শ্রীমদ্ভাগবতম্ ৫.২০

শ্রীশুক উবাচ
অতঃ পরং প্লক্ষাদীনাং প্রমাণলক্ষণসংস্থানতো বর্ষবিভাগ উপবর্ণ্যতে ॥ ১ ॥

জম্বূদ্বীপোঽযং যাবত্প্রমাণবিস্তারস্তাবতা ক্ষারোদধিনা পরিবেষ্টিতো যথা মেরুর্জম্ব্বাখ্যেন লবণোদধিরপি ততো দ্বিগুণবিশালেন প্লক্ষাখ্যেন পরিক্ষিপ্তো যথা পরিখা বাহ্যোপবনেন । প্লক্ষো জম্বূপ্রমাণো দ্বীপাখ্যাকরো হিরণ্ময উত্থিতো যত্রাগ্নিরুপাস্তে সপ্তজিহ্বস্তস্যাধিপতিঃ প্রিযব্রতাত্মজ ইধ্মজিহ্বঃ স্বং দ্বীপং সপ্তবর্ষাণি বিভজ্য সপ্তবর্ষনামভ্য আত্মজেভ্য আকলয্য স্বযমাত্মযোগেনোপররাম ॥ ২ ॥

শিবং যবসং সুভদ্রং শান্তং ক্ষেমমমৃতমভযমিতি বর্ষাণি তেষু গিরযো নদ্যশ্চ সপ্তৈবাভিজ্ঞাতাঃ ॥ ৩ ॥

মণিকূটো বজ্রকূট ইন্দ্রসেনো জ্যোতিষ্মান্ সুপর্ণো হিরণ্যষ্ঠীবো মেঘমাল ইতি সেতুশৈলাঃ । অরুণা নৃম্ণাঽঽঙ্গিরসী সাবিত্রী সুপ্তভাতা ঋতম্ভরা সত্যম্ভরা ইতি মহানদ্যঃ । যাসাং জলোপস্পর্শনবিধূতরজস্তমসো হংসপতঙ্গোর্ধ্বাযনসত্যাঙ্গসংজ্ঞাশ্চত্বারো বর্ণাঃ সহস্রাযুষো বিবুধোপমসন্দর্শনপ্রজননাঃ স্বর্গদ্বারং ত্রয্যা বিদ্যযা ভগবন্তং ত্রযীমযং সূর্যমাত্মানং যজন্তে ॥ ৪ ॥

প্রত্নস্য বিষ্ণো রূপং যত্সত্যস্যর্তস্য ব্রহ্মণঃ ।
অমৃতস্য চ মৃত্যোশ্চ সূর্যমাত্মানমীমহীতি ॥ ৫ ॥

প্লক্ষাদিষু পঞ্চসু পুরুষাণামাযুরিন্দ্রিযমোজঃ সহো বলং বুদ্ধির্বিক্রম ইতি চ সর্বেষামৌত্পত্তিকী সিদ্ধিরবিশেষেণ বর্ততে ॥ ৬ ॥

প্লক্ষঃ স্বসমানেনেক্ষুরসোদেনাবৃতো যথা তথা দ্বীপোঽপি শাল্মলো দ্বিগুণবিশালঃ সমানেন সুরোদেনাবৃতঃ পরিবৃঙ্ক্তে ॥ ৭ ॥

যত্র হ বৈ শাল্মলী প্লক্ষাযামা যস্যাং বাব কিল নিলযমাহুর্ভগবতশ্ছন্দঃ স্তুতঃ পতত্ত্রিরাজস্য সা দ্বীপহূতযে উপলক্ষ্যতে ॥ ৮ ॥

তদ্দ্বীপাধিপতিঃ প্রিযব্রতাত্মজো যজ্ঞবাহুঃ স্বসুতেভ্যঃ সপ্তভ্যস্তন্নামানি সপ্তবর্ষাণি ব্যভজত্সুরোচনং সৌমনস্যং রমণকং দেববর্ষং পারিভদ্রমাপ্যাযনমবিজ্ঞাতমিতি ॥ ৯ ॥

তেষু বর্ষাদ্রযো নদ্যশ্চ সপ্তৈবাভিজ্ঞাতাঃ স্বরসঃ শতশৃঙ্গো বামদেবঃ কুন্দো মুকুন্দঃ পুষ্পবর্ষঃ সহস্রশ্রুতিরিতি । অনুমতিঃ সিনীবালী সরস্বতী কুহূ রজনী নন্দা রাকেতি ॥ ১০ ॥

