শ্রীমদ্ভাগবতম্ ২.১০

শ্রীশুক উবাচ
অত্র সর্গো বিসর্গশ্চ স্থানং পোষণমূতযঃ ।
মন্বন্তরেশানুকথা নিরোধো মুক্তিরাশ্রযঃ ॥ ১ ॥

দশমস্য বিশুদ্ধ্যর্থং নবানামিহ লক্ষণম্ ।
বর্ণযন্তি মহাত্মানঃ শ্রুতেনার্থেন চাঞ্জসা ॥ ২ ॥

ভূতমাত্রেন্দ্রিযধিযাং জন্ম সর্গ উদাহৃতঃ ।
ব্রহ্মণো গুণবৈষম্যাদ্বিসর্গঃ পৌরুষঃ স্মৃতঃ ॥ ৩ ॥

স্থিতির্বৈকুণ্ঠবিজযঃ পোষণং তদনুগ্রহঃ ।
মন্বন্তরাণি সদ্ধর্ম ঊতযঃ কর্মবাসনাঃ ॥ ৪ ॥

অবতারানুচরিতং হরেশ্চাস্যানুবর্তিনাম্ ।
পুংসামীশকথাঃ প্রোক্তা নানাখ্যানোপবৃংহিতাঃ ॥ ৫ ॥

নিরোধোঽস্যানুশযনমাত্মনঃ সহ শক্তিভিঃ ।
মুক্তির্হিত্বান্যথারূপং স্বরূপেণ ব্যবস্থিতিঃ ॥ ৬ ॥

আভাসশ্চ নিরোধশ্চ যতোঽস্ত্যধ্যবসীযতে ।
স আশ্রযঃ পরং ব্রহ্ম পরমাত্মেতি শব্দ্যতে ॥ ৭ ॥

যোঽধ্যাত্মিকোঽযং পুরুষঃ সোঽসাবেবাধিদৈবিকঃ ।
যস্তত্রোভযবিচ্ছেদঃ পুরুষো হ্যাধিভৌতিকঃ ॥ ৮ ॥

একমেকতরাভাবে যদা নোপলভামহে ।
ত্রিতযং তত্র যো বেদ স আত্মা স্বাশ্রযাশ্রযঃ ॥ ৯ ॥

পুরুষোঽণ্ডং বিনির্ভিদ্য যদাসৌ স বিনির্গতঃ ।
আত্মনোঽযনমন্বিচ্ছন্নপোঽস্রাক্ষীচ্ছুচিঃ শুচীঃ ॥ ১০ ॥

তাস্ববাত্সীত্ স্বসৃষ্টাসু সহস্রংপরিবত্সরান্ ।
তেন নারাযণো নাম যদাপঃ পুরুষোদ্ভবাঃ ॥ ১১ ॥

দ্রব্যং কর্ম চ কালশ্চ স্বভাবো জীব এব চ ।
যদনুগ্রহতঃ সন্তি ন সন্তি যদুপেক্ষযা ॥ ১২ ॥

একো নানাত্বমন্বিচ্ছন্ যোগতল্পাত্ সমুত্থিতঃ ।
বীর্যং হিরণ্মযং দেবো মাযযা ব্যসৃজত্ ত্রিধা ॥ ১৩ ॥

অধিদৈবমথাধ্যাত্মমধিভূতমিতি প্রভুঃ ।
অথৈকং পৌরুষং বীর্যং ত্রিধাভিদ্যত তচ্ছৃণু ॥ ১৪ ॥

অন্তঃশরীর আকাশাত্ পুরুষস্য বিচেষ্টতঃ ।
ওজঃ সহো বলং জজ্ঞে ততঃ প্রাণো মহানসুঃ ॥ ১৫ ॥

অনুপ্রাণন্তি যং প্রাণাঃ প্রাণন্তং সর্বজন্তুষু ।
অপানন্তমপানন্তি নরদেবমিবানুগাঃ ॥ ১৬ ॥

প্রাণেনাক্ষিপতা ক্ষুত্ তৃডন্তরা জাযতে বিভোঃ ।
পিপাসতো জক্ষতশ্চ প্রাঙ্মুখং নিরভিদ্যত ॥ ১৭ ॥

মুখতস্তালু নির্ভিন্নং জিহ্বা তত্রোপজাযতে ।
ততো নানারসো জজ্ঞে জিহ্বযা যোঽধিগম্যতে ॥ ১৮ ॥

