শ্রীমদ্ভাগবতম্ ৫.১

রাজোবাচ
প্রিযব্রতো ভাগবত আত্মারামঃ কথং মুনে ।
গৃহেঽরমত যন্মূলঃ কর্মবন্ধঃ পরাভবঃ ॥ ১ ॥

ন নূনং মুক্তসঙ্গানাং তাদৃশানাং দ্বিজর্ষভ ।
গৃহেষ্বভিনিবেশোঽযং পুংসাং ভবিতুমর্হতি ॥ ২ ॥

মহতাং খলু বিপ্রর্ষে উত্তমশ্লোকপাদযোঃ ।
ছাযানির্বৃতচিত্তানাং ন কুটুম্বে স্পৃহামতিঃ ॥ ৩ ॥

সংশযোঽযং মহান্ ব্রহ্মন্ দারাগারসুতাদিষু ।
সক্তস্য যত্সিদ্ধিরভূত্কৃষ্ণে চ মতিরচ্যুতা ॥ ৪ ॥

শ্রীশুক উবাচ
বাঢমুক্তং ভগবত উত্তমশ্লোকস্য শ্রীমচ্চরণারবিন্দমকরন্দরস আবেশিতচেতসো ভাগবতপরমহংস দযিতকথাং কিঞ্চিদন্তরাযবিহতাং স্বাং শিবতমাং পদবীং ন প্রাযেণ হিন্বন্তি ॥ ৫ ॥

যর্হি বাব হ রাজন্ স রাজপুত্রঃ প্রিযব্রতঃ পরমভাগবতো নারদস্য চরণোপসেবযাঞ্জসাবগতপরমার্থসতত্ত্বো ব্রহ্মসত্রেণ দীক্ষিষ্যমাণঃ অবনিতলপরিপালনাযাম্নাতপ্রবরগুণগণৈকান্তভাজনতযা স্বপিত্রোপামন্ত্রিতো ভগবতি বাসুদেব এবাব্যবধানসমাধিযোগেন সমাবেশিত-সকলকারকক্রিযাকলাপো নৈবাভ্যনন্দদ্যদ্যপি তদপ্রত্যাম্নাতব্যং তদধিকরণ আত্মনোঽন্যস্মাদ সতোঽপি পরাভবমন্বীক্ষমাণঃ ॥ ৬ ॥

অথ হ ভগবানাদিদেব এতস্য গুণবিসর্গস্য পরিবৃংহণানুধ্যানব্যবসিত সকলজগদভিপ্রায
আত্মযোনিরখিলনিগমনিজগণপরিবেষ্টিতঃ স্বভবনাদবততার ॥ ৭ ॥

স তত্র তত্র গগনতল উডুপতিরিব বিমানাবলিভিরনুপথমমরপরিবৃঢৈরভিপূজ্যমানঃ পথি পথি চ বরূথশঃ সিদ্ধগন্ধর্বসাধ্যচারণমুনিগণৈরুপগীযমানো গন্ধমাদনদ্রোণীমবভাসযন্নুপসসর্প ॥ ৮ ॥

তত্র হ বা এনং দেবর্ষির্হংসযানেন পিতরং ভগবন্তং হিরণ্যগর্ভমুপলভমানঃ সহসৈবোত্থাযার্হণেন সহ পিতাপুত্রাভ্যামবহিতাঞ্জলিরুপতস্থে ॥ ৯ ॥

ভগবানপি ভারত তদুপনীতার্হণঃ সূক্তবাকেনাতিতরামুদিতগুণগণাবতারসুজযঃ প্রিযব্রতমাদি পুরুষস্তং সদযহাসাবলোক ইতি হোবাচ ॥ ১০ ॥

শ্রীভগবানুবাচ
নিবোধ তাতেদমৃতং ব্রবীমি
মাসূযিতুং দেবমর্হস্যপ্রমেযম্ ।
বযং ভবস্তে তত এষ মহর্ষি-
র্বহাম সর্বে বিবশা যস্য দিষ্টম্ ॥ ১১ ॥

