ଈଶ୍ଵର ଉଵାଚ। ମାତଃ ପରାତ୍ପରେ ଦେଵି ସର୍ଵଜ୍ଞାନମଯୀଶ୍ଵରି । କଥ୍ଯତାଂ ମେ ସର୍ଵପୀଠଶକ୍ତିଭୈରଵଦେଵତାଃ ॥୧॥
ଦେଵ୍ଯୁଵାଚ। ଶୃଣୁ ଵତ୍ସ ପ୍ରଵକ୍ଷ୍ଯାମି ଦଯାଲ ଭକ୍ତଵତ୍ସଲ । ଯାଭିର୍ଵିନା ନ ସିଧ୍ଯନ୍ତି ଜପସାଧନସତ୍କ୍ରିଯାଃ ॥୨॥
ପଞ୍ଚାଶଦେକପୀଠାନି ଏଵଂ ଭୈରଵଦେଵତାଃ । ଅଙ୍ଗପ୍ରତ୍ଯଙ୍ଗପାତେନ ଵିଷ୍ଣୁଚକ୍ରକ୍ଷତେନ ଚ ମମାଦ୍ଯଵପୁଷୋ ଦେଵ ହିତାଯ ତ୍ଵଯି କଥ୍ଯତେ ॥୩॥
ବ୍ରହ୍ମରନ୍ଧ୍ରଂ ହିଙ୍ଗୁଲାଯାଂ ଭୈରଵୋ ଭୀମଲୋଚନଃ । କୋଟ୍ଟରୀ ସା ମହାଦେଵ ତ୍ରିଗୁଣା ଯା ଦିଗମ୍ବରୀ ॥୪॥
କରଵୀରେ ତ୍ରିନେତ୍ରଂ ମେ ଦେଵୀ ମହିଷମର୍ଦିନୀ । କ୍ରୋଧୀଶୋ ଭୈରଵସ୍ତତ୍ର ସୁଗନ୍ଧାଯାଞ୍ଚ ନାସିକା ॥୫॥
ଦେଵସ୍ତ୍ର୍ଯମ୍ବକନାମା ଚ ସୁନନ୍ଦା ତତ୍ର ଦେଵତା ॥୬॥
କାଶ୍ମୀରେ କଣ୍ଠଦେଶଞ୍ଚ ତ୍ରିସନ୍ଧ୍ଯେଶ୍ଵରଭୈରଵଃ । ମହାମାଯା ଭଗଵତୀ ଗୁଣାତୀତା ଵରପ୍ରଦା ॥୭॥
ଜ୍ଵାଲାମୁଖ୍ଯାଂ ତଥା ଜିହ୍ଵା ଦେଵ ଉନ୍ମତ୍ତଭୈରଵଃ । ଅମ୍ବିକା ସିଦ୍ଧିଦା ନାମ୍ନୀ ସ୍ତନଂ ଜାଲନ୍ଧରେ ମମ ॥୮॥
ଭୀଷଣୋ ଭୈରଵସ୍ତତ୍ର ଦେଵୀ ତ୍ରିପୁରମାଲିନୀ ॥୯॥
ହାର୍ଦପୀଠଂ ଵୈଦ୍ଯନାଥେ ଵୈଦ୍ଯନାଥସ୍ତୁ ଭୈରଵଃ । ଦେଵତା ଜଯଦୁର୍ଗାଖ୍ଯା ନେପାଲେ ଜାନୁ ମେ ଶିଵ ॥୧୦॥
କପାଲୀ ଭୈରଵଃ ଶ୍ରୀମାନ୍ ମହାମାଯା ଚ ଦେଵତା ॥୧୧॥
ମାନସେ ଦକ୍ଷହସ୍ତୋ ମେ ଦେଵୀ ଦାକ୍ଷାଯଣୀ ହର । ଅମରୋ ଭୈରଵସ୍ତତ୍ର ସର୍ଵସିଦ୍ଧିପ୍ରଦାଯକଃ ॥୧୨॥
ଉତ୍କଲେ ନାଭିଦେଶଞ୍ଚ ଵିରଜାକ୍ଷେତ୍ରମୁଚ୍ଯତେ । ଵିମଲା ସା ମହାଦେଵୀ ଜଗନ୍ନାଥସ୍ତୁ ଭୈରଵଃ ॥୧୩॥
