6.3 - cātvālā ddhiṣṇiyā nupavapati - kṛṣṇa yajurveda taittirīya saṃhitā pāṭhaḥ

kṛṣṇa yajurvedīya taittirīya saṃhitāyāṃ ṣaṣṭhakāṇḍe tṛtīyaḥ praśnaḥ - somamantrabrāhmaṇanirūpaṇaṃ
o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | hariḥ om ||
cātvā̭lā-ddhiṣṇi̭yānupa̭ vapati yonirvai yajñasya cātvā̭laṃ-ya~jñasya̭ sayonitvāya̭ devā vai yajña-mparā̭-'jayanta tamāgnīddhrā-tpunarapā̭jayannetadvai yajñasyā-pa̭rājitaṃ-ya~dāgnīddhraṃ-ya~dāgnīddhrāddhiṣṇi̭yān. vihara̭ti yadeva yajñasyā-pa̭rājita-ntata̭ evaina-mpuna̭stanute parājityḙva khalu vā ete ya̭nti ye ba̭hiṣpavamānagṃ sarpa̭nti bahiṣpavamāne stuta [stute, āhāgnī̭dagnīn. vi] 1
āhāgnī̭dagnīn. vi ha̭ra barhi-sstṛ̭ṇāhi puroḍāśāgṃ ala̭-ṅkurviti̭ yajñamevāpajitya puna̭stanvānā yantyaṅgā̭rairdve sava̭ne vi ha̭rati śalākā̭bhi-stṛtīyagṃ̭ saśukratvāyātho sa-mbha̭ratyevainaddhiṣṇi̭yā vā amuṣmi̭n ~loke soma̭marakṣa-ntebhyo-'dhi somamā-'ha̭ra-nta ma̭nvavāyanta-mparya̭viśan. ya evaṃ-ve~da̭ vindatḙ [ya evaṃ-ve~da̭ vindate, pariveṣṭāra-nte] 2
pariveṣṭāra-nte so̭mapīthena vyārdhyanta te deveṣṷ somapīthamaicchanta tā-ndevā a̭bruva-ndvedve nāma̭nī kuruddhvamatha pra vā-''phsyatha na vetyagnayo vā atha dhiṣṇi̭yāstasmā-ddvināmā brāhmaṇo-'rdhṷkasteṣāṃ-ye~ nedi̭ṣṭha-mparyavi̭śa-nte so̭mapītha-mprā-'pnṷvannāhavanīya̭ āgnīddhrīyo̭ hotrīyo̭ mārjālīyastasmā-tteṣṷ juhvatyatihāya vaṣa̭-ṭkaroti vi hyḙ [vi hi, ete so̭mapīthenā-''rdhya̭nta] 3
-te so̭mapīthenā-''rdhya̭nta devā vai yāḥ prācī-rāhṷtī-rajṷhavurye purastādasṷrā āsa-ntāg stābhiḥ prāṇṷdanta yāḥ pratīcīrye paścādasṷrā āsa-ntāgstābhi-rapā̭nudanta prācī̭ranyā āhṷtayo hūyante pratyaṅṅāsī̭no dhiṣṇi̭yān. vyāghā̭rayati paścāccaiva purastācca yaja̭māno bhrātṛ̭vyā-npra ṇṷdate tasmā-tparā̭cīḥ prajāḥ pra vī̭yante pratīcī- [pratīcīḥ, jāyante prāṇā vā ete] 4
-rjāyante prāṇā vā ete yaddhiṣṇi̭yā yada̭ddhvaryuḥ pratya-ndhiṣṇi̭yā-natisarpe-tprāṇān-thsaṅka̭rṣe-tpramāyṷka-ssyānnābhirvā eṣā yajñasya yaddhotordhvaḥ khalu vai nābhyai prāṇo-'vāṃ̭apāno yada̭dhvaryuḥ pratyaṃ hotā̭ramatisarpḙdapāne prāṇa-nda̭dhyā-tpramāyṷka-ssyānnāddhvaryurupa̭ gāye-dvāgvīryo vā a̭ddhvaryu-ryada̭ddhvaryurṷpa-gāyḙdu-dgātre [ ] 5
vācagṃ sa-mpra ya̭cche-dupadāsṷkā-'sya vā-khsyādbrahmavādino̭ vadanti nāsagg̭sthite some-'ddhvaryuḥ pratyaṅ-khsado-'tī̭yādatha̭ kathā dākṣiṇāni hotṷmeti yāmo hi sa teṣā-ṅkasmā aha̭ devā yāmaṃ-vā~-'yā̭maṃ-vā~-'nṷ jñāsyantītyu-tta̭reṇā-''gnīddhra-mparītya̭ juhoti dākṣiṇāni na prāṇānthsa-ṅka̭rṣati nya̭nye dhiṣṇi̭yā upyante nānye yā-nnivapa̭ti tena tā-nprī̭ṇāti yā-nnanivapa̭ti yada̭nudiśati tena tān || 6 ||

(stute - vindate - hi - vī̭yante pratīcī̭ - rudgrātra - upyante - catṷrdaśa ca) (a. 1)
suvargāya vā etāni̭ lokāya̭ hūyante ya-dvai̭sarjanāni dvābhyā-ṅgārha̭patye juhoti dvipā-dyaja̭mānaḥ prati̭ṣṭhityā āgnīddhre juhotyantari̭kṣa evā-''kra̭mata āhavanīyḙ juhoti suvargamevainaṃ̭-lo~ka-ṅga̭mayati devān. vai sṷvargaṃ-lo~kaṃ-ya~to rakṣāg̭sya jighāgṃsante somḙna rājñā rakṣāg̭-syapahatyāptu-mātmāna̭-ṅkṛtvā sṷvargaṃ-lo~kamā̭ya-nrakṣa̭sā-manṷpalābhāyā ''tta-ssomo̭ bhavatyatha̭ [bhavatyatha̭, vaisarjanāni̭ juhoti] 7
