শ্রী বৈকুণ্ঠ গদ্যম্

যামুনার্যসুধাম্ভোধিমবগাহ্য যথামতি ।

আদায ভক্তিযোগাখ্যং রত্নং সন্দর্শযাম্যহম্ ॥
স্বাধীন ত্রিবিধচেতনাচেতনস্বরূপস্থিতি প্রবৃত্তিভেদং, ক্লেশ কর্মাদ্যশেষদোষাসংস্পৃষ্টং, স্বাভাবিকানবধিকাতিশয জ্ঞানবলৈশ্বর্যবীর্যশক্তিতেজঃ প্রভৃত্যসঙ্খ্যেয কল্যাণগুণগণৌঘ মহার্ণবং, পরমপুরুষং, ভগবন্তং, নারাযণং, স্বামিত্বেন সুহৃত্বেন গুরুত্বেন চ পরিগৃহ্য ঐকান্তিকাত্যন্তিক তত্পাদাম্বুজদ্বয পরিচর্যৈকমনোরথঃ, তত্প্রাপ্তযে চ তত্পাদাম্বুজদ্বয প্রপত্তেরন্যন্ন মে কল্পকোটিসহস্রেণাপি সাধনমস্তীতি মন্বানঃ, তস্যৈব ভগবতো নারাযণস্য অখিলসত্ত্বদযৈকসাগরস্য অনালোচিত গুণগুণাখণ্ড জনানুকূলামর্যাদ শীলবতঃ, স্বাভাবিকানবধিকাতিশয গুণবত্তযা দেবতির্যঙ্মনুষ্যাদ্যখিলজন হৃদযানন্দনস্য আশ্রিতবাত্সল্যৈকজলধেঃ ভক্তজনসংশ্লেষৈকভোগস্য নিত্যজ্ঞানক্রিযৈশ্বর্যাদি ভোগসামগ্রীসমৃদ্ধস্য, মহাবিভূতেঃ, শ্রীমচ্চরণারবিন্দযুগলং অনন্যাত্মসঞ্জীবনেন তদ্গতসর্বভাবেন শরণমনুব্রজেত্ । ততশ্চ প্রত্যহমাত্মোজ্জীবনাযৈবমনুস্মরেত্ । চতুর্দশভুবনাত্মকং অণ্ডং, দশগুণিতোত্তরং চ আবরণসপ্তকং, সমস্তং কার্যকারণ(জাত)মতীত্য, বর্তমানে পরমব্যোমশব্দাভিধেযে, ব্রহ্মাদীনাং বাঙ্মনসাঽগোচরে, শ্রীমতি বৈকুণ্ঠে দিব্যলোকে, সনকবিধিশিবাদিভিরপি অচিন্ত্যস্বভাবৈশ্বর্যৈঃ, নিত্যসিদ্ধৈরনন্তৈর্ভগবদানুকূল্যৈক ভোগৈর্দিব্যপুরুষৈঃ মহাত্মভিঃ আপূরিতে, তেষামপি ইযত্পরিমাণং, ইযদৈশ্বর্যং, ঈদৃশস্বভাবমিতি পরিচ্ছেত্তুমযোগ্যে, দিব্যাবরণশতসহস্রাবৃতে, দিব্যকল্পকতরূপশোভিতে, দিব্যোদ্যান শতসহস্রকোটিভিরাবৃতে, অতিপ্রমাণে দিব্যাযতনে, কস্মিংশ্চিদ্বিচিত্র দিব্যরত্নময দিব্যাস্থানমণ্ডপে, দিব্যরত্নস্তম্ভ শতসহস্রকোটিভিরুপশোভিতে,

