শ্রীমদ্ভাগবতম্ ৬.১

শ্রীপরীক্ষিদুবাচ
নিবৃত্তিমার্গঃ কথিত আদৌ ভগবতা যথা ।
ক্রমযোগোপলব্ধেন ব্রহ্মণা যদসংসৃতিঃ ॥ ১ ॥

প্রবৃত্তিলক্ষণশ্চৈব ত্রৈগুণ্যবিষযো মুনে ।
যোঽসাবলীনপ্রকৃতের্গুণসর্গঃ পুনঃ পুনঃ ॥ ২ ॥

অধর্মলক্ষণা নানা নরকাশ্চানুবর্ণিতাঃ ।
মন্বন্তরশ্চ ব্যাখ্যাত আদ্যঃ স্বাযম্ভুবো যতঃ ॥ ৩ ॥

প্রিযব্রতোত্তানপদোর্বংশস্তচ্চরিতানি চ ।
দ্বীপবর্ষসমুদ্রাদ্রিনদ্যুদ্যানবনস্পতীন্ ॥ ৪ ॥

ধরামণ্ডলসংস্থানং ভাগলক্ষণমানতঃ ।
জ্যোতিষাং বিবরাণাং চ যথেদমসৃজদ্বিভুঃ ॥ ৫ ॥

অধুনেহ মহাভাগ যথৈব নরকান্নরঃ ।
নানোগ্রযাতনান্নেযাত্তন্মে ব্যাখ্যাতুমর্হসি ॥ ৬ ॥

শ্রীশুক উবাচ
ন চেদিহৈবাপচিতিং যথাংহসঃ
কৃতস্য কুর্যান্মনউক্তপাণিভিঃ ।
ধ্রুবং স বৈ প্রেত্য নরকানুপৈতি
যে কীর্তিতা মে ভবতস্তিগ্মযাতনাঃ ॥ ৭ ॥

তস্মাত্পুরৈবাশ্বিহ পাপনিষ্কৃতৌ
যতেত মৃত্যোরবিপদ্যতাত্মনা ।
দোষস্য দৃষ্ট্বা গুরুলাঘবং যথা
ভিষক্ চিকিত্সেত রুজাং নিদানবিত্ ॥ ৮ ॥

শ্রীরাজোবাচ
দৃষ্টশ্রুতাভ্যাং যত্পাপং জানন্নপ্যাত্মনোঽহিতম্ ।
করোতি ভূযো বিবশঃ প্রাযশ্চিত্তমথো কথম্ ॥ ৯ ॥

ক্বচিন্নিবর্ততেঽভদ্রাত্ক্বচিচ্চরতি তত্পুনঃ ।
প্রাযশ্চিত্তমথোঽপার্থং মন্যে কুঞ্জরশৌচবত্ ॥ ১০ ॥

শ্রীবাদরাযণিরুবাচ
কর্মণা কর্মনির্হারো ন হ্যাত্যন্তিক ইষ্যতে ।
অবিদ্বদধিকারিত্বাত্প্রাযশ্চিত্তং বিমর্শনম্ ॥ ১১ ॥

নাশ্নতঃ পথ্যমেবান্নং ব্যাধযোঽভিভবন্তি হি ।
এবং নিযমকৃদ্রাজন্ শনৈঃ ক্ষেমায কল্পতে ॥ ১২ ॥

তপসা ব্রহ্মচর্যেণ শমেন চ দমেন চ ।
ত্যাগেন সত্যশৌচাভ্যাং যমেন নিযমেন বা ॥ ১৩ ॥

দেহবাগ্বুদ্ধিজং ধীরা ধর্মজ্ঞাঃ শ্রদ্ধযান্বিতাঃ ।
ক্ষিপন্ত্যঘং মহদপি বেণুগুল্মমিবানলঃ ॥ ১৪ ॥

কেচিত্কেবলযা ভক্ত্যা বাসুদেবপরাযণাঃ ।
অঘং ধুন্বন্তি কার্ত্স্ন্যেন নীহারমিব ভাস্করঃ ॥ ১৫ ॥

ন তথা হ্যঘবান্ রাজন্পূযেত তপআদিভিঃ ।
যথা কৃষ্ণার্পিতপ্রাণস্তত্পুরুষনিষেবযা ॥ ১৬ ॥

