শ্রীমদ্ভাগবতম্ ১০.৮

শ্রীশুক উবাচ
গর্গঃ পুরোহিতো রাজন্ যদূনাং সুমহাতপাঃ ।
ব্রজং জগাম নন্দস্য বসুদেবপ্রচোদিতঃ ॥ ১ ॥

তং দৃষ্ট্বা পরমপ্রীতঃ প্রত্যুত্থায কৃতাঞ্জলিঃ ।
আনর্চাধোক্ষজধিযা প্রণিপাতপুরঃসরম্ ॥ ২ ॥

সূপবিষ্টং কৃতাতিথ্যং গিরা সূনৃতযা মুনিম্ ।
নন্দযিত্বাব্রবীদ্ ব্রহ্মন্পূর্ণস্য করবাম কিম্ ॥ ৩ ॥

মহদ্বিচলনং নৃণাং গৃহিণাং দীনচেতসাম্ ।
নিঃশ্রেযসায ভগবন্কল্পতে নান্যথা ক্বচিত্ ॥ ৪ ॥

জ্যোতিষামযনং সাক্ষাদ্ যত্তজ্জ্ঞানমতীন্দ্রিযম্ ।
প্রণীতং ভবতা যেন পুমান্ বেদ পরাবরম্ ॥ ৫ ॥

ত্বং হি ব্রহ্মবিদাং শ্রেষ্ঠঃ সংস্কারান্কর্তুমর্হসি ।
বালযোরনযোর্নৃণাং জন্মনা ব্রাহ্মণো গুরুঃ ॥ ৬ ॥

শ্রীগর্গ উবাচ
যদূনামহমাচার্যঃ খ্যাতশ্চ ভুবি সর্বদা ।
সুতং মযা সংস্কৃতং তে মন্যতে দেবকীসুতম্ ॥ ৭ ॥

কংসঃ পাপমতিঃ সখ্যং তব চানকদুন্দুভেঃ ।
দেবক্যা অষ্টমো গর্ভো ন স্ত্রী ভবিতুমর্হতি ॥ ৮ ॥

ইতি সঞ্চিন্তযঞ্ছ্রুত্বা দেবক্যা দারিকাবচঃ ।
অপি হন্তা গতাশঙ্কস্তর্হি তন্নোঽনযো ভবেত্ ॥ ৯ ॥

শ্রীনন্দ উবাচ
অলক্ষিতোঽস্মিন্ রহসি মামকৈরপি গোব্রজে ।
কুরু দ্বিজাতিসংস্কারং স্বস্তিবাচনপূর্বকম্ ॥ ১০ ॥

শ্রীশুক উবাচ
এবং সম্প্রার্থিতো বিপ্রঃ স্বচিকীর্ষিতমেব তত্ ।
চকার নামকরণং গূঢো রহসি বালযোঃ ॥ ১১ ॥

শ্রীগর্গ উবাচ
অযং হি রোহিণীপুত্রো রমযন্ সুহৃদো গুণৈঃ ।
আখ্যাস্যতে রাম ইতি বলাধিক্যাদ্বলং বিদুঃ ।
যদূনামপৃথগ্ভাবাত্ সঙ্কর্ষণমুশন্ত্যপি ॥ ১২ ॥

আসন্ বর্ণাস্ত্রযো হ্যস্য গৃহ্ণতোঽনুযুগং তনূঃ ।
শুক্লো রক্তস্তথা পীত ইদানীং কৃষ্ণতাং গতঃ ॥ ১৩ ॥

প্রাগযং বসুদেবস্য ক্বচিজ্জাতস্তবাত্মজঃ ।
বাসুদেব ইতি শ্রীমানভিজ্ঞাঃ সম্প্রচক্ষতে ॥ ১৪ ॥

বহূনি সন্তি নামানি রূপাণি চ সুতস্য তে ।
গুণকর্মানুরূপাণি তান্যহং বেদ নো জনাঃ ॥ ১৫ ॥

এষ বঃ শ্রেয আধাস্যদ্ গোপগোকুলনন্দনঃ ।
অনেন সর্বদুর্গাণি যূযমঞ্জস্তরিষ্যথ ॥ ১৬ ॥

পুরানেন ব্রজপতে সাধবো দস্যুপীডিতাঃ ।
অরাজকে রক্ষ্যমাণা জিগ্যুর্দস্যূন্সমেধিতাঃ ॥ ১৭ ॥

য এতস্মিন্ মহাভাগাঃ প্রীতিং কুর্বন্তি মানবাঃ ।
নারযোঽভিভবন্ত্যেতান্ বিষ্ণুপক্ষানিবাসুরাঃ ॥ ১৮ ॥

তস্মান্নন্দাত্মজোঽযং তে নারাযণসমো গুণৈঃ ।
শ্রিযা কীর্ত্যানুভাবেন গোপাযস্ব সমাহিতঃ ॥ ১৯ ॥

