শ্রীমদ্ভাগবতম্ ১০.৫৯

শ্রীরাজোবাচ
যথা হতো ভগবতা ভৌমো যেনে চ তাঃ স্ত্রিযঃ ।
নিরুদ্ধা এতদাচক্ষ্ব বিক্রমং শার্ঙ্গধন্বনঃ ॥ ১ ॥

শ্রীশুক উবাচ
ইন্দ্রেণ হৃতছত্রেণ হৃতকুণ্ডলবন্ধুনা ।
হৃতামরাদ্রিস্থানেন জ্ঞাপিতো ভৌমচেষ্টিতম্ ।
সভার্যো গরুডারূঢঃ প্রাগ্জ্যোতিষপুরং যযৌ ॥ ২ ॥

গিরিদুর্গৈঃ শস্ত্রদুর্গৈর্জলাগ্ন্যনিলদুর্গমম্ ।
মুরপাশাযুতৈর্ঘোরৈর্দৃঢৈঃ সর্বত আবৃতম্ ॥ ৩ ॥

গদযা নির্বিভেদাদ্রীন্ শস্ত্রদুর্গাণি সাযকৈঃ ।
চক্রেণাগ্নিং জলং বাযুং মুরপাশাংস্তথাসিনা ॥ ৪ ॥

শঙ্খনাদেন যন্ত্রাণি হৃদযানি মনস্বিনাম্ ।
প্রাকারং গদযা গুর্ব্যা নির্বিভেদ গদাধরঃ ॥ ৫ ॥

পাঞ্চজন্যধ্বনিং শ্রুত্বা যুগান্তশনিভীষণম্ ।
মুরঃ শযান উত্তস্থৌ দৈত্যঃ পঞ্চশিরা জলাত্ ॥ ৬ ॥

ত্রিশূলমুদ্যম্য সুদুর্নিরীক্ষণো
যুগান্তসূর্যানলরোচিরুল্বণঃ ।
গ্রসংস্ত্রিলোকীমিব পঞ্চভির্মুখৈ-
রভ্যদ্রবত্তার্ক্ষ্যসুতং যথোরগঃ ॥ ৭ ॥

আবিধ্য শূলং তরসা গরুত্মতে
নিরস্য বক্ত্রৈর্ব্যনদত্স পঞ্চভিঃ ।
স রোদসী সর্বদিশোঽম্বরং মহা-
নাপূরযন্নণ্ডকটাহমাবৃণোত্ ॥ ৮ ॥

তদাপতদ্ বৈ ত্রিশিখং গরুত্মতে
হরিঃ শরাভ্যামভিনত্ত্রিধোজসা ।
মুখেষু তং চাপি শরৈরতাডযত্
তস্মৈ গদাং সোঽপি রুষা ব্যমুঞ্চত ॥ ৯ ॥

তামাপতন্তীং গদযা গদাং মৃধে
গদাগ্রজো নির্বিভিদে সহস্রধা ।
উদ্যম্য বাহূনভিধাবতোঽজিতঃ
শিরাংসি চক্রেণ জহার লীলযা ॥ ১০ ॥

ব্যসুঃ পপাতাম্ভসি কৃত্তশীর্ষো
নিকৃত্তশৃঙ্গোঽদ্রিরিবেন্দ্রতেজসা ।
তস্যাত্মজাঃ সপ্ত পিতুর্বধাতুরাঃ
প্রতিক্রিযামর্ষজুষঃ সমুদ্যতাঃ ॥ ১১ ॥

তাম্রোঽন্তরিক্ষঃ শ্রবণো বিভাবসু-
র্বসুর্নভস্বানরুণশ্চ সপ্তমঃ ।
পীঠং পুরস্কৃত্য চমূপতিং মৃধে
ভৌমপ্রযুক্তা নিরগন্ ধৃতাযুধাঃ ॥ ১২ ॥

প্রাযুঞ্জতাসাদ্য শরানসীন্ গদাঃ
শক্ত্যৃষ্টিশূলান্যজিতে রুষোল্বণাঃ ।
তচ্ছস্ত্রকূটং ভগবান্ স্বমার্গণৈ-
রমোঘবীর্যস্তিলশশ্চকর্ত হ ॥ ১৩ ॥

তান্ পীঠমুখ্যাননযদ্ যমক্ষযং
নিকৃত্তশীর্ষোরুভুজাঙ্ঘ্রিবর্মণঃ ।
স্বানীকপানচ্যুতচক্রসাযকৈ-
স্তথা নিরস্তান্ নরকো ধরাসুতঃ ।
নিরীক্ষ্য দুর্মর্ষণ আস্রবন্মদৈ-
র্গজৈঃ পযোধিপ্রভবৈর্নিরাক্রমাত্ ॥ ১৪ ॥

