What is Srimad Bhagavatam Canto 4, Chapter 22 — The Kumāras Instruct King Pṛthu?

Read Srimad Bhagavatam Canto 4, Chapter 22 — The Kumāras Instruct King Pṛthu in Bengali script — full lyrics with English meaning and transliteration. The Kumāras Instruct King Pṛthu. Śrīmad Bhāgavatam Canto 4, Chapter 22 (Dhruva, Pṛthu and the Early Kings), 63 verses in Sanskrit with transliteration in 9 scripts.

Which deity is Srimad Bhagavatam Canto 4, Chapter 22 — The Kumāras Instruct King Pṛthu dedicated to?

Srimad Bhagavatam Canto 4, Chapter 22 — The Kumāras Instruct King Pṛthu is a Sanskrit hymn dedicated to Lord Krishna.

Who composed Srimad Bhagavatam Canto 4, Chapter 22 — The Kumāras Instruct King Pṛthu?

Srimad Bhagavatam Canto 4, Chapter 22 — The Kumāras Instruct King Pṛthu is traditionally attributed to Vyasa.

Srimad Bhagavatam Canto 4, Chapter 22 — The… in Bengali

মৈত্রেয উবাচ
জনেষু প্রগৃণত্স্বেবং পৃথুং পৃথুলবিক্রমম্ ।
তত্রোপজগ্মুর্মুনযশ্চত্বারঃ সূর্যবর্চসঃ ॥ ১ ॥

তাংস্তু সিদ্ধেশ্বরান্ রাজা ব্যোম্নোঽবতরতোঽর্চিষা ।
লোকানপাপান্ কুর্বাণান্ সানুগোঽচষ্ট লক্ষিতান্ ॥ ২ ॥

তদ্দর্শনোদ্গতান্ প্রাণান্ প্রত্যাদিত্সুরিবোত্থিতঃ ।
সসদস্যানুগো বৈন্য ইন্দ্রিযেশো গুণানিব ॥ ৩ ॥

গৌরবাদ্যন্ত্রিতঃ সভ্যঃ প্রশ্রযানতকন্ধরঃ ।
বিধিবত্পূজযাং চক্রে গৃহীতাধ্যর্হণাসনান্ ॥ ৪ ॥

তত্পাদশৌচসলিলৈর্মার্জিতালকবন্ধনঃ ।
তত্র শীলবতাং বৃত্তমাচরন্মানযন্নিব ॥ ৫ ॥

হাটকাসন আসীনান্ স্বধিষ্ণ্যেষ্বিব পাবকান্ ।
শ্রদ্ধাসংযমসংযুক্তঃ প্রীতঃ প্রাহ ভবাগ্রজান্ ॥ ৬ ॥

পৃথুরুবাচ
অহো আচরিতং কিং মে মঙ্গলং মঙ্গলাযনাঃ ।
যস্য বো দর্শনং হ্যাসীদ্দুর্দর্শানাং চ যোগিভিঃ ॥ ৭ ॥

কিং তস্য দুর্লভতরমিহ লোকে পরত্র চ ।
যস্য বিপ্রাঃ প্রসীদন্তি শিবো বিষ্ণুশ্চ সানুগঃ ॥ ৮ ॥

নৈব লক্ষযতে লোকো লোকান্ পর্যটতোঽপি যান্ ।
যথা সর্বদৃশং সর্ব আত্মানং যেঽস্য হেতবঃ ॥ ৯ ॥

অধনা অপি তে ধন্যাঃ সাধবো গৃহমেধিনঃ ।
যদ্গৃহা হ্যর্হবর্যাম্বুতৃণভূমীশ্বরাবরাঃ ॥ ১০ ॥

ব্যালালযদ্রুমা বৈ তেষ্বরিক্তাখিলসম্পদঃ ।
যদ্গৃহাস্তীর্থপাদীযপাদতীর্থবিবর্জিতাঃ ॥ ১১ ॥

স্বাগতং বো দ্বিজশ্রেষ্ঠা যদ্ব্রতানি মুমুক্ষবঃ ।
চরন্তি শ্রদ্ধযা ধীরা বালা এব বৃহন্তি চ ॥ ১২ ॥

কচ্চিন্নঃ কুশলং নাথা ইন্দ্রিযার্থার্থবেদিনাম্ ।
ব্যসনাবাপ এতস্মিন্পতিতানাং স্বকর্মভিঃ ॥ ১৩ ॥

ভবত্সু কুশলপ্রশ্ন আত্মারামেষু নেষ্যতে ।
কুশলাকুশলা যত্র ন সন্তি মতিবৃত্তযঃ ॥ ১৪ ॥

