ঈশ্বর উবাচ। মাতঃ পরাত্পরে দেবি সর্বজ্ঞানমযীশ্বরি । কথ্যতাং মে সর্বপীঠশক্তিভৈরবদেবতাঃ ॥১॥
দেব্যুবাচ। শৃণু বত্স প্রবক্ষ্যামি দযাল ভক্তবত্সল । যাভির্বিনা ন সিধ্যন্তি জপসাধনসত্ক্রিযাঃ ॥২॥
পঞ্চাশদেকপীঠানি এবং ভৈরবদেবতাঃ । অঙ্গপ্রত্যঙ্গপাতেন বিষ্ণুচক্রক্ষতেন চ মমাদ্যবপুষো দেব হিতায ত্বযি কথ্যতে ॥৩॥
ব্রহ্মরন্ধ্রং হিঙ্গুলাযাং ভৈরবো ভীমলোচনঃ । কোট্টরী সা মহাদেব ত্রিগুণা যা দিগম্বরী ॥৪॥
করবীরে ত্রিনেত্রং মে দেবী মহিষমর্দিনী । ক্রোধীশো ভৈরবস্তত্র সুগন্ধাযাঞ্চ নাসিকা ॥৫॥
দেবস্ত্র্যম্বকনামা চ সুনন্দা তত্র দেবতা ॥৬॥
কাশ্মীরে কণ্ঠদেশঞ্চ ত্রিসন্ধ্যেশ্বরভৈরবঃ । মহামাযা ভগবতী গুণাতীতা বরপ্রদা ॥৭॥
জ্বালামুখ্যাং তথা জিহ্বা দেব উন্মত্তভৈরবঃ । অম্বিকা সিদ্ধিদা নাম্নী স্তনং জালন্ধরে মম ॥৮॥
ভীষণো ভৈরবস্তত্র দেবী ত্রিপুরমালিনী ॥৯॥
হার্দপীঠং বৈদ্যনাথে বৈদ্যনাথস্তু ভৈরবঃ । দেবতা জযদুর্গাখ্যা নেপালে জানু মে শিব ॥১০॥
কপালী ভৈরবঃ শ্রীমান্ মহামাযা চ দেবতা ॥১১॥
মানসে দক্ষহস্তো মে দেবী দাক্ষাযণী হর । অমরো ভৈরবস্তত্র সর্বসিদ্ধিপ্রদাযকঃ ॥১২॥
উত্কলে নাভিদেশঞ্চ বিরজাক্ষেত্রমুচ্যতে । বিমলা সা মহাদেবী জগন্নাথস্তু ভৈরবঃ ॥১৩॥
গণ্ডক্যাং গণ্ডপাতঞ্চ তত্র সিদ্ধির্ন সংশযঃ । তত্র সা গণ্ডকী চণ্ডী চক্রপাণিস্তু ভৈরবঃ ॥১৪॥
বহুলাযাং বামবাহুর্বহুলাখ্যা চ দেবতা । ভীরুকো ভৈরবস্তত্র সর্বসিদ্ধিপ্রদাযকঃ ॥১৫॥
উজ্জযিন্যাং কূর্পরঞ্চ মাঙ্গল্য কপিলাম্বরঃ ভৈরবঃ সিদ্ধিদঃ সাক্ষাদ্দেবী মঙ্গলচণ্ডিকা ॥১৬॥
চট্টলে দক্ষবাহুর্মে ভৈরবঞ্চন্দ্রশেখরঃ । ব্যক্তরূপা ভগবতী ভবানী যত্র দেবতা । বিশেষতঃ কলিযুগে বসামি চন্দ্রশেখরে ॥১৭॥
ত্রিপুরাযাং দক্ষপাদো দেবী ত্রিপুরসুন্দরী । ভৈরবস্ত্রিপুরেশঞ্চ সর্বাভীষ্টপ্রদাযকঃ ॥১৮॥
ত্রিস্রোতাযাং বামপাদো ভ্রামরী ভৈরবেশ্বরঃ ॥১৯॥
যোনিপীঠং কামগিরৌ কামাখ্যা তত্র দেবতা । যত্রাস্তে ত্রিগুণাতীতা রক্তপাষাণরূপিণী ॥২০॥
যত্রাস্তে মাধবঃ সাক্ষাদুমানন্দোঽথ ভৈরবঃ । সর্বদা বিহরেদ্দেবী তত্র মুক্তির্ন সংশযঃ ॥২১॥