ଗଣ୍ଡକ୍ଯାଂ ଗଣ୍ଡପାତଞ୍ଚ ତତ୍ର ସିଦ୍ଧିର୍ନ ସଂଶଯଃ । ତତ୍ର ସା ଗଣ୍ଡକୀ ଚଣ୍ଡୀ ଚକ୍ରପାଣିସ୍ତୁ ଭୈରଵଃ ॥୧୪॥
ବହୁଲାଯାଂ ଵାମବାହୁର୍ବହୁଲାଖ୍ଯା ଚ ଦେଵତା । ଭୀରୁକୋ ଭୈରଵସ୍ତତ୍ର ସର୍ଵସିଦ୍ଧିପ୍ରଦାଯକଃ ॥୧୫॥
ଉଜ୍ଜଯିନ୍ଯାଂ କୂର୍ପରଞ୍ଚ ମାଙ୍ଗଲ୍ଯ କପିଲାମ୍ବରଃ ଭୈରଵଃ ସିଦ୍ଧିଦଃ ସାକ୍ଷାଦ୍ଦେଵୀ ମଙ୍ଗଲଚଣ୍ଡିକା ॥୧୬॥
ଚଟ୍ଟଲେ ଦକ୍ଷବାହୁର୍ମେ ଭୈରଵଞ୍ଚନ୍ଦ୍ରଶେଖରଃ । ଵ୍ଯକ୍ତରୂପା ଭଗଵତୀ ଭଵାନୀ ଯତ୍ର ଦେଵତା । ଵିଶେଷତଃ କଲିଯୁଗେ ଵସାମି ଚନ୍ଦ୍ରଶେଖରେ ॥୧୭॥
ତ୍ରିପୁରାଯାଂ ଦକ୍ଷପାଦୋ ଦେଵୀ ତ୍ରିପୁରସୁନ୍ଦରୀ । ଭୈରଵସ୍ତ୍ରିପୁରେଶଞ୍ଚ ସର୍ଵାଭୀଷ୍ଟପ୍ରଦାଯକଃ ॥୧୮॥
ତ୍ରିସ୍ରୋତାଯାଂ ଵାମପାଦୋ ଭ୍ରାମରୀ ଭୈରଵେଶ୍ଵରଃ ॥୧୯॥
ଯୋନିପୀଠଂ କାମଗିରୌ କାମାଖ୍ଯା ତତ୍ର ଦେଵତା । ଯତ୍ରାସ୍ତେ ତ୍ରିଗୁଣାତୀତା ରକ୍ତପାଷାଣରୂପିଣୀ ॥୨୦॥
ଯତ୍ରାସ୍ତେ ମାଧଵଃ ସାକ୍ଷାଦୁମାନନ୍ଦୋଽଥ ଭୈରଵଃ । ସର୍ଵଦା ଵିହରେଦ୍ଦେଵୀ ତତ୍ର ମୁକ୍ତିର୍ନ ସଂଶଯଃ ॥୨୧॥
ତତ୍ର ଶ୍ରୀଭୈରଵୀ ଦେଵୀ ତତ୍ର ଚ କ୍ଷେତ୍ରଦେଵତା । ପ୍ରଚଣ୍ଡଚଣ୍ଡିକା ତତ୍ର ମାତଙ୍ଗୀ ତ୍ରିପୁରାମ୍ବିକା । ଵଗଲା କମଲା ତତ୍ର ଭୁଵନେଶୀ ସଧୂମିନୀ ॥୨୨॥
ଏତାନି ପରପୀଠାନି ଶଂସନ୍ତି ଵରଭୈରଵାଃ । ଏଵଂ ତୁ ଦେଵତାଃ ସର୍ଵା ଏଵଂ ତୁ ଦଶ ଭୈରଵାଃ ॥୨୩॥
ସର୍ଵତ୍ର ଵିରଲା ଚାହଂ କାମରୂପେ ଗୃହେ ଗୃହେ । ଗୌରି ଶିଖରମାରୁହ୍ଯ ପୁନର୍ଜନ୍ମ ନ ଵିଦ୍ଯତେ ॥୨୪॥
