শ্রীমদ্ভাগবতম্ ১০.৭৫

শ্রীরাজোবাচ
অজাতশত্রোস্তং দৃষ্ট্বা রাজসূযমহোদযম্ ।
সর্বে মুমুদিরে ব্রহ্মন্ নৃদেবা যে সমাগতাঃ ॥ ১ ॥

দুর্যোধনং বর্জযিত্বা রাজানঃ সর্ষযঃ সুরাঃ ।
ইতি শ্রুতং নো ভগবংস্তত্র কারণমুচ্যতাম্ ॥ ২ ॥

শ্রীবাদরাযণিরুবাচ
পিতামহস্য তে যজ্ঞে রাজসূযে মহাত্মনঃ ।
বান্ধবাঃ পরিচর্যাযাং তস্যাসন্প্রেমবন্ধনাঃ ॥ ৩ ॥

ভীমো মহানসাধ্যক্ষো ধনাধ্যক্ষঃ সুযোধনঃ ।
সহদেবস্তু পূজাযাং নকুলো দ্রব্যসাধনে ॥ ৪ ॥

গুরুশুশ্রূষণে জিষ্ণুঃ কৃষ্ণঃ পাদাবনেজনে ।
পরিবেষণে দ্রুপদজা কর্ণো দানে মহামনাঃ ॥ ৫ ॥

যুযুধানো বিকর্ণশ্চ হার্দিক্যো বিদুরাদযঃ ।
বাহ্লীকপুত্রা ভূর্যাদ্যা যে চ সন্তর্দনাদযঃ ॥ ৬ ॥

নিরূপিতা মহাযজ্ঞে নানাকর্মসু তে তদা ।
প্রবর্তন্তে স্ম রাজেন্দ্র রাজ্ঞঃ প্রিযচিকীর্ষবঃ ॥ ৭ ॥

ঋত্বিক্সদস্যবহুবিত্সু সুহৃত্তমেষু
স্বিষ্টেষু সূনৃতসমর্হণদক্ষিণাভিঃ ।
চৈদ্যে চ সাত্বতপতেশ্চরণং প্রবিষ্টে
চক্রুস্ততস্ত্ববভৃথস্নপনং দ্যুনদ্যাম্ ॥ ৮ ॥

মৃদঙ্গশঙ্খপণবধুন্ধুর্যানকগোমুখাঃ ।
বাদিত্রাণি বিচিত্রাণি নেদুরাবভৃথোত্সবে ॥ ৯ ॥

নার্তক্যো ননৃতুর্হৃষ্টা গাযকা যূথশো জগুঃ ।
বীণাবেণুতলোন্নাদস্তেষাং স দিবমস্পৃশত্ ॥ ১০ ॥

চিত্রধ্বজপতাকাগ্রৈরিভেন্দ্রস্যন্দনার্বভিঃ ।
স্বলঙ্কৃতৈর্ভটৈর্ভূপা নির্যযূ রুক্মমালিনঃ ॥ ১১ ॥

যদুসৃঞ্জযকাম্বোজকুরুকেকযকোশলাঃ ।
কম্পযন্তো ভুবং সৈন্যৈর্যজমানপুরঃসরাঃ ॥ ১২ ॥

সদস্যর্ত্বিগ্দ্বিজশ্রেষ্ঠা ব্রহ্মঘোষেণভূযসা ।
দেবর্ষিপিতৃগন্ধর্বাস্তুষ্টুবুঃ পুষ্পবর্ষিণঃ ॥ ১৩ ॥

স্বলঙ্কৃতা নরা নার্যো গন্ধস্রগ্ভূষণাম্বরৈঃ ।
বিলিম্পন্ত্যোঽভিসিঞ্চন্ত্যো বিজহ্রুর্বিবিধৈ রসৈঃ ॥ ১৪ ॥

তৈলগোরসগন্ধোদহরিদ্রাসান্দ্রকুঙ্কুমৈঃ ।
পুম্ভির্লিপ্তাঃ প্রলিম্পন্ত্যো বিজহ্রুর্বারযোষিতঃ ॥ ১৫ ॥

গুপ্তা নৃভির্নিরগমন্নুপলব্ধুমেতদ্
দেব্যো যথা দিবি বিমানবরৈর্নৃদেব্যো ।
তা মাতুলেযসখিভিঃ পরিষিচ্যমানাঃ
সব্রীডহাসবিকসদ্বদনা বিরেজুঃ ॥ ১৬ ॥

তা দেবরানুত সখীন্ সিষিচুর্দৃতীভিঃ
ক্লিন্নাম্বরা বিবৃতগাত্রকুচোরুমধ্যাঃ ।
ঔত্সুক্যমুক্তকবরাচ্চ্যবমানমাল্যাঃ
ক্ষোভং দধুর্মলধিযাং রুচিরৈর্বিহারৈঃ ॥ ১৭ ॥

স সম্রাড্ রথমারুঢঃ সদশ্বং রুক্মমালিনম্ ।
ব্যরোচত স্বপত্নীভিঃ ক্রিযাভিঃ ক্রতুরাডিব ॥ ১৮ ॥

পত্নীসংযাজাবভৃথ্যৈশ্চরিত্বা তে তমৃত্বিজঃ ।
আচান্তং স্নাপযাং চক্রুর্গঙ্গাযাং সহ কৃষ্ণযা ॥ ১৯ ॥

দেবদুন্দুভযো নেদুর্নরদুন্দুভিভিঃ সমম্ ।
মুমুচুঃ পুষ্পবর্ষাণি দেবর্ষিপিতৃমানবাঃ ॥ ২০ ॥

সস্নুস্তত্র ততঃ সর্বে বর্ণাশ্রমযুতা নরাঃ ।
মহাপাতক্যপি যতঃ সদ্যো মুচ্যেত কিল্বিষাত্ ॥ ২১ ॥