vaisarjanāni̭ juhoti rakṣa̭sāmapa̭hatyai tvagṃ so̭ma tanūkṛdbhya ityā̭ha tanūkṛddhya̭ṣa dveṣobhyo-'nyakṛ̭tebhya ityā̭hānyakṛ̭tāni hi rakṣāg̭syuru yantā-'si varṷ̄thamityā̭horu ṇa̭skṛdhīti vāvaitadā̭ha juṣāṇo apturājya̭sya vetvityā̭hāptumeva yaja̭māna-ṅkṛtvā sṷvargaṃ-lo~ka-ṅga̭mayati rakṣa̭sā-manṷpalābhāyā-'' soma̭-ndadata [soma̭-ndadate, ā grāvṇṇa ā] 8
ā grāvṇṇa ā vā̭yavyānyā dro̭ṇakalaśamu-tpatnīmā na̭yantyanvanāgṃ̭si pra va̭rtayanti yāva̭devāsyāsti tena̭ saha sṷvargaṃ-lo~kamḙti naya̭vatyarcā-''gnīddhre juhoti suvargasya̭ lokasyābhinītyai grāvṇṇo̭ vāyavyā̭ni droṇakalaśamāgnīddhra upa̭ vāsayati vi hyḙna-ntairgṛhṇate ya-thsahopa̭vāsayḙ-dapuvāyeta̭ saumyarcā pra pā̭dayati svayai- [pra pā̭dayati svaya, evaina̭-ndevata̭yā] 9
-vaina̭-ndevata̭yā pra pā̭dayatyadi̭tyā-ssado-'syadi̭tyā-ssada ā sīdetyā̭ha yathāyajurevaita-dyaja̭māno vā etasya̭ purā goptā bha̭vatyeṣa vo̭ deva savita-ssoma ityā̭ha savitṛpra̭sūta evaina̭-ndevatābhya-ssa-mpraya̭cchatyeta-ttvagṃ so̭ma devo devānupā̭gā ityā̭ha devo hyḙṣa sa- [devo hyḙṣa sann, devānupaitīdamaha-] 10
-ndevānupaitīdamaha-mma̭nuṣyo̭ manuṣyā̭nityā̭ha manuṣyo(1) hyḙṣa sa-nma̭nuṣyā̭nupaiti yadeta-dyajurna brūyādapra̭jā apaśuryaja̭māna-ssyā-thsaha prajayā̭ saha rāyaspoṣeṇetyā̭ha prajayaiva paśubhiḥ̭ sahemaṃ-lo~kamupāva̭rtate namo̭ devebhya ityā̭ha namaskāro hi devānāg̭ svadhā pitṛbhya ityā̭ha svadhākāro hi [svadhākāro hi, pitṛṇāmidamaha-] 11
pi̭tṛṇāmidamaha-nnirvarṷṇasya pāśādityā̭ha varuṇapāśādeva nirmṷcyate 'gne vratapata ātmanaḥ pūrvā̭ tanūrādeyetyā̭huḥ ko hi tadveda ya-dvasī̭yān-thsve vaśḙ bhūte puna̭rvā dadā̭ti na veti grāvā̭ṇo vai soma̭sya rājño̭ malimlusenā ya evaṃ-vi~dvā-ngrāvṇṇa āgnīddhra upavāsaya̭ti naina̭-mmalimlusenā vi̭ndati || 12 ||

(atha̭-dadate - svayā - santh - sva̭dhākāro hi - vi̭ndati) (a. 2)
vaiṣṇavyarcā hutvā yūpamacchai̭ti vaiṣṇavo vai devata̭yā yūpa-ssvayaivaina̭-ndevatayā 'cchaityatyanyānagā-nnānyā-nupā̭gāmityāhāti hya̭nyāneti nānyā-nupaityarvāktvā parai̭ravida-mparo-'va̭rairityā̭hārvāghyḙna-mparairvindati̭ paro-'va̭raista-ntvā̭ juṣe [juṣe, vaiṣṇava-ndḙvayajyāyā] 13
vaiṣṇava-ndḙvayajyāyā ityā̭ha devayajyāyai hyḙna-ñjuṣatḙ devastvā̭ savitā maddhvā̭-'naktvityā̭ha teja̭saivaina̭-manaktyoṣa̭dhe trāya̭svainagg svadhi̭te mainagṃ̭ higṃsīrityā̭ha vajro vai svadhi̭ti-śśāntyai svadhi̭tervṛkṣasya bibhya̭taḥ prathamena śaka̭lena saha tejaḥ parā̭ patati yaḥ pra̭thama-śśaka̭laḥ parāpate-ttamapyā ha̭re-thsatḙjasa- [ha̭re-thsatḙjasam, evainamā] 14
-mevainamā ha̭ratīme vai lokā yūpā-tprayato bi̭bhyati divamagrḙṇa mā lḙkhīrantari̭kṣa-mmaddhyḙna mā higṃ̭sīrityā̭haibhya evainaṃ̭-lo~kebhyaḥ̭ śamayati vana̭spate śatava̭lśo vi rohetyāvraśca̭ne juhoti tasmā̭-dāvraśca̭nā-dvṛkṣāṇā-mbhūyāgṃ̭sa utti̭ṣṭhanti sahasra̭valśā vi vayagṃ rṷhemetyā̭hā- ''śiṣa̭mevaitāmā śāste 'na̭kṣasaṅga- [śāste 'na̭kṣasaṅgam, vṛśce-dyada̭kṣasaṅgaṃ-] 15
