ଶ୍ରୀମଦ୍ଭାଗଵତମ୍ ୧୦.୧୩

ଶ୍ରୀଶୁକ ଉଵାଚ
ସାଧୁ ପୃଷ୍ଟଂ ମହାଭାଗ ତ୍ଵଯା ଭାଗଵତୋତ୍ତମ ।
ଯନ୍ନୂତନଯସୀଶସ୍ଯ ଶୃଣ୍ଵନ୍ନପି କଥାଂ ମୁହୁଃ ॥ ୧ ॥

ସତାମଯଂ ସାରଭୃତାଂ ନିସର୍ଗୋ
ଯଦର୍ଥଵାଣୀଶ୍ରୁତିଚେତସାମପି ।
ପ୍ରତିକ୍ଷଣଂ ନଵ୍ଯଵଦଚ୍ଯୁତସ୍ଯ ଯତ୍
ସ୍ତ୍ରିଯା ଵିଟାନାମିଵ ସାଧୁଵାର୍ତା ॥ ୨ ॥

ଶୃଣୁଷ୍ଵାଵହିତୋ ରାଜନ୍ନପି ଗୁହ୍ଯଂ ଵଦାମି ତେ ।
ବ୍ରୂଯୁଃ ସ୍ନିଗ୍ଧସ୍ଯ ଶିଷ୍ଯସ୍ଯ ଗୁରଵୋ ଗୁହ୍ଯମପ୍ଯୁତ ॥ ୩ ॥

ତଥାଘଵଦନାନ୍ମୃତ୍ଯୋ ରକ୍ଷିତ୍ଵା ଵତ୍ସପାଲକାନ୍ ।
ସରିତ୍ପୁଲିନମାନୀଯ ଭଗଵାନିଦମବ୍ରଵୀତ୍ ॥ ୪ ॥

ଅହୋଽତିରମ୍ଯଂ ପୁଲିନଂ ଵଯସ୍ଯାଃ
ସ୍ଵକେଲିସମ୍ପନ୍ମୃଦୁଲାଚ୍ଛବାଲୁକମ୍ ।
ସ୍ଫୁଟତ୍ସରୋଗନ୍ଧହୃତାଲିପତ୍ରିକ-
ଧ୍ଵନିପ୍ରତିଧ୍ଵାନଲସଦ୍ଦ୍ରୁମାକୁଲମ୍ ॥ ୫ ॥

ଅତ୍ର ଭୋକ୍ତଵ୍ଯମସ୍ମାଭିର୍ଦିଵାରୂଢଂ କ୍ଷୁଧାର୍ଦିତାଃ ।
ଵତ୍ସାଃ ସମୀପେଽପଃ ପୀତ୍ଵା ଚରନ୍ତୁ ଶନକୈସ୍ତୃଣମ୍ ॥ ୬ ॥

ତଥେତି ପାଯଯିତ୍ଵାର୍ଭା ଵତ୍ସାନାରୁଧ୍ଯ ଶାଦ୍ଵଲେ ।
ମୁକ୍ତ୍ଵା ଶିକ୍ଯାନି ବୁଭୁଜୁଃ ସମଂ ଭଗଵତା ମୁଦା ॥ ୭ ॥

କୃଷ୍ଣସ୍ଯ ଵିଷ୍ଵକ୍ ପୁରୁରାଜିମଣ୍ଡଲୈ-
ରଭ୍ଯାନନାଃ ଫୁଲ୍ଲଦୃଶୋ ଵ୍ରଜାର୍ଭକାଃ ।
ସହୋପଵିଷ୍ଟା ଵିପିନେ ଵିରେଜୁ-
ଶ୍ଛଦା ଯଥାମ୍ଭୋରୁହକର୍ଣିକାଯାଃ ॥ ୮ ॥

କେଚିତ୍ ପୁଷ୍ପୈର୍ଦଲୈଃ କେଚିତ୍ପଲ୍ଲଵୈରଙ୍କୁରୈଃ ଫଲୈଃ ।
ଶିଗ୍ଭିସ୍ତ୍ଵଗ୍ଭିର୍ଦୃଷଦ୍ଭିଶ୍ଚ ବୁଭୁଜୁଃ କୃତଭାଜନାଃ ॥ ୯ ॥