বিবক্ষোর্মুখতো ভূম্নো বহ্নির্বাগ্ ব্যাহৃতং তযোঃ ।
জলে চৈতস্য সুচিরং নিরোধঃ সমজাযত ॥ ১৯ ॥

নাসিকে নিরভিদ্যেতাং দোধূযতি নভস্বতি ।
তত্র বাযুর্গন্ধবহো ঘ্রাণো নসি জিঘৃক্ষতঃ ॥ ২০ ॥

যদাত্মনি নিরালোকমাত্মানং চ দিদৃক্ষতঃ ।
নির্ভিন্নে হ্যক্ষিণী তস্য জ্যোতিশ্চক্ষুর্গুণগ্রহঃ ॥ ২১ ॥

বোধ্যমানস্য ঋষিভিরাত্মনস্তজ্জিঘৃক্ষতঃ ।
কর্ণৌ চ নিরভিদ্যেতাং দিশঃ শ্রোত্রং গুণগ্রহঃ ॥ ২২ ॥

বস্তুনো মৃদুকাঠিন্যলঘুগুর্বোষ্ণশীততাম্ ।
জিঘৃক্ষতস্ত্বঙ্ নির্ভিন্না তস্যাং রোমমহীরুহাঃ ।
তত্র চান্তর্বহির্বাতস্ত্বচা লব্ধগুণো বৃতঃ ॥ ২৩ ॥

হস্তৌ রুরুহতুস্তস্য নানাকর্মচিকীর্ষযা ।
তযোস্তু বলবানিন্দ্র আদানমুভযাশ্রযম্ ॥ ২৪ ॥

গতিং জিগীষতঃ পাদৌ রুরুহাতেঽভিকামিকাম্ ।
পদ্ভ্যাং যজ্ঞঃ স্বযং হব্যং কর্মভিঃ ক্রিযতে নৃভিঃ ॥ ২৫ ॥

নিরভিদ্যত শিশ্নো বৈ প্রজানন্দামৃতার্থিনঃ ।
উপস্থ আসীত্ কামানাং প্রিযং তদুভযাশ্রযম্ ॥ ২৬ ॥

উত্সিসৃক্ষোর্ধাতুমলং নিরভিদ্যত বৈ গুদম্ ।
ততঃ পাযুস্ততো মিত্র উত্সর্গ উভযাশ্রযঃ ॥ ২৭ ॥

আসিসৃপ্সোঃ পুরঃ পুর্যা নাভিদ্বারমপানতঃ ।
তত্রাপানস্ততো মৃত্যুঃ পৃথক্ত্বমুভযাশ্রযম্ ॥ ২৮ ॥

আদিত্সোরন্নপানানামাসন্ কুক্ষ্যন্ত্রনাডযঃ ।
নদ্যঃ সমুদ্রাশ্চ তযোস্তুষ্টিঃ পুষ্টিস্তদাশ্রযে ॥ ২৯ ॥

নিদিধ্যাসোরাত্মমাযাং হৃদযং নিরভিদ্যত ।
ততো মনশ্চন্দ্র ইতি সঙ্কল্পঃ কাম এব চ ॥ ৩০ ॥

ত্বক্চর্মমাংসরুধিরমেদোমজ্জাস্থিধাতবঃ ।
ভূম্যপ্তেজোমযাঃ সপ্ত প্রাণো ব্যোমাম্বুবাযুভিঃ ॥ ৩১ ॥

গুণাত্মকানীন্দ্রিযাণি ভূতাদিপ্রভবা গুণাঃ ।
মনঃ সর্ববিকারাত্মা বুদ্ধির্বিজ্ঞানরূপিণী ॥ ৩২ ॥

এতদ্ভগবতো রূপং স্থূলং তে ব্যাহৃতং মযা ।
মহ্যাদিভিশ্চাবরণৈরষ্টভির্বহিরাবৃতম্ ॥ ৩৩ ॥

অতঃ পরং সূক্ষ্মতমমব্যক্তং নির্বিশেষণম্ ।
অনাদিমধ্যনিধনং নিত্যং বাঙ্মনসঃ পরম্ ॥ ৩৪ ॥

অমুনী ভগবদ্রূপে মযা তে হ্যনুবর্ণিতে ।
উভে অপি ন গৃহ্ণন্তি মাযাসৃষ্টে বিপশ্চিতঃ ॥ ৩৫ ॥