-~vṛśce-dyada̭kṣasaṅgaṃ-vṛ~śceda̭dhaīṣaṃ-ya~ja̭mānasya pramāyṷkagg syādya-ṅkāmayetāpra̭tiṣṭhita-ssyādityā̭roha-ntasma̭ vṛścedeṣa vai vanaspatī̭nā-mapra̭tiṣṭhito-'pra̭tiṣṭhita eva bha̭vati ya-ṅkāmayḙtāpaśu-ssyāditya̭parṇa-ntasmai śuṣkāgraṃ-vṛ~ścedeṣa vai vanaspatī̭nā-mapaśavyo̭-'paśureva bha̭vati ya-ṅkāmayḙta paśumān-thsyāditi̭ bahuparṇa-ntasmai̭ bahuśākhaṃ-vṛ~̭ścedeṣa vai [ ] 16
vanaspatī̭nā-mpaśavyaḥ̭ paśumāneva bha̭vati prati̭ṣṭhitaṃ-vṛ~śce-tpratiṣṭhākā̭masyaiṣa vai vanaspatī̭nā-mprati̭ṣṭhito ya-ssame bhūmyai svādyonḙ rūḍhaḥ pratyeva ti̭ṣṭhati yaḥ pratyaṅṅupa̭natastaṃ-vṛ~̭śce-thsa hi medha̭mabhyupa̭nataḥ pañcā̭ratni-ntasmai̭ vṛścedya-ṅkāmayetopai̭namutta̭ro yajño na̭mediti pañcākṣarā paṅktiḥ pāṅkto̭ yajña upai̭namutta̭ro yajño [yajñaḥ, namati ṣaḍa̭ratni] 17
na̭mati ṣaḍa̭ratni-mpratiṣṭhākā̭masya ṣaḍvā ṛtava̭ ṛtuṣveva prati̭ tiṣṭhati saptāra̭tni-mpaśukā̭masya saptapa̭dā śakva̭rī paśava-śśakva̭rī paśūnevāva̭ rundhe navā̭ratni-nteja̭skāmasya trivṛtā stomḙna sammi̭ta-nteja̭strivṛ-ttḙjasvyḙva bha̭va-tyekā̭daśāratni-mindriyakā̭ma-syaikā̭daśākṣarā triṣṭugi̭ndriya-ntriṣṭugi̭ndriyāvyḙva bha̭vati pañca̭daśāratni-mbhrātṛ̭vyavataḥ pañcadaśo vajro bhrātṛ̭vyābhibhūtyai saptada̭śāratni-mprajākā̭masya saptadaśaḥ prajāpa̭tiḥ prajāpa̭terāptyā eka̭vigṃśatyaratni-mpratiṣṭhākā̭ma-syaikavigṃśa-sstomā̭nā-mpratiṣṭhā prati̭ṣṭhityā aṣṭāśri̭rbhava-tyaṣṭākṣa̭rā gāyatrī tejo̭ gāyatrī gā̭yatrī ya̭jñamukha-nteja̭saiva gā̭yatriyā ya̭jñamukhena sammi̭taḥ || 18 ||

(juṣe - satḙjasa - mana̭kṣasaṅgaṃ - bahuśākhaṃ-vṛ~̭ścedeṣa vai - yajña upai̭namutta̭ro yajña - āptyā - ekānnavigṃ̭śatiśca̭) (a. 3)
pṛthivyai tvā-'ntari̭kṣāya tvā dive tvetyā̭haibhya evainaṃ̭-lo~kebhyaḥ prokṣa̭ti parāñca-mprokṣa̭ti parā̭ṅiva hi sṷvargo lokaḥ krūrami̭va vā eta-tka̭roti ya-tkhana̭tyapo-'va̭ nayati śāntyai yava̭matīrava̭ nayatyūrgvai yavo yaja̭mānena yūpa-ssammi̭to yāvā̭neva yaja̭māna-stāva̭tī-mevāsmi-nnūrja̭-ndadhāti [mevāsmi-nnūrja̭-ndadhāti, pitṛṇāgṃ sada̭namasīti̭] 19
pitṛṇāgṃ sada̭namasīti̭ barhirava̭ stṛṇāti pitṛdevatyā(1)gg hyḙta-dyannikhā̭taṃ-ya~-dbarhirana̭vastīrya minuyā-tpi̭tṛdevatyo̭ nikhā̭ta-ssyā-dbarhira̭vastīrya̭ minotyasyāmevaina̭-mminoti yūpaśakalamavāsyati satḙjasamevaina̭-mminoti devastvā̭ savitā maddhvā̭-'naktvityā̭ha teja̭saivaina̭manakti supippalābhya-stvauṣa̭dhībhya iti̭ caṣāla-mprati̭- [caṣāla-mprati̭, muñcati tasmācchīrṣata] 20
-muñcati tasmācchīrṣata oṣa̭dhayaḥ phala̭-ṅgṛhṇantyanakti tejo vā ājyaṃ-ya~ja̭mānenāgniṣṭhā-'śri-ssammi̭tā yada̭gniṣṭhā-maśri̭manakti yaja̭mānameva teja̭sā 'naktyānta-ma̭naktyāntameva yaja̭māna-nteja̭sānakti sarvataḥ pari̭ mṛśatyapa̭rivarga-mevāsmi-ntejo̭ dadhātyu-ddivagg̭ stabhānā-'ntari̭kṣa-mpṛṇetyā̭haiṣāṃ-lo~kānāṃ-vi~dhṛ̭tyai vaiṣṇavyarcā [vaiṣṇavyarcā, kalpayati vaiṣṇavo vai] 21
ka̭lpayati vaiṣṇavo vai devata̭yā yūpa-ssvayaivaina̭-ndevata̭yā kalpayati dvābhyā-ṅkalpayati dvipā-dyaja̭mānaḥ prati̭ṣṭhityai ya-ṅkāmayḙta teja̭saina-ndevatā̭bhirindriyeṇa vya̭rdhayeya-mitya̭gniṣṭhā-ntasyāśri̭-māhavanīyā̭ditthaṃ-ve~tthaṃ-vā~-'ti̭ nāvaye-tteja̭saivaina̭-ndevatā̭bhirindriyeṇa vya̭rdhayati ya-ṅkāmayḙta teja̭saina-ndevatā̭bhirindriyeṇa sama̭rdhayeyami- [sama̭rdhayeyamiti̭, agniṣṭhā-] 22