ন তস্য কশ্চিত্তপসা বিদ্যযা বা
ন যোগবীর্যেণ মনীষযা বা ।
নৈবার্থধর্মৈঃ পরতঃ স্বতো বা
কৃতং বিহন্তুং তনুভৃদ্বিভূযাত্ ॥ ১২ ॥

ভবায নাশায চ কর্ম কর্তুং
শোকায মোহায সদা ভযায ।
সুখায দুঃখায চ দেহযোগ-
মব্যক্তদিষ্টং জনতাঙ্গ ধত্তে ॥ ১৩ ॥

যদ্বাচি তন্ত্যাং গুণকর্মদামভিঃ
সুদুস্তরৈর্বত্স বযং সুযোজিতাঃ ।
সর্বে বহামো বলিমীশ্বরায
প্রোতা নসীব দ্বিপদে চতুষ্পদঃ ॥ ১৪ ॥

ঈশাভিসৃষ্টং হ্যবরুন্ধ্মহেঽঙ্গ
দুঃখং সুখং বা গুণকর্মসঙ্গাত্ ।
আস্থায তত্তদ্যদযুঙ্ক্ত নাথ-
শ্চক্ষুষ্মতান্ধা ইব নীযমানাঃ ॥ ১৫ ॥

মুক্তোঽপি তাবদ্বিভৃযাত্স্বদেহ-
মারব্ধমশ্নন্নভিমানশূন্যঃ ।
যথানুভূতং প্রতিযাতনিদ্রঃ
কিং ত্বন্যদেহায গুণান্ন বৃঙ্ক্তে ॥ ১৬ ॥

ভযং প্রমত্তস্য বনেষ্বপি স্যাদ্
যতঃ স আস্তে
সহষট্সপত্নঃ ।
জিতেন্দ্রিযস্যাত্মরতের্বুধস্য
গৃহাশ্রমঃ
কিং নু
করোত্যবদ্যম্ ॥ ১৭ ॥

যঃ ষট্ সপত্নান্ বিজিগীষমাণো
গৃহেষু নির্বিশ্য যতেত পূর্বম্ ।
অত্যেতি দুর্গাশ্রিত ঊর্জিতারীন্
ক্ষীণেষু কামং বিচরেদ্বিপশ্চিত্ ॥ ১৮ ॥

ত্বং ত্বব্জনাভাঙ্ঘ্রিসরোজকোশ-
দুর্গাশ্রিতো নির্জিতষট্সপত্নঃ ।
ভুঙ্ক্ষ্বেহ ভোগান্ পুরুষাতিদিষ্টান্
বিমুক্তসঙ্গঃ প্রকৃতিং ভজস্ব ॥ ১৯ ॥

শ্রীশুক উবাচ
ইতি সমভিহিতো মহাভাগবতো ভগবতস্ত্রিভুবনগুরোরনুশাসনমাত্মনো লঘুতযাবনতশিরোধরো বাঢমিতি সবহুমানমুবাহ ॥ ২০ ॥

ভগবানপি মনুনা যথাবদুপকল্পিতাপচিতিঃ প্রিযব্রতনারদযোরবিষমমভিসমীক্ষমাণযোরাত্মসমবস্থানমবাঙ্মনসং ক্ষযমব্যবহৃতং প্রবর্তযন্নগমত্ ॥ ২১ ॥

মনুরপি পরেণৈবং প্রতিসন্ধিতমনোরথঃ সুরর্ষিবরানুমতেনাত্মজমখিলধরামণ্ডলস্থিতিগুপ্তয আস্থাপ্য স্বযমতিবিষমবিষযবিষজলাশযাশাযা উপররাম ॥ ২২ ॥

