5.1 - ಸಾವಿತ್ರಾಣಿ ಜುಹೋತಿ ಪ್ರಸೂತ್ಯೈ - ಕೃಷ್ಣ ಯಜುರ್ವೇದ ತೈತ್ತಿರೀಯ ಸಂಹಿತಾ ಪಾಠಃ

ಕೃಷ್ಣ ಯಜುರ್ವೇದೀಯ ತೈತ್ತಿರೀಯ ಸಂಹಿತಾಯಾ-ಮ್ಪಞ್ಚಮಕಾಣ್ಡೇ ಪ್ರಥಮಃ ಪ್ರಶ್ನಃ - ಉಖ್ಯಾಗ್ನಿಕಥನಂ
ಓ-ನ್ನಮಃ ಪರಮಾತ್ಮನೇ, ಶ್ರೀ ಮಹಾಗಣಪತಯೇ ನಮಃ,

ಶ್ರೀ ಗುರುಭ್ಯೋ ನಮಃ । ಹರಿಃ ಓಮ್ ॥
ಸಾವಿತ್ರಾಣಿ ಜುಹೋತಿ ಪ್ರಸೂತ್ಯೈ ಚತುರ್ಗೃಹೀತೇನ ಜುಹೋತಿ ಚತುಷ್ಪಾದಃ ಪಶವಃ ಪಶೂನೇವಾ-ಽವ ರುನ್ಧೇ ಚತಸ್ರೋ ದಿಶೋ ದಿಕ್ಷ್ವೇವ ಪ್ರತಿ ತಿಷ್ಠತಿ ಛನ್ದಾಗ್ಂಸಿ ದೇವೇಭ್ಯೋ ಽಪಾ-ಽಕ್ರಾಮ-ನ್ನ ವೋ ಭಾಗಾನಿ ಹವ್ಯಂ-ವಁಕ್ಷ್ಯಾಮ ಇತಿ ತೇಭ್ಯ ಏತಚ್ಚತು-ರ್ಗೃಹೀತಮ-ಧಾರಯ-ನ್ಪುರೋ-ಽನು ವಾಕ್ಯಾಯೈ ಯಾಜ್ಯಾಯೈ ದೇವತಾಯೈ ವಷಟ್ಕಾರಾಯ ಯಚ್ಚತುರ್ಗೃಹೀತ-ಞ್ಜುಹೋತಿ ಛನ್ದಾಗ್ಸ್ಯೇವ ತ-ತ್ಪ್ರೀಣಾತಿ ತಾನ್ಯಸ್ಯ ಪ್ರೀತಾನಿ ದೇವೇಭ್ಯೋ ಹವ್ಯಂ-ವಁಹನ್ತಿ ಯ-ಙ್ಕಾಮಯೇತ [ಯ-ಙ್ಕಾಮಯೇತ, ಪಾಪೀಯಾನ್-ಥ್ಸ್ಯಾದಿತ್ಯೇಕೈಕ-] 1
ಪಾಪೀಯಾನ್-ಥ್ಸ್ಯಾದಿತ್ಯೇಕೈಕ-ನ್ತಸ್ಯ ಜುಹುಯಾ-ದಾಹುತೀಭಿರೇವೈನಮಪ ಗೃಹ್ಣಾತಿ ಪಾಪೀಯಾ-ನ್ಭವತಿ ಯ-ಙ್ಕಾಮಯೇತ ವಸೀಯಾನ್-ಥ್ಸ್ಯಾದಿತಿ ಸರ್ವಾಣಿ ತಸ್ಯಾ-ಽನುದ್ರುತ್ಯ ಜುಹುಯಾದಾಹುತ್ಯೈವೈನಮಭಿ ಕ್ರಮಯತಿ ವಸೀಯಾ-ನ್ಭವತ್ಯಥೋ ಯಜ್ಞಸ್ಯೈವೈಷಾ-ಽಭಿಕ್ರಾನ್ತಿರೇತಿ ವಾ ಏಷ ಯಜ್ಞಮುಖಾ-ದೃದ್ಧ್ಯಾ ಯೋ-ಽಗ್ನೇರ್ದೇವತಾಯಾ ಏತ್ಯಷ್ಟಾವೇತಾನಿ ಸಾವಿತ್ರಾಣಿ ಭವನ್ತ್ಯಷ್ಟಾಕ್ಷರಾ ಗಾಯತ್ರೀ ಗಾಯತ್ರೋ- [ಗಾಯತ್ರಃ, ಅಗ್ನಿಸ್ತೇನೈವ] 2
-ಽಗ್ನಿಸ್ತೇನೈವ ಯಜ್ಞಮುಖಾದೃದ್ಧ್ಯಾ ಅಗ್ನೇರ್ದೇವತಾಯೈ ನೈತ್ಯಷ್ಟೌ ಸಾವಿತ್ರಾಣಿ ಭವನ್ತ್ಯಾಹುತಿರ್ನವಮೀ ತ್ರಿವೃತಮೇವ ಯಜ್ಞಮುಖೇ ವಿಯಾತಯತಿ ಯದಿ ಕಾಮಯೇತ ಛನ್ದಾಗ್ಂಸಿ ಯಜ್ಞಯಶಸೇನಾ ಽರ್ಪಯೇಯಮಿತ್ಯೃಚಮನ್ತಮಾ-ಙ್ಕುರ್ಯಾಚ್ಛನ್ದಾಗ್ಸ್ಯೇವ ಯಜ್ಞಯಶಸೇನಾ ಽರ್ಪಯತಿ ಯದಿ ಕಾಮಯೇತ ಯಜಮಾನಂ-ಯಁಜ್ಞಯಶಸೇನಾ-ಽರ್ಪಯೇಯಮಿತಿ ಯಜುರನ್ತಮ-ಙ್ಕುರ್ಯಾ-ದ್ಯಜಮಾನಮೇವ ಯಜ್ಞಯಶಸೇನಾ-ಽರ್ಪಯತ್ಯೃಚಾ ಸ್ತೋಮಗ್ಂ ಸಮರ್ಧಯೇ- [ಸಮರ್ಧಯೇತಿ, ಆಹ ಸಮೃದ್ಧ್ಯೈ] 3
-ತ್ಯಾಹ ಸಮೃದ್ಧ್ಯೈ ಚತುರ್ಭಿರಭ್ರಿಮಾ ದತ್ತೇ ಚತ್ವಾರಿ ಛನ್ದಾಗ್ಂಸಿ ಛನ್ದೋಭಿರೇವ ದೇವಸ್ಯ ತ್ವಾ ಸವಿತುಃ ಪ್ರಸವ ಇತ್ಯಾಹ ಪ್ರಸೂತ್ಯಾ ಅಗ್ನಿರ್ದೇವೇಭ್ಯೋ ನಿಲಾಯತ ಸ ವೇಣು-ಮ್ಪ್ರಾ-ಽವಿಶ-ಥ್ಸ ಏತಾಮೂತಿಮನು ಸಮಚರ-ದ್ಯ-ದ್ವೇಣೋ-ಸ್ಸುಷಿರಗ್ಂ ಸುಷಿರಾ-ಽಭ್ರಿರ್ಭವತಿ ಸಯೋನಿತ್ವಾಯ ಸ ಯತ್ರಯತ್ರಾ-ಽವಸ-ತ್ತ-ತ್ಕೃಷ್ಣಮಭವ-ತ್ಕಲ್ಮಾಷೀ ಭವತಿ ರೂಪಸಮೃದ್ಧ್ಯಾ ಉಭಯತಃ, ಕ್ಷ್ಣೂರ್ಭವತೀತಶ್ಚಾ-ಽ-ಮುತಶ್ಚಾ-ಽರ್ಕಸ್ಯಾ-ವರುದ್ಧ್ಯೈ ವ್ಯಾಮಮಾತ್ರೀ ಭವತ್ಯೇತಾವದ್ವೈ ಪುರುಷೇ ವೀರ್ಯಂ-ವೀಁರ್ಯಸಮ್ಮಿತಾ ಽಪರಿಮಿತಾ ಭವತ್ಯ-ಪರಿಮಿತಸ್ಯಾ-ಽ ವರುದ್ಧ್ಯೈ ಯೋ ವನಸ್ಪತೀನಾ-ಮ್ಫಲಗ್ರಹಿ-ಸ್ಸ ಏಷಾಂ-ವೀಁರ್ಯಾವಾ-ನ್ಫಲಗ್ರಹಿರ್ವೇಣು-ರ್ವೈಣವೀ ಭವತಿ ವೀರ್ಯಸ್ಯಾ ವರುದ್ಧ್ಯೈ ॥ 4 ॥

(ಕಾಮಯೇತ - ಗಾಯತ್ರೋ - ಽರ್ಧಯೇತಿ - ಚ - ಸಪ್ತವಿಗ್ಂಶತಿಶ್ಚ) (ಅ. 1)
ವ್ಯೃದ್ಧಂ-ವಾಁ ಏತ-ದ್ಯಜ್ಞಸ್ಯ ಯದಯಜುಷ್ಕೇಣ ಕ್ರಿಯತ ಇಮಾಮಗೃಭ್ಣ-ನ್ರಶನಾ-ಮೃತಸ್ಯೇತ್ಯಶ್ವಾಭಿಧಾನೀಮಾ ದತ್ತೇ ಯಜುಷ್ಕೃತ್ಯೈ ಯಜ್ಞಸ್ಯ ಸಮೃದ್ಧ್ಯೈ ಪ್ರತೂರ್ತಂ-ವಾಁಜಿನ್ನಾ ದ್ರವೇತ್ಯಶ್ವ-ಮಭಿ ದಧಾತಿ ರೂಪಮೇವಾ-ಽಸ್ಯೈತ-ನ್ಮಹಿಮಾನಂ-ವ್ಯಾಁಚಷ್ಟೇ ಯುಞ್ಜಾಥಾಗ್ಂ ರಾಸಭಂ-ಯುಁವಮಿತಿ ಗರ್ದಭ-ಮಸತ್ಯೇವ ಗರ್ದಭ-ಮ್ಪ್ರತಿ ಷ್ಠಾಪಯತಿ ತಸ್ಮಾದಶ್ವಾ-ದ್ಗರ್ದಭೋ-ಽಸತ್ತರೋ ಯೋಗೇಯೋಗೇ ತವಸ್ತರಮಿತ್ಯಾಹ [ತವಸ್ತರಮಿತ್ಯಾಹ, ಯೋಗೇಯೋಗ] 5
ಯೋಗೇಯೋಗ ಏವೈನಂ-ಯುಁಙ್ಕ್ತೇ ವಾಜೇವಾಜೇ ಹವಾಮಹ ಇತ್ಯಾಹಾನ್ನಂ-ವೈಁ ವಾಜೋ-ಽನ್ನಮೇವಾವ ರುನ್ಧೇ ಸಖಾಯ ಇನ್ದ್ರಮೂತಯ ಇತ್ಯಾಹೇನ್ದ್ರಿಯಮೇವಾವ ರುನ್ಧೇ ಽಗ್ನಿರ್ದೇವೇಭ್ಯೋ ನಿಲಾಯತ ತ-ಮ್ಪ್ರಜಾಪತಿರನ್ವವಿನ್ದ-ತ್ಪ್ರಾಜಾಪತ್ಯೋ-ಽಶ್ವೋ ಽಶ್ವೇನ ಸ-ಮ್ಭರತ್ಯನುವಿತ್ತ್ಯೈ ಪಾಪವಸ್ಯಸಂ-ವಾಁ ಏತ-ತ್ಕ್ರಿಯತೇ ಯಚ್ಛ್ರೇಯಸಾ ಚ ಪಾಪೀಯಸಾ ಚ ಸಮಾನ-ಙ್ಕರ್ಮ ಕುರ್ವನ್ತಿ ಪಾಪೀಯಾನ್.- [ಪಾಪೀಯಾನ್, ಹ್ಯಶ್ವಾ-ದ್ಗರ್ದಭೋ-ಽಶ್ವ-] 6