-tya̭gniṣṭhā-ntasyāśri̭māhavanīyḙna sa-mmi̭nuyā-tteja̭saivaina̭-ndevatā̭bhirindriyeṇa sama̭rdhayati brahmavani̭-ntvā kṣatravanimityā̭ha yathāyajurevaita-tpari̭ vyayatyūrgvai ra̭śanā yaja̭mānena yūpa-ssammi̭to yaja̭mānamevorjā sama̭rdhayati nābhidaghne pari̭ vyayati nābhidaghna evāsmā ūrja̭-ndadhāti tasmānnābhidaghna ūrjā bhṷñjate ya-ṅkāmayḙtorjainaṃ- [ya-ṅkāmayḙtorjainam, vya̭rdhayeya-] 23
~vya̭rdhayeya-mityūrdhvāṃ-vā~ tasyāvā̭cīṃ-vā~-'vo̭hedūrjaivainaṃ-vya~̭rdhayati yadi̭ kāmayḙta varṣṷkaḥ parjanyaḥ̭ syāditya-vā̭cīmavo̭he-dvṛṣṭi̭meva ni ya̭cchati yadi̭ kāmayetāva̭rṣuka-ssyādityūrdhvāmudṷ̄he-dvṛṣṭi̭mevo-dya̭cchati pitṛṇā-nnikhā̭ta-mmanuṣyā̭ṇāmūrdhva-nnikhā̭tādā ra̭śanāyā oṣa̭dhīnāgṃ raśanā viśvḙṣā- [viśvḙṣām, devānā̭-] 24
-ndevānā̭-mūrdhvagṃ ra̭śanāyā ā caṣālādindra̭sya caṣālagṃ̭ sāddhyānāmati̭riktagṃ sa vā eṣa sa̭rvadevatyo̭ yadyūpo yadyūpa̭-mminoti sarvā̭ eva devatāḥ prīṇāti yajñena vai devā-ssṷvargaṃ-lo~kamā̭ya-ntḙ-'manyanta manuṣyā̭ no-'nvābha̭viṣyantīti te yūpḙna yopayitvā sṷvargaṃ ~lokamā̭ya-ntamṛṣa̭yo yūpḙnaivānu prājā̭na-nta-dyūpa̭sya yūpatvaṃ- [yūpatvam, ya-dyūpa̭-] 25
~ya-dyūpa̭-mminoti̭ suvargasya̭ lokasya prajñātyai purastā-nminoti purastāddhi yajñasya̭ prajñāyate pra̭jñātagṃ hi ta-dyadati̭panna āhurida-ṅkārya̭māsīditi̭ sāddhyā vai devā yajñamatya̭manyanta tān. yajño nāspṛ̭śa-ttān. ya-dyajñasyāti̭riktamāsī-ttada̭spṛśadati̭riktaṃ-vā~ eta-dyajñasya yadagnāvagni-mma̭thitvā praharatyati̭riktameta- [praharatyati̭riktametat, yūpa̭sya] 26
-dyūpa̭sya yadūrdhva-ñcaṣālā-tteṣā-nta-dbhā̭gadheya-ntāneva tena̭ prīṇāti devā vai saggsthi̭te some pra sruco-'ha̭ra-npra yūpa-ntḙ-'manyanta yajñaveśasaṃ-vā~ ida-ṅkṷrma iti te pra̭staragg srucā-nniṣkraya̭ṇa-mapaśyan-thsvaruṃ-yū~pa̭sya saggsthi̭te some pra pra̭staragṃ hara̭ti juhoti svarumaya̭jñaveśasāya || 27 ||

(dadhāti - pratyṛ - cā - sama̭rdhayeyamityū - rjainaṃ - ~viśvḙṣāṃ - ~yūpatva - mati̭riktameta-d- dvica̭tvārigṃśacca) (a. 4)
sāddhyā vai devā asmi~lloka ā̭sa-nnānya-tki̭-ñcana miṣa-tte-'gnimevāgnaye medhāyā 'la̭bhanta na hya̭nyadā̭labhyaṃ̭-mavi̭nda-ntato vā imāḥ prajāḥ prājā̭yanta yadagnāvagni-mma̭thitvā prahara̭ti prajānā-mprajana̭nāya rudro vā eṣa yadagniryaja̭mānaḥ paśurya-tpaśumālabhyāgni-mmanthe-drudrāya yaja̭māna- [yaja̭mānam, api̭ daddhyā-] 28
-mapi̭ daddhyā-tpramāyṷka-ssyādatho khalvā̭huragni-ssarvā̭ devatā̭ haviretadya-tpaśuriti ya-tpaśumālabhyāgni-mmantha̭ti havyāyaivā-''sa̭nnāya sarvā̭ devatā̭ janaya-tyupākṛtyaiva manthya-stannevā-''la̭bdha-nnevānā̭labdha-magne-rjanitra̭-masītyā̭hāgnerhyḙta-jjanitraṃ-vṛ~ṣa̭ṇau stha ityā̭ha vṛṣa̭ṇau [vṛṣa̭ṇau, hyḙtā-] 29
hyḙtā-vurvaśya̭syāyu-rasītyā̭ha mithunatvāya̭ ghṛtenākte vṛṣa̭ṇa-ndadhāthāmityā̭ha vṛṣa̭ṇagg hyḙte dadhā̭te ye agni-ṅgā̭yatra-ñchando-'nu pra jā̭yasvetyā̭ha chando̭bhirevaina-mpra ja̭nayatyagnayḙ mathyamā̭nāyānṷ brūhītyā̭ha sāvitrīmṛcamanvā̭ha savitṛpra̭sūta evaina̭-mmanthati jātāyānṷ brūhi [brūhi, prahriyamā̭ṇāyā-'nṷ] 30
