শ্রীমদ্ভাগবতম্ ১১.২৩

শ্রীবাদরাযণিরুবাচ
স এবমাশংসিত উদ্ধবেন
ভাগবতমুখ্যেন দাশার্হমুখ্যঃ ।
সভাজযন্ ভৃত্যবচো মুকুন্দ-
স্তমাবভাষে শ্রবণীযবীর্যঃ ॥ ১ ॥

শ্রীভগবানুবাচ
বার্হস্পত্য স নাস্ত্যত্র সাধুর্বৈ দুর্জনেরিতৈঃ ।
দুরক্তৈর্ভিন্নমাত্মানং যঃ সমাধাতুমীশ্বরঃ ॥ ২ ॥

ন তথা তপ্যতে বিদ্ধঃ পুমান্ বাণৈস্তু মর্মগৈঃ ।
যথা তুদন্তি মর্মস্থা হ্যসতাং পরুষেষবঃ ॥ ৩ ॥

কথযন্তি মহত্পুণ্যমিতিহাসমিহোদ্ধব ।
তমহং বর্ণযিষ্যামি নিবোধ সুসমাহিতঃ ॥ ৪ ॥

কেনচিদ্ ভিক্ষুণা গীতং পরিভূতেন দুর্জনৈঃ ।
স্মরতা ধৃতিযুক্তেন বিপাকং নিজকর্মণাম্ ॥ ৫ ॥

অবন্তিষু দ্বিজঃ কশ্চিদাসীদাঢ্যতমঃ শ্রিযা ।
বার্তাবৃত্তিঃ কদর্যস্তু কামী লুব্ধোঽতিকোপনঃ ॥ ৬ ॥

জ্ঞাতযোঽতিথযস্তস্য বাঙ্মাত্রেণাপি নার্চিতাঃ ।
শূন্যাবসথ আত্মাপি কালে কামৈরনর্চিতঃ ॥ ৭ ॥

দুঃশীলস্য কদর্যস্য দ্রুহ্যন্তে পুত্রবান্ধবাঃ ।
দারা দুহিতরো ভৃত্যা বিষণ্ণা নাচরন্ প্রিযম্ ॥ ৮ ॥

তস্যৈবং যক্ষবিত্তস্য চ্যুতস্যোভযলোকতঃ ।
ধর্মকামবিহীনস্য চুক্রুধুঃ পঞ্চভাগিনঃ ॥ ৯ ॥

তদবধ্যানবিস্রস্তপুণ্যস্কন্ধস্য ভূরিদ ।
অর্থোঽপ্যগচ্ছন্নিধনং বহ্বাযাসপরিশ্রমঃ ॥ ১০ ॥

জ্ঞাতযো জগৃহুঃ কিঞ্চিত্ কিঞ্চিদ্ দস্যব উদ্ধব ।
দৈবতঃ কালতঃ কিঞ্চিদ্ ব্রহ্মবন্ধোর্নৃপার্থিবাত্ ॥ ১১ ॥

স এবং দ্রবিণে নষ্টে ধর্মকামবিবর্জিতঃ ।
উপেক্ষিতশ্চ স্বজনৈশ্চিন্তামাপ দুরত্যযাম্ ॥ ১২ ॥

তস্যৈবং ধ্যাযতো দীর্ঘং নষ্টরাযস্তপস্বিনঃ ।
খিদ্যতো বাষ্পকণ্ঠস্য নির্বেদঃ সুমহানভূত্ ॥ ১৩ ॥

স চাহেদমহো কষ্টং বৃথাত্মা মেঽনুতাপিতঃ ।
ন ধর্মায ন কামায যস্যার্থাযাস ঈদৃশঃ ॥ ১৪ ॥

প্রাযেণার্থাঃ কদর্যাণাং ন সুখায কদাচন ।
ইহ চাত্মোপতাপায মৃতস্য নরকায চ ॥ ১৫ ॥

যশো যশস্বিনাং শুদ্ধং শ্লাঘ্যা যে গুণিনাং গুণাঃ ।
লোভঃ স্বল্পোঽপি তান্ হন্তি শ্বিত্রো রূপমিবেপ্সিতম্ ॥ ১৬ ॥

অর্থস্য সাধনে সিদ্ধে উত্কর্ষে রক্ষণে ব্যযে ।
নাশোপভোগ আযাসস্ত্রাসশ্চিন্তা ভ্রমো নৃণাম্ ॥ ১৭ ॥