-ಹ್ಯಶ್ವಾ-ದ್ಗರ್ದಭೋ-ಽಶ್ವ-ಮ್ಪೂರ್ವ-ನ್ನಯನ್ತಿ ಪಾಪವಸ್ಯ-ಸಸ್ಯ ವ್ಯಾವೃತ್ತ್ಯೈ ತಸ್ಮಾಚ್ಛ್ರೇಯಾಗ್ಂಸ-ಮ್ಪಾಪೀಯಾ-ನ್ಪಶ್ಚಾದನ್ವೇತಿ ಬಹುರ್ವೈ ಭವತೋ ಭ್ರಾತೃವ್ಯೋ ಭವತೀವ ಖಲು ವಾ ಏಷ ಯೋ-ಽಗ್ನಿ-ಞ್ಚಿನುತೇ ವಜ್ರ್ಯಶ್ವಃ ಪ್ರತೂರ್ವನ್ನೇಹ್ಯವ-ಕ್ರಾಮನ್ನ-ಶಸ್ತೀರಿತ್ಯಾಹ ವಜ್ರೇಣೈವ ಪಾಪ್ಮಾನ-ಮ್ಭ್ರಾತೃವ್ಯಮವ ಕ್ರಾಮತಿ ರುದ್ರಸ್ಯ ಗಾಣಪತ್ಯಾದಿತ್ಯಾಹ ರೌದ್ರಾ ವೈ ಪಶವೋ ರುದ್ರಾದೇವ [ ] 7
ಪಶೂ-ನ್ನಿರ್ಯಾಚ್ಯಾ-ಽಽತ್ಮನೇ ಕರ್ಮ ಕುರುತೇ ಪೂಷ್ಣಾ ಸಯುಜಾ ಸಹೇತ್ಯಾಹ ಪೂಷಾ ವಾ ಅದ್ಧ್ವನಾಗ್ಂ ಸನ್ನೇತಾ ಸಮಷ್ಟ್ಯೈ ಪುರೀಷಾಯತನೋ ವಾ ಏಷ ಯದಗ್ನಿರಙ್ಗಿರಸೋ ವಾ ಏತಮಗ್ರೇ ದೇವತಾನಾಗ್ಂ ಸಮಭರ-ನ್ಪೃಥಿವ್ಯಾ-ಸ್ಸಧಸ್ಥಾದಗ್ನಿ-ಮ್ಪುರೀಷ್ಯ-ಮಙ್ಗಿರಸ್ವ-ದಚ್ಛೇಹೀತ್ಯಾಹ ಸಾಯತನಮೇವೈನ-ನ್ದೇವತಾಭಿ-ಸ್ಸ-ಮ್ಭರತ್ಯಗ್ನಿ-ಮ್ಪುರೀಷ್ಯ-ಮಙ್ಗಿರಸ್ವ- ದಚ್ಛೇಮ ಇತ್ಯಾಹ ಯೇನ [ ] 8
ಸಙ್ಗಚ್ಛತೇ ವಾಜಮೇವಾಸ್ಯ ವೃಙ್ಕ್ತೇ ಪ್ರಜಾಪತಯೇ ಪ್ರತಿಪ್ರೋಚ್ಯಾಗ್ನಿ-ಸ್ಸಮ್ಭೃತ್ಯ ಇತ್ಯಾಹುರಿಯಂ-ವೈಁ ಪ್ರಜಾಪತಿಸ್ತಸ್ಯಾ ಏತಚ್ಛ್ರೋತ್ರಂ-ಯಁದ್ವಲ್ಮೀಕೋ-ಽಗ್ನಿ-ಮ್ಪುರೀಷ್ಯ-ಮಙ್ಗಿರಸ್ವ-ದ್ಭರಿಷ್ಯಾಮ ಇತಿ ವಲ್ಮೀಕವಪಾಮುಪ ತಿಷ್ಠತೇ ಸಾಕ್ಷಾದೇವ ಪ್ರಜಾಪತಯೇ ಪ್ರತಿಪ್ರೋಚ್ಯಾ-ಽಗ್ನಿಗ್ಂ ಸ-ಮ್ಭರತ್ಯಗ್ನಿ-ಮ್ಪುರೀಷ್ಯ-ಮಙ್ಗಿರಸ್ವ-ದ್ಭರಾಮ ಇತ್ಯಾಹ ಯೇನ ಸಗಞ್ಚ್ಛತೇ ವಾಜಮೇವಾಸ್ಯ ವೃಙ್ಕ್ತೇ ಽನ್ವಗ್ನಿರುಷಸಾಮಗ್ರ- [-ಽನ್ವಗ್ನಿರುಷಸಾಮಗ್ರಮ್, ಅಖ್ಯದಿತ್ಯಾಹಾ-] 9
-ಮಖ್ಯದಿತ್ಯಾಹಾ-ನುಖ್ಯಾತ್ಯಾ ಆಗತ್ಯ ವಾಜ್ಯದ್ಧ್ವನ ಆಕ್ರಮ್ಯ ವಾಜಿ-ನ್ಪೃಥಿವೀಮಿತ್ಯಾಹೇಚ್ಛತ್ಯೇವೈನ-ಮ್ಪೂರ್ವಯಾ ವಿನ್ದತ್ಯುತ್ತರಯಾ ದ್ವಾಭ್ಯಾಮಾ ಕ್ರಮಯತಿ ಪ್ರತಿಷ್ಠಿತ್ಯಾ ಅನುರೂಪಾಭ್ಯಾ-ನ್ತಸ್ಮಾದನುರೂಪಾಃ ಪಶವಃ ಪ್ರಜಾಯನ್ತೇ ದ್ಯೌಸ್ತೇ ಪೃಷ್ಠ-ಮ್ಪೃಥಿವೀ ಸಧಸ್ಥಮಿತ್ಯಾಹೈಭ್ಯೋ ವಾ ಏತಂ-ಲೋಁಕೇಭ್ಯಃ ಪ್ರಜಾಪತಿ-ಸ್ಸಮೈರಯ-ದ್ರೂಪಮೇವಾಸ್ಯೈ-ತನ್ಮಹಿಮಾನಂ-ವ್ಯಾಁಚಷ್ಟೇ ವಜ್ರೀ ವಾ ಏಷ ಯದಶ್ವೋ ದ-ದ್ಭಿರನ್ಯತೋದದ್ಭ್ಯೋ ಭೂಯಾಂ-ಲೋಁಮಭಿರುಭಯಾದದ್ಭ್ಯೋ ಯ-ನ್ದ್ವಿಷ್ಯಾ-ತ್ತಮಧಸ್ಪದ-ನ್ಧ್ಯಾಯೇ-ದ್ವಜ್ರೇಣೈವೈನಗ್ಗ್ ಸ್ತೃಣುತೇ ॥ 10 ॥

(ಆಹ - ಪಾಪೀಯಾನ್ - ರುದ್ರಾದೇವ - ಯೇನಾ - ಽಗ್ರಂ - ಁವಜ್ರೀ ವೈ - ಸಪ್ತದಶ ಚ) (ಅ. 2)
ಉತ್ಕ್ರಾಮೋ-ದಕ್ರಮೀದಿತಿ ದ್ವಾಭ್ಯಾಮುತ್ಕ್ರಮಯತಿ ಪ್ರತಿಷ್ಠಿತ್ಯಾ ಅನುರೂಪಾಭ್ಯಾ-ನ್ತಸ್ಮಾದನುರೂಪಾಃ ಪಶವಃ ಪ್ರಜಾಯನ್ತೇ ಽಪ ಉಪ ಸೃಜತಿ ಯತ್ರ ವಾ ಆಪ ಉಪ ಗಚ್ಛನ್ತಿ ತದೋಷಧಯಃ ಪ್ರತಿ ತಿಷ್ಠನ್ತ್ಯೋಷಧೀಃ ಪ್ರತಿತಿಷ್ಠನ್ತೀಃ ಪಶವೋ-ಽನು ಪ್ರತಿ ತಿಷ್ಠನ್ತಿ ಪಶೂನ್. ಯಜ್ಞೋ ಯಜ್ಞಂ-ಯಁಜಮಾನೋ ಯಜಮಾನ-ಮ್ಪ್ರಜಾಸ್ತಸ್ಮಾದಪ ಉಪ ಸೃಜತಿ ಪ್ರತಿಷ್ಠಿತ್ಯೈ ಯದದ್ಧ್ವರ್ಯು-ರನಗ್ನಾವಾಹುತಿ-ಞ್ಜುಹುಯಾದನ್ಧೋ ಽದ್ಧ್ವರ್ಯು- [-ಽದ್ಧ್ವರ್ಯುಃ, ಸ್ಯಾ-ದ್ರಕ್ಷಾಗ್ಂಸಿ] 11
-ಸ್ಸ್ಯಾ-ದ್ರಕ್ಷಾಗ್ಂಸಿ ಯಜ್ಞಗ್ಂ ಹನ್ಯುರ್ಹಿರಣ್ಯಮುಪಾಸ್ಯ ಜುಹೋತ್ಯಗ್ನಿವತ್ಯೇವ ಜುಹೋತಿ ನಾನ್ಧೋ-ಽದ್ಧ್ವರ್ಯುರ್ಭವತಿ ನ ಯಜ್ಞಗ್ಂ ರಕ್ಷಾಗ್ಂಸಿ ಘ್ನನ್ತಿ ಜಿಘರ್ಮ್ಯಗ್ನಿ-ಮ್ಮನಸಾ ಘೃತೇನೇತ್ಯಾಹ ಮನಸಾ ಹಿ ಪುರುಷೋ ಯಜ್ಞಮಭಿಗಚ್ಛತಿ ಪ್ರತಿಕ್ಷ್ಯನ್ತ-ಮ್ಭುವನಾನಿ ವಿಶ್ವೇತ್ಯಾಹ ಸರ್ವಗ್ಗ್ ಹ್ಯೇಷ ಪ್ರತ್ಯ-ಙ್ಕ್ಷೇತಿ ಪೃಥು-ನ್ತಿರಶ್ಚಾ ವಯಸಾ ಬೃಹನ್ತಮಿತ್ಯಾಹಾ-ಽಲ್ಪೋ ಹ್ಯೇಷ ಜಾತೋ ಮಹಾ- [ಮಹಾನ್, ಭವತಿ] 12
-ನ್ಭವತಿ ವ್ಯಚಿಷ್ಠಮನ್ನಗ್ಂ ರಭಸಂ-ವಿಁದಾನಮಿತ್ಯಾಹಾ ಽನ್ನಮೇವಾ-ಽಸ್ಮೈ ಸ್ವದಯತಿ ಸರ್ವಮಸ್ಮೈ ಸ್ವದತೇ ಯ ಏವಂ-ವೇಁದಾ ಽಽತ್ವಾ ಜಿಘರ್ಮಿ ವಚಸಾ ಘೃತೇನೇತ್ಯಾಹ ತಸ್ಮಾ-ದ್ಯ-ತ್ಪುರುಷೋ ಮನಸಾ-ಽಭಿಗಚ್ಛತಿ ತ-ದ್ವಾಚಾ ವದತ್ಯ ರಕ್ಷಸೇತ್ಯಾಹ ರಕ್ಷಸಾಮಪಹತ್ಯೈ ಮರ್ಯಶ್ರೀ-ಸ್ಸ್ಪೃಹಯ-ದ್ವರ್ಣೋ ಅಗ್ನಿರಿತ್ಯಾಹಾ-ಪಚಿತಿಮೇವಾ-ಽಸ್ಮಿ-ನ್ದಧಾತ್ಯ-ಪಚಿತಿಮಾ-ನ್ಭವತಿ ಯ ಏವಂ- [ಯ ಏವಮ್, ವೇದ ಮನಸಾ ತ್ವೈ] 13
-ಁವೇದ ಮನಸಾ ತ್ವೈ ತಾಮಾಪ್ತುಮರ್ಹತಿ ಯಾಮದ್ಧ್ವರ್ಯುರ-ನಗ್ನಾವಾಹುತಿ-ಞ್ಜುಹೋತಿ ಮನಸ್ವತೀಭ್ಯಾ-ಞ್ಜುಹೋತ್ಯಾಹುತ್ಯೋರಾಪ್ತ್ಯೈ ದ್ವಾಭ್ಯಾ-ಮ್ಪ್ರತಿಷ್ಠಿತ್ಯೈ ಯಜ್ಞಮುಖೇ ಯಜ್ಞಮುಖೇ ವೈ ಕ್ರಿಯಮಾಣೇ ಯಜ್ಞಗ್ಂ ರಕ್ಷಾಗ್ಂಸಿ ಜಿಘಾಗ್ಂ ಸನ್ತ್ಯೇತರ್ಹಿ ಖಲು ವಾ ಏತ-ದ್ಯಜ್ಞಮುಖಂ-ಯಁರ್ಹ್ಯೇನ-ದಾಹುತಿ-ರಶ್ಞುತೇ ಪರಿ ಲಿಖತಿ ರಕ್ಷಸಾಮಪಹತ್ಯೈ ತಿಸೃಭಿಃ ಪರಿ ಲಿಖತಿ ತ್ರಿವೃದ್ವಾ ಅಗ್ನಿರ್ಯಾವಾನೇವಾ-ಽಗ್ನಿಸ್ತಸ್ಮಾ-ದ್ರಕ್ಷಾಗ್ಸ್ಯಪ ಹನ್ತಿ [ಹನ್ತಿ, ಗಾಯತ್ರಿಯಾ ಪರಿ] 14
