শ্রীমদ্ভাগবতম্ ৫.৬

রাজোবাচ ।
ন নূনং ভগব আত্মারামাণাং যোগসমীরিতজ্ঞানাবভর্জিত-
কর্মবীজানাং ঐশ্বর্যাণি পুনঃ ক্লেশদানি ভবিতুমর্হন্তি
যদৃচ্ছযোপগতানি ॥ ১ ॥

ঋষিরুবাচ
সত্যমুক্তং কিন্ত্বিহ বা একে ন মনসোঽদ্ধা বিশ্রম্ভমনবস্থানস্য শঠকিরাত ইব সঙ্গচ্ছন্তে ॥ ২ ॥

তথা চোক্তম্—
ন কুর্যাত্কর্হিচিত্সখ্যং মনসি হ্যনবস্থিতে ।
যদ্বিশ্রম্ভাচ্চিরাচ্চীর্ণং চস্কন্দ তপ ঐশ্বরম্ ॥ ৩ ॥

নিত্যং দদাতি কামস্যচ্ছিদ্রং তমনু যেঽরযঃ ।
যোগিনঃ কৃতমৈত্রস্য পত্যুর্জাযেব পুংশ্চলী ॥ ৪ ॥

কামো মন্যুর্মদো লোভঃ শোকমোহভযাদযঃ ।
কর্মবন্ধশ্চ যন্মূলঃ স্বীকুর্যাত্কো নু তদ্ বুধঃ ॥ ৫ ॥

অথৈবমখিললোকপালললামোঽপি বিলক্ষণৈর্জডবদবধূতবেষভাষাচরিতৈরবিলক্ষিতভগবত্প্রভাবো যোগিনাং সাম্পরাযবিধিমনুশিক্ষযন্ স্বকলেবরং জিহাসুরাত্মন্যাত্মানমসংব্যবহিতমনর্থান্তরভাবেনান্বীক্ষমাণ উপরতানুবৃত্তিরুপররাম ॥ ৬ ॥

তস্য হ বা এবং মুক্তলিঙ্গস্য ভগবত ঋষভস্য যোগমাযাবাসনযা দেহ ইমাং জগতীমভিমানাভাসেন সঙ্ক্রমমাণঃ কোঙ্কবেঙ্ককুটকান্দক্ষিণকর্ণাটকান্দেশান্ যদৃচ্ছযোপগতঃ কুটকাচলোপবন আস্যকৃতাশ্মকবল উন্মাদ ইব মুক্তমূর্ধজোঽসংবীত এব বিচচার ॥ ৭ ॥

অথ সমীরবেগবিধূতবেণুবিকর্ষণজাতোগ্রদাবানলস্তদ্বনমালেলিহানঃ সহ তেন দদাহ ॥ ৮ ॥

যস্য কিলানুচরিতমুপাকর্ণ্য কোঙ্কবেঙ্ককুটকানাং রাজার্হন্নামোপশিক্ষ্য কলাবধর্ম উত্কৃষ্যমাণে ভবিতব্যেন বিমোহিতঃ স্বধর্মপথমকুতোভযমপহায কুপথপাখণ্ডমসমঞ্জসং নিজমনীষযা মন্দঃ সম্প্রবর্তযিষ্যতে ॥ ৯ ॥

যেন হ বাব কলৌ মনুজাপসদা দেবমাযামোহিতাঃ স্ববিধিনিযোগশৌচচারিত্রবিহীনা দেবহেলনান্যপব্রতানি নিজনিজেচ্ছযা গৃহ্ণানা অস্নানানাচমনাশৌচকেশোল্লুঞ্চনাদীনি কলিনাধর্মবহুলেনোপহতধিযো ব্রহ্মব্রাহ্মণযজ্ঞপুরুষলোকবিদূষকাঃ প্রাযেণ ভবিষ্যন্তি ॥ ১০ ॥

তে চ হ্যর্বাক্তনযা নিজলোকযাত্রযান্ধপরম্পরযাঽঽশ্বস্তাস্তমস্যন্ধে স্বযমেব প্রপতিষ্যন্তি ॥ ১১ ॥

অযমবতারো রজসোপপ্লুতকৈবল্যোপশিক্ষণার্থঃ ॥ ১২ ॥

তস্যানুগুণান্ শ্লোকান্ গাযন্তি—
অহো ভুবঃ সপ্তসমুদ্রবত্যা
দ্বীপেষু বর্ষেষ্বধিপুণ্যমেতত্ ।
গাযন্তি যত্রত্যজনা মুরারেঃ
কর্মাণি ভদ্রাণ্যবতারবন্তি ॥ ১৩ ॥

অহো নু বংশো যশসাবদাতঃ
প্রৈযব্রতো যত্র পুমান্ পুরাণঃ ।
কৃতাবতারঃ পুরুষঃ স আদ্য-
শ্চচার ধর্মং যদকর্মহেতুম্ ॥ ১৪ ॥

কো ন্বস্য কাষ্ঠামপরোঽনুগচ্ছে-
ন্মনোরথেনাপ্যভবস্য যোগী ।
যো যোগমাযাঃ স্পৃহযত্যুদস্তা
হ্যসত্তযা যেন কৃতপ্রযত্নাঃ ॥ ১৫ ॥

ইতি হ স্ম সকলবেদলোকদেবব্রাহ্মণগবাং পরমগুরোর্ভগবত ঋষভাখ্যস্য বিশুদ্ধাচরিতমীরিতং পুংসাং সমস্তদুশ্চরিতাভিহরণং পরমমহামঙ্গলাযনমিদমনুশ্রদ্ধযোপচিতযানুশৃণোত্যাশ্রাবযতি বাবহিতো ভগবতি তস্মিন্ বাসুদেব একান্ততো ভক্তিরনযোরপি সমনুবর্ততে ॥ ১৬ ॥

যস্যামেব কবয আত্মানমবিরতং বিবিধবৃজিনসংসারপরিতাপোপতপ্যমানমনুসবনং স্নাপযন্তস্তযৈব পরযা নির্বৃত্যা হ্যপবর্গমাত্যন্তিকং পরমপুরুষার্থমপি স্বযমাসাদিতং নো এবাদ্রিযন্তে ভগবদীযত্বেনৈব পরিসমাপ্তসর্বার্থাঃ ॥ ১৭ ॥

রাজন্ পতির্গুরুরলং ভবতাং যদূনাং
দৈবং প্রিযঃ কুলপতিঃ ক্ব চ কিঙ্করো বঃ ।
অস্ত্বেবমঙ্গ ভগবান্ ভজতাং মুকুন্দো
মুক্তিং দদাতি কর্হিচিত্স্ম ন ভক্তিযোগম্ ॥ ১৮ ॥

নিত্যানুভূতনিজলাভনিবৃত্ততৃষ্ণঃ
শ্রেযস্যতদ্রচনযা চিরসুপ্তবুদ্ধেঃ ।
লোকস্য যঃ করুণযাভযমাত্মলোক-
মাখ্যান্নমো ভগবতে ঋষভায তস্মৈ ॥ ১৯ ॥