ସର୍ଵେ ମିଥୋ ଦର୍ଶଯନ୍ତଃ ସ୍ଵସ୍ଵଭୋଜ୍ଯରୁଚିଂ ପୃଥକ୍ ।
ହସନ୍ତୋ ହାସଯନ୍ତଶ୍ଚାଭ୍ଯଵଜହ୍ରୁଃ ସହେଶ୍ଵରାଃ ॥ ୧୦ ॥

ବିଭ୍ରଦ୍ ଵେଣୁଂ ଜଠରପଟଯୋଃ ଶୃଙ୍ଗଵେତ୍ରେ ଚ କକ୍ଷେ
ଵାମେ ପାଣୌ ମସୃଣକଵଲଂ ତତ୍ଫଲାନ୍ଯଙ୍ଗୁଲୀଷୁ ।
ତିଷ୍ଠନ୍ ମଧ୍ଯେ ସ୍ଵପରିସୁହୃଦୋ ହାସଯନ୍ ନର୍ମଭିଃ ସ୍ଵୈଃ
ସ୍ଵର୍ଗେ ଲୋକେ ମିଷତି ବୁଭୁଜେ ଯଜ୍ଞଭୁଗ୍ ବାଲକେଲିଃ ॥ ୧୧ ॥

ଭାରତୈଵଂ ଵତ୍ସପେଷୁ ଭୁଞ୍ଜାନେଷ୍ଵଚ୍ଯୁତାତ୍ମସୁ ।
ଵତ୍ସାସ୍ତ୍ଵନ୍ତର୍ଵନେ ଦୂରଂ ଵିଵିଶୁସ୍ତୃଣଲୋଭିତାଃ ॥ ୧୨ ॥

ତାନ୍ ଦୃଷ୍ଟ୍ଵା ଭଯସନ୍ତ୍ରସ୍ତାନୂଚେ କୃଷ୍ଣୋଽସ୍ଯ ଭୀଭଯମ୍ ।
ମିତ୍ରାଣ୍ଯାଶାନ୍ମା ଵିରମତେହାନେଷ୍ଯେ ଵତ୍ସକାନହମ୍ ॥ ୧୩ ॥

ଇତ୍ଯୁକ୍ତ୍ଵାଦ୍ରିଦରୀକୁଞ୍ଜଗହ୍ଵରେଷ୍ଵାତ୍ମଵତ୍ସକାନ୍ ।
ଵିଚିନ୍ଵନ୍ଭଗଵାନ୍କୃଷ୍ଣଃ ସପାଣିକଵଲୋ ଯଯୌ ॥ ୧୪ ॥

ଅମ୍ଭୋଜନ୍ମଜନିସ୍ତଦନ୍ତରଗତୋ ମାଯାର୍ଭକସ୍ଯେଶିତୁ-
ର୍ଦ୍ରଷ୍ଟୁଂ ମଞ୍ଜୁ ମହିତ୍ଵମନ୍ଯଦପି ତଦ୍ଵତ୍ସାନିତୋ ଵତ୍ସପାନ୍ ।
ନୀତ୍ଵାନ୍ଯତ୍ର କୁରୂଦ୍ଵହାନ୍ତରଦଧାତ୍ ଖେଽଵସ୍ଥିତୋ ଯଃ ପୁରା
ଦୃଷ୍ଟ୍ଵାଘାସୁରମୋକ୍ଷଣଂ ପ୍ରଭଵତଃ ପ୍ରାପ୍ତଃ ପରଂ ଵିସ୍ମଯମ୍ ॥ ୧୫ ॥

ତତୋ ଵତ୍ସାନଦୃଷ୍ଟ୍ଵୈତ୍ଯ ପୁଲିନେଽପି ଚ ଵତ୍ସପାନ୍ ।
ଉଭାଵପି ଵନେ କୃଷ୍ଣୋ ଵିଚିକାଯ ସମନ୍ତତଃ ॥ ୧୬ ॥

କ୍ଵାପ୍ଯଦୃଷ୍ଟ୍ଵାନ୍ତର୍ଵିପିନେ ଵତ୍ସାନ୍ପାଲାଂଶ୍ଚ ଵିଶ୍ଵଵିତ୍ ।
ସର୍ଵଂ ଵିଧିକୃତଂ କୃଷ୍ଣଃ ସହସାଵଜଗାମ ହ ॥ ୧୭ ॥