prahriyamā̭ṇāyā-'nṷ brūhītyā̭ha kāṇḍḙkāṇḍa evaina̭-ṅkriyamā̭ṇe sama̭rdhayati gāyatrī-ssarvā anvā̭ha gāyatracha̭ndā vā agni-ssvenaivaina-ñchanda̭sā sama̭rdhayatyagniḥ purā bhava̭tyagni-mma̭thitvā pra ha̭rati tau sabhaṃva~̭ntau yaja̭mānamabhi sa-mbha̭vato bhava̭ta-nna-ssama̭nasāvityā̭ha śāntyai prahṛtya̭ juhoti jātāyaivāsmā annamapi̭ dadhātyājyḙna juhotyetadvā agneḥ priya-ndhāma yadājya̭-mpriyeṇaivaina-ndhāmnā sama̭rdhayatyatho teja̭sā || 31 ||

(yaja̭māna-māha vṛṣa̭ṇau-jātāyānṷ brūhyā-pya -ṣṭāda̭śa ca) (a. 5)
iṣe tveti̭ barhirā da̭tta icchata̭ iva hyḙṣa yo yaja̭ta upavīrasītyāhopa hyḙnānākarotyupo̭ devā-ndaivīrviśaḥ prāgurityā̭ha daivīrhyḙtā viśaḥ̭ satīrdevānṷpayanti vahnī̭ruśija ityā̭hartvijo vai vahna̭ya uśija-stasmā̭devamā̭ha bṛha̭spate dhārayā vasūnī- [vasūnīti̭, āha brahma vai] 32
-tyā̭ha brahma vai devānā-mbṛhaspati rbrahma̭ṇaivāsmai̭ paśūnava̭ rundhe havyā te svadantāmityā̭ha svadaya̭tyevainā-ndeva̭ tvaṣṭarvasṷ raṇvetyā̭ha tvaṣṭā vai pa̭śūnā-mmi̭thunānāgṃ̭ rūpakṛ-drūpameva paśuṣṷ dadhāti reva̭tī rama̭ddhvamityā̭ha paśavo vai revatīḥ paśūnevāsmai̭ ramayati devasya̭ tvā savituḥ pra̭sava iti̭ [iti̭, raśanāmā da̭tte] 33
raśanāmā da̭tte prasūtyā aśvinorbāhubhyā-mityā̭hāśvinau hi devānā̭maddhvaryū āstā-mpūṣṇo hastābhyāmityā̭ha yatyā̭ ṛtasya̭ tvā devahaviḥ pāśenā-'' ra̭bha ityā̭ha satyaṃ-vā~ ṛtagṃ satyenaivaina̭mṛtenā ''ra̭bhate 'kṣṇayā pari̭ harati vaddhyagṃ hi pratyañca̭-mprati muñcanti vyāvṛ̭ttyai dharṣā mānṷṣāniti ni yṷnakti dhṛtyā̭ adbhya- [adbhyaḥ, tvauṣa̭dhībhyaḥ] 34
-stvauṣa̭dhībhyaḥ prokṣāmītyā̭hādbhyo hyḙṣa oṣa̭dhībhya-ssabhaṃva~̭ti ya-tpaśurapā-mperurasītyā̭haiṣa hya̭pā-mpātā yo medhā̭yā-'' rabhyate svātta-ñci-thsadḙvagṃ havyamāpo̭ devī-ssvada̭tainamityā̭ha svadaya̭tyevaina̭-mupari̭ṣṭā-tprokṣa̭tyupari̭ṣṭādevaina-mmeddhya̭-ṅkaroti pāyaya̭tyantarata evaina-mmeddhya̭-ṅkarotyadhastādupokṣati sarvata̭ evaina-mmeddhya̭-ṅkaroti || 35 ||

(vasūnīti̭-prasava itya-dbhyo-'ntarata evainaṃ - daśa̭ ca) (a. 6)
agninā vai hotrā̭ devā asṷrā-nabhya̭bhava-nnagnayḙ samiddhyamā̭nāyānṷ brūhītyā̭ha bhrātṛ̭vyābhibhūtyai saptada̭śa sāmidhenīranvā̭ha saptadaśaḥ prajāpa̭tiḥ prajāpa̭terāptyai̭ saptadaśānvā̭ha dvāda̭śa māsāḥ pañcartava-ssa saṃ̭va~thsara-ssaṃ̭va~thsara-mprajā anu prajā̭yante prajānā-mprajana̭nāya devā vai sā̭midhenīranūcya̭ yajña-nnānva̭paśyan-thsa prajāpa̭ti-stūṣṇī-mā̭ghāra- [-mā̭ghāram, ā 'ghā̭raya-ttato vai] 36
-mā 'ghā̭raya-ttato vai devā yajñamanva̭paśyan. ya-ttūṣṇī-mā̭ghāra-mā̭ghāraya̭ti yajñasyānṷkhyātyā asṷreṣu vai yajña ā̭sī-tta-ndevāstūṣṇīgṃ homenā̭vṛñjata ya-ttūṣṇī-mā̭ghāra-mā̭ghāraya̭ti bhrātṛ̭vyasyai va ta-dyajñaṃ-vṛ~̭ṅkte paridhī̭n-thsa-mmārṣṭi punātyevainā-ntristri-ssa-mmārṣṭi tryā̭vṛddhi yajño-'tho rakṣa̭sāmapa̭hatyai dvāda̭śa sa-mpa̭dyante dvāda̭śa [dvāda̭śa, māsā-ssaṃva~thsara-] 37
māsā-ssaṃva~thsara-ssaṃ̭va~thsarameva prī̭ṇātyatho̭ saṃva~thsaramevāsmā upa̭ dadhāti suvargasya̭ lokasya sama̭ṣṭyai śiro vā eta-dyajñasya yadā̭ghāro-'gni-ssarvā̭ devatā yadā̭ghāra-mā̭ghāraya̭ti śīrṣata eva yajñasya yaja̭māna-ssarvā̭ devatā ava̭ rundhe śiro vā eta-dyajñasya yadā̭ghāra ātmā paśurā̭ghāramāghārya̭ paśugṃ sama̭naktyātmanneva yajñasya [yajñasya̭, śiraḥ prati̭ dadhāti] 38
