শ্ৰীমদ্ভাগৱতম্ ১০.৭

শ্ৰীৰাজোৱাচ
যেন যেনাৱতাৰেণ ভগৱান্ হৰিৰীশ্ৱৰঃ ।
কৰোতি কৰ্ণৰম্যাণি মনোজ্ঞানি চ নঃ প্ৰভো ॥ ১ ॥

যচ্ছৃণ্ৱতোঽপৈত্যৰতিৰ্ৱিতৃষ্ণা
সত্ত্ৱং চ শুদ্ধ্যত্যচিৰেণ পুংসঃ ।
ভক্তিৰ্হৰৌ তত্পুৰুষে চ সখ্যং
তদেৱ হাৰং ৱদ মন্যসে চেত্ ॥ ২ ॥

অথান্যদপি কৃষ্ণস্য তোকাচৰিতমদ্ভুতম্ । মানুষং লোকমাসাদ্য তজ্জাতিমনুৰুন্ধতঃ ॥ ৩ ॥

শ্ৰীশুক উৱাচ
কদাচিদৌত্থানিককৌতুকাপ্লৱে
জন্মৰ্ক্ষযোগে সমৱেতযোষিতাম্ ।
ৱাদিত্ৰগীতদ্ৱিজমন্ত্ৰৱাচকৈ-
শ্চকাৰ সূনোৰভিষেচনং সতী ॥ ৪ ॥

নন্দস্য পত্নী কৃতমজ্জনাদিকং
ৱিপ্ৰৈঃ কৃতস্ৱস্ত্যযনং সুপূজিতৈঃ ।
অন্নাদ্যৱাসঃস্ৰগভীষ্টধেনুভিঃ
সঞ্জাতনিদ্ৰাক্ষমশীশযচ্ছনৈঃ ॥ ৫ ॥

ঔত্থানিকৌত্সুক্যমনা মনস্ৱিনী
সমাগতান্ পূজযতী ৱ্ৰজৌকসঃ ।
নৈৱাশৃণোদ্ ৱৈ ৰুদিতং সুতস্য সা
ৰুদন্ স্তনাৰ্থী চৰণাৱুদক্ষিপত্ ॥ ৬ ॥

অধঃশযানস্য শিশোৰনোঽল্পক-
প্ৰৱালমৃদ্ৱঙ্ঘ্ৰিহতং ৱ্যৱৰ্তত ।
ৱিধ্ৱস্তনানাৰসকুপ্যভাজনং
ৱ্যত্যস্তচক্ৰাক্ষৱিভিন্নকূবৰম্ ॥ ৭ ॥

দৃষ্ট্ৱা যশোদাপ্ৰমুখা ৱ্ৰজস্ত্ৰিয
ঔত্থানিকে কৰ্মণি যাঃ সমাগতাঃ ।
নন্দাদযশ্চাদ্ভুতদৰ্শনাকুলাঃ
কথং স্ৱযং ৱৈ শকটং ৱিপৰ্যগাত্ ॥ ৮ ॥

ঊচুৰৱ্যৱসিতমতীন্ গোপান্গোপীশ্চ বালকাঃ ।
ৰুদতানেন পাদেন ক্ষিপ্তমেতন্ন সংশযঃ ॥ ৯ ॥

ন তে শ্ৰদ্দধিৰে গোপা বালভাষিতমিত্যুত ।
অপ্ৰমেযং বলং তস্য বালকস্য ন তে ৱিদুঃ ॥ ১০ ॥

ৰুদন্তং সুতমাদায যশোদা গ্ৰহশঙ্কিতা ।
কৃতস্ৱস্ত্যযনং ৱিপ্ৰৈঃ সূক্তৈঃ স্তনমপাযযত্ ॥ ১১ ॥

