শ্রীমদ্ভাগবতম্ ১০.৭

শ্রীরাজোবাচ
যেন যেনাবতারেণ ভগবান্ হরিরীশ্বরঃ ।
করোতি কর্ণরম্যাণি মনোজ্ঞানি চ নঃ প্রভো ॥ ১ ॥

যচ্ছৃণ্বতোঽপৈত্যরতির্বিতৃষ্ণা
সত্ত্বং চ শুদ্ধ্যত্যচিরেণ পুংসঃ ।
ভক্তির্হরৌ তত্পুরুষে চ সখ্যং
তদেব হারং বদ মন্যসে চেত্ ॥ ২ ॥

অথান্যদপি কৃষ্ণস্য তোকাচরিতমদ্ভুতম্ । মানুষং লোকমাসাদ্য তজ্জাতিমনুরুন্ধতঃ ॥ ৩ ॥

শ্রীশুক উবাচ
কদাচিদৌত্থানিককৌতুকাপ্লবে
জন্মর্ক্ষযোগে সমবেতযোষিতাম্ ।
বাদিত্রগীতদ্বিজমন্ত্রবাচকৈ-
শ্চকার সূনোরভিষেচনং সতী ॥ ৪ ॥

নন্দস্য পত্নী কৃতমজ্জনাদিকং
বিপ্রৈঃ কৃতস্বস্ত্যযনং সুপূজিতৈঃ ।
অন্নাদ্যবাসঃস্রগভীষ্টধেনুভিঃ
সঞ্জাতনিদ্রাক্ষমশীশযচ্ছনৈঃ ॥ ৫ ॥

ঔত্থানিকৌত্সুক্যমনা মনস্বিনী
সমাগতান্ পূজযতী ব্রজৌকসঃ ।
নৈবাশৃণোদ্ বৈ রুদিতং সুতস্য সা
রুদন্ স্তনার্থী চরণাবুদক্ষিপত্ ॥ ৬ ॥

অধঃশযানস্য শিশোরনোঽল্পক-
প্রবালমৃদ্বঙ্ঘ্রিহতং ব্যবর্তত ।
বিধ্বস্তনানারসকুপ্যভাজনং
ব্যত্যস্তচক্রাক্ষবিভিন্নকূবরম্ ॥ ৭ ॥

দৃষ্ট্বা যশোদাপ্রমুখা ব্রজস্ত্রিয
ঔত্থানিকে কর্মণি যাঃ সমাগতাঃ ।
নন্দাদযশ্চাদ্ভুতদর্শনাকুলাঃ
কথং স্বযং বৈ শকটং বিপর্যগাত্ ॥ ৮ ॥

ঊচুরব্যবসিতমতীন্ গোপান্গোপীশ্চ বালকাঃ ।
রুদতানেন পাদেন ক্ষিপ্তমেতন্ন সংশযঃ ॥ ৯ ॥

ন তে শ্রদ্দধিরে গোপা বালভাষিতমিত্যুত ।
অপ্রমেযং বলং তস্য বালকস্য ন তে বিদুঃ ॥ ১০ ॥

রুদন্তং সুতমাদায যশোদা গ্রহশঙ্কিতা ।
কৃতস্বস্ত্যযনং বিপ্রৈঃ সূক্তৈঃ স্তনমপাযযত্ ॥ ১১ ॥

পূর্ববত্ স্থাপিতং গোপৈর্বলিভিঃ সপরিচ্ছদম্ ।
বিপ্রা হুত্বার্চযাংচক্রুর্দধ্যক্ষতকুশাম্বুভিঃ ॥ ১২ ॥

যেঽসূযানৃতদম্ভের্ষাহিংসামানবিবর্জিতাঃ ।
ন তেষাং সত্যশীলানামাশিষো বিফলাঃ কৃতাঃ ॥ ১৩ ॥

ইতি বালকমাদায সামর্গ্যজুরুপাকৃতৈঃ ।
জলৈঃ পবিত্রৌষধিভিরভিষিচ্য দ্বিজোত্তমৈঃ ॥ ১৪ ॥

বাচযিত্বা স্বস্ত্যযনং নন্দগোপঃ সমাহিতঃ ।
হুত্বা চাগ্নিং দ্বিজাতিভ্যঃ প্রাদাদন্নং মহাগুণম্ ॥ ১৫ ॥

গাবঃ সর্বগুণোপেতা বাসঃস্রগ্রুক্মমালিনীঃ । আত্মজাভ্যুদযার্থায প্রাদাত্তে চান্বযুঞ্জত ॥ ১৬ ॥

বিপ্রা মন্ত্রবিদো যুক্তাস্তৈর্যাঃ প্রোক্তাস্তথাশিষঃ ।
তা নিষ্ফলা ভবিষ্যন্তি ন কদাচিদপি স্ফুটম্ ॥ ১৭ ॥

একদারোহমারূঢং লালযন্তী সুতং সতী ।
গরিমাণং শিশোর্বোঢুং ন সেহে গিরিকূটবত্ ॥ ১৮ ॥

ভূমৌ নিধায তং গোপী বিস্মিতা ভারপীডিতা ।
মহাপুরুষমাদধ্যৌ জগতামাস কর্মসু ॥ ১৯ ॥

দৈত্যো নাম্না তৃণাবর্তঃ কংসভৃত্যঃ প্রণোদিতঃ ।
চক্রবাতস্বরূপেণ জহারাসীনমর্ভকম্ ॥ ২০ ॥