ତତଃ କୃଷ୍ଣୋ ମୁଦଂ କର୍ତୁଂ ତନ୍ମାତୃଣାଂ ଚ କସ୍ଯ ଚ ।
ଉଭଯାଯିତମାତ୍ମାନଂ ଚକ୍ରେ ଵିଶ୍ଵକୃଦୀଶ୍ଵରଃ ॥ ୧୮ ॥

ଯାଵଦ୍ ଵତ୍ସପଵତ୍ସକାଲ୍ପକଵପୁର୍ଯାଵତ୍ କରାଙ୍ଘ୍ର୍ଯାଦିକଂ
ଯାଵଦ୍ ଯଷ୍ଟିଵିଷାଣଵେଣୁଦଲଶିଗ୍ ଯାଵଦ୍ ଵିଭୂଷାମ୍ବରମ୍ ।
ଯାଵଚ୍ଛୀଲଗୁଣାଭିଧାକୃତିଵଯୋ ଯାଵଦ୍ ଵିହାରାଦିକଂ
ସର୍ଵଂ ଵିଷ୍ଣୁମଯଂ ଗିରୋଽଙ୍ଗଵଦଜଃ ସର୍ଵସ୍ଵରୂପୋ ବଭୌ ॥ ୧୯ ॥

ସ୍ଵଯମାତ୍ମାତ୍ମଗୋଵତ୍ସାନ୍ ପ୍ରତିଵାର୍ଯାତ୍ମଵତ୍ସପୈଃ ।
କ୍ରୀଡନ୍ନାତ୍ମଵିହାରୈଶ୍ଚ ସର୍ଵାତ୍ମା ପ୍ରାଵିଶଦ୍ ଵ୍ରଜମ୍ ॥ ୨୦ ॥

ତତ୍ତଦ୍ଵତ୍ସାନ୍ପୃଥଙ୍ନୀତ୍ଵା ତତ୍ତଦ୍ଗୋଷ୍ଠେ ନିଵେଶ୍ଯ ସଃ ।
ତତ୍ତଦାତ୍ମାଭଵଦ୍ ରାଜଂସ୍ତତ୍ତତ୍ସଦ୍ମ ପ୍ରଵିଷ୍ଟଵାନ୍ ॥ ୨୧ ॥

ତନ୍ମାତରୋ ଵେଣୁରଵତ୍ଵରୋତ୍ଥିତା
ଉତ୍ଥାପ୍ଯ ଦୋର୍ଭିଃ ପରିରଭ୍ଯ ନିର୍ଭରମ୍ ।
ସ୍ନେହସ୍ନୁତସ୍ତନ୍ଯପଯଃସୁଧାସଵଂ
ମତ୍ଵା ପରଂ ବ୍ରହ୍ମ ସୁତାନପାଯଯନ୍ ॥ ୨୨ ॥

ତତୋ ନୃପୋନ୍ମର୍ଦନମଜ୍ଜଲେପନା-
ଲଙ୍କାରରକ୍ଷାତିଲକାଶନାଦିଭିଃ ।
ସଂଲାଲିତଃ ସ୍ଵାଚରିତୈଃ ପ୍ରହର୍ଷଯନ୍
ସାଯଂ ଗତୋ ଯାମଯମେନ ମାଧଵଃ ॥ ୨୩ ॥

ଗାଵସ୍ତତୋ ଗୋଷ୍ଠମୁପେତ୍ଯ ସତ୍ଵରଂ
ହୁଙ୍କାରଘୋଷୈଃ ପରିହୂତସଙ୍ଗତାନ୍ ।
ସ୍ଵକାନ୍ ସ୍ଵକାନ୍ ଵତ୍ସତରାନପାଯଯନ୍
ମୁହୁର୍ଲିହନ୍ତ୍ଯଃ ସ୍ରଵଦୌଧସଂ ପଯଃ ॥ ୨୪ ॥

ଗୋଗୋପୀନାଂ ମାତୃତାସ୍ମିନ୍ନାସୀତ୍ସ୍ନେହର୍ଧିକାଂ ଵିନା ।
ପୁରୋଵଦାସ୍ଵପି ହରେସ୍ତୋକତା ମାଯଯା ଵିନା ॥ ୨୫ ॥

ଵ୍ରଜୌକସାଂ ସ୍ଵତୋକେଷୁ ସ୍ନେହଵଲ୍ଲ୍ଯାବ୍ଦମନ୍ଵହମ୍ ।
ଶନୈର୍ନିଃସୀମ ଵଵୃଧେ ଯଥା କୃଷ୍ଣେ ତ୍ଵପୂର୍ଵଵତ୍ ॥ ୨୬ ॥