śiraḥ prati̭ dadhāti sa-nte prāṇo vāyunā̭ gacchatāmityā̭ha vāyudevatyo̭ vai prāṇo vāyāvevāsya̭ prāṇa-ñjṷhoti saṃ-ya~ja̭trairaṅgā̭ni saṃ-ya~jñapa̭tirāśiṣetyā̭ha yajñapa̭timevāsyā-''śiṣa̭-ṅgamayati viśvarṷ̄po vai tvāṣṭra upari̭ṣṭā-tpaśumabhya̭vamī-ttasmā̭-dupari̭ṣṭā-tpaśornāva̭ dyanti yadupari̭ṣṭā-tpaśugṃ sa̭manakti meddhya̭mevai- [meddhya̭meva, ena-ṅkarotyṛtvijo̭] 39
-na̭-ṅkarotyṛtvijo̭ vṛṇīte chandāg̭syeva vṛ̭ṇīte sapta vṛ̭ṇīte sapta grāmyāḥ paśavaḥ̭ saptā-''raṇyā-ssapta chandāg̭syubhayasyā va̭ruddhyā ekā̭daśa prayājān. ya̭jati daśa vai paśoḥ prāṇā ātmaikā̭daśo yāvā̭neva paśusta-mpra ya̭jati vapāmekaḥ pari̭ śaya ātmaivā-''tmāna-mpari̭ śaye vajro vai svadhi̭tirvajro̭ yūpaśakalo ghṛta-ṅkhalu vai devā vajra̭-ṅkṛtvā soma̭maghna-nghṛtenāktau paśu-ntrā̭yethāmityā̭ha vajrḙṇaivainaṃ-va~śḙ kṛtvā-''la̭bhate || 40 ||

(āghāraṃ - pa̭dyante dvāda̭śā - ''tmanneva yajñasya - medhya̭meva - khalu vā - aṣṭāda̭śa ca) (a. 7)
parya̭gni karoti sarvahuta̭mevaina̭-ṅkarotya-ska̭ndāyā-ska̭nnagṃ hi ta-dya-ddhutasya skanda̭ti triḥ parya̭gni karoti tryā̭vṛddhi yajño-'tho rakṣa̭sāmapa̭hatyai brahmavādino̭ vadantyanvārabhyaḥ̭ paśū(3)-rnānvārabhyā(3) iti̭ mṛtyave vā eṣa nī̭yate ya-tpaśustaṃ-ya~da̭nvārabhḙta pramāyṷko yaja̭māna-ssyādatho khalvā̭hu-ssuvargāya vā eṣa lokāya̭ nīyate ya- [yat, paśuriti] 41
-tpaśuriti yannānvārabhḙta suvargāllokā-dyaja̭māno hīyeta vapāśrapa̭ṇībhyā-manvāra̭bhate tannevānvāra̭bdha-nnevāna̭nvārabdhamupa preṣya̭ hotarhavyā devebhya ityā̭heṣitagṃ hi karma̭ kriyate reva̭tīryajñapa̭ti-mpriyadhā ''vi̭śatetyā̭ha yathāyajurevaitadagninā̭ purastā̭deti rakṣa̭sāmapa̭hatyai pṛthivyā-ssapṛñcaḥ̭ pāhīti̭ barhi- [barhiḥ, upā-'syatya-ska̭ndāyā-] 42
-rupā-'syatya-ska̭ndāyā-ska̭nnagṃ hi ta-dya-dbarhiṣi skandatyatho̭ barhiṣada̭mevaina̭-ṅkaroti parāṃā va̭rtate-'ddhvaryuḥ paśo-ssajñampyamā̭nā-tpaśubhya̭ eva tanni hnṷta ātmano-'nāvraskāya gaccha̭ti śriya-mpra paśūnāpnoti ya evaṃ-ve~da̭ paścāllo̭kā vā eṣā prācyudānī̭yate ya-tpatnī nama̭sta ātānetyā̭hā-''dityasya vai raśmaya̭ [raśmayaḥ̭, ātānāstebhya̭] 43
ātānāstebhya̭ eva nama̭skarotyanarvā prehītyā̭ha bhrātṛ̭vyo vā arvā bhrātṛ̭vyāpanuttyai ghṛtasya̭ kulyāmanṷ saha prajayā̭ saha rāyaspoṣeṇe-tyā̭hā ''śiṣa̭mevaitāmā śāsta āpo̭ devī-śśuddhāyuva ityā̭ha yathāyajurevaitat || 44 ||

(lokāya̭ nīyate ya-d- baraḥī - raśmayaḥ̭ - saptatrigṃ̭śacca) (a. 8)
paśorvā āla̭bdhasya prāṇāñchugṛ̭cchati vākta ā pyā̭yatā-mprāṇasta ā pyā̭yatāmityā̭ha prāṇebhya̭ evāsya śucagṃ̭ śamayati sā prāṇebhyo-'dhi̭ pṛthivīgṃ śu-kpra vi̭śati śamahobhyāmiti ni na̭yatyahorātrābhyā̭meva pṛ̭thivyai śucagṃ̭ śamayatyoṣa̭dhe trā̭yasvainagg svadhi̭te mainagṃ̭ higṃsīrityā̭ha vajro vai svadhi̭ti- [svadhi̭tiḥ, śāntyai̭ pārśvata] 45
-śśāntyai̭ pārśvata ā cchya̭ti maddhyato hi ma̭nuṣyā̭ ā cchyanti̭ tiraścīnamā cchya̭tyanūcīnagṃ hi ma̭nuṣyā̭ ācchyanti vyāvṛ̭ttyai rakṣa̭sā-mbhāgo̭-'sīti̭ sthavimato barhiraktvā-'pāsyatyasnaiva rakṣāgṃ̭si nirava̭dayata idamahagṃ rakṣo̭-'dhama-ntamo̭ nayāmi yo-'smā-ndveṣṭi ya-ñca̭ vaya-ndviṣma ityā̭ha dvau vāva purṷṣau ya-ñcaiva [ ] 46
