শ্রীশুক উবাচ
অথ কৃষ্ণশ্চ রামশ্চ কৃতশৌচৌ পরন্তপ । মল্লদুন্দুভিনির্ঘোষং শ্রুত্বা দ্রষ্টুমুপেযতুঃ ॥ ১ ॥
অথ কৃষ্ণশ্চ রামশ্চ কৃতশৌচৌ পরন্তপ । মল্লদুন্দুভিনির্ঘোষং শ্রুত্বা দ্রষ্টুমুপেযতুঃ ॥ ১ ॥
রঙ্গদ্বারং সমাসাদ্য তস্মিন্ নাগমবস্থিতম্ । অপশ্যত্কুবলযাপীডং কৃষ্ণোঽম্বষ্ঠপ্রচোদিতম্ ॥ ২ ॥
বদ্ধ্বা পরিকরং শৌরিঃ সমুহ্য কুটিলালকান্ । উবাচহস্তিপং বাচা মেঘনাদগভীরযা ॥ ৩ ॥
অম্বষ্ঠাম্বষ্ঠ মার্গং নৌ দেহ্যপক্রম মা চিরম্ । নো চেত্ সকুঞ্জরং ত্বাদ্য নযামি যমসাদনম্ ॥ ৪ ॥
এবং নির্ভর্ত্সিতোঽম্বষ্ঠঃ কুপিতঃ কোপিতং গজম্ । চোদযামাস কৃষ্ণায কালান্তকযমোপমম্ ॥ ৫ ॥
করীন্দ্রস্তমভিদ্রুত্য করেণ তরসাগ্রহীত্ । করাদ্বিগলিতঃ সোঽমুং নিহত্যাঙ্ঘ্রিষ্বলীযত ॥ ৬ ॥
সঙ্ক্রুদ্ধস্তমচক্ষাণো ঘ্রাণদৃষ্টিঃ স কেশবম্ । পরামৃশত্ পুষ্করেণ স প্রসহ্য বিনির্গতঃ ॥ ৭ ॥
পুচ্ছে প্রগৃহ্যাতিবলং ধনুষঃ পঞ্চবিংশতিম্ । বিচকর্ষ যথা নাগং সুপর্ণ ইব লীলযা ॥ ৮ ॥
স পর্যাবর্তমানেন সব্যদক্ষিণতোঽচ্যুতঃ । বভ্রাম ভ্রাম্যমাণেন গোবত্সেনেব বালকঃ ॥ ৯ ॥
ততোঽভিমুখমভ্যেত্য পাণিনাহত্য বারণম্ । প্রাদ্রবন্ পাতযামাস স্পৃশ্যমানঃ পদে পদে ॥ ১০ ॥
স ধাবন্ ক্রীডযা ভূমৌ পতিত্বা সহসোত্থিতঃ । তং মত্বা পতিতং ক্রুদ্ধো দন্তাভ্যাং সোঽহনত্ক্ষিতিম্ ॥ ১১ ॥
স্ববিক্রমে প্রতিহতে কুঞ্জরেন্দ্রোঽত্যমর্ষিতঃ । চোদ্যমানো মহামাত্রৈঃ কৃষ্ণমভ্যদ্রবদ্ রুষা ॥ ১২ ॥
তমাপতন্তমাসাদ্য ভগবান্ মধুসূদনঃ । নিগৃহ্য পাণিনা হস্তং পাতযামাস ভূতলে ॥ ১৩ ॥
পতিতস্য পদাক্রম্য মৃগেন্দ্র ইব লীলযা । দন্তমুত্পাট্য তেনেভং হস্তিপাংশ্চাহনদ্ধরিঃ ॥ ১৪ ॥
মৃতকং দ্বিপমুত্সৃজ্য দন্তপাণিঃ সমাবিশত্ । অংসন্যস্তবিষাণোঽসৃঙ্মদবিন্দুভিরঙ্কিতঃ । বিরূঢস্বেদকণিকাবদনাম্বুরুহো বভৌ ॥ ১৫ ॥
বৃতৌ গোপৈঃ কতিপযৈর্বলদেবজনার্দনৌ । রঙ্গং বিবিশতূ রাজন্ গজদন্তবরাযুধৌ ॥ ১৬ ॥
মল্লানামশনির্নৃণাং নরবরঃ স্ত্রীণাং স্মরো মূর্তিমান্গোপানাং স্বজনোঽসতাং ক্ষিতিভুজাং শাস্তা স্বপিত্রোঃ শিশুঃ । মৃত্যুর্ভোজপতের্বিরাডবিদুষাং তত্ত্বং পরং যোগিনাংবৃষ্ণীনাং পরদেবতেতি বিদিতো রঙ্গং গতঃ সাগ্রজঃ ॥ ১৭ ॥
হতং কুবলযাপীডং দৃষ্ট্বা তাবপি দুর্জযৌ । কংসো মনস্যপি তদা ভৃশমুদ্বিবিজে নৃপ ॥ ১৮ ॥
তৌ রেজতূ রঙ্গগতৌ মহাভুজৌবিচিত্রবেষাভরণস্রগম্বরৌ । যথা নটাবুত্তমবেষধারিণৌমনঃ ক্ষিপন্তৌ প্রভযা নিরীক্ষতাম্ ॥ ১৯ ॥
