ಈಶ್ವರ ಉವಾಚ। ಮಾತಃ ಪರಾತ್ಪರೇ ದೇವಿ ಸರ್ವಜ್ಞಾನಮಯೀಶ್ವರಿ । ಕಥ್ಯತಾಂ ಮೇ ಸರ್ವಪೀಠಶಕ್ತಿಭೈರವದೇವತಾಃ ॥೧॥
ದೇವ್ಯುವಾಚ। ಶೃಣು ವತ್ಸ ಪ್ರವಕ್ಷ್ಯಾಮಿ ದಯಾಲ ಭಕ್ತವತ್ಸಲ । ಯಾಭಿರ್ವಿನಾ ನ ಸಿಧ್ಯನ್ತಿ ಜಪಸಾಧನಸತ್ಕ್ರಿಯಾಃ ॥೨॥
ಪಞ್ಚಾಶದೇಕಪೀಠಾನಿ ಏವಂ ಭೈರವದೇವತಾಃ । ಅಙ್ಗಪ್ರತ್ಯಙ್ಗಪಾತೇನ ವಿಷ್ಣುಚಕ್ರಕ್ಷತೇನ ಚ ಮಮಾದ್ಯವಪುಷೋ ದೇವ ಹಿತಾಯ ತ್ವಯಿ ಕಥ್ಯತೇ ॥೩॥
ಬ್ರಹ್ಮರನ್ಧ್ರಂ ಹಿಙ್ಗುಲಾಯಾಂ ಭೈರವೋ ಭೀಮಲೋಚನಃ । ಕೋಟ್ಟರೀ ಸಾ ಮಹಾದೇವ ತ್ರಿಗುಣಾ ಯಾ ದಿಗಮ್ಬರೀ ॥೪॥
ಕರವೀರೇ ತ್ರಿನೇತ್ರಂ ಮೇ ದೇವೀ ಮಹಿಷಮರ್ದಿನೀ । ಕ್ರೋಧೀಶೋ ಭೈರವಸ್ತತ್ರ ಸುಗನ್ಧಾಯಾಞ್ಚ ನಾಸಿಕಾ ॥೫॥
ದೇವಸ್ತ್ರ್ಯಮ್ಬಕನಾಮಾ ಚ ಸುನನ್ದಾ ತತ್ರ ದೇವತಾ ॥೬॥
ಕಾಶ್ಮೀರೇ ಕಣ್ಠದೇಶಞ್ಚ ತ್ರಿಸನ್ಧ್ಯೇಶ್ವರಭೈರವಃ । ಮಹಾಮಾಯಾ ಭಗವತೀ ಗುಣಾತೀತಾ ವರಪ್ರದಾ ॥೭॥
ಜ್ವಾಲಾಮುಖ್ಯಾಂ ತಥಾ ಜಿಹ್ವಾ ದೇವ ಉನ್ಮತ್ತಭೈರವಃ । ಅಮ್ಬಿಕಾ ಸಿದ್ಧಿದಾ ನಾಮ್ನೀ ಸ್ತನಂ ಜಾಲನ್ಧರೇ ಮಮ ॥೮॥
ಭೀಷಣೋ ಭೈರವಸ್ತತ್ರ ದೇವೀ ತ್ರಿಪುರಮಾಲಿನೀ ॥೯॥
ಹಾರ್ದಪೀಠಂ ವೈದ್ಯನಾಥೇ ವೈದ್ಯನಾಥಸ್ತು ಭೈರವಃ । ದೇವತಾ ಜಯದುರ್ಗಾಖ್ಯಾ ನೇಪಾಲೇ ಜಾನು ಮೇ ಶಿವ ॥೧೦॥
ಕಪಾಲೀ ಭೈರವಃ ಶ್ರೀಮಾನ್ ಮಹಾಮಾಯಾ ಚ ದೇವತಾ ॥೧೧॥
ಮಾನಸೇ ದಕ್ಷಹಸ್ತೋ ಮೇ ದೇವೀ ದಾಕ್ಷಾಯಣೀ ಹರ । ಅಮರೋ ಭೈರವಸ್ತತ್ರ ಸರ್ವಸಿದ್ಧಿಪ್ರದಾಯಕಃ ॥೧೨॥
ಉತ್ಕಲೇ ನಾಭಿದೇಶಞ್ಚ ವಿರಜಾಕ್ಷೇತ್ರಮುಚ್ಯತೇ । ವಿಮಲಾ ಸಾ ಮಹಾದೇವೀ ಜಗನ್ನಾಥಸ್ತು ಭೈರವಃ ॥೧೩॥