শ্রীশুক উবাচ
ইত্যাত্মানং সমাদিশ্য গর্গে চ স্বগৃহং গতে ।
নন্দঃ প্রমুদিতো মেনে আত্মানং পূর্ণমাশিষাম্ ॥ ২০ ॥

কালেন ব্রজতাল্পেন গোকুলে রামকেশবৌ ।
জানুভ্যাং সহ পাণিভ্যাং রিঙ্গমাণৌ বিজহ্রতুঃ ॥ ২১ ॥

তাবঙ্ঘ্রিযুগ্মমনুকৃষ্য সরীসৃপন্তৌ
ঘোষপ্রঘোষরুচিরং ব্রজকর্দমেষু ।
তন্নাদহৃষ্টমনসাবনুসৃত্য লোকং
মুগ্ধপ্রভীতবদুপেযতুরন্তি মাত্রোঃ ॥ ২২ ॥

তন্মাতরৌ নিজসুতৌ ঘৃণযা স্নুবন্ত্যৌ
পঙ্কাঙ্গরাগরুচিরাবুপগৃহ্য দোর্ভ্যাম্ ।
দত্ত্বা স্তনং প্রপিবতোঃ স্ম মুখং নিরীক্ষ্য
মুগ্ধস্মিতাল্পদশনং যযতুঃ প্রমোদম্ ॥ ২৩ ॥

যর্হ্যঙ্গনাদর্শনীযকুমারলীলা-
বন্তর্ব্রজে তদবলাঃ প্রগৃহীতপুচ্ছৈঃ ।
বত্সৈরিতস্তত উভাবনুকৃষ্যমাণৌ
প্রেক্ষন্ত্য উজ্ঝিতগৃহা জহৃষুর্হসন্ত্যঃ ॥ ২৪ ॥

শৃঙ্গ্যগ্নিদংষ্ট্র্যসিজলদ্বিজকণ্টকেভ্যঃ
ক্রীডাপরাবতিচলৌ স্বসুতৌ নিষেদ্ধুম্ ।
গৃহ্যাণি কর্তুমপি যত্র ন তজ্জনন্যৌ
শেকাত আপতুরলং মনসোঽনবস্থাম্ ॥ ২৫ ॥

কালেনাল্পেন রাজর্ষে রামঃ কৃষ্ণশ্চ গোকুলে ।
অঘৃষ্টজানুভিঃ পদ্ভির্বিচক্রমতুরঞ্জসা ॥ ২৬ ॥

ততস্তু ভগবান্ কৃষ্ণো বযস্যৈর্ব্রজবালকৈঃ ।
সহরামো ব্রজস্ত্রীণাং চিক্রীডে জনযন্ মুদম্ ॥ ২৭ ॥

কৃষ্ণস্য গোপ্যো রুচিরং বীক্ষ্য কৌমারচাপলম্ ।
শৃণ্বন্ত্যাঃ কিল তন্মাতুরিতি হোচুঃ সমাগতাঃ ॥ ২৮ ॥

বত্সান্ মুঞ্চন্ ক্বচিদসমযে ক্রোশসঞ্জাতহাসঃ
স্তেযং স্বাদ্বত্ত্যথ দধিপযঃ কল্পিতৈঃ স্তেযযোগৈঃ ।
মর্কান্ ভোক্ষ্যন্ বিভজতি স চেন্নাত্তি ভাণ্ডং ভিন্নত্তি
দ্রব্যালাভে সগৃহকুপিতো যাত্যুপক্রোশ্য তোকান্ ॥ ২৯ ॥

হস্তাগ্রাহ্যে রচযতি বিধিং পীঠকোলূখলাদ্যৈ-
শ্ছিদ্রং হ্যন্তর্নিহিতবযুনঃ শিক্যভাণ্ডেষু তদ্বিত্ ।
ধ্বান্তাগারে ধৃতমণিগণং স্বাঙ্গমর্থপ্রদীপং
কালে গোপ্যো যর্হি গৃহকৃত্যেষু সুব্যগ্রচিত্তাঃ ॥ ৩০ ॥

এবং ধার্ষ্ট্যান্যুশতি কুরুতে মেহনাদীনি বাস্তৌ
স্তেযোপাযৈর্বিরচিতকৃতিঃ সুপ্রতীকো যথাস্তে ।
ইত্থং স্ত্রীভিঃ সভযনযনশ্রীমুখালোকিনীভি-
র্ব্যাখ্যাতার্থা প্রহসিতমুখী ন হ্যুপালব্ধুমৈচ্ছত্ ॥ ৩১ ॥

একদা ক্রীডমানাস্তে রামাদ্যা গোপদারকাঃ ।
কৃষ্ণো মৃদং ভক্ষিতবানিতি মাত্রে ন্যবেদযন্ ॥ ৩২ ॥

সা গৃহীত্বা করে কৃষ্ণমুপালভ্য হিতৈষিণী ।
যশোদা ভযসম্ভ্রান্তপ্রেক্ষণাক্ষমভাষত ॥ ৩৩ ॥