সধ্রীচীনো হ্যযং লোকে পন্থাঃ ক্ষেমোঽকুতোভযঃ ।
সুশীলাঃ সাধবো যত্র নারাযণপরাযণাঃ ॥ ১৭ ॥

প্রাযশ্চিত্তানি চীর্ণানি নারাযণপরাঙ্মুখম্ ।
ন নিষ্পুনন্তি রাজেন্দ্র সুরাকুম্ভমিবাপগাঃ ॥ ১৮ ॥

সকৃন্মনঃ কৃষ্ণপদারবিন্দযো-
র্নিবেশিতং তদ্গুণরাগি যৈরিহ ।
ন তে যমং পাশভৃতশ্চ তদ্ভটান্
স্বপ্নেঽপি পশ্যন্তি হি চীর্ণনিষ্কৃতাঃ ॥ ১৯ ॥

অত্র চোদাহরন্তীমমিতিহাসং পুরাতনম্ ।
দূতানাং বিষ্ণুযমযোঃ সংবাদস্তং নিবোধ মে ॥ ২০ ॥

কান্যকুব্জে দ্বিজঃ কশ্চিদ্দাসীপতিরজামিলঃ ।
নাম্না নষ্টসদাচারো দাস্যাঃ সংসর্গদূষিতঃ ॥ ২১ ॥

বন্দ্যক্ষৈঃ কৈতবৈশ্চৌর্যৈর্গর্হিতাং বৃত্তিমাস্থিতঃ ।
বিভ্রত্কুটুম্বমশুচির্যাতযামাস দেহিনঃ ॥ ২২ ॥

এবং নিবসতস্তস্য লালযানস্য তত্সুতান্ ।
কালোঽত্যগান্মহান্ রাজন্নষ্টাশীত্যাযুষঃ সমাঃ ॥ ২৩ ॥

তস্য প্রবযসঃ পুত্রা দশ তেষাং তু যোঽবমঃ ।
বালো নারাযণো নাম্না পিত্রোশ্চ দযিতো ভৃশম্ ॥ ২৪ ॥

স বদ্ধহৃদযস্তস্মিন্নর্ভকে কলভাষিণি ।
নিরীক্ষমাণস্তল্লীলাং মুমুদে জরঠো ভৃশম্ ॥ ২৫ ॥

ভুঞ্জানঃ প্রপিবন্ খাদন্ বালকং স্নেহযন্ত্রিতঃ ।
ভোজযন্ পাযযন্ মূঢো ন বেদাগতমন্তকম্ ॥ ২৬ ॥

স এবং বর্তমানোঽজ্ঞো মৃত্যুকাল উপস্থিতে ।
মতিং চকার তনযে বালে নারাযণাহ্বযে ॥ ২৭ ॥

স পাশহস্তাংস্ত্রীন্দৃষ্ট্বা পুরুষানতিদারুণান্ ।
বক্রতুণ্ডানূর্ধ্বরোম্ণ আত্মানং নেতুমাগতান্ ॥ ২৮ ॥

দূরে ক্রীডনকাসক্তং পুত্রং নারাযণাহ্বযম্ ।
প্লাবিতেন স্বরেণোচ্চৈরাজুহাবাকুলেন্দ্রিযঃ ॥ ২৯ ॥

নিশম্য ম্রিযমাণস্য মুখতো হরিকীর্তনম্ ।
ভর্তুর্নাম মহারাজ পার্ষদাঃ সহসাপতন্ ॥ ৩০ ॥

বিকর্ষতোঽন্তর্হৃদযাদ্দাসীপতিমজামিলম্ ।
যমপ্রেষ্যান্ বিষ্ণুদূতা বারযামাসুরোজসা ॥ ৩১ ॥

ঊচুর্নিষেধিতাস্তাংস্তে বৈবস্বতপুরঃসরাঃ ।
কে যূযং প্রতিষেদ্ধারো ধর্মরাজস্য শাসনম্ ॥ ৩২ ॥

কস্য বা কুত আযাতাঃ কস্মাদস্য নিষেধথ ।
কিং দেবা উপদেবা যা যূযং কিং সিদ্ধসত্তমাঃ ॥ ৩৩ ॥

