̭vanto maruto viṣṇṷragniḥ | mamāntari̭kṣa muru gopama̭stu mahyaṃ-vā~taḥ̭ pavatā-ṅkāmḙ asminn || mayi̭ devā dravi̭ṇa māya̭jantā-mmayyā śīra̭stu mayi̭ devahṷ̄tiḥ | daivyā hotā̭rā vaniṣanta [vaniṣanta, pūrve 'ri̭ṣṭā-ssyāma] 29
pūrve 'ri̭ṣṭā-ssyāma tanuvā̭ suvīrāḥ || mahyaṃ̭-ya~jantu mama yāni̭ havyā-''kṷ̄ti-ssatyā mana̭so me astu | eno mānigā-ṅkatamaccanāhaṃ-vi~śvḙ devāso adhi̭voca tā me || devī-ṣṣaḍurvīruruṇaḥ̭ kṛṇota viśvḙ devā sa iha vī̭rayaddhvam | māhāsmahi prajayā mā tanūbhirmā ra̭dhāma dviṣate so̭ma rājann || agnirmanyu-mpra̭tinuda-npurastā- [pra̭tinuda-npurastāt, ada̭bdho gopāḥ] 30
-dada̭bdho gopāḥ pari̭pāhi nastvam | pratyañco̭ yantu nigutaḥ punastḙ 'maiṣā-ñcitta-mprabudhā vinḙśat || dhātā dhā̭tṛṇā-mbhuva̭nasya yaspati̭ rdevagṃ sa̭vitāra̭mabhi mātiṣāham | imaṃ-ya~jña maśvinobhā bṛhaspati̭ rdevāḥ pāntu yaja̭māna-nnyarthāt || uruvyacā̭ no mahiṣa-śśarma̭ yagṃ sadasmin. havḙ puruhūtaḥ pṷrukṣu | sa naḥ̭ prajāyai̭ haryaśva mṛḍayendra mā [mṛḍayendra mā, no rīriṣo mā parā̭ dāḥ |] 31
no̭ rīriṣo mā parā̭ dāḥ || ye naḥ̭ sapatnā apate bha̭vantvindrā-gnibhyāmava̭ bādhāmahe tān | vasa̭vo rudrā ā̭dityā ṷpari spṛśa̭-mmogra-ñcettā̭ramadhi rājama̭krann || arvāñca mindra̭mamuto̭ havāmahe yo goji-ddha̭na-jida̭śva-jidyaḥ | imanno̭ yajñaṃ-vi~̭have jṷṣasvāsya kṷrmo harivo medina̭-ntvā || 32 ||
(vaniṣanta - purastān - mā - trica̭tvārigṃśacca) (a. 14)
agnerma̭nve prathamasya pracḙtaso ya-mpāñca̭janya-mbahavaḥ̭ samindhate | viśva̭syāṃ-vi~śi pra̭viviśivāgṃ sa̭mīmahe sa no̭ muñcatvagṃ ha̭saḥ || yasyeda-mprāṇanni̭miṣa-dyadeja̭ti yasya̭ jāta-ñjana̭māna-ñca keva̭lam | staumyagni-nnā̭thito jo̭havīmi sa no̭ muñcatvagṃ ha̭saḥ || indra̭sya manye prathamasya pracḙtaso vṛtraghna-sstomā upa māmupāguḥ̭ | yo dāśuṣaḥ̭ sukṛto havamupa gantā [gantā, sa no̭ muñcatvagṃ ha̭saḥ |] 33
sa no̭ muñcatvagṃ ha̭saḥ || ya-ssa̭ṅgrāma-nnaya̭ti saṃ-va~śī yudhe yaḥ puṣṭāni̭ sagṃsṛjati̭ trayāṇi̭ | staumīndra̭-nnāthito jo̭havīmi sa no̭ muñcatvagṃ ha̭saḥ || manve vā-mmitrā varuṇā tasya̭ vittagṃ satyaṷjasā dṛgṃhaṇā ya-nnudethe | yā rājā̭nagṃ sarathaṃ̭-yā~tha ṷgrā tā no̭ muñcatamāga̭saḥ || yo vāgṃ ratha̭ ṛjura̭śmi-ssatyadha̭rmā mithu ścara̭nta-mupayāti̭ dūṣayanṋ | staumi̭ [ ] 34
mitrāvarṷṇā nāthito jo̭havīmi tau no̭ muñcatamāga̭saḥ || vāyo-ssa̭vitu rvidathā̭ni manmahe yāvātmanva-dbi̭bhṛto yau ca rakṣa̭taḥ | yau viśva̭sya paribhū ba̭bhūvatustau no̭ muñcatamāga̭saḥ || upa śreṣṭhā̭na āśiṣo̭ devayordharmḙ asthirann | staumi̭ vāyugṃ sa̭vitāra̭-nnāthito jo̭havīmi tau no̭ muñcatamāga̭saḥ || rathīta̭mau rathīnāma̭hva ūtaye śubha-ṅgami̭ṣṭhau suyamḙbhiraśvaiḥ | yayo- [yayoḥ, vā-ndevau deveṣva-ni̭śita-] 35