নিরীক্ষ্য তাবুত্তমপূরুষৌ জনামঞ্চস্থিতা নাগররাষ্ট্রকা নৃপ । প্রহর্ষবেগোত্কলিতেক্ষণাননাঃপপুর্ন তৃপ্তা নযনৈস্তদাননম্ ॥ ২০ ॥
পিবন্ত ইব চক্ষুর্ভ্যাং লিহন্ত ইব জিহ্বযা । জিঘ্রন্ত ইব নাসাভ্যাং শ্লিষ্যন্ত ইব বাহুভিঃ ॥ ২১ ॥
ঊচুঃ পরস্পরং তে বৈ যথাদৃষ্টং যথাশ্রুতম্ । তদ্রূপগুণমাধুর্যপ্রাগল্ভ্যস্মারিতা ইব ॥ ২২ ॥
এতৌ ভগবতঃ সাক্ষাদ্ধরের্নারাযণস্য হি । অবতীর্ণাবিহাংশেন বসুদেবস্য বেশ্মনি ॥ ২৩ ॥
এষ বৈ কিল দেবক্যাং জাতো নীতশ্চ গোকুলম্ । কালমেতং বসন্ গূঢো ববৃধে নন্দবেশ্মনি ॥ ২৪ ॥
পূতনানেন নীতান্তং চক্রবাতশ্চ দানবঃ । অর্জুনৌ গুহ্যকঃ কেশী ধেনুকোঽন্যে চ তদ্বিধাঃ ॥ ২৫ ॥
গাবঃ সপালা এতেন দাবাগ্নেঃ পরিমোচিতাঃ । কালিযো দমিতঃ সর্প ইন্দ্রশ্চ বিমদঃ কৃতঃ ॥ ২৬ ॥
সপ্তাহমেকহস্তেন ধৃতোঽদ্রিপ্রবরোঽমুনা । বর্ষবাতাশনিভ্যশ্চ পরিত্রাতং চ গোকুলম্ ॥ ২৭ ॥
গোপ্যোঽস্য নিত্যমুদিতহসিতপ্রেক্ষণং মুখম্ । পশ্যন্ত্যো বিবিধাংস্তাপাংস্তরন্তি স্মাশ্রমং মুদা ॥ ২৮ ॥
বদন্ত্যনেন বংশোঽযং যদোঃ সুবহুবিশ্রুতঃ । শ্রিযং যশো মহত্বং চ লপ্স্যতে পরিরক্ষিতঃ ॥ ২৯ ॥
অযং চাস্যাগ্রজঃ শ্রীমান্রামঃ কমললোচনঃ । প্রলম্বো নিহতো যেন বত্সকো যে বকাদযঃ ॥ ৩০ ॥
জনেষ্বেবং ব্রুবাণেষু তূর্যেষু নিনদত্সু চ । কৃষ্ণরামৌ সমাভাষ্য চাণূরো বাক্যমব্রবীত্ ॥ ৩১ ॥
হে নন্দসূনো হে রাম ভবন্তৌ বীরসম্মতৌ । নিযুদ্ধকুশলৌ শ্রুত্বা রাজ্ঞাহূতৌ দিদৃক্ষুণা ॥ ৩২ ॥
প্রিযং রাজ্ঞঃ প্রকুর্বত্যঃ শ্রেযো বিন্দন্তি বৈ প্রজাঃ । মনসা কর্মণা বাচা বিপরীতমতোঽন্যথা ॥ ৩৩ ॥
নিত্যং প্রমুদিতা গোপা বত্সপালা যথাস্ফুটম্ । বনেষু মল্লযুদ্ধেন ক্রীডন্তশ্চারযন্তি গাঃ ॥ ৩৪ ॥
তস্মাদ্ রাজ্ঞঃ প্রিযং যূযং বযং চ করবাম হে । ভূতানি নঃ প্রসীদন্তি সর্বভূতমযো নৃপঃ ॥ ৩৫ ॥
তন্নিশম্যাব্রবীত্কৃষ্ণো দেশকালোচিতং বচঃ । নিযুদ্ধমাত্মনোঽভীষ্টং মন্যমানোঽভিনন্দ্য চ ॥ ৩৬ ॥
প্রজা ভোজপতেরস্য বযং চাপি বনেচরাঃ । করবাম প্রিযং নিত্যং তন্নঃ পরমনুগ্রহঃ ॥ ৩৭ ॥
বালা বযং তুল্যবলৈঃ ক্রীডিষ্যামো যথোচিতম্ । ভবেন্নিযুদ্ধং মাধর্মঃ স্পৃশেন্মল্ল সভাসদঃ ॥ ৩৮ ॥
চাণূর উবাচ
ন বালো ন কিশোরস্ত্বং বলশ্চ বলিনাং বরঃ । লীলযেভো হতো যেন সহস্রদ্বিপসত্ত্বভৃত্ ॥ ৩৯ ॥
ন বালো ন কিশোরস্ত্বং বলশ্চ বলিনাং বরঃ । লীলযেভো হতো যেন সহস্রদ্বিপসত্ত্বভৃত্ ॥ ৩৯ ॥
তস্মাদ্ভবদ্ভ্যাং বলিভির্যোদ্ধব্যং নানযোঽত্র বৈ । মযি বিক্রম বার্ষ্ণেয বলেন সহ মুষ্টিকঃ ॥ ৪০ ॥