তত্র শ্রীভৈরবী দেবী তত্র চ ক্ষেত্রদেবতা । প্রচণ্ডচণ্ডিকা তত্র মাতঙ্গী ত্রিপুরাম্বিকা । বগলা কমলা তত্র ভুবনেশী সধূমিনী ॥২২॥
এতানি পরপীঠানি শংসন্তি বরভৈরবাঃ । এবং তু দেবতাঃ সর্বা এবং তু দশ ভৈরবাঃ ॥২৩॥
সর্বত্র বিরলা চাহং কামরূপে গৃহে গৃহে । গৌরি শিখরমারুহ্য পুনর্জন্ম ন বিদ্যতে ॥২৪॥
করতোযাং সমারম্য যাবদ্দিক্করবাসিনীম্ । শতযোজনবিস্তীর্ণং ত্রিকোণং সর্বসিদ্ধিদম্ । দেবা মরণমিচ্ছন্তি কিং পুনর্মানবাদযঃ ॥২৫॥
ক্ষীরগ্রামে মহামাযা ভৈরবঃ ক্ষীরখণ্ডকঃ । যুগদ্যা সা মহামাযা দক্ষাঙ্গুষ্ঠং পদো মম ॥২৬॥
নকুলীশঃ কালীপীঠে দক্ষপাদাঙ্গুলী চ মে । সর্বসিদ্ধিকরী দেবী কালিকা তত্র দেবতা ॥২৭॥
অঙ্গুলীবৃন্দং হস্তস্য প্রযাগে ললিতা ভবঃ । জযন্ত্যাং বামজঙ্ঘা চ জযন্তী ক্রমদীশ্বরঃ ॥২৮॥
ভুবনেশী সিদ্ধিরূপা কিরীটস্থা কিরীটতঃ দেবতা বিমলা নাম্নী সংবর্ত্তো ভৈরবস্তথা ॥২৯॥
বারাণস্যাং বিশালাক্ষী দেবতা কালভৈরবঃ । মণিকর্ণীতি বিখ্যাতা কুণ্ডলং চ মম শ্রুতেঃ ॥৩০॥
কন্যাশ্রমে চ পৃষ্ঠং মে নিমিষো ভৈরবস্তথা । সর্বাণী দেবতা তত্র কুরুক্ষেত্রে চ গুল্ফতঃ ॥৩১॥
স্থাণুর্নাম্না চ সাবিত্রী দেবতা মণিবেদকে । মণিবন্ধে চ গাযত্রী সর্বানন্দস্তু ভৈরবঃ ॥৩২॥
শ্রীশৈলে চ মম গ্রীবা মহালক্ষ্মীস্তু দেবতা । ভৈরবঃ সম্বরানন্দো দেশো দেশো ব্যবস্থিতঃ ॥৩৩॥
কাঞ্চীদেশো চ কঙ্কালো ভৈরবো রুরুনামকঃ । দেবতা দেবগর্ভাখ্যা নিতম্বঃ কালমাধবে ॥৩৪॥
ভৈরবশ্চাসিতাঙ্গশ্চ দেবী কালী সুসিদ্ধিদা । দৃষ্টা দৃষ্টা নমস্কৃত্য মন্ত্রসিদ্ধিমবাপ্নুযাত্ ॥৩৫॥
কুজবারে ভূততিথৌ নিশার্দ্ধে যস্তু সাধকঃ । নত্বা প্রদক্ষিণীকৃত্য মন্ত্রসিদ্ধিমবাপ্নুযাত্ ॥৩৬॥
শোণাখ্যা ভদ্রসেনস্তু নর্মদাখ্যে নিতম্বকঃ । রামগিরৌ স্তনান্যঞ্চ শিবানী চণ্ডভৈরবঃ ॥৩৭॥
বৃন্দাবনে কেশজালমুমা নাম্নী চ দেবতা । ভূতেশো ভৈরবস্তত্র সর্বসিদ্ধিপ্রদাযকঃ ॥৩৮॥
সংহারাখ্য ঊর্দ্ধদন্তো দেবীঽনলে নারাযণী শ্রুচৌ । অধোদন্তো মহারুদ্রো বারাহী পঞ্চসাগরে ॥৩৯॥
