శ్రీమద్భాగవతమ్ ౧౦.౪౩

శ్రీశుక ఉవాచ
అథ కృష్ణశ్చ రామశ్చ కృతశౌచౌ పరన్తప । మల్లదున్దుభినిర్ఘోషం శ్రుత్వా ద్రష్టుముపేయతుః ॥ ౧ ॥

రఙ్గద్వారం సమాసాద్య తస్మిన్ నాగమవస్థితమ్ । అపశ్యత్కువలయాపీడం కృష్ణోఽమ్బష్ఠప్రచోదితమ్ ॥ ౨ ॥

బద్ధ్వా పరికరం శౌరిః సముహ్య కుటిలాలకాన్ । ఉవాచహస్తిపం వాచా మేఘనాదగభీరయా ॥ ౩ ॥

అమ్బష్ఠామ్బష్ఠ మార్గం నౌ దేహ్యపక్రమ మా చిరమ్ । నో చేత్ సకుఞ్జరం త్వాద్య నయామి యమసాదనమ్ ॥ ౪ ॥

ఏవం నిర్భర్త్సితోఽమ్బష్ఠః కుపితః కోపితం గజమ్ । చోదయామాస కృష్ణాయ కాలాన్తకయమోపమమ్ ॥ ౫ ॥

కరీన్ద్రస్తమభిద్రుత్య కరేణ తరసాగ్రహీత్ । కరాద్విగలితః సోఽముం నిహత్యాఙ్ఘ్రిష్వలీయత ॥ ౬ ॥

సఙ్క్రుద్ధస్తమచక్షాణో ఘ్రాణదృష్టిః స కేశవమ్ । పరామృశత్ పుష్కరేణ స ప్రసహ్య వినిర్గతః ॥ ౭ ॥

పుచ్ఛే ప్రగృహ్యాతిబలం ధనుషః పఞ్చవింశతిమ్ । విచకర్ష యథా నాగం సుపర్ణ ఇవ లీలయా ॥ ౮ ॥

స పర్యావర్తమానేన సవ్యదక్షిణతోఽచ్యుతః । బభ్రామ భ్రామ్యమాణేన గోవత్సేనేవ బాలకః ॥ ౯ ॥

తతోఽభిముఖమభ్యేత్య పాణినాహత్య వారణమ్ । ప్రాద్రవన్ పాతయామాస స్పృశ్యమానః పదే పదే ॥ ౧౦ ॥

స ధావన్ క్రీడయా భూమౌ పతిత్వా సహసోత్థితః । తం మత్వా పతితం క్రుద్ధో దన్తాభ్యాం సోఽహనత్క్షితిమ్ ॥ ౧౧ ॥

స్వవిక్రమే ప్రతిహతే కుఞ్జరేన్ద్రోఽత్యమర్షితః । చోద్యమానో మహామాత్రైః కృష్ణమభ్యద్రవద్ రుషా ॥ ౧౨ ॥

తమాపతన్తమాసాద్య భగవాన్ మధుసూదనః । నిగృహ్య పాణినా హస్తం పాతయామాస భూతలే ॥ ౧౩ ॥

పతితస్య పదాక్రమ్య మృగేన్ద్ర ఇవ లీలయా । దన్తముత్పాట్య తేనేభం హస్తిపాంశ్చాహనద్ధరిః ॥ ౧౪ ॥

మృతకం ద్విపముత్సృజ్య దన్తపాణిః సమావిశత్ । అంసన్యస్తవిషాణోఽసృఙ్మదబిన్దుభిరఙ్కితః । విరూఢస్వేదకణికావదనామ్బురుహో బభౌ ॥ ౧౫ ॥

వృతౌ గోపైః కతిపయైర్బలదేవజనార్దనౌ । రఙ్గం వివిశతూ రాజన్ గజదన్తవరాయుధౌ ॥ ౧౬ ॥

మల్లానామశనిర్నృణాం నరవరః స్త్రీణాం స్మరో మూర్తిమాన్గోపానాం స్వజనోఽసతాం క్షితిభుజాం శాస్తా స్వపిత్రోః శిశుః । మృత్యుర్భోజపతేర్విరాడవిదుషాం తత్త్వం పరం యోగినాంవృష్ణీనాం పరదేవతేతి విదితో రఙ్గం గతః సాగ్రజః ॥ ౧౭ ॥

హతం కువలయాపీడం దృష్ట్వా తావపి దుర్జయౌ । కంసో మనస్యపి తదా భృశముద్వివిజే నృప ॥ ౧౮ ॥

తౌ రేజతూ రఙ్గగతౌ మహాభుజౌవిచిత్రవేషాభరణస్రగమ్బరౌ । యథా నటావుత్తమవేషధారిణౌమనః క్షిపన్తౌ ప్రభయా నిరీక్షతామ్ ॥ ౧౯ ॥

