শ্রীমদ্ভাগবতম্ ৮.২১

শ্রীশুক উবাচ
সত্যং সমীক্ষ্যাব্জভবো নখেন্দুভি-
র্হতস্বধামদ্যুতিরাবৃতোঽভ্যগাত্ ।
মরীচিমিশ্রা ঋষযো বৃহদ্ব্রতাঃ
সনন্দনাদ্যা নরদেব যোগিনঃ ॥ ১ ॥

বেদোপবেদা নিযমা যমান্বিতা-
স্তর্কেতিহাসাঙ্গপুরাণসংহিতাঃ ।
যে চাপরে যোগসমীরদীপিত-
জ্ঞানাগ্নিনা রন্ধিতকর্মকল্মষাঃ ॥ ২ ॥

ববন্দিরে যত্স্মরণানুভাবতঃ
স্বাযম্ভুবং ধাম গতা অকর্মকম্ ।
অথাঙ্ঘ্রযে প্রোন্নমিতায বিষ্ণো-
রুপাহরত্ পদ্মভবোঽর্হণোদকম্ ।
সমর্চ্য ভক্ত্যাভ্যগৃণাচ্ছুচিশ্রবা
যন্নাভিপঙ্কেরুহসম্ভবঃ স্বযম্ ॥ ৩ ॥

ধাতুঃ কমণ্ডলুজলং তদুরুক্রমস্য
পাদাবনেজনপবিত্রতযা নরেন্দ্র ।
স্বর্ধুন্যভূন্নভসি সা পততী নিমার্ষ্টি
লোকত্রযং ভগবতো বিশদেব কীর্তিঃ ॥ ৪ ॥

ব্রহ্মাদযো লোকনাথাঃ স্বনাথায সমাদৃতাঃ ।
সানুগা বলিমাজহ্রুঃ সঙ্ক্ষিপ্তাত্মবিভূতযে ॥ ৫ ॥

তোযৈঃ সমর্হণৈঃ স্রগ্ভির্দিব্যগন্ধানুলেপনৈঃ ।
ধূপৈর্দীপৈঃ সুরভিভির্লাজাক্ষতফলাঙ্কুরৈঃ ॥ ৬ ॥

স্তবনৈর্জযশব্দৈশ্চ তদ্বীর্যমহিমাঙ্কিতৈঃ ।
নৃত্যবাদিত্রগীতৈশ্চ শঙ্খদুন্দুভিনিঃস্বনৈঃ ॥ ৭ ॥

জাম্ববানৃক্ষরাজস্তু ভেরীশব্দৈর্মনোজবঃ ।
বিজযং দিক্ষু সর্বাসু মহোত্সবমঘোষযত্ ॥ ৮ ॥

মহীং সর্বাং হৃতাং দৃষ্ট্বা ত্রিপদব্যাজযাচ্ঞযা ।
ঊচুঃ স্বভর্তুরসুরা দীক্ষিতস্যাত্যমর্ষিতাঃ ॥ ৯ ॥

ন বাযং ব্রহ্মবন্ধুর্বিষ্ণুর্মাযাবিনাং বরঃ ।
দ্বিজরূপপ্রতিচ্ছন্নো দেবকার্যং চিকীর্ষতি ॥ ১০ ॥

অনেন যাচমানেন শত্রুণা বটুরূপিণা ।
সর্বস্বং নো হৃতং ভর্তুর্ন্যস্তদণ্ডস্য বর্হিষি ॥ ১১ ॥

সত্যব্রতস্য সততং দীক্ষিতস্য বিশেষতঃ ।
নানৃতং ভাষিতুং শক্যং ব্রহ্মণ্যস্য দযাবতঃ ॥ ১২ ॥

তস্মাদস্য বধো ধর্মো ভর্তুঃ শুশ্রূষণং চ নঃ ।
ইত্যাযুধানি জগৃহুর্বলেরনুচরাসুরাঃ ॥ ১৩ ॥

তে সর্বে বামনং হন্তুং শূলপট্টিশপাণযঃ ।
অনিচ্ছন্তো বলে রাজন্ প্রাদ্রবঞ্জাতমন্যবঃ ॥ ১৪ ॥

তানভিদ্রবতো দৃষ্ট্বা দিতিজানীকপান্ নৃপ ।
প্রহস্যানুচরা বিষ্ণোঃ প্রত্যষেধন্নুদাযুধাঃ ॥ ১৫ ॥

নন্দঃ সুনন্দোঽথ জযো বিজযঃ প্রবলো বলঃ ।
কুমুদঃ কুমুদাক্ষশ্চ বিষ্বক্সেনঃ পতত্ত্রিরাট্ ॥ ১৬ ॥

