শ্রীমদ্ভাগবতম্ ১০.৬২

শ্রীরাজোবাচ
বাণস্য তনযামূষামুপযেমে যদূত্তমঃ ।
তত্র যুদ্ধমভূদ্ ঘোরং হরিশঙ্করযোর্মহত্ ।
এতত্ সর্বং মহাযোগিন্ সমাখ্যাতুং ত্বমর্হসি ॥ ১ ॥

শ্রীশুক উবাচ
বাণঃ পুত্রশতজ্যেষ্ঠো বলেরাসীন্মহাত্মনঃ ।
যেন বামনরূপায হরযেঽদাযি মেদিনী ॥
তস্যৌরসঃ সুতো বাণঃ শিবভক্তিরতঃ সদা ।
মান্যো বদান্যো ধীমাংশ্চ সত্যসন্ধো দৃঢব্রতঃ ।
শোণিতাখ্যে পুরে রম্যে স রাজ্যমকরোত্ পুরা ॥
তস্য শম্ভোঃ প্রাসাদেন কিঙ্করা ইব তেঽমরাঃ ।
সহস্রবাহুর্বাদ্যেন তাণ্ডবেঽতোষযন্মৃডম্ ॥ ২ ॥

ভগবান্ সর্বভূতেশঃ শরণ্যো ভক্তবত্সলঃ ।
বরেণ ছন্দযামাস স তং বব্রে পুরাধিপম্ ॥ ৩ ॥

স একদাহ গিরিশং পার্শ্বস্থং বীর্যদুর্মদঃ ।
কিরীটেনার্কবর্ণেন সংস্পৃশংস্তত্পদাম্বুজম্ ॥ ৪ ॥

নমস্যে ত্বাং মহাদেব লোকানাং গুরুমীশ্বরম্ ।
পুংসামপূর্ণকামানাং কামপূরামরাঙ্ঘ্রিপম্ ॥ ৫ ॥

দোঃসহস্রং ত্বযা দত্তং পরং ভারায মেঽভবত্ ।
ত্রিলোক্যাং প্রতিযোদ্ধারং ন লভে ত্বদৃতে সমম্ ॥ ৬ ॥

কণ্ডূত্যা নিভৃতৈর্দোর্ভির্যুযুত্সুর্দিগ্গজানহম্ ।
আদ্যাযাং চূর্ণযন্নদ্রীন্ ভীতাস্তেঽপি প্রদুদ্রুবুঃ ॥ ৭ ॥

তচ্ছ্রুত্বা ভগবান্ ক্রুদ্ধঃ কেতুস্তে ভজ্যতে যদা ।
ত্বদ্দর্পঘ্নং ভবেন্মূঢ সংযুগং মত্সমেন তে ॥ ৮ ॥

ইত্যুক্তঃ কুমতির্হৃষ্টঃ স্বগৃহং প্রাবিশন্নৃপ ।
প্রতীক্ষন্ গিরিশাদেশং স্ববীর্যনশনং কুধীঃ ॥ ৯ ॥

তস্যোষা নাম দুহিতা স্বপ্নে প্রাদ্যুম্নিনা রতিম্ ।
কন্যালভত কান্তেন প্রাগদৃষ্টশ্রুতেন সা ॥ ১০ ॥

সা তত্র তমপশ্যন্তী ক্বাসি কান্তেতি বাদিনী ।
সখীনাং মধ্য উত্তস্থৌ বিহ্বলা ব্রীডিতা ভৃশম্ ॥ ১১ ॥

বাণস্য মন্ত্রী কুম্ভাণ্ডশ্চিত্রলেখা চ তত্সুতা ।
সখ্যপৃচ্ছত্ সখীমূষাং কৌতূহলসমন্বিতা ॥ ১২ ॥

কং ত্বং মৃগযসে সুভ্রু কীদৃশস্তে মনোরথঃ ।
হস্তগ্রাহং ন তেঽদ্যাপি রাজপুত্র্যুপলক্ষযে ॥ ১৩ ॥

দৃষ্টঃ কশ্চিন্নরঃ স্বপ্নে শ্যামঃ কমললোচনঃ ।
পীতবাসা বৃহদ্বাহুর্যোষিতাং হৃদযংগমঃ ॥ ১৪ ॥

তমহং মৃগযে কান্তং পাযযিত্বাধরং মধু ।
ক্বাপি যাতঃ স্পৃহযতীং ক্ষিপ্ত্বা মাং বৃজিনার্ণবে ॥ ১৫ ॥

চিত্রলেখোবাচ
ব্যসনং তেঽপকর্ষামি ত্রিলোক্যাং যদি ভাব্যতে ।
তমানেষ্যে নরং যস্তে মনোহর্তা তমাদিশ ॥ ১৬ ॥

ইত্যুক্ত্বা দেবগন্ধর্বসিদ্ধচারণপন্নগান্ ।
দৈত্যবিদ্যাধরান্ যক্ষান্ মনুজাংশ্চ যথালিখত্ ॥ ১৭ ॥

