ശ്രീമദ്ഭാഗവതമ് ൮.൧൮

ശ്രീശുക ഉവാച
ഇത്ഥം വിരിഞ്ചസ്തുതകര്മവീര്യഃ
പ്രാദുര്ബഭൂവാമൃതഭൂരദിത്യാമ് ।
ചതുര്ഭുജഃ ശങ്ഖഗദാബ്ജചക്രഃ
പിശങ്ഗവാസാ നലിനായതേക്ഷണഃ ॥ ൧ ॥

ശ്യാമാവദാതോ ഝഷരാജകുണ്ഡല-
ത്വിഷോല്ലസച്ഛ്രീവദനാമ്ബുജഃ പുമാന് ।
ശ്രീവത്സവക്ഷാ ബലയാങ്ഗദോല്ലസ-
ത്കിരീടകാഞ്ചീഗുണചാരുനൂപുരഃ ॥ ൨ ॥

മധുവ്രതവ്രാതവിഘുഷ്ടയാ സ്വയാ
വിരാജിതഃ ശ്രീവനമാലയാ ഹരിഃ ।
പ്രജാപതേര്വേശ്മതമഃ സ്വരോചിഷാ
വിനാശയന് കണ്ഠനിവിഷ്ടകൌസ്തുഭഃ ॥ ൩ ॥

ദിശഃ പ്രസേദുഃ സലിലാശയാസ്തദാ
പ്രജാഃ പ്രഹൃഷ്ടാ ഋതവോ ഗുണാന്വിതാഃ ।
ദ്യൌരന്തരീക്ഷം ക്ഷിതിരഗ്നിജിഹ്വാ
ഗാവോ ദ്വിജാഃ സഞ്ജഹൃഷുര്നഗാശ്ച ॥ ൪ ॥

ശ്രോണായാം ശ്രവണദ്വാദശ്യാം മുഹൂര്തേഽഭിജിതി പ്രഭുഃ ।
സര്വേ നക്ഷത്രതാരാദ്യാശ്ചക്രുസ്തജ്ജന്മ ദക്ഷിണമ് ॥ ൫ ॥

ദ്വാദശ്യാം സവിതാതിഷ്ഠന്മധ്യന്ദിനഗതോ നൃപ ।
വിജയാനാമ സാ പ്രോക്താ യസ്യാം ജന്മ വിദുര്ഹരേഃ ॥ ൬ ॥

ശങ്ഖദുന്ദുഭയോ നേദുര്മൃദങ്ഗപണവാനകാഃ ।
ചിത്രവാദിത്രതൂര്യാണാം നിര്ഘോഷസ്തുമുലോഽഭവത് ॥ ൭ ॥

പ്രീതാശ്ചാപ്സരസോഽനൃത്യന്ഗന്ധര്വപ്രവരാ ജഗുഃ ।
തുഷ്ടുവുര്മുനയോ ദേവാ മനവഃ പിതരോഽഗ്നയഃ ॥ ൮ ॥

സിദ്ധവിദ്യാധരഗണാഃ സകിമ്പുരുഷകിന്നരാഃ ।
ചാരണാ യക്ഷരക്ഷാംസി സുപര്ണാ ഭുജഗോത്തമാഃ ॥ ൯ ॥

ഗായന്തോഽതിപ്രശംസന്തോ നൃത്യന്തോ വിബുധാനുഗാഃ ।
അദിത്യാ ആശ്രമപദം കുസുമൈഃ സമവാകിരന് ॥ ൧൦ ॥

ദൃഷ്ട്വാദിതിസ്തം നിജഗര്ഭസമ്ഭവം
പരം പുമാംസം മുദമാപ വിസ്മിതാ ।
ഗൃഹീതദേഹം നിജയോഗമായയാ
പ്രജാപതിശ്ചാഹ ജയേതി വിസ്മിതഃ ॥ ൧൧ ॥

യത് തദ് വപുര്ഭാതി വിഭൂഷണായുധൈ-
രവ്യക്തചിദ്വയക്തമധാരയദ്ധരിഃ ।
ബഭൂവ തേനൈവ സ വാമനോ വടുഃ
സമ്പശ്യതോര്ദിവ്യഗതിര്യഥാ നടഃ ॥ ൧൨ ॥

തം വടും വാമനം ദൃഷ്ട്വാ മോദമാനാ മഹര്ഷയഃ ।
കര്മാണി കാരയാമാസുഃ പുരസ്കൃത്യ പ്രജാപതിമ് ॥ ൧൩ ॥

തസ്യോപനീയമാനസ്യ സാവിത്രീം സവിതാബ്രവീത് ।
ബൃഹസ്പതിര്ബ്രഹ്മസൂത്രം മേഖലാം കശ്യപോഽദദാത് ॥ ൧൪ ॥

ദദൌ കൃഷ്ണാജിനം ഭൂമിര്ദണ്ഡം സോമോ വനസ്പതിഃ ।
കൌപീനാച്ഛാദനം മാതാ ദ്യൌശ്ഛത്രം ജഗതഃ പതേഃ ॥ ൧൫ ॥

കമണ്ഡലും വേദഗര്ഭഃ കുശാന്സപ്തര്ഷയോ ദദുഃ ।
അക്ഷമാലാം മഹാരാജ സരസ്വത്യവ്യയാത്മനഃ ॥ ൧൬ ॥

