শ্রীমদ্ভাগবতম্ ১.১১

সূত উবাচ
আনর্তান্ স উপব্রজ্য স্বৃদ্ধাঞ্জনপদান্স্বকান্ ।
দধ্মৌ দরবরং তেষাং বিষাদং শমযন্নিব ॥ ১ ॥

স উচ্চকাশে ধবলোদরো দরো-
ঽপ্যুরুক্রমস্যাধরশোণশোণিমা ।
দাধ্মাযমানঃ করকঞ্জসম্পুটে
যথাব্জখণ্ডে কলহংস উত্স্বনঃ ॥ ২ ॥

তমুপশ্রুত্য নিনদং জগদ্ভযভযাবহম্ ।
প্রত্যুদ্যযুঃ প্রজাঃ সর্বা ভর্তৃদর্শনলালসাঃ ॥ ৩ ॥

তত্রোপনীতবলযো রবের্দীপমিবাদৃতাঃ ।
আত্মারামং পূর্ণকামং নিজলাভেন নিত্যদা ॥ ৪ ॥

প্রীত্যুত্ফুল্লমুখাঃ প্রোচুর্হর্ষগদ্গদযা গিরা ।
পিতরং সর্বসুহৃদমবিতারমিবার্ভকাঃ ॥ ৫ ॥

নতাঃ স্ম তে নাথ সদাঙ্ঘ্রিপঙ্কজং
বিরিঞ্চবৈরিঞ্চ্যসুরেন্দ্রবন্দিতম্ ।
পরাযণং ক্ষেমমিহেচ্ছতাং পরং
ন যত্র কালঃ প্রভবেত্ পরঃ প্রভুঃ ॥ ৬ ॥

ভবায নস্ত্বং ভব বিশ্বভাবন
ত্বমেব মাতাথ সুহৃত্পতিঃ পিতা ।
ত্বং সদ্গুরুর্নঃ পরমং চ দৈবতং
যস্যানুবৃত্ত্যা কৃতিনো বভূবিম ॥ ৭ ॥

অহো সনাথা ভবতা স্ম যদ্বযং
ত্রৈবিষ্টপানামপি দূরদর্শনম্ ।
প্রেমস্মিতস্নিগ্ধনিরীক্ষণাননং
পশ্যেম রূপং তব সর্বসৌভগম্ ॥ ৮ ॥

যর্হ্যম্বুজাক্ষাপসসার ভো ভবান্
কুরূন্ মধূন্ বাথ সুহৃদ্দিদৃক্ষযা ।
তত্রাব্দকোটিপ্রতিমঃ ক্ষণো ভবেদ্
রবিং বিনাক্ষ্ণোরিব নস্তবাচ্যুত ॥ ৯ ॥

কথং বযং নাথ চিরোষিতে ত্বযি প্রসন্নদৃষ্টযাখিলতাপশোষণম ।
জীবেম তে সুন্দরহাসশোভিতমপশ্যমানা বদনং মনোহরম ।
ইতি চোদীরিতা বাচঃ প্রজানাং ভক্তবত্সল ।
শৃণ্বানোঽনুগ্রহং দৃষ্টযা বিতন্বন্ প্রাবিশত্ পুরম্ ॥ ১০ ॥

মধুভোজদশার্হার্হকুকুরান্ধকবৃষ্ণিভিঃ ।
আত্মতুল্যবলৈর্গুপ্তাং নাগৈর্ভোগবতীমিব ॥ ১১ ॥

সর্বর্তুসর্ববিভবপুণ্যবৃক্ষলতাশ্রমৈঃ ।
উদ্যানোপবনারামৈর্বৃতপদ্মাকরশ্রিযম্ ॥ ১২ ॥

গোপুরদ্বারমার্গেষু কৃতকৌতুকতোরণাম্ ।
চিত্রধ্বজপতাকাগ্রৈরন্তঃ প্রতিহতাতপাম্ ॥ ১৩ ॥

সম্মার্জিতমহামার্গরথ্যাপণকচত্বরাম্ ।
সিক্তাং গন্ধজলৈরুপ্তাং ফলপুষ্পাক্ষতাঙ্কুরৈঃ ॥ ১৪ ॥

দ্বারি দ্বারি গৃহাণাং চ দধ্যক্ষতফলেক্ষুভিঃ ।
অলঙ্কৃতাং পূর্ণকুম্ভৈর্বলিভির্ধূপদীপকৈঃ ॥ ১৫ ॥

নিশম্য প্রেষ্ঠমাযান্তং বসুদেবো মহামনাঃ ।
অক্রূরশ্চোগ্রসেনশ্চ রামশ্চাদ্ভুতবিক্রমঃ ॥ ১৬ ॥

প্রদ্যুম্নশ্চারুদেষ্ণশ্চ সাম্বো জাম্ববতীসুতঃ ।
প্রহর্ষবেগোচ্ছশিতশযনাসনভোজনাঃ ॥ ১৭ ॥

বারণেন্দ্রং পুরস্কৃত্য ব্রাহ্মণৈঃ সসুমঙ্গলৈঃ ।
শঙ্খতূর্যনিনাদেন ব্রহ্মঘোষেণ চাদৃতাঃ ।
প্রত্যুজ্জগ্মূ রথৈর্হৃষ্টাঃ প্রণযাগতসাধ্বসাঃ ॥ ১৮ ॥

