শ্রীমদ্ভাগবতম্ ৫.৮

শ্রীশুক উবাচ
একদা তু মহানদ্যাং কৃতাভিষেকনৈযমিকাবশ্যকো ব্রহ্মাক্ষরমভিগৃণানো মুহূর্তত্রযমুদকান্ত উপবিবেশ ॥ ১ ॥

তত্র তদা রাজন্ হরিণী পিপাসযা জলাশযাভ্যাশমেকৈবোপজগাম ॥ ২ ॥

তযা পেপীযমান উদকে তাবদেবাবিদূরেণ নদতো মৃগপতেরুন্নাদো লোকভযঙ্কর উদপতত্ ॥ ৩ ॥

তমুপশ্রুত্য সা মৃগবধূঃ প্রকৃতিবিক্লবা চকিতনিরীক্ষণা সুতরামপিহরিভযাভিনিবেশব্যগ্রহৃদযা পারিপ্লবদৃষ্টিরগততৃষা ভযাত্ সহসৈবোচ্চক্রাম ॥ ৪ ॥

তস্যা উত্পতন্ত্যা অন্তর্বত্ন্যা উরুভযাবগলিতো যোনিনির্গতো গর্ভঃ স্রোতসি নিপপাত ॥ ৫ ॥

তত্প্রসবোত্সর্পণভযখেদাতুরা স্বগণেন বিযুজ্যমানা কস্যাঞ্চিদ্দর্যাং কৃষ্ণসারসতী নিপপাতাথ চ মমার ॥ ৬ ॥

তং ত্বেণকুণকং কৃপণং স্রোতসানূহ্যমানমভিবীক্ষ্যাপবিদ্ধং বন্ধুরিবানুকম্পযা রাজর্ষির্ভরত আদায মৃতমাতরমিত্যাশ্রমপদমনযত্ ॥ ৭ ॥

তস্য হ বা এণকুণক উচ্চৈরেতস্মিন্ কৃতনিজাভিমানস্যাহরহস্তত্পোষণপালনলালনপ্রীণনানুধ্যানেনাত্মনিযমাঃ সহযমাঃ পুরুষপরিচর্যাদয একৈকশঃ কতিপযেনাহর্গণেন বিযুজ্যমানাঃ কিল সর্ব এবোদবসন্ ॥ ৮ ॥

অহো বতাযং হরিণকুণকঃ কৃপণ ঈশ্বররথচরণপরিভ্রমণরযেণ স্বগণসুহৃদ্ বন্ধুভ্যঃ পরিবর্জিতঃ শরণং চ মোপসাদিতো মামেব মাতাপিতরৌ ভ্রাতৃজ্ঞাতীন্ যৌথিকাংশ্চৈবোপেযায নান্যং কঞ্চন বেদ ময্যতিবিস্রব্ধশ্চাত এব মযা মত্পরাযণস্য পোষণপালনপ্রীণনলালনমনসূযুনানুষ্ঠেযং শরণ্যোপেক্ষাদোষবিদুষা ॥ ৯ ॥

নূনং হ্যার্যাঃ সাধব উপশমশীলাঃ কৃপণসুহৃদ এবংবিধার্থে স্বার্থানপি গুরুতরানুপেক্ষন্তে ॥ ১০ ॥

ইতি কৃতানুষঙ্গ আসনশযনাটনস্নানাশনাদিষু সহ মৃগজহুনা স্নেহানুবদ্ধহৃদয আসীত্ ॥ ১১ ॥

কুশকুসুমসমিত্পলাশফলমূলোদকান্যাহরিষ্যমাণো বৃকসালাবৃকাদিভ্যো ভযমাশংসমানো যদা সহ হরিণকুণকেন বনং সমাবিশতি ॥ ১২ ॥

পথিষু চ মুগ্ধভাবেন তত্র তত্র বিষক্তমতিপ্রণযভরহৃদযঃ কার্পণ্যাত্স্কন্ধেনোদ্বহতি এবমুত্সঙ্গ উরসি চাধাযোপলালযন্মুদং পরমামবাপ ॥ ১৩ ॥

ক্রিযাযাং নির্বর্ত্যমানাযামন্তরালেঽপ্যুত্থাযোত্থায যদৈনমভিচক্ষীত তর্হি বাব স বর্ষপতিঃ প্রকৃতিস্থেন মনসা তস্মা আশিষ আশাস্তে স্বস্তি স্তাদ্বত্স তে সর্বত ইতি ॥ ১৪ ॥

অন্যদা ভৃশমুদ্বিগ্নমনা নষ্টদ্রবিণ ইব কৃপণঃ সকরুণমতিতর্ষেণ হরিণকুণক বিরহবিহ্বলহৃদযসন্তাপস্তমেবানুশোচন্ কিল কশ্মলং মহদভিরম্ভিত ইতি হোবাচ ॥ ১৫ ॥

অপি বত স বৈ কৃপণ এণবালকো মৃতহরিণীসুতোঽহো মমানার্যস্য শঠকিরাতমতেরকৃতসুকৃতস্য কৃতবিস্রম্ভ আত্মপ্রত্যযেন তদবিগণযন্ সুজন ইবাগমিষ্যতি ॥ ১৬ ॥