ಗಣ್ಡಕ್ಯಾಂ ಗಣ್ಡಪಾತಞ್ಚ ತತ್ರ ಸಿದ್ಧಿರ್ನ ಸಂಶಯಃ । ತತ್ರ ಸಾ ಗಣ್ಡಕೀ ಚಣ್ಡೀ ಚಕ್ರಪಾಣಿಸ್ತು ಭೈರವಃ ॥೧೪॥
ಬಹುಲಾಯಾಂ ವಾಮಬಾಹುರ್ಬಹುಲಾಖ್ಯಾ ಚ ದೇವತಾ । ಭೀರುಕೋ ಭೈರವಸ್ತತ್ರ ಸರ್ವಸಿದ್ಧಿಪ್ರದಾಯಕಃ ॥೧೫॥
ಉಜ್ಜಯಿನ್ಯಾಂ ಕೂರ್ಪರಞ್ಚ ಮಾಙ್ಗಲ್ಯ ಕಪಿಲಾಮ್ಬರಃ ಭೈರವಃ ಸಿದ್ಧಿದಃ ಸಾಕ್ಷಾದ್ದೇವೀ ಮಙ್ಗಲಚಣ್ಡಿಕಾ ॥೧೬॥
ಚಟ್ಟಲೇ ದಕ್ಷಬಾಹುರ್ಮೇ ಭೈರವಞ್ಚನ್ದ್ರಶೇಖರಃ । ವ್ಯಕ್ತರೂಪಾ ಭಗವತೀ ಭವಾನೀ ಯತ್ರ ದೇವತಾ । ವಿಶೇಷತಃ ಕಲಿಯುಗೇ ವಸಾಮಿ ಚನ್ದ್ರಶೇಖರೇ ॥೧೭॥
ತ್ರಿಪುರಾಯಾಂ ದಕ್ಷಪಾದೋ ದೇವೀ ತ್ರಿಪುರಸುನ್ದರೀ । ಭೈರವಸ್ತ್ರಿಪುರೇಶಞ್ಚ ಸರ್ವಾಭೀಷ್ಟಪ್ರದಾಯಕಃ ॥೧೮॥
ತ್ರಿಸ್ರೋತಾಯಾಂ ವಾಮಪಾದೋ ಭ್ರಾಮರೀ ಭೈರವೇಶ್ವರಃ ॥೧೯॥
ಯೋನಿಪೀಠಂ ಕಾಮಗಿರೌ ಕಾಮಾಖ್ಯಾ ತತ್ರ ದೇವತಾ । ಯತ್ರಾಸ್ತೇ ತ್ರಿಗುಣಾತೀತಾ ರಕ್ತಪಾಷಾಣರೂಪಿಣೀ ॥೨೦॥
ಯತ್ರಾಸ್ತೇ ಮಾಧವಃ ಸಾಕ್ಷಾದುಮಾನನ್ದೋಽಥ ಭೈರವಃ । ಸರ್ವದಾ ವಿಹರೇದ್ದೇವೀ ತತ್ರ ಮುಕ್ತಿರ್ನ ಸಂಶಯಃ ॥೨೧॥
ತತ್ರ ಶ್ರೀಭೈರವೀ ದೇವೀ ತತ್ರ ಚ ಕ್ಷೇತ್ರದೇವತಾ । ಪ್ರಚಣ್ಡಚಣ್ಡಿಕಾ ತತ್ರ ಮಾತಙ್ಗೀ ತ್ರಿಪುರಾಮ್ಬಿಕಾ । ವಗಲಾ ಕಮಲಾ ತತ್ರ ಭುವನೇಶೀ ಸಧೂಮಿನೀ ॥೨೨॥
ಏತಾನಿ ಪರಪೀಠಾನಿ ಶಂಸನ್ತಿ ವರಭೈರವಾಃ । ಏವಂ ತು ದೇವತಾಃ ಸರ್ವಾ ಏವಂ ತು ದಶ ಭೈರವಾಃ ॥೨೩॥
ಸರ್ವತ್ರ ವಿರಲಾ ಚಾಹಂ ಕಾಮರೂಪೇ ಗೃಹೇ ಗೃಹೇ । ಗೌರಿ ಶಿಖರಮಾರುಹ್ಯ ಪುನರ್ಜನ್ಮ ನ ವಿದ್ಯತೇ ॥೨೪॥
