শ্ৰীমদ্ভাগৱতম্ ৫.৩

শ্ৰীশুক উৱাচ
নাভিৰপত্যকামোঽপ্ৰজযা মেৰুদেৱ্যা ভগৱন্তং যজ্ঞপুৰুষমৱহিতাত্মাযজত ॥ ১ ॥

তস্য হ ৱাৱ শ্ৰদ্ধযা ৱিশুদ্ধভাৱেন যজতঃ প্ৰৱৰ্গ্যেষু প্ৰচৰত্সু দ্ৰৱ্যদেশকালমন্ত্ৰৰ্ত্ৱিগ্দক্ষিণাৱিধানযোগোপপত্ত্যা দুৰধিগমোঽপি ভগৱান্ ভাগৱতৱাত্সল্যতযা সুপ্ৰতীক আত্মানমপৰাজিতং নিজজনাভিপ্ৰেতাৰ্থৱিধিত্সযা গৃহীতহৃদযো হৃদযঙ্গমং মনোনযনানন্দনাৱযৱাভিৰামমাৱিশ্চকাৰ ॥ ২ ॥

অথ হ তমাৱিষ্কৃতভুজযুগলদ্ৱযং হিৰণ্মযং পুৰুষৱিশেষং কপিশকৌশেযাম্বৰধৰমুৰসি ৱিলসচ্ছ্ৰীৱত্সললামং দৰৱৰৱনৰুহৱনমালাচ্ছূৰ্যমৃতমণিগদাদিভিৰুপলক্ষিতং স্ফুটকিৰণপ্ৰৱৰমুকুটকুণ্ডলকটককটিসূত্ৰহাৰকেযূৰনূপুৰাদ্যঙ্গভূষণৱিভূষিতমৃত্ৱিক্ সদস্যগৃহপতযোঽধনা ইৱোত্তমধনমুপলভ্য সবহুমানমৰ্হণেনাৱনতশীৰ্ষাণ উপতস্থুঃ ॥ ৩ ॥

ঋত্ৱিজ ঊচুঃ
অৰ্হসি মুহুৰৰ্হত্তমাৰ্হণমস্মাকমনুপথানাং নমো নম ইত্যেতাৱত্সদুপশিক্ষিতং কোঽৰ্হতি পুমান্ প্ৰকৃতিগুণৱ্যতিকৰমতিৰনীশ ঈশ্ৱৰস্য পৰস্য প্ৰকৃতিপুৰুষযোৰৰ্ৱাক্তনাভিৰ্নামৰূপাকৃতিভী ৰূপনিৰূপণম্ ॥ ৪ ॥

সকলজননিকাযৱৃজিননিৰসনশিৱতমপ্ৰৱৰগুণগণৈকদেশকথনাদৃতে ॥ ৫ ॥

পৰিজনানুৰাগৱিৰচিতশবলসংশব্দসলিলসিতকিসলযতুলসিকাদূৰ্ৱাঙ্কুৰৈৰপি সম্ভৃতযা সপৰ্যযা কিল পৰম পৰিতুষ্যসি ॥ ৬ ॥

অথানযাপি ন ভৱত ইজ্যযোৰুভাৰভৰযা সমুচিতমৰ্থমিহোপলভামহে ॥ ৭ ॥

আত্মন এৱানুসৱনমঞ্জসাৱ্যতিৰেকেণ বোভূযমানাশেষপুৰুষাৰ্থস্ৱৰূপস্য কিন্তু নাথাশিষ আশাসানানামেতদভিসংৰাধনমাত্ৰং ভৱিতুমৰ্হতি ॥ ৮ ॥

শ্লোক ৫.৩.৯
তদ্যথা বালিশানাং স্ৱযমাত্মনঃ শ্ৰেযঃ পৰমৱিদুষাং পৰমপৰমপুৰুষ প্ৰকৰ্ষকৰুণযা স্ৱমহিমানং চাপৱৰ্গাখ্যমুপকল্পযিষ্যন্ স্ৱযং নাপচিত এৱেতৰৱদিহোপলক্ষিতঃ ॥ ৯ ॥

