ശ്രീ വേങ്കടേശ്വര ശരണാഗതി ഗദ്യമ്

യോ നിത്യമച്യുതപദാമ്ബുജയുഗ്മരുക്മ
വ്യാമോഹതസ്തദിതരാണി തൃണായ മേനേ ।
അസ്മദ്ഗുരോര്ഭഗവതോഽസ്യ ദയൈകസിന്ധോഃ
രാമാനുജസ്യ ചരണൌ ശരണം പ്രപദ്യേ ॥
വന്ദേ വേദാന്തകര്പൂരചാമീകര കരണ്ഡകമ് ।
രാമാനുജാര്യമാര്യാണാം ചൂഡാമണിമഹര്നിശമ് ॥
ഓമ് ॥ ഭഗവന്നാരായണാഭിമതാനുരൂപ സ്വരൂപരൂപ ഗുണവിഭവൈശ്വര്യ ശീലാദ്യനവധികാതിശയ അസങ്ഖ്യേയ കല്യാണഗുണഗണാം പദ്മവനാലയാം ഭഗവതീം ശ്രിയം ദേവീം നിത്യാനപായിനീം നിരവദ്യാം ദേവദേവദിവ്യമഹിഷീം അഖിലജഗന്മാതരം അസ്മന്മാതരം അശരണ്യശരണ്യാം അനന്യശരണഃ ശരണമഹം പ്രപദ്യേ ॥
പാരമാര്ഥിക ഭഗവച്ചരണാരവിന്ദ യുഗലൈകാന്തികാത്യന്തിക പരഭക്തി പരജ്ഞാന പരമഭക്തികൃത പരിപൂര്ണാനവരത നിത്യവിശദതമാനന്യ പ്രയോജനാനവധികാതിശയ പ്രിയ ഭഗവദനുഭവജനിതാനവധികാതിശയ പ്രീതികാരിതാശേഷാവസ്ഥോചിത അശേഷശേഷതൈകരതിരൂപ നിത്യകൈങ്കര്യപ്രാപ്ത്യപേക്ഷയാ പാരമാര്ഥികീ ഭഗവച്ചരണാരവിന്ദ ശരണാഗതിഃ യഥാവസ്ഥിതാ അവിരതാഽസ്തു മേ ॥
അസ്തു തേ । തയൈവ സര്വം സമ്പത്സ്യതേ ॥
അഖിലഹേയപ്രത്യനീക കല്യാണൈകതാന, സ്വേതര സമസ്തവസ്തുവിലക്ഷണാനന്ത ജ്ഞാനാനന്ദൈകസ്വരൂപ, സ്വാഭിമതാനുരൂപൈകരൂപാചിന്ത്യ ദിവ്യാദ്ഭുത നിത്യനിരവദ്യ നിരതിശയൌജ്ജ്വല്യ സൌന്ദര്യ സൌഗന്ധ്യ സൌകുമാര്യ ലാവണ്യ യൌവനാദ്യനന്തഗുണനിധി ദിവ്യരൂപ, സ്വാഭാവികാനവധികാതിശയ ജ്ഞാന ബലൈശ്വര്യ വീര്യ ശക്തി തേജസ്സൌശീല്യ വാത്സല്യ മാര്ദവാര്ജവ സൌഹാര്ദ സാമ്യ കാരുണ്യ മാധുര്യ ഗാമ്ഭീര്യൌദാര്യ ചാതുര്യ സ്ഥൈര്യ ധൈര്യ ശൌര്യ പരാക്രമ സത്യകാമ സത്യസങ്കല്പ കൃതിത്വ കൃതജ്ഞതാദ്യസങ്ഖ്യേയ കല്യാണഗുണഗണൌഘ മഹാര്ണവ,
സ്വോചിത വിവിധ വിചിത്രാനന്താശ്ചര്യ നിത്യ നിരവദ്യ നിരതിശയ സുഗന്ധ നിരതിശയ സുഖസ്പര്ശ നിരതിശയൌജ്ജ്വല്യ കിരീട മകുട ചൂഡാവതംസ മകരകുണ്ഡല ഗ്രൈവേയക ഹാര കേയൂര കടക ശ്രീവത്സ കൌസ്തുഭ മുക്താദാമോദരബന്ധന പീതാമ്ബര കാഞ്ചീഗുണ നൂപുരാദ്യപരിമിത ദിവ്യഭൂഷണ, സ്വാനുരൂപാചിന്ത്യശക്തി ശങ്ഖചക്രഗദാഽസി ശാര്ങ്ഗാദ്യസങ്ഖ്യേയ
നിത്യനിരവദ്യ നിരതിശയ കല്യാണദിവ്യായുധ,
സ്വാഭിമത നിത്യനിരവദ്യാനുരൂപ സ്വരൂപരൂപഗുണ വിഭവൈശ്വര്യ ശീലാദ്യനവധികാതിശയാസങ്ഖ്യേയ കല്യാണഗുണഗണശ്രീവല്ലഭ, ഏവമ്ഭൂത ഭൂമിനീലാനായക, സ്വച്ഛന്ദാനുവര്തി സ്വരൂപസ്ഥിതി പ്രവൃത്തിഭേദാശേഷ ശേഷതൈകരതിരൂപ
നിത്യനിരവദ്യനിരതിശയ ജ്ഞാന ക്രിയൈശ്വര്യാദ്യനന്ത കല്യാണഗുണഗണ ശേഷ ശേഷാശന
ഗരുഡപ്രമുഖ നാനാവിധാനന്ത പരിജന പരിചാരികാ പരിചരിത ചരണയുഗല, പരമയോഗി വാങ്മനസാഽപരിച്ഛേദ്യ സ്വരൂപ സ്വഭാവ സ്വാഭിമത വിവിധവിചിത്രാനന്തഭോഗ്യ ഭോഗോപകരണ ഭോഗസ്ഥാന സമൃദ്ധാനന്താശ്ചര്യാനന്ത മഹാവിഭവാനന്ത പരിമാണ നിത്യ നിരവദ്യ നിരതിശയ ശ്രീവൈകുണ്ഠനാഥ, സ്വസങ്കല്പാനുവിധായി സ്വരൂപസ്ഥിതി പ്രവൃത്തി സ്വശേഷതൈകസ്വഭാവ പ്രകൃതി പുരുഷ കാലാത്മക വിവിധ വിചിത്രാനന്ത ഭോഗ്യ ഭോക്തൃവര്ഗ ഭോഗോപകരണ ഭോഗസ്ഥാനരൂപ
നിഖിലജഗദുദയ വിഭവ ലയലീല, സത്യകാമ, സത്യസങ്കല്പ, പരബ്രഹ്മഭൂത, പുരുഷോത്തമ,മഹാവിഭൂതേ,
ശ്രീമന് നാരായണ, വൈകുണ്ഠനാഥ, അപാര കാരുണ്യ സൌശീല്യ വാത്സല്യൌദാര്യൈശ്വര്യ സൌന്ദര്യ മഹോദധേ, അനാലോചിതവിശേഷാശേഷലോക ശരണ്യ, പ്രണതാര്തിഹര, ആശ്രിത വാത്സല്യൈകജലധേ, അനവരതവിദിത നിഖിലഭൂതജാതയാഥാത്മ്യ, അശേഷചരാചരഭൂത നിഖിലനിയമന നിരത, അശേഷചിദചിദ്വസ്തു ശേഷിഭൂത, നിഖിലജഗദാധാര, അഖിലജഗത്സ്വാമിന്, അസ്മത്സ്വാമിന്, സത്യകാമ,
സത്യസങ്കല്പ, സകലേതരവിലക്ഷണ, അര്ഥികല്പക, ആപത്സഖ, ശ്രീമന്, നാരായണ, അശരണ്യശരണ്യ, അനന്യശരണസ്ത്വത്പാദാരവിന്ദ യുഗലം ശരണമഹം പ്രപദ്യേ ॥
അത്ര ദ്വയമ് ।
പിതരം മാതരം ദാരാന് പുത്രാന് ബന്ധൂന് സഖീന് ഗുരൂന് ।
രത്നാനി ധനധാന്യാനി ക്ഷേത്രാണി ച ഗൃഹാണി ച ॥ 1

