ఈశ్వర ఉవాచ। మాతః పరాత్పరే దేవి సర్వజ్ఞానమయీశ్వరి । కథ్యతాం మే సర్వపీఠశక్తిభైరవదేవతాః ॥౧॥
దేవ్యువాచ। శృణు వత్స ప్రవక్ష్యామి దయాల భక్తవత్సల । యాభిర్వినా న సిధ్యన్తి జపసాధనసత్క్రియాః ॥౨॥
పఞ్చాశదేకపీఠాని ఏవం భైరవదేవతాః । అఙ్గప్రత్యఙ్గపాతేన విష్ణుచక్రక్షతేన చ మమాద్యవపుషో దేవ హితాయ త్వయి కథ్యతే ॥౩॥
బ్రహ్మరన్ధ్రం హిఙ్గులాయాం భైరవో భీమలోచనః । కోట్టరీ సా మహాదేవ త్రిగుణా యా దిగమ్బరీ ॥౪॥
కరవీరే త్రినేత్రం మే దేవీ మహిషమర్దినీ । క్రోధీశో భైరవస్తత్ర సుగన్ధాయాఞ్చ నాసికా ॥౫॥
దేవస్త్ర్యమ్బకనామా చ సునన్దా తత్ర దేవతా ॥౬॥
కాశ్మీరే కణ్ఠదేశఞ్చ త్రిసన్ధ్యేశ్వరభైరవః । మహామాయా భగవతీ గుణాతీతా వరప్రదా ॥౭॥
జ్వాలాముఖ్యాం తథా జిహ్వా దేవ ఉన్మత్తభైరవః । అమ్బికా సిద్ధిదా నామ్నీ స్తనం జాలన్ధరే మమ ॥౮॥
భీషణో భైరవస్తత్ర దేవీ త్రిపురమాలినీ ॥౯॥
హార్దపీఠం వైద్యనాథే వైద్యనాథస్తు భైరవః । దేవతా జయదుర్గాఖ్యా నేపాలే జాను మే శివ ॥౧౦॥
కపాలీ భైరవః శ్రీమాన్ మహామాయా చ దేవతా ॥౧౧॥
మానసే దక్షహస్తో మే దేవీ దాక్షాయణీ హర । అమరో భైరవస్తత్ర సర్వసిద్ధిప్రదాయకః ॥౧౨॥
ఉత్కలే నాభిదేశఞ్చ విరజాక్షేత్రముచ్యతే । విమలా సా మహాదేవీ జగన్నాథస్తు భైరవః ॥౧౩॥
గణ్డక్యాం గణ్డపాతఞ్చ తత్ర సిద్ధిర్న సంశయః । తత్ర సా గణ్డకీ చణ్డీ చక్రపాణిస్తు భైరవః ॥౧౪॥
బహులాయాం వామబాహుర్బహులాఖ్యా చ దేవతా । భీరుకో భైరవస్తత్ర సర్వసిద్ధిప్రదాయకః ॥౧౫॥
ఉజ్జయిన్యాం కూర్పరఞ్చ మాఙ్గల్య కపిలామ్బరః భైరవః సిద్ధిదః సాక్షాద్దేవీ మఙ్గలచణ్డికా ॥౧౬॥
చట్టలే దక్షబాహుర్మే భైరవఞ్చన్ద్రశేఖరః । వ్యక్తరూపా భగవతీ భవానీ యత్ర దేవతా । విశేషతః కలియుగే వసామి చన్ద్రశేఖరే ॥౧౭॥
త్రిపురాయాం దక్షపాదో దేవీ త్రిపురసున్దరీ । భైరవస్త్రిపురేశఞ్చ సర్వాభీష్టప్రదాయకః ॥౧౮॥
త్రిస్రోతాయాం వామపాదో భ్రామరీ భైరవేశ్వరః ॥౧౯॥
యోనిపీఠం కామగిరౌ కామాఖ్యా తత్ర దేవతా । యత్రాస్తే త్రిగుణాతీతా రక్తపాషాణరూపిణీ ॥౨౦॥
యత్రాస్తే మాధవః సాక్షాదుమానన్దోఽథ భైరవః । సర్వదా విహరేద్దేవీ తత్ర ముక్తిర్న సంశయః ॥౨౧॥
