শ্রীমদ্ভাগবতম্ ৫.১৮

শ্রীশুক উবাচ
তথা চ ভদ্রশ্রবা নাম ধর্মসুতস্তত্কুলপতযঃ পুরুষা ভদ্রাশ্ববর্ষে সাক্ষাদ্ভগবতো বাসুদেবস্য প্রিযাংতনুং ধর্মমযীং হযশীর্ষাভিধানাং পরমেণ সমাধিনা সন্নিধাপ্যেদমভিগৃণন্ত উপধাবন্তি ॥ ১ ॥

ভদ্রশ্রবস ঊচুঃ
ওঁ নমো ভগবতে ধর্মাযাত্মবিশোধনায নম ইতি ॥ ২ ॥

অহো বিচিত্রং ভগবদ্বিচেষ্টিতংঘ্নন্তং জনোঽযং হি মিষন্ন পশ্যতি । ধ্যাযন্নসদ্যর্হি বিকর্ম সেবিতুংনির্হৃত্য পুত্রং পিতরং জিজীবিষতি ॥ ৩ ॥

বদন্তি বিশ্বং কবযঃ স্ম নশ্বরংপশ্যন্তি চাধ্যাত্মবিদো বিপশ্চিতঃ । তথাপি মুহ্যন্তি তবাজ মাযযাসুবিস্মিতং কৃত্যমজং নতোঽস্মি তম্ ॥ ৪ ॥

বিশ্বোদ্ভবস্থাননিরোধকর্ম তেহ্যকর্তুরঙ্গীকৃতমপ্যপাবৃতঃ । যুক্তং ন চিত্রং ত্বযি কার্যকারণেসর্বাত্মনি ব্যতিরিক্তে চ বস্তুতঃ ॥ ৫ ॥

বেদান্ যুগান্তে তমসা তিরস্কৃতান্রসাতলাদ্যো নৃতুরঙ্গবিগ্রহঃ । প্রত্যাদদে বৈ কবযেঽভিযাচতেতস্মৈ নমস্তেঽবিতথেহিতায ইতি ॥ ৬ ॥

হরিবর্ষে চাপি ভগবান্নরহরিরূপেণাস্তে । তদ্রূপগ্রহণনিমিত্তমুত্তরত্রাভিধাস্যে । তদ্দযিতং রূপং মহাপুরুষগুণভাজনো মহাভাগবতো দৈত্যদানবকুলতীর্থীকরণশীলাচরিতঃ প্রহ্লাদোঽব্যবধানানন্যভক্তিযোগেন সহ তদ্বর্ষপুরুষৈরুপাস্তে ইদং চোদাহরতি ॥ ৭ ॥

ওঁ নমো ভগবতে নরসিংহায নমস্তেজস্তেজসে আবিরাবির্ভব বজ্রনখ বজ্রদংষ্ট্র কর্মাশযান্ রন্ধয রন্ধয তমো গ্রস গ্রস ওঁ স্বাহা । অভযমভযমাত্মনি ভূযিষ্ঠা ওঁ ক্ষ্রৌম্ ॥ ৮ ॥

স্বস্ত্যস্তু বিশ্বস্য খলঃ প্রসীদতাং
ধ্যাযন্তু ভূতানি শিবং মিথো ধিযা ।
মনশ্চ ভদ্রং ভজতাদধোক্ষজে
আবেশ্যতাং নো মতিরপ্যহৈতুকী ॥ ৯ ॥

মাগারদারাত্মজবিত্তবন্ধুষু
সঙ্গো যদি স্যাদ্ভগবত্প্রিযেষু নঃ ।
যঃ প্রাণবৃত্ত্যা পরিতুষ্ট আত্মবান্
সিদ্ধ্যত্যদূরান্ন তথেন্দ্রিযপ্রিযঃ ॥ ১০ ॥

যত্সঙ্গলব্ধং নিজবীর্যবৈভবং
তীর্থং মুহুঃ সংস্পৃশতাং হি মানসম্ ।
হরত্যজোঽন্তঃ শ্রুতিভির্গতোঽঙ্গজং
কো বৈ ন সেবেত মুকুন্দবিক্রমম্ ॥ ১১ ॥

যস্যাস্তি ভক্তির্ভগবত্যকিঞ্চনা
সর্বৈর্গুণৈস্তত্র সমাসতে সুরাঃ ।
হরাবভক্তস্য কুতো মহদ্গুণা
মনোরথেনাসতি ধাবতো বহিঃ ॥ ১২ ॥

হরির্হি সাক্ষাদ্ভগবান্ শরীরিণা-
মাত্মা ঝষাণামিব তোযমীপ্সিতম্ ।
হিত্বা মহাংস্তং যদি সজ্জতে গৃহে
তদা মহত্ত্বং বযসা দম্পতীনাম্ ॥ ১৩ ॥