ಗಾಯತ್ರಿಯಾ ಪರಿ ಲಿಖತಿ ತೇಜೋ ವೈ ಗಾಯತ್ರೀ ತೇಜಸೈವೈನ-ಮ್ಪರಿಗೃಹ್ಣಾತಿ ತ್ರಿಷ್ಟುಭಾ ಪರಿ ಲಿಖತೀನ್ದ್ರಿಯಂ-ವೈಁ ತ್ರಿಷ್ಟು-ಗಿನ್ದ್ರಿಯೇಣೈವೈನ-ಮ್ಪರಿ ಗೃಹ್ಣಾತ್ಯನುಷ್ಟುಭಾ ಪರಿ ಲಿಖತ್ಯನುಷ್ಟು-ಫ್ಸರ್ವಾಣಿ ಛನ್ದಾಗ್ಂಸಿ ಪರಿಭೂಃ ಪರ್ಯಾಪ್ತ್ಯೈ ಮದ್ಧ್ಯತೋ-ಽನುಷ್ಟುಭಾ ವಾಗ್ವಾ ಅನುಷ್ಟು-ಪ್ತಸ್ಮಾ-ನ್ಮದ್ಧ್ಯತೋ ವಾಚಾ ವದಾಮೋ ಗಾಯತ್ರಿಯಾ ಪ್ರಥಮಯಾ ಪರಿ ಲಿಖತ್ಯಥಾ-ಽನುಷ್ಟುಭಾ-ಽಥ ತ್ರಿಷ್ಟುಭಾ ತೇಜೋ ವೈ ಗಾಯತ್ರೀ ಯಜ್ಞೋ ಽನುಷ್ಟುಗಿನ್ದ್ರಿಯ-ನ್ತ್ರಿಷ್ಟು-ಪ್ತೇಜಸಾ ಚೈವೇನ್ದ್ರಿಯೇಣ ಚೋಭಯತೋ ಯಜ್ಞ-ಮ್ಪರಿ ಗೃಹ್ಣಾತಿ ॥ 15 ॥

(ಅನ್ಧೋ-ಽದ್ಧ್ವರ್ಯು - ರ್ಮಹಾನ್ - ಭವತಿ ಯ ಏವಗ್ಂ - ಹನ್ತಿ - ತ್ರಿಷ್ಟುಭಾ ತೇಜೋ ವೈ ಗಾಯತ್ರೀ - ತ್ರಯೋದಶ ಚ) (ಅ. 3)
ದೇವಸ್ಯ ತ್ವಾ ಸವಿತುಃ ಪ್ರಸವ ಇತಿ ಖನತಿ ಪ್ರಸೂತ್ಯಾ ಅಥೋ ಧೂಮ-ಮೇವೈತೇನ ಜನಯತಿ ಜ್ಯೋತಿಷ್ಮನ್ತ-ನ್ತ್ವಾ-ಽಗ್ನೇ ಸುಪ್ರತೀಕ-ಮಿತ್ಯಾಹ ಜ್ಯೋತಿರೇವೈತೇನ ಜನಯತಿ ಸೋ-ಽಗ್ನಿರ್ಜಾತಃ ಪ್ರಜಾ-ಶ್ಶುಚಾ-ಽಽರ್ಪಯ-ತ್ತ-ನ್ದೇವಾ ಅರ್ಧರ್ಚೇನಾ-ಶಮಯಞ್ಛಿವ-ಮ್ಪ್ರಜಾಭ್ಯೋ-ಽಹಿಗ್ಂ ಸನ್ತಮಿತ್ಯಾಹ ಪ್ರಜಾಭ್ಯ ಏವೈನಗ್ಂ ಶಮಯತಿ ದ್ವಾಭ್ಯಾ-ಙ್ಖನತಿ ಪ್ರತಿಷ್ಠಿತ್ಯಾ ಅಪಾ-ಮ್ಪೃಷ್ಠಮಸೀತಿ ಪುಷ್ಕರಪರ್ಣಮಾ [ಪುಷ್ಕರಪರ್ಣಮಾ, ಹರತ್ಯಪಾಂ-ವಾಁ] 16
ಹರತ್ಯಪಾಂ-ವಾಁ ಏತ-ತ್ಪೃಷ್ಠಂ-ಯಁ-ತ್ಪುಷ್ಕರಪರ್ಣಗ್ಂ ರೂಪೇಣೈವೈನದಾ ಹರತಿ ಪುಷ್ಕರಪರ್ಣೇನ ಸ-ಮ್ಭರತಿ ಯೋನಿರ್ವಾ ಅಗ್ನೇಃ ಪುಷ್ಕರಪರ್ಣಗ್ಂ ಸಯೋನಿಮೇವಾಗ್ನಿಗ್ಂ ಸಮ್ಭರತಿ ಕೃಷ್ಣಾಜಿನೇನ ಸಮ್ಭರತಿ ಯಜ್ಞೋ ವೈ ಕೃಷ್ಣಾಜಿನಂ-ಯಁಜ್ಞೇನೈವ ಯಜ್ಞಗ್ಂ ಸಮ್ಭರತಿ ಯ-ದ್ಗ್ರಾಮ್ಯಾಣಾ-ಮ್ಪಶೂನಾ-ಞ್ಚರ್ಮಣಾ ಸಮ್ಭರೇ-ದ್ಗ್ರಾಮ್ಯಾ-ನ್ಪಶೂಞ್ಛುಚಾ-ಽರ್ಪಯೇ-ತ್ಕೃಷ್ಣಾಜಿನೇನ ಸಮ್ಭರತ್ಯಾರಣ್ಯಾನೇವ ಪಶೂ- [ಪಶೂನ್, ಶುಚಾ-ಽರ್ಪಯತಿ] 17
-ಞ್ಛುಚಾ-ಽರ್ಪಯತಿ ತಸ್ಮಾ-ಥ್ಸಮಾವ-ತ್ಪಶೂನಾ-ಮ್ಪ್ರಜಾಯಮಾನಾನಾ-ಮಾರಣ್ಯಾಃ ಪಶವಃ ಕನೀಯಾಗ್ಂಸ-ಶ್ಶುಚಾ ಹ್ಯೃತಾ ಲೋಮತ-ಸ್ಸಮ್ಭರತ್ಯತೋ ಹ್ಯಸ್ಯ ಮೇದ್ಧ್ಯ-ಙ್ಕೃಷ್ಣಾಜಿನ-ಞ್ಚ ಪುಷ್ಕರಪರ್ಣ-ಞ್ಚ ಸಗ್ಗ್ ಸ್ತೃಣಾತೀಯಂ-ವೈಁ ಕೃಷ್ಣಾಜಿನಮಸೌ ಪುಷ್ಕರಪರ್ಣ-ಮಾಭ್ಯಾ-ಮೇವೈನ-ಮುಭಯತಃ ಪರಿಗೃಹ್ಣಾತ್ಯ-ಗ್ನಿರ್ದೇವೇಭ್ಯೋ ನಿಲಾಯತ ತಮಥರ್ವಾ-ಽನ್ವಪಶ್ಯದಥರ್ವಾ ತ್ವಾ ಪ್ರಥಮೋ ನಿರಮನ್ಥದಗ್ನ ಇ- [ನಿರಮನ್ಥದಗ್ನ ಇತಿ, ಆಹ ಯ ಏವೈನ-] 18
-ತ್ಯಾಹ ಯ ಏವೈನ-ಮನ್ವಪಶ್ಯ-ತ್ತೇನೈವೈನಗ್ಂ ಸಮ್ಭರತಿ ತ್ವಾಮಗ್ನೇ ಪುಷ್ಕರಾದಧೀತ್ಯಾಹ ಪುಷ್ಕರಪರ್ಣೇ ಹ್ಯೇನಮುಪಶ್ರಿತ-ಮವಿನ್ದ-ತ್ತಮು ತ್ವಾ ದದ್ಧ್ಯಙ್ಙೃಷಿರಿತ್ಯಾಹ ದದ್ಧ್ಯಙ್ ವಾ ಆಥರ್ವಣ-ಸ್ತೇಜಸ್ವ್ಯಾಸೀ-ತ್ತೇಜ ಏವಾಸ್ಮಿ-ನ್ದಧಾತಿ ತಮು ತ್ವಾ ಪಾಥ್ಯೋ ವೃಷೇತ್ಯಾಹ ಪೂರ್ವಮೇವೋದಿತ-ಮುತ್ತರೇಣಾಭಿ ಗೃಣಾತಿ [ಗೃಣಾತಿ, ಚತಸೃಭಿ-ಸ್ಸಮ್ಭರತಿ] 19
ಚತಸೃಭಿ-ಸ್ಸಮ್ಭರತಿ ಚತ್ವಾರಿ ಛನ್ದಾಗ್ಂಸಿ ಛನ್ದೋಭಿರೇವ ಗಾಯತ್ರೀಭಿರ್ಬ್ರಾಹ್ಮಣಸ್ಯ ಗಾಯತ್ರೋ ಹಿ ಬ್ರಾಹ್ಮಣ-ಸ್ತ್ರಿಷ್ಟುಗ್ಭೀ ರಾಜನ್ಯಸ್ಯ ತ್ರೈಷ್ಟುಭೋ ಹಿ ರಾಜನ್ಯೋ ಯ-ಙ್ಕಾಮಯೇತ ವಸೀಯಾನ್-ಥ್ಸ್ಯಾದಿತ್ಯುಭಯೀಭಿಸ್ತಸ್ಯ ಸಮ್ಭರೇ-ತ್ತೇಜಶ್ಚೈವಾ-ಽಸ್ಮಾ ಇನ್ದ್ರಿಯ-ಞ್ಚ ಸಮೀಚೀ ದಧಾತ್ಯಷ್ಟಾಭಿ-ಸ್ಸಮ್ಭರತ್ಯಷ್ಟಾಕ್ಷರಾ ಗಾಯತ್ರೀ ಗಾಯತ್ರೋ ಽಗ್ನಿರ್ಯಾವಾನೇವಾ-ಽಗ್ನಿಸ್ತಗ್ಂ ಸಮ್ಭರತಿ ಸೀದ ಹೋತರಿತ್ಯಾ- -ಹ ದೇವತಾ ಏವಾಸ್ಮೈ ಸಗ್ಂ ಸಾದಯತಿ ನಿ ಹೋತೇತಿ ಮನುಷ್ಯಾನ್-ಥ್ಸಗ್ಂ ಸೀದಸ್ವೇತಿ ವಯಾಗ್ಂಸಿ ಜನಿಷ್ವಾ ಹಿ ಜೇನ್ಯೋ ಅಗ್ರೇ ಅಹ್ನಾಮಿತ್ಯಾಹ ದೇವ ಮನುಷ್ಯಾನೇವಾ-ಽಸ್ಮೈ ಸಗ್ಂಸನ್ನಾ-ನ್ಪ್ರಜನಯತಿ ॥ 20

(ಐ - ವ ಪಶೂ - ನಿತಿ - ಗೃಣಾತಿ - ಹೋತರಿತಿ - ಸಪ್ತವಿಗ್ಂಶತಿಶ್ಚ) (ಅ. 4)