সর্বে পদ্মপলাশাক্ষাঃ পীতকৌশেযবাসসঃ ।
কিরীটিনঃ কুণ্ডলিনো লসত্পুষ্করমালিনঃ ॥ ৩৪ ॥

সর্বে চ নূত্নবযসঃ সর্বে চারুচতুর্ভুজাঃ ।
ধনুর্নিষঙ্গাসিগদাশঙ্খচক্রাম্বুজশ্রিযঃ ॥ ৩৫ ॥

দিশো বিতিমিরালোকাঃ কুর্বন্তঃ স্বেন তেজসা ।
কিমর্থং ধর্মপালস্য কিঙ্করান্নো নিষেধথ ॥ ৩৬ ॥

শ্রীশুক উবাচ
ইত্যুক্তে যমদূতৈস্তে বাসুদেবোক্তকারিণঃ ।
তান্ প্রত্যূচুঃ প্রহস্যেদং মেঘনির্হ্রাদযা গিরা ॥ ৩৭ ॥

শ্রীবিষ্ণুদূতা ঊচুঃ
যূযং বৈ ধর্মরাজস্য যদি নির্দেশকারিণঃ ।
ব্রূত ধর্মস্য নস্তত্ত্বং যচ্চাধর্মস্য লক্ষণম্ ॥ ৩৮ ॥

কথং স্বিদ্ ধ্রিযতে দণ্ডঃ কিং বাস্য স্থানমীপ্সিতম্ ।
দণ্ড্যাঃ কিং কারিণঃ সর্বে আহো স্বিত্কতিচিন্নৃণাম্ ॥ ৩৯ ॥

যমদূতা ঊচুঃ
বেদপ্রণিহিতো ধর্মো হ্যধর্মস্তদ্বিপর্যযঃ ।
বেদো নারাযণঃ সাক্ষাত্স্বযম্ভূরিতি শুশ্রুম ॥ ৪০ ॥

যেন স্বধাম্ন্যমী ভাবা রজঃসত্ত্বতমোমযাঃ ।
গুণনামক্রিযারূপৈর্বিভাব্যন্তে যথাতথম্ ॥ ৪১ ॥

সূর্যোঽগ্নিঃ খং মরুদ্দেবঃ সোমঃ সন্ধ্যাহনী দিশঃ ।
কং কুঃ স্বযং ধর্ম ইতি হ্যেতে দৈহ্যস্য সাক্ষিণঃ ॥ ৪২ ॥

এতৈরধর্মো বিজ্ঞাতঃ স্থানং দণ্ডস্য যুজ্যতে ।
সর্বে কর্মানুরোধেন দণ্ডমর্হন্তি কারিণঃ ॥ ৪৩ ॥

সম্ভবন্তি হি ভদ্রাণি বিপরীতানি চানঘাঃ ।
কারিণাং গুণসঙ্গোঽস্তি দেহবান্ন হ্যকর্মকৃত্ ॥ ৪৪ ॥

যেন যাবান্যথাধর্মো ধর্মো বেহ সমীহিতঃ ।
স এব তত্ফলং ভুঙ্ক্তে তথা তাবদমুত্র বৈ ॥ ৪৫ ॥

যথেহ দেবপ্রবরাস্ত্রৈবিধ্যমুপলভ্যতে ।
ভূতেষু গুণবৈচিত্র্যাত্তথান্যত্রানুমীযতে ॥ ৪৬ ॥

বর্তমানোঽন্যযোঃ কালো গুণাভিজ্ঞাপকো যথা ।
এবং জন্মান্যযোরেতদ্ধর্মাধর্মনিদর্শনম্ ॥ ৪৭ ॥

মনসৈব পুরে দেবঃ পূর্বরূপং বিপশ্যতি ।
অনুমীমাংসতেঽপূর্বং মনসা ভগবানজঃ ॥ ৪৮ ॥

যথাজ্ঞস্তমসা যুক্ত উপাস্তে ব্যক্তমেব হি ।
ন বেদ পূর্বমপরং নষ্টজন্মস্মৃতিস্তথা ॥ ৪৯ ॥

পঞ্চভিঃ কুরুতে স্বার্থান্ পঞ্চ বেদাথ পঞ্চভিঃ ।
একস্তু ষোডশেন ত্রীন্ স্বযং সপ্তদশোঽশ্নুতে ॥ ৫০ ॥