তদহং কৃতবিশ্রম্ভঃ সুহৃদো বস্তপস্বিনাম্ ।
সম্পৃচ্ছে ভব এতস্মিন্ ক্ষেমঃ কেনাঞ্জসা ভবেত্ ॥ ১৫ ॥

ব্যক্তমাত্মবতামাত্মা ভগবানাত্মভাবনঃ ।
স্বানামনুগ্রহাযেমাং সিদ্ধরূপী চরত্যজঃ ॥ ১৬ ॥

মৈত্রেয উবাচ
পৃথোস্তত্সূক্তমাকর্ণ্য সারং সুষ্ঠু মিতং মধু ।
স্মযমান ইব প্রীত্যা কুমারঃ প্রত্যুবাচহ ॥ ১৭ ॥

সনত্কুমার উবাচ
সাধু পৃষ্টং মহারাজ সর্বভূতহিতাত্মনা ।
ভবতা বিদুষা চাপি সাধূনাং মতিরীদৃশী ॥ ১৮ ॥

সঙ্গমঃ খলু সাধূনামুভযেষাং চ সম্মতঃ ।
যত্সম্ভাষণসম্প্রশ্নঃ সর্বেষাং বিতনোতি শম্ ॥ ১৯ ॥

অস্ত্যেব রাজন্ ভবতো মধুদ্বিষঃ
পাদারবিন্দস্য গুণানুবাদনে ।
রতির্দুরাপা বিধুনোতি নৈষ্ঠিকী
কামং কষাযং মলমন্তরাত্মনঃ ॥ ২০ ॥

শাস্ত্রেষ্বিযানেব সুনিশ্চিতো নৃণাং
ক্ষেমস্য সধ্র্যগ্বিমৃশেষু হেতুঃ ।
অসঙ্গ আত্মব্যতিরিক্ত আত্মনি
দৃঢা রতির্ব্রহ্মণি নির্গুণে চ যা ॥ ২১ ॥

সা শ্রদ্ধযা ভগবদ্ধর্মচর্যযা
জিজ্ঞাসযাধ্যাত্মিকযোগনিষ্ঠযা ।
যোগেশ্বরোপাসনযা চ নিত্যং
পুণ্যশ্রবঃকথযা পুণ্যযা চ ॥ ২২ ॥

অর্থেন্দ্রিযারামসগোষ্ঠ্যতৃষ্ণযা
তত্সম্মতানামপরিগ্রহেণ চ ।
বিবিক্তরুচ্যা পরিতোষ আত্মনি
বিনা হরের্গুণপীযূষপানাত্ ॥ ২৩ ॥

অহিংসযা পারমহংস্যচর্যযা
স্মৃত্যা মুকুন্দাচরিতাগ্র্যসীধুনা ।
যমৈরকামৈর্নিযমৈশ্চাপ্যনিন্দযা
নিরীহযা দ্বন্দ্বতিতিক্ষযা চ ॥ ২৪ ॥

হরের্মুহুস্তত্পরকর্ণপূর
গুণাভিধানেন বিজৃম্ভমাণযা ।
ভক্ত্যা হ্যসঙ্গঃ সদসত্যনাত্মনি
স্যান্নির্গুণে ব্রহ্মণি চাঞ্জসা রতিঃ ॥ ২৫ ॥

যদা রতির্ব্রহ্মণি নৈষ্ঠিকী পুমা-
নাচার্যবান্ জ্ঞানবিরাগরংহসা ।
দহত্যবীর্যং হৃদযং জীবকোশং
পঞ্চাত্মকং যোনিমিবোত্থিতোঽগ্নিঃ ॥ ২৬ ॥

দগ্ধাশযো মুক্তসমস্ততদ্গুণো
নৈবাত্মনো বহিরন্তর্বিচষ্টে ।
পরাত্মনোর্যদ্বযবধানং পুরস্তাত্
স্বপ্নে যথা পুরুষস্তদ্বিনাশে ॥ ২৭ ॥

আত্মানমিন্দ্রিযার্থং চ পরং যদুভযোরপি ।
সত্যাশয উপাধৌ বৈ পুমান্ পশ্যতি নান্যদা ॥ ২৮ ॥

নিমিত্তে সতি সর্বত্র জলাদাবপি পূরুষঃ ।
আত্মনশ্চ পরস্যাপি ভিদাং পশ্যতি নান্যদা ॥ ২৯ ॥

ইন্দ্রিযৈর্বিষযাকৃষ্টৈরাক্ষিপ্তং ধ্যাযতাং মনঃ ।
চেতনাং হরতে বুদ্ধেঃ স্তম্বস্তোযমিব হ্রদাত্ ॥ ৩০ ॥