ಕ್ರೂರಮಿವ ವಾ ಅಸ್ಯಾ ಏತ-ತ್ಕರೋತಿ ಯ-ತ್ಖನತ್ಯಪ ಉಪ ಸೃಜತ್ಯಾಪೋ ವೈ ಶಾನ್ತಾ-ಶ್ಶಾನ್ತಾಭಿರೇವಾ-ಽಸ್ಯೈ ಶುಚಗ್ಂ ಶಮಯತಿ ಸ-ನ್ತೇ ವಾಯುರ್ಮಾತರಿಶ್ವಾ ದಧಾತ್ವಿತ್ಯಾಹ ಪ್ರಾಣೋ ವೈ ವಾಯುಃ ಪ್ರಾಣೇನೈವಾಸ್ಯೈ ಪ್ರಾಣಗ್ಂ ಸ-ನ್ದಧಾತಿ ಸ-ನ್ತೇ ವಾಯುರಿತ್ಯಾಹ ತಸ್ಮಾ-ದ್ವಾಯುಪ್ರಚ್ಯುತಾ ದಿವೋ ವೃಷ್ಟಿರೀರ್ತೇ ತಸ್ಮೈ ಚ ದೇವಿ ವಷಡಸ್ತು [ವಷಡಸ್ತು, ತುಭ್ಯಮಿತ್ಯಾಹ] 21
ತುಭ್ಯಮಿತ್ಯಾಹ ಷಡ್ವಾ ಋತವ ಋತುಷ್ವೇವ ವೃಷ್ಟಿ-ನ್ದಧಾತಿ ತಸ್ಮಾ-ಥ್ಸರ್ವಾನೃತೂನ್. ವರ್ಷತಿ ಯ-ದ್ವಷಟ್ಕುರ್ಯಾ-ದ್ಯಾತಯಾಮಾ-ಽಸ್ಯ ವಷಟ್ಕಾರ-ಸ್ಸ್ಯಾದ್ಯನ್ನ ವಷಟ್ಕುರ್ಯಾ-ದ್ರಕ್ಷಾಗ್ಂಸಿ ಯಜ್ಞಗ್ಂ ಹನ್ಯುರ್ವಡಿತ್ಯಾಹ ಪರೋಕ್ಷಮೇವ ವಷ-ಟ್ಕರೋತಿ ನಾಸ್ಯ ಯಾತಯಾಮಾ ವಷಟ್ಕಾರೋ ಭವತಿ ನ ಯಜ್ಞಗ್ಂ ರಕ್ಷಾಗ್ಂಸಿ ಘ್ನನ್ತಿ ಸುಜಾತೋ ಜ್ಯೋತಿಷಾ ಸಹೇತ್ಯನುಷ್ಟುಭೋಪ ನಹ್ಯತ್ಯನುಷ್ಟು- [ನಹ್ಯತ್ಯನುಷ್ಟುಪ್, ಸರ್ವಾಣಿ ಛನ್ದಾಗ್ಂಸಿ] 22
-ಫ್ಸರ್ವಾಣಿ ಛನ್ದಾಗ್ಂಸಿ ಛನ್ದಾಗ್ಂಸಿ ಖಲು ವಾ ಅಗ್ನೇಃ ಪ್ರಿಯಾ ತನೂಃ ಪ್ರಿಯಯೈವೈನ-ನ್ತನುವಾ ಪರಿ ದಧಾತಿ ವೇದುಕೋ ವಾಸೋ ಭವತಿಯ ಏವಂ-ವೇಁದ ವಾರುಣೋ ವಾ ಅಗ್ನಿರುಪನದ್ಧ ಉದು ತಿಷ್ಠ ಸ್ವದ್ಧ್ವರೋರ್ಧ್ವ ಊ ಷುಣ ಊತಯ ಇತಿ ಸಾವಿತ್ರೀಭ್ಯಾಮು-ತ್ತಿಷ್ಠತಿ ಸವಿತೃಪ್ರಸೂತ ಏವಾಸ್ಯೋರ್ಧ್ವಾಂ-ವಁರುಣಮೇನಿಮು-ಥ್ಸೃಜತಿ ದ್ವಾಭ್ಯಾ-ಮ್ಪ್ರತಿಷ್ಠಿತ್ಯೈ ಸ ಜಾತೋ ಗರ್ಭೋ ಅಸಿ [ಗರ್ಭೋ ಅಸಿ, ರೋದಸ್ಯೋರಿತ್ಯಾಹೇಮೇ] 23
ರೋದಸ್ಯೋರಿತ್ಯಾಹೇಮೇ ವೈ ರೋದಸೀ ತಯೋರೇಷ ಗರ್ಭೋ ಯದಗ್ನಿ-ಸ್ತಸ್ಮಾ-ದೇವಮಾಹಾಗ್ನೇ ಚಾರುರ್ವಿಭೃತ ಓಷಧೀಷ್ವಿತ್ಯಾಹ ಯದಾ ಹ್ಯೇತಂ-ವಿಁಭರನ್ತ್ಯಥ ಚಾರುತರೋ ಭವತಿ ಪ್ರ ಮಾತೃಭ್ಯೋ ಅಧಿ ಕನಿಕ್ರದ-ದ್ಗಾ ಇತ್ಯಾಹೌಷಧಯೋ ವಾ ಅಸ್ಯ ಮಾತರಸ್ತಾಭ್ಯ ಏವೈನ-ಮ್ಪ್ರಚ್ಯಾವಯತಿ ಸ್ಥಿರೋ ಭವ ವೀಡ್ವಙ್ಗ ಇತಿ ಗರ್ದಭ ಆ ಸಾದಯತಿ [ಆ ಸಾದಯತಿ, ಸ-ನ್ನಹ್ಯತ್ಯೇವೈನ-] 24
ಸ-ನ್ನಹ್ಯತ್ಯೇವೈನ-ಮೇತಯಾ ಸ್ಥೇಮ್ನೇ ಗರ್ದಭೇನ ಸಮ್ಭರತಿ ತಸ್ಮಾ-ದ್ಗರ್ದಭಃ ಪಶೂನಾ-ಮ್ಭಾರಭಾರಿತಮೋ ಗರ್ದಭೇನ ಸ-ಮ್ಭರತಿ ತಸ್ಮಾ-ದ್ಗರ್ದಭೋ-ಽಪ್ಯನಾಲೇಶೇ-ಽತ್ಯನ್ಯಾ-ನ್ಪಶೂ-ನ್ಮೇದ್ಯತ್ಯನ್ನಗ್ಗ್ ಹ್ಯೇನೇನಾ-ಽರ್ಕಗ್ಂ ಸಮ್ಭರನ್ತಿ ಗರ್ದಭೇನ ಸಮ್ಭರತಿ ತಸ್ಮಾ-ದ್ಗರ್ದಭೋ ದ್ವಿರೇತಾ-ಸ್ಸನ್ ಕನಿಷ್ಠ-ಮ್ಪಶೂನಾ-ಮ್ಪ್ರಜಾಯತೇ-ಽಗ್ನಿರ್ಹ್ಯಸ್ಯ ಯೋನಿ-ನ್ನಿರ್ದಹತಿ ಪ್ರಜಾಸು ವಾ ಏಷ ಏತರ್ಹ್ಯಾರೂಢ- [ಏತರ್ಹ್ಯಾರೂಢಃ, ಸ ಈಶ್ವರಃ ಪ್ರಜಾ-ಶ್ಶುಚಾ] 25
-ಸ್ಸ ಈಶ್ವರಃ ಪ್ರಜಾ-ಶ್ಶುಚಾ ಪ್ರದಹಃ ಶಿವೋ ಭವ ಪ್ರಜಾಭ್ಯ ಇತ್ಯಾಹ ಪ್ರಜಾಭ್ಯ ಏವೈನಗ್ಂ ಶಮಯತಿ ಮಾನುಷೀಭ್ಯಸ್ತ್ವಮಙ್ಗಿರ ಇತ್ಯಾಹ ಮಾನವ್ಯೋ ಹಿ ಪ್ರಜಾ ಮಾ ದ್ಯಾವಾಪೃಥಿವೀ ಅಭಿ ಶೂಶುಚೋ ಮಾ-ಽನ್ತರಿಕ್ಷ-ಮ್ಮಾ ವನಸ್ಪತೀನಿತ್ಯಾಹೈಭ್ಯ ಏವೈನಂ-ಲೋಁಕೇಭ್ಯಃ ಶಮಯತಿ ಪ್ರೈತು ವಾಜೀ ಕನಿಕ್ರದದಿತ್ಯಾಹ ವಾಜೀ ಹ್ಯೇಷ ನಾನದ-ದ್ರಾಸಭಃ ಪತ್ವೇ- [ಪತ್ವೇತಿ, ಆಹ ರಾಸಭ ಇತಿ] 26
-ತ್ಯಾಹ ರಾಸಭ ಇತಿ ಹ್ಯೇತಮೃಷಯೋ-ಽವದ-ನ್ಭರನ್ನಗ್ನಿ-ಮ್ಪುರೀಷ್ಯಮಿತ್ಯಾಹಾ-ಽಗ್ನಿಗ್ಗ್ ಹ್ಯೇಷ ಭರತಿ ಮಾ ಪಾದ್ಯಾಯುಷಃ ಪುರೇತ್ಯಾಹಾ-ಽಽಯುರೇವಾ-ಽಸ್ಮಿ-ನ್ದಧಾತಿ ತಸ್ಮಾ-ದ್ಗರ್ದಭ-ಸ್ಸರ್ವಮಾಯುರೇತಿ ತಸ್ಮಾ-ದ್ಗರ್ದಭೇ ಪುರಾ-ಽಽಯುಷಃ ಪ್ರಮೀತೇ ಬಿಭ್ಯತಿ ವೃಷಾ-ಽಗ್ನಿಂ-ವೃಁಷಣ-ಮ್ಭರನ್ನಿತ್ಯಾಹ ವೃಷಾ ಹ್ಯೇಷ ವೃಷಾ-ಽಗ್ನಿರಪಾ-ಙ್ಗರ್ಭಗ್ಂ - [ವೃಷಾ-ಽಗ್ನಿರಪಾ-ಙ್ಗರ್ಭಮ್, ಸಮುದ್ರಿಯ-] 27
ಸಮುದ್ರಿಯ-ಮಿತ್ಯಾಹಾ-ಽಪಾಗ್ ಹ್ಯೇಷ ಗರ್ಭೋ ಯದಗ್ನಿರಗ್ನ ಆ ಯಾಹಿ ವೀತಯ ಇತಿ ವಾ ಇಮೌ ಲೋಕೌ ವ್ಯೈತಾಮಗ್ನ ಆ ಯಾಹಿ ವೀತಯ ಇತಿ ಯದಾಹಾ ಽನಯೋರ್ಲೋಕಯೋ-ರ್ವೀತ್ಯೈ ಪ್ರಚ್ಯುತೋ ವಾ ಏಷ ಆಯತನಾದಗತಃ ಪ್ರತಿಷ್ಠಾಗ್ಂ ಸ ಏತರ್ಹ್ಯದ್ಧ್ವರ್ಯು-ಞ್ಚ ಯಜಮಾನ-ಞ್ಚ ದ್ಧ್ಯಾಯತ್ಯೃತಗ್ಂ ಸತ್ಯಮಿತ್ಯಾಹೇಯಂ-ವಾಁ ಋತಮಸೌ [ ] 28
ಸತ್ಯಮನಯೋರೇವೈನ-ಮ್ಪ್ರತಿ ಷ್ಠಾಪಯತಿ ನಾ-ಽಽರ್ತಿಮಾರ್ಚ್ಛತ್ಯದ್ಧ್ವರ್ಯುರ್ನ ಯಜಮಾನೋ ವರುಣೋ ವಾ ಏಷ ಯಜಮಾನಮಭ್ಯೈತಿ ಯದಗ್ನಿರುಪನದ್ಧ ಓಷಧಯಃ ಪ್ರತಿ ಗೃಹ್ಣೀತಾಗ್ನಿಮೇತ-ಮಿತ್ಯಾಹ ಶಾನ್ತ್ಯೈ ವ್ಯಸ್ಯನ್ ವಿಶ್ವಾ ಅಮತೀರರಾತೀ-ರಿತ್ಯಾಹ ರಕ್ಷಸಾಮಪಹತ್ಯೈ ನಿಷೀದ-ನ್ನೋ ಅಪ ದುರ್ಮತಿಗ್ಂ ಹನದಿತ್ಯಾಹ ಪ್ರತಿಷ್ಠಿತ್ಯಾ ಓಷಧಯಃ ಪ್ರತಿಮೋದದ್ಧ್ವ- [ಪ್ರತಿಮೋದದ್ಧ್ವಮ್, ಏನಮಿತ್ಯಾಹೌಷಧಯೋ] 29
