শ্রীমদ্ভাগবতম্ ৫.১০

শ্রীশুক উবাচ
অথ সিন্ধুসৌবীরপতে রহূগণস্য ব্রজত ইক্ষুমত্যাস্তটে তত্কুলপতিনা শিবিকাবাহপুরুষান্বেষণসমযে দৈবেনোপসাদিতঃ স দ্বিজবর উপলব্ধ এষ পীবা যুবা সংহননাঙ্গো গোখরবদ্ধুরং বোঢুমলমিতি পূর্ববিষ্টিগৃহীতৈঃ সহ গৃহীতঃ প্রসভমতদর্হ উবাহ শিবিকাং স মহানুভাবঃ ॥ ১ ॥

যদা হি দ্বিজবরস্যেষুমাত্রাবলোকানুগতের্ন সমাহিতা পুরুষগতিস্তদা বিষমগতাং স্বশিবিকাং রহূগণ উপধার্য পুরুষানধিবহত আহ হে বোঢারঃ সাধ্বতিক্রমত কিমিতি বিষমমুহ্যতে যানমিতি ॥ ২ ॥

অথ ত ঈশ্বরবচঃ সোপালম্ভমুপাকর্ণ্যোপাযতুরীযাচ্ছঙ্কিতমনসস্তং বিজ্ঞাপযাংবভূবুঃ ॥ ৩ ॥

ন বযং নরদেব প্রমত্তা ভবন্নিযমানুপথাঃ সাধ্বেব বহামঃ । অযমধুনৈব নিযুক্তোঽপি ন দ্রুতং ব্রজতি নানেন সহ বোঢুমু হ বযং পারযাম ইতি ॥ ৪ ॥

সাংসর্গিকো দোষ এব নূনমেকস্যাপি সর্বেষাং সাংসর্গিকাণাং ভবিতুমর্হতীতি নিশ্চিত্য নিশম্য কৃপণবচো রাজা রহূগণ উপাসিতবৃদ্ধোঽপি নিসর্গেণ বলাত্কৃত ঈষদুত্থিতমন্যুরবিস্পষ্টব্রহ্মতেজসং জাতবেদসমিব রজসাঽঽবৃতমতিরাহ ॥ ৫ ॥

অহো কষ্টং ভ্রাতর্ব্যক্তমুরুপরিশ্রান্তো দীর্ঘমধ্বানমেক এব ঊহিবান্ সুচিরং নাতিপীবা ন সংহননাঙ্গো জরসা চোপদ্রুতো ভবান্ সখে নো এবাপর এতে সঙ্ঘট্টিন ইতি বহুবিপ্রলব্ধোঽপ্যবিদ্যযা রচিতদ্রব্যগুণকর্মাশযস্বচরমকলেবরেঽবস্তুনি সংস্থানবিশেষেঽহং মমেত্যনধ্যারোপিতমিথ্যাপ্রত্যযো ব্রহ্মভূতস্তূষ্ণীং শিবিকাং পূর্ববদুবাহ ॥ ৬ ॥

অথ পুনঃ স্বশিবিকাযাং বিষমগতাযাং প্রকুপিত উবাচরহূগণঃ কিমিদমরে ত্বং জীবন্মৃতো মাং কদর্থীকৃত্য ভর্তৃশাসনমতিচরসি প্রমত্তস্য চ তে করোমি চিকিত্সাং দণ্ডপাণিরিব জনতাযা যথা প্রকৃতিং স্বাং ভজিষ্যস ইতি ॥ ৭ ॥

এবং বহ্ববদ্ধমপি ভাষমাণং নরদেবাভিমানং রজসা তমসানুবিদ্ধেন মদেন তিরস্কৃতাশেষভগবত্প্রিযনিকেতং পণ্ডিতমানিনং স ভগবান্ ব্রাহ্মণো ব্রহ্মভূতসর্বভূতসুহৃদাত্মা যোগেশ্বরচর্যাযাং নাতিব্যুত্পন্নমতিং স্মযমান ইব বিগতস্ময ইদমাহ ॥ ৮ ॥

ব্রাহ্মণ উবাচ
ত্বযোদিতং ব্যক্তমবিপ্রলব্ধং
ভর্তুঃ স মে স্যাদ্যদি বীর ভারঃ ।
গন্তুর্যদি স্যাদধিগম্যমধ্বা
পীবেতি রাশৌ ন বিদাং প্রবাদঃ ॥ ৯ ॥

স্থৌল্যং কার্শ্যং ব্যাধয আধযশ্চ
ক্ষুত্তৃড্ ভযং কলিরিচ্ছা জরা চ ।
নিদ্রা রতির্মন্যুরহংমদঃ শুচো
দেহেন জাতস্য হি মে ন সন্তি ॥ ১০ ॥

জীবন্মৃতত্বং নিযমেন রাজন্
আদ্যন্তবদ্যদ্বিকৃতস্য দৃষ্টম্ ।
স্বস্বাম্যভাবো ধ্রুব ঈড্য যত্র
তর্হ্যুচ্যতেঽসৌ বিধিকৃত্যযোগঃ ॥ ১১ ॥

