শ্ৰীমদ্ভাগৱতম্ ৮.২১

শ্ৰীশুক উৱাচ
সত্যং সমীক্ষ্যাব্জভৱো নখেন্দুভি-
ৰ্হতস্ৱধামদ্যুতিৰাৱৃতোঽভ্যগাত্ ।
মৰীচিমিশ্ৰা ঋষযো বৃহদ্ৱ্ৰতাঃ
সনন্দনাদ্যা নৰদেৱ যোগিনঃ ॥ ১ ॥

ৱেদোপৱেদা নিযমা যমান্ৱিতা-
স্তৰ্কেতিহাসাঙ্গপুৰাণসংহিতাঃ ।
যে চাপৰে যোগসমীৰদীপিত-
জ্ঞানাগ্নিনা ৰন্ধিতকৰ্মকল্মষাঃ ॥ ২ ॥

ৱৱন্দিৰে যত্স্মৰণানুভাৱতঃ
স্ৱাযম্ভুৱং ধাম গতা অকৰ্মকম্ ।
অথাঙ্ঘ্ৰযে প্ৰোন্নমিতায ৱিষ্ণো-
ৰুপাহৰত্ পদ্মভৱোঽৰ্হণোদকম্ ।
সমৰ্চ্য ভক্ত্যাভ্যগৃণাচ্ছুচিশ্ৰৱা
যন্নাভিপঙ্কেৰুহসম্ভৱঃ স্ৱযম্ ॥ ৩ ॥

ধাতুঃ কমণ্ডলুজলং তদুৰুক্ৰমস্য
পাদাৱনেজনপৱিত্ৰতযা নৰেন্দ্ৰ ।
স্ৱৰ্ধুন্যভূন্নভসি সা পততী নিমাৰ্ষ্টি
লোকত্ৰযং ভগৱতো ৱিশদেৱ কীৰ্তিঃ ॥ ৪ ॥

ব্ৰহ্মাদযো লোকনাথাঃ স্ৱনাথায সমাদৃতাঃ ।
সানুগা বলিমাজহ্ৰুঃ সঙ্ক্ষিপ্তাত্মৱিভূতযে ॥ ৫ ॥

তোযৈঃ সমৰ্হণৈঃ স্ৰগ্ভিৰ্দিৱ্যগন্ধানুলেপনৈঃ ।
ধূপৈৰ্দীপৈঃ সুৰভিভিৰ্লাজাক্ষতফলাঙ্কুৰৈঃ ॥ ৬ ॥

স্তৱনৈৰ্জযশব্দৈশ্চ তদ্ৱীৰ্যমহিমাঙ্কিতৈঃ ।
নৃত্যৱাদিত্ৰগীতৈশ্চ শঙ্খদুন্দুভিনিঃস্ৱনৈঃ ॥ ৭ ॥

জাম্বৱানৃক্ষৰাজস্তু ভেৰীশব্দৈৰ্মনোজৱঃ ।
ৱিজযং দিক্ষু সৰ্ৱাসু মহোত্সৱমঘোষযত্ ॥ ৮ ॥

মহীং সৰ্ৱাং হৃতাং দৃষ্ট্ৱা ত্ৰিপদৱ্যাজযাচ্ঞযা ।
ঊচুঃ স্ৱভৰ্তুৰসুৰা দীক্ষিতস্যাত্যমৰ্ষিতাঃ ॥ ৯ ॥

ন ৱাযং ব্ৰহ্মবন্ধুৰ্ৱিষ্ণুৰ্মাযাৱিনাং ৱৰঃ ।
দ্ৱিজৰূপপ্ৰতিচ্ছন্নো দেৱকাৰ্যং চিকীৰ্ষতি ॥ ১০ ॥

অনেন যাচমানেন শত্ৰুণা ৱটুৰূপিণা ।
সৰ্ৱস্ৱং নো হৃতং ভৰ্তুৰ্ন্যস্তদণ্ডস্য বৰ্হিষি ॥ ১১ ॥

সত্যৱ্ৰতস্য সততং দীক্ষিতস্য ৱিশেষতঃ ।
নানৃতং ভাষিতুং শক্যং ব্ৰহ্মণ্যস্য দযাৱতঃ ॥ ১২ ॥

তস্মাদস্য ৱধো ধৰ্মো ভৰ্তুঃ শুশ্ৰূষণং চ নঃ ।
ইত্যাযুধানি জগৃহুৰ্বলেৰনুচৰাসুৰাঃ ॥ ১৩ ॥

তে সৰ্ৱে ৱামনং হন্তুং শূলপট্টিশপাণযঃ ।
অনিচ্ছন্তো বলে ৰাজন্ প্ৰাদ্ৰৱঞ্জাতমন্যৱঃ ॥ ১৪ ॥

তানভিদ্ৰৱতো দৃষ্ট্ৱা দিতিজানীকপান্ নৃপ ।
প্ৰহস্যানুচৰা ৱিষ্ণোঃ প্ৰত্যষেধন্নুদাযুধাঃ ॥ ১৫ ॥

নন্দঃ সুনন্দোঽথ জযো ৱিজযঃ প্ৰবলো বলঃ ।
কুমুদঃ কুমুদাক্ষশ্চ ৱিষ্ৱক্সেনঃ পতত্ত্ৰিৰাট্ ॥ ১৬ ॥