তস্মাদ্রজোরাগবিষাদমন্যু-
মানস্পৃহাভযদৈন্যাধিমূলম্ ।
হিত্বা গৃহং সংসৃতিচক্রবালং
নৃসিংহপাদং ভজতাকুতোভযমিতি ॥ ১৪ ॥

কেতুমালেঽপি ভগবান্ কামদেবস্বরূপেণ লক্ষ্ম্যাঃ প্রিযচিকীর্ষযা প্রজাপতের্দুহিতৃণাং পুত্রাণাং তদ্বর্ষপতীনাং পুরুষাযুষাহোরাত্রপরিসঙ্খ্যানানাং যাসাং গর্ভা মহাপুরুষমহাস্ত্রতেজসোদ্বেজিতমনসাং বিধ্বস্তা ব্যসবঃ সংবত্সরান্তে বিনিপতন্তি ॥ ১৫ ॥

অতীব সুললিতগতিবিলাসবিলসিতরুচিরহাসলেশাবলোকলীলযা কিঞ্চিদুত্তম্ভিতসুন্দরভ্রূমণ্ডলসুভগবদনারবিন্দশ্রিযা রমাং রমযন্নিন্দ্রিযাণি রমযতে ॥ ১৬ ॥

তদ্ভগবতো মাযামযং রূপং পরমসমাধিযোগেন রমা দেবী সংবত্সরস্য রাত্রিষু প্রজাপতের্দুহিতৃভিরুপেতাহঃসু চ তদ্ভর্তৃভিরুপাস্তে ইদং চোদাহরতি ॥ ১৭ ॥

ওঁ হ্রাং হ্রীং হ্রূং ওঁ নমো ভগবতে হৃষীকেশায সর্বগুণবিশেষৈর্বিলক্ষিতাত্মনে আকূতীনাং চিত্তীনাং চেতসাং বিশেষাণাং চাধিপতযে ষোডশকলাযচ্ছন্দোমযাযান্নমযাযামৃতমযায সর্বমযায সহসে ওজসে বলায কান্তায কামায নমস্তে উভযত্র ভূযাত্ ॥ ১৮ ॥

স্ত্রিযো ব্রতৈস্ত্বা হৃষীকেশ্বরং স্বতো
হ্যারাধ্য লোকে পতিমাশাসতেঽন্যম্ ।
তাসাং ন তে বৈ পরিপান্ত্যপত্যং
প্রিযং ধনাযূংষি যতোঽস্বতন্ত্রাঃ ॥ ১৯ ॥

স বৈ পতিঃ স্যাদকুতোভযঃ স্বযং
সমন্ততঃ পাতি ভযাতুরং জনম্ ।
স এক এবেতরথা মিথো ভযং
নৈবাত্মলাভাদধি মন্যতে পরম্ ॥ ২০ ॥

যা তস্য তে পাদসরোরুহার্হণং
নিকামযেত্সাখিলকামলম্পটা ।
তদেব রাসীপ্সিতমীপ্সিতোঽর্চিতো
যদ্ভগ্নযাচ্ঞা ভগবন্ প্রতপ্যতে ॥ ২১ ॥

মত্প্রাপ্তযেঽজেশসুরাসুরাদয-
স্তপ্যন্ত উগ্রং তপ ঐন্দ্রিযেধিযঃ ।
ঋতে ভবত্পাদপরাযণান্ন মাং
বিন্দন্ত্যহং ত্বদ্ধৃদযা যতোঽজিত ॥ ২২ ॥

স ত্বং মমাপ্যচ্যুত শীর্ষ্ণি বন্দিতং
করাম্বুজং যত্ত্বদধাযি সাত্বতাম্ ।
বিভর্ষি মাং লক্ষ্ম বরেণ্য মাযযা
ক ঈশ্বরস্যেহিতমূহিতুং বিভুরিতি ॥ ২৩ ॥

রম্যকে চ ভগবতঃ প্রিযতমং মাত্স্যমবতাররূপং তদ্বর্ষপুরুষস্য মনোঃ প্রাক্প্রদর্শিতং স ইদানীমপি মহতা ভক্তিযোগেনারাধযতীদং চোদাহরতি ॥ ২৪ ॥

ওঁ নমো ভগবতে মুখ্যতমায নমঃ সত্ত্বায প্রাণাযৌজসে সহসে বলায মহামত্স্যায নম ইতি ॥ ২৫ ॥

