ଶ୍ରୀମଦ୍ଭାଗଵତମ୍ ୫.୬

ରାଜୋଵାଚ ।
ନ ନୂନଂ ଭଗଵ ଆତ୍ମାରାମାଣାଂ ଯୋଗସମୀରିତଜ୍ଞାନାଵଭର୍ଜିତ-
କର୍ମବୀଜାନାଂ ଐଶ୍ଵର୍ଯାଣି ପୁନଃ କ୍ଲେଶଦାନି ଭଵିତୁମର୍ହନ୍ତି
ଯଦୃଚ୍ଛଯୋପଗତାନି ॥ ୧ ॥

ଋଷିରୁଵାଚ
ସତ୍ଯମୁକ୍ତଂ କିନ୍ତ୍ଵିହ ଵା ଏକେ ନ ମନସୋଽଦ୍ଧା ଵିଶ୍ରମ୍ଭମନଵସ୍ଥାନସ୍ଯ ଶଠକିରାତ ଇଵ ସଙ୍ଗଚ୍ଛନ୍ତେ ॥ ୨ ॥

ତଥା ଚୋକ୍ତମ୍—
ନ କୁର୍ଯାତ୍କର୍ହିଚିତ୍ସଖ୍ଯଂ ମନସି ହ୍ଯନଵସ୍ଥିତେ ।
ଯଦ୍ଵିଶ୍ରମ୍ଭାଚ୍ଚିରାଚ୍ଚୀର୍ଣଂ ଚସ୍କନ୍ଦ ତପ ଐଶ୍ଵରମ୍ ॥ ୩ ॥

ନିତ୍ଯଂ ଦଦାତି କାମସ୍ଯଚ୍ଛିଦ୍ରଂ ତମନୁ ଯେଽରଯଃ ।
ଯୋଗିନଃ କୃତମୈତ୍ରସ୍ଯ ପତ୍ଯୁର୍ଜାଯେଵ ପୁଂଶ୍ଚଲୀ ॥ ୪ ॥

କାମୋ ମନ୍ଯୁର୍ମଦୋ ଲୋଭଃ ଶୋକମୋହଭଯାଦଯଃ ।
କର୍ମବନ୍ଧଶ୍ଚ ଯନ୍ମୂଲଃ ସ୍ଵୀକୁର୍ଯାତ୍କୋ ନୁ ତଦ୍ ବୁଧଃ ॥ ୫ ॥

ଅଥୈଵମଖିଲଲୋକପାଲଲଲାମୋଽପି ଵିଲକ୍ଷଣୈର୍ଜଡଵଦଵଧୂତଵେଷଭାଷାଚରିତୈରଵିଲକ୍ଷିତଭଗଵତ୍ପ୍ରଭାଵୋ ଯୋଗିନାଂ ସାମ୍ପରାଯଵିଧିମନୁଶିକ୍ଷଯନ୍ ସ୍ଵକଲେଵରଂ ଜିହାସୁରାତ୍ମନ୍ଯାତ୍ମାନମସଂଵ୍ଯଵହିତମନର୍ଥାନ୍ତରଭାଵେନାନ୍ଵୀକ୍ଷମାଣ ଉପରତାନୁଵୃତ୍ତିରୁପରରାମ ॥ ୬ ॥

ତସ୍ଯ ହ ଵା ଏଵଂ ମୁକ୍ତଲିଙ୍ଗସ୍ଯ ଭଗଵତ ଋଷଭସ୍ଯ ଯୋଗମାଯାଵାସନଯା ଦେହ ଇମାଂ ଜଗତୀମଭିମାନାଭାସେନ ସଙ୍କ୍ରମମାଣଃ କୋଙ୍କଵେଙ୍କକୁଟକାନ୍ଦକ୍ଷିଣକର୍ଣାଟକାନ୍ଦେଶାନ୍ ଯଦୃଚ୍ଛଯୋପଗତଃ କୁଟକାଚଲୋପଵନ ଆସ୍ଯକୃତାଶ୍ମକଵଲ ଉନ୍ମାଦ ଇଵ ମୁକ୍ତମୂର୍ଧଜୋଽସଂଵୀତ ଏଵ ଵିଚଚାର ॥ ୭ ॥