ଇତ୍ଥମାତ୍ମାତ୍ମନାତ୍ମାନଂ ଵତ୍ସପାଲମିଷେଣ ସଃ ।
ପାଲଯନ୍ ଵତ୍ସପୋ ଵର୍ଷଂ ଚିକ୍ରୀଡେ ଵନଗୋଷ୍ଠଯୋଃ ॥ ୨୭ ॥

ଏକଦା ଚାରଯନ୍ ଵତ୍ସାନ୍ସରାମୋ ଵନମାଵିଶତ୍ ।
ପଞ୍ଚଷାସୁ ତ୍ରିଯାମାସୁ ହାଯନାପୂରଣୀଷ୍ଵଜଃ ॥ ୨୮ ॥

ତତୋ ଵିଦୂରାଚ୍ଚରତୋ ଗାଵୋ ଵତ୍ସାନୁପଵ୍ରଜମ୍ ।
ଗୋଵର୍ଧନାଦ୍ରିଶିରସି ଚରନ୍ତ୍ଯୋ ଦଦୃଶୁସ୍ତୃଣମ୍ ॥ ୨୯ ॥

ଦୃଷ୍ଟ୍ଵାଥ ତତ୍ସ୍ନେହଵଶୋଽସ୍ମୃତାତ୍ମା
ସ ଗୋଵ୍ରଜୋଽତ୍ଯାତ୍ମପଦୁର୍ଗମାର୍ଗଃ ।
ଦ୍ଵିପାତ୍କକୁଦ୍ଗ୍ରୀଵ ଉଦାସ୍ଯପୁଚ୍ଛୋ-
ଽଗାଦ୍ଧୁଙ୍କୃତୈରାସ୍ରୁପଯା ଜଵେନ ॥ ୩୦ ॥

ସମେତ୍ଯ ଗାଵୋଽଧୋ ଵତ୍ସାନ୍ ଵତ୍ସଵତ୍ଯୋଽପ୍ଯପାଯଯନ୍ ।
ଗିଲନ୍ତ୍ଯ ଇଵ ଚାଙ୍ଗାନି ଲିହନ୍ତ୍ଯଃ ସ୍ଵୌଧସଂ ପଯଃ ॥ ୩୧ ॥

ଗୋପାସ୍ତଦ୍ରୋଧନାଯାସମୌଘ୍ଯଲଜ୍ଜୋରୁମନ୍ଯୁନା ।
ଦୁର୍ଗାଧ୍ଵକୃଚ୍ଛ୍ରତୋଽଭ୍ଯେତ୍ଯ ଗୋଵତ୍ସୈର୍ଦଦୃଶୁଃ ସୁତାନ୍ ॥ ୩୨ ॥

ତଦୀକ୍ଷଣୋତ୍ପ୍ରେମରସାପ୍ଲୁତାଶଯା
ଜାତାନୁରାଗା ଗତମନ୍ଯଵୋଽର୍ଭକାନ୍ ।
ଉଦୁହ୍ଯ ଦୋର୍ଭିଃ ପରିରଭ୍ଯ ମୂର୍ଧନି
ଘ୍ରାଣୈରଵାପୁଃ ପରମାଂ ମୁଦଂ ତେ ॥ ୩୩ ॥

ତତଃ ପ୍ରଵଯସୋ ଗୋପାସ୍ତୋକାଶ୍ଲେଷସୁନିର୍ଵୃତାଃ ।
କୃଚ୍ଛ୍ରାଚ୍ଛନୈରପଗତାସ୍ତଦନୁସ୍ମୃତ୍ଯୁଦଶ୍ରଵଃ ॥ ୩୪ ॥

ଵ୍ରଜସ୍ଯ ରାମଃ ପ୍ରେମର୍ଧେର୍ଵୀକ୍ଷ୍ଯୌତ୍କଣ୍ଠ୍ଯମନୁକ୍ଷଣମ୍ ।
ମୁକ୍ତସ୍ତନେଷ୍ଵପତ୍ଯେଷ୍ଵପ୍ଯହେତୁଵିଦଚିନ୍ତଯତ୍ ॥ ୩୫ ॥