বিশেষবুদ্ধের্বিবরং মনাক্ চ
পশ্যাম যন্ন ব্যবহারতোঽন্যত্ ।
ক ঈশ্বরস্তত্র কিমীশিতব্যং
তথাপি রাজন্ করবাম কিং তে ॥ ১২ ॥

উন্মত্তমত্তজডবত্স্বসংস্থাং
গতস্য মে বীর চিকিত্সিতেন ।
অর্থঃ কিযান্ ভবতা শিক্ষিতেন
স্তব্ধপ্রমত্তস্য চ পিষ্টপেষঃ ॥ ১৩ ॥

শ্রীশুক উবাচ
এতাবদনুবাদপরিভাষযা প্রত্যুদীর্য মুনিবর উপশমশীল উপরতানাত্ম্যনিমিত্ত উপভোগেন কর্মারব্ধং ব্যপনযন্ রাজযানমপি তথোবাহ ॥ ১৪ ॥

স চাপি পাণ্ডবেয সিন্ধুসৌবীরপতিস্তত্ত্বজিজ্ঞাসাযাং সম্যক্শ্রদ্ধযাধিকৃতাধিকারস্তদ্ধৃদযগ্রন্থিমোচনং দ্বিজবচ আশ্রুত্য বহুযোগগ্রন্থসম্মতং ত্বরযাবরুহ্য শিরসা পাদমূলমুপসৃতঃ ক্ষমাপযন্ বিগতনৃপদেবস্ময উবাচ॥ ১৫ ॥

কস্ত্বং নিগূঢশ্চরসি দ্বিজানাং
বিভর্ষি সূত্রং কতমোঽবধূতঃ ।
কস্যাসি কুত্রত্য ইহাপি কস্মাত্
ক্ষেমায নশ্চেদসি নোত শুক্লঃ ॥ ১৬ ॥

নাহং বিশঙ্কে সুররাজবজ্রা-
ন্ন ত্র্যক্ষশূলান্ন যমস্য দণ্ডাত্ ।
নাগ্ন্যর্কসোমানিলবিত্তপাস্ত্রা-
চ্ছঙ্কে ভৃশং ব্রহ্মকুলাবমানাত্ ॥ ১৭ ॥

তদ্ব্রূহ্যসঙ্গো জডবন্নিগূঢ-
বিজ্ঞানবীর্যো বিচরস্যপারঃ ।
বচাংসি যোগগ্রথিতানি সাধো
ন নঃ ক্ষমন্তে মনসাপি ভেত্তুম্ ॥ ১৮ ॥

অহং চ যোগেশ্বরমাত্মতত্ত্ব-
বিদাং মুনীনাং পরমং গুরুং বৈ ।
প্রষ্টুং প্রবৃত্তঃ কিমিহারণং তত্
সাক্ষাদ্ধরিং জ্ঞানকলাবতীর্ণম্ ॥ ১৯ ॥

স বৈ ভবাঁল্লোকনিরীক্ষণার্থ-
মব্যক্তলিঙ্গো বিচরত্যপিস্বিত্ ।
যোগেশ্বরাণাং গতিমন্ধবুদ্ধিঃ
কথং বিচক্ষীত গৃহানুবন্ধঃ ॥ ২০ ॥

দৃষ্টঃ শ্রমঃ কর্মত আত্মনো বৈ
ভর্তুর্গন্তুর্ভবতশ্চানুমন্যে ।
যথাসতোদানযনাদ্যভাবাত্
সমূল ইষ্টো ব্যবহারমার্গঃ ॥ ২১ ॥

স্থাল্যগ্নিতাপাত্পযসোঽভিতাপ-
স্তত্তাপতস্তণ্ডুলগর্ভরন্ধিঃ ।
দেহেন্দ্রিযাস্বাশযসন্নিকর্ষাত্
তত্সংসৃতিঃ পুরুষস্যানুরোধাত্ ॥ ২২ ॥

শাস্তাভিগোপ্তা নৃপতিঃ প্রজানাংযঃ কিঙ্করো বৈ ন পিনষ্টি পিষ্টম্ । স্বধর্মমারাধনমচ্যুতস্যযদীহমানো বিজহাত্যঘৌঘম্ ॥ ২৩ ॥

তন্মে ভবান্নরদেবাভিমান-মদেন তুচ্ছীকৃতসত্তমস্য । কৃষীষ্ট মৈত্রীদৃশমার্তবন্ধোযথা তরে সদবধ্যানমংহঃ ॥ ২৪ ॥

ন বিক্রিযা বিশ্বসুহৃত্সখস্যসাম্যেন বীতাভিমতেস্তবাপি । মহদ্বিমানাত্ স্বকৃতাদ্ধি মাদৃঙ্নঙ্ক্ষ্যত্যদূরাদপি শূলপাণিঃ ॥ ২৫ ॥