ভ্রশ্যত্যনুস্মৃতিশ্চিত্তং জ্ঞানভ্রংশঃ স্মৃতিক্ষযে ।
তদ্রোধং কবযঃ প্রাহুরাত্মাপহ্নবমাত্মনঃ ॥ ৩১ ॥

নাতঃ পরতরো লোকে পুংসঃ স্বার্থব্যতিক্রমঃ ।
যদধ্যন্যস্য প্রেযস্ত্বমাত্মনঃ স্বব্যতিক্রমাত্ ॥ ৩২ ॥

অর্থেন্দ্রিযার্থাভিধ্যানং সর্বার্থাপহ্নবো নৃণাম্ ।
ভ্রংশিতো জ্ঞানবিজ্ঞানাদ্যেনাবিশতি মুখ্যতাম্ ॥ ৩৩ ॥

ন কুর্যাত্কর্হিচিত্সঙ্গং তমস্তীব্রং তিতীরিষুঃ ।
ধর্মার্থকামমোক্ষাণাং যদত্যন্তবিঘাতকম্ ॥ ৩৪ ॥

তত্রাপি মোক্ষ এবার্থ আত্যন্তিকতযেষ্যতে ।
ত্রৈবর্গ্যোঽর্থো যতো নিত্যং কৃতান্তভযসংযুতঃ ॥ ৩৫ ॥

পরেঽবরে চ যে ভাবা গুণব্যতিকরাদনু ।
ন তেষাং বিদ্যতে ক্ষেমমীশবিধ্বংসিতাশিষাম্ ॥ ৩৬ ॥

তত্ত্বং নরেন্দ্র জগতামথ তস্থূষাং চ
দেহেন্দ্রিযাসুধিষণাত্মভিরাবৃতানাম্ ।
যঃ ক্ষেত্রবিত্তপতযা হৃদি বিশ্বগাবিঃ
প্রত্যক্ চকাস্তি ভগবাংস্তমবেহি সোঽস্মি ॥ ৩৭ ॥

যস্মিন্নিদং সদসদাত্মতযা বিভাতি
মাযা বিবেকবিধুতি স্রজি বাহিবুদ্ধিঃ ।
তং নিত্যমুক্তপরিশুদ্ধবিশুদ্ধতত্ত্বং
প্রত্যূঢকর্মকলিলপ্রকৃতিং প্রপদ্যে ॥ ৩৮ ॥

যত্পাদপঙ্কজপলাশবিলাসভক্ত্যা
কর্মাশযং গ্রথিতমুদ্গ্রথযন্তি সন্তঃ ।
তদ্বন্ন রিক্তমতযো যতযোঽপি রুদ্ধ
স্রোতোগণাস্তমরণং ভজ বাসুদেবম্ ॥ ৩৯ ॥

কৃচ্ছ্রো মহানিহ ভবার্ণবমপ্লবেশাং
ষড্বর্গনক্রমসুখেন তিতীর্ষন্তি ।
তত্ত্বং হরের্ভগবতো ভজনীযমঙ্ঘ্রিং
কৃত্বোডুপং ব্যসনমুত্তর দুস্তরার্ণম্ ॥ ৪০ ॥

মৈত্রেয উবাচ
স এবং ব্রহ্মপুত্রেণ কুমারেণাত্মমেধসা ।
দর্শিতাত্মগতিঃ সম্যক্প্রশস্যোবাচ তং নৃপঃ ॥ ৪১ ॥

রাজোবাচ
কৃতো মেঽনুগ্রহঃ পূর্বং হরিণার্তানুকম্পিনা ।
তমাপাদযিতুং ব্রহ্মন্ ভগবন্ যূযমাগতাঃ ॥ ৪২ ॥

নিষ্পাদিতশ্চ কার্ত্স্ন্যেন ভগবদ্ভির্ঘৃণালুভিঃ ।
সাধূচ্ছিষ্টং হি মে সর্বমাত্মনা সহ কিং দদে ॥ ৪৩ ॥

প্রাণা দারাঃ সুতা ব্রহ্মন্ গৃহাশ্চ সপরিচ্ছদাঃ ।
রাজ্যং বলং মহী কোশ ইতি সর্বং নিবেদিতম্ ॥ ৪৪ ॥

সৈনাপত্যং চ রাজ্যং চ দণ্ডনেতৃত্বমেব চ ।
সর্ব লোকাধিপত্যং চ বেদশাস্ত্রবিদর্হতি ॥ ৪৫ ॥

স্বমেব ব্রাহ্মণো ভুঙ্ক্তে স্বং বস্তে স্বং দদাতি চ ।
তস্যৈবানুগ্রহেণান্নং ভুঞ্জতে ক্ষত্রিযাদযঃ ॥ ৪৬ ॥

