ശ്രീമദ്ഭാഗവതമ് ൮.൨൧

ശ്രീശുക ഉവാച
സത്യം സമീക്ഷ്യാബ്ജഭവോ നഖേന്ദുഭി-
ര്ഹതസ്വധാമദ്യുതിരാവൃതോഽഭ്യഗാത് ।
മരീചിമിശ്രാ ഋഷയോ ബൃഹദ്വ്രതാഃ
സനന്ദനാദ്യാ നരദേവ യോഗിനഃ ॥ ൧ ॥

വേദോപവേദാ നിയമാ യമാന്വിതാ-
സ്തര്കേതിഹാസാങ്ഗപുരാണസംഹിതാഃ ।
യേ ചാപരേ യോഗസമീരദീപിത-
ജ്ഞാനാഗ്നിനാ രന്ധിതകര്മകല്മഷാഃ ॥ ൨ ॥

വവന്ദിരേ യത്സ്മരണാനുഭാവതഃ
സ്വായമ്ഭുവം ധാമ ഗതാ അകര്മകമ് ।
അഥാങ്ഘ്രയേ പ്രോന്നമിതായ വിഷ്ണോ-
രുപാഹരത് പദ്മഭവോഽര്ഹണോദകമ് ।
സമര്ച്യ ഭക്ത്യാഭ്യഗൃണാച്ഛുചിശ്രവാ
യന്നാഭിപങ്കേരുഹസമ്ഭവഃ സ്വയമ് ॥ ൩ ॥

ധാതുഃ കമണ്ഡലുജലം തദുരുക്രമസ്യ
പാദാവനേജനപവിത്രതയാ നരേന്ദ്ര ।
സ്വര്ധുന്യഭൂന്നഭസി സാ പതതീ നിമാര്ഷ്ടി
ലോകത്രയം ഭഗവതോ വിശദേവ കീര്തിഃ ॥ ൪ ॥

ബ്രഹ്മാദയോ ലോകനാഥാഃ സ്വനാഥായ സമാദൃതാഃ ।
സാനുഗാ ബലിമാജഹ്രുഃ സങ്ക്ഷിപ്താത്മവിഭൂതയേ ॥ ൫ ॥

തോയൈഃ സമര്ഹണൈഃ സ്രഗ്ഭിര്ദിവ്യഗന്ധാനുലേപനൈഃ ।
ധൂപൈര്ദീപൈഃ സുരഭിഭിര്ലാജാക്ഷതഫലാങ്കുരൈഃ ॥ ൬ ॥

സ്തവനൈര്ജയശബ്ദൈശ്ച തദ്വീര്യമഹിമാങ്കിതൈഃ ।
നൃത്യവാദിത്രഗീതൈശ്ച ശങ്ഖദുന്ദുഭിനിഃസ്വനൈഃ ॥ ൭ ॥

ജാമ്ബവാനൃക്ഷരാജസ്തു ഭേരീശബ്ദൈര്മനോജവഃ ।
വിജയം ദിക്ഷു സര്വാസു മഹോത്സവമഘോഷയത് ॥ ൮ ॥

മഹീം സര്വാം ഹൃതാം ദൃഷ്ട്വാ ത്രിപദവ്യാജയാച്ഞയാ ।
ഊചുഃ സ്വഭര്തുരസുരാ ദീക്ഷിതസ്യാത്യമര്ഷിതാഃ ॥ ൯ ॥

ന വായം ബ്രഹ്മബന്ധുര്വിഷ്ണുര്മായാവിനാം വരഃ ।
ദ്വിജരൂപപ്രതിച്ഛന്നോ ദേവകാര്യം ചികീര്ഷതി ॥ ൧൦ ॥

അനേന യാചമാനേന ശത്രുണാ വടുരൂപിണാ ।
സര്വസ്വം നോ ഹൃതം ഭര്തുര്ന്യസ്തദണ്ഡസ്യ ബര്ഹിഷി ॥ ൧൧ ॥

സത്യവ്രതസ്യ സതതം ദീക്ഷിതസ്യ വിശേഷതഃ ।
നാനൃതം ഭാഷിതും ശക്യം ബ്രഹ്മണ്യസ്യ ദയാവതഃ ॥ ൧൨ ॥

തസ്മാദസ്യ വധോ ധര്മോ ഭര്തുഃ ശുശ്രൂഷണം ച നഃ ।
ഇത്യായുധാനി ജഗൃഹുര്ബലേരനുചരാസുരാഃ ॥ ൧൩ ॥

തേ സര്വേ വാമനം ഹന്തും ശൂലപട്ടിശപാണയഃ ।
അനിച്ഛന്തോ ബലേ രാജന് പ്രാദ്രവഞ്ജാതമന്യവഃ ॥ ൧൪ ॥

താനഭിദ്രവതോ ദൃഷ്ട്വാ ദിതിജാനീകപാന് നൃപ ।
പ്രഹസ്യാനുചരാ വിഷ്ണോഃ പ്രത്യഷേധന്നുദായുധാഃ ॥ ൧൫ ॥

നന്ദഃ സുനന്ദോഽഥ ജയോ വിജയഃ പ്രബലോ ബലഃ ।
കുമുദഃ കുമുദാക്ഷശ്ച വിഷ്വക്സേനഃ പതത്ത്രിരാട് ॥ ൧൬ ॥

