শ্রীমদ্ভাগবতম্ ১০.১৩

শ্রীশুক উবাচ
সাধু পৃষ্টং মহাভাগ ত্বযা ভাগবতোত্তম ।
যন্নূতনযসীশস্য শৃণ্বন্নপি কথাং মুহুঃ ॥ ১ ॥

সতামযং সারভৃতাং নিসর্গো
যদর্থবাণীশ্রুতিচেতসামপি ।
প্রতিক্ষণং নব্যবদচ্যুতস্য যত্
স্ত্রিযা বিটানামিব সাধুবার্তা ॥ ২ ॥

শৃণুষ্বাবহিতো রাজন্নপি গুহ্যং বদামি তে ।
ব্রূযুঃ স্নিগ্ধস্য শিষ্যস্য গুরবো গুহ্যমপ্যুত ॥ ৩ ॥

তথাঘবদনান্মৃত্যো রক্ষিত্বা বত্সপালকান্ ।
সরিত্পুলিনমানীয ভগবানিদমব্রবীত্ ॥ ৪ ॥

অহোঽতিরম্যং পুলিনং বযস্যাঃ
স্বকেলিসম্পন্মৃদুলাচ্ছবালুকম্ ।
স্ফুটত্সরোগন্ধহৃতালিপত্রিক-
ধ্বনিপ্রতিধ্বানলসদ্দ্রুমাকুলম্ ॥ ৫ ॥

অত্র ভোক্তব্যমস্মাভির্দিবারূঢং ক্ষুধার্দিতাঃ ।
বত্সাঃ সমীপেঽপঃ পীত্বা চরন্তু শনকৈস্তৃণম্ ॥ ৬ ॥

তথেতি পাযযিত্বার্ভা বত্সানারুধ্য শাদ্বলে ।
মুক্ত্বা শিক্যানি বুভুজুঃ সমং ভগবতা মুদা ॥ ৭ ॥

কৃষ্ণস্য বিষ্বক্ পুরুরাজিমণ্ডলৈ-
রভ্যাননাঃ ফুল্লদৃশো ব্রজার্ভকাঃ ।
সহোপবিষ্টা বিপিনে বিরেজু-
শ্ছদা যথাম্ভোরুহকর্ণিকাযাঃ ॥ ৮ ॥

কেচিত্ পুষ্পৈর্দলৈঃ কেচিত্পল্লবৈরঙ্কুরৈঃ ফলৈঃ ।
শিগ্ভিস্ত্বগ্ভির্দৃষদ্ভিশ্চ বুভুজুঃ কৃতভাজনাঃ ॥ ৯ ॥

সর্বে মিথো দর্শযন্তঃ স্বস্বভোজ্যরুচিং পৃথক্ ।
হসন্তো হাসযন্তশ্চাভ্যবজহ্রুঃ সহেশ্বরাঃ ॥ ১০ ॥

বিভ্রদ্ বেণুং জঠরপটযোঃ শৃঙ্গবেত্রে চ কক্ষে
বামে পাণৌ মসৃণকবলং তত্ফলান্যঙ্গুলীষু ।
তিষ্ঠন্ মধ্যে স্বপরিসুহৃদো হাসযন্ নর্মভিঃ স্বৈঃ
স্বর্গে লোকে মিষতি বুভুজে যজ্ঞভুগ্ বালকেলিঃ ॥ ১১ ॥

ভারতৈবং বত্সপেষু ভুঞ্জানেষ্বচ্যুতাত্মসু ।
বত্সাস্ত্বন্তর্বনে দূরং বিবিশুস্তৃণলোভিতাঃ ॥ ১২ ॥

তান্ দৃষ্ট্বা ভযসন্ত্রস্তানূচে কৃষ্ণোঽস্য ভীভযম্ ।
মিত্রাণ্যাশান্মা বিরমতেহানেষ্যে বত্সকানহম্ ॥ ১৩ ॥

ইত্যুক্ত্বাদ্রিদরীকুঞ্জগহ্বরেষ্বাত্মবত্সকান্ ।
বিচিন্বন্ভগবান্কৃষ্ণঃ সপাণিকবলো যযৌ ॥ ১৪ ॥

অম্ভোজন্মজনিস্তদন্তরগতো মাযার্ভকস্যেশিতু-
র্দ্রষ্টুং মঞ্জু মহিত্বমন্যদপি তদ্বত্সানিতো বত্সপান্ ।
নীত্বান্যত্র কুরূদ্বহান্তরদধাত্ খেঽবস্থিতো যঃ পুরা
দৃষ্ট্বাঘাসুরমোক্ষণং প্রভবতঃ প্রাপ্তঃ পরং বিস্মযম্ ॥ ১৫ ॥