দিব্যনানারত্নকৃতস্থল বিচিত্রিতে, দিব্যালঙ্কারালঙ্কৃতে, পরিতঃ পতিতৈঃ পতমানৈঃ পাদপস্থৈশ্চ নানাগন্ধবর্ণৈর্দিব্যপুষ্পৈঃ শোভমানৈর্দিব্যপুষ্পোপবনৈরুপশোভিতে, সঙ্কীর্ণপারিজাতাদি কল্পদ্রুমোপশোভিতৈঃ, অসঙ্কীর্ণৈশ্চ কৈশ্চিদন্তস্স্থপুষ্পরত্নাদিনির্মিত দিব্যলীলামণ্ডপ শতসহস্রোপশোভিতৈঃ, সর্বদাঽনুভূযমানৈরপ্যপূর্ববদাশ্চর্যমাবহদ্ভিঃ ক্রীডাশৈল শতসহস্রৈরলঙ্কৃতৈঃ, কৈশ্চিন্নারাযণদিব্যলীলাঽসাধারণৈঃ, কৈশ্চিত্পদ্মবনালযা দিব্যলীলাঽসাধারণৈঃ, সাধারণৈশ্চ কৈশ্চিত্ শুকশারিকামযূরকোকিলাদিভিঃ কোমলকূজিতৈরাকুলৈঃ, দিব্যোদ্যান শতসহস্রৈরাবৃতে, মণিমুক্তাপ্রবাল কৃতসোপানৈঃ, দিব্যামলামৃতরসোদকৈঃ, দিব্যাণ্ডজবরৈঃ, অতিরমণীযদর্শনৈঃ অতিমনোহরমধুরস্বরৈঃ আকুলৈঃ, অন্তস্থ মুক্তাময দিব্যক্রীডাস্থানোপশোভিতৈঃ দিব্যসৌগন্ধিকবাপীশতসহস্রৈঃ, দিব্যরাজহংসাবলীবিরাজিতৈরাবৃতে, নিরস্তাতিশযানন্দৈকরসতযা চানন্ত্যাচ্চ প্রবিষ্টানুন্মাদযদ্ভিঃ ক্রীডোদ্দেশৈর্বিরাজিতে, তত্র তত্র কৃত দিব্যপুষ্পপর্যঙ্কোপশোভিতে, নানাপুষ্পাসবাস্বাদ মত্তভৃঙ্গাবলীভিঃ উদ্গীযমান দিব্যগান্ধর্বেণাপূরিতে, চন্দনাগরুকর্পূর দিব্যপুষ্পাবগাহি মন্দানিলাসেব্যমানে, মধ্যে পুষ্পসঞ্চয বিচিত্রিতে, মহতি দিব্যযোগপর্যঙ্কে অনন্তভোগিনি, শ্রীমদ্বৈকুণ্ঠৈশ্বর্যাদি দিব্যলোকং আত্মকান্ত্যা বিশ্বমাপ্যাযযন্ত্যা শেষ শেষাশনাদি সর্বপরিজনং ভগবতস্তত্তদবস্থোচিত পরিচর্যাযাং আজ্ঞাপযন্ত্যা, শীলরূপগুণ বিলাসাদিভিঃ আত্মানুরূপযা শ্রিযা সহাসীনং, প্রত্যগ্রোন্মীলিত সরসিজসদৃশ নযনযুগলং, স্বচ্ছনীলজীমূতসঙ্কাশং, অত্যুজ্জ্বলপীতবাসসং, স্বযা প্রভযাঽতিনির্মলযা অতিশীতলযা অতিকোমলযা স্বচ্ছমাণিক্যাভযা কৃত্স্নং জগদ্ভাসযন্তং,

অচিন্ত্যদিব্যাদ্ভুত নিত্যযৌবন স্বভাবলাবণ্যমযামৃতসাগরং, অতিসৌকুমার্যাদি ঈষত্ প্রস্বিন্নবদালক্ষ্যমাণ ললাটফলক দিব্যালকাবলীবিরাজিতং, প্রবুদ্ধমুগ্ধাম্বুজ চারুলোচনং, সবিভ্রমভ্রূলতং, উজ্জ্বলাধরং, শুচিস্মিতং, কোমলগণ্ডং, উন্নসং, উদগ্রপীনাংস বিলম্বিকুণ্ডলালকাবলী বন্ধুর কম্বুকন্ধরং, প্রিযাবতংসোত্পল কর্ণভূষণশ্লথালকাবন্ধ বিমর্দশংসিভিঃ চতুর্ভিরাজানুবিলম্বিভির্ভুজৈর্বিরাজিতং, অতিকোমল দিব্যরেখালঙ্কৃতাতাম্রকরতলং, দিব্যাঙ্গুলীযকবিরাজিতং, অতিকোমল দিব্যনখাবলীবিরাজিতং, অতিরক্তাঙ্গুলীভিরলঙ্কৃতং, তত্ক্ষণোন্মীলিত পুণ্ডরীক সদৃশচরণযুগলং, অতিমনোহর কিরীটমকুট চূডাবতংস মকরকুণ্ডল গ্রৈবেযক হার কেযূর কটক শ্রীবত্স কৌস্তুভ মুক্তাদামোদরবন্ধন পীতাম্বর কাঞ্চীগুণ নূপুরাদিভিরত্যন্ত সুখস্পর্শৈঃ দিব্যগন্ধৈর্ভূষণৈর্ভূষিতং, শ্রীমত্যা বৈজযন্ত্যা বনমালযা বিরাজিতং, শঙ্খচক্রগদাঽসি শার্ঙ্গাদি দিব্যাযুধৈঃ সেব্যমানং, স্বসঙ্কল্পমাত্রাবক্লুপ্ত জগজ্জন্মস্থিতিধ্বংসাদিকে শ্রীমতি বিষ্বক্সেনে ন্যস্ত সমস্তাত্মৈশ্বর্যং, বৈনতেযাদিভিঃ স্বভাবতো নিরস্ত সমস্ত সাংসারিক স্বভাবৈঃ ভগবত্পরিচর্যাকরণ যোগ্যৈর্ভগবত্পরিচর্যৈকভোগৈ-র্নিত্যসিদ্ধৈরনন্তৈঃ যথা যোগং সেব্যমানং, আত্মভোগেন অননুসংহিতপরাদিকাল দিব্যামল কোমলাবলোকনেন বিশ্বমাহ্লাদযন্তং, ঈষদুন্মীলিত মুখাম্বুজোদরবিনির্গতেন দিব্যাননারবিন্দ শোভাজননেন দিব্যগাম্ভীর্যৌদার্য সৌন্দর্য মাধুর্যাদ্যনবধিক গুণগণবিভূষিতেন, অতিমনোহর দিব্যভাবগর্ভেণ দিব্যলীলাঽঽলাপামৃতেন অখিলজন হৃদযান্তরাণ্যাপূরযন্তং ভগবন্তং নারাযণং ধ্যানযোগেন দৃষ্ট্বা, ততো ভগবতো নিত্যস্বাম্যমাত্মনো নিত্যদাস্যং চ যথাবস্থিতমনুসন্ধায, কদাঽহং ভগবন্তং নারাযণং, মম কুলনাথং, মম কুলদৈবতং, মম কুলধনং, মম ভোগ্যং, মম মাতরং, মম পিতরং, মম সর্বং সাক্ষাত্করবাণি চক্ষুষা ।