ಕರತೋಯಾಂ ಸಮಾರಮ್ಯ ಯಾವದ್ದಿಕ್ಕರವಾಸಿನೀಮ್ । ಶತಯೋಜನವಿಸ್ತೀರ್ಣಂ ತ್ರಿಕೋಣಂ ಸರ್ವಸಿದ್ಧಿದಮ್ । ದೇವಾ ಮರಣಮಿಚ್ಛನ್ತಿ ಕಿಂ ಪುನರ್ಮಾನವಾದಯಃ ॥೨೫॥
ಕ್ಷೀರಗ್ರಾಮೇ ಮಹಾಮಾಯಾ ಭೈರವಃ ಕ್ಷೀರಖಣ್ಡಕಃ । ಯುಗದ್ಯಾ ಸಾ ಮಹಾಮಾಯಾ ದಕ್ಷಾಙ್ಗುಷ್ಠಂ ಪದೋ ಮಮ ॥೨೬॥
ನಕುಲೀಶಃ ಕಾಲೀಪೀಠೇ ದಕ್ಷಪಾದಾಙ್ಗುಲೀ ಚ ಮೇ । ಸರ್ವಸಿದ್ಧಿಕರೀ ದೇವೀ ಕಾಲಿಕಾ ತತ್ರ ದೇವತಾ ॥೨೭॥
ಅಙ್ಗುಲೀವೃನ್ದಂ ಹಸ್ತಸ್ಯ ಪ್ರಯಾಗೇ ಲಲಿತಾ ಭವಃ । ಜಯನ್ತ್ಯಾಂ ವಾಮಜಙ್ಘಾ ಚ ಜಯನ್ತೀ ಕ್ರಮದೀಶ್ವರಃ ॥೨೮॥
ಭುವನೇಶೀ ಸಿದ್ಧಿರೂಪಾ ಕಿರೀಟಸ್ಥಾ ಕಿರೀಟತಃ ದೇವತಾ ವಿಮಲಾ ನಾಮ್ನೀ ಸಂವರ್ತ್ತೋ ಭೈರವಸ್ತಥಾ ॥೨೯॥
ವಾರಾಣಸ್ಯಾಂ ವಿಶಾಲಾಕ್ಷೀ ದೇವತಾ ಕಾಲಭೈರವಃ । ಮಣಿಕರ್ಣೀತಿ ವಿಖ್ಯಾತಾ ಕುಣ್ಡಲಂ ಚ ಮಮ ಶ್ರುತೇಃ ॥೩೦॥
ಕನ್ಯಾಶ್ರಮೇ ಚ ಪೃಷ್ಠಂ ಮೇ ನಿಮಿಷೋ ಭೈರವಸ್ತಥಾ । ಸರ್ವಾಣೀ ದೇವತಾ ತತ್ರ ಕುರುಕ್ಷೇತ್ರೇ ಚ ಗುಲ್ಫತಃ ॥೩೧॥
ಸ್ಥಾಣುರ್ನಾಮ್ನಾ ಚ ಸಾವಿತ್ರೀ ದೇವತಾ ಮಣಿವೇದಕೇ । ಮಣಿಬನ್ಧೇ ಚ ಗಾಯತ್ರೀ ಸರ್ವಾನನ್ದಸ್ತು ಭೈರವಃ ॥೩೨॥
ಶ್ರೀಶೈಲೇ ಚ ಮಮ ಗ್ರೀವಾ ಮಹಾಲಕ್ಷ್ಮೀಸ್ತು ದೇವತಾ । ಭೈರವಃ ಸಮ್ಬರಾನನ್ದೋ ದೇಶೋ ದೇಶೋ ವ್ಯವಸ್ಥಿತಃ ॥೩೩॥
ಕಾಞ್ಚೀದೇಶೋ ಚ ಕಙ್ಕಾಲೋ ಭೈರವೋ ರುರುನಾಮಕಃ । ದೇವತಾ ದೇವಗರ್ಭಾಖ್ಯಾ ನಿತಮ್ಬಃ ಕಾಲಮಾಧವೇ ॥೩೪॥
ಭೈರವಶ್ಚಾಸಿತಾಙ್ಗಶ್ಚ ದೇವೀ ಕಾಲೀ ಸುಸಿದ್ಧಿದಾ । ದೃಷ್ಟಾ ದೃಷ್ಟಾ ನಮಸ್ಕೃತ್ಯ ಮನ್ತ್ರಸಿದ್ಧಿಮವಾಪ್ನುಯಾತ್ ॥೩೫॥