ততো বত্সানদৃষ্ট্বৈত্য পুলিনেঽপি চ বত্সপান্ ।
উভাবপি বনে কৃষ্ণো বিচিকায সমন্ততঃ ॥ ১৬ ॥

ক্বাপ্যদৃষ্ট্বান্তর্বিপিনে বত্সান্পালাংশ্চ বিশ্ববিত্ ।
সর্বং বিধিকৃতং কৃষ্ণঃ সহসাবজগাম হ ॥ ১৭ ॥

ততঃ কৃষ্ণো মুদং কর্তুং তন্মাতৃণাং চ কস্য চ ।
উভযাযিতমাত্মানং চক্রে বিশ্বকৃদীশ্বরঃ ॥ ১৮ ॥

যাবদ্ বত্সপবত্সকাল্পকবপুর্যাবত্ করাঙ্ঘ্র্যাদিকং
যাবদ্ যষ্টিবিষাণবেণুদলশিগ্ যাবদ্ বিভূষাম্বরম্ ।
যাবচ্ছীলগুণাভিধাকৃতিবযো যাবদ্ বিহারাদিকং
সর্বং বিষ্ণুমযং গিরোঽঙ্গবদজঃ সর্বস্বরূপো বভৌ ॥ ১৯ ॥

স্বযমাত্মাত্মগোবত্সান্ প্রতিবার্যাত্মবত্সপৈঃ ।
ক্রীডন্নাত্মবিহারৈশ্চ সর্বাত্মা প্রাবিশদ্ ব্রজম্ ॥ ২০ ॥

তত্তদ্বত্সান্পৃথঙ্নীত্বা তত্তদ্গোষ্ঠে নিবেশ্য সঃ ।
তত্তদাত্মাভবদ্ রাজংস্তত্তত্সদ্ম প্রবিষ্টবান্ ॥ ২১ ॥

তন্মাতরো বেণুরবত্বরোত্থিতা
উত্থাপ্য দোর্ভিঃ পরিরভ্য নির্ভরম্ ।
স্নেহস্নুতস্তন্যপযঃসুধাসবং
মত্বা পরং ব্রহ্ম সুতানপাযযন্ ॥ ২২ ॥

ততো নৃপোন্মর্দনমজ্জলেপনা-
লঙ্কাররক্ষাতিলকাশনাদিভিঃ ।
সংলালিতঃ স্বাচরিতৈঃ প্রহর্ষযন্
সাযং গতো যামযমেন মাধবঃ ॥ ২৩ ॥

গাবস্ততো গোষ্ঠমুপেত্য সত্বরং
হুঙ্কারঘোষৈঃ পরিহূতসঙ্গতান্ ।
স্বকান্ স্বকান্ বত্সতরানপাযযন্
মুহুর্লিহন্ত্যঃ স্রবদৌধসং পযঃ ॥ ২৪ ॥

গোগোপীনাং মাতৃতাস্মিন্নাসীত্স্নেহর্ধিকাং বিনা ।
পুরোবদাস্বপি হরেস্তোকতা মাযযা বিনা ॥ ২৫ ॥

ব্রজৌকসাং স্বতোকেষু স্নেহবল্ল্যাব্দমন্বহম্ ।
শনৈর্নিঃসীম ববৃধে যথা কৃষ্ণে ত্বপূর্ববত্ ॥ ২৬ ॥

ইত্থমাত্মাত্মনাত্মানং বত্সপালমিষেণ সঃ ।
পালযন্ বত্সপো বর্ষং চিক্রীডে বনগোষ্ঠযোঃ ॥ ২৭ ॥

একদা চারযন্ বত্সান্সরামো বনমাবিশত্ ।
পঞ্চষাসু ত্রিযামাসু হাযনাপূরণীষ্বজঃ ॥ ২৮ ॥

ততো বিদূরাচ্চরতো গাবো বত্সানুপব্রজম্ ।
গোবর্ধনাদ্রিশিরসি চরন্ত্যো দদৃশুস্তৃণম্ ॥ ২৯ ॥

দৃষ্ট্বাথ তত্স্নেহবশোঽস্মৃতাত্মা
স গোব্রজোঽত্যাত্মপদুর্গমার্গঃ ।
দ্বিপাত্ককুদ্গ্রীব উদাস্যপুচ্ছো-
ঽগাদ্ধুঙ্কৃতৈরাস্রুপযা জবেন ॥ ৩০ ॥

সমেত্য গাবোঽধো বত্সান্ বত্সবত্যোঽপ্যপাযযন্ ।
গিলন্ত্য ইব চাঙ্গানি লিহন্ত্যঃ স্বৌধসং পযঃ ॥ ৩১ ॥