ଅଥ ସମୀରଵେଗଵିଧୂତଵେଣୁଵିକର୍ଷଣଜାତୋଗ୍ରଦାଵାନଲସ୍ତଦ୍ଵନମାଲେଲିହାନଃ ସହ ତେନ ଦଦାହ ॥ ୮ ॥

ଯସ୍ଯ କିଲାନୁଚରିତମୁପାକର୍ଣ୍ଯ କୋଙ୍କଵେଙ୍କକୁଟକାନାଂ ରାଜାର୍ହନ୍ନାମୋପଶିକ୍ଷ୍ଯ କଲାଵଧର୍ମ ଉତ୍କୃଷ୍ଯମାଣେ ଭଵିତଵ୍ଯେନ ଵିମୋହିତଃ ସ୍ଵଧର୍ମପଥମକୁତୋଭଯମପହାଯ କୁପଥପାଖଣ୍ଡମସମଞ୍ଜସଂ ନିଜମନୀଷଯା ମନ୍ଦଃ ସମ୍ପ୍ରଵର୍ତଯିଷ୍ଯତେ ॥ ୯ ॥

ଯେନ ହ ଵାଵ କଲୌ ମନୁଜାପସଦା ଦେଵମାଯାମୋହିତାଃ ସ୍ଵଵିଧିନିଯୋଗଶୌଚଚାରିତ୍ରଵିହୀନା ଦେଵହେଲନାନ୍ଯପଵ୍ରତାନି ନିଜନିଜେଚ୍ଛଯା ଗୃହ୍ଣାନା ଅସ୍ନାନାନାଚମନାଶୌଚକେଶୋଲ୍ଲୁଞ୍ଚନାଦୀନି କଲିନାଧର୍ମବହୁଲେନୋପହତଧିଯୋ ବ୍ରହ୍ମବ୍ରାହ୍ମଣଯଜ୍ଞପୁରୁଷଲୋକଵିଦୂଷକାଃ ପ୍ରାଯେଣ ଭଵିଷ୍ଯନ୍ତି ॥ ୧୦ ॥

ତେ ଚ ହ୍ଯର୍ଵାକ୍ତନଯା ନିଜଲୋକଯାତ୍ରଯାନ୍ଧପରମ୍ପରଯାଽଽଶ୍ଵସ୍ତାସ୍ତମସ୍ଯନ୍ଧେ ସ୍ଵଯମେଵ ପ୍ରପତିଷ୍ଯନ୍ତି ॥ ୧୧ ॥

ଅଯମଵତାରୋ ରଜସୋପପ୍ଲୁତକୈଵଲ୍ଯୋପଶିକ୍ଷଣାର୍ଥଃ ॥ ୧୨ ॥

ତସ୍ଯାନୁଗୁଣାନ୍ ଶ୍ଲୋକାନ୍ ଗାଯନ୍ତି—
ଅହୋ ଭୁଵଃ ସପ୍ତସମୁଦ୍ରଵତ୍ଯା
ଦ୍ଵୀପେଷୁ ଵର୍ଷେଷ୍ଵଧିପୁଣ୍ଯମେତତ୍ ।
ଗାଯନ୍ତି ଯତ୍ରତ୍ଯଜନା ମୁରାରେଃ
କର୍ମାଣି ଭଦ୍ରାଣ୍ଯଵତାରଵନ୍ତି ॥ ୧୩ ॥