মনুজেষু চ সা বৃষ্ণীন্ শূরমানকদুন্দুভিম্ ।
ব্যলিখদ্ রামকৃষ্ণৌ চ প্রদ্যুম্নং বীক্ষ্য লজ্জিতা ॥ ১৮ ॥

অনিরুদ্ধং বিলিখিতং বীক্ষ্যোষাবাঙ্মুখী হ্রিযা ।
সোঽসাবসাবিতি প্রাহ স্মযমানা মহীপতে ॥ ১৯ ॥

চিত্রলেখা তমাজ্ঞায পৌত্রং কৃষ্ণস্য যোগিনী ।
যযৌ বিহাযসা রাজন্ দ্বারকাং কৃষ্ণপালিতাম্ ॥ ২০ ॥

তত্র সুপ্তং সুপর্যঙ্কে প্রাদ্যুম্নিং যোগমাস্থিতা ।
গৃহীত্বা শোণিতপুরং সখ্যৈ প্রিযমদর্শযত্ ॥ ২১ ॥

সা চ তং সুন্দরবরং বিলোক্য মুদিতাননা ।
দুষ্প্রেক্ষ্যে স্বগৃহে পুম্ভী রেমে প্রাদ্যুম্নিনা সমম্ ॥ ২২ ॥

পরার্ধ্যবাসঃস্রগ্গন্ধধূপদীপাসনাদিভিঃ ।
পানভোজনভক্ষ্যৈশ্চ বাক্যৈঃ শুশ্রূষণার্চিতঃ ॥ ২৩ ॥

গূঢঃ কন্যাপুরে শশ্বত্প্রবৃদ্ধস্নেহযা তযা ।
নাহর্গণান্ স বুবুধে ঊষযাপহৃতেন্দ্রিযঃ ॥ ২৪ ॥

তাং তথা যদুবীরেণ ভুজ্যমানাং হতব্রতাম্ ।
হেতুভির্লক্ষযাং চক্রুরাপৃঈতাং দুরবচ্ছদৈঃ ॥ ২৫ ॥

ভটা আবেদযাং চক্রূ রাজংস্তে দুহিতুর্বযম্ ।
বিচেষ্টিতং লক্ষযাম কন্যাযাঃ কুলদূষণম্ ॥ ২৬ ॥

অনপাযিভিরস্মাভির্গুপ্তাযাশ্চ গৃহে প্রভো ।
কন্যাযা দূষণং পুম্ভির্দুষ্প্রেক্ষ্যাযা ন বিদ্মহে ॥ ২৭ ॥

ততঃ প্রব্যথিতো বাণো দুহিতুঃ শ্রুতদূষণঃ ।
ত্বরিতঃ কন্যকাগারং প্রাপ্তোঽদ্রাক্ষীদ্ যদূদ্বহম্ ॥ ২৮ ॥

কামাত্মজং তং ভুবনৈকসুন্দরং
শ্যামং পিশঙ্গাম্বরমম্বুজেক্ষণম্ ।
বৃহদ্ভুজং কুণ্ডলকুন্তলত্বিষা
স্মিতাবলোকেন চ মণ্ডিতাননম্ ॥ ২৯ ॥

দীব্যন্তমক্ষৈঃ প্রিযযাভিনৃম্ণযা
তদঙ্গসঙ্গস্তনকুঙ্কুমস্রজম্ ।
বাহ্বোর্দধানং মধুমল্লিকাশ্রিতাং
তস্যাগ্র আসীনমবেক্ষ্য বিস্মিতঃ ॥ ৩০ ॥

স তং প্রবিষ্টং বৃতমাততাযিভি-
র্ভটৈরনীকৈরবলোক্য মাধবঃ ।
উদ্যম্য মৌর্বং পরিঘং ব্যবস্থিতো
যথান্তকো দণ্ডধরো জিঘাংসযা ॥ ৩১ ॥

জিঘৃক্ষযা তান্ পরিতঃ প্রসর্পতঃ
শুনো যথা শূকরযূথপোঽহনত্ ।
তে হন্যমানা ভবনাদ্ বিনির্গতা
নির্ভিন্নমূর্ধোরুভুজাঃ প্রদুদ্রুবুঃ ॥ ৩২ ॥

তং নাগপাশৈর্বলিনন্দনো বলী
ঘ্নন্তং স্বসৈন্যং কুপিতো ববন্ধ হ ।
ঊষা ভৃশং শোকবিষাদবিহ্বলা
বদ্ধং নিশম্যাশ্রুকলাক্ষ্যরৌত্সীত্ ॥ ৩৩ ॥

জিঘৃক্ষযা তান্ পরিতঃ প্রসর্পতঃ
শুনো যথা সূকরযূথপোহঽনত্ ।
তে হন্যমানা ভবনাদ্বিনির্গতা
নির্ভিন্নমূর্ধোরুভুজাঃ প্রদুদ্রুবুঃ