তদ্বর্ষপুরুষাঃ শ্রুতধরবীর্যধরবসুন্ধরেষন্ধরসংজ্ঞা ভগবন্তং বেদমযং সোমমাত্মানং বেদেন যজন্তে ॥ ১১ ॥

স্বগোভিঃ পিতৃদেবেভ্যো বিভজন্ কৃষ্ণশুক্লযোঃ ।
প্রজানাং সর্বাসাং রাজান্ধঃ সোমো ন আস্ত্বিতি ॥ ১২ ॥

এবং সুরোদাদ্বহিস্তদ্দ্বিগুণঃ সমানেনাবৃতো ঘৃতোদেন যথাপূর্বঃ কুশদ্বীপো যস্মিন্ কুশস্তম্বো দেবকৃতস্তদ্দ্বীপাখ্যাকরো জ্বলন ইবাপরঃ স্বশষ্পরোচিষা দিশো বিরাজযতি ॥ ১৩ ॥

তদ্দ্বীপপতিঃ প্রৈযব্রতো রাজন্ হিরণ্যরেতা নাম স্বং দ্বীপং সপ্তভ্যঃ স্বপুত্রেভ্যো যথাভাগং বিভজ্য স্বযং তপ আতিষ্ঠত বসুবসুদানদৃঢরুচিনাভিগুপ্তস্তুত্যব্রতবিবিক্তবামদেবনামভ্যঃ ॥ ১৪ ॥

তেষাং বর্ষেষু সীমাগিরযো নদ্যশ্চাভিজ্ঞাতাঃ সপ্ত সপ্তৈব চক্রশ্চতুঃশৃঙ্গঃ কপিলশ্চিত্রকূটো দেবানীক ঊর্ধ্বরোমা দ্রবিণ ইতি রসকুল্যা মধুকুল্যা মিত্রবিন্দা শ্রুতবিন্দা দেবগর্ভা ঘৃতচ্যুতা মন্ত্রমালেতি ॥ ১৫ ॥

যাসাং পযোভিঃ কুশদ্বীপৌকসঃ কুশলকোবিদাভিযুক্তকুলকসংজ্ঞা ভগবন্তং জাতবেদসরূপিণং কর্মকৌশলেন যজন্তে ॥ ১৬ ॥

পরস্য ব্রহ্মণঃ সাক্ষাজ্জাতবেদোঽসি হব্যবাট্ ।
দেবানাং পুরুষাঙ্গানাং যজ্ঞেন পুরুষং যজেতি ॥ ১৭ ॥

তথা ঘৃতোদাদ্বহিঃ ক্রৌঞ্চদ্বীপো দ্বিগুণঃ স্বমানেন ক্ষীরোদেন পরিত উপক্লৃপ্তো বৃতো যথা কুশদ্বীপো ঘৃতোদেন যস্মিন্ ক্রৌঞ্চো নাম পর্বতরাজো দ্বীপনামনির্বর্তক আস্তে ॥ ১৮ ॥

যোঽসৌ গুহপ্রহরণোন্মথিতনিতম্বকুঞ্জোঽপি ক্ষীরোদেনাসিচ্যমানো ভগবতা বরুণেনাভিগুপ্তো বিভযো বভূব ॥ ১৯ ॥

তস্মিন্নপি প্রৈযব্রতো ঘৃতপৃষ্ঠো নামাধিপতিঃ স্বে দ্বীপে বর্ষাণি সপ্ত বিভজ্য তেষু পুত্রনামসু সপ্ত রিক্থাদান্ বর্ষপান্নিবেশ্য স্বযং ভগবান্ ভগবতঃ পরমকল্যাণযশস আত্মভূতস্য হরেশ্চরণারবিন্দমুপজগাম ॥ ২০ ॥

আমো মধুরুহো মেঘপৃষ্ঠঃ সুধামা ভ্রাজিষ্ঠো লোহিতার্ণো বনস্পতিরিতি ঘৃতপৃষ্ঠসুতাস্তেষাং বর্ষগিরযঃ সপ্ত সপ্তৈব নদ্যশ্চাভিখ্যাতাঃ শুক্লো বর্ধমানো ভোজন উপবর্হিণো নন্দো নন্দনঃ সর্বতোভদ্র ইতি অভযা অমৃতৌঘা আর্যকা তীর্থবতী রূপবতী পবিত্রবতী শুক্লেতি ॥ ২১ ॥