অন্তর্বহিশ্চাখিললোকপালকৈ-
রদৃষ্টরূপো বিচরস্যুরুস্বনঃ ।
স ঈশ্বরস্ত্বং য ইদং বশেঽনয-
ন্নাম্না যথা দারুমযীং নরঃ স্ত্রিযম্ ॥ ২৬ ॥

যং লোকপালাঃ কিল মত্সরজ্বরা
হিত্বা যতন্তোঽপি পৃথক্সমেত্য চ ।
পাতুং ন শেকুর্দ্বিপদশ্চতুষ্পদঃ
সরীসৃপং স্থাণু যদত্র দৃশ্যতে ॥ ২৭ ॥

ভবান্ যুগান্তার্ণব ঊর্মিমালিনি
ক্ষোণীমিমামোষধিবীরুধাং নিধিম্ ।
মযা সহোরু ক্রমতেঽজ ওজসা
তস্মৈ জগত্প্রাণগণাত্মনে নম ইতি ॥ ২৮ ॥

হিরণ্মযেঽপি ভগবান্নিবসতি কূর্মতনুং বিভ্রাণস্তস্য তত্প্রিযতমাং তনুমর্যমা সহ বর্ষপুরুষৈঃ পিতৃগণাধিপতিরুপধাবতি মন্ত্রমিমং চানুজপতি ॥ ২৯ ॥

ওঁ নমো ভগবতে অকূপারায সর্বসত্ত্বগুণবিশেষণাযানুপলক্ষিতস্থানায নমো বর্ষ্মণে নমো ভূম্নে নমো নমোঽবস্থানায নমস্তে ॥ ৩০ ॥

যদ্রূপমেতন্নিজমাযযার্পিত-
মর্থস্বরূপং বহুরূপরূপিতম্ ।
সঙ্খ্যা ন যস্যাস্ত্যযথোপলম্ভনাত্-
তস্মৈ নমস্তেঽব্যপদেশরূপিণে ॥ ৩১ ॥

জরাযুজং স্বেদজমণ্ডজোদ্ভিদং
চরাচরং দেবর্ষিপিতৃভূতমৈন্দ্রিযম্ ।
দ্যৌঃ খং ক্ষিতিঃ শৈলসরিত্সমুদ্র-
দ্বীপগ্রহর্ক্ষেত্যভিধেয একঃ ॥ ৩২ ॥

যস্মিন্নসঙ্খ্যেযবিশেষনাম-
রূপাকৃতৌ কবিভিঃ কল্পিতেযম্ ।
সঙ্খ্যা যযা তত্ত্বদৃশাপনীযতে
তস্মৈ নমঃ সাঙ্খ্যনিদর্শনায তে ইতি ॥ ৩৩ ॥

উত্তরেষু চ কুরুষু ভগবান্ যজ্ঞপুরুষঃ কৃতবরাহরূপ আস্তে তং তু দেবী হৈষা ভূঃ সহ কুরুভিরস্খলিতভক্তিযোগেনোপধাবতি ইমাং চ পরমামুপনিষদমাবর্তযতি ॥ ৩৪ ॥

ওঁ নমো ভগবতে মন্ত্রতত্ত্বলিঙ্গায যজ্ঞক্রতবে মহাধ্বরাবযবায মহাপুরুষায নমঃ কর্মশুক্লায ত্রিযুগায নমস্তে ॥ ৩৫ ॥ ।

যস্য স্বরূপং কবযো বিপশ্চিতো
গুণেষু দারুষ্বিব জাতবেদসম্ ।
মথ্নন্তি মথ্না মনসা দিদৃক্ষবো
গূঢং ক্রিযার্থৈর্নম ঈরিতাত্মনে ॥ ৩৬ ॥

দ্রব্যক্রিযাহেত্বযনেশকর্তৃভি-
র্মাযাগুণৈর্বস্তুনিরীক্ষিতাত্মনে ।
অন্বীক্ষযাঙ্গাতিশযাত্মবুদ্ধিভি-
র্নিরস্তমাযাকৃতযে নমো নমঃ ॥ ৩৭ ॥

করোতি বিশ্বস্থিতিসংযমোদযং
যস্যেপ্সিতং নেপ্সিতমীক্ষিতুর্গুণৈঃ ।
মাযা যথাযো ভ্রমতে তদাশ্রযং
গ্রাব্ণো নমস্তে গুণকর্মসাক্ষিণে ॥ ৩৮ ॥

প্রমথ্য দৈত্যং প্রতিবারণং মৃধে
যো মাং রসাযা জগদাদিসূকরঃ ।
কৃত্বাগ্রদংষ্ট্রে নিরগাদুদন্বতঃ
ক্রীডন্নিবেভঃ প্রণতাস্মি তং বিভুমিতি ॥ ৩৯ ॥