శ్రీమద్భాగవతమ్ ౮.౧౮

శ్రీశుక ఉవాచ
ఇత్థం విరిఞ్చస్తుతకర్మవీర్యః
ప్రాదుర్బభూవామృతభూరదిత్యామ్ ।
చతుర్భుజః శఙ్ఖగదాబ్జచక్రః
పిశఙ్గవాసా నలినాయతేక్షణః ॥ ౧ ॥

శ్యామావదాతో ఝషరాజకుణ్డల-
త్విషోల్లసచ్ఛ్రీవదనామ్బుజః పుమాన్ ।
శ్రీవత్సవక్షా బలయాఙ్గదోల్లస-
త్కిరీటకాఞ్చీగుణచారునూపురః ॥ ౨ ॥

మధువ్రతవ్రాతవిఘుష్టయా స్వయా
విరాజితః శ్రీవనమాలయా హరిః ।
ప్రజాపతేర్వేశ్మతమః స్వరోచిషా
వినాశయన్ కణ్ఠనివిష్టకౌస్తుభః ॥ ౩ ॥

దిశః ప్రసేదుః సలిలాశయాస్తదా
ప్రజాః ప్రహృష్టా ఋతవో గుణాన్వితాః ।
ద్యౌరన్తరీక్షం క్షితిరగ్నిజిహ్వా
గావో ద్విజాః సఞ్జహృషుర్నగాశ్చ ॥ ౪ ॥

శ్రోణాయాం శ్రవణద్వాదశ్యాం ముహూర్తేఽభిజితి ప్రభుః ।
సర్వే నక్షత్రతారాద్యాశ్చక్రుస్తజ్జన్మ దక్షిణమ్ ॥ ౫ ॥

ద్వాదశ్యాం సవితాతిష్ఠన్మధ్యన్దినగతో నృప ।
విజయానామ సా ప్రోక్తా యస్యాం జన్మ విదుర్హరేః ॥ ౬ ॥

శఙ్ఖదున్దుభయో నేదుర్మృదఙ్గపణవానకాః ।
చిత్రవాదిత్రతూర్యాణాం నిర్ఘోషస్తుములోఽభవత్ ॥ ౭ ॥

ప్రీతాశ్చాప్సరసోఽనృత్యన్గన్ధర్వప్రవరా జగుః ।
తుష్టువుర్మునయో దేవా మనవః పితరోఽగ్నయః ॥ ౮ ॥

సిద్ధవిద్యాధరగణాః సకిమ్పురుషకిన్నరాః ।
చారణా యక్షరక్షాంసి సుపర్ణా భుజగోత్తమాః ॥ ౯ ॥

గాయన్తోఽతిప్రశంసన్తో నృత్యన్తో విబుధానుగాః ।
అదిత్యా ఆశ్రమపదం కుసుమైః సమవాకిరన్ ॥ ౧౦ ॥

దృష్ట్వాదితిస్తం నిజగర్భసమ్భవం
పరం పుమాంసం ముదమాప విస్మితా ।
గృహీతదేహం నిజయోగమాయయా
ప్రజాపతిశ్చాహ జయేతి విస్మితః ॥ ౧౧ ॥

యత్ తద్ వపుర్భాతి విభూషణాయుధై-
రవ్యక్తచిద్వయక్తమధారయద్ధరిః ।
బభూవ తేనైవ స వామనో వటుః
సమ్పశ్యతోర్దివ్యగతిర్యథా నటః ॥ ౧౨ ॥

తం వటుం వామనం దృష్ట్వా మోదమానా మహర్షయః ।
కర్మాణి కారయామాసుః పురస్కృత్య ప్రజాపతిమ్ ॥ ౧౩ ॥

తస్యోపనీయమానస్య సావిత్రీం సవితాబ్రవీత్ ।
బృహస్పతిర్బ్రహ్మసూత్రం మేఖలాం కశ్యపోఽదదాత్ ॥ ౧౪ ॥

దదౌ కృష్ణాజినం భూమిర్దణ్డం సోమో వనస్పతిః ।
కౌపీనాచ్ఛాదనం మాతా ద్యౌశ్ఛత్రం జగతః పతేః ॥ ౧౫ ॥

కమణ్డలుం వేదగర్భః కుశాన్సప్తర్షయో దదుః ।
అక్షమాలాం మహారాజ సరస్వత్యవ్యయాత్మనః ॥ ౧౬ ॥

