ઈશ્વર ઉવાચ। માતઃ પરાત્પરે દેવિ સર્વજ્ઞાનમયીશ્વરિ । કથ્યતાં મે સર્વપીઠશક્તિભૈરવદેવતાઃ ॥૧॥
દેવ્યુવાચ। શૃણુ વત્સ પ્રવક્ષ્યામિ દયાલ ભક્તવત્સલ । યાભિર્વિના ન સિધ્યન્તિ જપસાધનસત્ક્રિયાઃ ॥૨॥
પઞ્ચાશદેકપીઠાનિ એવં ભૈરવદેવતાઃ । અઙ્ગપ્રત્યઙ્ગપાતેન વિષ્ણુચક્રક્ષતેન ચ મમાદ્યવપુષો દેવ હિતાય ત્વયિ કથ્યતે ॥૩॥
બ્રહ્મરન્ધ્રં હિઙ્ગુલાયાં ભૈરવો ભીમલોચનઃ । કોટ્ટરી સા મહાદેવ ત્રિગુણા યા દિગમ્બરી ॥૪॥
કરવીરે ત્રિનેત્રં મે દેવી મહિષમર્દિની । ક્રોધીશો ભૈરવસ્તત્ર સુગન્ધાયાઞ્ચ નાસિકા ॥૫॥
દેવસ્ત્ર્યમ્બકનામા ચ સુનન્દા તત્ર દેવતા ॥૬॥
કાશ્મીરે કણ્ઠદેશઞ્ચ ત્રિસન્ધ્યેશ્વરભૈરવઃ । મહામાયા ભગવતી ગુણાતીતા વરપ્રદા ॥૭॥
જ્વાલામુખ્યાં તથા જિહ્વા દેવ ઉન્મત્તભૈરવઃ । અમ્બિકા સિદ્ધિદા નામ્ની સ્તનં જાલન્ધરે મમ ॥૮॥
ભીષણો ભૈરવસ્તત્ર દેવી ત્રિપુરમાલિની ॥૯॥
હાર્દપીઠં વૈદ્યનાથે વૈદ્યનાથસ્તુ ભૈરવઃ । દેવતા જયદુર્ગાખ્યા નેપાલે જાનુ મે શિવ ॥૧૦॥
કપાલી ભૈરવઃ શ્રીમાન્ મહામાયા ચ દેવતા ॥૧૧॥
માનસે દક્ષહસ્તો મે દેવી દાક્ષાયણી હર । અમરો ભૈરવસ્તત્ર સર્વસિદ્ધિપ્રદાયકઃ ॥૧૨॥
ઉત્કલે નાભિદેશઞ્ચ વિરજાક્ષેત્રમુચ્યતે । વિમલા સા મહાદેવી જગન્નાથસ્તુ ભૈરવઃ ॥૧૩॥
ગણ્ડક્યાં ગણ્ડપાતઞ્ચ તત્ર સિદ્ધિર્ન સંશયઃ । તત્ર સા ગણ્ડકી ચણ્ડી ચક્રપાણિસ્તુ ભૈરવઃ ॥૧૪॥
બહુલાયાં વામબાહુર્બહુલાખ્યા ચ દેવતા । ભીરુકો ભૈરવસ્તત્ર સર્વસિદ્ધિપ્રદાયકઃ ॥૧૫॥
ઉજ્જયિન્યાં કૂર્પરઞ્ચ માઙ્ગલ્ય કપિલામ્બરઃ ભૈરવઃ સિદ્ધિદઃ સાક્ષાદ્દેવી મઙ્ગલચણ્ડિકા ॥૧૬॥
ચટ્ટલે દક્ષબાહુર્મે ભૈરવઞ્ચન્દ્રશેખરઃ । વ્યક્તરૂપા ભગવતી ભવાની યત્ર દેવતા । વિશેષતઃ કલિયુગે વસામિ ચન્દ્રશેખરે ॥૧૭॥
ત્રિપુરાયાં દક્ષપાદો દેવી ત્રિપુરસુન્દરી । ભૈરવસ્ત્રિપુરેશઞ્ચ સર્વાભીષ્ટપ્રદાયકઃ ॥૧૮॥
ત્રિસ્રોતાયાં વામપાદો ભ્રામરી ભૈરવેશ્વરઃ ॥૧૯॥
યોનિપીઠં કામગિરૌ કામાખ્યા તત્ર દેવતા । યત્રાસ્તે ત્રિગુણાતીતા રક્તપાષાણરૂપિણી ॥૨૦॥
યત્રાસ્તે માધવઃ સાક્ષાદુમાનન્દોઽથ ભૈરવઃ । સર્વદા વિહરેદ્દેવી તત્ર મુક્તિર્ન સંશયઃ ॥૨૧॥
