শ্রীমদ্ভাগবতম্ ৮.১৮

শ্রীশুক উবাচ
ইত্থং বিরিঞ্চস্তুতকর্মবীর্যঃ
প্রাদুর্বভূবামৃতভূরদিত্যাম্ ।
চতুর্ভুজঃ শঙ্খগদাব্জচক্রঃ
পিশঙ্গবাসা নলিনাযতেক্ষণঃ ॥ ১ ॥

শ্যামাবদাতো ঝষরাজকুণ্ডল-
ত্বিষোল্লসচ্ছ্রীবদনাম্বুজঃ পুমান্ ।
শ্রীবত্সবক্ষা বলযাঙ্গদোল্লস-
ত্কিরীটকাঞ্চীগুণচারুনূপুরঃ ॥ ২ ॥

মধুব্রতব্রাতবিঘুষ্টযা স্বযা
বিরাজিতঃ শ্রীবনমালযা হরিঃ ।
প্রজাপতের্বেশ্মতমঃ স্বরোচিষা
বিনাশযন্ কণ্ঠনিবিষ্টকৌস্তুভঃ ॥ ৩ ॥

দিশঃ প্রসেদুঃ সলিলাশযাস্তদা
প্রজাঃ প্রহৃষ্টা ঋতবো গুণান্বিতাঃ ।
দ্যৌরন্তরীক্ষং ক্ষিতিরগ্নিজিহ্বা
গাবো দ্বিজাঃ সঞ্জহৃষুর্নগাশ্চ ॥ ৪ ॥

শ্রোণাযাং শ্রবণদ্বাদশ্যাং মুহূর্তেঽভিজিতি প্রভুঃ ।
সর্বে নক্ষত্রতারাদ্যাশ্চক্রুস্তজ্জন্ম দক্ষিণম্ ॥ ৫ ॥

দ্বাদশ্যাং সবিতাতিষ্ঠন্মধ্যন্দিনগতো নৃপ ।
বিজযানাম সা প্রোক্তা যস্যাং জন্ম বিদুর্হরেঃ ॥ ৬ ॥

শঙ্খদুন্দুভযো নেদুর্মৃদঙ্গপণবানকাঃ ।
চিত্রবাদিত্রতূর্যাণাং নির্ঘোষস্তুমুলোঽভবত্ ॥ ৭ ॥

প্রীতাশ্চাপ্সরসোঽনৃত্যন্গন্ধর্বপ্রবরা জগুঃ ।
তুষ্টুবুর্মুনযো দেবা মনবঃ পিতরোঽগ্নযঃ ॥ ৮ ॥

সিদ্ধবিদ্যাধরগণাঃ সকিম্পুরুষকিন্নরাঃ ।
চারণা যক্ষরক্ষাংসি সুপর্ণা ভুজগোত্তমাঃ ॥ ৯ ॥

গাযন্তোঽতিপ্রশংসন্তো নৃত্যন্তো বিবুধানুগাঃ ।
অদিত্যা আশ্রমপদং কুসুমৈঃ সমবাকিরন্ ॥ ১০ ॥

দৃষ্ট্বাদিতিস্তং নিজগর্ভসম্ভবং
পরং পুমাংসং মুদমাপ বিস্মিতা ।
গৃহীতদেহং নিজযোগমাযযা
প্রজাপতিশ্চাহ জযেতি বিস্মিতঃ ॥ ১১ ॥

যত্ তদ্ বপুর্ভাতি বিভূষণাযুধৈ-
রব্যক্তচিদ্বযক্তমধারযদ্ধরিঃ ।
বভূব তেনৈব স বামনো বটুঃ
সম্পশ্যতোর্দিব্যগতির্যথা নটঃ ॥ ১২ ॥

তং বটুং বামনং দৃষ্ট্বা মোদমানা মহর্ষযঃ ।
কর্মাণি কারযামাসুঃ পুরস্কৃত্য প্রজাপতিম্ ॥ ১৩ ॥

তস্যোপনীযমানস্য সাবিত্রীং সবিতাব্রবীত্ ।
বৃহস্পতির্ব্রহ্মসূত্রং মেখলাং কশ্যপোঽদদাত্ ॥ ১৪ ॥

দদৌ কৃষ্ণাজিনং ভূমির্দণ্ডং সোমো বনস্পতিঃ ।
কৌপীনাচ্ছাদনং মাতা দ্যৌশ্ছত্রং জগতঃ পতেঃ ॥ ১৫ ॥

কমণ্ডলুং বেদগর্ভঃ কুশান্সপ্তর্ষযো দদুঃ ।
অক্ষমালাং মহারাজ সরস্বত্যব্যযাত্মনঃ ॥ ১৬ ॥

