শ্রীমদ্ভাগবতম্ ৬.১৬

শ্রীবাদরাযণিরুবাচ
অথ দেবঋষী রাজন্ সম্পরেতং নৃপাত্মজম্ ।
দর্শযিত্বেতি হোবাচ জ্ঞাতীনামনুশোচতাম্ ॥ ১ ॥

শ্রীনারদ উবাচ
জীবাত্মন্ পশ্য ভদ্রং তে মাতরং পিতরং চ তে ।
সুহৃদো বান্ধবাস্তপ্তাঃ শুচা ত্বত্কৃতযা ভৃশম্ ॥ ২ ॥

কলেবরং স্বমাবিশ্য শেষমাযুঃ সুহৃদ্বৃতঃ ।
ভুঙ্ক্ষ্ব ভোগান্ পিতৃপ্রত্তানধিতিষ্ঠ নৃপাসনম্ ॥ ৩ ॥

জীব উবাচ
কস্মিঞ্জন্মন্যমী মহ্যং পিতরো মাতরোঽভবন্ ।
কর্মভির্ভ্রাম্যমাণস্য দেবতির্যঙ্নৃযোনিষু ॥ ৪ ॥

বন্ধুজ্ঞাত্যরিমধ্যস্থমিত্রোদাসীনবিদ্বিষঃ ।
সর্ব এব হি সর্বেষাং ভবন্তি ক্রমশো মিথঃ ॥ ৫ ॥

যথা বস্তূনি পণ্যানি হেমাদীনি ততস্ততঃ ।
পর্যটন্তি নরেষ্বেবং জীবো যোনিষু কর্তৃষু ॥ ৬ ॥

নিত্যস্যার্থস্য সম্বন্ধো হ্যনিত্যো দৃশ্যতে নৃষু ।
যাবদ্যস্য হি সম্বন্ধো মমত্বং তাবদেব হি ॥ ৭ ॥

এবং যোনিগতো জীবঃ স নিত্যো নিরহঙ্কৃতঃ ।
যাবদ্যত্রোপলভ্যেত তাবত্স্বত্বং হি তস্য তত্ ॥ ৮ ॥

এষ নিত্যোঽব্যযঃ সূক্ষ্ম এষ সর্বাশ্রযঃ স্বদৃক্ ।
আত্মমাযাগুণৈর্বিশ্বমাত্মানং সৃজতে প্রভুঃ ॥ ৯ ॥

ন হ্যস্যাস্তি প্রিযঃ কশ্চিন্নাপ্রিযঃ স্বঃ পরোঽপি বা ।
একঃ সর্বধিযাং দ্রষ্টা কর্তৃণাং গুণদোষযোঃ ॥ ১০ ॥

নাদত্ত আত্মা হি গুণং ন দোষং ন ক্রিযাফলম্ ।
উদাসীনবদাসীনঃ পরাবরদৃগীশ্বরঃ ॥ ১১ ॥

শ্রীবাদরাযণিরুবাচ
ইত্যুদীর্য গতো জীবো জ্ঞাতযস্তস্য তে তদা ।
বিস্মিতা মুমুচুঃ শোকং ছিত্ত্বাত্মস্নেহশৃঙ্খলাম্ ॥ ১২ ॥

নির্হৃত্য জ্ঞাতযো জ্ঞাতের্দেহং কৃত্বোচিতাঃ ক্রিযাঃ ।
তত্যজুর্দুস্ত্যজং স্নেহং শোকমোহভযার্তিদম্ ॥ ১৩ ॥

বালঘ্ন্যো ব্রীডিতাস্তত্র বালহত্যাহতপ্রভাঃ ।
বালহত্যাব্রতং চেরুর্ব্রাহ্মণৈর্যন্নিরূপিতম্ ।
যমুনাযাং মহারাজ স্মরন্ত্যো দ্বিজভাষিতম্ ॥ ১৪ ॥

স ইত্থং প্রতিবুদ্ধাত্মা চিত্রকেতুর্দ্বিজোক্তিভিঃ ।
গৃহান্ধকূপান্নিষ্ক্রান্তঃ সরঃপঙ্কাদিব দ্বিপঃ ॥ ১৫ ॥

কালিন্দ্যাং বিধিবত্ স্নাত্বা কৃতপুণ্যজলক্রিযঃ ।
মৌনেন সংযতপ্রাণো ব্রহ্মপুত্রাববন্দত ॥ ১৬ ॥