গোপাস্তদ্রোধনাযাসমৌঘ্যলজ্জোরুমন্যুনা ।
দুর্গাধ্বকৃচ্ছ্রতোঽভ্যেত্য গোবত্সৈর্দদৃশুঃ সুতান্ ॥ ৩২ ॥

তদীক্ষণোত্প্রেমরসাপ্লুতাশযা
জাতানুরাগা গতমন্যবোঽর্ভকান্ ।
উদুহ্য দোর্ভিঃ পরিরভ্য মূর্ধনি
ঘ্রাণৈরবাপুঃ পরমাং মুদং তে ॥ ৩৩ ॥

ততঃ প্রবযসো গোপাস্তোকাশ্লেষসুনির্বৃতাঃ ।
কৃচ্ছ্রাচ্ছনৈরপগতাস্তদনুস্মৃত্যুদশ্রবঃ ॥ ৩৪ ॥

ব্রজস্য রামঃ প্রেমর্ধের্বীক্ষ্যৌত্কণ্ঠ্যমনুক্ষণম্ ।
মুক্তস্তনেষ্বপত্যেষ্বপ্যহেতুবিদচিন্তযত্ ॥ ৩৫ ॥

কিমেতদদ্ভুতমিব বাসুদেবেঽখিলাত্মনি ।
ব্রজস্য সাত্মনস্তোকেষ্বপূর্বং প্রেম বর্ধতে ॥ ৩৬ ॥

কেযং বা কুত আযাতা দৈবী বা নার্যুতাসুরী ।
প্রাযো মাযাস্তু মে ভর্তুর্নান্যা মেঽপি বিমোহিনী ॥ ৩৭ ॥

ইতি সঞ্চিন্ত্য দাশার্হো বত্সান্সবযসানপি ।
সর্বানাচষ্ট বৈকুণ্ঠং চক্ষুষা বযুনেন সঃ ॥ ৩৮ ॥

নৈতে সুরেশা ঋষযো ন চৈতে
ত্বমেব ভাসীশ ভিদাশ্রযেঽপি ।
সর্বং পৃথক্ত্বং নিগমাত্ কথং বদে-
ত্যুক্তেন বৃত্তং প্রভুণা বলোঽবৈত্ ॥ ৩৯ ॥

তাবদেত্যাত্মভূরাত্মমানেন ত্রুট্যনেহসা ।
পুরোবদাব্দং ক্রীডন্তং দদৃশে সকলং হরিম্ ॥ ৪০ ॥

যাবন্তো গোকুলে বালাঃ সবত্সাঃ সর্ব এব হি ।
মাযাশযে শযানা মে নাদ্যাপি পুনরুত্থিতাঃ ॥ ৪১ ॥

ইত এতেঽত্র কুত্রত্যা মন্মাযামোহিতেতরে ।
তাবন্ত এব তত্রাব্দং ক্রীডন্তো বিষ্ণুনা সমম্ ॥ ৪২ ॥

এবমেতেষু ভেদেষু চিরং ধ্যাত্বা স আত্মভূঃ ।
সত্যাঃ কে কতরে নেতি জ্ঞাতুং নেষ্টে কথঞ্চন ॥ ৪৩ ॥

এবং সম্মোহযন্ বিষ্ণুং বিমোহং বিশ্বমোহনম্ ।
স্বযৈব মাযযাজোঽপি স্বযমেব বিমোহিতঃ ॥ ৪৪ ॥

তম্যাং তমোবন্নৈহারং খদ্যোতার্চিরিবাহনি ।
মহতীতরমাযৈশ্যং নিহন্ত্যাত্মনি যুঞ্জতঃ ॥ ৪৫ ॥

তাবত্ সর্বে বত্সপালাঃ পশ্যতোঽজস্য তত্ক্ষণাত্ ।
ব্যদৃশ্যন্ত ঘনশ্যামাঃ পীতকৌশেযবাসসঃ ॥ ৪৬ ॥

চতুর্ভুজাঃ শঙ্খচক্রগদারাজীবপাণযঃ ।
কিরীটিনঃ কুণ্ডলিনো হারিণো বনমালিনঃ ॥ ৪৭ ॥

শ্রীবত্সাঙ্গদদোরত্নকম্বুকঙ্কণপাণযঃ ।
নূপুরৈঃ কটকৈর্ভাতাঃ কটিসূত্রাঙ্গুলীযকৈঃ ॥ ৪৮ ॥

আঙ্ঘ্রিমস্তকমাপূর্ণাস্তুলসীনবদামভিঃ ।
কোমলৈঃ সর্বগাত্রেষু ভূরিপুণ্যবদর্পিতৈঃ ॥ ৪৯ ॥

চন্দ্রিকাবিশদস্মেরৈঃ সারুণাপাঙ্গবীক্ষিতৈঃ ।
স্বকার্থানামিব রজঃসত্ত্বাভ্যাং স্রষ্টৃপালকাঃ ॥ ৫০ ॥

