īśvara uvāca| mātaḥ parātpare devi sarvajñānamayīśvari | kathyatāṃ me sarvapīṭhaśaktibhairavadevatāḥ ||1||
devyuvāca| śṛṇu vatsa pravakṣyāmi dayāla bhaktavatsala | yābhirvinā na sidhyanti japasādhanasatkriyāḥ ||2||
pañcāśadekapīṭhāni evaṃ bhairavadevatāḥ | aṅgapratyaṅgapātena viṣṇucakrakṣatena ca mamādyavapuṣo deva hitāya tvayi kathyate ||3||
brahmarandhraṃ hiṅgulāyāṃ bhairavo bhīmalocanaḥ | koṭṭarī sā mahādeva triguṇā yā digambarī ||4||
karavīre trinetraṃ me devī mahiṣamardinī | krodhīśo bhairavastatra sugandhāyāñca nāsikā ||5||
devastryambakanāmā ca sunandā tatra devatā ||6||
kāśmīre kaṇṭhadeśañca trisandhyeśvarabhairavaḥ | mahāmāyā bhagavatī guṇātītā varapradā ||7||
jvālāmukhyāṃ tathā jihvā deva unmattabhairavaḥ | ambikā siddhidā nāmnī stanaṃ jālandhare mama ||8||
bhīṣaṇo bhairavastatra devī tripuramālinī ||9||
hārdapīṭhaṃ vaidyanāthe vaidyanāthastu bhairavaḥ | devatā jayadurgākhyā nepāle jānu me śiva ||10||
kapālī bhairavaḥ śrīmān mahāmāyā ca devatā ||11||
mānase dakṣahasto me devī dākṣāyaṇī hara | amaro bhairavastatra sarvasiddhipradāyakaḥ ||12||
utkale nābhideśañca virajākṣetramucyate | vimalā sā mahādevī jagannāthastu bhairavaḥ ||13||
gaṇḍakyāṃ gaṇḍapātañca tatra siddhirna saṃśayaḥ | tatra sā gaṇḍakī caṇḍī cakrapāṇistu bhairavaḥ ||14||
bahulāyāṃ vāmabāhurbahulākhyā ca devatā | bhīruko bhairavastatra sarvasiddhipradāyakaḥ ||15||
ujjayinyāṃ kūrparañca māṅgalya kapilāmbaraḥ bhairavaḥ siddhidaḥ sākṣāddevī maṅgalacaṇḍikā ||16||
caṭṭale dakṣabāhurme bhairavañcandraśekharaḥ | vyaktarūpā bhagavatī bhavānī yatra devatā | viśeṣataḥ kaliyuge vasāmi candraśekhare ||17||
tripurāyāṃ dakṣapādo devī tripurasundarī | bhairavastripureśañca sarvābhīṣṭapradāyakaḥ ||18||
trisrotāyāṃ vāmapādo bhrāmarī bhairaveśvaraḥ ||19||
yonipīṭhaṃ kāmagirau kāmākhyā tatra devatā | yatrāste triguṇātītā raktapāṣāṇarūpiṇī ||20||
yatrāste mādhavaḥ sākṣādumānando'tha bhairavaḥ | sarvadā vihareddevī tatra muktirna saṃśayaḥ ||21||
tatra śrībhairavī devī tatra ca kṣetradevatā | pracaṇḍacaṇḍikā tatra mātaṅgī tripurāmbikā | vagalā kamalā tatra bhuvaneśī sadhūminī ||22||
etāni parapīṭhāni śaṃsanti varabhairavāḥ | evaṃ tu devatāḥ sarvā evaṃ tu daśa bhairavāḥ ||23||
sarvatra viralā cāhaṃ kāmarūpe gṛhe gṛhe | gauri śikharamāruhya punarjanma na vidyate ||24||
karatoyāṃ samāramya yāvaddikkaravāsinīm | śatayojanavistīrṇaṃ trikoṇaṃ sarvasiddhidam | devā maraṇamicchanti kiṃ punarmānavādayaḥ ||25||
kṣīragrāme mahāmāyā bhairavaḥ kṣīrakhaṇḍakaḥ | yugadyā sā mahāmāyā dakṣāṅguṣṭhaṃ pado mama ||26||
nakulīśaḥ kālīpīṭhe dakṣapādāṅgulī ca me | sarvasiddhikarī devī kālikā tatra devatā ||27||
aṅgulīvṛndaṃ hastasya prayāge lalitā bhavaḥ | jayantyāṃ vāmajaṅghā ca jayantī kramadīśvaraḥ ||28||
bhuvaneśī siddhirūpā kirīṭasthā kirīṭataḥ devatā vimalā nāmnī saṃvartto bhairavastathā ||29||