জযন্তঃ শ্ৰুতদেৱশ্চ পুষ্পদন্তোঽথ সাত্ৱতঃ ।
সৰ্ৱে নাগাযুতপ্ৰাণাশ্চমূং তে জঘ্নুৰাসুৰীম্ ॥ ১৭ ॥

হন্যমানান্ স্ৱকান্ দৃষ্ট্ৱা পুৰুষানুচৰৈৰ্বলিঃ ।
ৱাৰযামাস সংৰব্ধান্ কাৱ্যশাপমনুস্মৰন্ ॥ ১৮ ॥

হে ৱিপ্ৰচিত্তে হে ৰাহো হে নেমে শ্ৰূযতাং ৱচঃ ।
মা যুধ্যত নিৱৰ্তধ্ৱং ন নঃ কালোঽযমৰ্থকৃত্ ॥ ১৯ ॥

যঃ প্ৰভুঃ সৰ্ৱভূতানাং সুখদুঃখোপপত্তযে ।
তং নাতিৱৰ্তিতুং দৈত্যাঃ পৌৰুষৈৰীশ্ৱৰঃ পুমান্ ॥ ২০ ॥

যো নো ভৱায প্ৰাগাসীদভৱায দিৱৌকসাম্ ।
স এৱ ভগৱানদ্য ৱৰ্ততে তদ্ৱিপৰ্যযম্ ॥ ২১ ॥

বলেন সচিৱৈৰ্বুদ্ধ্যা দুৰ্গৈৰ্মন্ত্ৰৌষধাদিভিঃ ।
সামাদিভিৰুপাযৈশ্চ কালং নাত্যেতি ৱৈ জনঃ ॥ ২২ ॥

ভৱদ্ভিৰ্নিৰ্জিতা হ্যেতে বহুশোঽনুচৰা হৰেঃ ।
দৈৱেনৰ্দ্ধৈস্ত এৱাদ্য যুধি জিত্ৱা নদন্তি নঃ ॥ ২৩ ॥

এতান্ ৱযং ৱিজেষ্যামো যদি দৈৱং প্ৰসীদতি ।
তস্মাত্ কালং প্ৰতীক্ষধ্ৱং যো নোঽৰ্থত্ৱায কল্পতে ॥ ২৪ ॥

শ্ৰীশুক উৱাচ
পত্যুৰ্নিগদিতং শ্ৰুত্ৱা দৈত্যদানৱযূথপাঃ ।
ৰসাং নিৰ্ৱিৱিশূ ৰাজন্ ৱিষ্ণুপাৰ্ষদতাডিতাঃ ॥ ২৫ ॥

অথ তাৰ্ক্ষ্যসুতো জ্ঞাত্ৱা ৱিৰাট্প্ৰভুচিকীৰ্ষিতম্ ।
ববন্ধ ৱাৰুণৈঃ পাশৈৰ্বলিং সূত্যেঽহনি ক্ৰতৌ ॥ ২৬ ॥

হাহাকাৰো মহানাসীদ্ ৰোদস্যোঃ সৰ্ৱতোদিশম্ ।
নিগৃহ্যমাণেঽসুৰপতৌ ৱিষ্ণুনা প্ৰভৱিষ্ণুনা ॥ ২৭ ॥

তং বদ্ধং ৱাৰুণৈঃ পাশৈৰ্ভগৱানাহ ৱামনঃ ।
নষ্টশ্ৰিযং স্থিৰপ্ৰজ্ঞমুদাৰযশসং নৃপ ॥ ২৮ ॥

পদানি ত্ৰীণি দত্তানি ভূমেৰ্মহ্যং ত্ৱযাসুৰ ।
দ্ৱাভ্যাং ক্ৰান্তা মহী সৰ্ৱা তৃতীযমুপকল্পয ॥ ২৯ ॥

যাৱত্ তপত্যসৌ গোভিৰ্যাৱদিন্দুঃ সহোডুভিঃ ।
যাৱদ্ ৱৰ্ষতি পৰ্জন্যস্তাৱতী ভূৰিযং তৱ ॥ ৩০ ॥

পদৈকেন মযাক্ৰান্তো ভূৰ্লোকঃ খং দিশস্তনোঃ ।
স্ৱৰ্লোকস্তে দ্ৱিতীযেন পশ্যতস্তে স্ৱমাত্মনা ॥ ৩১ ॥

প্ৰতিশ্ৰুতমদাতুস্তে নিৰযে ৱাস ইষ্যতে ।
ৱিশ ত্ৱং নিৰযং তস্মাদ্ গুৰুণা চানুমোদিতঃ ॥ ৩২ ॥

ৱৃথা মনোৰথস্তস্য দূৰঃ স্ৱৰ্গঃ পতত্যধঃ ।
প্ৰতিশ্ৰুতস্যাদানেন যোঽৰ্থিনং ৱিপ্ৰলম্ভতে ॥ ৩৩ ॥

ৱিপ্ৰলব্ধো দদামীতি ত্ৱযাহং চাঢ্যমানিনা ।
তদ্ ৱ্যলীকফলং ভুঙ্ক্ষ্ৱ নিৰযং কতিচিত্ সমাঃ ॥ ৩৪ ॥