నిరీక్ష్య తావుత్తమపూరుషౌ జనామఞ్చస్థితా నాగరరాష్ట్రకా నృప । ప్రహర్షవేగోత్కలితేక్షణాననాఃపపుర్న తృప్తా నయనైస్తదాననమ్ ॥ ౨౦ ॥

పిబన్త ఇవ చక్షుర్భ్యాం లిహన్త ఇవ జిహ్వయా । జిఘ్రన్త ఇవ నాసాభ్యాం శ్లిష్యన్త ఇవ బాహుభిః ॥ ౨౧ ॥

ఊచుః పరస్పరం తే వై యథాదృష్టం యథాశ్రుతమ్ । తద్రూపగుణమాధుర్యప్రాగల్భ్యస్మారితా ఇవ ॥ ౨౨ ॥

ఏతౌ భగవతః సాక్షాద్ధరేర్నారాయణస్య హి । అవతీర్ణావిహాంశేన వసుదేవస్య వేశ్మని ॥ ౨౩ ॥

ఏష వై కిల దేవక్యాం జాతో నీతశ్చ గోకులమ్ । కాలమేతం వసన్ గూఢో వవృధే నన్దవేశ్మని ॥ ౨౪ ॥

పూతనానేన నీతాన్తం చక్రవాతశ్చ దానవః । అర్జునౌ గుహ్యకః కేశీ ధేనుకోఽన్యే చ తద్విధాః ॥ ౨౫ ॥

గావః సపాలా ఏతేన దావాగ్నేః పరిమోచితాః । కాలియో దమితః సర్ప ఇన్ద్రశ్చ విమదః కృతః ॥ ౨౬ ॥

సప్తాహమేకహస్తేన ధృతోఽద్రిప్రవరోఽమునా । వర్షవాతాశనిభ్యశ్చ పరిత్రాతం చ గోకులమ్ ॥ ౨౭ ॥

గోప్యోఽస్య నిత్యముదితహసితప్రేక్షణం ముఖమ్ । పశ్యన్త్యో వివిధాంస్తాపాంస్తరన్తి స్మాశ్రమం ముదా ॥ ౨౮ ॥

వదన్త్యనేన వంశోఽయం యదోః సుబహువిశ్రుతః । శ్రియం యశో మహత్వం చ లప్స్యతే పరిరక్షితః ॥ ౨౯ ॥

అయం చాస్యాగ్రజః శ్రీమాన్రామః కమలలోచనః । ప్రలమ్బో నిహతో యేన వత్సకో యే బకాదయః ॥ ౩౦ ॥

జనేష్వేవం బ్రువాణేషు తూర్యేషు నినదత్సు చ । కృష్ణరామౌ సమాభాష్య చాణూరో వాక్యమబ్రవీత్ ॥ ౩౧ ॥

హే నన్దసూనో హే రామ భవన్తౌ వీరసమ్మతౌ । నియుద్ధకుశలౌ శ్రుత్వా రాజ్ఞాహూతౌ దిదృక్షుణా ॥ ౩౨ ॥

ప్రియం రాజ్ఞః ప్రకుర్వత్యః శ్రేయో విన్దన్తి వై ప్రజాః । మనసా కర్మణా వాచా విపరీతమతోఽన్యథా ॥ ౩౩ ॥

నిత్యం ప్రముదితా గోపా వత్సపాలా యథాస్ఫుటమ్ । వనేషు మల్లయుద్ధేన క్రీడన్తశ్చారయన్తి గాః ॥ ౩౪ ॥

తస్మాద్ రాజ్ఞః ప్రియం యూయం వయం చ కరవామ హే । భూతాని నః ప్రసీదన్తి సర్వభూతమయో నృపః ॥ ౩౫ ॥

తన్నిశమ్యాబ్రవీత్కృష్ణో దేశకాలోచితం వచః । నియుద్ధమాత్మనోఽభీష్టం మన్యమానోఽభినన్ద్య చ ॥ ౩౬ ॥

ప్రజా భోజపతేరస్య వయం చాపి వనేచరాః । కరవామ ప్రియం నిత్యం తన్నః పరమనుగ్రహః ॥ ౩౭ ॥

బాలా వయం తుల్యబలైః క్రీడిష్యామో యథోచితమ్ । భవేన్నియుద్ధం మాధర్మః స్పృశేన్మల్ల సభాసదః ॥ ౩౮ ॥

చాణూర ఉవాచ
న బాలో న కిశోరస్త్వం బలశ్చ బలినాం వరః । లీలయేభో హతో యేన సహస్రద్విపసత్త్వభృత్ ॥ ౩౯ ॥

తస్మాద్భవద్భ్యాం బలిభిర్యోద్ధవ్యం నానయోఽత్ర వై । మయి విక్రమ వార్ష్ణేయ బలేన సహ ముష్టికః ॥ ౪౦ ॥