অথাযমেৱ ৱৰো হ্যৰ্হত্তম যৰ্হি বৰ্হিষি ৰাজৰ্ষেৰ্ৱৰদৰ্ষভো ভৱান্নিজপুৰুষেক্ষণৱিষয আসীত্ ॥ ১০ ॥

অসঙ্গনিশিতজ্ঞানানলৱিধূতাশেষমলানাং ভৱত্স্ৱভাৱানামাত্মাৰামাণাং মুনীনামনৱৰতপৰিগুণিতগুণগণ পৰমমঙ্গলাযনগুণগণকথনোঽসি ॥ ১১ ॥

অথ কথঞ্চিত্স্খলনক্ষুত্পতনজৃম্ভণদুৰৱস্থানাদিষু ৱিৱশানাং নঃ স্মৰণায জ্ৱৰমৰণদশাযামপি সকলকশ্মলনিৰসনানি তৱ গুণকৃতনামধেযানি ৱচনগোচৰাণি ভৱন্তু ॥ ১২ ॥

কিঞ্চাযং ৰাজৰ্ষিৰপত্যকামঃ প্ৰজাং ভৱাদৃশীমাশাসান ঈশ্ৱৰমাশিষাং স্ৱৰ্গাপৱৰ্গযোৰপি ভৱন্তমুপধাৱতি প্ৰজাযামৰ্থপ্ৰত্যযো ধনদমিৱাধনঃ ফলীকৰণম্ ॥ ১৩ ॥

কো ৱা ইহ তেঽপৰাজিতোঽপৰাজিতযা মাযযানৱসিতপদৱ্যানাৱৃতমতিৰ্ৱিষযৱিষৰযানাৱৃতপ্ৰকৃতিৰনুপাসিতমহচ্চৰণঃ ॥ ১৪ ॥

যদু হ ৱাৱ তৱ পুনৰদভ্ৰকৰ্তৰিহ সমাহূতস্তত্ৰাৰ্থধিযাং মন্দানাং নস্তদ্যদ্দেৱহেলনং দেৱদেৱাৰ্হসি সাম্যেন সৰ্ৱান্ প্ৰতিৱোঢুমৱিদুষাম্ ॥ ১৫ ॥

শ্ৰীশুক উৱাচ
ইতি নিগদেনাভিষ্টূযমানো ভগৱাননিমিষৰ্ষভো ৱৰ্ষধৰাভিৱাদিতাভিৱন্দিতচৰণঃ সদযমিদমাহ ॥ ১৬ ॥

শ্ৰীভগৱানুৱাচ
অহো বতাহমৃষযো ভৱদ্ভিৰৱিতথগীৰ্ভিৰ্ৱৰমসুলভমভিযাচিতো যদমুষ্যাত্মজো মযা সদৃশো ভূযাদিতি মমাহমেৱাভিৰূপঃ কৈৱল্যাদথাপি ব্ৰহ্মৱাদো ন মৃষা ভৱিতুমৰ্হতি মমৈৱ হি মুখং যদ্ দ্ৱিজদেৱকুলম্ ॥ ১৭ ॥

তত আগ্নীধ্ৰীযেংঽশকলযাৱতৰিষ্যাম্যাত্মতুল্যমনুপলভমানঃ ॥ ১৮ ॥

শ্ৰীশুক উৱাচ
ইতি নিশামযন্ত্যা মেৰুদেৱ্যাঃ পতিমভিধাযান্তৰ্দধে ভগৱান্ ॥ ১৯ ॥

বৰ্হিষি তস্মিন্নেৱ ৱিষ্ণুদত্ত ভগৱান্ পৰমৰ্ষিভিঃ প্ৰসাদিতো নাভেঃ প্ৰিযচিকীৰ্ষযা তদৱৰোধাযনে মেৰুদেৱ্যাং ধৰ্মান্দৰ্শযিতুকামো ৱাতৰশনানাং শ্ৰমণানামৃষীণামূৰ্ধ্ৱমন্থিনাং শুক্লযা তনুৱাৱততাৰ ॥ ২০ ॥