দৃষ্ট্বা সভার্যং গরুডোপরি স্থিতং
সূর্যোপরিষ্টাত্ সতডিদ্ ঘনং যথা ।
কৃষ্ণং স তস্মৈ ব্যসৃজচ্ছতঘ্নীং
যোধাশ্চ সর্বে যুগপচ্চ বিব্যধুঃ ॥ ১৫ ॥

তদ্ ভৌমসৈন্যং ভগবান্ গদাগ্রজো
বিচিত্রবাজৈর্নিশিতৈঃ শিলীমুখৈঃ ।
নিকৃত্তবাহূরুশিরোধ্রবিগ্রহং
চকার তর্হ্যেব হতাশ্বকুঞ্জরম্ ॥ ১৬ ॥

যানি যোধৈঃ প্রযুক্তানি শস্ত্রাস্ত্রাণি কুরূদ্বহ ।
হরিস্তান্যচ্ছিনত্তীক্ষ্ণৈঃ শরৈরেকৈকশস্ত্রিভিঃ ॥ ১৭ ॥

উহ্যমানঃ সুপর্ণেন পক্ষাভ্যাং নিঘ্নতা গজান্ ।
গুরুত্মতা হন্যমানাস্তুণ্ডপক্ষনখের্গজাঃ ॥ ১৮ ॥

পুরমেবাবিশন্নার্তা নরকো যুধ্যযুধ্যত ॥ ১৯ ॥

দৃষ্ট্বা বিদ্রাবিতং সৈন্যং গরুডেনার্দিতং স্বকং ।
তং ভৌমঃ প্রাহরচ্ছক্ত্যা বজ্রঃ প্রতিহতো যতঃ ।
নাকম্পত তযা বিদ্ধো মালাহত ইব দ্বিপঃ ॥ ২০ ॥

শূলং ভৌমোঽচ্যুতং হন্তুমাদদে বিতথোদ্যমঃ ।
তদ্বিসর্গাত্ পূর্বমেব নরকস্য শিরো হরিঃ ।
অপাহরদ্ গজস্থস্য চক্রেণ ক্ষুরনেমিনা ॥ ২১ ॥

সকুণ্ডলং চারুকিরীটভূষণং
বভৌ পৃথিব্যাং পতিতং সমুজ্জ্বলম্ ।
হা হেতি সাধ্বিত্যৃষযঃ সুরেশ্বরা
মাল্যৈর্মুকুন্দং বিকিরন্ত ঈডিরে ॥ ২২ ॥

ততশ্চ ভূঃ কৃষ্ণমুপেত্য কুণ্ডলে
প্রতপ্তজাম্বূনদরত্নভাস্বরে ।
সবৈজযন্ত্যা বনমালযার্পযত্
প্রাচেতসং ছত্রমথো মহামণিম্ ॥ ২৩ ॥

অস্তৌষীদথ বিশ্বেশং দেবী দেববরার্চিতম্ ।
প্রাঞ্জলিঃ প্রণতা রাজন্ ভক্তিপ্রবণযা ধিযা ॥ ২৪ ॥

ভূমিরুবাচ
নমস্তে দেবদেবেশ শঙ্খচক্রগদাধর ।
ভক্তেচ্ছোপাত্তরূপায পরমাত্মন্ নমোঽস্তু তে ॥ ২৫ ॥

নমঃ পঙ্কজনাভায নমঃ পঙ্কজমালিনে ।
নমঃ পঙ্কজনেত্রায নমস্তে পঙ্কজাঙ্ঘ্রযে ॥ ২৬ ॥

নমো ভগবতে তুভ্যং বাসুদেবায বিষ্ণবে ।
পুরুষাযাদিবীজায পূর্ণবোধায তে নমঃ ॥ ২৭ ॥

অজায জনযিত্রেঽস্য ব্রহ্মণেঽনন্তশক্তযে ।
পরাবরাত্মন্ ভূতাত্মন্ পরমাত্মন্ নমোঽস্তু তে ॥ ২৮ ॥

ত্বং বৈ সিসৃক্ষুরজ উত্কটং প্রভো
তমো নিরোধায বিভর্ষ্যসংবৃতঃ ।
স্থানায সত্ত্বং জগতো জগত্পতে
কালঃ প্রধানং পুরুষো ভবান্ পরঃ ॥ ২৯ ॥