କିମେତଦଦ୍ଭୁତମିଵ ଵାସୁଦେଵେଽଖିଲାତ୍ମନି ।
ଵ୍ରଜସ୍ଯ ସାତ୍ମନସ୍ତୋକେଷ୍ଵପୂର୍ଵଂ ପ୍ରେମ ଵର୍ଧତେ ॥ ୩୬ ॥

କେଯଂ ଵା କୁତ ଆଯାତା ଦୈଵୀ ଵା ନାର୍ଯୁତାସୁରୀ ।
ପ୍ରାଯୋ ମାଯାସ୍ତୁ ମେ ଭର୍ତୁର୍ନାନ୍ଯା ମେଽପି ଵିମୋହିନୀ ॥ ୩୭ ॥

ଇତି ସଞ୍ଚିନ୍ତ୍ଯ ଦାଶାର୍ହୋ ଵତ୍ସାନ୍ସଵଯସାନପି ।
ସର୍ଵାନାଚଷ୍ଟ ଵୈକୁଣ୍ଠଂ ଚକ୍ଷୁଷା ଵଯୁନେନ ସଃ ॥ ୩୮ ॥

ନୈତେ ସୁରେଶା ଋଷଯୋ ନ ଚୈତେ
ତ୍ଵମେଵ ଭାସୀଶ ଭିଦାଶ୍ରଯେଽପି ।
ସର୍ଵଂ ପୃଥକ୍ତ୍ଵଂ ନିଗମାତ୍ କଥଂ ଵଦେ-
ତ୍ଯୁକ୍ତେନ ଵୃତ୍ତଂ ପ୍ରଭୁଣା ବଲୋଽଵୈତ୍ ॥ ୩୯ ॥

ତାଵଦେତ୍ଯାତ୍ମଭୂରାତ୍ମମାନେନ ତ୍ରୁଟ୍ଯନେହସା ।
ପୁରୋଵଦାବ୍ଦଂ କ୍ରୀଡନ୍ତଂ ଦଦୃଶେ ସକଲଂ ହରିମ୍ ॥ ୪୦ ॥

ଯାଵନ୍ତୋ ଗୋକୁଲେ ବାଲାଃ ସଵତ୍ସାଃ ସର୍ଵ ଏଵ ହି ।
ମାଯାଶଯେ ଶଯାନା ମେ ନାଦ୍ଯାପି ପୁନରୁତ୍ଥିତାଃ ॥ ୪୧ ॥

ଇତ ଏତେଽତ୍ର କୁତ୍ରତ୍ଯା ମନ୍ମାଯାମୋହିତେତରେ ।
ତାଵନ୍ତ ଏଵ ତତ୍ରାବ୍ଦଂ କ୍ରୀଡନ୍ତୋ ଵିଷ୍ଣୁନା ସମମ୍ ॥ ୪୨ ॥

ଏଵମେତେଷୁ ଭେଦେଷୁ ଚିରଂ ଧ୍ଯାତ୍ଵା ସ ଆତ୍ମଭୂଃ ।
ସତ୍ଯାଃ କେ କତରେ ନେତି ଜ୍ଞାତୁଂ ନେଷ୍ଟେ କଥଞ୍ଚନ ॥ ୪୩ ॥

ଏଵଂ ସମ୍ମୋହଯନ୍ ଵିଷ୍ଣୁଂ ଵିମୋହଂ ଵିଶ୍ଵମୋହନମ୍ ।
ସ୍ଵଯୈଵ ମାଯଯାଜୋଽପି ସ୍ଵଯମେଵ ଵିମୋହିତଃ ॥ ୪୪ ॥

ତମ୍ଯାଂ ତମୋଵନ୍ନୈହାରଂ ଖଦ୍ଯୋତାର୍ଚିରିଵାହନି ।
ମହତୀତରମାଯୈଶ୍ଯଂ ନିହନ୍ତ୍ଯାତ୍ମନି ଯୁଞ୍ଜତଃ ॥ ୪୫ ॥

ତାଵତ୍ ସର୍ଵେ ଵତ୍ସପାଲାଃ ପଶ୍ଯତୋଽଜସ୍ଯ ତତ୍କ୍ଷଣାତ୍ ।
ଵ୍ଯଦୃଶ୍ଯନ୍ତ ଘନଶ୍ଯାମାଃ ପୀତକୌଶେଯଵାସସଃ ॥ ୪୬ ॥

