ഈശ്വര ഉവാച। മാതഃ പരാത്പരേ ദേവി സര്വജ്ഞാനമയീശ്വരി । കഥ്യതാം മേ സര്വപീഠശക്തിഭൈരവദേവതാഃ ॥൧॥
ദേവ്യുവാച। ശൃണു വത്സ പ്രവക്ഷ്യാമി ദയാല ഭക്തവത്സല । യാഭിര്വിനാ ന സിധ്യന്തി ജപസാധനസത്ക്രിയാഃ ॥൨॥
പഞ്ചാശദേകപീഠാനി ഏവം ഭൈരവദേവതാഃ । അങ്ഗപ്രത്യങ്ഗപാതേന വിഷ്ണുചക്രക്ഷതേന ച മമാദ്യവപുഷോ ദേവ ഹിതായ ത്വയി കഥ്യതേ ॥൩॥
ബ്രഹ്മരന്ധ്രം ഹിങ്ഗുലായാം ഭൈരവോ ഭീമലോചനഃ । കോട്ടരീ സാ മഹാദേവ ത്രിഗുണാ യാ ദിഗമ്ബരീ ॥൪॥
കരവീരേ ത്രിനേത്രം മേ ദേവീ മഹിഷമര്ദിനീ । ക്രോധീശോ ഭൈരവസ്തത്ര സുഗന്ധായാഞ്ച നാസികാ ॥൫॥
ദേവസ്ത്ര്യമ്ബകനാമാ ച സുനന്ദാ തത്ര ദേവതാ ॥൬॥
കാശ്മീരേ കണ്ഠദേശഞ്ച ത്രിസന്ധ്യേശ്വരഭൈരവഃ । മഹാമായാ ഭഗവതീ ഗുണാതീതാ വരപ്രദാ ॥൭॥
ജ്വാലാമുഖ്യാം തഥാ ജിഹ്വാ ദേവ ഉന്മത്തഭൈരവഃ । അമ്ബികാ സിദ്ധിദാ നാമ്നീ സ്തനം ജാലന്ധരേ മമ ॥൮॥
ഭീഷണോ ഭൈരവസ്തത്ര ദേവീ ത്രിപുരമാലിനീ ॥൯॥
ഹാര്ദപീഠം വൈദ്യനാഥേ വൈദ്യനാഥസ്തു ഭൈരവഃ । ദേവതാ ജയദുര്ഗാഖ്യാ നേപാലേ ജാനു മേ ശിവ ॥൧൦॥
കപാലീ ഭൈരവഃ ശ്രീമാന് മഹാമായാ ച ദേവതാ ॥൧൧॥
മാനസേ ദക്ഷഹസ്തോ മേ ദേവീ ദാക്ഷായണീ ഹര । അമരോ ഭൈരവസ്തത്ര സര്വസിദ്ധിപ്രദായകഃ ॥൧൨॥
ഉത്കലേ നാഭിദേശഞ്ച വിരജാക്ഷേത്രമുച്യതേ । വിമലാ സാ മഹാദേവീ ജഗന്നാഥസ്തു ഭൈരവഃ ॥൧൩॥
ഗണ്ഡക്യാം ഗണ്ഡപാതഞ്ച തത്ര സിദ്ധിര്ന സംശയഃ । തത്ര സാ ഗണ്ഡകീ ചണ്ഡീ ചക്രപാണിസ്തു ഭൈരവഃ ॥൧൪॥
ബഹുലായാം വാമബാഹുര്ബഹുലാഖ്യാ ച ദേവതാ । ഭീരുകോ ഭൈരവസ്തത്ര സര്വസിദ്ധിപ്രദായകഃ ॥൧൫॥
ഉജ്ജയിന്യാം കൂര്പരഞ്ച മാങ്ഗല്യ കപിലാമ്ബരഃ ഭൈരവഃ സിദ്ധിദഃ സാക്ഷാദ്ദേവീ മങ്ഗലചണ്ഡികാ ॥൧൬॥
ചട്ടലേ ദക്ഷബാഹുര്മേ ഭൈരവഞ്ചന്ദ്രശേഖരഃ । വ്യക്തരൂപാ ഭഗവതീ ഭവാനീ യത്ര ദേവതാ । വിശേഷതഃ കലിയുഗേ വസാമി ചന്ദ്രശേഖരേ ॥൧൭॥
ത്രിപുരായാം ദക്ഷപാദോ ദേവീ ത്രിപുരസുന്ദരീ । ഭൈരവസ്ത്രിപുരേശഞ്ച സര്വാഭീഷ്ടപ്രദായകഃ ॥൧൮॥
ത്രിസ്രോതായാം വാമപാദോ ഭ്രാമരീ ഭൈരവേശ്വരഃ ॥൧൯॥
യോനിപീഠം കാമഗിരൌ കാമാഖ്യാ തത്ര ദേവതാ । യത്രാസ്തേ ത്രിഗുണാതീതാ രക്തപാഷാണരൂപിണീ ॥൨൦॥
യത്രാസ്തേ മാധവഃ സാക്ഷാദുമാനന്ദോഽഥ ഭൈരവഃ । സര്വദാ വിഹരേദ്ദേവീ തത്ര മുക്തിര്ന സംശയഃ ॥൨൧॥