যাসামম্ভঃ পবিত্রমমলমুপযুঞ্জানাঃ পুরুষঋষভদ্রবিণদেবকসংজ্ঞা বর্ষপুরুষা আপোমযং দেবমপাং পূর্ণেনাঞ্জলিনা যজন্তে ॥ ২২ ॥

আপঃ পুরুষবীর্যাঃ স্থ পুনন্তীর্ভূর্ভুবঃসুবঃ ।
তা নঃ পুনীতামীবঘ্নীঃ স্পৃশতামাত্মনা ভুব ইতি ॥ ২৩ ॥

এবং পুরস্তাত্ক্ষীরোদাত্পরিত উপবেশিতঃ শাকদ্বীপো দ্বাত্রিংশল্লক্ষযোজনাযামঃ সমানেন চ দধিমণ্ডোদেন পরীতো যস্মিন্ শাকো নাম মহীরুহঃ স্বক্ষেত্রব্যপদেশকো যস্য হ মহাসুরভিগন্ধস্তং দ্বীপমনুবাসযতি ॥ ২৪ ॥

তস্যাপি প্রৈযব্রত এবাধিপতির্নাম্না মেধাতিথিঃ সোঽপি বিভজ্য সপ্ত বর্ষাণি পুত্রনামানি তেষু স্বাত্মজান্ পুরোজবমনোজবপবমানধূম্রানীকচিত্ররেফবহুরূপবিশ্বধারসংজ্ঞান্নিধাপ্যাধিপতীন্ স্বযং ভগবত্যনন্ত আবেশিতমতিস্তপোবনং প্রবিবেশ ॥ ২৫ ॥

এতেষাং বর্ষমর্যাদাগিরযো নদ্যশ্চ সপ্ত সপ্তৈব ঈশান উরুশৃঙ্গো বলভদ্রঃ শতকেসরঃ সহস্রস্রোতো দেবপালো মহানস ইতি অনঘাঽঽযুর্দা উভযস্পৃষ্টিরপরাজিতা পঞ্চপদী সহস্রস্রুতির্নিজধৃতিরিতি ॥ ২৬ ॥

তদ্বর্ষপুরুষা ঋতব্রতসত্যব্রতদানব্রতানুব্রতনামানো ভগবন্তং বায্বাত্মকং প্রাণাযামবিধূতরজস্তমসঃ পরমসমাধিনা যজন্তে ॥ ২৭ ॥

অন্তঃপ্রবিশ্য ভূতানি যো বিভর্ত্যাত্মকেতুভিঃ ।
অন্তর্যামীশ্বরঃ সাক্ষাত্পাতু নো যদ্বশে স্ফুটম্ ॥ ২৮ ॥

এবমেব দধিমণ্ডোদাত্পরতঃ পুষ্করদ্বীপস্ততো দ্বিগুণাযামঃ সমন্তত উপকল্পিতঃ সমানেন স্বাদূদকেন সমুদ্রেণ বহিরাবৃতো যস্মিন্ বৃহত্পুষ্করং জ্বলনশিখামলকনকপত্রাযুতাযুতং ভগবতঃ কমলাসনস্যাধ্যাসনং পরিকল্পিতম্ ॥ ২৯ ॥

তদ্দ্বীপমধ্যে মানসোত্তরনামৈক এবার্বাচীনপরাচীনবর্ষযোর্মর্যাদাচলোঽযুতযোজনোচ্ছ্রাযাযামো যত্র তু চতসৃষু দিক্ষু চত্বারি পুরাণি লোকপালানামিন্দ্রাদীনাং যদুপরিষ্টাত্সূর্যরথস্য মেরুং পরিভ্রমতঃ সংবত্সরাত্মকং চক্রং দেবানামহোরাত্রাভ্যাং পরিভ্রমতি ॥ ৩০ ॥

তদ্দ্বীপস্যাপ্যধিপতিঃ প্রৈযব্রতো বীতিহোত্রো নামৈতস্যাত্মজৌ রমণকধাতকিনামানৌ বর্ষপতী নিযুজ্য স স্বযং পূর্বজবদ্ভগবত্কর্মশীল এবাস্তে ॥ ৩১ ॥

তদ্বর্ষপুরুষা ভগবন্তং ব্রহ্মরূপিণং সকর্মকেণ কর্মণাঽঽরাধযন্তীদং চোদাহরন্তি ॥ ৩২ ॥

যত্তত্কর্মমযং লিঙ্গং ব্রহ্মলিঙ্গং জনোঽর্চযেত্ ।
একান্তমদ্বযং শান্তং তস্মৈ ভগবতে নম ইতি ॥ ৩৩ ॥