-ಮೇನಮಿತ್ಯಾಹೌಷಧಯೋ ವಾ ಅಗ್ನೇರ್ಭಾಗಧೇಯ-ನ್ತಾಭಿರೇವೈನಗ್ಂ ಸಮರ್ಧಯತಿ ಪುಷ್ಪಾವತೀ-ಸ್ಸುಪಿಪ್ಪಲಾ ಇತ್ಯಾಹ ತಸ್ಮಾದೋಷಧಯಃ ಫಲ-ಙ್ಗೃಹ್ಣನ್ತ್ಯ ಯಂ-ವೋಁ ಗರ್ಭ ಋತ್ವಿಯಃ ಪ್ರತ್ನಗ್ಂ ಸಧಸ್ಥಮಾ-ಽಸದದಿತ್ಯಾಹ ಯಾಭ್ಯ ಏವೈನ-ಮ್ಪ್ರಚ್ಯಾವಯತಿ ತಾಸ್ವೇವೈನ-ಮ್ಪ್ರತಿಷ್ಠಾಪಯತಿ ದ್ವಾಭ್ಯಾಮುಪಾವಹರತಿ ಪ್ರತಿಷ್ಠಿತ್ಯೈ ॥ 30 ॥

(ಅಸ್ತ್ವ - ನುಷ್ಟು - ಬಸಿ - ಸಾದಯತ್ಯಾ - ರೂಢಃ-ಪತ್ವೇತಿ-ಗರ್ಭ-ಮಸೌ - ಮೋದದ್ಧ್ವಂ - ದ್ವಿಚತ್ವಾರಿಗ್ಂಶಚ್ಚ) (ಅ. 5)
ವಾರುಣೋ ವಾ ಅಗ್ನಿರುಪನದ್ಧೋ ವಿ ಪಾಜಸೇತಿ ವಿಸ್ರಗ್ಂಸಯತಿ ಸವಿತೃಪ್ರಸೂತ ಏವಾಸ್ಯ ವಿಷೂಚೀಂ-ವಁರುಣಮೇನಿಂ-ವಿಁಸೃಜತ್ಯಪ ಉಪ ಸೃಜತ್ಯಾಪೋ ವೈ ಶಾನ್ತಾ-ಶ್ಶಾನ್ತಾಭಿರೇವಾಸ್ಯ ಶುಚಗ್ಂ ಶಮಯತಿ ತಿಸೃಭಿರುಪ ಸೃಜತಿ ತ್ರಿವೃದ್ವಾ ಅಗ್ನಿರ್ಯಾವಾನೇವಾ-ಗ್ನಿಸ್ತಸ್ಯ ಶುಚಗ್ಂ ಶಮಯತಿ ಮಿತ್ರ-ಸ್ಸಗ್ಂಸೃಜ್ಯ ಪೃಥಿವೀಮಿತ್ಯಾಹ ಮಿತ್ರೋ ವೈ ಶಿವೋ ದೇವಾನಾ-ನ್ತೇನೈವೈ- [ದೇವಾನಾ-ನ್ತೇನೈವ, ಏನಗ್ಂ ಸಗ್ಂ ಸೃಜತಿ] 31
-ನಗ್ಂ ಸಗ್ಂ ಸೃಜತಿ ಶಾನ್ತ್ಯೈ ಯದ್ಗ್ರಾಮ್ಯಾಣಾ-ಮ್ಪಾತ್ರಾಣಾ-ಙ್ಕಪಾಲೈ-ಸ್ಸಗ್ಂಸೃಜೇ-ದ್ಗ್ರಾಮ್ಯಾಣಿ ಪಾತ್ರಾಣಿ ಶುಚಾ-ಽರ್ಪಯೇದರ್ಮಕಪಾಲೈ-ಸ್ಸಗ್ಂ ಸೃಜತ್ಯೇತಾನಿ ವಾ ಅನುಪಜೀವನೀಯಾನಿ ತಾನ್ಯೇವ ಶುಚಾ-ಽರ್ಪಯತಿ ಶರ್ಕರಾಭಿ-ಸ್ಸಗ್ಂ ಸೃಜತಿ ಧೃತ್ಯಾ ಅಥೋ ಶನ್ತ್ವಾಯಾ ಜಲೋಮೈ-ಸ್ಸಗ್ಂ ಸೃಜತ್ಯೇಷಾ ವಾ ಅಗ್ನೇಃ ಪ್ರಿಯಾ ತನೂರ್ಯದಜಾ ಪ್ರಿಯಯೈವೈನ-ನ್ತನುವಾ ಸಗ್ಂ ಸೃಜತ್ಯಥೋ ತೇಜಸಾ ಕೃಷ್ಣಾಜಿನಸ್ಯ ಲೋಮಭಿ-ಸ್ಸಗ್ಂ - [ಲೋಮಭಿ-ಸ್ಸಮ್, ಸೃಜತಿ ಯಜ್ಞೋ ವೈ] 32
ಸೃಜತಿ ಯಜ್ಞೋ ವೈ ಕೃಷ್ಣಾಜಿನಂ-ಯಁಜ್ಞೇನೈವ ಯಜ್ಞಗ್ಂ ಸಗ್ಂ ಸೃಜತಿ ರುದ್ರಾ-ಸ್ಸಭೃತ್ಯ ಪೃಥಿವೀಮಿತ್ಯಾಹೈತಾ ವಾ ಏತ-ನ್ದೇವತಾ ಅಗ್ರೇ ಸಮಭರ-ನ್ತಾಭಿರೇವೈನಗ್ಂ ಸಮ್ಭರತಿ ಮಖಸ್ಯ ಶಿರೋ-ಽಸೀತ್ಯಾಹ ಯಜ್ಞೋ ವೈ ಮಖಸ್ತಸ್ಯೈತ-ಚ್ಛಿರೋ ಯದುಖಾ ತಸ್ಮಾದೇವಮಾಹ ಯಜ್ಞಸ್ಯ ಪದೇ ಸ್ಥ ಇತ್ಯಾಹ ಯಜ್ಞಸ್ಯ ಹ್ಯೇತೇ [ ] 33
ಪದೇ ಅಥೋ ಪ್ರತಿಷ್ಠಿತ್ಯೈ ಪ್ರಾ-ಽನ್ಯಾಭಿ-ರ್ಯಚ್ಛತ್ಯನ್ವನ್ಯೈ-ರ್ಮನ್ತ್ರಯತೇ ಮಿಥುನತ್ವಾಯ ತ್ರ್ಯುದ್ಧಿ-ಙ್ಕರೋತಿ ತ್ರಯ ಇಮೇ ಲೋಕಾ ಏಷಾಂ-ಲೋಁಕಾನಾಮಾಪ್ತ್ಯೈ ಛನ್ದೋಭಿಃ ಕರೋತಿ ವೀರ್ಯಂ-ವೈಁ ಛನ್ದಾಗ್ಂಸಿ ವೀರ್ಯೇಣೈವೈನಾ-ಙ್ಕರೋತಿ ಯಜುಷಾ ಬಿಲ-ಙ್ಕರೋತಿ ವ್ಯಾವೃತ್ತ್ಯಾ ಇಯತೀ-ಙ್ಕರೋತಿ ಪ್ರಜಾಪತಿನಾ ಯಜ್ಞಮುಖೇನ ಸಮ್ಮಿತಾ-ನ್ದ್ವಿಸ್ತನಾ-ಙ್ಕರೋತಿ ಯಾವಾಪೃಥಿವ್ಯೋರ್ದೋಹಾಯ ಚತುಃಸ್ತನಾ-ಙ್ಕರೋತಿ ಪಶೂನಾ-ನ್ದೋಹಾಯಾಷ್ಟಾಸ್ತನಾ-ಙ್ಕರೋತಿ ಛನ್ದಸಾ-ನ್ದೋಹಾಯ ನವಾಶ್ರಿ-ಮಭಿಚರತಃ ಕುರ್ಯಾ-ತ್ತ್ರಿವೃತಮೇವ ವಜ್ರಗ್ಂ ಸಮ್ಭೃತ್ಯ ಭ್ರಾತೃವ್ಯಾಯ ಪ್ರಹರತಿ ಸ್ತೃತ್ಯೈ ಕೃತ್ವಾಯ ಸಾ ಮಹೀಮುಖಾಮಿತಿ ನಿ ದಧಾತಿ ದೇವತಾಸ್ವೇವೈನಾ-ಮ್ಪ್ರತಿಷ್ಠಾಪಯತಿ ॥ 34 ॥

(ತೇನೈವ - ಲೋಮಭಿ-ಸ್ಸ - ಮೇತೇ - ಅಭಿಚರತ - ಏಕವಿಗ್ಂಶತಿಶ್ಚ) (ಅ. 6)
ಸಪ್ತಭಿರ್ಧೂಪಯತಿ ಸಪ್ತ ವೈ ಶೀರ್ಷಣ್ಯಾಃ ಪ್ರಾಣಾ-ಶ್ಶಿರ ಏತ-ದ್ಯಜ್ಞಸ್ಯ ಯದುಖಾ ಶೀರ್ಷನ್ನೇವ ಯಜ್ಞಸ್ಯ ಪ್ರಾಣಾ-ನ್ದಧಾತಿ ತಸ್ಮಾ-ಥ್ಸಪ್ತ ಶೀರ್ಷ-ನ್ಪ್ರಾಣಾ ಅಶ್ವಶಕೇನ ಧೂಪಯತಿ ಪ್ರಾಜಾಪತ್ಯೋ ವಾ ಅಶ್ವಃ ಸಯೋನಿತ್ವಾಯಾ-ದಿತಿಸ್ತ್ವೇತ್ಯಾಹೇಯಂ-ವಾಁ ಅದಿತಿರದಿತ್ಯೈವಾದಿತ್ಯಾ-ಙ್ಖನತ್ಯಸ್ಯಾ ಅಕ್ರೂರಙ್ಕಾರಾಯ ನ ಹಿ ಸ್ವ-ಸ್ಸ್ವಗ್ಂ ಹಿನಸ್ತಿ ದೇವಾನಾ-ನ್ತ್ವಾ ಪತ್ನೀರಿತ್ಯಾಹ ದೇವಾನಾಂ- [ದೇವಾನಾಮ್, ವಾ ಏತಾ-ಮ್ಪತ್ನಯೋ-ಽಗ್ರೇ-ಽ] 35
-ಁವಾ ಏತಾ-ಮ್ಪತ್ನಯೋ-ಽಗ್ರೇ-ಽ-ಕುರ್ವ-ನ್ತಾಭಿರೇವೈನಾ-ನ್ದಧಾತಿ ಧಿಷಣಾಸ್ತ್ವೇತ್ಯಾಹ ವಿದ್ಯಾ ವೈ ಧಿಷಣಾ ವಿದ್ಯಾಭಿ-ರೇವೈನಾ-ಮಭೀನ್ಧೇ ಗ್ನಾಸ್ತ್ವೇತ್ಯಾಹ ಛನ್ದಾಗ್ಂಸಿ ವೈ ಗ್ನಾ ಶ್ಛನ್ದೋಭಿ-ರೇವೈನಾಗ್ ಶ್ರಪಯತಿ ವರೂತ್ರಯಸ್ತ್ವೇತ್ಯಾಹ ಹೋತ್ರಾ ವೈ ವರೂತ್ರಯೋ ಹೋತ್ರಾಭಿರೇವೈನಾ-ಮ್ಪಚತಿ ಜನಯಸ್ತ್ವೇತ್ಯಾಹ ದೇವಾನಾಂ-ವೈಁ ಪತ್ನೀ- [ಪತ್ನೀಃ, ಜನಯಸ್ತಾಭಿ-] 36
-ರ್ಜನಯಸ್ತಾಭಿ-ರೇವೈನಾ-ಮ್ಪಚತಿ ಷಡ್ಭಿಃ ಪಚತಿ ಷಡ್ವಾ ಋತವ ಋತುಭಿರೇವೈನಾ-ಮ್ಪಚತಿ ದ್ವಿಃ ಪಚನ್ತ್ವಿತ್ಯಾಹ ತಸ್ಮಾ-ದ್ದ್ವಿ-ಸ್ಸಂವಁಥ್ಸರಸ್ಯ ಸಸ್ಯ-ಮ್ಪಚ್ಯತೇ ವಾರುಣ್ಯುಖಾ-ಽಭೀದ್ಧಾ ಮೈತ್ರಿಯೋಪೈತಿ ಶಾನ್ತ್ಯೈ ದೇವಸ್ತ್ವಾ ಸವಿತೋ-ದ್ವಪತ್ವಿತ್ಯಾಹ ಸವಿತೃಪ್ರಸೂತ ಏವೈನಾ-ಮ್ಬ್ರಹ್ಮಣಾ ದೇವತಾಭಿರು-ದ್ವಪತ್ಯಪದ್ಯಮಾನಾ ಪೃಥಿವ್ಯಾಶಾ ದಿಶ ಆ ಪೃಣೇ- [ಆ ಪೃಣ, ಇತ್ಯಾಹ] 37