ଅହୋ ନୁ ଵଂଶୋ ଯଶସାଵଦାତଃ
ପ୍ରୈଯଵ୍ରତୋ ଯତ୍ର ପୁମାନ୍ ପୁରାଣଃ ।
କୃତାଵତାରଃ ପୁରୁଷଃ ସ ଆଦ୍ଯ-
ଶ୍ଚଚାର ଧର୍ମଂ ଯଦକର୍ମହେତୁମ୍ ॥ ୧୪ ॥

କୋ ନ୍ଵସ୍ଯ କାଷ୍ଠାମପରୋଽନୁଗଚ୍ଛେ-
ନ୍ମନୋରଥେନାପ୍ଯଭଵସ୍ଯ ଯୋଗୀ ।
ଯୋ ଯୋଗମାଯାଃ ସ୍ପୃହଯତ୍ଯୁଦସ୍ତା
ହ୍ଯସତ୍ତଯା ଯେନ କୃତପ୍ରଯତ୍ନାଃ ॥ ୧୫ ॥

ଇତି ହ ସ୍ମ ସକଲଵେଦଲୋକଦେଵବ୍ରାହ୍ମଣଗଵାଂ ପରମଗୁରୋର୍ଭଗଵତ ଋଷଭାଖ୍ଯସ୍ଯ ଵିଶୁଦ୍ଧାଚରିତମୀରିତଂ ପୁଂସାଂ ସମସ୍ତଦୁଶ୍ଚରିତାଭିହରଣଂ ପରମମହାମଙ୍ଗଲାଯନମିଦମନୁଶ୍ରଦ୍ଧଯୋପଚିତଯାନୁଶୃଣୋତ୍ଯାଶ୍ରାଵଯତି ଵାଵହିତୋ ଭଗଵତି ତସ୍ମିନ୍ ଵାସୁଦେଵ ଏକାନ୍ତତୋ ଭକ୍ତିରନଯୋରପି ସମନୁଵର୍ତତେ ॥ ୧୬ ॥

ଯସ୍ଯାମେଵ କଵଯ ଆତ୍ମାନମଵିରତଂ ଵିଵିଧଵୃଜିନସଂସାରପରିତାପୋପତପ୍ଯମାନମନୁସଵନଂ ସ୍ନାପଯନ୍ତସ୍ତଯୈଵ ପରଯା ନିର୍ଵୃତ୍ଯା ହ୍ଯପଵର୍ଗମାତ୍ଯନ୍ତିକଂ ପରମପୁରୁଷାର୍ଥମପି ସ୍ଵଯମାସାଦିତଂ ନୋ ଏଵାଦ୍ରିଯନ୍ତେ ଭଗଵଦୀଯତ୍ଵେନୈଵ ପରିସମାପ୍ତସର୍ଵାର୍ଥାଃ ॥ ୧୭ ॥

ରାଜନ୍ ପତିର୍ଗୁରୁରଲଂ ଭଵତାଂ ଯଦୂନାଂ
ଦୈଵଂ ପ୍ରିଯଃ କୁଲପତିଃ କ୍ଵ ଚ କିଙ୍କରୋ ଵଃ ।
ଅସ୍ତ୍ଵେଵମଙ୍ଗ ଭଗଵାନ୍ ଭଜତାଂ ମୁକୁନ୍ଦୋ
ମୁକ୍ତିଂ ଦଦାତି କର୍ହିଚିତ୍ସ୍ମ ନ ଭକ୍ତିଯୋଗମ୍ ॥ ୧୮ ॥

ନିତ୍ଯାନୁଭୂତନିଜଲାଭନିଵୃତ୍ତତୃଷ୍ଣଃ
ଶ୍ରେଯସ୍ଯତଦ୍ରଚନଯା ଚିରସୁପ୍ତବୁଦ୍ଧେଃ ।
ଲୋକସ୍ଯ ଯଃ କରୁଣଯାଭଯମାତ୍ମଲୋକ-
ମାଖ୍ଯାନ୍ନମୋ ଭଗଵତେ ଋଷଭାଯ ତସ୍ମୈ ॥ ୧୯ ॥