-rvā-ndevau deveṣva-ni̭śita-mojastau no̭ muñcatamāga̭saḥ || yadayā̭taṃ-va~hatugṃ sūryāyā-stricakreṇa̭ sagṃ sada̭micchamā̭nau | staumi̭ devā vaśvinaṷ nāthito jo̭havīmi tau no̭ muñcatamāga̭saḥ || marutā-mmanve adhi̭no bruvantu premāṃ-vā~caṃ-vi~śvā̭ mavantu viśve | āśūn. hṷve suyamā̭nūtaye te no̭ muñcantvena̭saḥ || tigmamāyṷdhaṃ-vī~ḍitagṃ saha̭sva-ddivyagṃ śardhaḥ [śardhaḥ̭, pṛta̭nāsu jiṣṇu |] 36
pṛta̭nāsu jiṣṇu | staumi̭ devā-nmaruto̭ nāthito jo̭havīmi te no̭ muñcantvena̭saḥ || devānā-mmanve adhi̭ no bruvantu premāṃ-vā~caṃ-vi~śvā̭mavantu viśve | āśūn. hṷve suyamā̭nūtaye te no̭ muñcantvena̭saḥ || yadida-mmā̭-'bhiśoca̭ti paurṷṣeyeṇa daivyḙna | staumi viśvā-ndevā-nnā̭thito jo̭havīmi te no̭ muñcantvena̭saḥ || anṷno-'dyānṷmati ra- [anṷno-'dyānṷmati ranṷ, ida̭numate] 37
-nvida̭numate tvaṃ ~vaiśvānaro na̭ ūtyāpṛṣṭo divi> 4 || ye apra̭thetā-mami̭tebhi rojo̭bhi rye pra̭tiṣṭhe abha̭vatāṃ-va~sṷ̄nām | staumi dyāvā̭ pṛthivī nā̭thito jo̭havīmi te no̭ muñcatamagṃ ha̭saḥ || urvī̭ rodasī vari̭vaḥ kṛṇota-ṅkṣetra̭sya patnī adhi̭ no brūyātam | staumi dyāvā̭ pṛthivī nā̭thito jo̭havīmi te no̭ muñcatamagṃ ha̭saḥ || ya-ttḙ vaya-mpṷruṣatrā ya̭viṣṭhā vi̭dvāgṃsaścakṛmā kaccanā- [kaccana, āgaḥ̭ |] 38
-''gaḥ̭ | kṛdhī sva̭smāgṃ adi̭teranā̭gā vyenāgṃ̭si śiśratho viṣva̭gagne || yathā̭ ha ta-dva̭savo gaurya̭-ñci-tpadiṣitā mamṷñcatā yajatrāḥ | evā tvamasma-tpramṷñcā vyagṃhaḥ prātāryagne pratarānna āyuḥ̭ || 39 ||
(gantā̭ - dūṣayan-thstaumi - yayoḥ - śardho-' - nṷmatiranṷ - cana - catṷstrigṃśacca) (a. 15)
(agnerma̭nve - yasyeda- mindra̭sya - ya-ssa̭-ṅgrāmamindragṃ - sa no̭ muñcatvagṃ ha̭saḥ | manve vāntā no̭ muñcatamāga̭saḥ | yo vāṃ - vāyo- rupa̭ - rathīta̭mau - yadayā̭ta-maśvinau - tau no̭ muñcatamāga̭saḥ | marutān- tigmaṃ - maruto̭ - devānāṃ - ~yadidaṃ-vi~śvān - te no̭ muñcantvena̭saḥ | anṷ na - urvī - dyāvā̭pṛthivī - te no̭ muñcatamagṃha̭so yattai | caturagṃ ha̭sa-ṣṣāḍāga̭saścaturena̭so dviragṃha̭saḥ |)
(agnā̭viṣṇū - jyaiṣṭhayagṃ - śañco - rkcā - 'śmā̭ cā - gniścā- 'gṃśu - śceddhmaścā -'gniśca̭ gharmā - garbhā - ścaikā̭ ca - vājo̭ no - agniṃ-yu~̭najmi - mamā-'gne - agnerma̭nve - pañca̭daśa |)
(agnā̭viṣṇū - agniśca - vājo̭ no - ada̭bdho gopā - nava̭trigṃśat)
(agnā̭viṣṇū, pratarānna āyuḥ̭)
(yuñjāno - viṣṇo̭- rapāgṃ - raśmi - rnamo -'śma - agnā̭viṣṇū - sapta ) (7)
|| hariḥ̭ om ||
|| kṛṣṇa yajurvedīya taittirīya saṃhitāyā-ñcaturthakāṇḍe saptamaḥ praśna-ssamāptaḥ ||