-ತ್ಯಾಹ ತಸ್ಮಾದಗ್ನಿ-ಸ್ಸರ್ವಾ ದಿಶೋ-ಽನು ವಿಭಾತ್ಯುತ್ತಿಷ್ಠ ಬೃಹತೀ ಭವೋರ್ಧ್ವಾ ತಿಷ್ಠ ಧ್ರುವಾ ತ್ವಮಿತ್ಯಾಹ ಪ್ರತಿಷ್ಠಿತ್ಯಾ ಅಸುರ್ಯ-ಮ್ಪಾತ್ರಮನಾಚ್ಛೃಣ್ಣಮಾ-ಚ್ಛೃಣತ್ತಿ ದೇವತ್ರಾ-ಽಕರಜಕ್ಷೀರೇಣಾ-ಽಽಚ್ಛೃಣತ್ತಿ ಪರಮಂ-ವಾಁ ಏತ-ತ್ಪಯೋ ಯದಜಕ್ಷೀರ-ಮ್ಪರಮೇಣೈವೈನಾ-ಮ್ಪಯಸಾ-ಽಽಚ್ಛೃಣತ್ತಿ ಯಜುಷಾ ವ್ಯಾವೃತ್ತ್ಯೈ ಛನ್ದೋಭಿರಾ ಚ್ಛೃಣತ್ತಿ ಛನ್ದೋಭಿರ್ವಾ ಏಷಾ ಕ್ರಿಯತೇ ಛನ್ದೋಭಿರೇವ ಛನ್ದಾಗ್ಸ್ಯಾ ಚ್ಛೃಣತ್ತಿ ॥ 38 ॥

(ಆಹ ದೇವಾನಾಂ - ಁವೈ ಪತ್ನೀಃ - ಪೃಣೈ - ಷಾ - ಷಟ್ ಚ) (ಅ. 7)
ಏಕವಿಗ್ಂಶತ್ಯಾ ಮಾಷೈಃ ಪುರುಷಶೀರ್ಷ-ಮಚ್ಛೈತ್ಯಮೇದ್ಧ್ಯಾ ವೈ ಮಾಷಾ ಅಮೇದ್ಧ್ಯ-ಮ್ಪುರುಷಶೀರ್ಷ-ಮಮೇದ್ಧ್ಯೈರೇವಾ-ಸ್ಯಾ-ಮೇದ್ಧ್ಯ-ನ್ನಿರವದಾಯ ಮೇದ್ಧ್ಯ-ಙ್ಕೃತ್ವಾ ಽಽಹರತ್ಯೇಕವಿಗ್ಂಶತಿ-ರ್ಭವನ್ತ್ಯೇಕವಿಗ್ಂಶೋ ವೈ ಪುರುಷಃ ಪುರುಷಸ್ಯಾ-ಽಽಪ್ತ್ಯೈ ವ್ಯೃದ್ಧಂ-ವಾಁ ಏತ-ತ್ಪ್ರಾಣೈರಮೇದ್ಧ್ಯಂ-ಯಁ-ತ್ಪುರುಷಶೀರ್ಷಗ್ಂ ಸಪ್ತಧಾ ವಿತೃಣ್ಣಾಂ-ವಁಲ್ಮೀಕವಪಾ-ಮ್ಪ್ರತಿ ನಿ ದಧಾತಿ ಸಪ್ತ ವೈ ಶೀರ್ಷಣ್ಯಾಃ ಪ್ರಾಣಾಃ ಪ್ರಾಣೈರೇವೈನ-ಥ್ಸಮರ್ಧಯತಿ ಮೇದ್ಧ್ಯತ್ವಾಯ ಯಾವನ್ತೋ [ಯಾವನ್ತಃ, ವೈ ಮೃತ್ಯುಬನ್ಧವ-] 39
ವೈ ಮೃತ್ಯುಬನ್ಧವ-ಸ್ತೇಷಾಂ-ಯಁಮ ಆಧಿಪತ್ಯ-ಮ್ಪರೀಯಾಯ ಯಮಗಾಥಾಭಿಃ ಪರಿಗಾಯತಿ ಯಮಾದೇವೈನ-ದ್ವೃಙ್ಕ್ತೇ ತಿಸೃಭಿಃ ಪರಿಗಾಯತಿ ತ್ರಯ ಇಮೇ ಲೋಕಾ ಏಭ್ಯ ಏವೈನಲ್ಲೋಕೇಭ್ಯೋ ವೃಙ್ಕ್ತೇ ತಸ್ಮಾ-ದ್ಗಾಯತೇ ನ ದೇಯ-ಙ್ಗಾಥಾ ಹಿ ತ-ದ್ವೃಙ್ಕ್ತೇ ಽಗ್ನಿಭ್ಯಃ ಪಶೂನಾ ಲಭತೇ ಕಾಮಾ ವಾ ಅಗ್ನಯಃ ಕಾಮಾನೇವಾವ ರುನ್ಧೇ ಯ-ತ್ಪಶೂ-ನ್ನಾ-ಽಽಲಭೇತಾ-ಽನವರುದ್ಧಾ ಅಸ್ಯ [ ] 40
ಪಶವಃ ಸ್ಯುರ್ಯ-ತ್ಪರ್ಯಗ್ನಿಕೃತಾನು-ಥ್ಸೃಜೇ-ದ್ಯಜ್ಞವೇಶಸ-ಙ್ಕುರ್ಯಾ-ದ್ಯ-ಥ್ಸಗ್ಗ್ಸ್ಥಾಪಯೇ-ದ್ಯಾತಯಾಮಾನಿ ಶೀರ್ಷಾಣಿ ಸ್ಯುರ್ಯ-ತ್ಪಶೂನಾಲಭತೇ ತೇನೈವ ಪಶೂನವ ರುನ್ಧೇ ಯ-ತ್ಪರ್ಯಗ್ನಿಕೃತಾನು-ಥ್ಸೃಜತಿ ಶೀರ್ಷ್ಣಾ-ಮಯಾತಯಾಮತ್ವಾಯ ಪ್ರಾಜಾಪತ್ಯೇನ ಸಗ್ಗ್ ಸ್ಥಾಪಯತಿ ಯಜ್ಞೋ ವೈ ಪ್ರಜಾಪತಿರ್ಯಜ್ಞ ಏವ ಯಜ್ಞ-ಮ್ಪ್ರತಿಷ್ಠಾಪಯತಿ ಪ್ರಜಾಪತಿಃ ಪ್ರಜಾ ಅಸೃಜತ ಸ ರಿರಿಚಾನೋ-ಽಮನ್ಯತ ಸ ಏತಾ ಆಪ್ರೀರಪಶ್ಯ-ತ್ತಾಭಿರ್ವೈ ಸ ಮುಖತ [ಸ ಮುಖತಃ, ಆತ್ಮಾನಮಾ ಽಪ್ರೀಣೀತ] 41
ಆತ್ಮಾನಮಾ ಽಪ್ರೀಣೀತ ಯದೇತಾ ಆಪ್ರಿಯೋ ಭವನ್ತಿ ಯಜ್ಞೋ ವೈ ಪ್ರಜಾಪತಿ-ರ್ಯಜ್ಞಮೇವೈತಾಭಿರ್ಮುಖತ ಆ ಪ್ರೀಣಾತ್ಯ-ಪರಿಮಿತಛನ್ದಸೋ ಭವನ್ತ್ಯಪರಿಮಿತಃ ಪ್ರಜಾಪತಿಃ ಪ್ರಜಾಪತೇರಾಪ್ತ್ಯಾ ಊನಾತಿರಿಕ್ತಾ ಮಿಥುನಾಃ ಪ್ರಜಾತ್ಯೈ ಲೋಮಶಂ-ವೈಁ ನಾಮೈತಚ್ಛನ್ದಃ ಪ್ರಜಾಪತೇಃ ಪಶವೋ ಲೋಮಶಾಃ ಪಶೂನೇವಾ-ಽವ ರುನ್ಧೇ ಸರ್ವಾಣಿ ವಾ ಏತಾ ರೂಪಾಣಿ ಸರ್ವಾಣಿ ರೂಪಾಣ್ಯಗ್ನೌ ಚಿತ್ಯೇ ಕ್ರಿಯನ್ತೇ ತಸ್ಮಾದೇತಾ ಅಗ್ನೇಶ್ಚಿತ್ಯಸ್ಯ [ಅಗ್ನೇಶ್ಚಿತ್ಯಸ್ಯ, ಭವನ್ತ್ಯೇಕವಿಗ್ಂ ಶತಿಗ್ಂ] 42
ಭವನ್ತ್ಯೇಕವಿಗ್ಂ ಶತಿಗ್ಂ ಸಾಮಿಧೇನೀರನ್ವಾಹ ರುಗ್ವಾ ಏಕವಿಗ್ಂಶೋ ರುಚಮೇವ ಗಚ್ಛತ್ಯಥೋ ಪ್ರತಿಷ್ಠಾಮೇವ ಪ್ರತಿಷ್ಠಾ ಹ್ಯೇಕವಿಗ್ಂಶ-ಶ್ಚತುರ್ವಿಗ್ಂಶತಿಮನ್ವಾಹ ಚತುರ್ವಿಗ್ಂಶತಿರರ್ಧಮಾಸಾ-ಸ್ಸಂವಁಥ್ಸರ-ಸ್ಸಂವಁಥ್ಸರೋ-ಽಗ್ನಿರ್ವೈಶ್ವಾನರ-ಸ್ಸಾಕ್ಷಾದೇವ ವೈಶ್ವಾನರಮವ ರುನ್ಧೇ ಪರಾಚೀರನ್ವಾಹ ಪರಾಙಿವ ಹಿ ಸುವರ್ಗೋ ಲೋಕ-ಸ್ಸಮಾಸ್ತ್ವಾ-ಽಗ್ನ ಋತವೋ ವರ್ಧಯನ್ತ್ವಿತ್ಯಾಹ ಸಮಾಭಿರೇವಾ-ಽಗ್ನಿಂ-ವಁರ್ಧಯ- [-ಽಗ್ನಿಂ-ವಁರ್ಧಯತಿ, ಋತುಭಿಃ ಸಂವಁಥ್ಸರಂ-ವಿಁಶ್ವಾ] 43
-ತ್ಯೃತುಭಿಃ ಸಂವಁಥ್ಸರಂ-ವಿಁಶ್ವಾ ಆ ಭಾಹಿ ಪ್ರದಿಶಃ ಪೃಥಿವ್ಯಾ ಇತ್ಯಾಹ ತಸ್ಮಾದಗ್ನಿ-ಸ್ಸರ್ವಾ ದಿಶೋ-ಽನು ವಿಭಾತಿ ಪ್ರತ್ಯೌಹತಾಮಶ್ವಿನಾ ಮೃತ್ಯುಮಸ್ಮಾದಿತ್ಯಾಹ ಮೃತ್ಯುಮೇವಾ-ಽಸ್ಮಾದಪ ನುದತ್ಯುದ್ವಯ-ನ್ತಮಸಸ್ಪರೀತ್ಯಾಹ ಪಾಪ್ಮಾ ವೈ ತಮಃ ಪಾಪ್ಮಾನಮೇವಾಸ್ಮಾದಪ ಹನ್ತ್ಯಗನ್ಮ ಜ್ಯೋತಿರುತ್ತಮ-ಮಿತ್ಯಾಹಾ-ಽಸೌ ವಾ ಆದಿತ್ಯೋ ಜ್ಯೋತಿರುತ್ತಮ-ಮಾದಿತ್ಯಸ್ಯೈವ ಸಾಯುಜ್ಯ-ಙ್ಗಚ್ಛತಿ ನ ಸಂವಁಥ್ಸರಸ್ತಿಷ್ಠತಿ ನಾಸ್ಯ ಶ್ರೀಸ್ತಿಷ್ಠತಿ ಯಸ್ಯೈತಾಃ ಕ್ರಿಯನ್ತೇ ಜ್ಯೋತಿಷ್ಮತೀ-ಮುತ್ತಮಾಮನ್ವಾಹ ಜ್ಯೋತಿರೇವಾಸ್ಮಾ ಉಪರಿಷ್ಟಾ-ದ್ದಧಾತಿ ಸುವರ್ಗಸ್ಯ ಲೋಕಸ್ಯಾನುಖ್ಯಾತ್ಯೈ ॥ 44 ॥