করতোযাতটে কর্ণে বামে বামনভৈরবঃ । অপর্ণা দেবতা যত্র ব্রহ্মরূপাকরোদ্ভবা ॥৪০॥
শ্রীপর্বতে দক্ষগুল্ফস্তত্র শ্রীসুন্দরী পরা । সর্বসিদ্ধীশ্বরী সর্বা সুন্দরানন্দভৈরবঃ ॥৪১॥
কপালিনী ভীমরূপা বামগুল্ফো বিভাষকে । ভৈরবশ্চ মহাদেব সর্বানন্দঃ শুভপ্রদঃ ॥৪২॥
উদরঞ্চ প্রভাসে মে চন্দ্রভাগা যশস্বিনী । বক্রতুণ্ডো ভৈরব ঊর্ধ্বোষ্ঠো ভৈরবপর্বতে ॥৪৩॥
অবন্তী চ মহাদেবী লম্বকর্ণস্তু ভৈরবঃ ॥৪৪॥
চিবুকে ভ্রামরী দেবী বিকৃতাক্ষো জনস্থানে । গণ্ডো গোদাবরীতীরে বিশ্বেশী বিশ্বমাতৃকা ॥৪৫॥
দণ্ডপাণিভৈরবস্তু বামগণ্ডে তু রাকিণী । ভৈরবো বত্সনাভস্তু তত্র সিদ্ধির্ন সংশযঃ ॥৪৬॥
রত্নাবল্যাং দক্ষস্কন্ধঃ কুমারী ভৈরবঃ শিবঃ । মিথিলাযামুমা দেবী বামস্কন্ধো মহোদরঃ ॥৪৭॥
নলাহাট্যাং নলাপাতো যোগীশো ভৈরবস্তথা । তত্র সা কালিকা দেবী সর্বসিদ্ধিপ্রদাযিকা ॥৪৮॥
কালীঘাটে মুণ্ডপাতঃ ক্রোধীশো ভৈরবস্তথা । দেবতা জযদুর্গাখ্যা নানাভোগপ্রদাযিনী ॥৪৯॥
বক্রেশ্বরে মনঃপাতো বক্রনাথস্তু ভৈরবঃ । নদী পাপহরা তত্র দেবী মহিষমর্দিনী ॥৫০॥
যশোরে পাণিপদ্মঞ্চ দেবতা যশোরেশ্বরী । চণ্ডশ্চ ভৈরবো যত্র তত্র সিদ্ধির্ন সংশয ॥৫১॥
অট্টহাসে চোষ্ঠপাতো দেবী সা ফুল্লরা স্মৃতা । বিশ্বেশো ভৈরবস্তত্র সর্বাভীষ্টপ্রদাযকঃ ॥৫২॥
হারপাতো নন্দিপুরে ভৈরবো নন্দিকেশ্বরঃ । নন্দিনী সা মহাদেবী তত্র সিদ্ধিমবাপ্নুযাত্ ॥৫৩॥
লঙ্কাযাং নূপুরঞ্চৈব ভৈরবো রাক্ষসেশ্বরঃ । ইন্দ্রাক্ষী দেবতা তত্র ইন্দ্রেণোপাসিতা পুরা ॥৫৪॥
বিরাটদেশমধ্যে তু পাদাঙ্গুলিনিপাতনম্ । ভৈরবশ্চামৃতাখ্যশ্চ দেবী তত্রাম্বিকা স্মৃতা ॥৫৫॥
এতাস্তে কথিতাঃ পুত্র পীঠনাথাধিদেবতাঃ । ক্ষেত্রাধিপং বিনা দেব পূজযেত্ পীঠদেবতাম্ । ভৈরবৈর্হ্রযতে সর্বং জপপূজাদিসাধনম্ ॥৫৬॥
অজ্ঞাত্বা ভৈরবং পীঠে পীঠশক্তিতঞ্চ শঙ্কর । প্রাণনাথ ন সিধ্যেত্তু কল্পকোটি জপাদিভিঃ ॥৫৭॥
ন দেযং পরশিষ্যায নিন্দকায দুরাত্মনে । শঠায ক্রূরকার্যায দত্বা মৃত্যুমবাপ্নুযাত্ । দদ্যাচ্ছান্তায শিষ্যায মন্ত্রী মন্ত্রার্থসিদ্ধযে ॥৫৮॥