বারমুখ্যাশ্চ শতশো যানৈস্তদ্দর্শনোত্সুকাঃ ।
লসত্কুণ্ডলনির্ভাতকপোলবদনশ্রিযঃ ॥ ১৯ ॥

নটনর্তকগন্ধর্বাঃ সূতমাগধবন্দিনঃ ।
গাযন্তি চোত্তমশ্লোকচরিতান্যদ্ভুতানি চ ॥ ২০ ॥

ভগবাংস্তত্র বন্ধূনাং পৌরাণামনুবর্তিনাম্ ।
যথাবিধ্যুপসঙ্গম্য সর্বেষাং মানমাদধে ॥ ২১ ॥

প্রহ্বাভিবাদনাশ্লেষকরস্পর্শস্মিতেক্ষণৈঃ ।
আশ্বাস্য চাশ্বপাকেভ্যো বরৈশ্চাভিমতৈর্বিভুঃ ॥ ২২ ॥

স্বযং চ গুরুভির্বিপ্রৈঃ সদারৈঃ স্থবিরৈরপি ।
আশীর্ভির্যুজ্যমানোঽন্যৈর্বন্দিভিশ্চাবিশত্পুরম্ ॥ ২৩ ॥

রাজমার্গং গতে কৃষ্ণে দ্বারকাযাঃ কুলস্ত্রিযঃ ।
হর্ম্যাণ্যারুরুহুর্বিপ্র তদীক্ষণমহোত্সবাঃ ॥ ২৪ ॥

নিত্যং নিরীক্ষমাণানাং যদপি দ্বারকৌকসাম্ ।
ন বিতৃপ্যন্তি হি দৃশঃ শ্রিযো ধামাঙ্গমচ্যুতম্ ॥ ২৫ ॥

শ্রিযো নিবাসো যস্যোরঃ পানপাত্রং মুখং দৃশাম্ ।
বাহবো লোকপালানাং সারঙ্গাণাং পদাম্বুজম্ ॥ ২৬ ॥

সিতাতপত্রব্যজনৈরুপস্কৃতঃ
প্রসূনবর্ষৈরভিবর্ষিতঃ পথি ।
পিশঙ্গবাসা বনমালযা বভৌ
ঘনো যথার্কোডুপচাপবৈদ্যুতৈঃ ॥ ২৭ ॥

প্রবিষ্টস্তু গৃহং পিত্রোঃ পরিষ্বক্তঃ স্বমাতৃভিঃ ।
ববন্দে শিরসা সপ্ত দেবকীপ্রমুখা মুদা ॥ ২৮ ॥

তাঃ পুত্রমঙ্কমারোপ্য স্নেহস্নুতপযোধরাঃ ।
হর্ষবিহ্বলিতাত্মানঃ সিষিচুর্নেত্রজৈর্জলৈঃ ॥ ২৯ ॥

অথাবিশত্ স্বভবনং সর্বকামমনুত্তমম্ ।
প্রাসাদা যত্র পত্নীনাং সহস্রাণি চ ষোডশ ॥ ৩০ ॥

পত্ন্যঃ পতিং প্রোষ্য গৃহানুপাগতং
বিলোক্য সঞ্জাতমনোমহোত্সবাঃ ।
উত্তস্থুরারাত্ সহসাসনাশযাত্
সাকং ব্রতৈর্ব্রীডিতলোচনাননাঃ ॥ ৩১ ॥

তমাত্মজৈর্দৃষ্টিভিরন্তরাত্মনা
দুরন্তভাবাঃ পরিরেভিরে পতিম্ ।
নিরুদ্ধমপ্যাস্রবদম্বু নেত্রযো-
র্বিলজ্জতীনাং ভৃগুবর্য বৈক্লবাত্ ॥ ৩২ ॥

যদ্যপ্যসৌ পার্শ্বগতো রহোগত-
স্তথাপি তস্যাঙ্ঘ্রিযুগং নবং নবম্ ।
পদে পদে কা বিরমেত তত্পদা-
চ্চলাপি যচ্ছ্রীর্ন জহাতি কর্হিচিত্ ॥ ৩৩ ॥

এবং নৃপাণাং ক্ষিতিভারজন্মনা-
মক্ষৌহিণীভিঃ পরিবৃত্ততেজসাম্ ।
বিধায বৈরং শ্বসনো যথানলং
মিথো বধেনোপরতো নিরাযুধঃ ॥ ৩৪ ॥

স এষ নরলোকেঽস্মিন্নবতীর্ণঃ স্বমাযযা ।
রেমে স্ত্রীরত্নকূটস্থো ভগবান্ প্রাকৃতো যথা ॥ ৩৫ ॥

উদ্দামভাবপিশুনামলবল্গুহাস-
ব্রীডাবলোকনিহতো মদনোঽপি যাসাম্ ।
সম্মুহ্য চাপমজহাত্প্রমদোত্তমাস্তা
যস্যেন্দ্রিযং বিমথিতুং কুহকৈর্ন শেকুঃ ॥ ৩৬ ॥

তমযং মন্যতে লোকো হ্যসঙ্গমপি সঙ্গিনম্ ।
আত্মৌপম্যেন মনুজং ব্যাপৃণ্বানং যতোঽবুধঃ ॥ ৩৭ ॥

এতদীশনমীশস্য প্রকৃতিস্থোঽপি তদ্গুণৈঃ ।
ন যুজ্যতে সদাত্মস্থৈর্যথা বুদ্ধিস্তদাশ্রযা ॥ ৩৮ ॥

তং মেনিরেঽবলা মূঢাঃ স্ত্রৈণং চানুব্রতং রহঃ ।
অপ্রমাণবিদো ভর্তুরীশ্বরং মতযো যথা ॥ ৩৯ ॥