(ಯಾವನ್ತೋ - ಽಸ್ಯ - ಮುಖತ - ಶ್ಚಿತ್ಯಸ್ಯ - ವರ್ಧಯ - ತ್ಯಾದಿತ್ಯೋ - ಽಷ್ಟಾವಿಗ್ಂಶತಿಶ್ಚ) (ಅ. 8)
ಷಡ್ಭಿರ್ದೀಕ್ಷಯತಿ ಷಡ್ವಾ ಋತವ ಋತುಭಿರೇವೈನ-ನ್ದೀಕ್ಷಯತಿ ಸಪ್ತಭಿರ್ದೀಕ್ಷಯತಿ ಸಪ್ತ ಛನ್ದಾಗ್ಂಸಿ ಛನ್ದೋಭಿರೇವೈನ-ನ್ದೀಕ್ಷಯತಿ ವಿಶ್ವೇ ದೇವಸ್ಯ ನೇತುರಿತ್ಯ-ನುಷ್ಟುಭೋತ್ತಮಯಾ ಜುಹೋತಿ ವಾಗ್ವಾ ಅನುಷ್ಟು-ಪ್ತಸ್ಮಾ-ತ್ಪ್ರಾಣಾನಾಂ-ವಾಁಗುತ್ತಮೈ- ಕಸ್ಮಾದಕ್ಷರಾದನಾಪ್ತ-ಮ್ಪ್ರಥಮ-ಮ್ಪದ-ನ್ತಸ್ಮಾ-ದ್ಯ-ದ್ವಾಚೋ-ಽನಾಪ್ತ-ನ್ತನ್ಮನುಷ್ಯಾ ಉಪ ಜೀವನ್ತಿ ಪೂರ್ಣಯಾ ಜುಹೋತಿ ಪೂರ್ಣ ಇವ ಹಿ ಪ್ರಜಾಪತಿಃ [ಪ್ರಜಾಪತಿಃ, ಪ್ರಜಾಪತೇರಾಪತ್ಯೈ] 45
ಪ್ರಜಾಪತೇರಾಪ್ತ್ಯೈ ನ್ಯೂನಯಾ ಜುಹೋತಿ ನ್ಯೂನಾದ್ಧಿ ಪ್ರಜಾಪತಿಃ ಪ್ರಜಾ ಅಸೃಜತ ಪ್ರಜಾನಾಗ್ಂ ಸೃಷ್ಟ್ಯೈ ಯದರ್ಚಿಷಿ ಪ್ರವೃಞ್ಜ್ಯಾ-ದ್ಭೂತಮವ ರುನ್ಧೀತ ಯದಙ್ಗಾರೇಷು ಭವಿಷ್ಯದಙ್ಗಾರೇಷು ಪ್ರವೃಣಕ್ತಿ ಭವಿಷ್ಯ ದೇವಾವ ರುನ್ಧೇ ಭವಿಷ್ಯದ್ಧಿ ಭೂಯೋ ಭೂತಾ-ದ್ದ್ವಾಭ್ಯಾ-ಮ್ಪ್ರವೃಣಕ್ತಿ ದ್ವಿಪಾ-ದ್ಯಜಮಾನಃ ಪ್ರತಿಷ್ಠಿತ್ಯೈ ಬ್ರಹ್ಮಣಾ ವಾ ಏಷಾ ಯಜುಷಾ ಸಮ್ಭೃತಾ ಯದುಖಾ ಸಾ ಯದ್ಭಿದ್ಯೇತಾ-ಽಽರ್ತಿಮಾರ್ಚ್ಛೇ- [-ಽಽರ್ತಿಮಾರ್ಚ್ಛೇತ್, ಯಜಮಾನೋ] 46
-ದ್ಯಜಮಾನೋ ಹನ್ಯೇತಾ-ಽಸ್ಯ ಯಜ್ಞೋ ಮಿತ್ರೈತಾಮುಖಾ-ನ್ತಪೇತ್ಯಾಹ ಬ್ರಹ್ಮ ವೈ ಮಿತ್ರೋ ಬ್ರಹ್ಮನ್ನೇವೈನಾ-ಮ್ಪ್ರತಿಷ್ಠಾಪಯತಿ ನಾ-ಽಽರ್ತಿಮಾರ್ಚ್ಛತಿ ಯಜಮಾನೋ ನಾಸ್ಯ ಯಜ್ಞೋ ಹನ್ಯತೇ ಯದಿ ಭಿದ್ಯೇತ ತೈರೇವ ಕಪಾಲೈ-ಸ್ಸಗ್ಂ ಸೃಜೇ-ಥ್ಸೈವ ತತಃ ಪ್ರಾಯಶ್ಚಿತ್ತಿರ್ಯೋ ಗತಶ್ರೀ-ಸ್ಸ್ಯಾನ್ಮಥಿತ್ವಾ ತಸ್ಯಾವ ದದ್ಧ್ಯಾ-ದ್ಭೂತೋ ವಾ ಏಷ ಸ ಸ್ವಾ- [ಏಷ ಸ ಸ್ವಾಮ್, ದೇವತಾಮುಪೈತಿ] 47
-ನ್ದೇವತಾಮುಪೈತಿ ಯೋ ಭೂತಿಕಾಮ-ಸ್ಸ್ಯಾದ್ಯ ಉಖಾಯೈ ಸಮ್ಭವೇ-ಥ್ಸ ಏವ ತಸ್ಯ ಸ್ಯಾದತೋ ಹ್ಯೇಷ ಸಮ್ಭವತ್ಯೇಷ ವೈ ಸ್ವಯಮ್ಭೂರ್ನಾಮ ಭವತ್ಯೇವ ಯ-ಙ್ಕಾಮಯೇತ ಭ್ರಾತೃವ್ಯಮಸ್ಮೈ ಜನಯೇಯಮಿತ್ಯ-ನ್ಯತಸ್ತಸ್ಯಾ-ಽಽಹೃತ್ಯಾ-ಽವ ದದ್ಧ್ಯಾ-ಥ್ಸಾಕ್ಷಾದೇವಾಸ್ಮೈ ಭ್ರಾತೃವ್ಯ-ಞ್ಜನಯತ್ಯಮ್ಬರೀಷಾದನ್ನ ಕಾಮಸ್ಯಾವ ದದ್ಧ್ಯಾದಮ್ಬರೀಷೇ ವಾ ಅನ್ನ-ಮ್ಭ್ರಿಯತೇ ಸಯೋನ್ಯೇವಾನ್ನ- [ಸಯೋನ್ಯೇವಾನ್ನಮ್, ಅವ ರುನ್ಧೇ] 48
-ಮವ ರುನ್ಧೇ ಮುಞ್ಜಾನವ ದಧಾತ್ಯೂರ್ಗ್ವೈ ಮುಞ್ಜಾ ಊರ್ಜಮೇವಾಸ್ಮಾ ಅಪಿ ದಧಾತ್ಯಗ್ನಿರ್ದೇವೇಭ್ಯೋ ನಿಲಾಯತ ಸ ಕ್ರುಮುಕ-ಮ್ಪ್ರಾ-ಽವಿಶ-ತ್ಕ್ರುಮುಕಮವ ದಧಾತಿ ಯದೇವಾಸ್ಯ ತತ್ರ ನ್ಯಕ್ತ-ನ್ತ ದೇವಾವ ರುನ್ಧ ಆಜ್ಯೇನ ಸಂ-ಯೌಁತ್ಯೇತದ್ವಾ ಅಗ್ನೇಃ ಪ್ರಿಯ-ನ್ಧಾಮ ಯದಾಜ್ಯ-ಮ್ಪ್ರಿಯೇಣೈವೈನ-ನ್ಧಾಮ್ನಾ ಸಮರ್ಧಯತ್ಯಥೋ ತೇಜಸಾ [ತೇಜಸಾ, ವೈ ಕಕನ್ತೀಮಾ ದಧಾತಿ] 49
ವೈ ಕಙ್ಕತೀಮಾ ದಧಾತಿ ಭಾ ಏವಾವ ರುನ್ಧೇ ಶಮೀಮಯೀಮಾ ದಧಾತಿ ಶಾನ್ತ್ಯೈ ಸೀದ ತ್ವ-ಮ್ಮಾತುರಸ್ಯಾ ಉಪಸ್ಥ ಇತಿ ತಿಸೃಭಿರ್ಜಾತಮುಪ ತಿಷ್ಠತೇ ತ್ರಯ ಇಮೇ ಲೋಕಾ ಏಷ್ವೇವ ಲೋಕೇಷ್ವಾವಿದ-ಙ್ಗಚ್ಛತ್ಯಥೋ ಪ್ರಾಣಾನೇವಾ-ಽಽತ್ಮ-ನ್ಧತ್ತೇ ॥ 50 ॥

( ಪ್ರಜಾಪತಿ--ರ್ ಋಚ್ಛೇಥ್ - ಸ್ವಾ - ಮೇವಾನ್ನಂ - ತೇಜಸಾ - ಚತುಸ್ತ್ರಿಗ್ಂಶಚ್ಚ) (ಅ. 9)
ನ ಹ ಸ್ಮ ವೈ ಪುರಾ-ಽಗ್ನಿರಪರಶುವೃಕ್ಣ-ನ್ದಹತಿ ತದಸ್ಮೈ ಪ್ರಯೋಗ ಏವರ್ಷಿರಸ್ವದಯ-ದ್ಯದಗ್ನೇ ಯಾನಿ ಕಾನಿ ಚೇತಿ ಸಮಿಧಮಾ ದಧಾತ್ಯಪರಶುವೃಕ್ಣ-ಮೇವಾಸ್ಮೈ ಸ್ವದಯತಿ ಸರ್ವಮಸ್ಮೈ ಸ್ವದತೇ ಯ ಏವಂ-ವೇಁದೌದುಮ್ಬರೀಮಾ ದಧಾತ್ಯೂರ್ಗ್ವಾ ಉದುಮ್ಬರ ಊರ್ಜಮೇವಾಸ್ಮಾ ಅಪಿ ದಧಾತಿ ಪ್ರಜಾಪತಿರಗ್ನಿ-ಮಸೃಜತ ತಗ್ಂ ಸೃಷ್ಟಗ್ಂ ರಕ್ಷಾಗ್- [ಸೃಷ್ಟಗ್ಂ ರಕ್ಷಾಗ್ಂಸಿ, ಅಜಿಘಾಗ್ಂಸನ್ಥ್ಸ ಏತ-] 51
-ಸ್ಯಜಿಘಾಗ್ಂಸನ್ಥ್ಸ ಏತ-ದ್ರಾಕ್ಷೋಘ್ನಮಪಶ್ಯ-ತ್ತೇನ ವೈ ಸರಕ್ಷಾಗ್ಸ್ಯಪಾ-ಽಹತ ಯ-ದ್ರಾಕ್ಷೋಘ್ನ-ಮ್ಭವತ್ಯಗ್ನೇರೇವ ತೇನ ಜಾತಾ-ದ್ರಕ್ಷಾಗ್ಸ್ಯಪ ಹನ್ತ್ಯಾಶ್ವತ್ಥೀಮಾ ದಧಾತ್ಯಶ್ವತ್ಥೋ ವೈ ವನಸ್ಪತೀನಾಗ್ಂ ಸಪತ್ನಸಾಹೋ ವಿಜಿತ್ಯೈ ವೈಕಙ್ಕತೀಮಾ ದಧಾತಿ ಭಾ ಏವಾವ ರುನ್ಧೇ ಶಮೀಮಯೀಮಾ ದಧಾತಿ ಶಾನ್ತ್ಯೈ ಸಗ್ಂಶಿತ-ಮ್ಮೇ ಬ್ರಹ್ಮೋದೇಷಾ-ಮ್ಬಾಹೂ ಅತಿರಮಿತ್ಯುತ್ತಮೇ ಔದುಮ್ಬರೀ [ಔದುಮ್ಬರೀ, ವಾಚಯತಿ ಬ್ರಹ್ಮಣೈವ] 52