തസ്മാ ഇത്യുപനീതായ യക്ഷരാട് പാത്രികാമദാത് ।
ഭിക്ഷാം ഭഗവതീ സാക്ഷാദുമാദാദമ്ബികാ സതീ ॥ ൧൭ ॥

സ ബ്രഹ്മവര്ചസേനൈവം സഭാം സമ്ഭാവിതോ വടുഃ ।
ബ്രഹ്മര്ഷിഗണസഞ്ജുഷ്ടാമത്യരോചത മാരിഷഃ ॥ ൧൮ ॥

സമിദ്ധമാഹിതം വഹ്നിം കൃത്വാ പരിസമൂഹനമ് ।
പരിസ്തീര്യ സമഭ്യര്ച്യ സമിദ്ഭിരജുഹോദ് ദ്വിജഃ ॥ ൧൯ ॥

ശ്രുത്വാശ്വമേധൈര്യജമാനമൂര്ജിതം
ബലിം ഭൃഗൂണാമുപകല്പിതൈസ്തതഃ ।
ജഗാമ തത്രാഖിലസാരസമ്ഭൃതോ
ഭാരേണ ഗാം സന്നമയന്പദേ പദേ ॥ ൨൦ ॥

തം നര്മദായാസ്തട ഉത്തരേ ബലേ-
ര്യ ഋത്വിജസ്തേ ഭൃഗുകച്ഛസംജ്ഞകേ ।
പ്രവര്തയന്തോ ഭൃഗവഃ ക്രതൂത്തമം
വ്യചക്ഷതാരാദുദിതം യഥാ രവിമ് ॥ ൨൧ ॥

തേ ഋത്വിജോ യജമാനഃ സദസ്യാ
ഹതത്വിഷോ വാമനതേജസാ നൃപ ।
സൂര്യഃ കിലായാത്യുത വാ വിഭാവസുഃ
സനത്കുമാരോഽഥ ദിദൃക്ഷയാ ക്രതോഃ ॥ ൨൨ ॥

ഇത്ഥം സശിഷ്യേഷു ഭൃഗുഷ്വനേകധാ
വിതര്ക്യമാണോ ഭഗവാന്സ വാമനഃ ।
ഛത്രം സദണ്ഡം സജലം കമണ്ഡലും
വിവേശ ബിഭ്രദ്ധയമേധവാടമ് ॥ ൨൩ ॥

മൌഞ്ജ്യാ മേഖലയാ വീതമുപവീതാജിനോത്തരമ് ।
ജടിലം വാമനം വിപ്രം മായാമാണവകം ഹരിമ് ॥ ൨൪ ॥

പ്രവിഷ്ടം വീക്ഷ്യ ഭൃഗവഃ സശിഷ്യാസ്തേ സഹാഗ്നിഭിഃ ।
പ്രത്യഗൃഹ്ണന്സമുത്ഥായ സങ്ക്ഷിപ്താസ്തസ്യ തേജസാ ॥ ൨൫ ॥

യജമാനഃ പ്രമുദിതോ ദര്ശനീയം മനോരമമ് ।
രൂപാനുരൂപാവയവം തസ്മാ ആസനമാഹരത് ॥ ൨൬ ॥

സ്വാഗതേനാഭിനന്ദ്യാഥ പാദൌ ഭഗവതോ ബലിഃ ।
അവനിജ്യാര്ചയാമാസ മുക്തസങ്ഗമനോരമമ് ॥ ൨൭ ॥

തത്പാദശൌചം ജനകല്മഷാപഹം
സ ധര്മവിന്മൂര്ധ്ന്യദധാത് സുമങ്ഗലമ് ।
യദ് ദേവദേവോ ഗിരിശശ്ചന്ദ്രമൌലി-
ര്ദധാര മൂര്ധ്നാ പരയാ ച ഭക്ത്യാ ॥ ൨൮ ॥

ശ്രീബലിരുവാച
സ്വാഗതം തേ നമസ്തുഭ്യം ബ്രഹ്മന്കിം കരവാമ തേ ।
ബ്രഹ്മര്ഷീണാം തപഃ സാക്ഷാന്മന്യേ ത്വാര്യ വപുര്ധരമ് ॥ ൨൯ ॥

അദ്യ നഃ പിതരസ്തൃപ്താ അദ്യ നഃ പാവിതം കുലമ് ।
അദ്യ സ്വിഷ്ടഃ ക്രതുരയം യദ് ഭവാനാഗതോ ഗൃഹാന് ॥ ൩൦ ॥

അദ്യാഗ്നയോ മേ സുഹുതാ യഥാവിധി
ദ്വിജാത്മജ ത്വച്ചരണാവനേജനൈഃ ।
ഹതാംഹസോ വാര്ഭിരിയം ച ഭൂരഹോ
തഥാ പുനീതാ തനുഭിഃ പദൈസ്തവ ॥ ൩൧ ॥

യദ് വടോ വാഞ്ഛസി തത്പ്രതീച്ഛ മേ
ത്വാമര്ഥിനം വിപ്രസുതാനുതര്കയേ ।
ഗാം കാഞ്ചനം ഗുണവദ് ധാമ മൃഷ്ടം
തഥാന്നപേയമുത വാ വിപ്രകന്യാമ് ।
ഗ്രാമാന് സമൃദ്ധാംസ്തുരഗാന് ഗജാന് വാ
രഥാംസ്തഥാര്ഹത്തമ സമ്പ്രതീച്ഛ ॥ ൩൨ ॥