যৈরীদৃশী ভগবতো গতিরাত্মবাদ
একান্ততো নিগমিভিঃ প্রতিপাদিতা নঃ ।
তুষ্যন্ত্বদভ্রকরুণাঃ স্বকৃতেন নিত্যং
কো নাম তত্প্রতিকরোতি বিনোদপাত্রম্ ॥ ৪৭ ॥

মৈত্রেয উবাচ
ত আত্মযোগপতয আদিরাজেন পূজিতাঃ ।
শীলং তদীযং শংসন্তঃ খেঽভবন্মিষতাং নৃণাম্ ॥ ৪৮ ॥

বৈন্যস্তু ধুর্যো মহতাং সংস্থিত্যাধ্যাত্মশিক্ষযা ।
আপ্তকামমিবাত্মানং মেন আত্মন্যবস্থিতঃ ॥ ৪৯ ॥

কর্মাণি চ যথাকালং যথাদেশং যথাবলম্ ।
যথোচিতং যথাবিত্তমকরোদ্ব্রহ্মসাত্কৃতম্ ॥ ৫০ ॥

ফলং ব্রহ্মণি সংন্যস্য নির্বিষঙ্গঃ সমাহিতঃ ।
কর্মাধ্যক্ষং চ মন্বান আত্মানং প্রকৃতেঃ পরম্ ॥ ৫১ ॥

গৃহেষু বর্তমানোঽপি স সাম্রাজ্যশ্রিযান্বিতঃ ।
নাসজ্জতেন্দ্রিযার্থেষু নিরহংমতিরর্কবত্ ॥ ৫২ ॥

এবমধ্যাত্মযোগেন কর্মাণ্যনুসমাচরন্ ।
পুত্রানুত্পাদযামাস পঞ্চার্চিষ্যাত্মসম্মতান্ ॥ ৫৩ ॥

বিজিতাশ্বং ধূম্রকেশং হর্যক্ষং দ্রবিণং
বৃকম্ ।
সর্বেষাং লোকপালানাং দধারৈকঃ পৃথুর্গুণান্ ॥ ৫৪ ॥

গোপীথায জগত্সৃষ্টেঃ কালে স্বে
স্বেঽচ্যুতাত্মকঃ ।
মনোবাগ্বৃত্তিভিঃ সৌম্যৈর্গুণৈঃ সংরঞ্জযন্
প্রজাঃ ॥ ৫৫ ॥

রাজেত্যধান্নামধেযং সোমরাজ ইবাপরঃ ।
সূর্যবদ্বিসৃজন্ গৃহ্ণন্ প্রতপংশ্চ ভুবো বসু ॥ ৫৬ ॥

দুর্ধর্ষস্তেজসেবাগ্নির্মহেন্দ্র ইব দুর্জযঃ ।
তিতিক্ষযা ধরিত্রীব দ্যৌরিবাভীষ্টদো নৃণাম্ ॥ ৫৭ ॥

বর্ষতি স্ম যথাকামং পর্জন্য ইব তর্পযন্ ।
সমুদ্র ইব দুর্বোধঃ সত্ত্বেনাচলরাডিব ॥ ৫৮ ॥

ধর্মরাডিব শিক্ষাযামাশ্চর্যে হিমবানিব ।
কুবের ইব কোশাঢ্যো গুপ্তার্থো বরুণো যথা ॥ ৫৯ ॥

মাতরিশ্বেব সর্বাত্মা বলেন মহসৌজসা ।
অবিষহ্যতযা দেবো ভগবান্ ভূতরাডিব ॥ ৬০ ॥

কন্দর্প ইব সৌন্দর্যে মনস্বী মৃগরাডিব ।
বাত্সল্যে মনুবন্নৃণাং প্রভুত্বে ভগবানজঃ ॥ ৬১ ॥

বৃহস্পতির্ব্রহ্মবাদে আত্মবত্ত্বে স্বযং হরিঃ ।
ভক্ত্যা গোগুরুবিপ্রেষু বিষ্বক্সেনানুবর্তিষু ।
হ্রিযা প্রশ্রযশীলাভ্যামাত্মতুল্যঃ পরোদ্যমে ॥ ৬২ ॥

কীর্ত্যোর্ধ্বগীতযা পুম্ভিস্ত্রৈলোক্যে তত্র তত্র হ ।
প্রবিষ্টঃ কর্ণরন্ধ্রেষু স্ত্রীণাং রামঃ সতামিব ॥ ৬৩ ॥

শ্রীমদ্ভাগবতম্ ৪.২২

Explore More

More Krishna Stotras

Explore More