ಕುಜವಾರೇ ಭೂತತಿಥೌ ನಿಶಾರ್ದ್ಧೇ ಯಸ್ತು ಸಾಧಕಃ । ನತ್ವಾ ಪ್ರದಕ್ಷಿಣೀಕೃತ್ಯ ಮನ್ತ್ರಸಿದ್ಧಿಮವಾಪ್ನುಯಾತ್ ॥೩೬॥
ಶೋಣಾಖ್ಯಾ ಭದ್ರಸೇನಸ್ತು ನರ್ಮದಾಖ್ಯೇ ನಿತಮ್ಬಕಃ । ರಾಮಗಿರೌ ಸ್ತನಾನ್ಯಞ್ಚ ಶಿವಾನೀ ಚಣ್ಡಭೈರವಃ ॥೩೭॥
ವೃನ್ದಾವನೇ ಕೇಶಜಾಲಮುಮಾ ನಾಮ್ನೀ ಚ ದೇವತಾ । ಭೂತೇಶೋ ಭೈರವಸ್ತತ್ರ ಸರ್ವಸಿದ್ಧಿಪ್ರದಾಯಕಃ ॥೩೮॥
ಸಂಹಾರಾಖ್ಯ ಊರ್ದ್ಧದನ್ತೋ ದೇವೀಽನಲೇ ನಾರಾಯಣೀ ಶ್ರುಚೌ । ಅಧೋದನ್ತೋ ಮಹಾರುದ್ರೋ ವಾರಾಹೀ ಪಞ್ಚಸಾಗರೇ ॥೩೯॥
ಕರತೋಯಾತಟೇ ಕರ್ಣೇ ವಾಮೇ ವಾಮನಭೈರವಃ । ಅಪರ್ಣಾ ದೇವತಾ ಯತ್ರ ಬ್ರಹ್ಮರೂಪಾಕರೋದ್ಭವಾ ॥೪೦॥
ಶ್ರೀಪರ್ವತೇ ದಕ್ಷಗುಲ್ಫಸ್ತತ್ರ ಶ್ರೀಸುನ್ದರೀ ಪರಾ । ಸರ್ವಸಿದ್ಧೀಶ್ವರೀ ಸರ್ವಾ ಸುನ್ದರಾನನ್ದಭೈರವಃ ॥೪೧॥
ಕಪಾಲಿನೀ ಭೀಮರೂಪಾ ವಾಮಗುಲ್ಫೋ ವಿಭಾಷಕೇ । ಭೈರವಶ್ಚ ಮಹಾದೇವ ಸರ್ವಾನನ್ದಃ ಶುಭಪ್ರದಃ ॥೪೨॥
ಉದರಞ್ಚ ಪ್ರಭಾಸೇ ಮೇ ಚನ್ದ್ರಭಾಗಾ ಯಶಸ್ವಿನೀ । ವಕ್ರತುಣ್ಡೋ ಭೈರವ ಊರ್ಧ್ವೋಷ್ಠೋ ಭೈರವಪರ್ವತೇ ॥೪೩॥
ಅವನ್ತೀ ಚ ಮಹಾದೇವೀ ಲಮ್ಬಕರ್ಣಸ್ತು ಭೈರವಃ ॥೪೪॥
ಚಿವುಕೇ ಭ್ರಾಮರೀ ದೇವೀ ವಿಕೃತಾಕ್ಷೋ ಜನಸ್ಥಾನೇ । ಗಣ್ಡೋ ಗೋದಾವರೀತೀರೇ ವಿಶ್ವೇಶೀ ವಿಶ್ವಮಾತೃಕಾ ॥೪೫॥
ದಣ್ಡಪಾಣಿಭೈರವಸ್ತು ವಾಮಗಣ್ಡೇ ತು ರಾಕಿಣೀ । ಭೈರವೋ ವತ್ಸನಾಭಸ್ತು ತತ್ರ ಸಿದ್ಧಿರ್ನ ಸಂಶಯಃ ॥೪೬॥
ರತ್ನಾವಲ್ಯಾಂ ದಕ್ಷಸ್ಕನ್ಧಃ ಕುಮಾರೀ ಭೈರವಃ ಶಿವಃ । ಮಿಥಿಲಾಯಾಮುಮಾ ದೇವೀ ವಾಮಸ್ಕನ್ಧೋ ಮಹೋದರಃ ॥೪೭॥
