শ্রীমদ্ভাগবতম্ ১০.৩৩

শ্রীশুক উবাচ
ইত্থং ভগবতো গোপ্যঃ শ্রুত্বা বাচঃ সুপেশলাঃ ।
জহুর্বিরহজং তাপং তদঙ্গোপচিতাশিষঃ ॥ ১ ॥

তত্রারভত গোবিন্দো রাসক্রীডামনুব্রতৈঃ ।
স্ত্রীরত্নৈরন্বিতঃ প্রীতৈরন্যোন্যাবদ্ধবাহুভিঃ ॥ ২ ॥

রাসোত্সবঃ সম্প্রবৃত্তো গোপীমণ্ডলমণ্ডিতঃ ।
যোগেশ্বরেণ কৃষ্ণেন তাসাং মধ্যে দ্বযোর্দ্বযোঃ ।
প্রবিষ্টেন গৃহীতানাং কণ্ঠে স্বনিকটং স্ত্রিযঃ ।
যং মন্যেরন্ নভস্তাবদ্ বিমানশতসঙ্কুলম্ ।
দিবৌকসাং সদারাণামৌত্সুক্যাপহৃতাত্মনাম্ ॥ ৩ ॥

ততো দুন্দুভযো নেদুর্নিপেতুঃ পুষ্পবৃষ্টযঃ ।
জগুর্গন্ধর্বপতযঃ সস্ত্রীকাস্তদ্যশোঽমলম্ ॥ ৪ ॥

বলযানাং নূপুরাণাং কিঙ্কিণীনাং চ যোষিতাম্ ।
সপ্রিযাণামভূচ্ছব্দস্তুমুলো রাসমণ্ডলে ॥ ৫ ॥

তত্রাতিশুশুভে তাভির্ভগবান্ দেবকীসুতঃ ।
মধ্যে মণীনাং হৈমানাং মহামরকতো যথা ॥ ৬ ॥

পাদন্যাসৈর্ভুজবিধুতিভিঃ সস্মিতৈর্ভ্রূবিলাসৈ-
র্ভজ্যন্মধ্যৈশ্চলকুচপটৈঃ কুণ্ডলৈর্গণ্ডলোলৈঃ ।
স্বিদ্যন্মুখ্যঃ কবররসনাগ্রন্থযঃ কৃষ্ণবধ্বো
গাযন্ত্যস্তং তডিত ইব তা মেঘচক্রে বিরেজুঃ ॥ ৭ ॥

উচ্চৈর্জগুর্নৃত্যমানা রক্তকণ্ঠ্যো রতিপ্রিযাঃ ।
কৃষ্ণাভিমর্শমুদিতা যদ্গীতেনেদমাবৃতম্ ॥ ৮ ॥

কাচিত্ সমং মুকুন্দেন স্বরজাতীরমিশ্রিতাঃ ।
উন্নিন্যে পূজিতা তেন প্রীযতা সাধু সাধ্বিতি ।
তদেব ধ্রুবমুন্নিন্যে তস্যৈ মানং চ বহ্বদাত্ ॥ ৯ ॥

কাচিদ্ রাসপরিশ্রান্তা পার্শ্বস্থস্য গদাভৃতঃ ।
জগ্রাহ বাহুনা স্কন্ধং শ্লথদ্বলযমল্লিকা ॥ ১০ ॥

তত্রৈকাংসগতং বাহুং কৃষ্ণস্যোত্পলসৌরভম্ ।
চন্দনালিপ্তমাঘ্রায হৃষ্টরোমা চুচুম্ব হ ॥ ১১ ॥

কস্যাশ্চিন্নাট্যবিক্ষিপ্ত কুণ্ডলত্বিষমণ্ডিতম্ ।
গণ্ডং গণ্ডে সন্দধত্যাঃ প্রাদাত্তাম্বূলচর্বিতম্ ॥ ১২ ॥

নৃত্যতী গাযতী কাচিত্ কূজন্নূপুরমেখলা ।
পার্শ্বস্থাচ্যুতহস্তাব্জং শ্রান্তাধাত্স্তনযোঃ শিবম্ ॥ ১৩ ॥