অথ রাজাহতে ক্ষৌমে পরিধায স্বলঙ্কৃতঃ ।
ঋত্বিক্সদস্যবিপ্রাদীনানর্চাভরণাম্বরৈঃ ॥ ২২ ॥

বন্ধূঞ্জ্ঞাতীন্ নৃপান্ মিত্রসুহৃদোঽন্যাংশ্চ সর্বশঃ ।
অভীক্ষ্ণং পূজযামাস নারাযণপরো নৃপঃ ॥ ২৩ ॥

সর্বে জনাঃ সুররুচো মণিকুণ্ডলস্র-
গুষ্ণীষকঞ্চুকদুকূলমহার্ঘ্যহারাঃ ।
নার্যশ্চ কুণ্ডলযুগালকবৃন্দজুষ্ট-
বক্ত্রশ্রিযঃ কনকমেখলযা বিরেজুঃ ॥ ২৪ ॥

অথর্ত্বিজো মহাশীলাঃ সদস্যা ব্রহ্মবাদিনঃ ।
ব্রহ্মক্ষত্রিযবিট্শূদ্রা রাজানো যে সমাগতাঃ ॥ ২৫ ॥

দেবর্ষিপিতৃভূতানি লোকপালাঃ সহানুগাঃ ।
পূজিতাস্তমনুজ্ঞাপ্য স্বধামানি যযুর্নৃপ ॥ ২৬ ॥

হরিদাসস্য রাজর্ষে রাজসূযমহোদযম্ ।
নৈবাতৃপ্যন্প্রশংসন্তঃ পিবন্মর্ত্যোঽমৃতং যথা ॥ ২৭ ॥

ততো যুধিষ্ঠিরো রাজা সুহৃত্সম্বন্ধিবান্ধবান্ ।
প্রেম্ণা নিবারযামাস কৃষ্ণং চ ত্যাগকাতরঃ ॥ ২৮ ॥

ভগবানপি তত্রাঙ্গ ন্যাবাত্সীত্তত্প্রিযংকরঃ ।
প্রস্থাপ্য যদুবীরাংশ্চ সাম্বাদীংশ্চ কুশস্থলীম্ ॥ ২৯ ॥

ইত্থং রাজা ধর্মসুতো মনোরথমহার্ণবম্ ।
সুদুস্তরং সমুত্তীর্য কৃষ্ণেনাসীদ্ গতজ্বরঃ ॥ ৩০ ॥

একদান্তঃপুরে তস্য বীক্ষ্য দুর্যোধনঃ শ্রিযম্ ।
অতপ্যদ্ রাজসূযস্য মহিত্বং চাচ্যুতাত্মনঃ ॥ ৩১ ॥

যস্মিন্ নরেন্দ্রদিতিজেন্দ্রসুরেন্দ্রলক্ষ্মী-
র্নানা বিভান্তি কিল বিশ্বসৃজোপক্লৃপ্তাঃ ।
তাভিঃ পতীন্ দ্রুপদরাজসুতোপতস্থে
যস্যাং বিষক্তহৃদযঃ কুরুরাডতপ্যত্ ॥ ৩২ ॥

যস্মিন্ তদা মধুপতের্মহিষীসহস্রং
শ্রোণীভরেণ শনকৈঃ ক্বণদঙ্ঘ্রিশোভম্ ।
মধ্যে সুচারু কুচকুঙ্কুমশোণহারং
শ্রীমন্মুখং প্রচলকুণ্ডলকুন্তলাঢ্যম্ ॥ ৩৩ ॥

সভাযাং মযক্লৃপ্তাযাং ক্বাপি ধর্মসুতোঽধিরাট্ ।
বৃতোঽনুগৈর্বন্ধুভিশ্চ কৃষ্ণেনাপি স্বচক্ষুষা ॥ ৩৪ ॥

আসীনঃ কাঞ্চনে সাক্ষাদাসনে মঘবানিব ।
পারমেষ্ঠ্যশ্রিযা জুষ্টঃ স্তূযমানশ্চ বন্দিভিঃ ॥ ৩৫ ॥

তত্র দুর্যোধনো মানী পরীতো ভ্রাতৃভির্নৃপ ।
কিরীটমালী ন্যবিশদসিহস্তঃ ক্ষিপন্ রুষা ॥ ৩৬ ॥

স্থলেঽভ্যগৃহ্ণাদ্ বস্ত্রান্তং জলং মত্বা স্থলেঽপতত্ ।
জলে চ স্থলবদ্ ভ্রান্ত্যা মযমাযাবিমোহিতঃ ॥ ৩৭ ॥

জহাস ভীমস্তং দৃষ্ট্বা স্ত্রিযো নৃপতযোঽপরে ।
নিবার্যমাণা অপ্যঙ্গ রাজ্ঞা কৃষ্ণানুমোদিতাঃ ॥ ৩৮ ॥

স ব্রীডিতোঽবাগ্বদনো রুষা জ্বলন্
নিষ্ক্রম্য তূষ্ণীং প্রযযৌ গজাহ্বযম্ ।
হাহেতি শব্দঃ সুমহানভূত্ সতা-
মজাতশত্রুর্বিমনা ইবাভবত্ ।
বভূব তূষ্ণীং ভগবান্ ভুবো ভরং
সমুজ্জিহীর্ষুর্ভ্রমতি স্ম যদ্ দৃশা ॥ ৩৯ ॥

এতত্তেঽভিহিতং রাজন্ যত্পৃষ্টোঽহমিহ ত্বযা ।
সুযোধনস্য দৌরাত্ম্যং রাজসূযে মহাক্রতৌ ॥ ৪০ ॥