অথ তস্মৈ প্রপন্নায ভক্তায প্রযতাত্মনে ।
ভগবান্নারদঃ প্রীতো বিদ্যামেতামুবাচ হ ॥ ১৭ ॥

ওঁ নমস্তুভ্যং ভগবতে বাসুদেবায ধীমহি ।
প্রদ্যুম্নাযানিরুদ্ধায নমঃ সঙ্কর্ষণায চ ॥ ১৮ ॥

নমো বিজ্ঞানমাত্রায পরমানন্দমূর্তযে ।
আত্মারামায শান্তায নিবৃত্তদ্বৈতদৃষ্টযে ॥ ১৯ ॥

আত্মানন্দানুভূত্যৈব ন্যস্তশক্ত্যূর্মযে নমঃ ।
হৃষীকেশায মহতে নমস্তেঽনন্তমূর্তযে ॥ ২০ ॥

বচস্যুপরতেঽপ্রাপ্য য একো মনসা সহ ।
অনামরূপশ্চিন্মাত্রঃ সোঽব্যান্নঃ সদসত্পরঃ ॥ ২১ ॥

যস্মিন্নিদং যতশ্চেদং তিষ্ঠত্যপ্যেতি জাযতে ।
মৃণ্মযেষ্বিব মৃজ্জাতিস্তস্মৈ তে ব্রহ্মণে নমঃ ॥ ২২ ॥

যন্ন স্পৃশন্তি ন বিদুর্মনোবুদ্ধীন্দ্রিযাসবঃ ।
অন্তর্বহিশ্চ বিততং ব্যোমবত্তন্নতোঽস্ম্যহম্ ॥ ২৩ ॥

দেহেন্দ্রিযপ্রাণমনোধিযোঽমী
যদংশবিদ্ধাঃ প্রচরন্তি কর্মসু ।
নৈবান্যদা লৌহমিবাপ্রতপ্তং
স্থানেষু তদ্ দ্রষ্ট্রপদেশমেতি ॥ ২৪ ॥

ওঁ নমো ভগবতে মহাপুরুষায মহানুভাবায মহাবিভূতিপতযে সকলসাত্বতপরিবৃঢনিকর করকমলকুড্মলোপলালিতচরণারবিন্দযুগল পরমপরমেষ্ঠিন্নমস্তে ॥ ২৫ ॥

শ্রীশুক উবাচ
ভক্তাযৈতাং প্রপন্নায বিদ্যামাদিশ্য নারদঃ ।
যযাবঙ্গিরসা সাকং ধাম স্বাযম্ভুবং প্রভো ॥ ২৬ ॥

চিত্রকেতুস্তু তাং বিদ্যাং যথা নারদভাষিতাম্ ।
ধারযামাস সপ্তাহমব্ভক্ষঃ সুসমাহিতঃ ॥ ২৭ ॥

ততঃ স সপ্তরাত্রান্তে বিদ্যযা ধার্যমাণযা ।
বিদ্যাধরাধিপত্যং চ লেভেঽপ্রতিহতং নৃপ ॥ ২৮ ॥

ততঃ কতিপযাহোভির্বিদ্যযেদ্ধমনোগতিঃ ।
জগাম দেবদেবস্য শেষস্য চরণান্তিকম্ ॥ ২৯ ॥

মৃণালগৌরং শিতিবাসসং স্ফুরত্-
কিরীটকেযূরকটিত্রকঙ্কণম্ ।
প্রসন্নবক্ত্রারুণলোচনং বৃতং
দদর্শ সিদ্ধেশ্বরমণ্ডলৈঃ প্রভুম্ ॥ ৩০ ॥

তদ্দর্শনধ্বস্তসমস্তকিল্বিষঃ
স্বস্থামলান্তঃকরণোঽভ্যযান্মুনিঃ ।
প্রবৃদ্ধভক্ত্যা প্রণযাশ্রুলোচনঃ
প্রহৃষ্টরোমানমদাদিপুরুষম্ ॥ ৩১ ॥

স উত্তমশ্লোকপদাব্জবিষ্টরং
প্রেমাশ্রুলেশৈরুপমেহযন্মুহুঃ ।
প্রেমোপরুদ্ধাখিলবর্ণনির্গমো
নৈবাশকত্তং প্রসমীডিতুং চিরম্ ॥ ৩২ ॥

ততঃ সমাধায মনো মনীষযা
বভাষ এতত্প্রতিলব্ধবাগসৌ ।
নিযম্য সর্বেন্দ্রিযবাহ্যবর্তনং
জগদ্গুরুং সাত্বতশাস্ত্রবিগ্রহম্ ॥ ৩৩ ॥