আত্মাদিস্তম্বপর্যন্তৈর্মূর্তিমদ্ভিশ্চরাচরৈঃ ।
নৃত্যগীতাদ্যনেকার্হৈঃ পৃথক্পৃথগুপাসিতাঃ ॥ ৫১ ॥

অণিমাদ্যৈর্মহিমভিরজাদ্যাভির্বিভূতিভিঃ ।
চতুর্বিংশতিভিস্তত্ত্বৈঃ পরীতা মহদাদিভিঃ ॥ ৫২ ॥

কালস্বভাবসংস্কারকামকর্মগুণাদিভিঃ ।
স্বমহিধ্বস্তমহিভির্মূর্তিমদ্ভিরুপাসিতাঃ ॥ ৫৩ ॥

সত্যজ্ঞানানন্তানন্দমাত্রৈকরসমূর্তযঃ ।
অস্পৃষ্টভূরিমাহাত্ম্যা অপি হ্যুপনিষদ্দৃশাম্ ॥ ৫৪ ॥

এবং সকৃদ্ দদর্শাজঃ পরব্রহ্মাত্মনোঽখিলান্ ।
যস্য ভাসা সর্বমিদং বিভাতি সচরাচরম্ ॥ ৫৫ ॥

ততোঽতিকুতুকোদ্বৃত্যস্তিমিতৈকাদশেন্দ্রিযঃ ।
তদ্ধাম্নাভূদজস্তূষ্ণীং পূর্দেব্যন্তীব পুত্রিকা ॥ ৫৬ ॥

ইতীরেশেঽতর্ক্যে নিজমহিমনি স্বপ্রমিতিকে
পরত্রাজাতোঽতন্নিরসনমুখব্রহ্মকমিতৌ ।
অনীশেঽপি দ্রষ্টুং কিমিদমিতি বা মুহ্যতি সতি
চচ্ছাদাজো জ্ঞাত্বা সপদি পরমোঽজাজবনিকাম্ ॥ ৫৭ ॥

ততোঽর্বাক্প্রতিলব্ধাক্ষঃ কঃ পরেতবদুত্থিতঃ ।
কৃচ্ছ্রাদুন্মীল্য বৈ দৃষ্টীরাচষ্টেদং সহাত্মনা ॥ ৫৮ ॥

সপদ্যেবাভিতঃ পশ্যন্ দিশোঽপশ্যত্পুরঃস্থিতম্ ।
বৃন্দাবনং জনাজীব্যদ্রুমাকীর্ণং সমাপ্রিযম্ ॥ ৫৯ ॥

যত্র নৈসর্গদুর্বৈরাঃ সহাসন্ নৃমৃগাদযঃ ।
মিত্রাণীবাজিতাবাসদ্রুতরুট্তর্ষকাদিকম্ ॥ ৬০ ॥

তত্রোদ্বহত্ পশুপবংশশিশুত্বনাট্যং
ব্রহ্মাদ্বযং পরমনন্তমগাধবোধম্ ।
বত্সান্ সখীনিব পুরা পরিতো বিচিন্ব-
দেকং সপাণিকবলং পরমেষ্ঠ্যচষ্ট ॥ ৬১ ॥

দৃষ্ট্বা ত্বরেণ নিজধোরণতোঽবতীর্য
পৃথ্ব্যাং বপুঃ কনকদণ্ডমিবাভিপাত্য ।
স্পৃষ্ট্বা চতুর্মুকুটকোটিভিরঙ্ঘ্রিযুগ্মং
নত্বা মুদশ্রুসুজলৈরকৃতাভিষেকম্ ॥ ৬২ ॥

উত্থাযোত্থায কৃষ্ণস্য চিরস্য পাদযোঃ পতন্ ।
আস্তে মহিত্বং প্রাগ্দৃষ্টং স্মৃত্বা স্মৃত্বা পুনঃ পুনঃ ॥ ৬৩ ॥

শনৈরথোত্থায বিমৃজ্য লোচনে
মুকুন্দমুদ্বীক্ষ্য বিনম্রকন্ধরঃ ।
কৃতাঞ্জলিঃ প্রশ্রযবান্ সমাহিতঃ
সবেপথুর্গদ্গদযৈলতেলযা ॥ ৬৪ ॥
জ্ঞানে প্রযাসমুদপাস্য নমন্ত এব
জীবন্তি সন্মুখরিতাং ভবদীযবার্তাম্ ।
স্থানে স্থিতাঃ শ্রুতিগতাং তনুবাঙ্মনোভি-
র্যে প্রাযশোঽজিত জিতোঽপ্যসি তৈস্ত্রিলোক্যাম্ ॥