তদেতত্ষোডশকলং লিঙ্গং শক্তিত্রযং মহত্ ।
ধত্তেঽনুসংসৃতিং পুংসি হর্ষশোকভযার্তিদাম্ ॥ ৫১ ॥

দেহ্যজ্ঞোঽজিতষড্বর্গো নেচ্ছন্কর্মাণি কার্যতে ।
কোশকার ইবাত্মানং কর্মণাচ্ছাদ্য মুহ্যতি ॥ ৫২ ॥

ন হি কশ্চিত্ক্ষণমপি জাতু তিষ্ঠত্যকর্মকৃত্ ।
কার্যতে হ্যবশঃ কর্ম গুণৈঃ স্বাভাবিকৈর্বলাত্ ॥ ৫৩ ॥

লব্ধ্বা নিমিত্তমব্যক্তং ব্যক্তাব্যক্তং ভবত্যুত ।
যথাযোনি যথাবীজং স্বভাবেন বলীযসা ॥ ৫৪ ॥

এষ প্রকৃতিসঙ্গেন পুরুষস্য বিপর্যযঃ ।
আসীত্স এব নচিরাদীশসঙ্গাদ্বিলীযতে ॥ ৫৫ ॥

অযং হি শ্রুতসম্পন্নঃ শীলবৃত্তগুণালযঃ ।
ধৃতব্রতো মৃদুর্দান্তঃ সত্যবাঙ্মন্ত্রবিচ্ছুচিঃ ॥ ৫৬ ॥

গুর্বগ্ন্যতিথিবৃদ্ধানাং শুশ্রূষুরনহঙ্কৃতঃ ।
সর্বভূতসুহৃত্সাধুর্মিতবাগনসূযকঃ ॥ ৫৭ ॥

একদাসৌ বনং যাতঃ পিতৃসন্দেশকৃদ্ দ্বিজঃ ।
আদায তত আবৃত্তঃ ফলপুষ্পসমিত্কুশান্ ॥ ৫৮ ॥

দদর্শ কামিনং কঞ্চিচ্ছূদ্রং সহ ভুজিষ্যযা ।
পীত্বা চ মধু মৈরেযং মদাঘূর্ণিতনেত্রযা ॥ ৫৯ ॥

মত্তযা বিশ্লথন্নীব্যা ব্যপেতং নিরপত্রপম্ ।
ক্রীডন্তমনুগাযন্তং হসন্তমনযান্তিকে ॥ ৬০ ॥

দৃষ্ট্বা তাং কামলিপ্তেন বাহুনা পরিরম্ভিতাম্ ।
জগাম হৃচ্ছযবশং সহসৈব বিমোহিতঃ ॥ ৬১ ॥

স্তম্ভযন্নাত্মনাত্মানং যাবত্সত্ত্বং যথাশ্রুতম্ ।
ন শশাক সমাধাতুং মনো মদনবেপিতম্ ॥ ৬২ ॥

তন্নিমিত্তস্মরব্যাজগ্রহগ্রস্তো বিচেতনঃ ।
তামেব মনসা ধ্যাযন্ স্বধর্মাদ্বিররাম হ ॥ ৬৩ ॥

তামেব তোষযামাস পিত্র্যেণার্থেন যাবতা ।
গ্রাম্যৈর্মনোরমৈঃ কামৈঃ প্রসীদেত যথা তথা ॥ ৬৪ ॥

বিপ্রাং স্বভার্যামপ্রৌঢাং কুলে মহতি লম্ভিতাম্ ।
বিসসর্জাচিরাত্পাপঃ স্বৈরিণ্যাপাঙ্গবিদ্ধধীঃ ॥ ৬৫ ॥

যতস্ততশ্চোপনিন্যে ন্যাযতোঽন্যাযতো ধনম্ ।
বভারাস্যাঃ কুটুম্বিন্যাঃ কুটুম্বং মন্দধীরযম্ ॥ ৬৬ ॥

যদসৌ শাস্ত্রমুল্লঙ্ঘ্য স্বৈরচার্যতিগর্হিতঃ ।
অবর্তত চিরং কালমঘাযুরশুচির্মলাত্ ॥ ৬৭ ॥

তত এনং দণ্ডপাণেঃ সকাশং কৃতকিল্বিষম্ ।
নেষ্যামোঽকৃতনির্বেশং যত্র দণ্ডেন শুদ্ধ্যতি ॥ ৬৮ ॥