ଚତୁର୍ଭୁଜାଃ ଶଙ୍ଖଚକ୍ରଗଦାରାଜୀଵପାଣଯଃ ।
କିରୀଟିନଃ କୁଣ୍ଡଲିନୋ ହାରିଣୋ ଵନମାଲିନଃ ॥ ୪୭ ॥

ଶ୍ରୀଵତ୍ସାଙ୍ଗଦଦୋରତ୍ନକମ୍ବୁକଙ୍କଣପାଣଯଃ ।
ନୂପୁରୈଃ କଟକୈର୍ଭାତାଃ କଟିସୂତ୍ରାଙ୍ଗୁଲୀଯକୈଃ ॥ ୪୮ ॥

ଆଙ୍ଘ୍ରିମସ୍ତକମାପୂର୍ଣାସ୍ତୁଲସୀନଵଦାମଭିଃ ।
କୋମଲୈଃ ସର୍ଵଗାତ୍ରେଷୁ ଭୂରିପୁଣ୍ଯଵଦର୍ପିତୈଃ ॥ ୪୯ ॥

ଚନ୍ଦ୍ରିକାଵିଶଦସ୍ମେରୈଃ ସାରୁଣାପାଙ୍ଗଵୀକ୍ଷିତୈଃ ।
ସ୍ଵକାର୍ଥାନାମିଵ ରଜଃସତ୍ତ୍ଵାଭ୍ଯାଂ ସ୍ରଷ୍ଟୃପାଲକାଃ ॥ ୫୦ ॥

ଆତ୍ମାଦିସ୍ତମ୍ବପର୍ଯନ୍ତୈର୍ମୂର୍ତିମଦ୍ଭିଶ୍ଚରାଚରୈଃ ।
ନୃତ୍ଯଗୀତାଦ୍ଯନେକାର୍ହୈଃ ପୃଥକ୍ପୃଥଗୁପାସିତାଃ ॥ ୫୧ ॥

ଅଣିମାଦ୍ଯୈର୍ମହିମଭିରଜାଦ୍ଯାଭିର୍ଵିଭୂତିଭିଃ ।
ଚତୁର୍ଵିଂଶତିଭିସ୍ତତ୍ତ୍ଵୈଃ ପରୀତା ମହଦାଦିଭିଃ ॥ ୫୨ ॥

କାଲସ୍ଵଭାଵସଂସ୍କାରକାମକର୍ମଗୁଣାଦିଭିଃ ।
ସ୍ଵମହିଧ୍ଵସ୍ତମହିଭିର୍ମୂର୍ତିମଦ୍ଭିରୁପାସିତାଃ ॥ ୫୩ ॥

ସତ୍ଯଜ୍ଞାନାନନ୍ତାନନ୍ଦମାତ୍ରୈକରସମୂର୍ତଯଃ ।
ଅସ୍ପୃଷ୍ଟଭୂରିମାହାତ୍ମ୍ଯା ଅପି ହ୍ଯୁପନିଷଦ୍ଦୃଶାମ୍ ॥ ୫୪ ॥

ଏଵଂ ସକୃଦ୍ ଦଦର୍ଶାଜଃ ପରବ୍ରହ୍ମାତ୍ମନୋଽଖିଲାନ୍ ।
ଯସ୍ଯ ଭାସା ସର୍ଵମିଦଂ ଵିଭାତି ସଚରାଚରମ୍ ॥ ୫୫ ॥

ତତୋଽତିକୁତୁକୋଦ୍ଵୃତ୍ଯସ୍ତିମିତୈକାଦଶେନ୍ଦ୍ରିଯଃ ।
ତଦ୍ଧାମ୍ନାଭୂଦଜସ୍ତୂଷ୍ଣୀଂ ପୂର୍ଦେଵ୍ଯନ୍ତୀଵ ପୁତ୍ରିକା ॥ ୫୬ ॥

ଇତୀରେଶେଽତର୍କ୍ଯେ ନିଜମହିମନି ସ୍ଵପ୍ରମିତିକେ
ପରତ୍ରାଜାତୋଽତନ୍ନିରସନମୁଖବ୍ରହ୍ମକମିତୌ ।
ଅନୀଶେଽପି ଦ୍ରଷ୍ଟୁଂ କିମିଦମିତି ଵା ମୁହ୍ଯତି ସତି
ଚଚ୍ଛାଦାଜୋ ଜ୍ଞାତ୍ଵା ସପଦି ପରମୋଽଜାଜଵନିକାମ୍ ॥ ୫୭ ॥