কদাঽহং ভগবত্পাদাম্বুজদ্বযং শিরসা সঙ্গ্রহীষ্যামি । কদাঽহং ভগবত্পাদাম্বুজদ্বয পরিচর্যাঽঽশযা নিরস্তসমস্তেতর ভোগাশঃ, অপগত সমস্ত সাংসারিকস্বভাবঃ তত্পাদাম্বুজদ্বযং প্রবেক্ষ্যামি । কদাঽহং ভগবত্পাদাম্বুজদ্বয পরিচর্যাকরণযোগ্য-স্তদেকভোগস্তত্পাদৌ পরিচরিষ্যামি । কদা মাং ভগবান্ স্বকীযযা অতিশীতলযা দৃশা অবলোক্য, স্নিগ্ধগম্ভীরমধুরযা গিরা পরিচর্যাযাং আজ্ঞাপযিষ্যতি, ইতি ভগবত্পরিচর্যাযামাশাং বর্ধযিত্বা তযৈবাঽশযা তত্প্রসাদোপবৃংহিতযা ভগবন্তমুপেত্য, দূরাদেব ভগবন্তং শেষভোগে শ্রিযা সহাসীনং বৈনতেযাদিভিঃ সেব্যমানং, সমস্তপরিবারায শ্রীমতে নারাযণায নমঃ, ইতি প্রণম্য উত্থাযোত্থায পুনঃ পুনঃ প্রণম্য অত্যন্ত সাধ্বসবিনযাবনতো ভূত্বা, ভগবত্পারিষদগণনাযকৈর্দ্বারপালৈঃ কৃপযা স্নেহগর্ভযা দৃশাঽবলোকিতঃ সম্যগভিবন্দিতৈস্তৈস্তৈরেবানুমতো ভগবন্তমুপেত্য, শ্রীমতা মূলমন্ত্রেণ মামৈকান্তিকাত্যন্তিক পরিচর্যাকরণায পরিগৃহ্ণীষ্ব ইতি যাচমানঃ প্রণম্যাত্মানং ভগবতে নিবেদযেত্ ।

ততো ভগবতা স্বযমেবাত্মসঞ্জীবনেন অমর্যাদশীলবতা অতিপ্রেমান্বিতেন অবলোকনেনাবলোক্য সর্বদেশ সর্বকাল সর্বাবস্থোচিতাত্যন্তশেষভাবায স্বীকৃতোঽনুজ্ঞাতশ্চ অত্যন্তসাধ্বসবিনযাবনতঃ কিঙ্কুর্বাণঃ কৃতাঞ্জলিপুটো ভগবন্তমুপাসীত । ততশ্চানুভূযমান ভাববিশেষঃ নিরতিশযপ্রীত্যাঽন্যত্কিঞ্চিত্কর্তুং দ্রষ্টুং স্মর্তুমশক্তঃ পুনরপি শেষভাবমেব যাচমানো ভগবন্তমেবাবিচ্ছিন্নস্রোতোরূপেণাবলোকনেন অবলোকযন্নাসীত । ততো ভগবতা স্বযমেবাত্মসঞ্জীবনেনাবলোকনেনাবলোক্য সস্মিতমাহূয সমস্তক্লেশাপহং নিরতিশযসুখাবহমাত্মীযং, শ্রীমত্পাদারবিন্দযুগলং শিরসি কৃতং ধ্যাত্বা, অমৃতসাগরান্তর্নিমগ্নসর্বাবযবঃ সুখমাসীত ।
লক্ষ্মীপতের্যতিপতেশ্চ দযৈকধাম্নোঃ

যোঽসৌ পুরা সমজনিষ্ট জগদ্ধিতার্থম্ ।

প্রাপ্যং প্রকাশযতু নঃ পরমং রহস্যং

সংবাদ এষ শরণাগতি মন্ত্রসারঃ ॥