କରତୋଯାଂ ସମାରମ୍ଯ ଯାଵଦ୍ଦିକ୍କରଵାସିନୀମ୍ । ଶତଯୋଜନଵିସ୍ତୀର୍ଣଂ ତ୍ରିକୋଣଂ ସର୍ଵସିଦ୍ଧିଦମ୍ । ଦେଵା ମରଣମିଚ୍ଛନ୍ତି କିଂ ପୁନର୍ମାନଵାଦଯଃ ॥୨୫॥
କ୍ଷୀରଗ୍ରାମେ ମହାମାଯା ଭୈରଵଃ କ୍ଷୀରଖଣ୍ଡକଃ । ଯୁଗଦ୍ଯା ସା ମହାମାଯା ଦକ୍ଷାଙ୍ଗୁଷ୍ଠଂ ପଦୋ ମମ ॥୨୬॥
ନକୁଲୀଶଃ କାଲୀପୀଠେ ଦକ୍ଷପାଦାଙ୍ଗୁଲୀ ଚ ମେ । ସର୍ଵସିଦ୍ଧିକରୀ ଦେଵୀ କାଲିକା ତତ୍ର ଦେଵତା ॥୨୭॥
ଅଙ୍ଗୁଲୀଵୃନ୍ଦଂ ହସ୍ତସ୍ଯ ପ୍ରଯାଗେ ଲଲିତା ଭଵଃ । ଜଯନ୍ତ୍ଯାଂ ଵାମଜଙ୍ଘା ଚ ଜଯନ୍ତୀ କ୍ରମଦୀଶ୍ଵରଃ ॥୨୮॥
ଭୁଵନେଶୀ ସିଦ୍ଧିରୂପା କିରୀଟସ୍ଥା କିରୀଟତଃ ଦେଵତା ଵିମଲା ନାମ୍ନୀ ସଂଵର୍ତ୍ତୋ ଭୈରଵସ୍ତଥା ॥୨୯॥
ଵାରାଣସ୍ଯାଂ ଵିଶାଲାକ୍ଷୀ ଦେଵତା କାଲଭୈରଵଃ । ମଣିକର୍ଣୀତି ଵିଖ୍ଯାତା କୁଣ୍ଡଲଂ ଚ ମମ ଶ୍ରୁତେଃ ॥୩୦॥
କନ୍ଯାଶ୍ରମେ ଚ ପୃଷ୍ଠଂ ମେ ନିମିଷୋ ଭୈରଵସ୍ତଥା । ସର୍ଵାଣୀ ଦେଵତା ତତ୍ର କୁରୁକ୍ଷେତ୍ରେ ଚ ଗୁଲ୍ଫତଃ ॥୩୧॥
ସ୍ଥାଣୁର୍ନାମ୍ନା ଚ ସାଵିତ୍ରୀ ଦେଵତା ମଣିଵେଦକେ । ମଣିବନ୍ଧେ ଚ ଗାଯତ୍ରୀ ସର୍ଵାନନ୍ଦସ୍ତୁ ଭୈରଵଃ ॥୩୨॥
ଶ୍ରୀଶୈଲେ ଚ ମମ ଗ୍ରୀଵା ମହାଲକ୍ଷ୍ମୀସ୍ତୁ ଦେଵତା । ଭୈରଵଃ ସମ୍ବରାନନ୍ଦୋ ଦେଶୋ ଦେଶୋ ଵ୍ଯଵସ୍ଥିତଃ ॥୩୩॥
କାଞ୍ଚୀଦେଶୋ ଚ କଙ୍କାଲୋ ଭୈରଵୋ ରୁରୁନାମକଃ । ଦେଵତା ଦେଵଗର୍ଭାଖ୍ଯା ନିତମ୍ବଃ କାଲମାଧଵେ ॥୩୪॥
ଭୈରଵଶ୍ଚାସିତାଙ୍ଗଶ୍ଚ ଦେଵୀ କାଲୀ ସୁସିଦ୍ଧିଦା । ଦୃଷ୍ଟା ଦୃଷ୍ଟା ନମସ୍କୃତ୍ଯ ମନ୍ତ୍ରସିଦ୍ଧିମଵାପ୍ନୁଯାତ୍ ॥୩୫॥