ইতি হ বাব স জগতীপতিরীশ্বরেচ্ছযাধিনিবেশিতকর্মাধিকারোঽখিলজগদ্বন্ধধ্বংসনপরানুভাবস্য ভগবত আদিপুরুষস্যাঙ্ঘ্রিযুগলানবরতধ্যানানুভাবেন পরিরন্ধিতকষাযাশযোঽবদাতোঽপি মানবর্ধনো মহতাং মহীতলমনুশশাস ॥ ২৩ ॥

অথ চ দুহিতরং প্রজাপতের্বিশ্বকর্মণ উপযেমে বর্হিষ্মতীং নাম তস্যামু হ বাব আত্মজানাত্মসমানশীলগুণকর্মরূপবীর্যোদারান্দশ ভাবযাম্বভূব কন্যাং চ যবীযসীমূর্জস্বতীং নাম ॥ ২৪ ॥

আগ্নীধ্রেধ্মজিহ্বযজ্ঞবাহুমহাবীরহিরণ্যরেতোঘৃতপৃষ্ঠসবনমেধাতিথিবীতিহোত্রকবয ইতি সর্ব এবাগ্নিনামানঃ ॥ ২৫ ॥

এতেষাং কবির্মহাবীরঃ সবন ইতি ত্রয আসন্নূর্ধ্বরেতসস্ত আত্মবিদ্যাযামর্ভভাবাদারভ্য কৃতপরিচযাঃ পারমহংস্যমেবাশ্রমমভজন্ ॥ ২৬ ॥

তস্মিন্নু হ বা উপশমশীলাঃ পরমর্ষযঃ সকলজীবনিকাযাবাসস্য ভগবতো বাসুদেবস্য ভীতানাং শরণভূতস্য শ্রীমচ্চরণারবিন্দাবিরতস্মরণাবিগলিতপরমভক্তিযোগানুভাবেন পরিভাবিতান্তর্হৃদযাধিগতে ভগবতি সর্বেষাং ভূতানামাত্মভূতে প্রত্যগাত্মন্যেবা- ত্মনস্তাদাত্ম্যমবিশেষেণ সমীযুঃ ॥ ২৭ ॥

অন্যস্যামপি জাযাযাং ত্রযঃ পুত্রা আসন্নুত্তমস্তামসো রৈবত ইতি মন্বন্তরাধিপতযঃ ॥ ২৮ ॥

এবমুপশমাযনেষু স্বতনযেষ্বথ জগতীপতির্জগতীমর্বুদান্যেকাদশ পরিবত্সরাণামব্যাহতাখিলপুরুষকারসারসম্ভৃতদোর্দণ্ডযুগলাপীডিতমৌর্বীগুণস্তনিতবিরমিতধর্মপ্রতিপক্ষো বর্হিষ্মত্যাশ্চানুদিনমেধমানপ্রমোদপ্রসরণযৌষিণ্যব্রীডাপ্রমুষিতহাসাবলোকরুচিরক্ষ্বেল্যাদিভিঃ পরাভূযমানবিবেক ইবানববুধ্যমান ইব মহামনা বুভুজে ॥ ২৯ ॥

যাবদবভাসযতি সুরগিরিমনুপরিক্রামন্ ভগবানাদিত্যো বসুধাতলমর্ধেনৈব প্রতপত্যর্ধেনাবচ্ছাদযতি তদা হি ভগবদুপাসনোপচিতাতিপুরুষপ্রভাবস্তদনভিনন্দন্ সমজবেন রথেন জ্যোতির্মযেন রজনীমপি দিনং করিষ্যামীতি সপ্তকৃত্বস্তরণিমনুপর্যক্রামদ্ দ্বিতীয ইব পতঙ্গঃ ॥ ৩০ ॥

যে বা উ হ তদ্রথচরণনেমিকৃতপরিখাতাস্তে সপ্ত সিন্ধব আসন্ যত এব কৃতাঃ সপ্ত ভুবো দ্বীপাঃ ॥ ৩১ ॥