dveṣṭi yaścai̭na-ndveṣṭi tāvubhāva̭dhama-ntamo̭ nayatīṣe tveti̭ vapāmutkhi̭datīcchata̭ iva hyḙṣa yo yaja̭te yadṷpatṛndyā-drudro-'sya paśū-nghātṷka-ssyā-dyannopa̭tṛndyā-daya̭tā syā-danyayo̭patṛṇattyanyayā na dhṛtyai̭ ghṛtena̭ dyāvāpṛthivī prorṇvā̭thāmityā̭ha dyāvā̭pṛthivī eva rasḙnānaktyacchi̭nno [rasḙnānaktyacchi̭nnaḥ, rāyaḥ̭ suvīra] 47
rāyaḥ̭ suvīra ityā̭ha yathāyajurevaita-tkrūrami̭va vā eta-tka̭roti ya-dvapā-mṷtkhida-tyurva̭ntari̭kṣa-manvihītyā̭ha śāntyai pra vā eṣo-'smāllokāccya̭vate yaḥ paśu-mmṛtyavḙ nīyamā̭namanvārabha̭te vapāśrapa̭ṇī puna̭ranvāra̭bhate-'sminneva loke prati̭ tiṣṭhatyagninā̭ purastā̭deti rakṣa̭sāmapa̭hatyā atho̭ devatā̭ eva havyenā- [eva havyena̭, anvḙti] 48
-nvḙti nāntamamaṅgā̭ramati̭ hare-dyada̭ntamamaṅgā̭ramati hare-ddevatā ati̭ manyeta vāyo vīhi̭ stokānāmityā̭ha tasmā-dvibha̭ktā-sstokā ava̭ padyante-'graṃ-vā~ eta-tpa̭śūnāṃ-ya~-dvapā-'gramoṣa̭dhīnā-mbarhiragrḙṇaivāgragṃ sama̭rdhayatyatho oṣa̭dhīṣveva paśū-nprati̭ṣṭhāpayati svāhā̭kṛtībhyaḥ preṣyetyā̭ha [ ] 49
yajñasya sami̭ṣṭyai prāṇāpānau vā etau pa̭śūnāṃ-ya~-tpṛ̭ṣadājyamātmā vapā pṛ̭ṣadājyama̭bhighārya̭ vapāmabhi ghā̭rayatyātmanneva pa̭śūnā-mprā̭ṇāpānau da̭dhāti svāhordhvana̭bhasa-mmāruta-ṅga̭cchatamityā̭hordhvana̭bhā ha sma vai mā̭ruto devānāṃ-va~pāśrapa̭ṇī pra ha̭rati tenaivaine pra ha̭rati viṣṷ̄cī pra ha̭rati tasmā-dviṣva̭ñcau prāṇāpānau || 50 ||

(svadhi̭ti - ścaivā - cchi̭nno - havyene - ṣyetyā̭ha - ṣaṭca̭tvārigṃśacca) (a. 9)
paśumālabhya̭ puroḍāśa-nnirva̭pati samḙdhamevainamā la̭bhate vapayā pracarya̭ puroḍāśḙna pra ca̭ratyūrgvai pṷroḍāśa ūrja̭meva pa̭śūnā-mma̭ddhyato da̭dhātyatho̭ paśoreva chidramapi̭ dadhāti pṛṣadājyasyo̭pahatya triḥ pṛ̭cchati śṛtagṃ havī(3)-śśa̭mitariti triṣa̭tyā hi devā yo-'śṛ̭tagṃ śṛtamāha sa ena̭sā prāṇāpānau vā etau pa̭śūnāṃ- [etau pa̭śūnām, ya-tpṛ̭ṣadājya-mpaśoḥ] 51
-~ya-tpṛ̭ṣadājya-mpaśoḥ khalu vā āla̭bdhasya hṛda̭yamātmā-'bhi samḙti ya-tpṛ̭ṣadājyena hṛda̭ya-mabhighāraya̭tyātmanneva pa̭śūnā-mprā̭ṇāpānau da̭dhāti paśunā vai devā-ssṷvargaṃ-lo~kamā̭ya-ntḙ-'manyanta manuṣyā̭ no-'nvābha̭viṣyantīti tasya śiraḥ̭ chittvā medha-mprākṣā̭rayanthsa prakṣo̭-'bhava-tta-tprakṣasya̭ prakṣatvaṃ-ya~-tpla̭kṣaśākho-tta̭rabarhi-rbhava̭ti samḙdhasyaiva [ ] 52
paśorava̭ dyati paśuṃ-vai~ hriyamā̭ṇagṃ rakṣāgsyanṷ sacante-'ntarā yūpa̭-ñcā-''havanīya̭-ñca harati rakṣa̭sāmapa̭hatyai paśorvā āla̭bdhasya mano-'pa̭ krāmati manotā̭yai haviṣo̭-'vadīyamā̭nasyānṷ brūhītyā̭ha mana̭ evāsyāva̭ rundha ekā̭daśāvadānānyava̭ dyati daśa vai paśoḥ prāṇā ātmaikā̭daśo yāvā̭neva paśustasyā-'va̭- [paśustasyā-'va̭, dyati hṛda̭yasyā-] 53
-dyati hṛda̭yasyā-gre-'va̭ dyatyatha̭ jihvāyā atha vakṣa̭so yadvai hṛda̭yenābhigaccha̭ti tajjihvayā̭ vadati yajjihvayā vada̭ti taduraso-'dhi nirva̭datyetadvai paśorya̭thāpūrvaṃ-ya~syaivama̭vadāya̭ yathākāma-mutta̭reṣāmavadyati̭ yathā pūrvamevāsya̭ paśorava̭tta-mbhavati maddhyato gudasyāva̭ dyati maddhyato hi prāṇa ṷttamasyāva̭ dya- [ṷttamasyāva̭ dyati, uttamo hi prāṇo] 54