തത്ര ശ്രീഭൈരവീ ദേവീ തത്ര ച ക്ഷേത്രദേവതാ । പ്രചണ്ഡചണ്ഡികാ തത്ര മാതങ്ഗീ ത്രിപുരാമ്ബികാ । വഗലാ കമലാ തത്ര ഭുവനേശീ സധൂമിനീ ॥൨൨॥
ഏതാനി പരപീഠാനി ശംസന്തി വരഭൈരവാഃ । ഏവം തു ദേവതാഃ സര്വാ ഏവം തു ദശ ഭൈരവാഃ ॥൨൩॥
സര്വത്ര വിരലാ ചാഹം കാമരൂപേ ഗൃഹേ ഗൃഹേ । ഗൌരി ശിഖരമാരുഹ്യ പുനര്ജന്മ ന വിദ്യതേ ॥൨൪॥
കരതോയാം സമാരമ്യ യാവദ്ദിക്കരവാസിനീമ് । ശതയോജനവിസ്തീര്ണം ത്രികോണം സര്വസിദ്ധിദമ് । ദേവാ മരണമിച്ഛന്തി കിം പുനര്മാനവാദയഃ ॥൨൫॥
ക്ഷീരഗ്രാമേ മഹാമായാ ഭൈരവഃ ക്ഷീരഖണ്ഡകഃ । യുഗദ്യാ സാ മഹാമായാ ദക്ഷാങ്ഗുഷ്ഠം പദോ മമ ॥൨൬॥
നകുലീശഃ കാലീപീഠേ ദക്ഷപാദാങ്ഗുലീ ച മേ । സര്വസിദ്ധികരീ ദേവീ കാലികാ തത്ര ദേവതാ ॥൨൭॥
അങ്ഗുലീവൃന്ദം ഹസ്തസ്യ പ്രയാഗേ ലലിതാ ഭവഃ । ജയന്ത്യാം വാമജങ്ഘാ ച ജയന്തീ ക്രമദീശ്വരഃ ॥൨൮॥
ഭുവനേശീ സിദ്ധിരൂപാ കിരീടസ്ഥാ കിരീടതഃ ദേവതാ വിമലാ നാമ്നീ സംവര്ത്തോ ഭൈരവസ്തഥാ ॥൨൯॥
വാരാണസ്യാം വിശാലാക്ഷീ ദേവതാ കാലഭൈരവഃ । മണികര്ണീതി വിഖ്യാതാ കുണ്ഡലം ച മമ ശ്രുതേഃ ॥൩൦॥
കന്യാശ്രമേ ച പൃഷ്ഠം മേ നിമിഷോ ഭൈരവസ്തഥാ । സര്വാണീ ദേവതാ തത്ര കുരുക്ഷേത്രേ ച ഗുല്ഫതഃ ॥൩൧॥
സ്ഥാണുര്നാമ്നാ ച സാവിത്രീ ദേവതാ മണിവേദകേ । മണിബന്ധേ ച ഗായത്രീ സര്വാനന്ദസ്തു ഭൈരവഃ ॥൩൨॥
ശ്രീശൈലേ ച മമ ഗ്രീവാ മഹാലക്ഷ്മീസ്തു ദേവതാ । ഭൈരവഃ സമ്ബരാനന്ദോ ദേശോ ദേശോ വ്യവസ്ഥിതഃ ॥൩൩॥
കാഞ്ചീദേശോ ച കങ്കാലോ ഭൈരവോ രുരുനാമകഃ । ദേവതാ ദേവഗര്ഭാഖ്യാ നിതമ്ബഃ കാലമാധവേ ॥൩൪॥
ഭൈരവശ്ചാസിതാങ്ഗശ്ച ദേവീ കാലീ സുസിദ്ധിദാ । ദൃഷ്ടാ ദൃഷ്ടാ നമസ്കൃത്യ മന്ത്രസിദ്ധിമവാപ്നുയാത് ॥൩൫॥
കുജവാരേ ഭൂതതിഥൌ നിശാര്ദ്ധേ യസ്തു സാധകഃ । നത്വാ പ്രദക്ഷിണീകൃത്യ മന്ത്രസിദ്ധിമവാപ്നുയാത് ॥൩൬॥
ശോണാഖ്യാ ഭദ്രസേനസ്തു നര്മദാഖ്യേ നിതമ്ബകഃ । രാമഗിരൌ സ്തനാന്യഞ്ച ശിവാനീ ചണ്ഡഭൈരവഃ ॥൩൭॥
വൃന്ദാവനേ കേശജാലമുമാ നാമ്നീ ച ദേവതാ । ഭൂതേശോ ഭൈരവസ്തത്ര സര്വസിദ്ധിപ്രദായകഃ ॥൩൮॥
സംഹാരാഖ്യ ഊര്ദ്ധദന്തോ ദേവീഽനലേ നാരായണീ ശ്രുചൌ । അധോദന്തോ മഹാരുദ്രോ വാരാഹീ പഞ്ചസാഗരേ ॥൩൯॥
