శ్రీమద్భాగవతమ్ ౧౦.౬౨

శ్రీరాజోవాచ
బాణస్య తనయామూషాముపయేమే యదూత్తమః ।
తత్ర యుద్ధమభూద్ ఘోరం హరిశఙ్కరయోర్మహత్ ।
ఏతత్ సర్వం మహాయోగిన్ సమాఖ్యాతుం త్వమర్హసి ॥ ౧ ॥

శ్రీశుక ఉవాచ
బాణః పుత్రశతజ్యేష్ఠో బలేరాసీన్మహాత్మనః ।
యేన వామనరూపాయ హరయేఽదాయి మేదినీ ॥
తస్యౌరసః సుతో బాణః శివభక్తిరతః సదా ।
మాన్యో వదాన్యో ధీమాంశ్చ సత్యసన్ధో దృఢవ్రతః ।
శోణితాఖ్యే పురే రమ్యే స రాజ్యమకరోత్ పురా ॥
తస్య శమ్భోః ప్రాసాదేన కిఙ్కరా ఇవ తేఽమరాః ।
సహస్రబాహుర్వాద్యేన తాణ్డవేఽతోషయన్మృడమ్ ॥ ౨ ॥

భగవాన్ సర్వభూతేశః శరణ్యో భక్తవత్సలః ।
వరేణ ఛన్దయామాస స తం వవ్రే పురాధిపమ్ ॥ ౩ ॥

స ఏకదాహ గిరిశం పార్శ్వస్థం వీర్యదుర్మదః ।
కిరీటేనార్కవర్ణేన సంస్పృశంస్తత్పదామ్బుజమ్ ॥ ౪ ॥

నమస్యే త్వాం మహాదేవ లోకానాం గురుమీశ్వరమ్ ।
పుంసామపూర్ణకామానాం కామపూరామరాఙ్ఘ్రిపమ్ ॥ ౫ ॥

దోఃసహస్రం త్వయా దత్తం పరం భారాయ మేఽభవత్ ।
త్రిలోక్యాం ప్రతియోద్ధారం న లభే త్వదృతే సమమ్ ॥ ౬ ॥

కణ్డూత్యా నిభృతైర్దోర్భిర్యుయుత్సుర్దిగ్గజానహమ్ ।
ఆద్యాయాం చూర్ణయన్నద్రీన్ భీతాస్తేఽపి ప్రదుద్రువుః ॥ ౭ ॥

తచ్ఛ్రుత్వా భగవాన్ క్రుద్ధః కేతుస్తే భజ్యతే యదా ।
త్వద్దర్పఘ్నం భవేన్మూఢ సంయుగం మత్సమేన తే ॥ ౮ ॥

ఇత్యుక్తః కుమతిర్హృష్టః స్వగృహం ప్రావిశన్నృప ।
ప్రతీక్షన్ గిరిశాదేశం స్వవీర్యనశనం కుధీః ॥ ౯ ॥

తస్యోషా నామ దుహితా స్వప్నే ప్రాద్యుమ్నినా రతిమ్ ।
కన్యాలభత కాన్తేన ప్రాగదృష్టశ్రుతేన సా ॥ ౧౦ ॥

సా తత్ర తమపశ్యన్తీ క్వాసి కాన్తేతి వాదినీ ।
సఖీనాం మధ్య ఉత్తస్థౌ విహ్వలా వ్రీడితా భృశమ్ ॥ ౧౧ ॥

బాణస్య మన్త్రీ కుమ్భాణ్డశ్చిత్రలేఖా చ తత్సుతా ।
సఖ్యపృచ్ఛత్ సఖీమూషాం కౌతూహలసమన్వితా ॥ ౧౨ ॥

కం త్వం మృగయసే సుభ్రు కీదృశస్తే మనోరథః ।
హస్తగ్రాహం న తేఽద్యాపి రాజపుత్ర్యుపలక్షయే ॥ ౧౩ ॥

దృష్టః కశ్చిన్నరః స్వప్నే శ్యామః కమలలోచనః ।
పీతవాసా బృహద్బాహుర్యోషితాం హృదయంగమః ॥ ౧౪ ॥

తమహం మృగయే కాన్తం పాయయిత్వాధరం మధు ।
క్వాపి యాతః స్పృహయతీం క్షిప్త్వా మాం వృజినార్ణవే ॥ ౧౫ ॥

చిత్రలేఖోవాచ
వ్యసనం తేఽపకర్షామి త్రిలోక్యాం యది భావ్యతే ।
తమానేష్యే నరం యస్తే మనోహర్తా తమాదిశ ॥ ౧౬ ॥

ఇత్యుక్త్వా దేవగన్ధర్వసిద్ధచారణపన్నగాన్ ।
దైత్యవిద్యాధరాన్ యక్షాన్ మనుజాంశ్చ యథాలిఖత్ ॥ ౧౭ ॥