କୁଜଵାରେ ଭୂତତିଥୌ ନିଶାର୍ଦ୍ଧେ ଯସ୍ତୁ ସାଧକଃ । ନତ୍ଵା ପ୍ରଦକ୍ଷିଣୀକୃତ୍ଯ ମନ୍ତ୍ରସିଦ୍ଧିମଵାପ୍ନୁଯାତ୍ ॥୩୬॥
ଶୋଣାଖ୍ଯା ଭଦ୍ରସେନସ୍ତୁ ନର୍ମଦାଖ୍ଯେ ନିତମ୍ବକଃ । ରାମଗିରୌ ସ୍ତନାନ୍ଯଞ୍ଚ ଶିଵାନୀ ଚଣ୍ଡଭୈରଵଃ ॥୩୭॥
ଵୃନ୍ଦାଵନେ କେଶଜାଲମୁମା ନାମ୍ନୀ ଚ ଦେଵତା । ଭୂତେଶୋ ଭୈରଵସ୍ତତ୍ର ସର୍ଵସିଦ୍ଧିପ୍ରଦାଯକଃ ॥୩୮॥
ସଂହାରାଖ୍ଯ ଊର୍ଦ୍ଧଦନ୍ତୋ ଦେଵୀଽନଲେ ନାରାଯଣୀ ଶ୍ରୁଚୌ । ଅଧୋଦନ୍ତୋ ମହାରୁଦ୍ରୋ ଵାରାହୀ ପଞ୍ଚସାଗରେ ॥୩୯॥
କରତୋଯାତଟେ କର୍ଣେ ଵାମେ ଵାମନଭୈରଵଃ । ଅପର୍ଣା ଦେଵତା ଯତ୍ର ବ୍ରହ୍ମରୂପାକରୋଦ୍ଭଵା ॥୪୦॥
ଶ୍ରୀପର୍ଵତେ ଦକ୍ଷଗୁଲ୍ଫସ୍ତତ୍ର ଶ୍ରୀସୁନ୍ଦରୀ ପରା । ସର୍ଵସିଦ୍ଧୀଶ୍ଵରୀ ସର୍ଵା ସୁନ୍ଦରାନନ୍ଦଭୈରଵଃ ॥୪୧॥
କପାଲିନୀ ଭୀମରୂପା ଵାମଗୁଲ୍ଫୋ ଵିଭାଷକେ । ଭୈରଵଶ୍ଚ ମହାଦେଵ ସର୍ଵାନନ୍ଦଃ ଶୁଭପ୍ରଦଃ ॥୪୨॥
ଉଦରଞ୍ଚ ପ୍ରଭାସେ ମେ ଚନ୍ଦ୍ରଭାଗା ଯଶସ୍ଵିନୀ । ଵକ୍ରତୁଣ୍ଡୋ ଭୈରଵ ଊର୍ଧ୍ଵୋଷ୍ଠୋ ଭୈରଵପର୍ଵତେ ॥୪୩॥
ଅଵନ୍ତୀ ଚ ମହାଦେଵୀ ଲମ୍ବକର୍ଣସ୍ତୁ ଭୈରଵଃ ॥୪୪॥
ଚିଵୁକେ ଭ୍ରାମରୀ ଦେଵୀ ଵିକୃତାକ୍ଷୋ ଜନସ୍ଥାନେ । ଗଣ୍ଡୋ ଗୋଦାଵରୀତୀରେ ଵିଶ୍ଵେଶୀ ଵିଶ୍ଵମାତୃକା ॥୪୫॥
ଦଣ୍ଡପାଣିଭୈରଵସ୍ତୁ ଵାମଗଣ୍ଡେ ତୁ ରାକିଣୀ । ଭୈରଵୋ ଵତ୍ସନାଭସ୍ତୁ ତତ୍ର ସିଦ୍ଧିର୍ନ ସଂଶଯଃ ॥୪୬॥
ରତ୍ନାଵଲ୍ଯାଂ ଦକ୍ଷସ୍କନ୍ଧଃ କୁମାରୀ ଭୈରଵଃ ଶିଵଃ । ମିଥିଲାଯାମୁମା ଦେଵୀ ଵାମସ୍କନ୍ଧୋ ମହୋଦରଃ ॥୪୭॥