পূৰ্ৱৱত্ স্থাপিতং গোপৈৰ্বলিভিঃ সপৰিচ্ছদম্ ।
ৱিপ্ৰা হুত্ৱাৰ্চযাংচক্ৰুৰ্দধ্যক্ষতকুশাম্বুভিঃ ॥ ১২ ॥

যেঽসূযানৃতদম্ভেৰ্ষাহিংসামানৱিৱৰ্জিতাঃ ।
ন তেষাং সত্যশীলানামাশিষো ৱিফলাঃ কৃতাঃ ॥ ১৩ ॥

ইতি বালকমাদায সামৰ্গ্যজুৰুপাকৃতৈঃ ।
জলৈঃ পৱিত্ৰৌষধিভিৰভিষিচ্য দ্ৱিজোত্তমৈঃ ॥ ১৪ ॥

ৱাচযিত্ৱা স্ৱস্ত্যযনং নন্দগোপঃ সমাহিতঃ ।
হুত্ৱা চাগ্নিং দ্ৱিজাতিভ্যঃ প্ৰাদাদন্নং মহাগুণম্ ॥ ১৫ ॥

গাৱঃ সৰ্ৱগুণোপেতা ৱাসঃস্ৰগ্ৰুক্মমালিনীঃ । আত্মজাভ্যুদযাৰ্থায প্ৰাদাত্তে চান্ৱযুঞ্জত ॥ ১৬ ॥

ৱিপ্ৰা মন্ত্ৰৱিদো যুক্তাস্তৈৰ্যাঃ প্ৰোক্তাস্তথাশিষঃ ।
তা নিষ্ফলা ভৱিষ্যন্তি ন কদাচিদপি স্ফুটম্ ॥ ১৭ ॥

একদাৰোহমাৰূঢং লালযন্তী সুতং সতী ।
গৰিমাণং শিশোৰ্ৱোঢুং ন সেহে গিৰিকূটৱত্ ॥ ১৮ ॥

ভূমৌ নিধায তং গোপী ৱিস্মিতা ভাৰপীডিতা ।
মহাপুৰুষমাদধ্যৌ জগতামাস কৰ্মসু ॥ ১৯ ॥

দৈত্যো নাম্না তৃণাৱৰ্তঃ কংসভৃত্যঃ প্ৰণোদিতঃ ।
চক্ৰৱাতস্ৱৰূপেণ জহাৰাসীনমৰ্ভকম্ ॥ ২০ ॥

গোকুলং সৰ্ৱমাৱৃণ্ৱন্ মুষ্ণংশ্চক্ষূংষি ৰেণুভিঃ । ঈৰযন্ সুমহাঘোৰশব্দেন প্ৰদিশো দিশঃ ॥ ২১ ॥

মুহূৰ্তমভৱদ্ গোষ্ঠং ৰজসা তমসাৱৃতম্ ।
সুতং যশোদা নাপশ্যত্তস্মিন্ ন্যস্তৱতী যতঃ ॥ ২২ ॥

নাপশ্যত্কশ্চনাত্মানং পৰং চাপি ৱিমোহিতঃ ।
তৃণাৱৰ্তনিসৃষ্টাভিঃ শৰ্কৰাভিৰুপদ্ৰুতঃ ॥ ২৩ ॥

ইতি খৰপৱনচক্ৰপাংশুৱৰ্ষে
সুতপদৱীমবলাৱিলক্ষ্য মাতা ।
অতিকৰুণমনুস্মৰন্ত্যশোচদ্
ভুৱি পতিতা মৃতৱত্সকা যথা গৌঃ ॥ ২৪ ॥

ৰুদিতমনুনিশম্য তত্ৰ গোপ্যো
ভৃশমনুতপ্তধিযোঽশ্ৰুপূৰ্ণমুখ্যঃ ।
ৰুৰুদুৰনুপলভ্য নন্দসূনুং
পৱন উপাৰতপাংশুৱৰ্ষৱেগে ॥ ২৫ ॥