স্তেযং হিংসানৃতং দম্ভঃ কামঃ ক্রোধঃ স্মযো মদঃ ।
ভেদো বৈরমবিশ্বাসঃ সংস্পর্ধা ব্যসনানি চ ॥ ১৮ ॥

এতে পঞ্চদশানর্থা হ্যর্থমূলা মতা নৃণাম্ ।
তস্মাদনর্থমর্থাখ্যং শ্রেযোঽর্থী দূরতস্ত্যজেত্ ॥ ১৯ ॥

ভিদ্যন্তে ভ্রাতরো দারাঃ পিতরঃ সুহৃদস্তথা ।
একাস্নিগ্ধাঃ কাকিণিনা সদ্যঃ সর্বেঽরযঃ কৃতাঃ ॥ ২০ ॥

অর্থেনাল্পীযসা হ্যেতে সংরব্ধা দীপ্তমন্যবঃ ।
ত্যজন্ত্যাশু স্পৃধো ঘ্নন্তি সহসোত্সৃজ্য সৌহৃদম্ ॥ ২১ ॥

লব্ধ্বা জন্মামরপ্রার্থ্যং মানুষ্যং তদ্দ্বিজাগ্র্যতাম্ ।
তদনাদৃত্য যে স্বার্থং ঘ্নন্তি যান্ত্যশুভাং গতিম্ ॥ ২২ ॥

স্বর্গাপবর্গযোর্দ্বারং প্রাপ্য লোকমিমং পুমান্ ।
দ্রবিণে কোঽনুষজ্জেত মর্ত্যোঽনর্থস্য ধামনি ॥ ২৩ ॥

দেবর্ষিপিতৃভূতানি জ্ঞাতীন্ বন্ধূংশ্চ ভাগিনঃ ।
অসংবিভজ্য চাত্মানং যক্ষবিত্তঃ পতত্যধঃ ॥ ২৪ ॥

ব্যর্থযার্থেহযা বিত্তং প্রমত্তস্য বযো বলম্ ।
কুশলা যেন সিধ্যন্তি জরঠঃ কিং নু সাধযে ॥ ২৫ ॥

কস্মাত্ সঙ্ক্লিশ্যতে বিদ্বান্ ব্যর্থযার্থেহযাসকৃত্ ।
কস্যচিন্মাযযা নূনং লোকোঽযং সুবিমোহিতঃ ॥ ২৬ ॥

কিং ধনৈর্ধনদৈর্বা কিং কামৈর্বা কামদৈরুত ।
মৃত্যুনা গ্রস্যমানস্য কর্মভির্বোত জন্মদৈঃ ॥ ২৭ ॥

নূনং মে ভগবাংস্তুষ্টঃ সর্বদেবমযো হরিঃ ।
যেন নীতো দশামেতাং নির্বেদশ্চাত্মনঃ প্লবঃ ॥ ২৮ ॥

সোঽহং কালাবশেষেণ শোষযিষ্যেঽঙ্গমাত্মনঃ ।
অপ্রমত্তোঽখিলস্বার্থে যদি স্যাত্ সিদ্ধ আত্মনি ॥ ২৯ ॥

তত্র মামনুমোদেরন্ দেবাত্রিভুবনেশ্বরাঃ ।
মুহূর্তেন ব্রহ্মলোকং খট্বাঙ্গঃ সমসাধযত্ ॥ ৩০ ॥

শ্রীভগবানুবাচ
ইত্যভিপ্রেত্য মনসা হ্যাবন্ত্যো দ্বিজসত্তমঃ ।
উন্মুচ্য হৃদযগ্রন্থীন্ শান্তো ভিক্ষুরভূন্মুনিঃ ॥ ৩১ ॥

স চচার মহীমেতাং সংযতাত্মেন্দ্রিযানিলঃ ।
ভিক্ষার্থং নগরগ্রামানসঙ্গোঽলক্ষিতোঽবিশত্ ॥ ৩২ ॥

তং বৈ প্রবযসং ভিক্ষুমবধূতমসজ্জনাঃ ।
দৃষ্ট্বা পর্যভবন্ ভদ্র বহ্বীভিঃ পরিভূতিভিঃ ॥ ৩৩ ॥