తస్మా ఇత్యుపనీతాయ యక్షరాట్ పాత్రికామదాత్ ।
భిక్షాం భగవతీ సాక్షాదుమాదాదమ్బికా సతీ ॥ ౧౭ ॥

స బ్రహ్మవర్చసేనైవం సభాం సమ్భావితో వటుః ।
బ్రహ్మర్షిగణసఞ్జుష్టామత్యరోచత మారిషః ॥ ౧౮ ॥

సమిద్ధమాహితం వహ్నిం కృత్వా పరిసమూహనమ్ ।
పరిస్తీర్య సమభ్యర్చ్య సమిద్భిరజుహోద్ ద్విజః ॥ ౧౯ ॥

శ్రుత్వాశ్వమేధైర్యజమానమూర్జితం
బలిం భృగూణాముపకల్పితైస్తతః ।
జగామ తత్రాఖిలసారసమ్భృతో
భారేణ గాం సన్నమయన్పదే పదే ॥ ౨౦ ॥

తం నర్మదాయాస్తట ఉత్తరే బలే-
ర్య ఋత్విజస్తే భృగుకచ్ఛసంజ్ఞకే ।
ప్రవర్తయన్తో భృగవః క్రతూత్తమం
వ్యచక్షతారాదుదితం యథా రవిమ్ ॥ ౨౧ ॥

తే ఋత్విజో యజమానః సదస్యా
హతత్విషో వామనతేజసా నృప ।
సూర్యః కిలాయాత్యుత వా విభావసుః
సనత్కుమారోఽథ దిదృక్షయా క్రతోః ॥ ౨౨ ॥

ఇత్థం సశిష్యేషు భృగుష్వనేకధా
వితర్క్యమాణో భగవాన్స వామనః ।
ఛత్రం సదణ్డం సజలం కమణ్డలుం
వివేశ బిభ్రద్ధయమేధవాటమ్ ॥ ౨౩ ॥

మౌఞ్జ్యా మేఖలయా వీతముపవీతాజినోత్తరమ్ ।
జటిలం వామనం విప్రం మాయామాణవకం హరిమ్ ॥ ౨౪ ॥

ప్రవిష్టం వీక్ష్య భృగవః సశిష్యాస్తే సహాగ్నిభిః ।
ప్రత్యగృహ్ణన్సముత్థాయ సఙ్క్షిప్తాస్తస్య తేజసా ॥ ౨౫ ॥

యజమానః ప్రముదితో దర్శనీయం మనోరమమ్ ।
రూపానురూపావయవం తస్మా ఆసనమాహరత్ ॥ ౨౬ ॥

స్వాగతేనాభినన్ద్యాథ పాదౌ భగవతో బలిః ।
అవనిజ్యార్చయామాస ముక్తసఙ్గమనోరమమ్ ॥ ౨౭ ॥

తత్పాదశౌచం జనకల్మషాపహం
స ధర్మవిన్మూర్ధ్న్యదధాత్ సుమఙ్గలమ్ ।
యద్ దేవదేవో గిరిశశ్చన్ద్రమౌలి-
ర్దధార మూర్ధ్నా పరయా చ భక్త్యా ॥ ౨౮ ॥

శ్రీబలిరువాచ
స్వాగతం తే నమస్తుభ్యం బ్రహ్మన్కిం కరవామ తే ।
బ్రహ్మర్షీణాం తపః సాక్షాన్మన్యే త్వార్య వపుర్ధరమ్ ॥ ౨౯ ॥

అద్య నః పితరస్తృప్తా అద్య నః పావితం కులమ్ ।
అద్య స్విష్టః క్రతురయం యద్ భవానాగతో గృహాన్ ॥ ౩౦ ॥

అద్యాగ్నయో మే సుహుతా యథావిధి
ద్విజాత్మజ త్వచ్చరణావనేజనైః ।
హతాంహసో వార్భిరియం చ భూరహో
తథా పునీతా తనుభిః పదైస్తవ ॥ ౩౧ ॥

యద్ వటో వాఞ్ఛసి తత్ప్రతీచ్ఛ మే
త్వామర్థినం విప్రసుతానుతర్కయే ।
గాం కాఞ్చనం గుణవద్ ధామ మృష్టం
తథాన్నపేయముత వా విప్రకన్యామ్ ।
గ్రామాన్ సమృద్ధాంస్తురగాన్ గజాన్ వా
రథాంస్తథార్హత్తమ సమ్ప్రతీచ్ఛ ॥ ౩౨ ॥