তৃণাৱৰ্তঃ শান্তৰযো ৱাত্যাৰূপধৰো হৰন্ ।
কৃষ্ণং নভোগতো গন্তুং নাশক্নোদ্ ভূৰিভাৰভৃত্ ॥ ২৬ ॥

তমশ্মানং মন্যমান আত্মনো গুৰুমত্তযা ।
গলে গৃহীত উত্স্ৰষ্টুং নাশক্নোদদ্ভুতাৰ্ভকম্ ॥ ২৭ ॥

গলগ্ৰহণনিশ্চেষ্টো দৈত্যো নিৰ্গতলোচনঃ ।
অৱ্যক্তৰাৱো ন্যপতত্সহবালো ৱ্যসুৰ্ৱ্ৰজে ॥ ২৮ ॥

তমন্তৰিক্ষাত্ পতিতং শিলাযাং
ৱিশীৰ্ণসৰ্ৱাৱযৱং কৰালম্ ।
পুৰং যথা ৰুদ্ৰশৰেণ ৱিদ্ধং
স্ত্ৰিযো ৰুদত্যো দদৃশুঃ সমেতাঃ ॥ ২৯ ॥

প্ৰাদায মাত্ৰে প্ৰতিহৃত্য ৱিস্মিতাঃ
কৃষ্ণং চ তস্যোৰসি লম্বমানম্ ।
তং স্ৱস্তিমন্তং পুৰুষাদনীতং
ৱিহাযসা মৃত্যুমুখাত্ প্ৰমুক্তম্ ।
গোপ্যশ্চ গোপাঃ কিল নন্দমুখ্যা
লব্ধ্ৱা পুনঃ প্ৰাপুৰতীৱ মোদম্ ॥ ৩০ ॥

অহো বতাত্যদ্ভুতমেষ ৰক্ষসা
বালো
নিৱৃত্তিং গমিতোঽভ্যগাত্ পুনঃ ।
হিংস্ৰঃ স্ৱপাপেন ৱিহিংসিতঃ
খলঃ
সাধুঃ সমত্ৱেন ভযাদ্ ৱিমুচ্যতে ॥ ৩১ ॥

কিং নস্তপশ্চীৰ্ণমধোক্ষজাৰ্চনং
পূৰ্তেষ্টদত্তমুত ভূতসৌহৃদম্ ।
যত্সম্পৰেতঃ পুনৰেৱ বালকো
দিষ্টযা স্ৱবন্ধূন্ প্ৰণযন্নুপস্থিতঃ ॥ ৩২ ॥

দৃষ্ট্ৱাদ্ভুতানি বহুশো নন্দগোপো বৃহদ্ৱনে ।
ৱসুদেৱৱচো ভূযো মানযামাস ৱিস্মিতঃ ॥ ৩৩ ॥

একদাৰ্ভকমাদায স্ৱাঙ্কমাৰোপ্য ভামিনী ।
প্ৰস্নুতং পাযযামাস স্তনং স্নেহপৰিপ্লুতা ॥ ৩৪ ॥

পীতপ্ৰাযস্য জননী সুতস্য ৰুচিৰস্মিতম্ ।
মুখং লালযতী ৰাজঞ্জৃম্ভতো দদৃশে ইদম্ ॥ ৩৫ ॥

খং ৰোদসী জ্যোতিৰনীকমাশাঃ
সূৰ্যেন্দুৱহ্নিশ্ৱসনাম্বুধীংশ্চ ।
দ্ৱীপান্ নগাংস্তদ্দুহিতৃৰ্ৱনানি
ভূতানি যানি স্থিৰজঙ্গমানি? ॥ ৩৬ ॥

সা ৱীক্ষ্য ৱিশ্ৱং সহসা ৰাজন্ সঞ্জাতৱেপথুঃ ।
সম্মীল্য মৃগশাৱাক্ষী নেত্ৰে আসীত্সুৱিস্মিতা ॥ ৩৭ ॥