গোকুলং সর্বমাবৃণ্বন্ মুষ্ণংশ্চক্ষূংষি রেণুভিঃ । ঈরযন্ সুমহাঘোরশব্দেন প্রদিশো দিশঃ ॥ ২১ ॥

মুহূর্তমভবদ্ গোষ্ঠং রজসা তমসাবৃতম্ ।
সুতং যশোদা নাপশ্যত্তস্মিন্ ন্যস্তবতী যতঃ ॥ ২২ ॥

নাপশ্যত্কশ্চনাত্মানং পরং চাপি বিমোহিতঃ ।
তৃণাবর্তনিসৃষ্টাভিঃ শর্করাভিরুপদ্রুতঃ ॥ ২৩ ॥

ইতি খরপবনচক্রপাংশুবর্ষে
সুতপদবীমবলাবিলক্ষ্য মাতা ।
অতিকরুণমনুস্মরন্ত্যশোচদ্
ভুবি পতিতা মৃতবত্সকা যথা গৌঃ ॥ ২৪ ॥

রুদিতমনুনিশম্য তত্র গোপ্যো
ভৃশমনুতপ্তধিযোঽশ্রুপূর্ণমুখ্যঃ ।
রুরুদুরনুপলভ্য নন্দসূনুং
পবন উপারতপাংশুবর্ষবেগে ॥ ২৫ ॥

তৃণাবর্তঃ শান্তরযো বাত্যারূপধরো হরন্ ।
কৃষ্ণং নভোগতো গন্তুং নাশক্নোদ্ ভূরিভারভৃত্ ॥ ২৬ ॥

তমশ্মানং মন্যমান আত্মনো গুরুমত্তযা ।
গলে গৃহীত উত্স্রষ্টুং নাশক্নোদদ্ভুতার্ভকম্ ॥ ২৭ ॥

গলগ্রহণনিশ্চেষ্টো দৈত্যো নির্গতলোচনঃ ।
অব্যক্তরাবো ন্যপতত্সহবালো ব্যসুর্ব্রজে ॥ ২৮ ॥

তমন্তরিক্ষাত্ পতিতং শিলাযাং
বিশীর্ণসর্বাবযবং করালম্ ।
পুরং যথা রুদ্রশরেণ বিদ্ধং
স্ত্রিযো রুদত্যো দদৃশুঃ সমেতাঃ ॥ ২৯ ॥

প্রাদায মাত্রে প্রতিহৃত্য বিস্মিতাঃ
কৃষ্ণং চ তস্যোরসি লম্বমানম্ ।
তং স্বস্তিমন্তং পুরুষাদনীতং
বিহাযসা মৃত্যুমুখাত্ প্রমুক্তম্ ।
গোপ্যশ্চ গোপাঃ কিল নন্দমুখ্যা
লব্ধ্বা পুনঃ প্রাপুরতীব মোদম্ ॥ ৩০ ॥

অহো বতাত্যদ্ভুতমেষ রক্ষসা
বালো
নিবৃত্তিং গমিতোঽভ্যগাত্ পুনঃ ।
হিংস্রঃ স্বপাপেন বিহিংসিতঃ
খলঃ
সাধুঃ সমত্বেন ভযাদ্ বিমুচ্যতে ॥ ৩১ ॥

কিং নস্তপশ্চীর্ণমধোক্ষজার্চনং
পূর্তেষ্টদত্তমুত ভূতসৌহৃদম্ ।
যত্সম্পরেতঃ পুনরেব বালকো
দিষ্টযা স্ববন্ধূন্ প্রণযন্নুপস্থিতঃ ॥ ৩২ ॥

দৃষ্ট্বাদ্ভুতানি বহুশো নন্দগোপো বৃহদ্বনে ।
বসুদেববচো ভূযো মানযামাস বিস্মিতঃ ॥ ৩৩ ॥

একদার্ভকমাদায স্বাঙ্কমারোপ্য ভামিনী ।
প্রস্নুতং পাযযামাস স্তনং স্নেহপরিপ্লুতা ॥ ৩৪ ॥

পীতপ্রাযস্য জননী সুতস্য রুচিরস্মিতম্ ।
মুখং লালযতী রাজঞ্জৃম্ভতো দদৃশে ইদম্ ॥ ৩৫ ॥

খং রোদসী জ্যোতিরনীকমাশাঃ
সূর্যেন্দুবহ্নিশ্বসনাম্বুধীংশ্চ ।
দ্বীপান্ নগাংস্তদ্দুহিতৃর্বনানি
ভূতানি যানি স্থিরজঙ্গমানি? ॥ ৩৬ ॥

সা বীক্ষ্য বিশ্বং সহসা রাজন্ সঞ্জাতবেপথুঃ ।
সম্মীল্য মৃগশাবাক্ষী নেত্রে আসীত্সুবিস্মিতা ॥ ৩৭ ॥