ତତୋଽର୍ଵାକ୍ପ୍ରତିଲବ୍ଧାକ୍ଷଃ କଃ ପରେତଵଦୁତ୍ଥିତଃ ।
କୃଚ୍ଛ୍ରାଦୁନ୍ମୀଲ୍ଯ ଵୈ ଦୃଷ୍ଟୀରାଚଷ୍ଟେଦଂ ସହାତ୍ମନା ॥ ୫୮ ॥

ସପଦ୍ଯେଵାଭିତଃ ପଶ୍ଯନ୍ ଦିଶୋଽପଶ୍ଯତ୍ପୁରଃସ୍ଥିତମ୍ ।
ଵୃନ୍ଦାଵନଂ ଜନାଜୀଵ୍ଯଦ୍ରୁମାକୀର୍ଣଂ ସମାପ୍ରିଯମ୍ ॥ ୫୯ ॥

ଯତ୍ର ନୈସର୍ଗଦୁର୍ଵୈରାଃ ସହାସନ୍ ନୃମୃଗାଦଯଃ ।
ମିତ୍ରାଣୀଵାଜିତାଵାସଦ୍ରୁତରୁଟ୍ତର୍ଷକାଦିକମ୍ ॥ ୬୦ ॥

ତତ୍ରୋଦ୍ଵହତ୍ ପଶୁପଵଂଶଶିଶୁତ୍ଵନାଟ୍ଯଂ
ବ୍ରହ୍ମାଦ୍ଵଯଂ ପରମନନ୍ତମଗାଧବୋଧମ୍ ।
ଵତ୍ସାନ୍ ସଖୀନିଵ ପୁରା ପରିତୋ ଵିଚିନ୍ଵ-
ଦେକଂ ସପାଣିକଵଲଂ ପରମେଷ୍ଠ୍ଯଚଷ୍ଟ ॥ ୬୧ ॥

ଦୃଷ୍ଟ୍ଵା ତ୍ଵରେଣ ନିଜଧୋରଣତୋଽଵତୀର୍ଯ
ପୃଥ୍ଵ୍ଯାଂ ଵପୁଃ କନକଦଣ୍ଡମିଵାଭିପାତ୍ଯ ।
ସ୍ପୃଷ୍ଟ୍ଵା ଚତୁର୍ମୁକୁଟକୋଟିଭିରଙ୍ଘ୍ରିଯୁଗ୍ମଂ
ନତ୍ଵା ମୁଦଶ୍ରୁସୁଜଲୈରକୃତାଭିଷେକମ୍ ॥ ୬୨ ॥

ଉତ୍ଥାଯୋତ୍ଥାଯ କୃଷ୍ଣସ୍ଯ ଚିରସ୍ଯ ପାଦଯୋଃ ପତନ୍ ।
ଆସ୍ତେ ମହିତ୍ଵଂ ପ୍ରାଗ୍ଦୃଷ୍ଟଂ ସ୍ମୃତ୍ଵା ସ୍ମୃତ୍ଵା ପୁନଃ ପୁନଃ ॥ ୬୩ ॥

ଶନୈରଥୋତ୍ଥାଯ ଵିମୃଜ୍ଯ ଲୋଚନେ
ମୁକୁନ୍ଦମୁଦ୍ଵୀକ୍ଷ୍ଯ ଵିନମ୍ରକନ୍ଧରଃ ।
କୃତାଞ୍ଜଲିଃ ପ୍ରଶ୍ରଯଵାନ୍ ସମାହିତଃ
ସଵେପଥୁର୍ଗଦ୍ଗଦଯୈଲତେଲଯା ॥ ୬୪ ॥
ଜ୍ଞାନେ ପ୍ରଯାସମୁଦପାସ୍ଯ ନମନ୍ତ ଏଵ
ଜୀଵନ୍ତି ସନ୍ମୁଖରିତାଂ ଭଵଦୀଯଵାର୍ତାମ୍ ।
ସ୍ଥାନେ ସ୍ଥିତାଃ ଶ୍ରୁତିଗତାଂ ତନୁଵାଙ୍ମନୋଭି-
ର୍ଯେ ପ୍ରାଯଶୋଽଜିତ ଜିତୋଽପ୍ଯସି ତୈସ୍ତ୍ରିଲୋକ୍ଯାମ୍ ॥