-tyuttamo hi prāṇo yadīta̭raṃ-ya~dīta̭ra-mubhaya̭mevājā̭mi jāya̭māno vai brāhmaṇa-stribhir-ṛ̭ṇavā jā̭yate brahmacaryeṇarṣi̭bhyo yajñena̭ devebhyaḥ̭ prajayā̭ pitṛbhya̭ eṣa vā a̭nṛṇo yaḥ putrī yajvā brahmacārivāsī tada̭vadānai̭-revā-'va̭ dayate tada̭vadānā̭nā-mavadānatva-ndḙvāsurā-ssaṃya~̭ttā āsa-nte devā agnima̭bruva-ntvayā̭ vīreṇāsṷrānabhi bha̭vāmeti [bha̭vāmeti̭, so-'bravī-dvaraṃ̭-vṛ~ṇai] 55
so-'bravī-dvaraṃ̭-vṛ~ṇai paśorṷddhāramuddha̭rā iti sa etamṷddhāramuda̭harata doḥ pūrvārdhasya̭ guda-mma̭ddhyata-śśroṇi̭-ñjaghanārdhasya tato̭ devā abha̭va-nparā-'sṷrā ya-ttryaṅgāṇāgṃ̭ samavadyati bhrātṛ̭vyābhibhūtyai bhava̭tyātmanā parā-'sya bhrātṛ̭vyo bhavatyakṣṇayā-'va̭ dyati tasmā̭dakṣṇayā paśavo-'ṅgā̭ni pra ha̭ranti prati̭ṣṭhityai || 56 ||

(etau pa̭śūnāgṃ - samḙdhasyaiva - tasyā-'vo - ttamasyāva̭ dyatī - ti - pañca̭catvārigṃśacca) (a. 10)
meda̭sā srucau prorṇo̭ti medo̭rūpā vai paśavo̭ rūpameva paśuṣṷ dadhāti yūṣanna̭vadhāya prorṇo̭ti raso vā eṣa pa̭śūnāṃ-ya~dyū rasa̭meva paśuṣṷ dadhāti pārśvena̭ vasāhoma-mprayaṷti maddhyaṃ-vā~ eta-tpa̭śūnāṃ-ya~-tpārśvagṃ rasa̭ eṣa pa̭śūnāṃ-ya~dvasā ya-tpārśvena̭ vasāhoma-mprayauti̭ maddhyata eva pa̭śūnāgṃ rasa̭-ndadhāti ghnanti [ghnanti̭, vā eta-tpaśu-] 57
vā eta-tpaśuṃ-ya~-thsajñampaya̭ntyaindraḥ khalu vai devata̭yā prāṇa aindro̭-'pāna aindraḥ prāṇo aṅgḙaṅge ni deddhyadityā̭ha prāṇāpānāveva paśuṣṷ dadhāti deva̭ tvaṣṭarbhūri̭ te sagṃ sa̭metvityā̭ha tvāṣṭrā hi devata̭yā paśavo viṣṷrūpā ya-thsala̭kṣmāṇo bhavathetyā̭ha viṣṷrūpā hyḙte santa-ssala̭kṣmāṇa etarhi bhava̭nti devatrā yanta- [devatrā yantam, ava̭se] 58
-mava̭se sakhāyo-'nṷ tvā mātā pitaro̭ madantvityāhā-nṷmatamevaina̭-mmātrā pitrā sṷvargaṃ-lo~ka-ṅga̭mayatyardharce va̭sāhoma-ñjṷhotyasau vā a̭rdharca iyama̭rdharca ime eva rasḙnānakti diśo̭ juhoti diśa̭ eva rasḙnānaktyatho̭ digbhya evorjagṃ rasamava̭ rundhe prāṇāpānau vā etau pa̭śūnāṃ-ya~-tpṛ̭ṣadājyaṃ-vā~̭naspatyāḥ khalu [khalṷ, vai devata̭yā paśavo] 59
vai devata̭yā paśavo ya-tpṛ̭ṣadājyasyo̭-pahatyā-''ha vanaspataye-'nṷ brūhi vanaspata̭ye preṣyeti̭ prāṇāpānāveva paśuṣṷ dadhātyanyasyānyasya samavattagṃ samava̭dyati tasmānnānā̭rūpāḥ paśavo̭ yūṣṇopa̭ siñcati raso vā eṣa pa̭śūnāṃ-ya~dyū rasa̭meva paśuṣṷ dadhātīḍāmupa̭ hvayate paśavo vā iḍā̭ paśūnevopa̭ hvayate caturupa̭ hvayate [caturupa̭ hvayate, catṷṣpādo hi] 60
catṷṣpādo hi paśavo ya-ṅkāmayḙtā paśu-ssyāditya̭medaska-ntasmā ā da̭ddhyānmedo̭rūpā vai paśavo̭ rūpeṇaivaina̭-mpaśubhyo nirbha̭jatyapaśureva bha̭vati ya-ṅkāmayḙta paśumān-thsyāditi meda̭sva-ttasmā ā da̭ddhyānmedo̭rūpā vai paśavo̭ rūpeṇaivāsmai̭ paśūnava̭ rundhe paśumāneva bha̭vati prajāpa̭tiryajñama̭sṛjata sa ājya̭- [sa ājyam, purastā̭dasṛjata] 61
-mpurastā̭dasṛjata paśu-mma̭ddhyataḥ pṛ̭ṣadājya-mpaścā-ttasmādājyḙna prayājā i̭jyante paśunā̭ maddhyataḥ pṛ̭ṣadājyenā̭-nūyājā-stasmā̭detanmiśrami̭va paścā-thsṛṣṭagg hyekā̭daśānūyājān. ya̭jati daśa vai paśoḥ prāṇā ātmaikā̭daśo yāvā̭neva paśustamanṷ yajati ghnanti vā eta-tpaśuṃ-ya~-thsaṃ(2)jñapaya̭nti vā prāṇāpānau khalu vā etau pa̭śūnāṃ-ya~-tpṛ̭ṣadājyaṃ-ya~-tpṛ̭ṣadājyenā̭ nūyājān. yaja̭ti prāṇāpānāveva paśuṣṷ dadhāti || 62 ||