জম্বূপ্লক্ষশাল্মলিকুশক্রৌঞ্চশাকপুষ্করসংজ্ঞাস্তেষাং পরিমাণং পূর্বস্মাত্পূর্বস্মাদুত্তর উত্তরো যথাসংখ্যং দ্বিগুণমানেন বহিঃ সমন্তত উপক্লৃপ্তাঃ ॥ ৩২ ॥

ক্ষারোদেক্ষুরসোদসুরোদঘৃতোদক্ষীরোদদধিমণ্ডোদশুদ্ধোদাঃ সপ্ত জলধযঃ সপ্ত দ্বীপপরিখা ইবাভ্যন্তরদ্বীপসমানা একৈকশ্যেন যথানুপূর্বং সপ্তস্বপি বহির্দ্বীপেষু পৃথক্পরিত উপকল্পিতাস্তেষু জম্ব্বাদিষু বর্হিষ্মতীপতিরনুব্রতানাত্মজানাগ্নীধ্রেধ্মজিহ্বযজ্ঞবাহুহিরণ্যরেতোঘৃতপৃষ্ঠমেধাতিথিবীতিহোত্রসংজ্ঞান্ যথা সংখ্যেনৈকৈকস্মিন্নেকমেবাধিপতিং বিদধে ॥ ৩৩ ॥

দুহিতরং চোর্জস্বতীং নামোশনসে প্রাযচ্ছদ্যস্যামাসীদ্ দেবযানী নাম কাব্যসুতা ॥ ৩৪ ॥

নৈবংবিধঃ পুরুষকার উরুক্রমস্যপুংসাং তদঙ্ঘ্রিরজসা জিতষড্গুণানাম্ । চিত্রং বিদূরবিগতঃ সকৃদাদদীতযন্নামধেযমধুনা স জহাতি বন্ধম্ ॥ ৩৫ ॥

স এবমপরিমিতবলপরাক্রম একদা তু দেবর্ষিচরণানুশযনানুপতিতগুণবিসর্গসংসর্গেণানির্বৃতমিবাত্মানং মন্যমান আত্মনির্বেদ ইদমাহ ॥ ৩৬ ॥

অহো অসাধ্বনুষ্ঠিতং যদভিনিবেশিতোঽহমিন্দ্রিযৈরবিদ্যারচিতবিষমবিষযান্ধকূপে তদলমলমমুষ্যা বনিতাযা বিনোদমৃগং মাং ধিগ্ধিগিতি গর্হযাঞ্চকার ॥ ৩৭ ॥

পরদেবতাপ্রসাদাধিগতাত্মপ্রত্যবমর্শেনানুপ্রবৃত্তেভ্যঃ পুত্রেভ্য ইমাং যথাদাযং বিভজ্য ভুক্তভোগাং চ মহিষীং মৃতকমিব সহ মহাবিভূতিমপহায স্বযং নিহিতনির্বেদো হৃদি গৃহীতহরিবিহারানুভাবো ভগবতো নারদস্য পদবীং পুনরেবানুসসার ॥ ৩৮ ॥

তস্য হ বা এতে শ্লোকাঃ—
প্রিযব্রতকৃতং কর্ম কো নু কুর্যাদ্বিনেশ্বরম্ । যো নেমিনিম্নৈরকরোচ্ছাযাং ঘ্নন্ সপ্ত বারিধীন্ ॥ ৩৯ ॥

ভূসংস্থানং কৃতং যেন সরিদ্গিরিবনাদিভিঃ । সীমা চ ভূতনির্বৃত্যৈ দ্বীপে দ্বীপে বিভাগশঃ ॥ ৪০ ॥

ভৌমং দিব্যং মানুষং চ মহিত্বং কর্মযোগজম্ । যশ্চক্রে নিরযৌপম্যং পুরুষানুজনপ্রিযঃ ॥ ৪১ ॥