ନଲାହାଟ୍ଯାଂ ନଲାପାତୋ ଯୋଗୀଶୋ ଭୈରଵସ୍ତଥା । ତତ୍ର ସା କାଲିକା ଦେଵୀ ସର୍ଵସିଦ୍ଧିପ୍ରଦାଯିକା ॥୪୮॥
କାଲୀଘାଟେ ମୁଣ୍ଡପାତଃ କ୍ରୋଧୀଶୋ ଭୈରଵସ୍ତଥା । ଦେଵତା ଜଯଦୁର୍ଗାଖ୍ଯା ନାନାଭୋଗପ୍ରଦାଯିନୀ ॥୪୯॥
ଵକ୍ରେଶ୍ଵରେ ମନଃପାତୋ ଵକ୍ରନାଥସ୍ତୁ ଭୈରଵଃ । ନଦୀ ପାପହରା ତତ୍ର ଦେଵୀ ମହିଷମର୍ଦିନୀ ॥୫୦॥
ଯଶୋରେ ପାଣିପଦ୍ମଞ୍ଚ ଦେଵତା ଯଶୋରେଶ୍ଵରୀ । ଚଣ୍ଡଶ୍ଚ ଭୈରଵୋ ଯତ୍ର ତତ୍ର ସିଦ୍ଧିର୍ନ ସଂଶଯ ॥୫୧॥
ଅଟ୍ଟହାସେ ଚୋଷ୍ଠପାତୋ ଦେଵୀ ସା ଫୁଲ୍ଲରା ସ୍ମୃତା । ଵିଶ୍ଵେଶୋ ଭୈରଵସ୍ତତ୍ର ସର୍ଵାଭୀଷ୍ଟପ୍ରଦାଯକଃ ॥୫୨॥
ହାରପାତୋ ନନ୍ଦିପୁରେ ଭୈରଵୋ ନନ୍ଦିକେଶ୍ଵରଃ । ନନ୍ଦିନୀ ସା ମହାଦେଵୀ ତତ୍ର ସିଦ୍ଧିମଵାପ୍ନୁଯାତ୍ ॥୫୩॥
ଲଙ୍କାଯାଂ ନୂପୁରଞ୍ଚୈଵ ଭୈରଵୋ ରାକ୍ଷସେଶ୍ଵରଃ । ଇନ୍ଦ୍ରାକ୍ଷୀ ଦେଵତା ତତ୍ର ଇନ୍ଦ୍ରେଣୋପାସିତା ପୁରା ॥୫୪॥
ଵିରାଟଦେଶମଧ୍ଯେ ତୁ ପାଦାଙ୍ଗୁଲିନିପାତନମ୍ । ଭୈରଵଶ୍ଚାମୃତାଖ୍ଯଶ୍ଚ ଦେଵୀ ତତ୍ରାମ୍ବିକା ସ୍ମୃତା ॥୫୫॥
ଏତାସ୍ତେ କଥିତାଃ ପୁତ୍ର ପୀଠନାଥାଧିଦେଵତାଃ । କ୍ଷେତ୍ରାଧିପଂ ଵିନା ଦେଵ ପୂଜଯେତ୍ ପୀଠଦେଵତାମ୍ । ଭୈରଵୈର୍ହ୍ରଯତେ ସର୍ଵଂ ଜପପୂଜାଦିସାଧନମ୍ ॥୫୬॥
ଅଜ୍ଞାତ୍ଵା ଭୈରଵଂ ପୀଠେ ପୀଠଶକ୍ତିତଞ୍ଚ ଶଙ୍କର । ପ୍ରାଣନାଥ ନ ସିଧ୍ଯେତ୍ତୁ କଲ୍ପକୋଟି ଜପାଦିଭିଃ ॥୫୭॥
ନ ଦେଯଂ ପରଶିଷ୍ଯାଯ ନିନ୍ଦକାଯ ଦୁରାତ୍ମନେ । ଶଠାଯ କ୍ରୂରକାର୍ଯାଯ ଦତ୍ଵା ମୃତ୍ଯୁମଵାପ୍ନୁଯାତ୍ । ଦଦ୍ଯାଚ୍ଛାନ୍ତାଯ ଶିଷ୍ଯାଯ ମନ୍ତ୍ରୀ ମନ୍ତ୍ରାର୍ଥସିଦ୍ଧଯେ ॥୫୮॥