গোপ্যো লব্ধ্বাচ্যুতং কান্তং শ্রিয একান্তবল্লভম্ ।
গৃহীতকণ্ঠ্যস্তদ্দোর্ভ্যাং গাযন্ত্যস্তং বিজহ্রিরে ॥ ১৪ ॥

কর্ণোত্পলালকবিটঙ্ককপোলঘর্ম-
বক্ত্রশ্রিযো বলযনূপুরঘোষবাদ্যৈঃ ।
গোপ্যঃ সমং ভগবতা ননৃতুঃ স্বকেশ-
স্রস্তস্রজো ভ্রমরগাযকরাসগোষ্ঠ্যাম্ ॥ ১৫ ॥

এবং পরিষ্বঙ্গকরাভিমর্শ-
স্নিগ্ধেক্ষণোদ্দামবিলাসহাসৈঃ ।
রেমে রমেশো ব্রজসুন্দরীভি-
র্যথার্ভকঃ স্বপ্রতিবিম্ববিভ্রমঃ ॥ ১৬ ॥

তদঙ্গসঙ্গপ্রমুদাকুলেন্দ্রিযাঃ
কেশান্ দুকূলং কুচপট্টিকাং বা ।
নাঞ্জঃ প্রতিব্যোঢুমলং ব্রজস্ত্রিযো
বিস্রস্তমালাভরণাঃ কুরূদ্বহ ॥ ১৭ ॥

কৃষ্ণবিক্রীডিতং বীক্ষ্য মুমুহুঃ খেচরস্ত্রিযঃ ।
কামার্দিতাঃ শশাঙ্কশ্চ সগণো বিস্মিতোঽভবত্ ॥ ১৮ ॥

কৃত্বা তাবন্তমাত্মানং যাবতীর্গোপযোষিতঃ ।
রেমে স ভগবাংস্তাভিরাত্মারামোঽপি লীলযা ॥ ১৯ ॥

তাসাং রতিবিহারেণ শ্রান্তানাং বদনানি সঃ ।
প্রামৃজত্ করুণঃ প্রেম্ণা শন্তমেনাঙ্গ পাণিনা ॥ ২০ ॥

গোপ্যঃ স্ফুরত্পুরটকুণ্ডলকুন্তলত্বিড্-
গণ্ডশ্রিযা সুধিতহাসনিরীক্ষণেন ।
মানং দধত্য ঋষভস্য জগুঃ কৃতানি
পুণ্যানি তত্কররুহস্পর্শপ্রমোদাঃ ॥ ২১ ॥

তাভির্যুতঃ শ্রমমপোহিতুমঙ্গসঙ্গ-
ঘৃষ্টস্রজঃ স কুচকুঙ্কুমরঞ্জিতাযাঃ ।
গন্ধর্বপালিভিরনুদ্রুত আবিশদ্ বাঃ
শ্রান্তো গজীভিরিভরাডিব ভিন্নসেতুঃ ॥ ২২ ॥

সোঽম্ভস্যলং যুবতিভিঃ পরিষিচ্যমানঃ
প্রেম্ণেক্ষিতঃ প্রহসতীভিরিতস্ততোঽঙ্গ ।
বৈমানিকৈঃ কুসুমবর্ষিভিরীড্যমানো
রেমে স্বযং স্বরতিরত্র গজেন্দ্রলীলঃ ॥ ২৩ ॥

ততশ্চ কৃষ্ণোপবনে জলস্থল-
প্রসূনগন্ধানিলজুষ্টদিক্তটে ।
চচার ভৃঙ্গপ্রমদাগণাবৃতো
যথা মদচ্যুদ্ দ্বিরদঃ করেণুভিঃ ॥ ২৪ ॥

এবং শশাঙ্কাংশুবিরাজিতা নিশাঃ
স সত্যকামোঽনুরতাবলাগণঃ ।
সিষেব আত্মন্যবরুদ্ধসৌরতঃ
সর্বাঃ শরত্কাব্যকথারসাশ্রযাঃ ॥ ২৫ ॥