ವಾಚಯತಿ ಬ್ರಹ್ಮಣೈವ ಕ್ಷತ್ರಗ್ಂ ಸಗ್ಗ್ ಶ್ಯತಿ ಕ್ಷತ್ರೇಣ ಬ್ರಹ್ಮ ತಸ್ಮಾ-ದ್ಬ್ರಾಹ್ಮಣೋ ರಾಜನ್ಯವಾನತ್ಯನ್ಯ-ಮ್ಬ್ರಾಹ್ಮಣ-ನ್ತಸ್ಮಾ-ದ್ರಾಜನ್ಯೋ ಬ್ರಾಹ್ಮಣವಾನತ್ಯನ್ಯಗ್ಂ ರಾಜನ್ಯ-ಮ್ಮೃತ್ಯುರ್ವಾ ಏಷ ಯದಗ್ನಿರಮೃತಗ್ಂ ಹಿರಣ್ಯಗ್ಂ ರುಕ್ಮಮನ್ತರ-ಮ್ಪ್ರತಿಮುಞ್ಚತೇ ಽಮೃತಮೇವ ಮೃತ್ಯೋರನ್ತರ್ಧತ್ತ ಏಕವಿಗ್ಂಶತಿನಿರ್ಬಾಧೋ ಭವತ್ಯೇಕವಿಗ್ಂಶತಿರ್ವೈ ದೇವಲೋಕಾ ದ್ವಾದಶ ಮಾಸಾಃ ಪಞ್ಚರ್ತವಸ್ತ್ರಯ ಇಮೇ ಲೋಕಾ ಅಸಾವಾದಿತ್ಯ [ಅಸಾವಾದಿತ್ಯಃ, ಏಕವಿಗ್ಂಶ ಏತಾವನ್ತೋ ವೈ] 53
ಏಕವಿಗ್ಂಶ ಏತಾವನ್ತೋ ವೈ ದೇವಲೋಕಾಸ್ತೇಭ್ಯ ಏವ ಭ್ರಾತೃವ್ಯಮನ್ತರೇತಿ ನಿರ್ಬಾಧೈರ್ವೈ ದೇವಾ ಅಸುರಾ-ನ್ನಿರ್ಬಾಧೇ-ಽಕುರ್ವತ ತನ್ನಿರ್ಬಾಧಾನಾ-ನ್ನಿರ್ಬಾಧತ್ವ-ನ್ನಿರ್ಬಾಧೀ ಭವತಿ ಭ್ರಾತೃವ್ಯಾನೇವ ನಿರ್ಬಾಧೇ ಕುರುತೇ ಸಾವಿತ್ರಿಯಾ ಪ್ರತಿಮುಞ್ಚತೇ ಪ್ರಸೂತ್ಯೈ ನಕ್ತೋಷಾಸೇತ್ಯುತ್ತರಯಾ ಽಹೋರಾತ್ರಾಭ್ಯಾಮೇವೈನ-ಮುದ್ಯಚ್ಛತೇ ದೇವಾ ಅಗ್ನಿ-ನ್ಧಾರಯ-ನ್ದ್ರವಿಣೋದಾ ಇತ್ಯಾಹ ಪ್ರಾಣಾ ವೈ ದೇವಾ ದ್ರವಿಣೋದಾ ಅಹೋರಾತ್ರಾಭ್ಯಾಮೇವೈನಮುದ್ಯತ್ಯ [ ] 54
ಪ್ರಾಣೈರ್ದಾಧಾರಾ ಽಽಸೀನಃ ಪ್ರತಿಮುಞ್ಚತೇ ತಸ್ಮಾದಾಸೀನಾಃ ಪ್ರಜಾಃ ಪ್ರಜಾಯನ್ತೇ ಕೃಷ್ಣಾಜಿನಮುತ್ತರ-ನ್ತೇಜೋ ವೈ ಹಿರಣ್ಯ-ಮ್ಬ್ರಹ್ಮ ಕೃಷ್ಣಾಜಿನ-ನ್ತೇಜಸಾ ಚೈವೈನ-ಮ್ಬ್ರಹ್ಮಣಾ ಚೋಭಯತಃ ಪರಿಗೃಹ್ಣಾತಿ ಷಡುದ್ಯಾಮಗ್ಂ ಶಿಕ್ಯ-ಮ್ಭವತಿ ಷಡ್ವಾ ಋತವ ಋತುಭಿರೇವೈನ-ಮುದ್ಯಚ್ಛತೇ ಯ-ದ್ದ್ವಾದಶೋದ್ಯಾಮಗ್ಂ ಸಂವಁಥ್ಸರೇಣೈವ ಮೌಞ್ಜ-ಮ್ಭವತ್ಯೂರ್ಗ್ವೈ ಮುಞ್ಜಾ ಊರ್ಜೈವೈನಗ್ಂ ಸ ಮರ್ಧಯತಿ ಸುಪರ್ಣೋ-ಽಸಿ ಗರುತ್ಮಾನಿತ್ಯವೇಕ್ಷತೇ ರೂಪಮೇವಾಸ್ಯೈತನ್ಮಹಿಮಾನಂ-ವ್ಯಾಁಚಷ್ಟೇ ದಿವ-ಙ್ಗಚ್ಛ ಸುವಃ ಪತೇತ್ಯಾಹ ಸುವರ್ಗಮೇವೈನಂ-ಲೋಁಕ-ಙ್ಗಮಯತಿ ॥ 55 ॥

(ರಕ್ಷಾಗ್ಸ್ಯೌ - ದುಬಂರಿ - ಆದಿತ್ಯ - ಉದ್ಯತ್ಯ - ಸಂ - ಚತುರ್ವಿಗ್ಂಶತಿಶ್ಚ) (ಅ. 10)
ಸಮಿದ್ಧೋ ಅಞ್ಜನ್ ಕೃದರ-ಮ್ಮತೀನಾ-ಙ್ಘೃತಮಗ್ನೇ ಮಧುಮ-ತ್ಪಿನ್ವಮಾನಃ । ವಾಜೀ ವಹನ್ ವಾಜಿನ-ಞ್ಜಾತವೇದೋ ದೇವಾನಾಂ-ವಁಕ್ಷಿ ಪ್ರಿಯಮಾ ಸಧಸ್ಥಮ್ ॥ ಘೃತೇನಾಞ್ಜನ್ಥ್ಸ-ಮ್ಪಥೋ ದೇವಯಾನಾ-ನ್ಪ್ರಜಾನನ್ ವಾಜ್ಯಪ್ಯೇತು ದೇವಾನ್ । ಅನು ತ್ವಾ ಸಪ್ತೇ ಪ್ರದಿಶಃ ಸಚನ್ತಾಗ್ ಸ್ವಧಾಮಸ್ಮೈ ಯಜಮಾನಾಯ ಧೇಹಿ ॥ ಈಡ್ಯಶ್ಚಾಸಿ ವನ್ದ್ಯಶ್ಚ ವಾಜಿನ್ನಾಶುಶ್ಚಾಸಿ ಮೇದ್ಧ್ಯಶ್ಚ ಸಪ್ತೇ । ಅಗ್ನಿಷ್ಟ್ವಾ [ಅಗ್ನಿಷ್ಟ್ವಾ, ದೇವೈರ್ವಸುಭಿ-ಸ್ಸಜೋಷಾಃ] 56
ದೇವೈರ್ವಸುಭಿ-ಸ್ಸಜೋಷಾಃ ಪ್ರೀತಂ-ವಁಹ್ನಿಂ-ವಁಹತು ಜಾತವೇದಾಃ ॥ ಸ್ತೀರ್ಣ-ಮ್ಬರ್ಹಿ-ಸ್ಸುಷ್ಟರೀಮಾ ಜುಷಾಣೋರು ಪೃಥು ಪ್ರಥಮಾನ-ಮ್ಪೃಥಿವ್ಯಾಮ್ । ದೇವೇಭಿರ್ಯುಕ್ತಮದಿತಿ-ಸ್ಸಜೋಷಾ-ಸ್ಸ್ಯೋನ-ಙ್ಕೃಣ್ವಾನಾ ಸುವಿತೇ ದಧಾತು ॥ ಏತಾ ಉ ವ-ಸ್ಸುಭಗಾ ವಿಶ್ವರೂಪಾ ವಿಪಕ್ಷೋಭಿ-ಶ್ಶ್ರಯಮಾಣಾ ಉದಾತೈಃ । ಋಷ್ವಾ-ಸ್ಸತೀಃ ಕವಷ-ಶ್ಶುಮ್ಭಮಾನಾ ದ್ವಾರೋ ದೇವೀ-ಸ್ಸುಪ್ರಾಯಣಾ ಭವನ್ತು ॥ ಅನ್ತರಾ ಮಿತ್ರಾವರುಣಾ ಚರನ್ತೀ ಮುಖಂ-ಯಁಜ್ಞಾನಾಮಭಿ ಸಂವಿಁದಾನೇ । ಉಷಾಸಾ ವಾಗ್ಂ [ಉಷಾಸಾ ವಾಮ್, ಸುಹಿರಣ್ಯೇ ಸುಶಿಲ್ಪೇ] 57
ಸುಹಿರಣ್ಯೇ ಸುಶಿಲ್ಪೇ ಋತಸ್ಯ ಯೋನಾವಿಹ ಸಾದಯಾಮಿ ॥ ಪ್ರಥಮಾ ವಾಗ್ಂ ಸರಥಿನಾ ಸುವರ್ಣಾ ದೇವೌ ಪಶ್ಯನ್ತೌ ಭುವನಾನಿ ವಿಶ್ವಾ । ಅಪಿಪ್ರಯ-ಞ್ಚೋದನಾ ವಾ-ಮ್ಮಿಮಾನಾ ಹೋತಾರಾ ಜ್ಯೋತಿಃ ಪ್ರದಿಶಾ ದಿಶನ್ತಾ ॥ ಆದಿತ್ಯೈರ್ನೋ ಭಾರತೀ ವಷ್ಟು ಯಜ್ಞಗ್ಂ ಸರಸ್ವತೀ ಸಹ ರುದ್ರೈರ್ನ ಆವೀತ್ । ಇಡೋಪಹೂತಾ ವಸುಭಿ-ಸ್ಸಜೋಷಾ ಯಜ್ಞ-ನ್ನೋ ದೇವೀರಮೃತೇಷು ಧತ್ತ ॥ ತ್ವಷ್ಟಾ ವೀರ-ನ್ದೇವಕಾಮ-ಞ್ಜಜಾನ ತ್ವಷ್ಟುರರ್ವಾ ಜಾಯತ ಆಶುರಶ್ವಃ । 58
ತ್ವಷ್ಟೇದಂ-ವಿಁಶ್ವ-ಮ್ಭುವನ-ಞ್ಜಜಾನ ಬಹೋಃ ಕರ್ತಾರಮಿಹ ಯಕ್ಷಿ ಹೋತಃ ॥ ಅಶ್ವೋ ಘೃತೇನ ತ್ಮನ್ಯಾ ಸಮಕ್ತ ಉಪ ದೇವಾಗ್ಂ ಋತುಶಃ ಪಾಥ ಏತು । ವನಸ್ಪತಿ-ರ್ದೇವಲೋಕ-ಮ್ಪ್ರಜಾನನ್ನಗ್ನಿನಾ ಹವ್ಯಾ ಸ್ವದಿತಾನಿ ವಕ್ಷತ್ ॥ ಪ್ರಜಾಪತೇಸ್ತಪಸಾ ವಾವೃಧಾನ-ಸ್ಸದ್ಯೋ ಜಾತೋ ದಧಿಷೇ ಯಜ್ಞಮಗ್ನೇ । ಸ್ವಾಹಾಕೃತೇನ ಹವಿಷಾ ಪುರೋಗಾ ಯಾಹಿ ಸಾದ್ಧ್ಯಾ ಹವಿರದನ್ತು ದೇವಾಃ ॥ 59 ॥