শ্ৰীমদ্ভাগৱতম্ ৫.৬

ৰাজোৱাচ ।
ন নূনং ভগৱ আত্মাৰামাণাং যোগসমীৰিতজ্ঞানাৱভৰ্জিত-
কৰ্মবীজানাং ঐশ্ৱৰ্যাণি পুনঃ ক্লেশদানি ভৱিতুমৰ্হন্তি
যদৃচ্ছযোপগতানি ॥ ১ ॥

ঋষিৰুৱাচ
সত্যমুক্তং কিন্ত্ৱিহ ৱা একে ন মনসোঽদ্ধা ৱিশ্ৰম্ভমনৱস্থানস্য শঠকিৰাত ইৱ সঙ্গচ্ছন্তে ॥ ২ ॥

তথা চোক্তম্—
ন কুৰ্যাত্কৰ্হিচিত্সখ্যং মনসি হ্যনৱস্থিতে ।
যদ্ৱিশ্ৰম্ভাচ্চিৰাচ্চীৰ্ণং চস্কন্দ তপ ঐশ্ৱৰম্ ॥ ৩ ॥

নিত্যং দদাতি কামস্যচ্ছিদ্ৰং তমনু যেঽৰযঃ ।
যোগিনঃ কৃতমৈত্ৰস্য পত্যুৰ্জাযেৱ পুংশ্চলী ॥ ৪ ॥

কামো মন্যুৰ্মদো লোভঃ শোকমোহভযাদযঃ ।
কৰ্মবন্ধশ্চ যন্মূলঃ স্ৱীকুৰ্যাত্কো নু তদ্ বুধঃ ॥ ৫ ॥

অথৈৱমখিললোকপালললামোঽপি ৱিলক্ষণৈৰ্জডৱদৱধূতৱেষভাষাচৰিতৈৰৱিলক্ষিতভগৱত্প্ৰভাৱো যোগিনাং সাম্পৰাযৱিধিমনুশিক্ষযন্ স্ৱকলেৱৰং জিহাসুৰাত্মন্যাত্মানমসংৱ্যৱহিতমনৰ্থান্তৰভাৱেনান্ৱীক্ষমাণ উপৰতানুৱৃত্তিৰুপৰৰাম ॥ ৬ ॥

তস্য হ ৱা এৱং মুক্তলিঙ্গস্য ভগৱত ঋষভস্য যোগমাযাৱাসনযা দেহ ইমাং জগতীমভিমানাভাসেন সঙ্ক্ৰমমাণঃ কোঙ্কৱেঙ্ককুটকান্দক্ষিণকৰ্ণাটকান্দেশান্ যদৃচ্ছযোপগতঃ কুটকাচলোপৱন আস্যকৃতাশ্মকৱল উন্মাদ ইৱ মুক্তমূৰ্ধজোঽসংৱীত এৱ ৱিচচাৰ ॥ ৭ ॥

অথ সমীৰৱেগৱিধূতৱেণুৱিকৰ্ষণজাতোগ্ৰদাৱানলস্তদ্ৱনমালেলিহানঃ সহ তেন দদাহ ॥ ৮ ॥

যস্য কিলানুচৰিতমুপাকৰ্ণ্য কোঙ্কৱেঙ্ককুটকানাং ৰাজাৰ্হন্নামোপশিক্ষ্য কলাৱধৰ্ম উত্কৃষ্যমাণে ভৱিতৱ্যেন ৱিমোহিতঃ স্ৱধৰ্মপথমকুতোভযমপহায কুপথপাখণ্ডমসমঞ্জসং নিজমনীষযা মন্দঃ সম্প্ৰৱৰ্তযিষ্যতে ॥ ৯ ॥

যেন হ ৱাৱ কলৌ মনুজাপসদা দেৱমাযামোহিতাঃ স্ৱৱিধিনিযোগশৌচচাৰিত্ৰৱিহীনা দেৱহেলনান্যপৱ্ৰতানি নিজনিজেচ্ছযা গৃহ্ণানা অস্নানানাচমনাশৌচকেশোল্লুঞ্চনাদীনি কলিনাধৰ্মবহুলেনোপহতধিযো ব্ৰহ্মব্ৰাহ্মণযজ্ঞপুৰুষলোকৱিদূষকাঃ প্ৰাযেণ ভৱিষ্যন্তি ॥ ১০ ॥