తత్ర శ్రీభైరవీ దేవీ తత్ర చ క్షేత్రదేవతా । ప్రచణ్డచణ్డికా తత్ర మాతఙ్గీ త్రిపురామ్బికా । వగలా కమలా తత్ర భువనేశీ సధూమినీ ॥౨౨॥
ఏతాని పరపీఠాని శంసన్తి వరభైరవాః । ఏవం తు దేవతాః సర్వా ఏవం తు దశ భైరవాః ॥౨౩॥
సర్వత్ర విరలా చాహం కామరూపే గృహే గృహే । గౌరి శిఖరమారుహ్య పునర్జన్మ న విద్యతే ॥౨౪॥
కరతోయాం సమారమ్య యావద్దిక్కరవాసినీమ్ । శతయోజనవిస్తీర్ణం త్రికోణం సర్వసిద్ధిదమ్ । దేవా మరణమిచ్ఛన్తి కిం పునర్మానవాదయః ॥౨౫॥
క్షీరగ్రామే మహామాయా భైరవః క్షీరఖణ్డకః । యుగద్యా సా మహామాయా దక్షాఙ్గుష్ఠం పదో మమ ॥౨౬॥
నకులీశః కాలీపీఠే దక్షపాదాఙ్గులీ చ మే । సర్వసిద్ధికరీ దేవీ కాలికా తత్ర దేవతా ॥౨౭॥
అఙ్గులీవృన్దం హస్తస్య ప్రయాగే లలితా భవః । జయన్త్యాం వామజఙ్ఘా చ జయన్తీ క్రమదీశ్వరః ॥౨౮॥
భువనేశీ సిద్ధిరూపా కిరీటస్థా కిరీటతః దేవతా విమలా నామ్నీ సంవర్త్తో భైరవస్తథా ॥౨౯॥
వారాణస్యాం విశాలాక్షీ దేవతా కాలభైరవః । మణికర్ణీతి విఖ్యాతా కుణ్డలం చ మమ శ్రుతేః ॥౩౦॥
కన్యాశ్రమే చ పృష్ఠం మే నిమిషో భైరవస్తథా । సర్వాణీ దేవతా తత్ర కురుక్షేత్రే చ గుల్ఫతః ॥౩౧॥
స్థాణుర్నామ్నా చ సావిత్రీ దేవతా మణివేదకే । మణిబన్ధే చ గాయత్రీ సర్వానన్దస్తు భైరవః ॥౩౨॥
శ్రీశైలే చ మమ గ్రీవా మహాలక్ష్మీస్తు దేవతా । భైరవః సమ్బరానన్దో దేశో దేశో వ్యవస్థితః ॥౩౩॥
కాఞ్చీదేశో చ కఙ్కాలో భైరవో రురునామకః । దేవతా దేవగర్భాఖ్యా నితమ్బః కాలమాధవే ॥౩౪॥
భైరవశ్చాసితాఙ్గశ్చ దేవీ కాలీ సుసిద్ధిదా । దృష్టా దృష్టా నమస్కృత్య మన్త్రసిద్ధిమవాప్నుయాత్ ॥౩౫॥
కుజవారే భూతతిథౌ నిశార్ద్ధే యస్తు సాధకః । నత్వా ప్రదక్షిణీకృత్య మన్త్రసిద్ధిమవాప్నుయాత్ ॥౩౬॥
శోణాఖ్యా భద్రసేనస్తు నర్మదాఖ్యే నితమ్బకః । రామగిరౌ స్తనాన్యఞ్చ శివానీ చణ్డభైరవః ॥౩౭॥
వృన్దావనే కేశజాలముమా నామ్నీ చ దేవతా । భూతేశో భైరవస్తత్ర సర్వసిద్ధిప్రదాయకః ॥౩౮॥
సంహారాఖ్య ఊర్ద్ధదన్తో దేవీఽనలే నారాయణీ శ్రుచౌ । అధోదన్తో మహారుద్రో వారాహీ పఞ్చసాగరే ॥౩౯॥