സര്വധര്മാംശ്ച സന്ത്യജ്യ സര്വകാമാംശ്ച സാക്ഷരാന് ।
ലോകവിക്രാന്തചരണൌ ശരണം തേഽവ്രജം വിഭോ ॥ 2

ത്വമേവ മാതാ ച പിതാ ത്വമേവ
ത്വമേവ ബന്ധുശ്ച ഗുരുസ്ത്വമേവ ।
ത്വമേവ വിദ്യാ ദ്രവിണം ത്വമേവ
ത്വമേവ സര്വം മമ ദേവദേവ ॥ 3

പിതാഽസി ലോകസ്യ ചരാചരസ്യ
ത്വമസ്യ പൂജ്യശ്ച ഗുരുര്ഗരീയാന് ।
ന ത്വത്സമോഽസ്ത്യഭ്യധികഃ കുതോഽന്യോ
ലോകത്രയേഽപ്യപ്രതിമപ്രഭാവ ॥ 4
തസ്മാത്പ്രണമ്യ പ്രണിധായ കായം
പ്രസാദയേ ത്വാമഹമീശമീഡ്യമ് ।
പിതേവ പുത്രസ്യ സഖേവ സഖ്യുഃ
പ്രിയഃ പ്രിയായാര്ഹസി ദേവ സോഢുമ് ॥
മനോവാക്കായൈരനാദികാല പ്രവൃത്താനന്താകൃത്യകരണ കൃത്യാകരണ ഭഗവദപചാര ഭാഗവതാപചാരാസഹ്യാപചാരരൂപ നാനാവിധാനന്താപചാരാന് ആരബ്ധകാര്യാന് അനാരബ്ധകാര്യാന് കൃതാന് ക്രിയമാണാന് കരിഷ്യമാണാംശ്ച സര്വാനശേഷതഃ ക്ഷമസ്വ ।
അനാദികാലപ്രവൃത്തവിപരീത ജ്ഞാനമാത്മവിഷയം കൃത്സ്ന ജഗദ്വിഷയം ച വിപരീതവൃത്തം ചാശേഷവിഷയമദ്യാപി വര്തമാനം വര്തിഷ്യമാണം ച സര്വം ക്ഷമസ്വ ।
മദീയാനാദികര്മ പ്രവാഹപ്രവൃത്താം ഭഗവത്സ്വരൂപ തിരോധാനകരീം വിപരീതജ്ഞാനജനനീം സ്വവിഷയായാശ്ച ഭോഗ്യബുദ്ധേര്ജനനീം ദേഹേന്ദ്രിയത്വേന ഭോഗ്യത്വേന സൂക്ഷ്മരൂപേണ ചാവസ്ഥിതാം ദൈവീം ഗുണമയീം മായാം ദാസഭൂതം ശരണാഗതോഽസ്മി തവാസ്മി ദാസഃ