অপি ক্ষেমেণাস্মিন্নাশ্রমোপবনে শষ্পাণি চরন্তং দেবগুপ্তং দ্রক্ষ্যামি ॥ ১৭ ॥

অপি চ ন বৃকঃ সালাবৃকোঽন্যতমো বা নৈকচর একচরো বা ভক্ষযতি ॥ ১৮ ॥

নিম্লোচতি হ ভগবান্ সকলজগত্ক্ষেমোদযস্ত্রয্যাত্মাদ্যাপি মম ন মৃগবধূন্যাস আগচ্ছতি ॥ ১৯ ॥

অপিস্বিদকৃতসুকৃতমাগত্য মাং সুখযিষ্যতি হরিণরাজকুমারো বিবিধরুচিরদর্শনীযনিজমৃগদারকবিনোদৈরসন্তোষং স্বানামপনুদন্ ॥ ২০ ॥

ক্ষ্বেলিকাযাং মাং মৃষাসমাধিনাঽঽমীলিতদৃশং প্রেমসংরম্ভেণ চকিতচকিত আগত্য পৃষদপরুষবিষাণাগ্রেণ লুঠতি ॥ ২১ ॥

আসাদিতহবিষি বর্হিষি দূষিতে মযোপালব্ধো ভীতভীতঃ সপদ্যুপরতরাস ঋষিকুমারবদবহিতকরণকলাপ আস্তে ॥ ২২ ॥

কিং বা অরে আচরিতং তপস্তপস্বিন্যানযা যদিযমবনিঃ সবিনযকৃষ্ণসারতনযতনুতরসুভগশিবতমাখরখুরপদপঙ্ক্তিভির্দ্রবিণবিধুরাতুরস্য কৃপণস্য মম দ্রবিণপদবীং সূচযন্ত্যাত্মানং চ সর্বতঃ কৃতকৌতুকং দ্বিজানাং স্বর্গাপবর্গকামানাং দেবযজনং করোতি ॥ ২৩ ॥

অপিস্বিদসৌ ভগবানুডুপতিরেনং মৃগপতিভযান্মৃতমাতরং মৃগবালকং স্বাশ্রমপরিভ্রষ্টমনুকম্পযা কৃপণজনবত্সলঃ পরিপাতি ॥ ২৪ ॥

কিং বাঽঽত্মজবিশ্লেষজ্বরদবদহনশিখাভিরুপতপ্যমানহৃদযস্থলনলিনীকং মামুপসৃতমৃগীতনযং শিশিরশান্তানুরাগগুণিতনিজবদনসলিলামৃতমযগভস্তিভিঃ স্বধযতীতি চ ॥ ২৫ ॥

এবমঘটমানমনোরথাকুলহৃদযো মৃগদারকাভাসেন স্বারব্ধকর্মণা যোগারম্ভণতো বিভ্রংশিতঃ স যোগতাপসো ভগবদারাধনলক্ষণাচ্চ কথমিতরথা জাত্যন্তর এণকুণক আসঙ্গঃ সাক্ষান্নিঃশ্রেযসপ্রতিপক্ষতযা প্রাক্পরিত্যক্তদুস্ত্যজহৃদযাভিজাতস্য তস্যৈবমন্তরাযবিহত যোগারম্ভণস্য রাজর্ষের্ভরতস্য তাবন্মৃগার্ভকপোষণপালনপ্রীণনলালনানুষঙ্গেণাবিগণযত আত্মানমহিরিবাখুবিলং দুরতিক্রমঃ কালঃ করালরভস আপদ্যত ॥ ২৬ ॥

তদানীমপি পার্শ্ববর্তিনমাত্মজমিবানুশোচন্তমভিবীক্ষমাণো মৃগ এবাভিনিবেশিতমনা বিসৃজ্য লোকমিমং সহ মৃগেণ কলেবরং মৃতমনু ন মৃতজন্মানুস্মৃতিরিতরবন্মৃগশরীরমবাপ ॥ ২৭ ॥

তত্রাপি হ বা আত্মনো মৃগত্বকারণং
ভগবদারাধনসমীহানুভাবেনানুস্মৃত্য
ভৃশমনুতপ্যমান আহ ॥ ২৮ ॥

অহো কষ্টং ভ্রষ্টোঽহমাত্মবতামনুপথাদ্যদ্বিমুক্তসমস্তসঙ্গস্য বিবিক্তপুণ্যারণ্যশরণস্যাত্মবত আত্মনি সর্বেষামাত্মনাং ভগবতি বাসুদেবে তদনুশ্রবণমননসঙ্কীর্তনারাধনানুস্মরণাভিযোগেনাশূন্যসকলযামেন কালেন সমাবেশিতং সমাহিতং কার্ত্স্ন্যেন মনস্তত্তু পুনর্মমাবুধস্যারান্মৃগসুতমনু পরিসুস্রাব ॥ ২৯ ॥

ইত্যেবং নিগূঢনির্বেদো বিসৃজ্য মৃগীং মাতরং পুনর্ভগবত্ক্ষেত্রমুপশমশীলমুনিগণদযিতং শালগ্রামং পুলস্ত্যপুলহাশ্রমং কালঞ্জরাত্প্রত্যাজগাম ॥ ৩০ ॥

তস্মিন্নপি কালং প্রতীক্ষমাণঃ সঙ্গাচ্চ ভৃশমুদ্বিগ্ন
আত্মসহচরঃ শুষ্কপর্ণতৃণবীরুধা বর্তমানো
মৃগত্বনিমিত্তাবসানমেব গণযন্ মৃগশরীরং
তীর্থোদকক্লিন্নমুত্সসর্জ