శ్రీబాదరాయణిరువాచ
ఏకాదశ్యాం నిరాహారః సమభ్యర్చ్య జనార్దనమ్ । స్నాతుం నన్దస్తు కాలిన్ద్యాం ద్వాదశ్యాం జలమావిశత్ ॥ ౧ ॥
ఏకాదశ్యాం నిరాహారః సమభ్యర్చ్య జనార్దనమ్ । స్నాతుం నన్దస్తు కాలిన్ద్యాం ద్వాదశ్యాం జలమావిశత్ ॥ ౧ ॥
తం గృహీత్వానయద్ భృత్యో వరుణస్యాసురోఽన్తికమ్ । అవజ్ఞాయాసురీం వేలాం ప్రవిష్టముదకం నిశి ॥ ౨ ॥
చుక్రుశుస్తమపశ్యన్తః కృష్ణ రామేతి గోపకాః । భగవాంస్తదుపశ్రుత్య పితరం వరుణాహృతమ్ । తదన్తికం గతో రాజన్స్వానామభయదో విభుః ॥ ౩ ॥
ప్రాప్తం వీక్ష్య హృషీకేశం లోకపాలః సపర్యయా । మహత్యా పూజయిత్వాహ తద్దర్శనమహోత్సవః ॥ ౪ ॥
శ్రీవరుణ ఉవాచ
అద్య మే నిభృతో దేహోఽద్యైవార్థోఽధిగతః ప్రభో । త్వత్పాదభాజో భగవన్నవాపుః పారమధ్వనః ॥ ౫ ॥
అద్య మే నిభృతో దేహోఽద్యైవార్థోఽధిగతః ప్రభో । త్వత్పాదభాజో భగవన్నవాపుః పారమధ్వనః ॥ ౫ ॥
నమస్తుభ్యం భగవతే బ్రహ్మణే పరమాత్మనే । న యత్ర శ్రూయతే మాయా లోకసృష్టివికల్పనా ॥ ౬ ॥
అజానతా మామకేన మూఢేనాకార్యవేదినా । ఆనీతోఽయం తవ పితా తద్భవాన్ క్షన్తుమర్హతి ॥ ౭ ॥
మమాప్యనుగ్రహం కృష్ణ కర్తుమర్హస్యశేషదృక్ । గోవిన్ద నీయతామేష పితా తే పితృవత్సల ॥ ౮ ॥
శ్రీశుక ఉవాచ
ఏవం ప్రసాదితః కృష్ణో భగవానీశ్వరేశ్వరః । ఆదాయాగత్స్వపితరం బన్ధూనాం చావహన్ముదమ్ ॥ ౯ ॥
ఏవం ప్రసాదితః కృష్ణో భగవానీశ్వరేశ్వరః । ఆదాయాగత్స్వపితరం బన్ధూనాం చావహన్ముదమ్ ॥ ౯ ॥
నన్దస్త్వతీన్ద్రియం దృష్ట్వా లోకపాలమహోదయమ్ । కృష్ణే చ సన్నతిం తేషాం జ్ఞాతిభ్యో విస్మితోఽబ్రవీత్ ॥ ౧౦ ॥
తే చౌత్సుక్యధియో రాజన్ మత్వా గోపాస్తమీశ్వరమ్ । అపి నః స్వగతిం సూక్ష్మాముపాధాస్యదధీశ్వరః ॥ ౧౧ ॥
ఇతి స్వానాం స భగవాన్ విజ్ఞాయాఖిలదృక్స్వయమ్ । సఙ్కల్పసిద్ధయే తేషాం కృపయైతదచిన్తయత్ ॥ ౧౨ ॥
జనో వై లోక ఏతస్మిన్నవిద్యాకామకర్మభిః । ఉచ్చావచాసు గతిషు న వేద స్వాం గతిం భ్రమన్ ॥ ౧౩ ॥
ఇతి సఞ్చిన్త్య భగవాన్ మహాకారుణికో హరిః । దర్శయామాస లోకం స్వం గోపానాం తమసః పరమ్ ॥ ౧౪ ॥
సత్యం జ్ఞానమనన్తం యద్ బ్రహ్మజ్యోతిః సనాతనమ్ । యద్ధి పశ్యన్తి మునయో గుణాపాయే సమాహితాః ॥ ౧౫ ॥
తే తు బ్రహ్మహ్రదం నీతా మగ్నాః కృష్ణేన చోద్ధృతాః । దదృశుర్బ్రహ్మణో లోకం యత్రాక్రూరోఽధ్యగాత్ పురా ॥ ౧౬ ॥
నన్దాదయస్తు తం దృష్ట్వా పరమానన్దనివృతాః । కృష్ణం చ తత్రచ్ఛన్దోభిః స్తూయమానం సువిస్మితాః ॥ ౧౭ ॥