শ্ৰীবাদৰাযণিৰুৱাচ
একাদশ্যাং নিৰাহাৰঃ সমভ্যৰ্চ্য জনাৰ্দনম্ । স্নাতুং নন্দস্তু কালিন্দ্যাং দ্ৱাদশ্যাং জলমাৱিশত্ ॥ ১ ॥
একাদশ্যাং নিৰাহাৰঃ সমভ্যৰ্চ্য জনাৰ্দনম্ । স্নাতুং নন্দস্তু কালিন্দ্যাং দ্ৱাদশ্যাং জলমাৱিশত্ ॥ ১ ॥
তং গৃহীত্ৱানযদ্ ভৃত্যো ৱৰুণস্যাসুৰোঽন্তিকম্ । অৱজ্ঞাযাসুৰীং ৱেলাং প্ৰৱিষ্টমুদকং নিশি ॥ ২ ॥
চুক্ৰুশুস্তমপশ্যন্তঃ কৃষ্ণ ৰামেতি গোপকাঃ । ভগৱাংস্তদুপশ্ৰুত্য পিতৰং ৱৰুণাহৃতম্ । তদন্তিকং গতো ৰাজন্স্ৱানামভযদো ৱিভুঃ ॥ ৩ ॥
প্ৰাপ্তং ৱীক্ষ্য হৃষীকেশং লোকপালঃ সপৰ্যযা । মহত্যা পূজযিত্ৱাহ তদ্দৰ্শনমহোত্সৱঃ ॥ ৪ ॥
শ্ৰীৱৰুণ উৱাচ
অদ্য মে নিভৃতো দেহোঽদ্যৈৱাৰ্থোঽধিগতঃ প্ৰভো । ত্ৱত্পাদভাজো ভগৱন্নৱাপুঃ পাৰমধ্ৱনঃ ॥ ৫ ॥
অদ্য মে নিভৃতো দেহোঽদ্যৈৱাৰ্থোঽধিগতঃ প্ৰভো । ত্ৱত্পাদভাজো ভগৱন্নৱাপুঃ পাৰমধ্ৱনঃ ॥ ৫ ॥
নমস্তুভ্যং ভগৱতে ব্ৰহ্মণে পৰমাত্মনে । ন যত্ৰ শ্ৰূযতে মাযা লোকসৃষ্টিৱিকল্পনা ॥ ৬ ॥
অজানতা মামকেন মূঢেনাকাৰ্যৱেদিনা । আনীতোঽযং তৱ পিতা তদ্ভৱান্ ক্ষন্তুমৰ্হতি ॥ ৭ ॥
মমাপ্যনুগ্ৰহং কৃষ্ণ কৰ্তুমৰ্হস্যশেষদৃক্ । গোৱিন্দ নীযতামেষ পিতা তে পিতৃৱত্সল ॥ ৮ ॥
শ্ৰীশুক উৱাচ
এৱং প্ৰসাদিতঃ কৃষ্ণো ভগৱানীশ্ৱৰেশ্ৱৰঃ । আদাযাগত্স্ৱপিতৰং বন্ধূনাং চাৱহন্মুদম্ ॥ ৯ ॥
এৱং প্ৰসাদিতঃ কৃষ্ণো ভগৱানীশ্ৱৰেশ্ৱৰঃ । আদাযাগত্স্ৱপিতৰং বন্ধূনাং চাৱহন্মুদম্ ॥ ৯ ॥
নন্দস্ত্ৱতীন্দ্ৰিযং দৃষ্ট্ৱা লোকপালমহোদযম্ । কৃষ্ণে চ সন্নতিং তেষাং জ্ঞাতিভ্যো ৱিস্মিতোঽব্ৰৱীত্ ॥ ১০ ॥
তে চৌত্সুক্যধিযো ৰাজন্ মত্ৱা গোপাস্তমীশ্ৱৰম্ । অপি নঃ স্ৱগতিং সূক্ষ্মামুপাধাস্যদধীশ্ৱৰঃ ॥ ১১ ॥
ইতি স্ৱানাং স ভগৱান্ ৱিজ্ঞাযাখিলদৃক্স্ৱযম্ । সঙ্কল্পসিদ্ধযে তেষাং কৃপযৈতদচিন্তযত্ ॥ ১২ ॥
জনো ৱৈ লোক এতস্মিন্নৱিদ্যাকামকৰ্মভিঃ । উচ্চাৱচাসু গতিষু ন ৱেদ স্ৱাং গতিং ভ্ৰমন্ ॥ ১৩ ॥
ইতি সঞ্চিন্ত্য ভগৱান্ মহাকাৰুণিকো হৰিঃ । দৰ্শযামাস লোকং স্ৱং গোপানাং তমসঃ পৰম্ ॥ ১৪ ॥
সত্যং জ্ঞানমনন্তং যদ্ ব্ৰহ্মজ্যোতিঃ সনাতনম্ । যদ্ধি পশ্যন্তি মুনযো গুণাপাযে সমাহিতাঃ ॥ ১৫ ॥
তে তু ব্ৰহ্মহ্ৰদং নীতা মগ্নাঃ কৃষ্ণেন চোদ্ধৃতাঃ । দদৃশুৰ্ব্ৰহ্মণো লোকং যত্ৰাক্ৰূৰোঽধ্যগাত্ পুৰা ॥ ১৬ ॥
নন্দাদযস্তু তং দৃষ্ট্ৱা পৰমানন্দনিৱৃতাঃ । কৃষ্ণং চ তত্ৰচ্ছন্দোভিঃ স্তূযমানং সুৱিস্মিতাঃ ॥ ১৭ ॥