మనుజేషు చ సా వృష్ణీన్ శూరమానకదున్దుభిమ్ ।
వ్యలిఖద్ రామకృష్ణౌ చ ప్రద్యుమ్నం వీక్ష్య లజ్జితా ॥ ౧౮ ॥

అనిరుద్ధం విలిఖితం వీక్ష్యోషావాఙ్ముఖీ హ్రియా ।
సోఽసావసావితి ప్రాహ స్మయమానా మహీపతే ॥ ౧౯ ॥

చిత్రలేఖా తమాజ్ఞాయ పౌత్రం కృష్ణస్య యోగినీ ।
యయౌ విహాయసా రాజన్ ద్వారకాం కృష్ణపాలితామ్ ॥ ౨౦ ॥

తత్ర సుప్తం సుపర్యఙ్కే ప్రాద్యుమ్నిం యోగమాస్థితా ।
గృహీత్వా శోణితపురం సఖ్యై ప్రియమదర్శయత్ ॥ ౨౧ ॥

సా చ తం సున్దరవరం విలోక్య ముదితాననా ।
దుష్ప్రేక్ష్యే స్వగృహే పుమ్భీ రేమే ప్రాద్యుమ్నినా సమమ్ ॥ ౨౨ ॥

పరార్ధ్యవాసఃస్రగ్గన్ధధూపదీపాసనాదిభిః ।
పానభోజనభక్ష్యైశ్చ వాక్యైః శుశ్రూషణార్చితః ॥ ౨౩ ॥

గూఢః కన్యాపురే శశ్వత్ప్రవృద్ధస్నేహయా తయా ।
నాహర్గణాన్ స బుబుధే ఊషయాపహృతేన్ద్రియః ॥ ౨౪ ॥

తాం తథా యదువీరేణ భుజ్యమానాం హతవ్రతామ్ ।
హేతుభిర్లక్షయాం చక్రురాపృఈతాం దురవచ్ఛదైః ॥ ౨౫ ॥

భటా ఆవేదయాం చక్రూ రాజంస్తే దుహితుర్వయమ్ ।
విచేష్టితం లక్షయామ కన్యాయాః కులదూషణమ్ ॥ ౨౬ ॥

అనపాయిభిరస్మాభిర్గుప్తాయాశ్చ గృహే ప్రభో ।
కన్యాయా దూషణం పుమ్భిర్దుష్ప్రేక్ష్యాయా న విద్మహే ॥ ౨౭ ॥

తతః ప్రవ్యథితో బాణో దుహితుః శ్రుతదూషణః ।
త్వరితః కన్యకాగారం ప్రాప్తోఽద్రాక్షీద్ యదూద్వహమ్ ॥ ౨౮ ॥

కామాత్మజం తం భువనైకసున్దరం
శ్యామం పిశఙ్గామ్బరమమ్బుజేక్షణమ్ ।
బృహద్భుజం కుణ్డలకున్తలత్విషా
స్మితావలోకేన చ మణ్డితాననమ్ ॥ ౨౯ ॥

దీవ్యన్తమక్షైః ప్రియయాభినృమ్ణయా
తదఙ్గసఙ్గస్తనకుఙ్కుమస్రజమ్ ।
బాహ్వోర్దధానం మధుమల్లికాశ్రితాం
తస్యాగ్ర ఆసీనమవేక్ష్య విస్మితః ॥ ౩౦ ॥

స తం ప్రవిష్టం వృతమాతతాయిభి-
ర్భటైరనీకైరవలోక్య మాధవః ।
ఉద్యమ్య మౌర్వం పరిఘం వ్యవస్థితో
యథాన్తకో దణ్డధరో జిఘాంసయా ॥ ౩౧ ॥

జిఘృక్షయా తాన్ పరితః ప్రసర్పతః
శునో యథా శూకరయూథపోఽహనత్ ।
తే హన్యమానా భవనాద్ వినిర్గతా
నిర్భిన్నమూర్ధోరుభుజాః ప్రదుద్రువుః ॥ ౩౨ ॥

తం నాగపాశైర్బలినన్దనో బలీ
ఘ్నన్తం స్వసైన్యం కుపితో బబన్ధ హ ।
ఊషా భృశం శోకవిషాదవిహ్వలా
బద్ధం నిశమ్యాశ్రుకలాక్ష్యరౌత్సీత్ ॥ ౩౩ ॥

జిఘృక్షయా తాన్ పరితః ప్రసర్పతః
శునో యథా సూకరయూథపోహఽనత్ ।
తే హన్యమానా భవనాద్వినిర్గతా
నిర్భిన్నమూర్ధోరుభుజాః ప్రదుద్రువుః