শ্রীপরীক্ষিদুবাচ
সংস্থাপনায ধর্মস্য প্রশমাযেতরস্য চ ।
অবতীর্ণো হি ভগবানংশেন জগদীশ্বরঃ ॥ ২৬ ॥

স কথং ধর্মসেতূনাং বক্তা কর্তাভিরক্ষিতা ।
প্রতীপমাচরদ্ ব্রহ্মন্ পরদারাভিমর্শনম্ ॥ ২৭ ॥

আপ্তকামো যদুপতিঃ কৃতবান্বৈ জুগুপ্সিতম্ ।
কিমভিপ্রায এতন্নঃ শংশযং ছিন্ধি সুব্রত ॥ ২৮ ॥

শ্রীশুক উবাচ
ধর্মব্যতিক্রমো দৃষ্ট ঈশ্বরাণাং চ সাহসম্ ।
তেজীযসাং ন দোষায বহ্নেঃ সর্বভুজো যথা ॥ ২৯ ॥

নৈতত্ সমাচরেজ্জাতু মনসাপি হ্যনীশ্বরঃ ।
বিনশ্যত্যাচরন্ মৌঢ্যাদ্যথারুদ্রোঽব্ধিজং বিষম্ ॥ ৩০ ॥

ঈশ্বরাণাং বচঃ সত্যং তথৈবাচরিতং ক্বচিত্ ।
তেষাং যত্ স্ববচোযুক্তং বুদ্ধিমাংস্তত্ সমাচরেত্ ॥ ৩১ ॥

কুশলাচরিতেনৈষামিহ স্বার্থো ন বিদ্যতে ।
বিপর্যযেণ বানর্থো নিরহঙ্কারিণাং প্রভো ॥ ৩২ ॥

কিমুতাখিলসত্ত্বানাং তির্যঙ্মর্ত্যদিবৌকসাম্ ।
ঈশিতুশ্চেশিতব্যানাং কুশলাকুশলান্বযঃ ॥ ৩৩ ॥

যত্পাদপঙ্কজপরাগনিষেবতৃপ্তা
যোগপ্রভাববিধুতাখিলকর্মবন্ধাঃ ।
স্বৈরং চরন্তি মুনযোঽপি ন নহ্যমানা-
স্তস্যেচ্ছযাত্তবপুষঃ কুত এব বন্ধঃ ॥ ৩৪ ॥

গোপীনাং তত্পতীনাং চ সর্বেষামেব দেহিনাম্ ।
যোঽন্তশ্চরতি সোঽধ্যক্ষঃ ক্রীডনেনেহ দেহভাক্ ॥ ৩৫ ॥

অনুগ্রহায ভক্তানাং মানুষং দেহমাস্থিতঃ ।
ভজতে তাদৃশীঃ ক্রীডা যাঃ শ্রুত্বা তত্পরো ভবেত্ ॥ ৩৬ ॥

নাসূযন্ খলু কৃষ্ণায মোহিতাস্তস্য মাযযা ।
মন্যমানাঃ স্বপার্শ্বস্থান্স্বান্স্বান্দারান্ ব্রজৌকসঃ ॥ ৩৭ ॥

ব্রহ্মরাত্র উপাবৃত্তে বাসুদেবানুমোদিতাঃ ।
অনিচ্ছন্ত্যো যযুর্গোপ্যঃ স্বগৃহান্ভগবত্প্রিযাঃ ॥ ৩৮ ॥

বিক্রীডিতং ব্রজবধূভিরিদং চ বিষ্ণোঃ
শ্রদ্ধান্বিতোঽনুশৃণুযাদথ বর্ণযেদ্ যঃ ।
ভক্তিং পরাং ভগবতি প্রতিলভ্য কামং
হৃদ্রোগমাশ্বপহিনোত্যচিরেণ ধীরঃ ॥ ৩৯ ॥