চিত্রকেতুরুবাচ
অজিত জিতঃ সমমতিভিঃ
সাধুভির্ভবান্ জিতাত্মভির্ভবতা ।
বিজিতাস্তেঽপি চ ভজতা-
মকামাত্মনাং য আত্মদোঽতিকরুণঃ ॥ ৩৪ ॥

তব বিভবঃ খলু ভগবন্
জগদুদযস্থিতিলযাদীনি ।
বিশ্বসৃজস্তেশাংশা
স্তত্র মৃষা স্পর্ধন্তি পৃথগভিমত্যা ॥ ৩৫ ॥

পরমাণুপরমমহতো-
স্ত্বমাদ্যন্তান্তরবর্তী ত্রযবিধুরঃ ।
আদাবন্তেঽপি চ সত্ত্বানাং
যদ্ ধ্রুবং তদেবান্তরালেঽপি ॥ ৩৬ ॥

ক্ষিত্যাদিভিরেষ কিলাবৃতঃ
সপ্তভির্দশগুণোত্তরৈরণ্ডকোশঃ ।
যত্র পতত্যণুকল্পঃ
সহাণ্ডকোটিকোটিভিস্তদনন্তঃ ॥ ৩৭ ॥

বিষযতৃষো নরপশবো
য উপাসতে বিভূতীর্ন পরং ত্বাম্ ।
তেষামাশিষ ঈশ
তদনু বিনশ্যন্তি যথা রাজকুলম্ ॥ ৩৮ ॥

কামধিযস্ত্বযি রচিতা
ন পরম রোহন্তি যথা করম্ভবীজানি ।
জ্ঞানাত্মন্যগুণমযে
গুণগণতোঽস্য দ্বন্দ্বজালানি ॥ ৩৯ ॥

জিতমজিত তদা ভবতা
যদাহ ভাগবতং ধর্মমনবদ্যম্ ।
নিষ্কিঞ্চনা যে মুনয
আত্মারামা যমুপাসতেঽপবর্গায ॥ ৪০ ॥

বিষমমতির্ন যত্র নৃণাং
ত্বমহমিতি মম তবেতি চ যদন্যত্র ।
বিষমধিযা রচিতো যঃ
স হ্যবিশুদ্ধঃ ক্ষযিষ্ণুরধর্মবহুলঃ ॥ ৪১ ॥

কঃ ক্ষেমো নিজপরযোঃ
কিযান্বার্থঃ স্বপরদ্রুহা ধর্মেণ ।
স্বদ্রোহাত্তব কোপঃ
পরসম্পীডযা চ তথাধর্মঃ ॥ ৪২ ॥

ন ব্যভিচরতি তবেক্ষা
যযা হ্যভিহিতো ভাগবতো ধর্মঃ ।
স্থিরচরসত্ত্বকদম্বে-
ষ্বপৃথগ্ধিযো যমুপাসতে ত্বার্যাঃ ॥ ৪৩ ॥

ন হি ভগবন্নঘটিতমিদং
ত্বদ্দর্শনান্নৃণামখিলপাপক্ষযঃ ।
যন্নাম সকৃচ্ছ্রবণাত্
পুক্কশোঽপি বিমুচ্যতে সংসারাত্ ॥ ৪৪ ॥

অথ ভগবন্ বযমধুনা
ত্বদবলোকপরিমৃষ্টাশযমলাঃ ।
সুরঋষিণা যত্কথিতং
তাবকেন কথমন্যথা ভবতি ॥ ৪৫ ॥

বিদিতমনন্ত সমস্তং
তব জগদাত্মনো জনৈরিহাচরিতম্ ।
বিজ্ঞাপ্যং পরমগুরোঃ
কিযদিব সবিতুরিব খদ্যোতৈঃ ॥ ৪৬ ॥

নমস্তুভ্যং ভগবতে
সকলজগত্স্থিতিলযোদযেশায ।
দুরবসিতাত্মগতযে
কুযোগিনাং ভিদা পরমহংসায ॥ ৪৭ ॥

যং বৈ শ্বসন্তমনু বিশ্বসৃজঃ শ্বসন্তি
যং চেকিতানমনু চিত্তয উচ্চকন্তি ।
ভূমণ্ডলং সর্ষপাযতি যস্য মূর্ধ্নি
তস্মৈ নমো ভগবতেঽস্তু সহস্রমূর্ধ্নে ॥ ৪৮ ॥

