শ্ৰীমদ্ভাগৱতম্ ৮.১৮

শ্ৰীশুক উৱাচ
ইত্থং ৱিৰিঞ্চস্তুতকৰ্মৱীৰ্যঃ
প্ৰাদুৰ্বভূৱামৃতভূৰদিত্যাম্ ।
চতুৰ্ভুজঃ শঙ্খগদাব্জচক্ৰঃ
পিশঙ্গৱাসা নলিনাযতেক্ষণঃ ॥ ১ ॥

শ্যামাৱদাতো ঝষৰাজকুণ্ডল-
ত্ৱিষোল্লসচ্ছ্ৰীৱদনাম্বুজঃ পুমান্ ।
শ্ৰীৱত্সৱক্ষা বলযাঙ্গদোল্লস-
ত্কিৰীটকাঞ্চীগুণচাৰুনূপুৰঃ ॥ ২ ॥

মধুৱ্ৰতৱ্ৰাতৱিঘুষ্টযা স্ৱযা
ৱিৰাজিতঃ শ্ৰীৱনমালযা হৰিঃ ।
প্ৰজাপতেৰ্ৱেশ্মতমঃ স্ৱৰোচিষা
ৱিনাশযন্ কণ্ঠনিৱিষ্টকৌস্তুভঃ ॥ ৩ ॥

দিশঃ প্ৰসেদুঃ সলিলাশযাস্তদা
প্ৰজাঃ প্ৰহৃষ্টা ঋতৱো গুণান্ৱিতাঃ ।
দ্যৌৰন্তৰীক্ষং ক্ষিতিৰগ্নিজিহ্ৱা
গাৱো দ্ৱিজাঃ সঞ্জহৃষুৰ্নগাশ্চ ॥ ৪ ॥

শ্ৰোণাযাং শ্ৰৱণদ্ৱাদশ্যাং মুহূৰ্তেঽভিজিতি প্ৰভুঃ ।
সৰ্ৱে নক্ষত্ৰতাৰাদ্যাশ্চক্ৰুস্তজ্জন্ম দক্ষিণম্ ॥ ৫ ॥

দ্ৱাদশ্যাং সৱিতাতিষ্ঠন্মধ্যন্দিনগতো নৃপ ।
ৱিজযানাম সা প্ৰোক্তা যস্যাং জন্ম ৱিদুৰ্হৰেঃ ॥ ৬ ॥

শঙ্খদুন্দুভযো নেদুৰ্মৃদঙ্গপণৱানকাঃ ।
চিত্ৰৱাদিত্ৰতূৰ্যাণাং নিৰ্ঘোষস্তুমুলোঽভৱত্ ॥ ৭ ॥

প্ৰীতাশ্চাপ্সৰসোঽনৃত্যন্গন্ধৰ্ৱপ্ৰৱৰা জগুঃ ।
তুষ্টুৱুৰ্মুনযো দেৱা মনৱঃ পিতৰোঽগ্নযঃ ॥ ৮ ॥

সিদ্ধৱিদ্যাধৰগণাঃ সকিম্পুৰুষকিন্নৰাঃ ।
চাৰণা যক্ষৰক্ষাংসি সুপৰ্ণা ভুজগোত্তমাঃ ॥ ৯ ॥

গাযন্তোঽতিপ্ৰশংসন্তো নৃত্যন্তো ৱিবুধানুগাঃ ।
অদিত্যা আশ্ৰমপদং কুসুমৈঃ সমৱাকিৰন্ ॥ ১০ ॥

দৃষ্ট্ৱাদিতিস্তং নিজগৰ্ভসম্ভৱং
পৰং পুমাংসং মুদমাপ ৱিস্মিতা ।
গৃহীতদেহং নিজযোগমাযযা
প্ৰজাপতিশ্চাহ জযেতি ৱিস্মিতঃ ॥ ১১ ॥

যত্ তদ্ ৱপুৰ্ভাতি ৱিভূষণাযুধৈ-
ৰৱ্যক্তচিদ্ৱযক্তমধাৰযদ্ধৰিঃ ।
বভূৱ তেনৈৱ স ৱামনো ৱটুঃ
সম্পশ্যতোৰ্দিৱ্যগতিৰ্যথা নটঃ ॥ ১২ ॥

তং ৱটুং ৱামনং দৃষ্ট্ৱা মোদমানা মহৰ্ষযঃ ।
কৰ্মাণি কাৰযামাসুঃ পুৰস্কৃত্য প্ৰজাপতিম্ ॥ ১৩ ॥

তস্যোপনীযমানস্য সাৱিত্ৰীং সৱিতাব্ৰৱীত্ ।
বৃহস্পতিৰ্ব্ৰহ্মসূত্ৰং মেখলাং কশ্যপোঽদদাত্ ॥ ১৪ ॥

দদৌ কৃষ্ণাজিনং ভূমিৰ্দণ্ডং সোমো ৱনস্পতিঃ ।
কৌপীনাচ্ছাদনং মাতা দ্যৌশ্ছত্ৰং জগতঃ পতেঃ ॥ ১৫ ॥

কমণ্ডলুং ৱেদগৰ্ভঃ কুশান্সপ্তৰ্ষযো দদুঃ ।
অক্ষমালাং মহাৰাজ সৰস্ৱত্যৱ্যযাত্মনঃ ॥ ১৬ ॥