તત્ર શ્રીભૈરવી દેવી તત્ર ચ ક્ષેત્રદેવતા । પ્રચણ્ડચણ્ડિકા તત્ર માતઙ્ગી ત્રિપુરામ્બિકા । વગલા કમલા તત્ર ભુવનેશી સધૂમિની ॥૨૨॥
એતાનિ પરપીઠાનિ શંસન્તિ વરભૈરવાઃ । એવં તુ દેવતાઃ સર્વા એવં તુ દશ ભૈરવાઃ ॥૨૩॥
સર્વત્ર વિરલા ચાહં કામરૂપે ગૃહે ગૃહે । ગૌરિ શિખરમારુહ્ય પુનર્જન્મ ન વિદ્યતે ॥૨૪॥
કરતોયાં સમારમ્ય યાવદ્દિક્કરવાસિનીમ્ । શતયોજનવિસ્તીર્ણં ત્રિકોણં સર્વસિદ્ધિદમ્ । દેવા મરણમિચ્છન્તિ કિં પુનર્માનવાદયઃ ॥૨૫॥
ક્ષીરગ્રામે મહામાયા ભૈરવઃ ક્ષીરખણ્ડકઃ । યુગદ્યા સા મહામાયા દક્ષાઙ્ગુષ્ઠં પદો મમ ॥૨૬॥
નકુલીશઃ કાલીપીઠે દક્ષપાદાઙ્ગુલી ચ મે । સર્વસિદ્ધિકરી દેવી કાલિકા તત્ર દેવતા ॥૨૭॥
અઙ્ગુલીવૃન્દં હસ્તસ્ય પ્રયાગે લલિતા ભવઃ । જયન્ત્યાં વામજઙ્ઘા ચ જયન્તી ક્રમદીશ્વરઃ ॥૨૮॥
ભુવનેશી સિદ્ધિરૂપા કિરીટસ્થા કિરીટતઃ દેવતા વિમલા નામ્ની સંવર્ત્તો ભૈરવસ્તથા ॥૨૯॥
વારાણસ્યાં વિશાલાક્ષી દેવતા કાલભૈરવઃ । મણિકર્ણીતિ વિખ્યાતા કુણ્ડલં ચ મમ શ્રુતેઃ ॥૩૦॥
કન્યાશ્રમે ચ પૃષ્ઠં મે નિમિષો ભૈરવસ્તથા । સર્વાણી દેવતા તત્ર કુરુક્ષેત્રે ચ ગુલ્ફતઃ ॥૩૧॥
સ્થાણુર્નામ્ના ચ સાવિત્રી દેવતા મણિવેદકે । મણિબન્ધે ચ ગાયત્રી સર્વાનન્દસ્તુ ભૈરવઃ ॥૩૨॥
શ્રીશૈલે ચ મમ ગ્રીવા મહાલક્ષ્મીસ્તુ દેવતા । ભૈરવઃ સમ્બરાનન્દો દેશો દેશો વ્યવસ્થિતઃ ॥૩૩॥
કાઞ્ચીદેશો ચ કઙ્કાલો ભૈરવો રુરુનામકઃ । દેવતા દેવગર્ભાખ્યા નિતમ્બઃ કાલમાધવે ॥૩૪॥
ભૈરવશ્ચાસિતાઙ્ગશ્ચ દેવી કાલી સુસિદ્ધિદા । દૃષ્ટા દૃષ્ટા નમસ્કૃત્ય મન્ત્રસિદ્ધિમવાપ્નુયાત્ ॥૩૫॥
કુજવારે ભૂતતિથૌ નિશાર્દ્ધે યસ્તુ સાધકઃ । નત્વા પ્રદક્ષિણીકૃત્ય મન્ત્રસિદ્ધિમવાપ્નુયાત્ ॥૩૬॥
શોણાખ્યા ભદ્રસેનસ્તુ નર્મદાખ્યે નિતમ્બકઃ । રામગિરૌ સ્તનાન્યઞ્ચ શિવાની ચણ્ડભૈરવઃ ॥૩૭॥
વૃન્દાવને કેશજાલમુમા નામ્ની ચ દેવતા । ભૂતેશો ભૈરવસ્તત્ર સર્વસિદ્ધિપ્રદાયકઃ ॥૩૮॥
સંહારાખ્ય ઊર્દ્ધદન્તો દેવીઽનલે નારાયણી શ્રુચૌ । અધોદન્તો મહારુદ્રો વારાહી પઞ્ચસાગરે ॥૩૯॥