কেচিত্ত্রিবেণুং জগৃহুরেকে পাত্রং কমণ্ডলুম্ ।
পীঠং চৈকেঽক্ষসূত্রং চ কন্থাং চীরাণি কেচন ।
প্রদায চ পুনস্তানি দর্শিতান্যাদদুর্মুনেঃ ॥ ৩৪ ॥

অন্নং চ ভৈক্ষ্যসম্পন্নং ভুঞ্জানস্য সরিত্তটে ।
মূত্রযন্তি চ পাপিষ্ঠাঃ ষ্ঠীবন্ত্যস্য চ মূর্ধনি ॥ ৩৫ ॥

যতবাচং বাচযন্তি তাডযন্তি ন বক্তি চেত্ ।
তর্জযন্ত্যপরে বাগ্ভিঃ স্তেনোঽযমিতি বাদিনঃ ।
বধ্নন্তি রজ্জ্বা তং কেচিদ্ বধ্যতাং বধ্যতামিতি ॥ ৩৬ ॥

ক্ষিপন্ত্যেকেঽবজানন্ত এষ ধর্মধ্বজঃ শঠঃ ।
ক্ষীণবিত্ত ইমাং বৃত্তিমগ্রহীত্ স্বজনোজ্ঝিতঃ ॥ ৩৭ ॥

অহো এষ মহাসারো ধৃতিমান্গিরিরাডিব ।
মৌনেন সাধযত্যর্থং বকবদ্দৃঢনিশ্চযঃ ॥ ৩৮ ॥

ইত্যেকে বিহসন্ত্যেনমেকে দুর্বাতযন্তি চ ।
তং ববন্ধুর্নিরুরুধুর্যথা ক্রীডনকং দ্বিজম্ ॥ ৩৯ ॥

এবং স ভৌতিকং দুঃখং দৈবিকং দৈহিকং চ যত্ ।
ভোক্তব্যমাত্মনো দিষ্টং প্রাপ্তং প্রাপ্তমবুধ্যত ॥ ৪০ ॥

পরিভূত ইমাং গাথামগাযত নরাধমৈঃ ।
পাতযদ্ভিঃ স্ব ধর্মস্থো ধৃতিমাস্থায সাত্ত্বিকীম্ ॥ ৪১ ॥

দ্বিজ উবাচ
নাযং জনো মে সুখদুঃখহেতু-
র্ন দেবতাত্মা গ্রহকর্মকালাঃ ।
মনঃ পরং কারণমামনন্তি
সংসারচক্রং পরিবর্তযেদ্ যত্ ॥ ৪২ ॥

মনো গুণান্ বৈ সৃজতে বলীয-
স্ততশ্চ কর্মাণি বিলক্ষণানি ।
শুক্লানি কৃষ্ণান্যথ লোহিতানি
তেভ্যঃ সবর্ণাঃ সৃতযো ভবন্তি ॥ ৪৩ ॥

অনীহ আত্মা মনসা সমীহতা
হিরণ্মযো মত্সখ উদ্বিচষ্টে ।
মনঃ স্বলিঙ্গং পরিগৃহ্য কামান্
জুষন্ নিবদ্ধো গুণসঙ্গতোঽসৌ ॥ ৪৪ ॥

দানং স্বধর্মো নিযমো যমশ্চ
শ্রুতং চ কর্মাণি চ সদ্ব্রতানি ।
সর্বে মনোনিগ্রহলক্ষণান্তাঃ
পরো হি যোগো মনসঃ সমাধিঃ ॥ ৪৫ ॥

সমাহিতং যস্য মনঃ প্রশান্তং
দানাদিভিঃ কিং বদ তস্য কৃত্যম্ ।
অসংযতং যস্য মনো বিনশ্যদ্
দানাদিভিশ্চেদপরং কিমেভিঃ ॥ ৪৬ ॥

মনোবশেঽন্যে হ্যভবন্ স্ম দেবা
মনশ্চ নান্যস্য বশং সমেতি ।
ভীষ্মো হি দেবঃ সহসঃ সহীযান্
যুঞ্জ্যাদ বশে তং স হি দেবদেবঃ ॥ ৪৭ ॥

তং দুর্জযং শত্রুমসহ্যবেগ-
মরুন্তুদং তন্ন বিজিত্য কেচিত্ ।
কুর্বন্ত্যসদ্বিগ্রহমত্র মর্ত্যৈ-
র্মিত্রাণ্যুদাসীনরিপূন্ বিমূঢাঃ ॥ ৪৮ ॥