শ্রীশুক উবাচ
সংস্তুতো ভগবানেবমনন্তস্তমভাষত ।
বিদ্যাধরপতিং প্রীতশ্চিত্রকেতুং কুরূদ্বহ ॥ ৪৯ ॥

শ্রীভগবানুবাচ
যন্নারদাঙ্গিরোভ্যাং তে ব্যাহৃতং মেঽনুশাসনম্ ।
সংসিদ্ধোঽসি তযা রাজন্ বিদ্যযা দর্শনাচ্চ মে ॥ ৫০ ॥

অহং বৈ সর্বভূতানি ভূতাত্মা ভূতভাবনঃ ।
শব্দব্রহ্ম পরং ব্রহ্ম মমোভে শাশ্বতী তনূ ॥ ৫১ ॥

লোকে বিততমাত্মানং লোকং চাত্মনি সন্ততম্ ।
উভযং চ মযা ব্যাপ্তং মযি চৈবোভযং কৃতম্ ॥ ৫২ ॥

যথা সুষুপ্তঃ পুরুষো বিশ্বং পশ্যতি চাত্মনি ।
আত্মানমেকদেশস্থং মন্যতে স্বপ্ন উত্থিতঃ ॥ ৫৩ ॥

এবং জাগরণাদীনি জীবস্থানানি চাত্মনঃ ।
মাযামাত্রাণি বিজ্ঞায তদ্ দ্রষ্টারং পরং স্মরেত্ ॥ ৫৪ ॥

যেন প্রসুপ্তঃ পুরুষঃ স্বাপং বেদাত্মনস্তদা ।
সুখং চ নির্গুণং ব্রহ্ম তমাত্মানমবেহি মাম্ ॥ ৫৫ ॥

উভযং স্মরতঃ পুংসঃ প্রস্বাপপ্রতিবোধযোঃ ।
অন্বেতি ব্যতিরিচ্যেত তজ্জ্ঞানং ব্রহ্ম তত্পরম্ ॥ ৫৬ ॥

যদেতদ্বিস্মৃতং পুংসো মদ্ভাবং ভিন্নমাত্মনঃ ।
ততঃ সংসার এতস্য দেহাদ্দেহো মৃতের্মৃতিঃ ॥ ৫৭ ॥

লব্ধ্বেহ মানুষীং যোনিং জ্ঞানবিজ্ঞানসম্ভবাম্ ।
আত্মানং যো ন বুদ্ধ্যেত ন ক্বচিত্ক্ষেমমাপ্নুযাত্ ॥ ৫৮ ॥

স্মৃত্বেহাযাং পরিক্লেশং ততঃ ফলবিপর্যযম্ ।
অভযং চাপ্যনীহাযাং সঙ্কল্পাদ্বিরমেত্কবিঃ ॥ ৫৯ ॥

সুখায দুঃখমোক্ষায কুর্বাতে দম্পতী ক্রিযাঃ ।
ততোঽনিবৃত্তিরপ্রাপ্তির্দুঃখস্য চ সুখস্য চ ॥ ৬০ ॥

এবং বিপর্যযং বুদ্ধ্বা নৃণাং বিজ্ঞাভিমানিনাম্ ।
আত্মনশ্চ গতিং সূক্ষ্মাং স্থানত্রযবিলক্ষণাম্ ॥ ৬১ ॥

দৃষ্টশ্রুতাভির্মাত্রাভির্নির্মুক্তঃ স্বেন তেজসা ।
জ্ঞানবিজ্ঞানসন্তৃপ্তো মদ্ভক্তঃ পুরুষো ভবেত্ ॥ ৬২ ॥

এতাবানেব মনুজৈর্যোগনৈপুণ্যবুদ্ধিভিঃ ।
স্বার্থঃ সর্বাত্মনা জ্ঞেযো যত্পরাত্মৈকদর্শনম্ ॥ ৬৩ ॥

ত্বমেতচ্ছ্রদ্ধযা রাজন্নপ্রমত্তো বচো মম ।
জ্ঞানবিজ্ঞানসম্পন্নো ধারযন্নাশু সিধ্যসি ॥ ৬৪ ॥

শ্রীশুক উবাচ
আশ্বাস্য ভগবানিত্থং চিত্রকেতুং জগদ্গুরুঃ ।
পশ্যতস্তস্য বিশ্বাত্মা ততশ্চান্তর্দধে হরিঃ ॥ ৬৫ ॥