vārāṇasyāṃ viśālākṣī devatā kālabhairavaḥ | maṇikarṇīti vikhyātā kuṇḍalaṃ ca mama śruteḥ ||30||
kanyāśrame ca pṛṣṭhaṃ me nimiṣo bhairavastathā | sarvāṇī devatā tatra kurukṣetre ca gulphataḥ ||31||
sthāṇurnāmnā ca sāvitrī devatā maṇivedake | maṇibandhe ca gāyatrī sarvānandastu bhairavaḥ ||32||
śrīśaile ca mama grīvā mahālakṣmīstu devatā | bhairavaḥ sambarānando deśo deśo vyavasthitaḥ ||33||
kāñcīdeśo ca kaṅkālo bhairavo rurunāmakaḥ | devatā devagarbhākhyā nitambaḥ kālamādhave ||34||
bhairavaścāsitāṅgaśca devī kālī susiddhidā | dṛṣṭā dṛṣṭā namaskṛtya mantrasiddhimavāpnuyāt ||35||
kujavāre bhūtatithau niśārddhe yastu sādhakaḥ | natvā pradakṣiṇīkṛtya mantrasiddhimavāpnuyāt ||36||
śoṇākhyā bhadrasenastu narmadākhye nitambakaḥ | rāmagirau stanānyañca śivānī caṇḍabhairavaḥ ||37||
vṛndāvane keśajālamumā nāmnī ca devatā | bhūteśo bhairavastatra sarvasiddhipradāyakaḥ ||38||
saṃhārākhya ūrddhadanto devī'nale nārāyaṇī śrucau | adhodanto mahārudro vārāhī pañcasāgare ||39||
karatoyātaṭe karṇe vāme vāmanabhairavaḥ | aparṇā devatā yatra brahmarūpākarodbhavā ||40||
śrīparvate dakṣagulphastatra śrīsundarī parā | sarvasiddhīśvarī sarvā sundarānandabhairavaḥ ||41||
kapālinī bhīmarūpā vāmagulpho vibhāṣake | bhairavaśca mahādeva sarvānandaḥ śubhapradaḥ ||42||
udarañca prabhāse me candrabhāgā yaśasvinī | vakratuṇḍo bhairava ūrdhvoṣṭho bhairavaparvate ||43||
avantī ca mahādevī lambakarṇastu bhairavaḥ ||44||
civuke bhrāmarī devī vikṛtākṣo janasthāne | gaṇḍo godāvarītīre viśveśī viśvamātṛkā ||45||
daṇḍapāṇibhairavastu vāmagaṇḍe tu rākiṇī | bhairavo vatsanābhastu tatra siddhirna saṃśayaḥ ||46||
ratnāvalyāṃ dakṣaskandhaḥ kumārī bhairavaḥ śivaḥ | mithilāyāmumā devī vāmaskandho mahodaraḥ ||47||
nalāhāṭyāṃ nalāpāto yogīśo bhairavastathā | tatra sā kālikā devī sarvasiddhipradāyikā ||48||
kālīghāṭe muṇḍapātaḥ krodhīśo bhairavastathā | devatā jayadurgākhyā nānābhogapradāyinī ||49||
vakreśvare manaḥpāto vakranāthastu bhairavaḥ | nadī pāpaharā tatra devī mahiṣamardinī ||50||
yaśore pāṇipadmañca devatā yaśoreśvarī | caṇḍaśca bhairavo yatra tatra siddhirna saṃśaya ||51||
aṭṭahāse coṣṭhapāto devī sā phullarā smṛtā | viśveśo bhairavastatra sarvābhīṣṭapradāyakaḥ ||52||
hārapāto nandipure bhairavo nandikeśvaraḥ | nandinī sā mahādevī tatra siddhimavāpnuyāt ||53||
laṅkāyāṃ nūpurañcaiva bhairavo rākṣaseśvaraḥ | indrākṣī devatā tatra indreṇopāsitā purā ||54||
virāṭadeśamadhye tu pādāṅgulinipātanam | bhairavaścāmṛtākhyaśca devī tatrāmbikā smṛtā ||55||
etāste kathitāḥ putra pīṭhanāthādhidevatāḥ | kṣetrādhipaṃ vinā deva pūjayet pīṭhadevatām | bhairavairhrayate sarvaṃ japapūjādisādhanam ||56||
ajñātvā bhairavaṃ pīṭhe pīṭhaśaktitañca śaṅkara | prāṇanātha na sidhyettu kalpakoṭi japādibhiḥ ||57||
na deyaṃ paraśiṣyāya nindakāya durātmane | śaṭhāya krūrakāryāya datvā mṛtyumavāpnuyāt | dadyācchāntāya śiṣyāya mantrī mantrārthasiddhaye ||58||