કરતોયાતટે કર્ણે વામે વામનભૈરવઃ । અપર્ણા દેવતા યત્ર બ્રહ્મરૂપાકરોદ્ભવા ॥૪૦॥
શ્રીપર્વતે દક્ષગુલ્ફસ્તત્ર શ્રીસુન્દરી પરા । સર્વસિદ્ધીશ્વરી સર્વા સુન્દરાનન્દભૈરવઃ ॥૪૧॥
કપાલિની ભીમરૂપા વામગુલ્ફો વિભાષકે । ભૈરવશ્ચ મહાદેવ સર્વાનન્દઃ શુભપ્રદઃ ॥૪૨॥
ઉદરઞ્ચ પ્રભાસે મે ચન્દ્રભાગા યશસ્વિની । વક્રતુણ્ડો ભૈરવ ઊર્ધ્વોષ્ઠો ભૈરવપર્વતે ॥૪૩॥
અવન્તી ચ મહાદેવી લમ્બકર્ણસ્તુ ભૈરવઃ ॥૪૪॥
ચિવુકે ભ્રામરી દેવી વિકૃતાક્ષો જનસ્થાને । ગણ્ડો ગોદાવરીતીરે વિશ્વેશી વિશ્વમાતૃકા ॥૪૫॥
દણ્ડપાણિભૈરવસ્તુ વામગણ્ડે તુ રાકિણી । ભૈરવો વત્સનાભસ્તુ તત્ર સિદ્ધિર્ન સંશયઃ ॥૪૬॥
રત્નાવલ્યાં દક્ષસ્કન્ધઃ કુમારી ભૈરવઃ શિવઃ । મિથિલાયામુમા દેવી વામસ્કન્ધો મહોદરઃ ॥૪૭॥
નલાહાટ્યાં નલાપાતો યોગીશો ભૈરવસ્તથા । તત્ર સા કાલિકા દેવી સર્વસિદ્ધિપ્રદાયિકા ॥૪૮॥
કાલીઘાટે મુણ્ડપાતઃ ક્રોધીશો ભૈરવસ્તથા । દેવતા જયદુર્ગાખ્યા નાનાભોગપ્રદાયિની ॥૪૯॥
વક્રેશ્વરે મનઃપાતો વક્રનાથસ્તુ ભૈરવઃ । નદી પાપહરા તત્ર દેવી મહિષમર્દિની ॥૫૦॥
યશોરે પાણિપદ્મઞ્ચ દેવતા યશોરેશ્વરી । ચણ્ડશ્ચ ભૈરવો યત્ર તત્ર સિદ્ધિર્ન સંશય ॥૫૧॥
અટ્ટહાસે ચોષ્ઠપાતો દેવી સા ફુલ્લરા સ્મૃતા । વિશ્વેશો ભૈરવસ્તત્ર સર્વાભીષ્ટપ્રદાયકઃ ॥૫૨॥
હારપાતો નન્દિપુરે ભૈરવો નન્દિકેશ્વરઃ । નન્દિની સા મહાદેવી તત્ર સિદ્ધિમવાપ્નુયાત્ ॥૫૩॥
લઙ્કાયાં નૂપુરઞ્ચૈવ ભૈરવો રાક્ષસેશ્વરઃ । ઇન્દ્રાક્ષી દેવતા તત્ર ઇન્દ્રેણોપાસિતા પુરા ॥૫૪॥
વિરાટદેશમધ્યે તુ પાદાઙ્ગુલિનિપાતનમ્ । ભૈરવશ્ચામૃતાખ્યશ્ચ દેવી તત્રામ્બિકા સ્મૃતા ॥૫૫॥
એતાસ્તે કથિતાઃ પુત્ર પીઠનાથાધિદેવતાઃ । ક્ષેત્રાધિપં વિના દેવ પૂજયેત્ પીઠદેવતામ્ । ભૈરવૈર્હ્રયતે સર્વં જપપૂજાદિસાધનમ્ ॥૫૬॥
અજ્ઞાત્વા ભૈરવં પીઠે પીઠશક્તિતઞ્ચ શઙ્કર । પ્રાણનાથ ન સિધ્યેત્તુ કલ્પકોટિ જપાદિભિઃ ॥૫૭॥
ન દેયં પરશિષ્યાય નિન્દકાય દુરાત્મને । શઠાય ક્રૂરકાર્યાય દત્વા મૃત્યુમવાપ્નુયાત્ । દદ્યાચ્છાન્તાય શિષ્યાય મન્ત્રી મન્ત્રાર્થસિદ્ધયે ॥૫૮॥