ನಲಾಹಾಟ್ಯಾಂ ನಲಾಪಾತೋ ಯೋಗೀಶೋ ಭೈರವಸ್ತಥಾ । ತತ್ರ ಸಾ ಕಾಲಿಕಾ ದೇವೀ ಸರ್ವಸಿದ್ಧಿಪ್ರದಾಯಿಕಾ ॥೪೮॥
ಕಾಲೀಘಾಟೇ ಮುಣ್ಡಪಾತಃ ಕ್ರೋಧೀಶೋ ಭೈರವಸ್ತಥಾ । ದೇವತಾ ಜಯದುರ್ಗಾಖ್ಯಾ ನಾನಾಭೋಗಪ್ರದಾಯಿನೀ ॥೪೯॥
ವಕ್ರೇಶ್ವರೇ ಮನಃಪಾತೋ ವಕ್ರನಾಥಸ್ತು ಭೈರವಃ । ನದೀ ಪಾಪಹರಾ ತತ್ರ ದೇವೀ ಮಹಿಷಮರ್ದಿನೀ ॥೫೦॥
ಯಶೋರೇ ಪಾಣಿಪದ್ಮಞ್ಚ ದೇವತಾ ಯಶೋರೇಶ್ವರೀ । ಚಣ್ಡಶ್ಚ ಭೈರವೋ ಯತ್ರ ತತ್ರ ಸಿದ್ಧಿರ್ನ ಸಂಶಯ ॥೫೧॥
ಅಟ್ಟಹಾಸೇ ಚೋಷ್ಠಪಾತೋ ದೇವೀ ಸಾ ಫುಲ್ಲರಾ ಸ್ಮೃತಾ । ವಿಶ್ವೇಶೋ ಭೈರವಸ್ತತ್ರ ಸರ್ವಾಭೀಷ್ಟಪ್ರದಾಯಕಃ ॥೫೨॥
ಹಾರಪಾತೋ ನನ್ದಿಪುರೇ ಭೈರವೋ ನನ್ದಿಕೇಶ್ವರಃ । ನನ್ದಿನೀ ಸಾ ಮಹಾದೇವೀ ತತ್ರ ಸಿದ್ಧಿಮವಾಪ್ನುಯಾತ್ ॥೫೩॥
ಲಙ್ಕಾಯಾಂ ನೂಪುರಞ್ಚೈವ ಭೈರವೋ ರಾಕ್ಷಸೇಶ್ವರಃ । ಇನ್ದ್ರಾಕ್ಷೀ ದೇವತಾ ತತ್ರ ಇನ್ದ್ರೇಣೋಪಾಸಿತಾ ಪುರಾ ॥೫೪॥
ವಿರಾಟದೇಶಮಧ್ಯೇ ತು ಪಾದಾಙ್ಗುಲಿನಿಪಾತನಮ್ । ಭೈರವಶ್ಚಾಮೃತಾಖ್ಯಶ್ಚ ದೇವೀ ತತ್ರಾಮ್ಬಿಕಾ ಸ್ಮೃತಾ ॥೫೫॥
ಏತಾಸ್ತೇ ಕಥಿತಾಃ ಪುತ್ರ ಪೀಠನಾಥಾಧಿದೇವತಾಃ । ಕ್ಷೇತ್ರಾಧಿಪಂ ವಿನಾ ದೇವ ಪೂಜಯೇತ್ ಪೀಠದೇವತಾಮ್ । ಭೈರವೈರ್ಹ್ರಯತೇ ಸರ್ವಂ ಜಪಪೂಜಾದಿಸಾಧನಮ್ ॥೫೬॥
ಅಜ್ಞಾತ್ವಾ ಭೈರವಂ ಪೀಠೇ ಪೀಠಶಕ್ತಿತಞ್ಚ ಶಙ್ಕರ । ಪ್ರಾಣನಾಥ ನ ಸಿಧ್ಯೇತ್ತು ಕಲ್ಪಕೋಟಿ ಜಪಾದಿಭಿಃ ॥೫೭॥
ನ ದೇಯಂ ಪರಶಿಷ್ಯಾಯ ನಿನ್ದಕಾಯ ದುರಾತ್ಮನೇ । ಶಠಾಯ ಕ್ರೂರಕಾರ್ಯಾಯ ದತ್ವಾ ಮೃತ್ಯುಮವಾಪ್ನುಯಾತ್ । ದದ್ಯಾಚ್ಛಾನ್ತಾಯ ಶಿಷ್ಯಾಯ ಮನ್ತ್ರೀ ಮನ್ತ್ರಾರ್ಥಸಿದ್ಧಯೇ ॥೫೮॥