দেহং মনোমাত্রমিমং গৃহীত্বা
মমাহমিত্যন্ধধিযো মনুষ্যাঃ ।
এষোঽহমন্যোঽযমিতি ভ্রমেণ
দুরন্তপারে তমসি ভ্রমন্তি ॥ ৪৯ ॥

জনস্তু হেতুঃ সুখদুঃখযোশ্চেত্
কিমাত্মনশ্চাত্র হি ভৌমযোস্তত্ ।
জিহ্বাং ক্বচিত্ সন্দশতি স্বদদ্ভি-
স্তদ্বেদনাযাং কতমায কুপ্যেত্ ॥ ৫০ ॥

দুঃখস্য হেতুর্যদি দেবতাস্তু
কিমাত্মনস্তত্র বিকারযোস্তত্ ।
যদঙ্গমঙ্গেন নিহন্যতে ক্বচিত্
ক্রুধ্যেত কস্মৈ পুরুষঃ স্বদেহে ॥ ৫১ ॥

আত্মা যদি স্যাত্ সুখদুঃখহেতুঃ
কিমন্যতস্তত্র নিজস্বভাবঃ ।
ন হ্যাত্মনোঽন্যদ্ যদি তন্মৃষা স্যাত্
ক্রুধ্যেত কস্মান্ন সুখং ন দুঃখম্ ॥ ৫২ ॥

গ্রহানিমিত্তং সুখদুঃখযোশ্চেত্
কিমাত্মনোঽজস্য জনস্য তে বৈ ।
গ্রহৈর্গ্রহস্যৈববদন্তিপীডাং
ক্রুধ্যেত কস্মৈপুরুষস্ততোঽন্যঃ ॥ ৫৩ ॥

কর্মাস্তুহেতুঃ সুখদুঃখযোশ্চেত্
কিমাত্মনস্তদ্ধিজডাজডত্বে ।
দেহস্ত্বচিত্ পুরুষোঽযং সুপর্ণঃ
ক্রুধ্যেত কস্মৈ ন হি কর্মমূলম্ ॥ ৫৪ ॥

কালস্তুহেতুঃ সুখদুঃখযোশ্চেত্
কিমাত্মনস্তত্রতদাত্মকোঽসৌ ।
নাগ্নের্হি তাপো ন হিমস্য তত্ স্যাত্
ক্রুধ্যেত কস্মৈ ন পরস্য দ্বন্দ্বম্ ॥ ৫৫ ॥

ন কেনচিত্ ক্বাপি কথঞ্চনাস্য
দ্বন্দ্বোপরাগঃ পরতঃ পরস্য ।
যথাহমঃ সংসৃতিরূপিণঃ স্যা-
দেবং প্রবুদ্ধো ন বিভেতি ভূতৈঃ ॥ ৫৬ ॥

এতাং স আস্থায পরাত্মনিষ্ঠা-
মধ্যাসিতাং পূর্বতমৈর্মহর্ষিভিঃ ।
অহং তরিষ্যামি দুরন্তপারং
তমো মুকুন্দাঙ্ঘ্রিনিষেবযৈব ॥ ৫৭ ॥

শ্রীভগবানুবাচ
নির্বিদ্য নষ্টদ্রবিণে গতক্লমঃ
প্রব্রজ্য গাং পর্যটমান ইত্থম্ ।
নিরাকৃতোঽসদ্ভিরপি স্বধর্মা-
দকম্পিতোঽমূং মুনিরাহ গাথাম্ ॥ ৫৮ ॥

সুখদুঃখপ্রদো নান্যঃ পুরুষস্যাত্মবিভ্রমঃ ।
মিত্রোদাসীনরিপবঃ সংসারস্তমসঃ কৃতঃ ॥ ৫৯ ॥

তস্মাত্ সর্বাত্মনা তাত নিগৃহাণ মনো ধিযা ।
ময্যাবেশিতযা যুক্ত এতাবান্ যোগসঙ্গ্রহঃ ॥ ৬০ ॥

য এতাং ভিক্ষুণা গীতাং ব্রহ্মনিষ্ঠাং সমাহিতঃ ।
ধারযঞ্ছ্রাবযঞ্ছৃণ্বন্দ্বন্দ্বৈর্নৈবাভিভূযতে ॥ ৬১ ॥