కరతోయాతటే కర్ణే వామే వామనభైరవః । అపర్ణా దేవతా యత్ర బ్రహ్మరూపాకరోద్భవా ॥౪౦॥
శ్రీపర్వతే దక్షగుల్ఫస్తత్ర శ్రీసున్దరీ పరా । సర్వసిద్ధీశ్వరీ సర్వా సున్దరానన్దభైరవః ॥౪౧॥
కపాలినీ భీమరూపా వామగుల్ఫో విభాషకే । భైరవశ్చ మహాదేవ సర్వానన్దః శుభప్రదః ॥౪౨॥
ఉదరఞ్చ ప్రభాసే మే చన్ద్రభాగా యశస్వినీ । వక్రతుణ్డో భైరవ ఊర్ధ్వోష్ఠో భైరవపర్వతే ॥౪౩॥
అవన్తీ చ మహాదేవీ లమ్బకర్ణస్తు భైరవః ॥౪౪॥
చివుకే భ్రామరీ దేవీ వికృతాక్షో జనస్థానే । గణ్డో గోదావరీతీరే విశ్వేశీ విశ్వమాతృకా ॥౪౫॥
దణ్డపాణిభైరవస్తు వామగణ్డే తు రాకిణీ । భైరవో వత్సనాభస్తు తత్ర సిద్ధిర్న సంశయః ॥౪౬॥
రత్నావల్యాం దక్షస్కన్ధః కుమారీ భైరవః శివః । మిథిలాయాముమా దేవీ వామస్కన్ధో మహోదరః ॥౪౭॥
నలాహాట్యాం నలాపాతో యోగీశో భైరవస్తథా । తత్ర సా కాలికా దేవీ సర్వసిద్ధిప్రదాయికా ॥౪౮॥
కాలీఘాటే ముణ్డపాతః క్రోధీశో భైరవస్తథా । దేవతా జయదుర్గాఖ్యా నానాభోగప్రదాయినీ ॥౪౯॥
వక్రేశ్వరే మనఃపాతో వక్రనాథస్తు భైరవః । నదీ పాపహరా తత్ర దేవీ మహిషమర్దినీ ॥౫౦॥
యశోరే పాణిపద్మఞ్చ దేవతా యశోరేశ్వరీ । చణ్డశ్చ భైరవో యత్ర తత్ర సిద్ధిర్న సంశయ ॥౫౧॥
అట్టహాసే చోష్ఠపాతో దేవీ సా ఫుల్లరా స్మృతా । విశ్వేశో భైరవస్తత్ర సర్వాభీష్టప్రదాయకః ॥౫౨॥
హారపాతో నన్దిపురే భైరవో నన్దికేశ్వరః । నన్దినీ సా మహాదేవీ తత్ర సిద్ధిమవాప్నుయాత్ ॥౫౩॥
లఙ్కాయాం నూపురఞ్చైవ భైరవో రాక్షసేశ్వరః । ఇన్ద్రాక్షీ దేవతా తత్ర ఇన్ద్రేణోపాసితా పురా ॥౫౪॥
విరాటదేశమధ్యే తు పాదాఙ్గులినిపాతనమ్ । భైరవశ్చామృతాఖ్యశ్చ దేవీ తత్రామ్బికా స్మృతా ॥౫౫॥
ఏతాస్తే కథితాః పుత్ర పీఠనాథాధిదేవతాః । క్షేత్రాధిపం వినా దేవ పూజయేత్ పీఠదేవతామ్ । భైరవైర్హ్రయతే సర్వం జపపూజాదిసాధనమ్ ॥౫౬॥
అజ్ఞాత్వా భైరవం పీఠే పీఠశక్తితఞ్చ శఙ్కర । ప్రాణనాథ న సిధ్యేత్తు కల్పకోటి జపాదిభిః ॥౫౭॥
న దేయం పరశిష్యాయ నిన్దకాయ దురాత్మనే । శఠాయ క్రూరకార్యాయ దత్వా మృత్యుమవాప్నుయాత్ । దద్యాచ్ఛాన్తాయ శిష్యాయ మన్త్రీ మన్త్రార్థసిద్ధయే ॥౫౮॥