কস্মান্মৃদমদান্তাত্মন্ ভবান্ভক্ষিতবান্ রহঃ ।
বদন্তি তাবকা হ্যেতে কুমারাস্তেঽগ্রজোঽপ্যযম্ ॥ ৩৪ ॥

নাহং ভক্ষিতবানম্ব সর্বে মিথ্যাভিশংসিনঃ ।
যদি সত্যগিরস্তর্হি সমক্ষং পশ্য মে মুখম্ ॥ ৩৫ ॥

যদ্যেবং তর্হি ব্যাদেহীত্যুক্তঃ স ভগবান্হরিঃ ।
ব্যাদত্তাব্যাহতৈশ্বর্যঃ ক্রীডামনুজবালকঃ ॥ ৩৬ ॥

সা তত্র দদৃশে বিশ্বং জগত্স্থাস্নু চ খং দিশঃ ।
সাদ্রিদ্বীপাব্ধিভূগোলং সবায্বগ্নীন্দুতারকম্ ॥ ৩৭ ॥

জ্যোতিশ্চক্রং জলং তেজো নভস্বান্বিযদেব চ ।
বৈকারিকাণীন্দ্রিযাণি মনো মাত্রা গুণাস্ত্রযঃ ॥ ৩৮ ॥

এতদ্ বিচিত্রং সহজীবকাল-
স্বভাবকর্মাশযলিঙ্গভেদম্ ।
সূনোস্তনৌ বীক্ষ্য বিদারিতাস্যে
ব্রজং সহাত্মানমবাপ শঙ্কাম্? ॥ ৩৯ ॥

কিং স্বপ্ন এতদুত দেবমাযা
কিং বা মদীযো বত বুদ্ধিমোহঃ ।
অথো অমুষ্যৈব মমার্ভকস্য
যঃ কশ্চনৌত্পত্তিক আত্মযোগঃ ॥ ৪০ ॥

অথো যথাবন্ন বিতর্কগোচরং
চেতোমনঃকর্মবচোভিরঞ্জসা ।
যদাশ্রযং যেন যতঃ প্রতীযতে
সুদুর্বিভাব্যং প্রণতাস্মি তত্পদম্ ॥ ৪১ ॥

অহং মমাসৌ পতিরেষ মে সুতো
ব্রজেশ্বরস্যাখিলবিত্তপা সতী ।
গোপ্যশ্চ গোপাঃ সহগোধনাশ্চ মে
যন্মাযযেত্থং কুমতিঃ স মে গতিঃ ॥ ৪২ ॥

ইত্থং বিদিততত্ত্বাযাং গোপিকাযাং স ঈশ্বরঃ ।
বৈষ্ণবীং ব্যতনোন্মাযাং পুত্রস্নেহমযীং বিভুঃ ॥ ৪৩ ॥

সদ্যোনষ্টস্মৃতির্গোপী সারোপ্যারোহমাত্মজম্ ।
প্রবৃদ্ধস্নেহকলিলহৃদযাসীদ্ যথা পুরা ॥ ৪৪ ॥

ত্রয্যা চোপনিষদ্ভিশ্চ সাঙ্খ্যযোগৈশ্চ সাত্বতৈঃ ।
উপগীযমানমাহাত্ম্যং হরিং সামন্যতাত্মজম্ ॥ ৪৫ ॥

শ্রীরাজোবাচ
নন্দঃ কিমকরোদ্ ব্রহ্মন্শ্রেয এবং মহোদযম্ ।
যশোদা চ মহাভাগা পপৌ যস্যাঃ স্তনং হরিঃ ॥ ৪৬ ॥

পিতরৌ নান্ববিন্দেতাং কৃষ্ণোদারার্ভকেহিতম্ ।
গাযন্ত্যদ্যাপি কবযো যল্লোকশমলাপহম্ ॥ ৪৭ ॥

শ্রীশুক উবাচ
দ্রোণো বসূনাং প্রবরো ধরযা ভার্যযা সহ ।
করিষ্যমাণ আদেশান্ ব্রহ্মণস্তমুবাচ হ ॥ ৪৮ ॥

জাতযোর্নৌ মহাদেবে ভুবি বিশ্বেশ্বরে হরৌ ।
ভক্তিঃ স্যত্পরমা লোকে যযাঞ্জো দুর্গতিং তরেত্ ॥ ৪৯ ॥

অস্ত্বিত্যুক্তঃ স ভগবান্ব্রজে দ্রোণো মহাযশাঃ ।
জজ্ঞে নন্দ ইতি খ্যাতো যশোদা সা ধরাভবত্ ॥ ৫০ ॥

ততো ভক্তির্ভগবতি পুত্রীভূতে জনার্দনে ।
দম্পত্যোর্নিতরামাসীদ্ গোপগোপীষু ভারত ॥ ৫১ ॥

কৃষ্ণো ব্রহ্মণ আদেশং সত্যং কর্তুং ব্রজে বিভুঃ ।
সহরামো বসংশ্চক্রে তেষাং প্রীতিং স্বলীলযা ॥ ৫২ ॥