ജയന്തഃ ശ്രുതദേവശ്ച പുഷ്പദന്തോഽഥ സാത്വതഃ ।
സര്വേ നാഗായുതപ്രാണാശ്ചമൂം തേ ജഘ്നുരാസുരീമ് ॥ ൧൭ ॥

ഹന്യമാനാന് സ്വകാന് ദൃഷ്ട്വാ പുരുഷാനുചരൈര്ബലിഃ ।
വാരയാമാസ സംരബ്ധാന് കാവ്യശാപമനുസ്മരന് ॥ ൧൮ ॥

ഹേ വിപ്രചിത്തേ ഹേ രാഹോ ഹേ നേമേ ശ്രൂയതാം വചഃ ।
മാ യുധ്യത നിവര്തധ്വം ന നഃ കാലോഽയമര്ഥകൃത് ॥ ൧൯ ॥

യഃ പ്രഭുഃ സര്വഭൂതാനാം സുഖദുഃഖോപപത്തയേ ।
തം നാതിവര്തിതും ദൈത്യാഃ പൌരുഷൈരീശ്വരഃ പുമാന് ॥ ൨൦ ॥

യോ നോ ഭവായ പ്രാഗാസീദഭവായ ദിവൌകസാമ് ।
സ ഏവ ഭഗവാനദ്യ വര്തതേ തദ്വിപര്യയമ് ॥ ൨൧ ॥

ബലേന സചിവൈര്ബുദ്ധ്യാ ദുര്ഗൈര്മന്ത്രൌഷധാദിഭിഃ ।
സാമാദിഭിരുപായൈശ്ച കാലം നാത്യേതി വൈ ജനഃ ॥ ൨൨ ॥

ഭവദ്ഭിര്നിര്ജിതാ ഹ്യേതേ ബഹുശോഽനുചരാ ഹരേഃ ।
ദൈവേനര്ദ്ധൈസ്ത ഏവാദ്യ യുധി ജിത്വാ നദന്തി നഃ ॥ ൨൩ ॥

ഏതാന് വയം വിജേഷ്യാമോ യദി ദൈവം പ്രസീദതി ।
തസ്മാത് കാലം പ്രതീക്ഷധ്വം യോ നോഽര്ഥത്വായ കല്പതേ ॥ ൨൪ ॥

ശ്രീശുക ഉവാച
പത്യുര്നിഗദിതം ശ്രുത്വാ ദൈത്യദാനവയൂഥപാഃ ।
രസാം നിര്വിവിശൂ രാജന് വിഷ്ണുപാര്ഷദതാഡിതാഃ ॥ ൨൫ ॥

അഥ താര്ക്ഷ്യസുതോ ജ്ഞാത്വാ വിരാട്പ്രഭുചികീര്ഷിതമ് ।
ബബന്ധ വാരുണൈഃ പാശൈര്ബലിം സൂത്യേഽഹനി ക്രതൌ ॥ ൨൬ ॥

ഹാഹാകാരോ മഹാനാസീദ് രോദസ്യോഃ സര്വതോദിശമ് ।
നിഗൃഹ്യമാണേഽസുരപതൌ വിഷ്ണുനാ പ്രഭവിഷ്ണുനാ ॥ ൨൭ ॥

തം ബദ്ധം വാരുണൈഃ പാശൈര്ഭഗവാനാഹ വാമനഃ ।
നഷ്ടശ്രിയം സ്ഥിരപ്രജ്ഞമുദാരയശസം നൃപ ॥ ൨൮ ॥

പദാനി ത്രീണി ദത്താനി ഭൂമേര്മഹ്യം ത്വയാസുര ।
ദ്വാഭ്യാം ക്രാന്താ മഹീ സര്വാ തൃതീയമുപകല്പയ ॥ ൨൯ ॥

യാവത് തപത്യസൌ ഗോഭിര്യാവദിന്ദുഃ സഹോഡുഭിഃ ।
യാവദ് വര്ഷതി പര്ജന്യസ്താവതീ ഭൂരിയം തവ ॥ ൩൦ ॥

പദൈകേന മയാക്രാന്തോ ഭൂര്ലോകഃ ഖം ദിശസ്തനോഃ ।
സ്വര്ലോകസ്തേ ദ്വിതീയേന പശ്യതസ്തേ സ്വമാത്മനാ ॥ ൩൧ ॥

പ്രതിശ്രുതമദാതുസ്തേ നിരയേ വാസ ഇഷ്യതേ ।
വിശ ത്വം നിരയം തസ്മാദ് ഗുരുണാ ചാനുമോദിതഃ ॥ ൩൨ ॥

വൃഥാ മനോരഥസ്തസ്യ ദൂരഃ സ്വര്ഗഃ പതത്യധഃ ।
പ്രതിശ്രുതസ്യാദാനേന യോഽര്ഥിനം വിപ്രലമ്ഭതേ ॥ ൩൩ ॥

വിപ്രലബ്ധോ ദദാമീതി ത്വയാഹം ചാഢ്യമാനിനാ ।
തദ് വ്യലീകഫലം ഭുങ്ക്ഷ്വ നിരയം കതിചിത് സമാഃ ॥ ൩൪ ॥