കരതോയാതടേ കര്ണേ വാമേ വാമനഭൈരവഃ । അപര്ണാ ദേവതാ യത്ര ബ്രഹ്മരൂപാകരോദ്ഭവാ ॥൪൦॥
ശ്രീപര്വതേ ദക്ഷഗുല്ഫസ്തത്ര ശ്രീസുന്ദരീ പരാ । സര്വസിദ്ധീശ്വരീ സര്വാ സുന്ദരാനന്ദഭൈരവഃ ॥൪൧॥
കപാലിനീ ഭീമരൂപാ വാമഗുല്ഫോ വിഭാഷകേ । ഭൈരവശ്ച മഹാദേവ സര്വാനന്ദഃ ശുഭപ്രദഃ ॥൪൨॥
ഉദരഞ്ച പ്രഭാസേ മേ ചന്ദ്രഭാഗാ യശസ്വിനീ । വക്രതുണ്ഡോ ഭൈരവ ഊര്ധ്വോഷ്ഠോ ഭൈരവപര്വതേ ॥൪൩॥
അവന്തീ ച മഹാദേവീ ലമ്ബകര്ണസ്തു ഭൈരവഃ ॥൪൪॥
ചിവുകേ ഭ്രാമരീ ദേവീ വികൃതാക്ഷോ ജനസ്ഥാനേ । ഗണ്ഡോ ഗോദാവരീതീരേ വിശ്വേശീ വിശ്വമാതൃകാ ॥൪൫॥
ദണ്ഡപാണിഭൈരവസ്തു വാമഗണ്ഡേ തു രാകിണീ । ഭൈരവോ വത്സനാഭസ്തു തത്ര സിദ്ധിര്ന സംശയഃ ॥൪൬॥
രത്നാവല്യാം ദക്ഷസ്കന്ധഃ കുമാരീ ഭൈരവഃ ശിവഃ । മിഥിലായാമുമാ ദേവീ വാമസ്കന്ധോ മഹോദരഃ ॥൪൭॥
നലാഹാട്യാം നലാപാതോ യോഗീശോ ഭൈരവസ്തഥാ । തത്ര സാ കാലികാ ദേവീ സര്വസിദ്ധിപ്രദായികാ ॥൪൮॥
കാലീഘാടേ മുണ്ഡപാതഃ ക്രോധീശോ ഭൈരവസ്തഥാ । ദേവതാ ജയദുര്ഗാഖ്യാ നാനാഭോഗപ്രദായിനീ ॥൪൯॥
വക്രേശ്വരേ മനഃപാതോ വക്രനാഥസ്തു ഭൈരവഃ । നദീ പാപഹരാ തത്ര ദേവീ മഹിഷമര്ദിനീ ॥൫൦॥
യശോരേ പാണിപദ്മഞ്ച ദേവതാ യശോരേശ്വരീ । ചണ്ഡശ്ച ഭൈരവോ യത്ര തത്ര സിദ്ധിര്ന സംശയ ॥൫൧॥
അട്ടഹാസേ ചോഷ്ഠപാതോ ദേവീ സാ ഫുല്ലരാ സ്മൃതാ । വിശ്വേശോ ഭൈരവസ്തത്ര സര്വാഭീഷ്ടപ്രദായകഃ ॥൫൨॥
ഹാരപാതോ നന്ദിപുരേ ഭൈരവോ നന്ദികേശ്വരഃ । നന്ദിനീ സാ മഹാദേവീ തത്ര സിദ്ധിമവാപ്നുയാത് ॥൫൩॥
ലങ്കായാം നൂപുരഞ്ചൈവ ഭൈരവോ രാക്ഷസേശ്വരഃ । ഇന്ദ്രാക്ഷീ ദേവതാ തത്ര ഇന്ദ്രേണോപാസിതാ പുരാ ॥൫൪॥
വിരാടദേശമധ്യേ തു പാദാങ്ഗുലിനിപാതനമ് । ഭൈരവശ്ചാമൃതാഖ്യശ്ച ദേവീ തത്രാമ്ബികാ സ്മൃതാ ॥൫൫॥
ഏതാസ്തേ കഥിതാഃ പുത്ര പീഠനാഥാധിദേവതാഃ । ക്ഷേത്രാധിപം വിനാ ദേവ പൂജയേത് പീഠദേവതാമ് । ഭൈരവൈര്ഹ്രയതേ സര്വം ജപപൂജാദിസാധനമ് ॥൫൬॥
അജ്ഞാത്വാ ഭൈരവം പീഠേ പീഠശക്തിതഞ്ച ശങ്കര । പ്രാണനാഥ ന സിധ്യേത്തു കല്പകോടി ജപാദിഭിഃ ॥൫൭॥
ന ദേയം പരശിഷ്യായ നിന്ദകായ ദുരാത്മനേ । ശഠായ ക്രൂരകാര്യായ ദത്വാ മൃത്യുമവാപ്നുയാത് । ദദ്യാച്ഛാന്തായ ശിഷ്യായ മന്ത്രീ മന്ത്രാര്ഥസിദ്ധയേ ॥൫൮॥