তস্মা ইত্যুপনীতায যক্ষরাট্ পাত্রিকামদাত্ ।
ভিক্ষাং ভগবতী সাক্ষাদুমাদাদম্বিকা সতী ॥ ১৭ ॥

স ব্রহ্মবর্চসেনৈবং সভাং সম্ভাবিতো বটুঃ ।
ব্রহ্মর্ষিগণসঞ্জুষ্টামত্যরোচত মারিষঃ ॥ ১৮ ॥

সমিদ্ধমাহিতং বহ্নিং কৃত্বা পরিসমূহনম্ ।
পরিস্তীর্য সমভ্যর্চ্য সমিদ্ভিরজুহোদ্ দ্বিজঃ ॥ ১৯ ॥

শ্রুত্বাশ্বমেধৈর্যজমানমূর্জিতং
বলিং ভৃগূণামুপকল্পিতৈস্ততঃ ।
জগাম তত্রাখিলসারসম্ভৃতো
ভারেণ গাং সন্নমযন্পদে পদে ॥ ২০ ॥

তং নর্মদাযাস্তট উত্তরে বলে-
র্য ঋত্বিজস্তে ভৃগুকচ্ছসংজ্ঞকে ।
প্রবর্তযন্তো ভৃগবঃ ক্রতূত্তমং
ব্যচক্ষতারাদুদিতং যথা রবিম্ ॥ ২১ ॥

তে ঋত্বিজো যজমানঃ সদস্যা
হতত্বিষো বামনতেজসা নৃপ ।
সূর্যঃ কিলাযাত্যুত বা বিভাবসুঃ
সনত্কুমারোঽথ দিদৃক্ষযা ক্রতোঃ ॥ ২২ ॥

ইত্থং সশিষ্যেষু ভৃগুষ্বনেকধা
বিতর্ক্যমাণো ভগবান্স বামনঃ ।
ছত্রং সদণ্ডং সজলং কমণ্ডলুং
বিবেশ বিভ্রদ্ধযমেধবাটম্ ॥ ২৩ ॥

মৌঞ্জ্যা মেখলযা বীতমুপবীতাজিনোত্তরম্ ।
জটিলং বামনং বিপ্রং মাযামাণবকং হরিম্ ॥ ২৪ ॥

প্রবিষ্টং বীক্ষ্য ভৃগবঃ সশিষ্যাস্তে সহাগ্নিভিঃ ।
প্রত্যগৃহ্ণন্সমুত্থায সঙ্ক্ষিপ্তাস্তস্য তেজসা ॥ ২৫ ॥

যজমানঃ প্রমুদিতো দর্শনীযং মনোরমম্ ।
রূপানুরূপাবযবং তস্মা আসনমাহরত্ ॥ ২৬ ॥

স্বাগতেনাভিনন্দ্যাথ পাদৌ ভগবতো বলিঃ ।
অবনিজ্যার্চযামাস মুক্তসঙ্গমনোরমম্ ॥ ২৭ ॥

তত্পাদশৌচং জনকল্মষাপহং
স ধর্মবিন্মূর্ধ্ন্যদধাত্ সুমঙ্গলম্ ।
যদ্ দেবদেবো গিরিশশ্চন্দ্রমৌলি-
র্দধার মূর্ধ্না পরযা চ ভক্ত্যা ॥ ২৮ ॥

শ্রীবলিরুবাচ
স্বাগতং তে নমস্তুভ্যং ব্রহ্মন্কিং করবাম তে ।
ব্রহ্মর্ষীণাং তপঃ সাক্ষান্মন্যে ত্বার্য বপুর্ধরম্ ॥ ২৯ ॥

অদ্য নঃ পিতরস্তৃপ্তা অদ্য নঃ পাবিতং কুলম্ ।
অদ্য স্বিষ্টঃ ক্রতুরযং যদ্ ভবানাগতো গৃহান্ ॥ ৩০ ॥

অদ্যাগ্নযো মে সুহুতা যথাবিধি
দ্বিজাত্মজ ত্বচ্চরণাবনেজনৈঃ ।
হতাংহসো বার্ভিরিযং চ ভূরহো
তথা পুনীতা তনুভিঃ পদৈস্তব ॥ ৩১ ॥

যদ্ বটো বাঞ্ছসি তত্প্রতীচ্ছ মে
ত্বামর্থিনং বিপ্রসুতানুতর্কযে ।
গাং কাঞ্চনং গুণবদ্ ধাম মৃষ্টং
তথান্নপেযমুত বা বিপ্রকন্যাম্ ।
গ্রামান্ সমৃদ্ধাংস্তুরগান্ গজান্ বা
রথাংস্তথার্হত্তম সম্প্রতীচ্ছ ॥ ৩২ ॥