অহং পযো জ্যোতিরথানিলো নভো
মাত্রাণি দেবা মন ইন্দ্রিযাণি ।
কর্তা মহানিত্যখিলং চরাচরং
ত্বয্যদ্বিতীযে ভগবন্নযং ভ্রমঃ ॥ ৩০ ॥

তস্যাত্মজোঽযং তব পাদপঙ্কজং
ভীতঃ প্রপন্নার্তিহরোপসাদিতঃ ।
তত্ পালযৈনং কুরু হস্তপঙ্কজং
শিরস্যমুষ্যাখিলকল্মষাপহম্ ॥ ৩১ ॥

শ্রীশুক উবাচ
ইতি ভূম্যর্থিতো বাগ্ভির্ভগবান্ ভক্তিনম্রযা ।
দত্ত্বাভযং ভৌমগৃহং প্রাবিশত্ সকলর্দ্ধিমত্ ॥ ৩২ ॥

তত্র রাজন্যকন্যানাং ষট্সহস্রাধিকাযুতম্ ।
ভৌমাহৃতানাং বিক্রম্য রাজভ্যো দদৃশে হরিঃ ॥ ৩৩ ॥

তং প্রবিষ্টং স্ত্রিযো বীক্ষ্য নরবর্যং বিমোহিতাঃ ।
মনসা বব্রিরেঽভীষ্টং পতিং দৈবোপসাদিতম্ ॥ ৩৪ ॥

ভূযাত্ পতিরযং মহ্যং ধাতা তদনুমোদতাম্ ।
ইতি সর্বাঃ পৃথক্ কৃষ্ণে ভাবেন হৃদযং দধুঃ ॥ ৩৫ ॥

তাঃ প্রাহিণোদ্দ্বারবতীং সুমৃষ্টবিরজোঽম্বরাঃ ।
নরযানৈর্মহাকোশান্ রথাশ্বান্ দ্রবিণং মহত্ ॥ ৩৬ ॥

ঐরাবতকুলেভাংশ্চ চতুর্দন্তাংস্তরস্বিনঃ ।
পাণ্ডুরাংশ্চ চতুঃষষ্টিং প্রেরযামাস কেশবঃ ॥ ৩৭ ॥

গত্বা সুরেন্দ্রভবনং দত্ত্বাদিত্যৈ চ কুণ্ডলে ।
পূজিতস্ত্রিদশেন্দ্রেণ মহেন্দ্রযাণ্যা চ সপ্রিযঃ ॥ ৩৮ ॥

চোদিতো ভার্যযোত্পাট্য পারিজাতং গরুত্মতি ।
আরোপ্য সেন্দ্রান্ বিবুধান্ নির্জিত্যোপানযত্পুরম্ ॥ ৩৯ ॥

স্থাপিতঃ সত্যভামাযা গৃহোদ্যানোপশোভনঃ ।
অন্বগুর্ভ্রমরাঃ স্বর্গাত্ তদ্গন্ধাসবলম্পটাঃ ॥ ৪০ ॥

যযাচ আনম্য কিরীটকোটিভিঃ
পাদৌ স্পৃশন্নচ্যুতমর্থসাধনম্ ।
সিদ্ধার্থ এতেন বিগৃহ্যতে মহা-
নহো সুরাণাং চ তমো ধিগাঢ্যতাম্ ॥ ৪১ ॥

অথো মুহূর্ত একস্মিন্ নানাগারেষু তাঃ স্ত্রিযঃ ।
যথোপযেমে ভগবান্ তাবদ্ রূপধরোঽব্যযঃ ॥ ৪২ ॥

গৃহেষু তাসামনপায্যতর্ককৃ-
ন্নিরস্তসাম্যাতিশযেষ্ববস্থিতঃ ।
রেমে রমাভির্নিজকামসম্প্লুতো
যথেতরো গার্হকমেধিকাংশ্চরন্ ॥ ৪৩ ॥

ইত্থং রমাপতিমবাপ্য পতিং স্ত্রিযস্তা
ব্রহ্মাদযোঽপি ন বিদুঃ পদবীং যদীযাম্ ।
ভেজুর্মুদাবিরতমেধিতযানুরাগ-
হাসাবলোকনবসঙ্গমজল্পলজ্জাঃ ॥ ৪৪ ॥

প্রত্যুদ্গমাসনবরার্হণপাদশৌচ-
তাম্বূলবিশ্রমণবীজনগন্ধমাল্যৈঃ ।
কেশপ্রসারশযনস্নপনোপহার্যৈ-
র্দাসীশতা অপি বিভোর্বিদধুঃ স্ম দাস্যম্ ॥ ৪৫ ॥