স বাচ্যবাচকতযা ভগবান্ ব্রহ্মরূপধৃক্ ।
নামরূপক্রিযা ধত্তে সকর্মাকর্মকঃ পরঃ ॥ ৩৬ ॥

প্রজাপতীন্মনূন্ দেবানৃষীন্ পিতৃগণান্ পৃথক্ ।
সিদ্ধচারণগন্ধর্বান্ বিদ্যাধ্রাসুরগুহ্যকান্ ॥ ৩৭ ॥

কিন্নরাপ্সরসো নাগান্ সর্পান্ কিম্পুরুষান্নরান্ ।
মাতৃ রক্ষঃপিশাচাংশ্চ প্রেতভূতবিনাযকান্ ॥ ৩৮ ॥

কূষ্মাণ্ডোন্মাদবেতালান্ যাতুধানান্ গ্রহানপি ।
খগান্মৃগান্ পশূন্ বৃক্ষান্ গিরীন্নৃপ সরীসৃপান্ ॥ ৩৯ ॥

দ্বিবিধাশ্চতুর্বিধা যেঽন্যে জলস্থলনভৌকসঃ ।
কুশলাকুশলা মিশ্রাঃ কর্মণাং গতযস্ত্বিমাঃ ॥ ৪০ ॥

সত্ত্বং রজস্তম ইতি তিস্রঃ সুরনৃনারকাঃ ।
তত্রাপ্যেকৈকশো রাজন্ ভিদ্যন্তে গতযস্ত্রিধা ।
যদৈকৈকতরোঽন্যাভ্যাং স্বভাব উপহন্যতে ॥ ৪১ ॥

স এবেদং জগদ্ধাতা ভগবান্ ধর্মরূপধৃক্ ।
পুষ্ণাতি স্থাপযন্ বিশ্বং তির্যঙ্নরসুরাদিভিঃ ॥ ৪২ ॥

ততঃ কালাগ্নিরুদ্রাত্মা যত্সৃষ্টমিদমাত্মনঃ ।
সংনিযচ্ছতি তত্ কালে ঘনানীকমিবানিলঃ ॥ ৪৩ ॥

ইত্থংভাবেন কথিতো ভগবান্ ভগবত্তমঃ ।
নেত্থংভাবেন হি পরং দ্রষ্টুমর্হন্তি সূরযঃ ॥ ৪৪ ॥

নাস্য কর্মণি জন্মাদৌ পরস্যানুবিধীযতে ।
কর্তৃত্বপ্রতিষেধার্থং মাযযারোপিতং হি তত্ ॥ ৪৫ ॥

অযং তু ব্রহ্মণঃ কল্পঃ সবিকল্প উদাহৃতঃ ।
বিধিঃ সাধারণো যত্র সর্গাঃ প্রাকৃতবৈকৃতাঃ ॥ ৪৬ ॥

পরিমাণং চ কালস্য কল্পলক্ষণবিগ্রহম্ ।
যথা পুরস্তাদ্ব্যাখ্যাস্যে পাদ্মং কল্পমথো শৃণু ॥ ৪৭ ॥

শৌনক উবাচ
যদাহ নো ভবান্ সূত ক্ষত্তা ভাগবতোত্তমঃ ।
চচার তীর্থানি ভুবস্ত্যক্ত্বা বন্ধূন্ সুদুস্ত্যজান্ ॥ ৪৮ ॥

ক্ষত্তুঃ কৌশারবেস্তস্য সংবাদোঽধ্যাত্মসংশ্রিতঃ ।
যদ্বা স ভগবাংস্তস্মৈ পৃষ্টস্তত্ত্বমুবাচ হ ॥ ৪৯ ॥

ব্রূহি নস্তদিদং সৌম্য বিদুরস্য বিচেষ্টিতম্ ।
বন্ধুত্যাগনিমিত্তং চ যথৈবাগতবান্ পুনঃ ॥ ৫০ ॥

সূত উবাচ
রাজ্ঞা পরীক্ষিতা পৃষ্টো যদবোচন্মহামুনিঃ ।
তদ্বোঽভিধাস্যে শৃণুত রাজ্ঞঃ প্রশ্নানুসারতঃ ॥ ৫১ ॥
যচ্চ ব্রজন্ত্যনিমিষামৃষভানুবৃত্ত্যা
দূরেযমা হ্যুপরি নঃ স্পৃহণীযশীলাঃ ।
ভর্তুর্মিথঃ সুযশসঃ কথনানুরাগ-
বৈক্লব্যবাষ্পকলযা পুলকীকৃতাঙ্গাঃ ॥