জযন্তঃ শ্রুতদেবশ্চ পুষ্পদন্তোঽথ সাত্বতঃ ।
সর্বে নাগাযুতপ্রাণাশ্চমূং তে জঘ্নুরাসুরীম্ ॥ ১৭ ॥

হন্যমানান্ স্বকান্ দৃষ্ট্বা পুরুষানুচরৈর্বলিঃ ।
বারযামাস সংরব্ধান্ কাব্যশাপমনুস্মরন্ ॥ ১৮ ॥

হে বিপ্রচিত্তে হে রাহো হে নেমে শ্রূযতাং বচঃ ।
মা যুধ্যত নিবর্তধ্বং ন নঃ কালোঽযমর্থকৃত্ ॥ ১৯ ॥

যঃ প্রভুঃ সর্বভূতানাং সুখদুঃখোপপত্তযে ।
তং নাতিবর্তিতুং দৈত্যাঃ পৌরুষৈরীশ্বরঃ পুমান্ ॥ ২০ ॥

যো নো ভবায প্রাগাসীদভবায দিবৌকসাম্ ।
স এব ভগবানদ্য বর্ততে তদ্বিপর্যযম্ ॥ ২১ ॥

বলেন সচিবৈর্বুদ্ধ্যা দুর্গৈর্মন্ত্রৌষধাদিভিঃ ।
সামাদিভিরুপাযৈশ্চ কালং নাত্যেতি বৈ জনঃ ॥ ২২ ॥

ভবদ্ভির্নির্জিতা হ্যেতে বহুশোঽনুচরা হরেঃ ।
দৈবেনর্দ্ধৈস্ত এবাদ্য যুধি জিত্বা নদন্তি নঃ ॥ ২৩ ॥

এতান্ বযং বিজেষ্যামো যদি দৈবং প্রসীদতি ।
তস্মাত্ কালং প্রতীক্ষধ্বং যো নোঽর্থত্বায কল্পতে ॥ ২৪ ॥

শ্রীশুক উবাচ
পত্যুর্নিগদিতং শ্রুত্বা দৈত্যদানবযূথপাঃ ।
রসাং নির্বিবিশূ রাজন্ বিষ্ণুপার্ষদতাডিতাঃ ॥ ২৫ ॥

অথ তার্ক্ষ্যসুতো জ্ঞাত্বা বিরাট্প্রভুচিকীর্ষিতম্ ।
ববন্ধ বারুণৈঃ পাশৈর্বলিং সূত্যেঽহনি ক্রতৌ ॥ ২৬ ॥

হাহাকারো মহানাসীদ্ রোদস্যোঃ সর্বতোদিশম্ ।
নিগৃহ্যমাণেঽসুরপতৌ বিষ্ণুনা প্রভবিষ্ণুনা ॥ ২৭ ॥

তং বদ্ধং বারুণৈঃ পাশৈর্ভগবানাহ বামনঃ ।
নষ্টশ্রিযং স্থিরপ্রজ্ঞমুদারযশসং নৃপ ॥ ২৮ ॥

পদানি ত্রীণি দত্তানি ভূমের্মহ্যং ত্বযাসুর ।
দ্বাভ্যাং ক্রান্তা মহী সর্বা তৃতীযমুপকল্পয ॥ ২৯ ॥

যাবত্ তপত্যসৌ গোভির্যাবদিন্দুঃ সহোডুভিঃ ।
যাবদ্ বর্ষতি পর্জন্যস্তাবতী ভূরিযং তব ॥ ৩০ ॥

পদৈকেন মযাক্রান্তো ভূর্লোকঃ খং দিশস্তনোঃ ।
স্বর্লোকস্তে দ্বিতীযেন পশ্যতস্তে স্বমাত্মনা ॥ ৩১ ॥

প্রতিশ্রুতমদাতুস্তে নিরযে বাস ইষ্যতে ।
বিশ ত্বং নিরযং তস্মাদ্ গুরুণা চানুমোদিতঃ ॥ ৩২ ॥

বৃথা মনোরথস্তস্য দূরঃ স্বর্গঃ পতত্যধঃ ।
প্রতিশ্রুতস্যাদানেন যোঽর্থিনং বিপ্রলম্ভতে ॥ ৩৩ ॥

বিপ্রলব্ধো দদামীতি ত্বযাহং চাঢ্যমানিনা ।
তদ্ ব্যলীকফলং ভুঙ্ক্ষ্ব নিরযং কতিচিত্ সমাঃ ॥ ৩৪ ॥