ঋষিরুবাচ
ততঃ পরস্তাল্লোকালোকনামাচলো লোকালোকযোরন্তরালে পরিত উপক্ষিপ্তঃ ॥ ৩৪ ॥

যাবন্মানসোত্তরমের্বোরন্তরং তাবতী ভূমিঃ কাঞ্চন্যন্যাঽঽদর্শতলোপমা যস্যাং প্রহিতঃ পদার্থো ন
কথঞ্চিত্পুনঃ
প্রত্যুপলভ্যতে তস্মাত্সর্বসত্ত্বপরিহৃতাসীত্ ॥ ৩৫ ॥

লোকালোক ইতি সমাখ্যা যদনেনাচলেন লোকালোকস্যান্তর্বর্তিনাবস্থাপ্যতে ॥ ৩৬ ॥

স লোকত্রযান্তে পরিত ঈশ্বরেণ বিহিতো যস্মাত্সূর্যাদীনাং ধ্রুবাপবর্গাণাং জ্যোতির্গণানাং গভস্তযোঽর্বাচীনাংস্ত্রীংল্লোকানাবিতন্বানা ন কদাচিত্পরাচীনা ভবিতুমুত্সহন্তে তাবদুন্নহনাযামঃ ॥ ৩৭ ॥

এতাবাঁল্লোকবিন্যাসো মানলক্ষণসংস্থাভির্বিচিন্তিতঃ কবিভিঃ স তু পঞ্চাশত্কোটিগণিতস্য ভূগোলস্য তুরীযভাগোঽযং লোকালোকাচলঃ ॥ ৩৮ ॥

তদুপরিষ্টাচ্চতসৃষ্বাশাস্বাত্মযোনিনাখিলজগদ্গুরুণাধিনিবেশিতা যে দ্বিরদপতয ঋষভঃ পুষ্করচূডো বামনোঽপরাজিত ইতি সকললোকস্থিতিহেতবঃ ॥ ৩৯ ॥

তেষাং স্ববিভূতীনাং লোকপালানাং চ বিবিধবীর্যোপবৃংহণায ভগবান্ পরমমহাপুরুষো মহাবিভূতিপতিরন্তর্যাম্যাত্মনো বিশুদ্ধসত্ত্বং ধর্মজ্ঞানবৈরাগ্যৈশ্বর্যাদ্যষ্টমহাসিদ্ধ্যুপলক্ষণং বিষ্বক্সেনাদিভিঃ স্বপার্ষদপ্রবরৈঃ পরিবারিতো নিজবরাযুধোপশোভিতৈর্নিজভুজদণ্ডৈঃ সন্ধারয-মাণস্তস্মিন্ গিরিবরে সমন্তাত্সকললোকস্বস্তয আস্তে ॥ ৪০ ॥

আকল্পমেবং বেষং গত এষ ভগবানাত্মযোগমাযযা বিরচিতবিবিধলোকযাত্রাগোপীযাযেত্যর্থঃ ॥ ৪১ ॥

যোঽন্তর্বিস্তার এতেন হ্যলোকপরিমাণং চ ব্যাখ্যাতং যদ্বহির্লোকালোকাচলাত্ । ততঃ পরস্তাদ্যোগেশ্বরগতিং বিশুদ্ধামুদাহরন্তি ॥ ৪২ ॥

অণ্ডমধ্যগতঃ সূর্যো দ্যাবাভূম্যোর্যদন্তরম্ ।
সূর্যাণ্ডগোলযোর্মধ্যে কোট্যঃ স্যুঃ পঞ্চবিংশতিঃ ॥ ৪৩ ॥

মৃতেঽণ্ড এষ এতস্মিন্ যদভূত্ততো মার্তণ্ড ইতি ব্যপদেশঃ ।
হিরণ্যগর্ভ ইতি যদ্ধিরণ্যাণ্ডসমুদ্ভবঃ ॥ ৪৪ ॥

সূর্যেণ হি বিভজ্যন্তে দিশঃ খং দ্যৌর্মহী ভিদা ।
স্বর্গাপবর্গৌ নরকা রসৌকাংসি
চ সর্বশঃ ॥ ৪৫ ॥

দেবতির্যঙ্মনুষ্যাণাং সরীসৃপসবীরুধাম্ ।
সর্বজীবনিকাযানাং সূর্য আত্মা
দৃগীশ্বরঃ ॥ ৪৬ ॥