তস্মা ইত্যুপনীতায যক্ষৰাট্ পাত্ৰিকামদাত্ ।
ভিক্ষাং ভগৱতী সাক্ষাদুমাদাদম্বিকা সতী ॥ ১৭ ॥

স ব্ৰহ্মৱৰ্চসেনৈৱং সভাং সম্ভাৱিতো ৱটুঃ ।
ব্ৰহ্মৰ্ষিগণসঞ্জুষ্টামত্যৰোচত মাৰিষঃ ॥ ১৮ ॥

সমিদ্ধমাহিতং ৱহ্নিং কৃত্ৱা পৰিসমূহনম্ ।
পৰিস্তীৰ্য সমভ্যৰ্চ্য সমিদ্ভিৰজুহোদ্ দ্ৱিজঃ ॥ ১৯ ॥

শ্ৰুত্ৱাশ্ৱমেধৈৰ্যজমানমূৰ্জিতং
বলিং ভৃগূণামুপকল্পিতৈস্ততঃ ।
জগাম তত্ৰাখিলসাৰসম্ভৃতো
ভাৰেণ গাং সন্নমযন্পদে পদে ॥ ২০ ॥

তং নৰ্মদাযাস্তট উত্তৰে বলে-
ৰ্য ঋত্ৱিজস্তে ভৃগুকচ্ছসংজ্ঞকে ।
প্ৰৱৰ্তযন্তো ভৃগৱঃ ক্ৰতূত্তমং
ৱ্যচক্ষতাৰাদুদিতং যথা ৰৱিম্ ॥ ২১ ॥

তে ঋত্ৱিজো যজমানঃ সদস্যা
হতত্ৱিষো ৱামনতেজসা নৃপ ।
সূৰ্যঃ কিলাযাত্যুত ৱা ৱিভাৱসুঃ
সনত্কুমাৰোঽথ দিদৃক্ষযা ক্ৰতোঃ ॥ ২২ ॥

ইত্থং সশিষ্যেষু ভৃগুষ্ৱনেকধা
ৱিতৰ্ক্যমাণো ভগৱান্স ৱামনঃ ।
ছত্ৰং সদণ্ডং সজলং কমণ্ডলুং
ৱিৱেশ বিভ্ৰদ্ধযমেধৱাটম্ ॥ ২৩ ॥

মৌঞ্জ্যা মেখলযা ৱীতমুপৱীতাজিনোত্তৰম্ ।
জটিলং ৱামনং ৱিপ্ৰং মাযামাণৱকং হৰিম্ ॥ ২৪ ॥

প্ৰৱিষ্টং ৱীক্ষ্য ভৃগৱঃ সশিষ্যাস্তে সহাগ্নিভিঃ ।
প্ৰত্যগৃহ্ণন্সমুত্থায সঙ্ক্ষিপ্তাস্তস্য তেজসা ॥ ২৫ ॥

যজমানঃ প্ৰমুদিতো দৰ্শনীযং মনোৰমম্ ।
ৰূপানুৰূপাৱযৱং তস্মা আসনমাহৰত্ ॥ ২৬ ॥

স্ৱাগতেনাভিনন্দ্যাথ পাদৌ ভগৱতো বলিঃ ।
অৱনিজ্যাৰ্চযামাস মুক্তসঙ্গমনোৰমম্ ॥ ২৭ ॥

তত্পাদশৌচং জনকল্মষাপহং
স ধৰ্মৱিন্মূৰ্ধ্ন্যদধাত্ সুমঙ্গলম্ ।
যদ্ দেৱদেৱো গিৰিশশ্চন্দ্ৰমৌলি-
ৰ্দধাৰ মূৰ্ধ্না পৰযা চ ভক্ত্যা ॥ ২৮ ॥

শ্ৰীবলিৰুৱাচ
স্ৱাগতং তে নমস্তুভ্যং ব্ৰহ্মন্কিং কৰৱাম তে ।
ব্ৰহ্মৰ্ষীণাং তপঃ সাক্ষান্মন্যে ত্ৱাৰ্য ৱপুৰ্ধৰম্ ॥ ২৯ ॥

অদ্য নঃ পিতৰস্তৃপ্তা অদ্য নঃ পাৱিতং কুলম্ ।
অদ্য স্ৱিষ্টঃ ক্ৰতুৰযং যদ্ ভৱানাগতো গৃহান্ ॥ ৩০ ॥

অদ্যাগ্নযো মে সুহুতা যথাৱিধি
দ্ৱিজাত্মজ ত্ৱচ্চৰণাৱনেজনৈঃ ।
হতাংহসো ৱাৰ্ভিৰিযং চ ভূৰহো
তথা পুনীতা তনুভিঃ পদৈস্তৱ ॥ ৩১ ॥

যদ্ ৱটো ৱাঞ্ছসি তত্প্ৰতীচ্ছ মে
ত্ৱামৰ্থিনং ৱিপ্ৰসুতানুতৰ্কযে ।
গাং কাঞ্চনং গুণৱদ্ ধাম মৃষ্টং
তথান্নপেযমুত ৱা ৱিপ্ৰকন্যাম্ ।
গ্ৰামান্ সমৃদ্ধাংস্তুৰগান্ গজান্ ৱা
ৰথাংস্তথাৰ্হত্তম সম্প্ৰতীচ্ছ ॥ ৩২ ॥