তে চ হ্যৰ্ৱাক্তনযা নিজলোকযাত্ৰযান্ধপৰম্পৰযাঽঽশ্ৱস্তাস্তমস্যন্ধে স্ৱযমেৱ প্ৰপতিষ্যন্তি ॥ ১১ ॥

অযমৱতাৰো ৰজসোপপ্লুতকৈৱল্যোপশিক্ষণাৰ্থঃ ॥ ১২ ॥

তস্যানুগুণান্ শ্লোকান্ গাযন্তি—
অহো ভুৱঃ সপ্তসমুদ্ৰৱত্যা
দ্ৱীপেষু ৱৰ্ষেষ্ৱধিপুণ্যমেতত্ ।
গাযন্তি যত্ৰত্যজনা মুৰাৰেঃ
কৰ্মাণি ভদ্ৰাণ্যৱতাৰৱন্তি ॥ ১৩ ॥

অহো নু ৱংশো যশসাৱদাতঃ
প্ৰৈযৱ্ৰতো যত্ৰ পুমান্ পুৰাণঃ ।
কৃতাৱতাৰঃ পুৰুষঃ স আদ্য-
শ্চচাৰ ধৰ্মং যদকৰ্মহেতুম্ ॥ ১৪ ॥

কো ন্ৱস্য কাষ্ঠামপৰোঽনুগচ্ছে-
ন্মনোৰথেনাপ্যভৱস্য যোগী ।
যো যোগমাযাঃ স্পৃহযত্যুদস্তা
হ্যসত্তযা যেন কৃতপ্ৰযত্নাঃ ॥ ১৫ ॥

ইতি হ স্ম সকলৱেদলোকদেৱব্ৰাহ্মণগৱাং পৰমগুৰোৰ্ভগৱত ঋষভাখ্যস্য ৱিশুদ্ধাচৰিতমীৰিতং পুংসাং সমস্তদুশ্চৰিতাভিহৰণং পৰমমহামঙ্গলাযনমিদমনুশ্ৰদ্ধযোপচিতযানুশৃণোত্যাশ্ৰাৱযতি ৱাৱহিতো ভগৱতি তস্মিন্ ৱাসুদেৱ একান্ততো ভক্তিৰনযোৰপি সমনুৱৰ্ততে ॥ ১৬ ॥

যস্যামেৱ কৱয আত্মানমৱিৰতং ৱিৱিধৱৃজিনসংসাৰপৰিতাপোপতপ্যমানমনুসৱনং স্নাপযন্তস্তযৈৱ পৰযা নিৰ্ৱৃত্যা হ্যপৱৰ্গমাত্যন্তিকং পৰমপুৰুষাৰ্থমপি স্ৱযমাসাদিতং নো এৱাদ্ৰিযন্তে ভগৱদীযত্ৱেনৈৱ পৰিসমাপ্তসৰ্ৱাৰ্থাঃ ॥ ১৭ ॥

ৰাজন্ পতিৰ্গুৰুৰলং ভৱতাং যদূনাং
দৈৱং প্ৰিযঃ কুলপতিঃ ক্ৱ চ কিঙ্কৰো ৱঃ ।
অস্ত্ৱেৱমঙ্গ ভগৱান্ ভজতাং মুকুন্দো
মুক্তিং দদাতি কৰ্হিচিত্স্ম ন ভক্তিযোগম্ ॥ ১৮ ॥

নিত্যানুভূতনিজলাভনিৱৃত্ততৃষ্ণঃ
শ্ৰেযস্যতদ্ৰচনযা চিৰসুপ্তবুদ্ধেঃ ।
লোকস্য যঃ কৰুণযাভযমাত্মলোক-
মাখ্যান্নমো ভগৱতে ঋষভায তস্মৈ ॥ ১৯ ॥